هل تريد التسجيل في منتديات بنوته ؟
إحصائيات المنتدى: المواضيع: , المشاركات: , الأعضاء:
إحصائيات المنتدى: المواضيع: , المشاركات: , الأعضاء:
|
|  |
| التميز خلال 24 ساعة | |||
 العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم |
المشرفة المميزه |
قريبا | بقلم :  | قريبا | قريبا |
| |||||||
 |
| | LinkBack | أدوات الموضوع | انواع عرض الموضوع |
07-15-2010, 12:19 AM
| #31 (permalink) | |||||||||
|
مستشار المؤسس ~  
| 
رد: من يحبك كثر ماأحبك أنا انا :
قمرهم كلهم  إوعدني عني ماتغيب.. تبقى هنا جنبي قريب.. محتاج أنا مثلك حبيب.. يفهم عيوني وضحكتي.. فيك إنت حلمي من زمان.. وإنت الهوا وأدفا حنان.. تلقى معاك روحي الأمان.. ياأغلى بشر في دنيتي.. غاليه بندت السياره ونزلت تقعد عالبحر، لقت لها كرسي ويلست عليه وهي مب حاسه بالي حواليها، كانت يالسه وهي تشكي للبحر حزنها وضيجها.. كانت تبا تفر همومها عالبحر بس كانت تحس البحر مليان هموم ومشاكل.. ليش يادنيا ماترحمين.. ليش تعطي باليمين وتاخذين بالشمال، عطيتيني أحسن أب وأم.. عطيتيني البيزات والبيت وكل شي، بس حرمتيني من أغلى شي فالدنيا.. حرمتيني من الصحه.. ليش ياربي ليش، إستغفر الله انا شو يالسه أقول.. هذا حكم الله وقدره، وأنا لازم أصبر على الي الله كاتبه.. (( الســــلام عليــــكم )) حست بصوت حد يسلم عليها وكأنه ياي من بعيــــــــــد، الصوت هزها وصحاها من أفكارها وهمومها.. إلتفتت وشافت الريال الي سلم واقف ويبتسم لها.. إبتسمت له بالرغم من دمعتها الي على خدها.. غاليه: وعليكم السلام.. أستاذ خالد!! شو تسوي هني..؟؟ خالد: مب إتفقنا على خالد بس.. غاليه: آسفه.. خالد، شو تسوي هني..؟؟ خالد: هذا مكاني كل يوم أقعد هني هالوقت.. بس اليوم شفت غزال سرحان محتل مكاني.. غاليه: هههههههه عيل إسمحلي اليوم سويت إحتلال على منطقتك.. خالد: المكان وصاحبه تحت أمرج.. كم غاليه عندنا. غاليه: الله يخليك.. تعال إقعد ولا تبيني أروح وإنت تقعد بروحك.. خالد يلس عالطرف الثاني: لالا أبدا خليج مرتاحه، ولو تبين أنا الي بمشي.. غاليه: لا بالعكس.. خذ راحتك..!! سكتت غاليه ورجعت تتطالع البحر.. وخالد يلس يطالعها ولاحظ الحزن الي تارس قلبها ومبين على ويها.. كسرت خاطره، كل هالجمال والعز وتغزيها كل هالهموم والمشاكل.. خالد: غاليه.. غاليه رسمت إبتسامتها الرسميه: نعم..!! خالد انصدم منها: معقوله ياغاليه.. ليش جي..!! غاليه مستغربه: شو..!! خالد: كل شي فيج تغير.. ضحكتج.. كلامج.. أسلوبج.. برائتج..!! غاليه: أنا مثل ماأنا ماتغيرت..!! خالد: غاليه الي عرفتها من سنتين مب هي غاليه الي يالسه جدامي.. غاليه منصور ضحكتها تنسمع من آخر الدنيا، كشختها ومرحها وسوالفها تحبب الكل فيها.. والحين ماشوف غير شبح إبتسامه بالغصب تظهر على ويها.. غاليه وهي تتنهد: شو تباني أسوي، وإنت شايفني جدامك بدون مستقبل ولا أحلام.. كل أحلامي ماتت جدامي وأنا واقفه أتفرج عليها.. كل شي ضاع وأنا.. وأنا ضعت..!! خالد: لا ياغاليه.. الدنيا ماتوقف عند تحطم الأحلام.. الدنيا تستمر وتمشي، ونحن عايشين في إمتحان من رب العالمين والي يخسر فالإمتحان يخسر دنيته وآخرته.. غاليه بخصه في حلجها: خالد إفهمني.. أنا مهما درست وتعلمت وإشتغلت وشغلت أكبر المناصب فالبلاد بظل.. بظل وحده مريضه اليوم أو باجر بتموت.. خالد: بسم الله عليج من طاري الموت.. غاليه (( إعمل لدنياك كأنك تعيش أبدااا.. وإعمل لآخرتك كأنك تموت غداا..)) غاليه: مافهمت..!! خالد: يعني كلنا بنموت فيوم من الأيام صح.. المريض وغير المريض، أنا يدي مريض من هو توه شباب، يعني من كان أبوي بعده فالعشرين.. تخيلي الحين يدي مريض من أكثر من ثلاثين سنه.. وسبحان الله للحين عايش.. غاليه: سبحان الله.. خالد: الي أبي أقوله لج.. الإنسان مايعيش لنفسه بس، يعيش للي معاه أكثر من نفسه.. أبوج كل يوم يكلمني ودمعته على خده، يقولي غاليه يالسه تموت جدامي وأنا مب قادر أسويلها شي.. غاليه: حرام.. بس أنا أسولف معاهم وأضحك علشان ما أحسسهم بشي.. خالد: إنتي بس تسولفين وتضحكين لكن شوفي نفسج، إوقفي جدام المنظره لو دقيقه وسألي نفسج هل انا غاليه الأوليه..؟؟ شوفي لبسج.. شوفي مكياجج.. شوفي ضحكتج الي ماتت.. غاليه نزلت راسها وشوي وبتصيح.. خالد: وأهم من هذا كله.. شوفي كلامج، بالأول بابا وماما.. والحين أميه وأبويه، أبوج واااااايد مضايج من هالكلمه، يقولي تحسسني كأني السبب فالي قاعد يصير لها.. علشان جي غيرت معاملتها معانا.. غاليه: فديت أبويه والله مب قصدي أزعله.. بس أنا........ خالد: إنتي فكرتي في أبوج وكيف بترضينه، وطلعتي من المستشفى وبديتي تتكلمين وتسولفين معاهم بس... بس بدون نفس بدون روح.. غاليه مسحت دمعتها: خلاص ياخالد.. إوعدك إني أعيش مثل قبل وأحسن بعد.. وأسعد أبويه وأميه.. خالد: إن شاءالله يارب.. وأنا كل يوم أقعد هني لو تبين تقولين لي أي شي وتحكيلي أنا مستعد أسمعج.. قامت غاليه وودعته وراحت لسيارتها، ركبت السياره وراحت على طول على البيت وهي تبا تغير أشياء وايد بحياتها، تبا تسعد الغير.. تبا تعيش أحلى سنين عمرها ولو كانت الأخيره.. دخلت البيت وماشافت حد فيلست تدورهم.. غاليه: بـــابــــــــا... مــــامـــــــــا وينكم..!! طلع لها أبوها من غرفة الأكل وهو مصدوم من الي يسمعه.. أبوغاليه: أنا هني بابا تعالي.. غاليه راحت له وحظنته: فديـــــــتك إشتقت لك مووووت.. أبوغاليه: فديت روحج وانا بعد إشتقت لج.. غاليه: ووينها فاطمه المنصوري، أكيد يالسه تاكل ولا تترياني.. أم غاليه: هههههههههههههه تعالي هني ياأم لسانين.. وراحت غاليه وباست أمها وحظنتها بقووو أم غاليه: هههههههه بسج ذبحتيني.. أبوغاليه: يلسي فديتج تعشي معانا.. غاليه: أممممممممم أوكي بس بشرط.. أبوغاليه: عيوني لج.. إنتي آمريني بس.. غاليه وهي تيلس على ريول أبوها: أبا أقعد على ريول بابا وماما تعشيني مثل ماكنتوا تسوون وأنا صغيره.. أبوغاليه: هههههههه ولو إنج بتكسرين ريولي.. بس يالله كل شي علشانج يهون.. تعالي يافاطمه أكلي هالدلوعه.. أم غاليه: ههههههههههههه والله هالبنيه ماتكبر أبد.. ويلسوا يتعشون وهم يضحكون ومستانسين للتغير الي بدا على غاليه، وإن شاءالله كل حياتها تكون ضحك وفرح.. | |||||||||
  |
|
07-15-2010, 12:19 AM
| #32 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم الجزء التاسع عشر.. ياحبيب الروح بكتب لك وصاتي .. إن غديـت الـيوم فـي حـبك جتيـل.. أنشــدك بــالله لـي طـفت برفــاتي.. لاتخـــلي دمــعــة عيونــك تسيــل.. لاتـذكــرني بــحــبك يــاغــنــاتــي.. لاتذكـرنـــي بماضيــك الجــمــيــل.. فــي صــدى ذكــراك بــقزر حياتي.. مــستحيــل أحــب غيــرك مستحيـل.. اليوم عرس جاسم وفتون، الحفله كانت بسيطه وعاديه في بيت بوجاسم.. العايله كلها حظرت وربعهم المقربين.. فتون كانت واااايد حلوه فستانها الأبيض فخم وحلو من إختيار شروق وشذا.. والحفله كانت فالحوش برع لأن الجو بعده بارد وحلو.. غاليه ومرام كانوا يالسات مع فتون عالكوشه يسولفون معاها ويضحكونها.. فتون تهمس لغاليه: ماتحسيني دبه بالفستان..؟؟ غاليه: هههه إنتي من بونج دبه.. فتون: لا أقصد علشان.... مرام: إنتي لاتفكرين فهالشي وإن شاءالله محد بيلاحظ.. فتون: إن شاءالله.. غاليه: بتروحون الفندق..؟؟ فتون: هيه.. جاسم حاجز لنا هناك، أنا قلت له خل نقعد فالبيت قالي لا الفندق أحسن.. غاليه: أحسن لكم.. فتون: وباجر بنسير أبوظبي بنقعد أسبوع وبنرجع.. مرام: الله يهنيج يارب.. وإستمرت الحفله للساعه 12 بالليل، وبعدها دخل جاسم وسلم على حرمته ويلس معاها عالكوشه.. وبعد نص ساعه نزلوا من على الكوشه ودخلوا غرفتهم يتجهزون لروحة الفندق.. أم غاليه: غاليه فديتج يالله نروح.. غاليه: إن شاءالله ماما.. بس صبري بحط باقة الورد عند غرفة المعاريس وبرجع.. غاليه دخلت البيت وهي لابسه شيلتها بس مب متغشيه، طلعت فوق وحطت الباقة عند غرفة جاسم ونزلت تحت.. وهي على الدري تمشي بسرعه طلع لها هشام الي كان يركب الدري ومنزل راسه وكانت شوي وبتدعم فيه.. غاليه: هشام ماشفتك..!! هشام: ههههههههه انا شفتج وإنتي تحطين الورد شكلج مثل الحراميه الي أول مره بحياتها تسرق.. غاليه: ههههههههههه ماعليه تتطنز علي.. أنا مستعيله ولا كنت عرفت دواك عندي... هشام وهو يمشي عنها: good night baby غاليه نزلت وراحت لأمها وروحوا عالبيت، فالبيت كان أبوها يالس ينتظرهم وهو يطالع التلفزيون.. أبوغاليه: لا جان يلستوا عند المعاريس في حجرتهم تونسونهم.. أم غاليه: نحن عادي بنسويها بس قالولنا عيب.. غاليه: هههههههههههههههههه أبوغاليه: زين يوم تعرفون العيب.. غاليه: بابا بعدها الساعه وحده.. إحمد ربك العرس فالبيت ولا لو فصالة العرس والله مانظوي إلا ثلاث الفير.. أم غاليه: ويمكن أربع بعد.. أبوغاليه: وليش مستعيلات تريقوا عندهم وبعدين تعالوا.. غاليه: ههههههههه مره ثانيه إن شاءالله.. يالله أنا بطلع غرفتي تصبحون على خير.. راحت غاليه غرفتها وبدلت وحطت راسها عالمخده بس الرقاد اليوم مخاصمنها.. ياربي شو هالأرق اليوم.. قامت غاليه وفتحت الكمبيوتر صار لها أكثر من شهر مادخلت النت، ويوم بطلت المسن لقت أحمد أون لاين.. قام قلبها يدق طبول.. ياربي أنا من صارت السالفه مادشيت المسن ولاسويت له بلوك.. ويلست غاليه تتطالع النك نيك مالته وهي سرحانه وتتذكر كل الأشياء الحلوه الي كانت من بينهم.. مزيون بوظبي: غــــاليه..!! غاليه تيبست في مكانها، شو أرد عليه شو أقوله..؟؟ غالية أبوها: أمممم أحمد..!! مزيون بوظبي: لا.. أنا هيا أخته، أحمد رايح عوافي من يومين.. ولارجع للحين. غاليه إرتاحت شوي يوم عرفت إنه مب أحمد، هي تعرف هيونه دايما أحمد يحكيلها عنها، وتدري إنه قايلها عن علاقتهم.. غالية أبوها: هلا هيا اشحالج..؟؟ مزيون بوظبي: الحمدلله على كل حال.. غالية أبوها: مايدري عنج أحمد ولا هزبج على يلستج على جهازه.. مزيون بوظبي: ههههههههههه لا مابيقول شي.. لأني قايلة له بستخدمه أبا أزدهب من النت لعرسي.. ولقيت المسن شغال.. غالية أبوها: والله خلاص بتعرسين..!! الله يوفقج يارب.. مزيون بوظبي : مشكوره حبيبتي.. عقبالج.. وتندمت إنها كتبت هالكلمه لأنها فلحظه نست مرض غاليه، حتى غاليه من شافت الكلمه تيبست في مكانها.. وسكتت ولاردت عليها.. مزيون بوظبي: فديتج بخليج الحين بكمل شغلي.. غالية أبوها: الله يحفظج الغاليه.. أمممممم سلمي على أحمد.. مزيون بوظبي: يوصل غناتي.. باي.. وبندت غاليه وراحت وإنسدحت عالسرير.. باربي ليش فتحت الكمبيوتر بس علشان أضايج في نفسي.. خلاص من باجر ببيعه وبشتري غيره مافيه ولا شي عن أحمد.. نامت غاليه وهي تفكر كيف بتقدر تنسى أحمد الي أول شخص تعيش معاه تجربة حب من طرفين.. | |||||||||
| |
|
07-15-2010, 12:20 AM
| #33 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم صارت عاده عند غاليه إنها كل يوم بالليل تروح البحر تغير جو، تشوف هناك المحامي خالد الي ماشاءالله عليه حبوب ويحب يسمع للغير.. غاليه تقعد ترمس وتشكي له الحال.. وهو يسمعها وأحيانا ينصحها، أحلى شي فيه إنه إبتسامته ماتفارق ويهه.. ودايما ردوده لأي سؤال موجوده وبالمنطق.. اليوم غاليه يلست جريب الساعه عالبحر بس خالد اليوم مب موجود، وغاليه تشرب العصير وتسولف للبحر.. ويوم ملت وحست إنه خلاص مب ياي اليوم شالت أكياس الأكل الي بيدها وقامت تبا تفرهم فالزباله.. واول ما لفت تبا تفر الوصخ إلا وتشوف في ويها خالد، بس للأسف إنتبهت متأخر..!!!!!!!!!! وكانت النتيجه حمام بارد من علبة الماي.. غاليه: انا آآآآآآآآآسفه والله مب قصدي.. سووووووري خالد..!! خالد: هههههههههههه والله توني متسبح، حضرتج شامه فيني ريحه..!! غاليه وهي من الخاااطرمفتشله: السموووووحه والله ماشفتك.. خالد: لا والله عادي.. هذا ماي بس.. ولا في شي ثاني..!! غاليه: لالا بس ماي.. صبر بييب لك كلينكس.. خالد: تعالي تعالي ماله داعي.. الحين بينشف فالهوا.. غاليه: أبيييييه والله فشيله.. خالد: يابنت الناس لاتكبرين السالفه.. عادي تحصل في أحسن العائلات.. غاليه: أمممممم ليش متأخر اليوم..!! خالد: إسمحيلي بس اليوم كنت معزوم على العشا في ميلس ربيعي، وتأخرت عندهم شوي.. غاليه: اهاااا خلاص عيل مسمووووح.. خالد: شكلج بتروحين..!! غاليه وهي تفر فالزباله: هيه والله تأخرت عالبيت.. وأبوي من يومين صاير شيبه عسى مانتأخر أنا وماما دقيقه إلا وحشر الدنيا.. خالد: هههههههههههههه الله يخليه لكم إن شاءالله.. غاليه: بشوفك مره ثانيه.. باي.. خالد: الله يحفظج مع السلامه.. رجعت غاليه البيت وهي تفكر في خالد، ياربي أنا ليش كل يوم يالسه أشوفه وأكلمه.. مب كفايه أحمد والي صار معاه، مافيني على تجربه يديده وأنا عارفه إنه كل هذا مامنه فايده.. وقلبي قام يدق بقوه وللحين مب راضي يوقف.. سلطان: بسم الله عليج.. قومي خليني أوديج الدختر.. غاليه تتسند عالباب: لالا برتاح وبصير زينه.. سلطان: أي زينه الله يهديج.. إنتي بكبرج يالسه ترتجفين.. غاليه صج كانت ترجف ومب قادره توقف، وبدون إحساس نزلت عالأرض ويلست وإيدها على قلبها.. سلطان: غاليه.. غاليه شو فيج..؟؟ غاليه بصوت مخنوق: إزقر لي أمي.. سلطان بسرعه.. ركض سلطان ينادي فاطمه الي يات ركض ولبست بنتها العبايه وركبوا مع سلطان السياره وطاروا بها عالمستشفى.. | |||||||||
| |
|
07-15-2010, 12:21 AM
| #34 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم في المستشفى.. أم غاليه وسلطان كانوا يالسين ينتظرون الدكتور يظهر لهم ويطمنهم على غاليه، بعد شوي دخلوا عليهم أبوغاليه وأبولؤي ومشعل.. أبوغاليه: فاطمه شو صار للبنيه..؟؟ أم غاليه: مادري طاحت وسلطان زقرني وعلى طول يبناها هني والدكتور للحين ماطمنا.. ومع نهاية جملتها إنفتح الباب وظهر الدكتور مع الممرضه والدكتور عطا الممرضه تعليماته وراحت.. أبوغاليه: بشر يادكتور عسى بنتي مافيها شي..!! الدكتور: تطمن إن شاءالله خير.. بس ضغطها كان وايد مرتفع وأنا عطيتها إبرة وإن شاءالله كلها عشر دقايق وبتاخذونها معاكم.. أم غاليه: الحمدلله الحمدلله.. أبوغاليه: الحمدلله.. بس ليش مرتفع ضغطها.. ووينه الدكتور راشد..؟؟ الدكتور: الدكتور راشد إجازة اليوم، ولاتخاف بنتك مافيها إلا العافيه بس لازم تديرون بالكم عليها.. أبوغاليه دخل على بنته وشافها يالسه تعدل شيلتها وهي واقفه وعاطيته ظهرها.. أبوغاليه: سلامات حبيبي.. شو صار لج..!! غاليه راحت وطاحت في حظن أبوها.. ويلست تصيح بهدوء.. أبوها حظنها وهو ساكت، كان متوقع مثل هالحالات الي بصيب بنتها من بعد التجربه الفاشله الي مرت بها.. غاليه: بابا.. بروح البيت..؟؟ أبوغاليه يمسح على شعرها: هيه فديتج الحين بنروح.. أم غاليه دخلت عليهم وحظنت بنتها وهي تصيح.. غاليه: أول مره فطيم تصيح علي.. أم غاليه: ولو ماصحت عليج بصيح على منو..!! أبوغاليه: خلاص عاد خلونا نروح البيت وهناك صيحن إلين تشبعن.. ورجعوا البيت وهم يتحمدون لغاليه بالسلامه.. رجعت غاليه لغرفتها وهي شايله اللوحه وعلقتها في مكان حلو وبارز فالغرفه علشان كل حد يدخل يشوفها.. وحست إنها تعبانه وتبي ترقد.. وحطت راسها ونامت لليل بدون أي إحساس بالدنيا.. وعالساعه تسع المسا قامت على صوت أمها وهزها لها، لنها كانت خايفه عليها وايد رقدت اليوم.. غاليه: خلاص ماما الحين بسبح وبصلي وبنزل تحت.. نزلت غاليه وشافت امها وأبوها يالسين يلعبون مونوبولي.. غاليه: هههههههه شكلي رقدت ورجعت الأيام لعشرين سنه ورا.. أم غاليه: أبوج يتحرا عمره يقدر يغلبني.. أبوغاليه: أونج عاد.. نسيتي أيام قبل يوم كنت أغلبج.. وتيلسين تصيحين علي للفير.. غاليه: ههههههههههههه بابا كيف كانت تصيح..؟؟ أبوغاليه يلس يقلد فاطمه وهو يحط يده على ويه ويرافس بريوله ويصيح بصوت عالي.. غاليه: هههههههههههههههههه أم غاليه: ماعليج منه، الحين بغلبه وبتشوفينه كيف بيصيح.. غاليه: زين عيل.. وين العشى..؟؟ أم غاليه: تو الناس على العشا.. صبري شوي.. غاليه: خلاص أنا بظهر أغير جو، وبعدين برجع.. أبوغاليه: وين سايره بهالليل..!! خلج هني يالسه.. غاليه: بابا أبا أتمشى بالسياره.. وينها يدووه..!! أم غاليه: سلطان وداها السوق.. تبا تشتري ألعاب لعيال خلف.. غاليه: خلاص أنا بسير بلبس عبايتي وبتمشى لي ساعة زمان برع ومن أرجع ألاقي العشا جااهز.. أبوغاليه: هع دخلي السجن.. خخخخخخخخخ أوكي حبيبتي سيري ونحن بنجهز لج العشا.. غاليه: ههههههههه لا أوصيك عليها.. إغلبها.. أم غاليه: خلج إنتي بنت أبوج.. سيري أشوفج سيري.. وراحت عنهم غاليه ولبست عبايتها وصورت اللوحه الي رسمها لها مشعل عالموبايل وطلعت.. ساقت غاليه سيارتها للبحر بس مانزلت لأنها ماشافت خالد.. وخذت لها لفتين عالشوارع ويوم رجعت شافت سيارته فبركنت على جهة ونزلت وراحت له.. غاليه: السلام عليكم.. خالد: وعليكم السلام.. هلا وغلا غاليه وهي تقعد على الطرف الثاني: إشحالك خالد عساك بخير.. خالد: أنا بخير الحمدلله، إنتي طمنيني على صحتج عساج مرتاحه.. غاليه: الحمدلله على كل حال.. من زمان وإنت هني..؟؟ خالد: لا والله.. توني واصل بعدني ماكملت خمس دقايق.. غاليه: زين والله.. ويلسوا يسولفون تقريبا ربع ساعه عن أمور الدنيا والأهل وأي شي.. غاليه: أمممممممممم ممكن أسألك سؤال..؟؟ خالد: أكيــــد سألي الي تبينه.. غاليه: هو سؤال شخصي ولو تعتبره خاص جدا لاترد علي.. خالد: هههههههه خلاص سأليني.. غاليه: ليش مافكرت بالزواج طول حياتك..؟؟ يعني ماشاءالله عليك كل شي فيك حلو.. غريبه للحين ولا وحده قدرت تخترق حياتك وقلبك..!!!!!! لاحظت غاليه إنها من سألته السؤال تغيرت ملامح ويهه.. يعني كأنه تذكر شي جديم أو إنصدم من السؤال.. غاليه: آآآسفه مب قصدي أضايجك.. خالد رجع يبتسم لها: لا عادي.. بس أنا مب من النوع الي أتكلم وأفتح قلبي لأي حد.. غاليه: خلاص إعتبرني اليوم طبيبتك النفسيه وصارحني.. خالد: ههههههه خلاص بصارحج.. بس بتتعبين.. قصتي طويله.. غاليه: أفااا.. إنت ياما سمعتني ولا إشتكيت.. تتوقع الحين أنا بمل ولابتشكى منك..!! خالد: خلاص عيل سمعي السالفه.. غاليه: تفضل.. خالد: قبل سبع سنين من الحين، كان عمري 23 سنه وكنت توني متخرج من الجامعه وناوي أدور لي وظيفه وأكمل ماجستير.. غاليه: حلوووو... وبعدين..!! خالد: وكنت محير بنت خالتي من صغرها لأنا كنا نحب بعض من سنين طويله.. وهي كانت توها مخلصه ثانويه وأنا مخلص جامعه.. وإتفقنا نكمل مشوار حياتنا مع بعض.. أنا أساعدها في دراستها الجامعيه وهي تهيء لي الجو المناسب للشغل والتحضير للماجستير.. وسكت شوي يتذكر الذكريات الي مرت عليها سنين طويله.. خالد: ملجنا وحددنا موعد العرس.. وكانت هي تتشرى حق العرس وحق الجامعه مره وحده.. وخلاص مب باجي عن العرس غير شهر ونص يوم قررت فجأة إنها ماتبي تاخذ فستانها إلا من لبنان.. والكل حاولوا فيها تغير رايها بس هي مصره لأنها شافت ربيعتها ماخذه من لبنان بسعر حلو وكان فخم وروووووعه.. وماكانت تدري إنها رايحه للموت بريولها.. هالمره سكت فترة طويله وكل علامات الحزن على ويهه، وحسته غاليه مب قادر يكمل.. غاليه: لو ماتبي تكمل برايك........... خالد ولا كأنه سمعها: ومر أسبوع على روحتها هي وأمها وأخوها الصغير، وكانت كل يوم تكلمني وتطمني على أخبارها، وآخر مكالمه قالت لي إنها بترجع على أول طيارة الصبح وتبيني أستقبلها.. وسهرتها معاي عالتلفون للفير وبعدها سكرت ورقدت بعد ماظبطت المنبه علشان أقوم أستقبلها.. خالد وقف وعطى غاليه ظهره يلس يطالع البحر وهو يتذكر ذكريات أليمه على قلبه.. خالد: ومن رقدت حلمت بحلم فظيع، حلمت خطيبتي راكبه عاليبل وأنا تحت أناديها، وكانت تقولي لو طحت بتيودني؟؟ قلت لها عمري كله فداج، وفجأة زلقت ريولها وطاحت من فوق وأنا أحاول أمسكها ومب قادر ولقيتها طايحه يمي وجسمها كله دم ولاتتحرك.. خالد غمض عيونه وسكت، وغاليه الي خلاص عرفت باجي السالفه قامت دموعها تنزل.. خالد: وقمت من رقادي وأنا أصرخ وأستغفر ربي وأتشهد.. وفجأة رن التلفون والمتصل كان عمي أبو خطيبتي، حطيت يدي على قلبي وقلت شي صاير.. ومن شلت التلفون سمعت صوت عمي يصيح وهو يقولي راحوا كلهم.. الغاليه راحت البنيه راحت ولدي راح.. خالد محد بقالي فالدنيا كلهم راحوا عني.. غاليه ماتحملت ويلست تصيح من خاطرها، وخالد مثل الي يالس ويكلم نفسه مب حاس بوجود غاليه ولا بصياحها.. خالد: مرت ثلاث أيام العزا مثل الكابوس الثجيل، من وصل خبر سقوط الطيارة إلين ثالث يوم فالعزا، والناس داخلين طالعين يعزون، وأنا حاولت كثر ما أقدر إني أتصبر وأقوي إيماني، والي كان صج منهار هو عمي حليله.. خسر حرمته وعياله بلحظه، ماكان عنده غير حرمته وهالإثنين وراحوا عنه.. غاليه: الله يرحمهم إن شاءالله.. خالد رجع يقعد وهو يطالع غاليه الي تمسح دموعها.. خالد: ماقدرت أقعد فالبلاد أكثر عن جي.. حسيت نفسي كل يوم يالس أموت.. فقررت إني أسافر أمريكا أكمل دراستي هناك.. وكل إجازة أتلعث بشي علشان ماأرجع وأتذكر الماضي.. غاليه بصوت مخنوق: وعمك شو صار عليه..؟!!!! خالد: عمي..!! عمي ليومج هذا حابس نفسه فالبيت.. من يوم رجع من المقبره دافن أعز ثلاث أشخاص بحياته ماظهر من بيته.. كلنا حاولنا فيه بس محد قدر عليه.. وأنا كل يوم أمر عليه وأشوفه شو يبا.. خالد يلس يطالع غاليه الي منزله راسها.. وتنهد بكل قوته.. خالد: ومن ست سنين وأنا أعاني من الكابوس الي ياني قبل لايوصلني خبر وفاتهم.. كل يوم والله ياغاليه كل يوم أقوم وأنا أصرخ وأحاول أنقذها بس ماشي فايده.. قاعد أشوفها كل يوم تموت جدامي وأنا مثل الصنم مب قادر أرجعها للحياة.. غاليه: الله يرحمها.. خالد رجع يطالع غاليه شوي وهي رفعت راسها وإلتقت عيونهم ببعض.. وإبتسم لها خالد.. خالد: ومن سنه ونص تقريبا.. ماتكرر هالحلم لي أبداااا.. غاليه: والله..؟!!!!!! خالد وهو يبلع ريجه: تعرفين من متى..؟؟ من يوم الي قابلتج فيه.. غاليه من الصدمه فجت حلجها ولا قدرت تسكره.. خالد: أنا فالبدايه قلت لج أنا مب من النوع الي أتكلم وأظهر الي بخاطري. علشان جي سكت.. ولاصارحتج، بس قلبي دق لج من اليوم الي دخلتي فيه علينا مكتب أبوج وإنتي ماتدرين إني موجود.. غاليه إحمرت خدودها يوم تذكر هالسالفه.. خالد: هذاك اليوم مادري شو صار فيني.. أنا شفت بنات أشكال وألوان بس كلهم ماهزوا فيني شعره، إلا إنتي ياغاليه.. غاليه بصعوبه: إشمعنى أنا..!!!!! خالد: مادري إسألي قلبي الي حبج..!! بس ماصارحتج ولا حاولت أتقرب منج، صح أبوج قالي من أول يوم عن مرضج وإنج ماتقدرين تتزوجين، بس والله ياغاليه ماهمني المرض وكنت مستعد آخذج وأعيش معاج طول العمر.. المهم نكون قراب من بعض.. بس حسيت إنه بقلبج حد.. حسيتج تحبين علشان جي سكت ولابديت بأول خطوه تجاهج.. غاليه: خالد.. إنت تستاهل كل خير، وحرام تضيع عمرك مع وحده مريضه لو عاشت اليوم مابتعيش باجر.. خالد: مب بس إنتي.. أنا مب ضامن عمري إني أعيش لباجر.. بس مع ذلك الحياة تستمر.. غاليه: ولو.. تخيل عمرك تعيش دون يهال بدون أطفال يملون عليك البيت..!! خالد: كفايه تملينه إنتي.. غاليه: إنت حاس بعمرك شو يالس تقول..!!!! خالد: هيه حاس.. وأنا أباج تفكرين عدل، لأني أبا ردج قبل أبوج.. غاليه منصور أنا أحبج وأبا أتقدم لج.. شو رايج..؟؟!!!! غاليه وهي بعدها مصدومه: بس كلهم تركوني من عرفوا بمرضي ليش إنت مصر..؟؟؟ خالد: لأني كبير وعاقل، وعارف إنه مب اليهال هم الي يبنون البيت، الي يبنيه الحب والتفاهم بين الزوجين.. غاليه وهي متردده: بس أنا.. بس أنا كنت أحب واحد، وبصراحه للحين مب قادره أنساه.. خالد: أدري.. كنتي تحبين أحمد.. بس لو أحمد يحبج ربع حبي كان تخلى عن كل شي وركض وراج.. بس هو فكر في نفسه وأهله ومستقبله قبل لايفكر فيج.. غاليه: لا أحمد حبني من كل قلبه.. خالد: وأنا ما أنكر هالحقيقه.. أحمد للحين يموت عليج.. بس ماقدر ياخذج لأن في أشياء ثانيه تمنع هالإرتباط.. غاليه: وإنت عادي تاخذ وحده تحب غيرك..؟؟ خالد: غاليه الين وصلتي عمري بتعرفين تميزين بين الحب قبل الزواج وبعده.. أنا ياغاليه أحبج وأوعدج إني أسعدج بعمري كله.. وإنتي لو وافقتي علي بخليج مب بس تحبيني إلا تموتين علي، لأن عارف طاقة الحب الي بداخلي بوزعها على البلاد كلها وبتزيد.. غاليه يلست سااااكته ومب عارفه كيف ترد عليه، منطقه صحيح، بس أنا مستحيل أضيع مستقبله.. خالد: أنا عارف الي بتفكرين فيه، إنج بتضيعين حياتي وإني ممكن آخذ غيرج وأييب منها عيال و....و..... غاليه: صـــح.. خالد: بس ياغاليه أنا لو ماأخذتج ماباخذ غيرج.. أنا عشت 30 سنه وحيد.. ومستعد أعيش باجي عمري وحيد، بس لو إنتي بتشاركيني حياتي وبتملين وحدتي والله ثم والله أخلي أيامج كلها سعاده وحب.. غاليه أول مره تشوف خالد الرومانسي المحب.. تحسه إنسان ثاني، إنسان إنولد للحب وبس.. غاليه ماعرفت كيف ترد عليه ولا شو تقوله، ففضلت الإنسحاب، وإنها بتفكر وبترد له خبر.. غاليه: تصبـــح علــى خيــر.. وهو خلاها تروح ولامنعها، لأنه عارف إنها تبا تكون بروحها فهاللحظه.. راحت غاليه وهي تفكر فكلام خالد.. هل ممكن إنها ترتبط فيه وتعيش أيامها معاه.. هل ممكن إنه يسعدها مثل ماوعدها.. وهل هي بتقدر تسعده..؟؟؟؟؟؟؟؟؟؟ ميت سؤال يدور في بالها.. بس الجواب لازم يكون نعم... أو لا.. ووصلنا لمفترق الطريق في حياة غاليه.. تتوقعون بترضى في خالد.!!!!!!!!. وأحمد شو بيصير فيه..؟؟؟؟؟؟ وشو النهاية الي تتوقعونها لغاليه.. سعيده.. حزينه.. وحيده.. | |||||||||
| |
|
07-15-2010, 12:22 AM
| #35 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم الجزء العشرين.. خلاص يعني كل شَيّ انتهى وراح خلاص يعني ما بقينا حبايب يعني وعودك كلها كانت مْزاح والاّ انت ما لك في المحبّه رغايب وين العهود ووين لحظات الافراح يعني تلاشت مع هبوب الهبايب القلب بعدك من له اليوم يرتاح من بعد ما هو في محبّتْك ذايب ياما على شانك تحمّلت الجراح وياما جروحي من صدودك عطايب غاليه من وصلها خبر خطوبة أحمد من زميلته فالشغل وهي حالتها حالها، مضيعه الوقت والزمن.. لاتعرف ليله من نهارها، من قالها ناصر عن الخبر إبتسمت له وقالت: يازين ما إختار سلمى طيبه وتستاهله.. وهي بداخلها سيف يقطع قلبها.. كيف أضحك وأبارك له وأنا قلبي مثل الطير المذبوح بهالخبر.. غاليه: بابا انا اليوم برقد عند شروق.. أبوغاليه: ترقدين......؟!!!!!!!! إنتي ماسويتيها وإنتي صغيره، شو عندج اليوم..؟؟!! أم غاليه: هههههههههههه عندهم حفلة توديع العزوبيه.. غاليه: فطيم بليز العيز يمتنعون.. أم غاليه: عيز حيلج يالفيل.. غاليه: من حرة قلبج.. فديتني أضعف عنج.. أبوغاليه: بسكم من الظرابه، عنبوا عايش مع يهال لا الحرمه ولا البنيه عقال.. غاليه: عالأقل أنا صغيره، العتب على العيوز المعرسه وتناجر اليهال.. أم غاليه: أنا عيوز يالفاره.. أبوغاليه: ياربي من هالثنتين.. لو ماسكتن بسير لي بيت ثاني.. أم غاليه: على وين إن شاءالله..!! غاليه: بابا تزوج عليها.. والعروس عندي.. مره فالك طيب.. أم غاليه: يالسباااله لاتحطين السالفه في راسه.. أبوغاليه: شو شايفتني ياهل تحط السالفه في راسي، يوم أقولج ياهل عصبتي علي.. أم غاليه حاست بوزها ولفت بويها عنهم.. وغاليه راحت وحضنت أبوها الي كان يالس عالأرض.. غاليه: أوكي بابا..!! أبوغاليه: خلاص حبيبتي روحي لبيت خالتج، بس لاتطولين يوم واحد بس.. غاليه: لا أقصد عن العروس.. شو رايك تاخذ لك لبنانيه شرات عمي.. والله بتريحك.. أبوغاليه: ههههههههههههه والله إنج سوالف، أولا منو قالج عمج مرتاح، لو مرتاح كان خلاها تحمل منه.. بس هو مايبي يهال منها.. وثانيا مافيني حد يغتالني وأنا راقد.. غاليه: إنزين إنت بعد ماتبي يهال.. تزوجها ولاتييب عيال.. أم غاليه: هيه تزوج عساها تحرقك بليلة عرسك.. أبوغاليه تضايج من الكلمه: أفااا وأهون عليج..!! غاليه: ماما حرام ليش جي..!! أم غاليه: وأنا هنت عليك تحرق قلبي.. أبوغاليه: أنا ماظهرت من لساني.. غاليه هي الي ترمس.. والله يافطيم كسرتي بخاطري.. أم غاليه: يعلني أفداك والله مب قصدي، بس السالفه تعور قلبي.. أبوغاليه: الحين أنا ماسويتها وأنا شباب، بيي الحين وأفضح نفسي.. لاحشى محد يسد مكان الغاليه.. غاليه: باربييييييييييه.. نبا نفرقهم ردوا يتيمعون.. أبوغاليه: يالشريره يالله قومي زهبي أغراضج وعلى بيت خالتج.. غاليه وهي تقوم: لازم بتوزعني.. تبا البيت يخلا لك.. أبوغاليه وهو يسحب حرمته ويلمها: هيه أبا أعيد شهر العسل.. أم غاليه: ههههههههه عيب عليك قوم عني.. غاليه: خل عنج.. أونج مستحيه، والود ودج تلزقين أكثر.. أم غاليه وهي تلزق بمنصور: كيفي ريلي.. بنشوفج شو بتسوين يوم بييج الريل.. أم غاليه من خلصت جملتها حست بسكين تنغرس في قلبها..!! انا شو الي قلته..؟؟ ليش زل لساني.. وتوقعت مثل ريلها إنه غاليه تتأثر بالكلمه، بس غاليه ضحكت بصوت عالي وقالت: لا فديتج، ريلي بيحطني على راسه أنا غاليه بنت منصور المنصوري.. غاليه طلعت على غرفتها ويلست تجهز أغراضها وتحس كلمة أمها عاديه ولاهزتها.. هي للحين ماقررت بالنسبه لخالد.. بس هي صلت إستخاره وتحس إنها مرتاحه للسالفه، ويمكن خطوبة أحمد كانت الدافع الأقوى لموافقتها بس للحين ماخبرته بقرارها.. وقررت إنها تبتعد عنه هالفترة، إلين يخلص عرس شروق، وبعدها بتصلي إستخارة مرة ثانيه وبعدين بترد عليه.. وصلت غاليه بيت خالتها ولقت البنات يالسات ومتجهزات للسهره، وشروق مب موجوده.. غاليه: عيل وينها صاحبة الجلاله..؟؟ مروى: ههههههه راحت داخل تكلم الحب.. غاليه: قلنا لها بسها من السوالف بيملون من بعض، بس شو أقول راسها يابس.. ميعاد: هههههههه خليها تتهنى حلوه هالأيام.. غاليه: وإنتي شو تسوين هني، قلنا الحفله للعزباوات والعوانس والمطلقات والأرامل.. المتزوجات ماااانبيهن... ميعاد: وعععععع الي يسمع يقول القمه العربيه.. أقصاها سهرة وممله بعد.. غاليه: لو ممله شو الي يايبنج هني.. يالله شيلي بنتج وعلى بيتج.. ميعاد: مب يالسه على راسج، انتظر ريلي الحين بيني.. شذا: إنزين خبروني شو بنسوي اليوم.. غاليه: أنا بسير فوق وبحطي شنطتي وبنزل لكم أقولكم عالجدول.. ميعاد: هه فلحتوا يوم غلوووي بتمشيكم على هواها.. غاليه: هههههههه من حرة قلبج.. محد قالج تعرسين وتخلينا.. طلعت غاليه فوق وحطت أغراضها في غرفة شروق الي كانت منسدحه على بطنها وتكلم زايد.. شروق برقه: لا زايد ماحب جي.. لاتخليني أزعل عليك.. زايد:............................. شروق: هههههههههههه صج والله.. وشو قالت لك بعد.. غاليه: إحم إحم.. ممكن أقطع على الكناري رمستهم.. شروق: غلووي متى ييتي..؟؟ غاليه: قبل شوي.. وانسدحت معاها عالسرير: عادي عادي كملي سوالفج.. شروق بدلع: هههههههههه يالمااضخه قومي إطلعي برع.. غاليه: أويييييه منو الي يرمس.. منو هالدلوعه الي صوتها رقيق.. خبري فيج حشرة مب مستواج الرقه.. زايد: هههههههههههههههههه شروق: وإنت تضحك بعد، خلاص بند وبكلمك بعد شوي.. بندت شروق ومسكت المخدة ويلست تضرب فيها غاليه.. غاليه: ههههههه هيه هـاي هي بنت خالتي الي أعرفها.. شروق: يالمااااااااااصخه خلينا نتدلع شوي.. لاحقين عالشقا.. غاليه: إنزين يالله ننزل تحت الكل هناك.. شروق: وميعاد هناك ولا روحت..؟؟ غاليه: غسلت شراعها والحين بتروح.. شروق: ههههههههه يالله ننزل.. وبدت السهره في بيت بوجاسم.. بدوها بترتيب أغراض العروس، علقوا الملابس والبدل والعبايات عالعلاقه الكبيره علشان الكل يشوفها.. وبعدين يابوا المناديس الكبيره المزينه والمعدله وبدوا يحطون فيها الأغراض، أول مندوس كان وردي حطوا فيه العطور والدخون.. وثاني مندوس لونه أحمر وحطوا فيه الذهب.. والثالث كان بنفسجي وكان فيه الكريمات شغلات الحمام.. غاليه: شو الي ناقص..؟؟ شروق: واايد أشياء ناقصه عندنا شغل وايد.. الحين أباكم تخلون هالأغراض كلها في غرفتي إلين باجر.. وبعدها بنظهرهم وبنرتبهم في ميلس الحريم.. مروى: ومتى بيون أهل الفجيره..؟؟ شروق: زايد قالي هو وميثه ونواري وعمووه بيون بعد يومين بس ماببيتون هني، يعني للمغرب وبيردون.. غاليه: وأغراضج متى بتودينها عندهم..؟؟ شذا: أمي تقول قبل العرس بيومين.. شروق: وأنا أبا أخليهم هني.. ترانا بنبيت أول ليله فالفندق، وباليوم الثاني ونحن رايحين عالفجيره بمر أسلم على أهلي وباخذهم معاي.. مروى: وليش كل هذا..!! خليهم ياخذون الأغراض ويرتبونها لج.. شذا: مشكلتها ماتحب حد يرتب لها.. يعني لها مزاج فالترتيب.. غاليه: والله إنج متفيجه.. بتكونين عروس ومالج بارض للترتيب.. وبعدين تعالي إنتوا مابتسافرون..؟؟ شروق: ماعنده إجازه بس أسبوع فبنروح البحرين بس.. غاليه: إنتي طرشي الأغراض والي شايله همهم لاتطرشينهم ولا حطي عليه قفل.. مروى: هههههههههههههههههههههه شروق وهي مستحيه: شو قصدج..؟؟ غاليه: أونج يعني.. أعرف وين عوقج.. الشنطه الي فيها بالي بالك خليها معاج هني والباجي طرشينهم، ولو ماتبين حطي لها قفل وقولي لميثوه ترتب الشنط بس هالشنطه لاتقربها.. مروى: وميثووه بيظرب فضولها وبتكسر القفل وبتشوف الي فيها.. هههههههههههه شروق: وتبوني أطرشها بعد.. شذا: لاتعورون راسكم معاها أختي وأعرفها زين.. مابتسوي أي شي من الي إنتوا تقولونه.. غاليه: كيفها هي الي بتتبهدل.. بس قولولي فتونه وينها ماشفتها من ييت..؟؟ شروق: أكيد مع جسوم.. المهم غلووي شفتي العبايه العيناويه الي فصلتها في بوظبي.. غاليه: رهييييييبه يبيلي وحده مثلها.. وكملوا البنات سوالف وحشره لنص الليل.. على الساعه 12 ونص دخلت عليهم فتون وشكلها مبين عليه التعب.. غاليه: هلا حبيبتي.. شو فيج تعبانه..؟؟ فتون باست غاليه ويلست معاها: لايعه جبدي.. غاليه: سيري بعيد لاترجعين علي.. فتون: ههههههه لا مب لهالدرجه.. بس يالسه أنتظر جاسم وآخر شي إتصل وقال أنا برقد فالمخيم عند الربع.. إنزين جان قلت من وقت.. كنت بسهر هني ومعاكم.. شذا: فجي عن الريال خليه يتنفس.. فتون: وأنا متى منعته..؟؟ قصدي ليش مايخبرني من وقت.. شذا: أخوي من بونه حر نفسه، بتيين إنتي على آخر الزمن بتمشينه على كيفج..!! شروق: شذوووي ويعة إن شاءالله.. غاليه: هذاك أول حر نفسه الحين هو مسؤول من حرمه ومب زين يخليها لنص الليل بروحها.. شذا: هذا لو ماخذنها بإقتناع، مب غصبا عنه.. شروق: صج حيوااانه.. قومي سيري حجرتج الله ياخذج.. شذا: مب على كيفج تطرديني.. شروق سحبتها من إيدها: لمن بتتعلمين الأدب تعالي إيلسي ولا الحين مالج يلسه وحرمة أخوج تعتذرين منها قبل لاتروحين.. شذا: يخسي هالوصخه أعتذر لها.. مب كفايه فضيحتها قبل العرس.. شذا ماحست إلا بكف على ويها.. تحرته من أختها بس كانت فتون هي الي ضربتها.. شذا: أنا تضربيني يالخايسه يالي هلج ماربوج..!!!!! شروق سحبت أختها وراحت معاها برع، وفتون طاحت على غاليه ويلست تصيح.. فتون: ياليتني خليت أبوي يذبحني ولا عشت لهاليوم.. غاليه: لا تقولين جي.. هذي مراهقه وماتعرف شو تقول.. فتون: دايما تنغزني بالرمسه.. دايما تجرحني، وجاسم مايحبني ولايسويلي أي إعتبار، أنا والكرسي واحد.. والله تعبت تعبت.. غاليه يلست تهديها ومروى طلعت عنهم برع راحت ولقت أم جاسم يالسه تهزب شذا.. أم جاسم: وقسما بالله إني بزعل عليج طول عمري لو زعلتي حرمة أخوج بكلمة مره ثانيه.. شذا وهي تصيح: أنا ماسويت شي هي الي تبا تمشينا على كيفها.. شروق: حرام عليج البنيه ماسوت شي، هذا ريلها ومن حقها تحاتيه وتتشره علي.. شذا: برايها تولي أنا الغلطانه الي يلست معاها.. وركضت على غرفتها وسكرت على نفسها الباب ورقدت.. شروق: أميه والله فشلتنا جدام البنات.. مروى: شروق.. ترى فتون وايد مضايجه.. أم جاسم: من حقها.. ولا منو بيسمع هالكلام وبيسكت.. شروق: الله يهديها شذا لازم تخرب علينا.. أم جاسم: خلاص إنتوا إطلعوا الغرفه فوق.. ولاتكلمون شذوي بروحها بتهدا.. راحوا البنات على غرفة شروق ويلسوا يرتبون باجي الأغراض. غاليه وفتون يرتبون على جهة وشروق ومروى فالجهة الثانيه.. وكانوا ساكتين وكأن الكلام خلص من الدنيا.. شروق: ياربيييه نسيت الجلابيات ماوديتهن البخار.. مروى: تستهبلين وين محطيتهم..؟؟ شروق: في غرفة شيوومه.. خليتهم هناك يوم يبناهم من السوق ونسيت آخذهم، والدبه حجرتها زباله وأكيد ما إنتبهت لهم.. مروى: قومي خلينا نسير ناخذهم، وبندق لهشام يمكن يرضى يوديهن البخار الحين.. غاليه: يالله الحين الغرفه فضت، قوليلي متعوده شذا تعاملج جي..؟؟ فتون: هي أساسا ماتكلمني وايد.. ويوم أمر حذالها تعطيني نظرة سخريه، علشان جي ماقمت أظهر وايد.. غاليه: وخالتي والباجيين..؟!! فتون: كلهم زينين بس مشكلتي مع شذا.. غاليه: وجاسم شو معاملته معاج..؟؟ فتون: جاسم هذا عاد أكبر لغز.. أيام ألاقيه ماشي أحسن منه حب ورومانسيه ودلع، وأيام تلاقينه عصبي ويلعني و..... غاليه: شو..؟؟؟ فتون: مره ضربني.. وقالي لولا الي في بطنج ماكنت إطالعت وحده مثلج بايعه شرفها.. غاليه: الله ياخذه.. ليش جي..!!!! فتون: صدقيني حد يوزه علي.. هو مب دوم جي، الله يسامحهم بس.. غاليه: الله يعينج الصراحه.. ودخلوا عليهم البنات ورجعوا لسوالفهم وترتيباتهم.. وعلى الساعه 12 ونص نزلوا تحت يغيرون جو شوي.. أم جاسم: خلصتوا ترتيباتكم..؟؟!!!! غاليه: هلكتنا بنتج مابقى شي ماشرته.. فتون: خليها تتهنى تراها عروس.. أم جاسم: متى بترقدون..؟؟ غاليه: بعدنا تو الناس عالرقاد.. أم جاسم: فتون حبيبتي جاسم مابيي اليوم..؟؟ فتون: لاعمووه قال بيرقد عند ربعه.. أم جاسم: خلاص عيل ترقدين عند البنات اليوم.. فتون: إن شاءالله.. كملوا البنات سهرتهم للساعه 2 الفير.. وبعدها راحوا يرقدون في غرفة شروق الي نامت هي وفتون عالسرير، بس غاليه ماتحب حد يرقد معاها فرقدت على الأرض.. الساعه تسع ونص قامت غاليه وشافت شروق راقده وفتون محد، قامت وتغسلت وبدلت ثيابها ونزلت تحت.. شافت فتون يالسه مع عمتها يسولفون.. غاليه: صباح الخير.. الكل: صباح الورد.. وسلمت على خالتها ويلست معاهم.. أم جاسم: وينها شروق..؟؟ غاليه: خالووه من متى شروق تقوم من وقت.. أم جاسم: بتفضحنا هالبنيه باجر يوم بتعرس، مابتقوم لهم إلا الظهر.. فتون: بتتعود إن شاءالله.. أم جاسم: فديتها فتون من الصبح تقوم وتتريق معاي.. غاليه: منو مثل فتون شيخة البنات.. دخل عليهم جاسم.. جاسم: السلام عليكم.. الكل: وعليكم السلام.. أم جاسم: حمدلله عالسلامه.. زين ظويت من الرغده.. جاسم بدون نفس: يعني أنا وين سرت إلا عند ربعي.. أم جاسم: وماتقول وراك حرمه وعيب تخليها بروحها.. جاسم: طول عمري أرقد برع البيت.. إشمعنى الحين لأ..!! أم جاسم: الحين وراك حرمه ومسؤوليات.. فتون: عادي عمووه خليه.. هو يرتاح مع ربعه.. جاسم: الحين تسوين نفسج طيبه وإنت شاحنتنها علي طول اليوم.. فتون: حرام عليك والله ماقلت لها شي... جاسم: جب ولا كلمه، والحين قومي وراي داخل.. غاليه: جاسم شوي شوي عالبنيه.. جاسم: إنتي مايخصج.. ولاتتدخلين من بينا.. أم جاسم عصبت عليه: إنت شو ماتحشم حد.. جاسم وهو يسحب حرمته من إيدها: حرمتي وأنا حر فيها.. محد له شغل فيني.. ودخل عليهم فهاللحظه أبو جاسم الي سمع كل السالفه.. أبوجاسم بصوت قوي: جاسم.. خل البنيه.. جاسم ترك إيد فتون وإبتعد عنها، أبوه إقترب ومسح على راس فتون بحنان.. كانت كاسره خاطره، هي صح غلطت بس مب معناته يعاملها بهالقسوة.. أبوجاسم: مالك حق تعامل بنت الناس بهالطريقه.. جاسم: كيف مالي حق مب حرمتي ولا أنا غلطان..!! أبوجاسم: حرمتك تعاملها برقه بأدب مب تيرها من يدها مثل الصخله.. أنا عارف إنك مضايج من طريقة زواجكم.. وأعرف إنك تقول عليها إنها غلطت بس إنت بعد غلطت وراها.. جاسم: أنا ريال.. أبوجاسم: يعني يوم بتجابل ربك مابيحاسبك؟؟ ولا بيقول لا هذا ريال بحاسب البنيه بس.. جاسم نزل راسه وسكت.. أبوجاسم: لو وحده من خواتك غلطت هالغلطه بترضى ريلها يعالمها بهالطريقه.. الي صار إنت سببه يوم ركضت ورا البنيه وخطبتها وقصيت عليها وعلى أهلها.. شوف البنيه كيف تعبانه منك.. جاسم رفع راسه وشاف فتون وهي تصيح وحاظنه عمتها.. أبوجاسم: كل ذنبها إنها حبت واحد مايستاهل الحب.. جاسم: خلاص يابوي أنا أوعدك أغير معاملتي لها.. أبوجاسم: وعدت أبوها تحسن لها وشو النتيجه..!! أنا مابي وعودك، فتون بتقعد في غرفة شروق هالفتره إلين الله يسهل عليها وتولد.. جاسم: بس يابووي............ أبوجاسم: ولا كلمه.. خلاص مب الين تولد.. أبيها تبتعد عنك كم يوم لين تهدا النفوس.. راح أبوجاسم ووراه حرمته، وغاليه وفتون طلعوا غرفة شروق الي كانت بعدها خااامده.. غاليه: الحمدلله يوم عمي صلح الموقف.. فتون: بس كيف بعيش بعيد عن ريلي.. حرام هو مابيتحمل معتمد علي في كل شي.. غاليه: مثل ماقال عمي.. متى ماحس بجيمتج بييج يزحف.. فتون تنهدت وطاحت على السرير وغمضت عيونها.. غاليه قامت وراحت لشذا ودقت عليها الباب بس ماردت عليها، فنزلت تحت وشافتها تتريق.. غاليه: صباح الخير.. شذا بدون نفس: صباح الغلا.. غاليه: ههههههه مالها نفس وبعد تقول صباح الغلا.. ممكن أتريق وياج..؟؟ شذا إبتسمت لها: حياج.. قعدت غاليه تاكل وهي ساكته، كان ودها تقول أي شي بس ماتدري ليش فضلت الصمت.. شذا: أنا آسفه إني خربت عليكم ليلتكم.. غاليه إبتسمت: خربتي ليلتج.. نحن سهرنا وإستانسنا.. شذا: مادري ليش أنا معاديتها..!! هي ماسوت لي شي، بس من أشوفها أحب أعلق عليها.. غاليه: أنا مابنصحج بس بقولج شي، حطي نفسج في مكانها، بترضين أهل ريلج جي يعاملونج..؟؟ شذا: أكيد لأ..!! غاليه: عيل كيف تبهدلين بنت الناس وإنتي تدرين الدنيا دواره.. شذا: والحين شو أسوي الكل معصب علي..؟!! غاليه: بسيطه سيري لفتون وتسامحي منها وإبدي صفحه يديده.. ولاتقولين كرامتي وخسي.. صدقيني بتكسبينها أخت كبيره.. وشروق بتظهر هالأسبوع من بيتكم، يعني إنتي محتاجه للي تفهمج.. قامت شذا وراحت الصاله وشافت أمها وحرمة أخوها يالسين يسولفون.. شذا راحت وباست أمها ويلست تتطالع فتون.. فتون: الله يخليج لاتعقين علي رمسه كفايه الي صار اليوم.. شذا راحت لها وباستها على خدها وهي مستحيه.. شذا: أنا آسفه على كل شي طلع مني من ييتي بيتنا لليوم.. فتون تمت تتطالعها وهي متفاجأة شو الي صار لها وغير مزاجها.. فتون: مسموحه فديتج إنتي مثل أختي الصغيره.. وحظنوا بعض وفتون يلست تصيح.. غاليه: ولييييييه بدينا فصل يديد من الصياح.. أم جاسم: ههههههههه غاليه فديتج سيري وعي العروس النايمه، الساعه الحين عشر ونص بسها رقاد.. غاليه: ولو إني أشك إنها بتقوم بس من عيووووني بوعيها.. راحت غاليه فوق لشروق وتفاجأت بهشام الي ظاهر سابح ولابس روب الحمام.. غاليه: هههههههه والله شكلك يضحك بالروب.. هشام وهو مستحي: جب إنتي جب.. إجلبي ويهج.. غاليه بدلع: أفااااا هشام بإرتباك: وين سايره..؟؟ غاليه حست إنها أحرجته: بسير بوعي العروس.. هشام وهو يروح عنها: أمحق عروس.. بتفضحنا باجر when she married, she will sleep to after noon غاليه: ههههههههه كلنا قلنا نفس الجمله.. الله يهديها إن شاءالله.. وراحت عنه ودخلت الغرفة وشافت شروق ترتب السرير وهي سابحه ومتعدله.. غاليه مستغربه: إنتي شروق ولا قرينتها..!!!!!!!!!! شروق بدون نفس: هه هه هه زايد إتصل وقال إنهم الحين يايين.. غاليه: أهااااا علشان الشوك الي فالورد بحب الورد.. شروق: شو قصدج يالفيله..!! غاليه: تتحملين نشة الصبح علشان خاطر عيون زيووودج.. شروق: أففففففففففففففففف شي ريوق..؟؟ غاليه: هيه إنزلي وبتشوفينهم يالسين يحشون فيج.. ونزلوا البنات وشافوا هشام مع أمه ياكلون وفتون وشذا محد، وطبعا غاليه كانت حاكيه حق شروق عن التطورات الي صارت.. شروق: صباح الحب لعايلتي الي بفارقها بعد ستة أيام.. أم جاسم: صباح النور.. هشام: أحلى صباح للي بنرتاح منها for ever شروق: لافديتك قاعده على قلبك.. غاليه: شرووقه حبيبي أنا برجع البيت لأني مواعده ماما أوديها عند عمووه فجر.. شروق: خلاص قطيني فالصالون.. غاليه: كيف تطلعين وإنتي تعرفين ميثووه بتيي..؟؟ شروق: تعالي نسيت.. خلاص بستقبلهم وبروح أنا وياهم.. غاليه خلتهم وطلعت فوق ترتب شنطتها ويوم نزلت لقت هشام واقف ينتظرها عند باب الغرفه.. غاليه: بسم الله خوفتني.. هشام: بسم الله على قلبج.. غاليه: تدور حد..؟؟ هشام: أممممممممم هيه.. إنتي..!! غاليه: خير.. هشام: ليش مستانسه..؟؟ غاليه: حرام أستانس يعني..!!!! هشام: لا مب قصدي بس وايد مرحه وفرفوشه.. غاليه: شرووقه أغلى من أخت ووايد فرحانه لها.. هشام: خلاص برايج سيري.. غاليه: وإنت موقفني علشان هالسبب..!! هشام: ههههه شو أسوي وايد أهتم بالغير.. غاليه وهي مب مقتنعه: الله يعينك على هالطيبه الزايده.. وروحت غاليه على البيت وشافت أمها تنتظرها.. غاليه: صباح الخير.. أم غاليه: صبار النور حبيبتي.. غاليه: وينه بابا.. أم غاليه: كالعاده هزبني وراح الدوام.. غاليه: زين يسوي فيج.. يالله قومي نسير لعمووه.. أم غاليه: ماتبين ريوق..؟؟ غاليه: لا أكلت في بيت خالتي.. وراحت غاليه توصل أمها لعمتها ويلسوا عندها للظهر.. | |||||||||
| |
|
07-15-2010, 12:24 AM
| #36 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم  مر أسبوع عرس شروق على خير.. يوميا البنات مطيحات عندها وهن مرتبشات ودق ورقص.. واليوم الجمعه ليلة العرس البيت كان فاضي مافيه غير ابو جاسم وحرمته وجاسم وحرمته والخدم.. أم جاسم: فتون متى بتسيرين الصالون..؟؟ فتون: بعد شوي.. جاسم بيوديني.. أبوجاسم عطى ولده نظره.. وجاسم فهم عليه.. جاسم: أكيد بوديج، لو ماأودي حرمتي الحلوه منو بودي.. أم جاسم: ولاتنسى في طريجك تييب أختك شروق من الصالون لأنها قالت لي بتخلص العصر.. وعلى المغرب البنات وصلوا من الصالون وشافوا شروق وغاليه بالغرفه يالسين يتجهزون لروحة الفندق.. شذا: روووووعه شكلج.. فتون: ماشاءالله عليج ياشروق رهيبه طالعه.. شروق: الله يخليكم لي.. بعد زيدوا في المدح.. غاليه: بس بس لحد يعطيها ويه هالبنيه.. وأنا شو رايكم فيني أينن صح.. شيماء: إنتي وااااااايد حلوه.. غاليه: حبيبتي إنتي.. شذا: بصراحه غلوووي دايما تغلبينا.. شو هالفستان الحلوو..!!! غاليه: حياكل مني حته..!! خخخخخخخخ فتون: حتت مب حته وحده.. أم جاسم الي دخلت عليهم: يالله بنات أنا بسير الفندق مع خالتكم، وإنتوا تجهزوا وهشام وجاسم بييبونكم هناك.. شروق: أوكي ماما.. أم جاسم: فتون إقري عليها قبل لاتظهرون.. فتون: إن شاءالله عموووه.. وبعد ساعه من التجهيزات والتحضيرات كل البنات ركبوا السيايير، غاليه وشروق وفتون ركبوا مع جاسم.. وشذا وشيماء مع هشام.. ووصلوا الفدق وراحوا غرفة العروسه يتجهزون لنزلتها.. وعلى الساعه 11 نزلت شروق لصالة العرس.. وكانت دخلتها بسيطه وحلوه، دخلت قبلها شذا وهي ماسكه مسكة العروس وعلى موسيقى ناعمه وجدامها بنتين صغار شايلين شموع.. ووصلوا الين الستيج.. وبعدها بدت أغنيه ثانيه.. أغنية راشد الماجد (أقبلت) وكانت مع دخلة شروق.. أقبلت ياقدرة الله في حلاها شمعة الدنيا ضوت ليلة العمر.. أقبلت والكل يمشي من وراها وإنثنى من زينها ليل السهر.. هي صبا شمس تعلت في سماها هي ملاذ الأرض في وقت السحر.. من شذاها تاخذ الندى من شذاها.. لادخون ولاعبير ولاعطر.. مشت شروق بكل رقه وهدوء..لين وصلت لشذا باستها وخذت عنها المسكه وركبت الستيج ويلست عالكوشه.. ومن يلست قاموا البنات يسلمون عليها ويباركون لها.. وإشتغلوا بالرقص والربشه للساعه وحده، وبعدها قالوا المعرس بيدخل.. ميثه كانت مزهبه أغنيه خاصه منها إهداء لأخوها.. ودخل زايد وباس حرمته على جبهتها ويلس معاها يصورون.. ميثه: زيووود متى البيبي بيوصل..؟؟ زايد: الشهر الياي.. شروق: بسم الله علي.. وراي دراسه.. نوره: هههههههههه والله إنج ماتستحين ياميثووه.. زايد: أقولكم تراني تعبت من اليلسه وهالحريم مايشبعون مطالع.. ميثه: يالسين يقارنون منو أحلى.. خخخخخخخخخ شروق: طبعا أنا.. زايد: إنتي غزالي الي مالج مثيل.. شروق إحمرت خدودها ولفت الجهة الثانيه وشافت شذا حاضنه أمها ويصيحون.. شروق: نواري نادي أمي.. ميثه: لالالا يالسات يصيحن وأخافج تخربين المكياج.. وبعد نص ساعه نزلوا المعاريس يبون يروحون، ومسكتهم أم جاسم الي مسحت دموعها عن تصيح بنتها.. أم جاسم: زايد وصيتك بشروق تحطيها في عينك تراها بجري ولاعمره حد رد لها طلب.. وتحملها تراها شوي دلوعه، بس العشرة الي من بينكم بتقربكم من بعض إن شاءالله.. زايد باس عمته على راسها وقالها: إن شاءالله لاتوصين حريص.. أم جاسم لفت على بنتها: وإنتي ياشروق تحطين زايد في عيونج وتسوين له كل الي يبيه، ولاتخلينه أبدا أبدا يشتكي منج.. وحافظي على بيتج وأسراره.. شروق ماتحملت وحظنت أمها ويلست تصيح.. والكل وراها إشتغلوا بالصياح.. فمسك زايد حرمته وطلع معاها قبل لاتستوي كارثه.. | |||||||||
| |
|
07-15-2010, 12:24 AM
| #37 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم غاليه قررت تروح الشركه تشوف أبوها وتقول لخالد قرارها.. وهي بالطريج تذكرت أحمد ويلست تدعي إنها ماتشوفه ولايحس بوجودها.. والأفضل إني ما أروح لناصر أبدا لأنه أكيد بيكون عنده.. غاليه على طول راحت لمكتب أبوها وشافته مع خالد بروحهم، فسلمت على أبوها ويلست.. وخالد كان على أعصابه وقلبه يدق. يحس غاليه يايه تعطيه الخبر الأخير هيه.. أولأ..!!!!!! بس هي أبدا ما إطالعته بس يوم سلمت عليه.. يمكن تخاف أبوها يلاحظ..!! أو إنها بترفضني علشان جي مستحيه تتطالعني..!!!!! ياربي كيف أعرف السالفه وأبوها هني..!!!!!! أبوغاليه: غلووويه حبيبي سيري عند ناصر وبناديج يوم بخلص.. غاليه توهقت: لا بابا مالي نفس أروح له.. خلني هني.. أبوغاليه: إنزين سيري عند وحده من البنات فالمكاتب.. أنا عندي شغل وايد.. وكل شوي أطالع هالغزال الي فويهي وألخبط.. خالد: ههههههههههه غاليه: لا والله.. تغازلني..!! بخبر عليك المدير.. أبوغاليه: هههههههه لا خلاص تووووبه.. غاليه: خلاص أنا بيلس بعيد عنكم بس إطلب لي شاي حليب.. أبوغاليه: من عيوني ياعيوني.. غاليه مسحت على عينه: أموت في عيونك.. ويلست غاليه تقريبا نص ساعه وهي تشرب الشاي وتلعب بالموبايل وتتصفح المجلات الإقتصاديه.. أبوغاليه: ههههههههه خالد شو رايك تسير تودي هالأوراق عن ويهي لأني تعبت وأبا أرتاح.. وبيلس شوي مع بنوتي.. خالد: إن شاءالله.. أنا بسير مكتبي وبرجه لكم بعدين.. غاليه تهمس لأبوها: بابا أنا بسير الحمام.. أبوغاليه: أوكي فديتج.. سيري وأنا بنتظرج هني، وبطلب لنا شاي ثاني.. طلعت غاليه وشافت خالد واقف مع أحمد يطالع ملف، غاليه نشف الدم الي في جسمها كله.. وأحمد رفع راسه وشافها ولاقدر يتحرك.. أحمد وهو يبلع ريجه: ش.. شخبارج غاليه..؟؟ غاليه وأونها مب مهتمه: زينه.. هيه صح مبروك.. أحمد إبتسم بدون نفس: الله يبارك بحياتك.. وتموا ساكتين وكل واحد واقف وخالد يالس يوقع الأوراق الي بالملف ومحترق من الموقف.. خالد: خلاص خلصت.. خذ هالملف لباسم سكرتيري وهو بيكمل لك الباجي.. خذ أحمد الأوراق وراح.. وراح خالد لغاليه الي كانت يالسه تتطالع أحمد وهو يمشي.. خالد: شو فيج..!! غاليه بدون إحساس: ولا شي.. أنا..أنا يايه علشانك.. خالد أخذ نفس: أدري.. والحين قوليلي شو قرارج..؟؟ غاليه: أي قرار..؟!!!! خالد حس بضيج: لهالدرجه شوفتج لأحمد لخبطت كيانج.. غاليه إنصدمت من الكلمه بس نزلت راسها وسكتت وهو حس إنه لازم يصلح الموقف لأنه مب في صالحه.. خالد: غاليه إرفعي راسج.. رفعت غاليه راسها وشاف الدمعه على طرف عينها.. خالد: أنا أعرف إنه أحمد صار ماضي.. والي فيج الحين ربكة اللقاء من بعد الفراق.. وإن شاءالله بتتخطينه.. غاليه: آسفه.. بس أول مره أشوفه من إفترقنا من شهرين.. خالد إبتسم لها: عادي.. وذكرياتج لها حق عليج.. والعشرة ماتهون إلا على ولد الحرام.. غاليه إستانست إنه إنسان متفهم.. حتى الغيره الي بداخله مابينها لها.. وحسسها كأنه شي عادي ومن حقها.. بس مادري هل قراري الي إتخذته صحيح أو لأ..!!!!!!!! خالد: والحين بسرعه خبريني قبل لايدورنا أبوج..!! غاليه بإستهبال: شو أخبرك..؟؟ خالد قرص عينه في عينها: غاليه المنصوري.. أتقبلين بي زوجا لك على سنة الله ورسوله.. غاليه ضغطت بأسنانها على شفايفها ونزلت راسها.. خالد: المستحى وتنزيل الراس مال بنات أمس.. بنات اليوم غير، عطيني إجابتج الصريحه.. غاليه: هههههههههههه أنا.. أنا عندي سؤال.. خالد: تفضلي.. غاليه: مابيي اليوم الي بتقولي فيه.. خاطري في بيبي.. خالد وهو يمسح على لحيته: لا.. لأني أولا ماعرف أتعامل مع اليهال..وثانيا كفايه إنتي بيبي ودلوعه.. أبلي نفسي بياهل ثاني ليش.. غاليه حطت إيدها على خاصرتها: ياسلااااام يعني أنا بلوه.. خالد بهمس: أحلى بلوه.. غاليه عطته ظهرها ومشت.. خالد: تعالي ماعطيتيني الرد..!!!! غاليه عطته نص ويها: الراي راي أهلي.. لو وافقوا أنا ماعندي مانع.. خالد حس نفسه طاير من الفرحه.. وراح لمكتبه بس ماقدر يقعد فيه، فرجع لمكتب العم منصور وشاف غاليه تبا تظهر.. خالد: تو الناس.. بعدنا ماضيفناج.. غاليه: ههههههه شربت كوبين شاي بسني.. أبوغاليه: خلاص فديتج سيري البيت وأنا بييكم بعد ساعتين.. غاليه: بــاي.. | |||||||||
| |
|
07-15-2010, 12:24 AM
| #38 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم رجع أبو غاليه من الشركه على الساعه 2، وكان مبين عليه الضيج شوي.. بس محد قاله شي.. يلس تغدا وراح الغرفه يريح، لحقته فاطمه ويلست معاه عالسرير وهو سرحان مايعرف وين الله حاطه.. أم غاليه: منصور.. شو فيك من رجعت وإنت متلخبط..!! أبوغاليه وهو حاس بضيجه بصدره: مادري يافطيم صار شي اليوم وأنا محتار منه ومب عارف كيف أتصرف.. أم غاليه: خبرني عسى خير إن شاءالله..!! أبوغاليه: الواحد منا لو ياله معرس لبنته يفرح وانا أشيل الهم.. أم غاليه يودت على قلبها: مــنو..؟؟ أبوغاليه: المحامي خالد.. أم غاليه: خــــالد..!!!!! هو مايعرف عن حالة غاليه..؟؟ أبوغاليه: بلى يعرف بس اليوم خطبها مني.. ويقولي إنه من شافها وهي عايبتنه ويتمناها زوجه له بالحلال.. أم غاليه: كيف..؟؟ وليش يبيها وهو يعرف إنه لو أخذها مابيقدر إييب عيال ويربيهم..!! أبوغاليه: قلت له.. قالي اليهال آخر همي.. ولا أبي شي غير غاليه.. وقلت له ليش ماتبي الي يشيل إسمك من بعدك بعد عمر طويل، قالي مابي غير غاليه.. أم غاليه: يعني مصر..؟؟ أبوغاليه: فوق ماتتصورين.. أم غاليه: بس أنا مب مستعده أخسر بنتي.. أبوغاليه: قلت له.. وقالي بسوي كل الإحتياطات علشان ماتحمل.. ووالله أحطها بعيوني.. بس زوجها لي.. أم غاليه: لو مايحبها ماكان تمسك بها بهالقوه.. أبوغاليه: كل الي دروا عن مرضها خلوها وجرحوها في قلبها، إلا هو مصمم يوصل لها.. أم غاليه: وأنا ماتمنيت لبنتي إلا واحد مثله.. أبوغاليه: يعني موافقه..؟؟ أم غاليه: لو وافقت غاليه.. بعطيها له وأنا مطمنه عليها.. أبوغاليه: خلاص عيل العصر بنكلمها والي الله كاتبه بيصير.. على الساعه أربع ونص فاطمه ومنصور دشوا على بنتهم غرفتها، وكانت منسدحه عالسرير وتكتب في دفترها الصغير.. غاليه: لالا.. شي صاير فالدنيا يوم أحلى أبوين فالدنيا داخلين علي.. أبوغاليه: ههههههه هالبنيه محد يغلبها.. أم غاليه: طالعه على أبوها.. غاليه: لو ماأطلع على بابا حبيبي أطلع على منو..!! أم غاليه: أممممم علي أنا مثلا..!!!! غاليه: ياربي هالحرمه إشكثر تغااااار.. أبوغاليه: هههههههههه الله لايحرمني منكم إنتوا الثنتين.. غاليه: آآآآآآآآآمين.. أنا مضمونه الحمدلله.. أم غاليه: شو قصدج أنا الي مب وفيه..!! أبوغاليه: بدينا بالضرابه.. غاليه: لاقصدي إني بعنس هني مب متزوجه.. بس شكلها فطيم بتطفش من العيشه وبتخلعك.. أم غاليه: أدريبج تبيم تطفشيني بس أنا يالسه عله على قلبج.. أبوغاليه: على طاري العرس.. غاليه..!! غاليه هني حست إنه خالد كلم أبوها.. بس مالحق اليوم الصبح عطته موافقتها.. الظاهر هو مستعيل وكلم باباتي على طول.. غاليه: نعم..!! أبوغاليه وهو يطالع حرمته ورجع يطالع بنته: أممممم في واحد اليوم متقدم لج.. غاليه ماعرفت تضحك تستحي تبكي.. المهم إنها نزلت راسها.. أبوغاليه: أدري إنج بتستغربين بس هذا الي صار.. المحامي خالد كلمني اليوم بعد ماسرتي وخطبج مني.. غاليه سوت نفسها مستغربه: وهو مايعرف عن مرضي..؟؟ أبوغاليه: بلى.. وهو شارنج ومب هامنه شي.. يبيج إنتي وبس.. غاليه: بس أنا مابي أحرمه من العيال.. وهو من حقه يصير أب، وبيلقى الي أحسن عني وتسعده طول عمرها.. أم غاليه: أبوج قاله كل هالكلام وزياده بس هو مصر عليج.. غاليه الريال والنعم فيه ومستعد يسوي كل شي علشانج.. غاليه وقفت وراحت بعيد عنهم، هي كانت مقتنعه بس ماتدري ليش كلام أهلها خلاها تخاف وتحتار.. أبوغاليه: بشو يالسه تفكرين..؟!! غاليه: أقول يعني.. لو في يوم تمنى الياهل، شو ممكن يصير..؟؟ بيتزوج علي.. ولا.........!!!!!!!! أبوغاليه قام ووقف في ويها ويلس يطالعها.. وحط يده على ويها وسحبها لحظنه وحظنها بكل قوته.. أبوغاليه: عمره مابيتمنى غيرج.. الي يعيش معاج ياحبيبتي يعاف الدنيا ومافيها.. شوفيني أنا وأمج مالنا غيرج ومع ذلك راضين بحياتنا ونصيبنا.. غاليه: يعني إنتوا موافقين..؟!! أبوغاليه غاليه هز راسه بالموافقه.. ولفت غاليه على أمها الي هي الثانيه هزت راسها بالموافقه.. غاليه تركت أبوها وراحت تحظن أمها.. غاليه: لو إنتوا موافقين يعني هذا الشي لمصلحتي.. وطول عمري أوافقكم الراي لأنكم أدرى بمصلحتي.. أبوها خلاها في حظن أمها وطلع عنهم، راح وإتصل على إخوانه وطلب منهم يجتمعون عنده.. ورجع يخبر حرمته وبنته إنه إخوانه بيونهم وبيخبرهم بخبر خطبة غاليه.. بعد ساعه تقريبا كانوا الكل موجودين بميلس منصور، أبوحميد وعياله.. وأبوعبدالله وعياله.. وأبوطلال وعياله.. حطوا الفواله وتفاولوا والكل مستغربين من هالإجتماع المفاجئ.. أبوعبدالله: خير ياخوي شو السالفه..؟؟ أبوغاليه: وأنا مايستوي أجمعكم إلا بالشر..!! أبوعبدالله: مب القصد.. بس فجأة تطلب تشوفنا طلنا.. أكيد شي صاير..!! أبوغاليه أخذ نفس عميق: هيه في شي صاير.. ناصر: عمي ترانا على أعصابنا قول شو السالفه.. أبوغاليه: لابلف ولابدور.. السالفه ومافيها غاليه متقدم لها معرس ونحن موافقين.. عم المكان صمت فظييييع بعد كلمة بوغاليه، والكل بينه وبين نفسه كيف يبا يزوج بنته وهو أدرى بحالتها.. وأخيرا نطق أبوحميد.. أبوحميد: ولكن يابوغاليه بنتك ماتصلح للزواج.. سامحني بس هذا الصج الي كنا نعرفها.. أبوغاليه: أعرف ياخوي شو تبا تقول.. وغاليه ممنوعه عن الحمل والولاده مب الزواج.. ناصر: يعني الي بياخذها مايبي عيال..؟؟!!!! أبوغاليه: لا.. يبي غاليه بس، والعيال مايبيهم.. حميد: لايكون بتزوجها شيبه ولا واحد متزوج.. عمي غاليه مب طايحه علشان تبليها هالبلوه.. أبوغاليه: حميد.. مب أنا الي أبيع بنتي.. عبدالعزيز: مب قصده ياعمي.. بس غريبه منو هذا الي مايبي عيال يشيلون إسمه من بعد..؟؟!!!! أبوغاليه: ريال شارنها.. وهمته غاليه قبل اليهال.. وهني نقز هشام من مكانه وهو معصب: يوم إنك تبا تزوجها وراضي إنها تروح في نصيبها إشعنه ماتزوجها لي!! وإنت تعرف إشكثر أنا أبيها.. وعازف عن الزواج علشانها..!!!!!!!!! أبوغاليه: هشام هدي أعصابك.. بنت خالتك كانت جدامك ومحد منعك عنها.. أنا قلت لك عن مرضها وإنت الي تركت البلاد وسافرت، ودورت ريال فيكم يضحي علشان بنتي مالقيت.. كلكم قلتوا تعيش من بينا ولا إنا نفقدها.. بس كل هذا لمصلحتكم مب لمصلحتها هي.. كل واحد فيكم فكر بنفسه قبلها.. هشام: لا..أنا فكرت فيها وللحين أبيها.. والدليل إني ماتزوجت، عمي أنا أبيها.. ومب مرخصنها تتزوج غيري وأنا ولد خالتها وأحق بها.. أبوطلال سحبه من إيده ويلسه مره ثانيه.. أبوطلال: إقعد أشوفك.. أنا الي مب موافق على زواجك منها.. ياخوي سامحني بس أنا أبا أشوف عياله وعيال عياله.. أبوغاليه: مسموح ياخوي، وأنا عارف إن هذا شعوركم كلكم.. وبنتي خلاص ياها نصيبها والله يوفقها.. ناصر: بس للحين ماقلت لنا ياعمي.. منو المتقدم لها..؟!!!! أبوغاليه: المحامي خالد الخيلي.. الكل سكت يوم قال الإسم.. محد قدر يعترض ولا يقول شي، خالد والنعم فيه ماينعاب وينشرى بفلوس الدنيا.. هشام: بس أنــا..!!!!!! أبوغاليه: هشام... بسألك سؤال واحد.. تقدر تصبر عن العيال خمسين سنه..؟؟ تعطيني ضمان إنك مابتتزوج عليها علشان العيال..؟؟ هشام سكت ونزل راسه.. أبوغاليه: أنا أعرف إنك تموت عاليهال.. ودايما الشباب ينادونك بوهزاع.. وإنت بعد تتمنى غاليه وتبيها زوجه لك.. بس لو إنحطيت بين هالخيارين بتختار العيال.. صح..؟؟؟!!! هشام وهو شوي ويصيح: وحتى ولو.. المهم غاليه تكون زوجتي.. أبوغاليه: يعني ناوي تتزوج عليها عقب فترة.. خليفه: إنت إنسان أناني.. ناصر: يعني ياهشام تبا تاخذها وبعد فتره تتزوج عليها.. يعني من الحين ناويلها عالجرح..؟؟ هشام:..................................... أبوحميد: ياخوي دامك موافق وهلك موافقين.. توكل على الله ورد عالريال.. وخلنا نفرح بوردة العيله.. الكل قاموا يهنون منصور ويباركون له.. ومنصور مستانس لفرح إخوانه له.. إلا هشام الي يالس يتجرع الألم ومحد حاسس فيه.. كان ممكن إنه ياخذ غاليه فهاللحظه.. بس مثل ماقال خليفه هشام أناني وصار مثلهم دور مصلحته قبل مصلحة غاليه ... | |||||||||
| |
|
07-15-2010, 12:25 AM
| #39 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم إنتشر خبر خطوبة غاليه من المحامي خالد، والكل بدون إستثناء فرحوا لها.. وأحمد من وصله الخبر عوره قلبه.. حس نفسه نذل لأنه ماقدر يضحي مثل خالد.. وخدع نفسه بكلمة إنه يضحي علشانها.. بس الندم بداخله قاعد ياكله.. بس شو بيسوي..!! كل شي قسمه ونصيب.. خالد ماحب يطول فالخطوبه وملج بعد أسبوعين.. وسووها حفله راهيه وحلوه في بيت منصور.. ومابقى حد من الأهل ولا الأصدقاء ماحظرها.. وماشاءالله عليها غاليه كانت قمه فالروعه والحلاوه، وحددوا العرس فالصيف يعني بعد شهرين ونص.. وكان أهم شروط غاليه إنها تكمل دراستها.. اليوم غاليه مجهزة مفاجأة حق خالد.. اليوم يوم ميلاده، راحت السوق وإشترت له أحلى الهدايا.. ورتبت الميلس والفواله وأهم شي كيكتها الحلوه.. وصل خالد وإستقبلته غاليه بكل حفاوه وترحاب.. كانت لابسه بدله حمرا وشيله بعد حمرا.. هاللون وايد يحبه خالد.. ودخلته الميلس وهو متخبل على شكلها كانت قمر 14.. يلس خالد على كنبه وهي يلست عالكنبه الثانيه.. يلس يطالعها وهي منزله راسها وتلعب بطرف الشيله.. خالد: أنا خلاص إستويت ريلج يعني تعالي إيلسي حذالي.. غاليه: مابي أستحي.. خالد: أفاااا.. تعالي عن الدلع..!! غاليه: خالد لاتحرجني.. يوم بتعود عليك بقعد جريب منك.. خالد: ونحن مالجين من أسبوعين وكل ماييتج شردتي عني.. تعالي.. غاليه ترددت ورفعت راسها تتطالعه.. خالد وهو يأشرعلى المكان الفاضي حذاله: تعـــــالي.. قامت غاليه وراحت ويلست وخلت من بينهم مسافه بسيطه.. خالد مسك إيدها: وحشتيني..!! غاليه سحبت إيدها: ماتشوفشي وحش..!! خالد: هههههههههههه حياتي والله.. غاليه تغير الموضوع: أنا مساعه دقيت لك ولارديت علي.. خالد: كنت مع ربعي ونسيت التلفون فالسياره، ومن رجعت وشفت سبع مس كولات قلت فخاطري خلاص الحين وراي حرمه مب لازم أنسى تلفوني.. غاليه: هههههه زين عيل غير أسلوبك.. خالد: أممممممم وإنتي بعد لازم تتغيرين.. غاليه مستغربه: أغير شو..!! شوفيني مب عايبنك..؟؟ خالد: لا فديتج كل شي فيج عايبني.. بس كل ماشفتج ماشوف شعرج، حتى يوم الملجه حلفتي علي ماأدخل.. مادري ليش..!! غاليه: لا عيب تشوفه قبل لانتزوج.. خالد: ههههههههههههه ونحن الحين شو..؟؟ غاليه: بس ملجه.. خالد: يعني زوجج ولا ماخلوني أهلج أقعد وياج بروحنا.. غاليه: أمممممممممم مادري..!!!! خالد طالعها بنظره خبيثه: لو تحبيني شيلي شيلتج.. غاليه بنظرة أقوى: أنا للحين ماحبيتك.. خالد: هههههههههههههههههههههههه خالد من كثر ماضحك شرق بالهوى.. غاليه: صحه صحه حبيبي.. خالد: كح كح.. على قلبج ياحبيبتي.. شوفي قلتي حبيبي يعني تحبيني.. غاليه: هههههههههههه خالد مل منها: على راحتج حبيبتي.. بس خوزي عني بتفاول أحسن لي من الدلوعه.. ويلس خالد ياكل وغاليه تضحك عليه، ويوم خلص قام ورجع مكانه.. غاليه: خلك مكانك أنا بسير وبرجع.. خالد: على أمرج دلوعتي.. غاليه: دلوعتك..؟؟ خالد: مب عايبنج..!! غاليه: بلى وايد حلو.. خالد وهو يبتسم لها: خلاص دلوعتي سيري.. راحت غاليه تييب الكيكه الي كانت محطيه عليها صورة خالد، وقالت للخدامه تجهزها لها.. وصعدت هي لغرفتها وخوزت الشيله وعدلت شعرها وحطت وردتين حمر فوق إذنها اليمين.. ونزلت وراحت الميلس وشافت أبوها ظاهر من عند خالد.. أبوغاليه: منو هالغزال..!! غاليه بدلع: بنت منصور فديته.. أبوغاليه: حبيبتي والله.. وينج مخليه ريلج بروحه..؟؟ غاليه: الحين بسير له.. ليندا ييبي الكيكه.. أبوغاليه: ياسلام وأنا مالي كيك..؟؟ غاليه: أمممممممم بعدين.. منصور مشى عنها: الله يرحم أيام كان الغلا كله حقي.. غاليه: ههههههههه فديت باباتي كل عمري فداك.. أبوغاليه: ماظنتي الريل بيخلي حقي شي.. ودخلت غاليه الميلس وهي تدف العربه الي محطيه فوقها الكيكه، وخالد ما إنتبه للكيكه وهو يطالع غاليه الي كانت فاله شعرها القصير وكان شكلها أحلى بوااااايد.. غاليه حطت الكيكه جدامه ويلست حذاله عالكنبه.. خالد يلس يطالعها بنظرات حب وهي مستحيه.. غاليه: بس عاد نزل عينك.. خالد: ههههههههههه خالد وهو يضحك نزل عينه وشاف الكيكه وإستغرب.. خالد: شو هذا..!!!! غاليه: كــل عــام وريـــلي بخير.. خالد تم ساكت شوي وهو يتذكر وبعدين إبتسم لها: وإنتي بخير يابعد عمر ريلج.. غاليه: يالله مب ناوي تقطع كيكتك..؟؟ خالد: وأهون عليج تقطعيني بالسكين..!! غاليه: تراني يايبه السكين بلاستيك علشان مايعورك.. خالد: هههههههههه على قولة أبوج مايغلبج شي.. وقطع خالد الكيك من على جهة وخلى الباجي بيوديه حق أهله، ويلس يأكلها أونه بدال حفلة الملجه الي مادخلها ولا أكلها من الكيك.. غاليه بعد ماخلصوا من أكل الكيك.. راحت وطلعت من زاوية الميلس ثلاث أكياس كبيره.. خالد: شو هذا بعد..؟؟ غاليه: مايستوي عيد ميلاد بدون هدايا.. خالد: زين ماما كان خاطري في سيارة أوتوماتيك يبتيها لي..؟؟ غاليه: هههههههههههههه خالد: ياسلام من زمان محد دلعني.. وفتح أول كيس وكان فيه مخده كبيره عليها صورة غاليه يوم الملجه وصورة خالد.. وعليها عبارة.. عسانا مانتفارق يوم.. خالد: آمين يارب عسى الله لايفرقنا.. غاليه: يالله إفتح الي بعدها.. وفتح خالد الكيس الثاني وكان صغير شوي وكان داخله قلم وبزم الكندوره وميداليه عليها صورته.. خالد: واااااااااااايد حلو ذوقج.. تسلميلي.. غاليه: الحين وصلنا للأخيره.. وفتح خالد آخر كيس الي كان أكبر منهم كلهم، وكان داخله صندوق كبير وبداخل الصندوق مكينه صغيره لتنظيف كراسي السياره، وتعليقة على شكل آية الكرسي تتعلق فالسياره.. وعلبه صغيره داخها دبله فضيه.. خالد: زين سويتي لأني للحين ماإشتريت لي دبله.. غاليه: عيبتك الهدايا..؟!! خالد: عيبتني وااااااااايد.. والي عيبني أكثر الأيادي الحلوه الي يابت لي الهديه.. عسى الله يخليج لي إن شاءالله.. غاليه: ويخليك لي يـــارب.. وبعد نص ساعه روح خالد وخلى غاليه بروحها تتذكر كلام خالد وتعيش أيام يديده تحس بطعمها أحلى وأحلى مع مر الأيام.. مرت الأيام على الكل حلوه وسعيده.. ناصر تزوج نجود وسافروا ماليزيا شهر العسل، وماشاءالله جميلة حامل للمره الثانيه.. وشروق مرتاحه ومستانسه مع ريلها.. وأحمد ملج وبيتزوج بعد غاليه بأسبوعين.. والأهم من كل هذا فجر أمس ولدت ويابت أحلى توأم فالدنيا.. ولد وبنت مثل القمر الله يحفظهم لأهلهم.. ولدت فالشهر السابع لأن الحمل وايد تعبها لأنها كبيره فإضطروا يسوون لها عمليه ويولدونها.. وهي للحين تعبانه بس أحسن من أمس.. غاليه: ياربيه ياعموه لو تشوفينهم إشحلاتهم يهبلون.. فجر بتعب: والله محد أهبل غيرج.. فاطمه قولي للدكتور إني تعبانه ومب قادره أتحرك.. جميله: عادي حبيبتي أنا كنت جي مثلج.. بس الحمدلله يومين وعدا الموضوع على خير.. غاليه: أشوفج مستويه دلوعه.. ماما ماعليج منها خليها تولي.. أم غاليه: حرام عليج خليها تتدلع.. وإنتي سيري نادي لها النيرس، خليها تعطيها مهدئ.. طلعت غاليه برع ونادت النيرس وهي راجعه شافت علي رايح لليهال.. غاليه: علي علي.. علي: هلا غاليه شخبارج..؟؟ غاليه: الحمدلله.. مبروك عاليهال.. يتربون في عزكم إن شاءالله.. علي: الله يخليج يابنت منصور.. شفتيهم..؟؟ غاليه: هيه شفتهم.. البنيه تشبهك والولد يشبه عمووه.. علي: ههههههه على طول طلعتي الشبه.. غاليه: تعال بنروح نشوفهم.. حرمتك يالسه داخل آي وآي تعبانه أبا مسكن.. أفففففف مللتني.. علي: ههههههه حرام عليج.. خليها تتدلع، إنتي ماشفتيها كيف كانت بتموت من الألم عالولاده، الله يعينها يارب.. وراحوا وشافوا اليهال وبعدها رجعوا للغرفه ولقوها فاضيه.. غاليه: عاد عندج ثلاث أسابيع ترتاحين فيهم، وبعدها تقومين مثل السبال أقصد الغزال.. فجر: محد سبال غيرج.. وبعدين شوعندج بعد ثلاث أسابيع..؟؟ غاليه: أفااااااااااااااااااااااا نسيتي تاريخ عرسي..؟؟ 07\07\2007 علي: ألف ألف مبروووك ياغاليه.. عساج تتهنين وتتوفقين طوووول العمر إن شاءالله.. غاليه: الله يخليك ياريل عمتي.. وعقبال عيالكم.. أم غاليه: وشو بتسمونهم اليهال.. علي: أمهم مختاره ومخلصه.. وأنا وحليلني مالي شور.. فجر: خل عنك أنا شاورتك الأسامي وإنت وافقت.. علي: هههههههههه بنسميهم حمد وهند.. غاليه: الله وايد حلوين.. الله يخليهم لكم إن شاءالله.. فجر: قوليلي خلصتي كل تجهيزات العرس..؟؟ غاليه: الحمدلله كل شي تمااااااااااام.. أم غاليه: الأسبوع الياي بنحطي زينة العرس.. وبتبتدي حشرة البنات الي بيخيسون عندنا.. غاليه: أي بنات كلهن عرسن عني.. الباجيات شذا ومروى.. أم غاليه: ويدوتج أمس إتصلت وقالت إنهم بيون هاليومين.. غاليه: فديت يدوه تولهت عليها وااااااايد.. ومرت الأسابيع الثلاث مثل البرق وغاليه مابين التجهيزات للعرس ومابين خالد.. الي بدت تتقرب منه وتحبه.. أسبوع العرس كان حافل بالعزايم والتجمعات الحلوه، ومع إنه بيت أهل غاليه هو بيت العروس والمفروض كل الذبايح والفرق عند المعرس، بس أبوغاليه من فرحته ياب فرقة حربيه ويويله.. وكل يوم يدقون لنص الليل والجو ربشه وحلوو.. وكل يوم يذبح ويسوي العشى ولا الغدا ويوم يوزع عالجيران.. ويوم عالفقراء.. ويوم للموظفين الي عنده فالشركه.. دبي كلها إرتبشت لربشة المناصير.. ووصلنا لليوم المنشود، يوم العرس.. 07\07\2007 غاليه قامت الساعه عشر وبدت تجهز الأغراض لهاليوم، وكانت مجهزة شنطة السفر والشنطه الي بتروح فيها الفندق أول يوم من أمس.. سبحت وتدخنت وتعطرت ونزلت تحت وشافت أمها الي يلست تيبب من شافتها.. أم غاليه: فديت عروسنا الحلوه.. عسى الله يهنيج طول عمرج.. غاليه حظنت أمها: الله يخليج لي إن شاءالله.. وينه بابا..؟؟ أم غاليه: برع عند اليويله.. وإنتي تجهزتي..؟؟ غاليه: هيه كل شي جاهز.. الظهر إن شاءالله بتغدا وبرتاح شوي.. وعلى العصر بسير الفندق لأن راعية الصالون بتيي لي هناك.. وفعلا على العصر غاليه كانت فالفندق وياتها الماكييره شمس من بوظبي وبدت تحطي لها المكياج من بعد ماخلصت خبيرة الشعر من التسريحه.. على الساعه سبع تقريبا غاليه كانت مخلصه كل شي ومب باجي غير تلبس الفستان.. غاليه: ياربي ليش تأخرن البنات..؟؟ الحين منو الي بيلبسني الفستان..!! شمس: لاتلبسين الحين.. إصبري لأذان العشا.. صلي وإلبسي، علشان الله يبارك لج فحياتج.. غاليه: معاج حق.. وأصلا مب باجي وايد عن الأذان.. ومن أذن الأذان صلت غاليه ووصلت مروى.. غاليه: زين وصلتي أبا ألبس الفستان وبروحي ماأقدر.. مروى: إن شاءالله بلبسج.. بس بصلي بالأول.. وإنتي إدخلي الحمام الحين لاتتوهقين بعدين.. غاليه: هههههههههههه إن شاءالله.. وخلصوا البنات لبس فساتينهم وعدلت خبيرة الشعر التسريحه الي إختربت شوي.. شمس: ماشاءالله عليج وااايد جميله.. وإستايلج أسطوري.. غاليه: تسلمين.. مروى: من صغرها وهي تحلم بالعرس الأسطوري وشكله اليوم بيتحقق.. غاليه: الله يعدي هالليله على خير.. وصلوا باجي البنات وبدوا يتجهزون لنزلة العروس لقاعة الأفراح.. غاليه: أحس بيغمى علي.. أم غاليه: بسم الله عليج.. شدي حيلج والله بيساعدج.. غاليه: إن شاءالله.. الناس يالسين ينتظرون العروس.. وتبندت كل الأضواء وإستوى الجو هدووووء.. وإبتدت الدخله بأصوات أقدام تمشي، وبعدها صورة جرس ساعه يدق بقوه وبطء.. وبعدها إنفتح الباب وطلعوا أربع بنات صغار لابسات فساتين ورديه كيوووت ونزلوا من الدري ومشوا إلين وصلوا للكوشه ويلسوا عالمخدات الي محطينها جنب كرسي العروس، وكل هذا على صوت موسيقى هاديه كلاسيك، وبعدهم دخلوا على موسيقى أهدأ أربع راقصات باليه نزلوا وبدوا يرقصون حركات الباليه في نص القاعه.. ويوم خلصوا رجعوا للدري من تحت ووقفوا ينتظرون نزلت العروس لهم.. وفي هالحظه إنفتح الباب وكانت غاليه واقفه ورا الباب وكانت محطيه وصلة شعر على شكل رولات نازله على كتفها باللون الأحمر.. ومكياجها المتعدد الأوان على ألوان الصيف كان رهييييييب.. وفستانها كان مخصر شوي ومن تحت منفوووش.. كانت واقفه مثل الأميره الي تنتظر تنزل لشعبها.. وبدت الدخله على صوت شاعر يشعر لغاليه، وهي واقفه تنتظر يخلص.. | |||||||||
| |
|
07-15-2010, 12:26 AM
| #40 (permalink) | |||||||||
|
مستشار المؤسس ~
|
رد: من يحبك كثر ماأحبك أنا انا :
قمرهم كلهم اليوم ليله من ألف ليله وليله *** اليوم كلنا بنزف شيخة الحلوين هللوا معي يالحضور ورحبوا*** بغاليه.. وردة ولا كل الورود غاليه بنت القمر وأخت النجوم*** من رآها مالقى غير الفرح يالله عسى الفرحه دايم تدوم *** وتبقى طول الدهر فحب وسعاده ومن خلص الشاعر شعره، بدت غاليه تنزل على الدري بكل هدوء.. على أغنية عبدالمجيد عبدالله.. خل عينك تناظر شوف منهو ظهر ** بين كل العذارى له شعاع عجيب ** الله أكبر عليها والجمال الرهيب ** غاليه كانت مجهزة حق كل شي.. وطالبه هالأغنيه مخصوص علشان دخلتها.. ومن وصلت لنص القاعه قاموا راقصات الباليه يرقصون حواليها وهي واقفه تبتسم بكل هدوء وفرح.. وبعدها كملت للكوشه ويلست وكل البنات حواليها مستانسين لها.. الكل عيبتهم دخلتها وحسوها فريده من نوعها.. الكوشه كانت عباره عن قصر ملوكي بحديقته والكرسي الي يلست عليه غاليه كان على شكل مرجيحه فالحديقه.. محد مصدق نفسه إنه في قاعه أفراح.. القاعه كانت مزينه بالورود والأزهار بكل أنواعها.. كل القاعه ورود وحركات رهييييييبه.. على الساعه 12 ونص قالوا المعرس بيدخل.. طبعا غاليه مانست ريلها وكانت مجهزة له بعد أبيات شعريه يدخل عليها.. دخل خالد ومعاه إخواته البنات على صوت شاعر وشاعره.. الشاعر: اليوم جيتج يابعد كل الأحباب حامل قلبي لج هديه.. عساني أقدر أسعدج وأهنيج وكل عمري فدا روحج.. الشاعره: إنت عندي كل الوجود إنت بدنيتي حلم وتحقق.. ياعسى ربي يهنينا ونبقى حبايب طول الدهر.. ووصل خالد للكوشه ويلس يطالع غاليه فتره بسيطه وبعدها باسها على جبهتها.. خالد: عسى الله يقدرني وأسعدج طول العمر.. غاليه نزلت راسها وبعدها وقف خالد معاها وصوروا وقصوا الكيك وشربوا العصير.. وكل الأهل معاهم بفرح وسعاده.. كانت ليله من أحلى الليالي.. تكلمت عنها دبي لأسبوع كامل.. وعلى الساعه وحده ونص زفوا المعاريس لغرفتهم فالفندق وهالمره مب على صوت الموسيقى.. كان على صوت صياح أم غاليه الي محد قدر يوقف دموعها على فراق بنتها.. وبالعافيه خلوها تودر غاليه الي كانت ماسكتها بالقوو.. خالد سكر الباب بعد ماظهروا كلهم وخلصت المصوره تصوير.. وراح وفصخ بشته وحطاه على الطاوله.. وراح ويلس مع غاليه عالسرير ورفع شعرها من على ويها وباسها على خدها.. خالد: الحمدلله شفتج بشعر طويل.. غاليه وهي مسحيه: ههههههههه لاتستانس وايد.. آخر مره تشوفه جي.. خالد: فديت روحج، دلوعتي.. شو تتمنين فهاللحظه..؟؟ غاليه وهي منزله راسها: أتمنى نعيش طول العمر فسعاده.. خالد: آمين يارب.. وأنا ما أتمنى أنام وأصحى إلا على صوتج، آكل من إيدج، أروح معاج كل مكان.. حتى الدوام باخذج وياي.. غاليه: ههههههههههه مينون.. خالد: مينون حبج.. مينون في عيونج الي مدوختني.. مينون ومغرم فأحلى ماخلق ربي.. غاليه: بس عاد خالد ترى أستحي.. خالد: بعدج ماشفتي شي.. والله لا أصبحج وأمسيج بغزل.. أفرش لج الأرض ورد وزهور علشان ماتتعب ريولج الصغيره.. غاليه وهي تناظر عيونه: إنت وااايد رومانسي.. خالد: أرجع وأقول لج عسى الله يقدرني وأسعدج طول العمر.. وإنتهت ليله من الحب والفرح.. ليله توجنا فيها بطلتنا أحلى عروس.. وأحلى قمر.. وليله سعيده بتتبعها ليالي أسعد وأحلى مع قلوب حطت الحب هدفها، وبتعيش وبتموت للحب.... | |||||||||
| |
|
| مواقع النشر (المفضلة) |
| الذين يشاهدون محتوى الموضوع الآن : 21 ( الأعضاء 0 والزوار 21) | |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| أيهما أجمل قلب يحبك أم عين تحترمك؟! | شآأإآدن | زآۈيـﮧ حرهـﮧ | 8 | 01-16-2011 04:10 PM |
| من علامات حب الله لك | الأميـرة الدلـوعة | الاسلام والشريعه | 1 | 10-28-2009 09:54 PM |
| من قصيدي : جيتك | &ليت الزعل ممنوع& | الشعر والخواطر والقصائد | 9 | 01-22-2009 07:19 PM |
| هل تعلم أن هناك من يحبك وأنت ربما لا تدرى ....!!!؟؟ | محمودعمر | زآۈيـﮧ حرهـﮧ | 5 | 07-04-2008 08:34 PM |
| ان اعطاك الله.... | بنـ البدو ـت | الاسلام والشريعه | 6 | 04-29-2007 09:27 PM |
| |
العرض العادي
