منتديات بنوته - عرض مشاركة واحدة

06-30-2010, 03:03 AM

الجزء الحادي عشر..

اليوم كان آخر إمتحان لغاليه في أول كورس لها الجامعه، ورجعت البيت وهي متفائله بالنتيجه الحلوه.. دخلت البيت وشافت أمها تسولف بالتلفون راحت لها وباستها..
غاليه: ماما منو تكلمين..؟؟
أم غاليه: فجر.. تبينها..!!
غاليه: لا.. بسير ببدل ثيابي وبرقد.. من أسبوعين شقيانه فالدراسه لارقاد ولاهم يحزنون.. باااااااي
أم غاليه: هههههه فديتها والله، تصدقين أحسها كبرت من دخلت الجامعه.. إستوت أعقل وأهدأ.. ربي يحفظها لي..
فجر: ربي يوفجها ويهنيها بحياتها..
أم غاليه: خلاص فديتج أكيد ريلج الحين بيوصل يالله سيري..مع السلامه..
فجر: مع السلامه..
سكرت أم غاليه وسارت للمطبخ تجهز الغدا لمنصور.. الي وصل بعد نص ساعه وبدا يتغدا..
أبوغاليه: غاليه للحين ماخلصت إمتحانها..؟؟
أم غاليه: بلى وصلت وسارت ترقد تقول من بدت امتحانات مارقدت..
أبوغاليه: ربي يحفظها لنا يارب.. أقولج فاطمه اليوم خالد المحامي يقولي إنه بيسافر أسبوعين فرنسا يودي أمه علاج، فأنا مفكر أخليه يشتري من هناك هديه لغاليه بمناسبة نجاحها..
أم غاليه: بس هي للحين مانجحت..
أبوغاليه: إن شاءالله بتنجح.. هاذي بنوتي الحلوه..
أم غاليه: إن شاءالله..
أبوغاليه: بس خبريني هي شو تحب.. يعني شو أقدر آخذ لها من هناك..؟؟
أم غاليه: والله ماعرف..!! انزين إنت قول له عن الهديه يمكن هو بيخلي إخواته يختارون لها شي..
أبوغاليه: فكره حلوه.. خلاص بكلمه اليوم وبشوفه، أنا الحمدلله شبعت، بغسل وبريح بالغرفه..
أم غاليه: أييب لك الشاي هناك..؟؟
أبوغاليه: ياليت الصراحه.. مافيني أنزل مره ثانيه..
راح أبوغاليه يريح بالغرفه وفاطمه راحت المطبخ تشيل صينية الشاي.. وهي طالعه عالدري شافت غاليه نازله وهي نافشه شعرها..
أم غاليه: بسم الله عليج.. بلاج جي واقفه..؟؟
غاليه: ماما راسي يعورني.. الله هذا شاي عطيني أشرب..
أم غاليه: تعالي اشربي مع أبوج..
غاليه: عيل عطيني الصينية بدخلها له..
خذت غاليه الصينيه ودخلتها على ابوها الي كان متسدح على السرير وسرحان..
غاليه: وأحلى شاي لأحلى بابا..
أبوغاليه اعتدل في يلسته: وأحلى بنوته داخله علي الحين..
أم غاليه: وأنا نسيتوني..!!
غاليه: مشكله فاطمه المنصوري يوم تغار..
أبوغاليه: إنتي عاد أم الغلا كله..
أم غاليه: ههههههههه
أبوغاليه: تعالي غلوووي اقعدي يمي..
يلست غاليه تشرب الشاي مع أبوها وأمها سارت تييب لها شي تاكله من المطبخ..
أبوغاليه: غاليه شخبار آخر امتحان..؟؟
غاليه: تمااااااااام وإن شاءالله بييب أحسن الدرجات..
أبوغاليه: ربي يوفقج يالحلوه..
غاليه: بابا خاطري في شي..
أبوغاليه: عيوني لج غناتي.. آمريني..
غاليه: أمممممممم خاطري أسير الفجيره..
أبوغاليه: الفجيــــــــــره..!! شو الي يابها على بالج..
غاليه: أنا ولا مره شفت يدوووه وعمي بدر.. بابا بخاطري أشوفهم..
أبوغاليه: فديت أمي والله.. الله يهداها مارضت تيي ويانا دبي، وأخوي بدر بعد يالس وياها..
غاليه: بابا الحين عندي إجازة شو رايك نسير لهم..
أبوغاليه: إن شاءالله غناتي اليوم بالليل بنتناقش بالسالفه..
غاليه: خلاص بابا بسير حجرتي برتاح..
ودخلت عليهم امها: أول تاكلين وبعدين تسيرين..
غاليه: مالي نفس ماما..
أم غاليه: مسوية لج سندويتشات نقانق وبيض.. أدريبج ماتبين عيش.
غاليه: شندويتشات أوكي، المهم إنه مب عيش..
أبوغاليه: هههههههههه بالعافيه عسولتي..
يلست غاليه مع أهلها وهي مستانسه على الأهل الي عندها، لو عاشت العمر مرتين ما راح تلاقي أحسن عنهم..

نروح شوي لشروق الي قررت تكلم أبوها وتنهي السالفه الي معذبتها.. سارت لأبوها وهو يالس بالميلس بروحه يشرب الشاي..
شروق: أبويه ممكن أسولف وياك شوي..
أبوجاسم: تعالي حبيبتي اقعدي هني..
يلست شروق وصبت لنفسها شاي ويلست تلعب بالكاس بصبعها..
أبوجاسم: شروق.. في شي صاير..؟؟
شروق: أبويه إنت معلمني من يوم صغري عالصراحه.. وانا اليوم يايه أكلمك بكل صراحه وأتمنى تفهمني..
أبوجاسم: إن شاءالله حبيبتي.. خبريني شو تبين..!!
شروق: أنا.. أنا مابا ناصر ولد خالي..
أبوجاسم بهدوء: ممكن أسأل ليش..؟؟
شروق: بصراحه ماشي تفاهم من بينا.. ودايما نختلف في كل شي، فقلنا أحسن شي نفترق بالمعروف ومن الحين، قبل لانتزوج ونييب عيال يكونون هم الضحيه..
أبوجاسم: إنزين ليش ماتحطين عينج بعيني مثل ما إنتي متعوده يوم تصارحيني بشي..!!
شروق: مستحيه منك.. لأني بزعلك بهالطلب..
أبوجاسم: لا.. لأنج تعرفين نفسج جذااااابه..
شروق انصدمت ويلست تتطالع أبوها الي يناظرها بعينه الحكيمه الواعيه..
أبوجاسم: ناصر هو الي مايبيج، وطلب منج إنج إنتي الي تقولين هالشي عسب مايأثر على سمعتج.. صح..!!
شروق نزلت راسها ولاردت عليه، وهو حس إنه جرحها برمسته بس لازم يعرف منها كل الي صار..
أبوجاسم: شروق.. إنتي تربيتي وأعرف لو فيج شي من نظرة عيونج..
شروق: هو مايحبني وخلاص كل الي من بينا إنتهى..
أبوجاسم: شروق بابا.. كلميني بصراحه.. ليش مايبيج..؟؟
شروق بدت تصيح وتنزل راسها أكثر..
أبوجاسم: مهما كان الي صار.. شروق دايما لازم يكون راسها مرفوع، إنتي ماغلطتي.. بالعكس هو الخسران.. خسر جوهره الكل يتمناها..
شروق رفعت راسها وويها كله دموع: يقول إني ياهل وتصرفاتي مب ناضجه.. وإنه مايحس تجاهي بأي انجذاب..
أبوجاسم: وإنتي..؟؟ بشو حاسه..!!
شروق: أنا..؟؟
أبوجاسم: هيه إنتي.. بعدج تبينه.. تحتقرينه.. تكرهينه.. شو شعورج..؟؟
شروق: أبويه أنا عزيته من كل قلبي بس هو مايستاهل..
أبوجاسم: وهذا الي أباج توصلين له.. إنه مايستاهلج.. وبنفس الوقت تتعلمين من تجاربج..
شروق: شو يعني..!!!
أبوجاسم: يعني تغيرين تصرفاتج الي قال عنها ناصر، وخلج من حركات اليهالوو الي كم مره حذرتج منها، إكبري وخلج حرمه عوده الكل يحبها ويحترمها..
شروق: بس بابا أنا مجروحه.. و...
أبوجاسم: شروق.. في مثل يقول الضربه الي ماتجتلك تقويك، وناصر ماجتلج.. ناصر عطاج الكف الي لازم يصحيج من غفلتج وتعرفين الدنيا على حقيقتها..
شروق استوعبت كلام أبوها وقامت وباسته على راسه بس هو سحبها وحظنها.. وحست بحظنه الدافي هو شعلة الأمل عشان تقدر تجتاز هالمرحله الصعبه من حياتها..

***********_____________************

في بيت غاليه الي كانت يالسه بالصاله تلعب بلاي ستيشن مع غصون بنت حميد ولد عمها وحاشره الدنيا هي وياها..
أم غاليه: غااااااااليه بسج صراخ قلت لج سيري حجرتج إلعبي هناك أحسن لكم..
غاليه: لا ماما بنلعب هني..
أم غاليه: إنزين بس عن الصراخ.. ذبحتوني..
غصون: غاليه أبا حلاوه..
غاليه: ماشي حلاوه.. أول نخلص لعب...
غصون: أنا خلصت.. أبا حلاوه..
غاليه: يعني إنتي خسرانه.. أويييييييييه غلبتج..
غصون: عادي المهم أبا حلاوه..
غاليه: تتوحمين إنتي شو..
أم غاليه: غلوووي قومي ودي البنيه المطبخ وعطيها الي تبيه..
غاليه: غصون وين المطبخ..؟؟
غصون: هناك ورا البيت..
غاليه: إنزين سيري بتشوفين ماري قوليلها وبتعطيج الحلاوه..
راحت غصون للمطبخ تدور الحلويات..
أم غاليه: قاصه عالبنيه أشوفج..
غاليه: ههههههه وناسه لعبت وياها إلين تعبت..
أم غاليه: الي يسمعج يقول تراكضين من الله يالسه..
غاليه: ماما متى حميد بيي ياخذها..؟؟
أم غاليه: مادري اول مايخلص أشغاله..
غاليه: بقوله يخليها عندي اليوم ترقد وياي..
أم غاليه: مينونه إنتي حميد يموت عليها ومستحيل يخليها بعيد عنه، أسمع الجرس يدق أكيد هو ياي ياخذها...
غاليه: عيل أنا بظهر له وبقوله ماعندنا بنات..
أم غاليه: يالمينونه تعالي..
بس غاليه سارت للباب بعد مالبست شيلتها، بس يوم رجعت كانوا معاها عبدالله وجميله..
غاليه: ماما عندنا ضيوف.. الحمدلله مب حميد وإلا بروغه..
أم غاليه: هالبنيه ماتحشم أبد.. حياكم فديتكم تفضلوا..
جميله: إشحالج أم غاليه عساج بخير..
أم عبدالله: الحمدلله ربي يعافيج.. عبدالله اشحالك عساك بخير..
عبدالله: تماااااااام
غاليه: وليش هالكثر مستانس.. شو عندك طاير من الفرحه طاير..
عبدالله: أنا طحت بلسانج الله يعيني عيل..
جميله: ههههههه عاد إلا غاليه ما أرضى عليها..
غاليه: فديييييييتج أنا..
دخلت عليهم غصون الي تموت في عبدالله وركضت عليه ويلست في حظنه وهي تبوسه..
جميله: وأنا مالي بوسه..
غصون: لا إنتي مب حلوه..
جميله: حراااااااام ليش ماتحبيني..!!
غصون: إنتي أخذتي عبادي مني..
جميله: ههههههههه شكله كانت في قصة حب بينكم..
عبدالله: هههههههههههه هاذي غصون العسل حبي الأول..
غاليه: غصون بترقدين عندي اليوم..
غصون: بابا مايطيع.. يقولي إنتي حبيبتي لازم ترقدين عندي..
غاليه: ههههههههه لا أنا بقوله.. إنتي تبين وإلا لأ..؟؟
غصون: هيه أبا.. وباجر ماشي مدرسه..
عبدالله: جمول أبا بنوته عسل مثل هاذي.. نفس العيون والشعر والحلاوه كلها شراتها..
غاليه: لالالالالا.. جميله تذكرين دايما أيام المدرسه كنتي تقولين لي لو الله عطاني بنوته أباها مثلج..
عبدالله: وعععععع هذاك قبل الحين بتغير رايها بعد ماشافت هالعسل.. صح حبيبي..!!
أم غاليه: شو السالفه.. لايكون في بيبي فالطريج..
جميله استحت ونزلت راسها.. وعبدالله يلس يضحك..
أم غاليه: يعني صح.. مبروك تستاهلون كل خير..
غاليه: والله صج... الله وناسه مبروووك.. وأخيرا عبدالله بيكون عنده بيبي صغيرووون..
عبدالله: الله يبارك بحياتكم.. وعقبال كل العزابيه..
جميله: يالله عبدالله نسير أمي تنتظرنا بالبيت..
غاليه: تو الناس ماشبعنا منكم..
أم غاليه: إيلسوا شوي بعدكم لاتفاولتوا ولا شي..
جميله: مشكوره الغاليه خيرج سابق..
عبدالله: لازم نسير وانا وراي شغل بعد..
طلعوا عبدالله وجميله ورجعوا غاليه وغصون يلعبون بلاي ستيشن إلين الساعه تسع ونص وقت رجوع منصور من الشركه.. وكان معاه ولد أخوه حميد..
حميد: غصوووون الحلوه وحشتيني..
ركضت غصون لأبوها تبوسه وشالها فوق ويلس يلاعبها..
غاليه: حشى مسرع ما اشتقت لها، ماكملت أربع ساعات من خليتها عندي..
حميد: أربع ساعات وايد.. والله لو دقيقه بشتاق لها.. فديتها هالعسل..
أبوغاليه: باجر بييك البيبي اليديد وبتنساها..
غاليه: هيه صح حميد، خلها عندي إنت بيكون عندك غيرها..
حميد: لا والله.. هاي البجر.. الغاليه العزيزه..
غصون: بابا بنام عند غاليه اليوم..
حميد: لا حبيبي وانا من بيقعد عندي..
غصون: عندك أشواق..
غاليه: هههههههههههههه
أبوغاليه: عيب بابا.. يقولون ماما
غصون: بابا خلني هني.. وباجر بسير مع غاليه الفخيره..
حميد: شو الفخيره بعد..
غاليه: هههههههههههههه
أبوغاليه: غاليه حاشرتني تبا تسير الفجيره تزور يدتها..
حميد: والله فكره حلوه.. حليلها يدوه من زمان ماسرنا نزورها..
أبوغاليه: يالله عيل عزم ويانا..
حميد: بشوف الأهل وإن شاءالله نطلع كلنا..
غصون: الله يعني بتوديني.. خلاص غاليه بروح البيت..
غاليه: يالمصلحجيه..
حميد: ههههههه يالله نسير حبيبي.. تصبحون على خير.. مع السلامه..

وراحت غاليه تتعشى وترقد لأنها من الصبح بتطلع عالفجيره، تزور يدتها الي عمرها ماشافتها..

************____________*************

باليوم الثاني ومن صباح الله خير غاليه قامت وهي في قمة نشاطها وبدت تجهز شنطتها وحطت ثياب للأسبوعين وهي بتروح يومين بس.. ونزلت تحت تشوف الترتيبات وهي متوقعه الكل جاهز إلا هي..
غاليه: ماما سوووووري تأخرت.
أم غاليه: بسم الله عليج على شو تأخرتي..؟؟
غاليه: على الطلعه.. مب اليوم سايرين الفجيره..
أم غاليه: هههههههه بعدها الساعه سبع، ونحن مقررين نسير الساعه 12 أو 1
غاليه: خيييييييييييبه لا ماما خلونا نظهر من وقت..
أم غاليه: لا فديتج أبوج بيسير يخلص كم شغله، وبعدها بيرجع وبيتغدا وبنظهر..
غاليه: حرااااام وايد..
أم غاليه: لا وايد ولا شي، وإنتي بلاج متلهفه على يدووه وإنتي بعمرج ماشفتيها..
غاليه: لأني بخاطري أتعرف عليها.. وبخاطري أشوف الفجيره، وبخاطري أغير جو..
أم غاليه: خلاص تسلي بأي شي لوقت الطلعه..
غاليه: بسير برقد أحسن لي..
أم غاليه: هههههههه انزين جهزتي ثيابج..؟؟
غاليه: هيه.. خذيت وياي بدلتين تنانير وقمصان، وأربع جينزات وخمس بديات طواااال وجوتيين بوووت.. هذا غير الإكسسوارات..
أم غاليه: خيييييييبه كل هذا شو بتسويين فيه.. كلهم يومين..
غاليه: ماما كل شوي ببدل عسب أراويهم بنت منصور وكشختها..
أم غاليه: ياخوفي تصيبنا عين من خقتج..
غاليه: ههههههههههههههه
أم غاليه: إنزين ايلسي سولفي وياي وبيضيع الوقت..
غاليه: أممممممم أوكي..
أم غاليه: خبريني متى نتايجج..!!
غاليه: يمكن الأسبوع الياي.. ماماتي شو رايج نسير صلاله أسبوعين والله الجو هناك بيكون رووووعه..
أم غاليه: حبيبتي منو بيسير ويانا، أبوج زين منه بياخذ إجازة يومين..
غاليه: تعالي ماقلتيلي منو الي بيروحون ويانا..
أم غاليه: بيروحون عيال عمج خليفه وسعيد
غاليه: الله يعينا عالخقاقين، ومنو بعد..؟؟
أم غاليه: ههههههه ناصر يمكن مب أكيد، وشروق ومروى وشذا، وإحتمال عبدالله وجميله..
غاليه: ناااااااااايس.. ماما بسير برتب شنطتي مره ثانيه..
أم غاليه: وخففي من الأغراض ولاتيلسين هناك تستعرضين كل شوي لبسه، بيقولون هاذولا خقاقين..
غاليه: ماماااااااا
أم غاليه: خلاص خلاص سيري فوق..
غاليه: ماما.. إنتي تحبيني..!!
أم غاليه: ههههههههههههههه لا
غاليه: ماماااااااااااااااا
أم غاليه: يعني سؤال غبي من وحده غبيه.. شو تبيني أرد عليج..؟؟
غاليه: عبري عن مشاعرج، بابا دايما يتمدح بي إلا إنتي كله ساكته وأحسج ماتحبيني.. قولي عبري ذبحني برودج..
أم غاليه: ههههههههههه خلاص بعبر لج.. إنتي الجدر الي أطبخ فيه، إنتي كوب الشاي الي يحرر اليوف.. إنتي الكندوره الي أحب ألبسها ولا أمل منها.. إنتي....هههههههههههه
غاليه قامت وهي معصبه: أنا الغلطانه الي يالسه وياج، أدريبج ماتحبيني.. محد يحبني غير بابا..
أم غاليه: تعالي حبيبتي إنتي..
غاليه: ماحبج إنتي مب أمي..
أم غاليه: هههههههههههههههههههه غلايه تعالي فديتج..
غاليه وصلت غرفتها وسكرت الباب بقوه وفرت نفسها عالسرير وهي تتأفأف وتتحلطم على أمها..
غاليه: أوووووه نسيت برتب الشنطه مره ثانيه..
وقامت تعابل الشنطه وهي مرتبشه ونست أمها وكله تتذكر رحلة اليوم والي بيصير هناك.. وأكيد يدوووه بتستانس، وأكيد بعد بتحبني أكثر وحده.. يالله بابا تعال بسرعه..
سمعت دق عالباب..
غاليه: منوو
ليندا: أنا ماما
غاليه: تعالي ليندا دشي..
ليندا دخلت: غاليه ماما تبيكي..
غاليه: قوليلها أنا يالسه أرتب أغراضي..
ليندا: بابا في تحت...
غاليه: والله..!!
وفرت الجينز الي كان بيدها ونزلت تحت تشوف أبوها، الي كان يالس مع أمها وشكله مضايج..
غاليه: بابااااا
وراحت وباسته ويلست تحضنه وهي تتغزل به، وتعطي أمها نظرات تحدي وأمها ميته من الضحك..
أبوغاليه: هلا بقلبي هلا بغناتي هلا بالي محد يسواها..
غاليه: فديتك أبويه محد فهالدنيا يسواك عندي..
أبوغاليه: والله شكلي بهون عن الطلعه أحس روحي تعبان..
غاليه: بابا إنت وعدتني.. وأنا مجهزة كل شي..
أبوغاليه: بس أنـا..
أم غاليه: خلاص ياغاليه الأسبوع الياي، من الله إنتي فإجازه..
غاليه تضايجت ولفت بويها عن أبوها وأمها ويلست تلعب بالتلفزيون وتغير القنوات..
أبوغاليه: زعلتي حبوبه..!!
غاليه: المهم راحتك..
أبوغاليه: إنزين خليني أرقد ساعتين وعقبها بنظهر..
غاليه: والله..!!
أبوغاليه: هيه حبيبتي.. الحينه الساعه تسع ونص.. الساعه 12 بنظهر.. راضيه علي..
غاليه: ولاعمري أزعل منك ياحبيبي إنت..
ولوت على أبوها ويلست تبوسه..
أبوغاليه: هههههههههه بس خلاص خليني أقوم بسير أرقد شوي وبعدها بنروح عالفجيره..
راح بوغاليه يرتاح وحرمته وراه، وغاليه قامت تتصل ببنات عمها عسب تعرف شو ترتيباتهم..

************_____________************

على الساعه 2 إلا ربع سيارات أهل دبي وصلت للفجيره، غاليه وأبوها وأمها والخدامتين بسياره، والخقاقين سعيد وخليفه وأبوه وكاتيا وبنات عمته شروق وشذا بسياره، وناصر ماخذ معاه أم عبدالله حرمة عمه وعبدالعزيز، وإخواته مروى وميعاد بسياره.. وحميد وحرمته وبنته وفجر بسياره بروحهم..
وصلوا الجماعه للبيت العود الي كانوا ساكنينه قبل أكثر من عشرين سنه، والكل حس بالذكريات الحلوه الي عاشوها هني ترجع لهم..
أبوحميد: منصور تذكر يوم كنا نربط الثور تحت هالنخله ونخوف فجر به نص الليل..
أبوغاليه: ههههههههههههههههه
فجر: ههههههههه شوف إنتوا شو يتذكرون..
أبوغاليه: هههههههه وتذكر يوم فلعتها بالحصاه وقلنا حقها تقول حق أميه إنها دعمت فاليدار.. عسب تتستر علينا..
أم غاليه: ههههههههه هالموقف انا الي أذكره لأني كنت أقنعها تستر عليكم..
فجر: حليلني كنت ياهل وكلكم قاصين علي..
أبوحميد: الله يرحمها أم حميد كانت تحب تيلس العصر هني..
غاليه: الحينه كل هالذكريات بس على هالنخله.. عيل باجي الأماكن شو صار فيها..
فجر: يالله خل ندخل لأميه فديتها...
دخلوا الجماعه كلهم البيت والكبار يتذكرون أحلى سنين عمرهم لدرجة إنه أبوحميد دمعت عينه، والعيال يطالعون البيت العود الي صامد في ويه الزمن ولاهزته الريح.. بيت عمره سنين بس يدل على الأصاله والحب الي تارسين البيت..
أم منصور كانت يالسه تشرب القهوه بالصاله الوسيعه بروحها، أم منصور حرمة عوده جسمها وايد ضعيف ونظرها بعد ضعيف بس ذاكرتها ماشاءالله عليها للحين قويه..
دخل منصور وشاف أمه يالسه تشرب القهوه ولاحد معاها، حط يده على قلبه وهو متحسف ليش قطعها طول هالسنين..
شافها تبا تسحب صحب التمر بس كان بعيد عنها شوي، وتحاول تسحبه بعصاتها ولا قادره عليه.. وطبعا ما انتبهت للي دخلوا عليها ويلسوا يطالعونها، منصور تجدمهم ومسك الصحن وعطاه حقها..
أم منصور: بدر إنت متى رجعت..؟؟
أبوغاليه دمعت عينه، حس اشكثر متوله على صوتها وحنانها، صوتها كله حب وحنيه..
أبوغاليه: أميه..
أم منصور رفعت عينها ويلست تتطالع الريال ومب قادره تثبت شكله..
أبوغاليه: أمايه أنا.. أنا ولدج منصور..
أم منصور بينت عليها الصدمه ويلست تتطالعه بس منصور خر على يدها وباسها ودموعه سبقت شفايفه ليدها..
أم منصور: منصور..!! إنت وين كل هالسنين.. مب حرام عليك أمك تقطعها كل هالأيام...؟؟
أبوغاليه: سامحيني أميه.. غرتني الدنيا وإلتهيت عنكم..
أم منصور: فديتك يامنصور.. والله إني كل يوم أدعي عسى الله يطول بعمري إلين أشوفك إنت وإخوانك..
أبوحميد: أمايه اشحالج..
ووخى راشد على راس أمه وباسها ووراه سميره أخته وفجر..
أم منصور لوت على عيالها ويلست تصيح وتحمد الله الي جمعها بعيالها عقب هالسنين كلها..
أم غاليه: عاد بسكم خلوني آخذ لي لمه من أميه العوده..
أم منصور: فااااطمه..!! فديتج وفديت حسج فالبيت..
وخذتها في حظنها وهي ميته من الصياح..
أم منصور: الله يرحم أختج في قبرها، ماعزيت حد كثرماعزيتها عساها فالجنه إن شاءالله..
فجر: أمايه وين عمي بدر..
أم منصور وهي تمسح دموعها: راح المزرعه، من تقاعد وهو ماله شغله غير المزرعه والعمال.. عيل وين عيالكم مايبتوهم وياكم..؟؟
أبوغاليه: بلى أميه ويانا بس مب كلهم.. أول شي بعرفج على العسل بنت ولدج العود.. غاليه تعالي حبيبي سلمي على يدوه..
غاليه راحت وباست راس يدتها الي سحبتها ولمتها في صدرها..
أم منصور: فديت هالويه ياربي.. محلاتها بنتك يامنصور.. تشبهيني يوم كنت صغيره..
أبوحميد: وأنا أشهد إنها تشبهج.. ماتشوفين الشيبه الله يرحمه مات بسرعه.. إلا من جمالج.. ههههههههههه
أم منصور: تتمناه جمالي يالوهف إنت.. ومنو عندك غيرها يامنصور..؟؟
أبوغاليه: ماعندي غيرها..
أم منصور: الي يشوف هالحلاه كلها مايبا من الدنيا شي ثاني.. غاليه تدرسين..؟؟
غاليه: هيه يدووه فالجامعه..
أم منصور: ماشاءالله ماشاءالله
خليفه رز بويهه: كل واحد فيكم بيقعد يتعرف سنه خلوني أبوس يدووه فديتها..
وحب يدته على راسها الي يلست تتطالعه..
أم منصور: فيك شبه من المرحومه عايشه أكيد ولدك ياراشد..
أبوحميد: هيه هذا آخر الأولاد خليفه.. وهذاك العود حميد والي وراه ناصر.. وبناتي ميعاد ومروى..
كلهم راحوا يسلمون على يدتهم، الي مسكت ميعاد من إيدها يوم سلمت عليها..
أم منصور: ميعاد.. إنتي حامل..؟؟
ميعاد: ماشاءالله عليج يدوه..!! هيه حامل..
أم منصور: وزوجتوا العيال بعد..!! ومنو زوجج..؟؟
أم عبدالله: خذت ولدي عبدالعزيز..
أم منصور: فديته وينه عزيز ماشوفه..؟؟
عزيز حرك كرسيه المتحرك وراح لها وباسها على راسها..
أم منصور: يعلني أفداك يالغالي.. شو الي صار له.. وليش على هالكرسي..؟؟
عبدالعزيز: حادث يدووه.. والحمدلله على كل حال..
أم منصور: ومتى صار الحادث عقب العرس..؟؟
أبومنصور: لا أميه قبل العرس.. والله كتب لهم النصيب..
أم منصور: يعله في ميزان حسناتج يالغاليه.. ومنو بقى ماشفته..؟؟
أم غاليه: باجي الخقاق الثاني سعيد ولد سميره، وحرمة حميد أشواق وبنتها غصون.. وهاذيلا بنات أختي مريم شروق وشذا..
أم منصور: فديتكم عسى الله يحفظكم ويخليكم لأهلكم وتفرحون بهم إن شاءالله..
أبوغاليه: الله يخليج لنا يا أميه.. عاد الوالده غرفنا مثل ماهي وإلا أجرتيها للمهنده.. ههههههههههههه
أم منصور: لا فديتك مثل ماخليتوها ماتغير فيها شي..
أبوحميد: أمايه عيل متى بيرجع بدر والله تولهنا عليه..؟؟
أم منصور: يرجع الظهر على الغدا.. بس لو مستعيلين عليه سيروا له المزرعه.. وعلى قولتهم سبسايس
أبومنصور: ههههههههه شو هاي بعد سبسايس
أم منصور: شو دراني.. عيال خلف ولد بدر يوم يدشون علينا جي يقولون.. يمكن مسبه وأنا مادري..
غاليه: هههههههههه هيه قصدها سربرايز..
أم منصور: هيه هيه هاي هي..
غاليه: يدوه يعني مفاجأة..
أم منصور: مفاجأة..؟؟ والله إنهم عيال بليس من يدخلون قلبوا الدنيا..
أم عبدالله: الله يخليهم لأهلهم..
ميعاد: يدووه وين بنرقد لأني تعبانه وأبا أرتاح..
أم منصور بفرح: فديتكم إنتوا بتبيتون هني..؟؟
أم عبدالله: لو ماتبونا نعرف طريجنا..
أم منصور: العين أوسع لكم من المكان.. سيري فديتج آخر هالممر بتلاقين غرف إختاري الي تبينه...
أبوغاليه: لالا اصبري بسير وراج عن تاخذين حجرتي.. مشتاق أرقد فيها..
وراحوا كلهم على غرفهم يرتاحون شوي.. وأم منصور كل شوي تدخل غرفه تسولف وياهم وهي مستانسه إنهم وياها يونسونها..

في غرفة البنات..
غاليه: ماما بسألج عمي بدر عياله كبار..؟؟
أم غاليه وهي ترتب أغراض بنتها: هيه عنده سلطان أكبر منج تقريبا بسنتين.. والي أكبر منه صالح متزوج وعنده عيال.. وأختهم العوده لطيفه وبعد معرسه وعندها عيال..وعنده خلف.. والباجين ماعرفهم وايد..
غاليه: يعني هو أكبر عن بابا..؟؟
أم غاليه: هيه تقريبا بينهم ست أو سبع سنين..
غاليه: عيل ليش يدوه ينادونها أم منصور مب المفروض على ولدها العود..
شروق: غلووي إنتي ماتدرين إنه أخوهم بالرضاعه..!!
غاليه: والله..؟؟؟؟؟؟؟؟؟ اول مره أعرف..!!
أم غاليه: هههههه يالله بسير لأبوج.. ولو تبين شي ناديني..
غاليه: أوكـــي.. شذا قومي نبدل ثيابنا ونطلع برع..
شروق: أنا برقد..
غاليه: عشان جي ماقلت لج قومي ويانا أعرفج تموتين على رقاد الظهر..
شذا: شو نلبس بناطلين..؟؟
غاليه: هيه عيل شو بعد.. أنا يايبه بدل كويتيه يديده..
شذا: وأنا بعد..
تلبسن البنات وطلعن برع شافوا يدتهم يالسه تشرب قهوه..
غاليه: يدوه وايد تشربين قهوه مب زينه لصحتج..
أم منصور: شو أسوي ياصالحه تعودت عليها..
شذا: ههههههههههههههه
غاليه:يدووه إسمي غاااليه..
أم منصور: هههههههه سامحيني فديتج.. أقولكم.. شو هالصراويل الي لابسينها.. ليش ماتلبسن كنادير أستر لكم...
شذا: ههههههه يدوه جي أريح عالموضه..
أم منصور: بنات دبي ماينرام عليكن.. إمبونكن الدلع لاعب بكن، وهالتلفزيونات خربتكن..
غاليه: يدووه لاتحطين علينا عاد.. الدنيا تغيرت وكلنا لازم نتغير..
أم منصور: شهد نشي شغلي التلفزيون..
شذا: شذا أمييييه إسمي شذا..
أم منصور: مادري من وين يايبينها هالأسماء الصعبه..
قامت شذا وشغلت التلفزيون ورجعت تيلس وهي ميته من الضحك..
غاليه: يدوه شو تبين أحط لج الأخبار..؟؟
أم منصور: وعععععع أي أخبار كلها حرب وذبح بعيد الشر..
شذا: عيل أكيد تبين حلقه بدويه..
أم منصور: لالا ماحبهم يعورون لي راسي..
غاليه: عيل شو تبين تشوفين..؟؟
أم منصور: حطي هالبرنامج اللبناني..
غاليه: أي واحد..؟؟
أم منصور: هذاك الي محطيين الأولاد والبنات في بيت واحد ويغنون ويرقصون وكل أسبوع واحد يظهر..
غاليه: إلحقي شذووي يدووه تبا ستار أكاديمي..
شذا: الحينه منو الي مخربنه التلفزيون..
غاليه: ههههههههههههه
أم منصور: إنتوا شو تقولون أنا ما أسمعكم سمعي خفيف..
غاليه: ههههههههه لايدوه نقول ماشاءالله عليج متابعه المسلسل..
أم منصور: هيه وحليلهم مونسيني.. هذا العماني يعيبني إن شاءالله بيفوز..
غاليه: وعاد تصوتي لهم بعد..
أم منصور: ماعرف أطرش هالي يقولوا عنها مسسات.. وإلا مب مقصره فيهم..
شذا: هههههههههههه ومنو أحلاهم يدوووه
أم منصور: الكويتي أحمد تعرفنه.. يشبه يدكم الله يرحمه بشبابه..
غاليه: هههههههههههههههه لايدتج رايحه فيها.. خلينا نسير برع.. يدوه هاذي حطيناها لج، ونحن بنسير برع نشوف البلاد..
أم منصور: عاد لاتضيعون برع.. ولاتبتعدون أخاف ماتدلون طريق الرجعه..
شذا: إن شاءالله..
طلعوا البنات وهم ميتات من الضحك على سوالف يدتهم..

************_____________*************

على الليل الكل كان مجتمع فالبيت العود وبدر مستانس على إخوانه الي مشتاق لهم ولسوالفهم.. حتى عياله اتصل بهم علشان يشوفون عمامهم وعماتهم..
غاليه: عمي ماشاءالله عليك أحلى من إخوانك كلهم..
بدر: هههههههههههه ربي يخليج لي يابنت أخوي الحلوه..
أبوغاليه: ماعليه غلووي يعني أنا مب حلو..
غاليه: لا بابا إنت حلو بس عمي شكله غير.. شكله مطيح البنات من صغره.. خخخخخخخ
بدر: هههههههههه والله بنتك سوالف.. أنا عني حبيت مره.. وحبيبتي تزوجتها ويبنا عيال.. والله اختارها وراحت عنده.. ولا طيحت بنات ولا غربلت حد..
شذا: عمي لاتتواضع.. إنت لو ظهرت الحين وطلبت عروس، كل الي فالبلاد بيعرضون عليك بناتهم..
بدر: ههههههههههههه أنا مابا أتزوج.. بس بجرب وبقولهم إني قررت أتزوج.. وبشوف من الي بفر علي بناته..
أبوحميد: هههههههههه تمشي ورا كلام البنات..
أم غاليه: أميه محد من جيران أهلي هني..؟؟
أم منصور: مابقى غير هالعيوز أم شامس أسولف أنا وياها كل يوم..
بدر: الله والسوالف كل وحده سمعها أخف عن الثانيه والرمسه شرق وغرب..
الكل ضحك عليهم بس أم منصور ماسمعت شي وحليلها.. شوي ويدخل واحد، كان لابس كندوره سوده وسفره حمرا وماشاءالله عليه جميل يطير العقل.. وملامحه وسيمه وكلها رجوله.. ومن جماله غاروا منه سعيد وخليفه، لأنه من دخل لفت إنتباه الكل..
سلطان: السلام عليكم عرب زايد..
الكل: وعليكم السلام.. الله يرحم زايد إن شاءالله..
دخل سلطان وتوايه مع الرياييل وعيونه تخطف صوب البنات يطالعهن.. والبنات يرمسون عليه يبون يعرفون منو هذا..!!
أبوغاليه: منو الريال..؟؟
بدر: هذا ولدي سلطان..
أبوغاليه: ماشاءالله عليه.. آخر مره شفته كان عمره سنتين تقريبا.. كبر وغدا ريال الله يحفظه لك..
سلطان: الله يخليك ياعمي..
بدر: هذا عمك منصور وهذاك راشد، وهني عماتك فجر وسميره..
وعرفه بدر على الكل وهو بس ينتظر يعرف منو هالبنات.. ويوم شاف أبوه سكت ولاعرفه عالبنات قال لازم هو الي يبدي..
سلطان: الحمدلله يوم الله جمعنا مره ثانيه، عاد الله يهداك يابوي عرفتني عالشباب وخليت البنات، عرفني عليهن بعد..
بدر: ههههههههههه والله البنات ماحفظت أسماؤهم..
غاليه: هههههههه هااه عميه توني أقول عنك شباب وبندور لك عروس..
بدر: ههههههههه خلاص تذكرتكم، هالملسونه غاليه بنت منصور..
غاليه: هههههههههههه
والي هناك شذا وشروق بنات خالتها، والي هناك مروى وميعاد بنات عمك راشد..
بس سلطان ماهمه كل البنات.. من عرف اسم الي في باله سرح عن باقي الأسامي.. غاليه.. وإنتي فعلا غاليه..
سلطان: ربي يخليكن لأهلكم ويشوفونكم عرايس..
سعيد: أقول سلطان إنت وين تدرس..؟؟
سلطان: يطول لي بعمرك أنا أدرس بالتقنيه وبنفس الوقت أشتغل فالديوان.. وإنتوا..؟؟
ويلسوا الشباب يسولفون والبنات طلعوا يتمشون برع، لأن الفجيره أحلى شي فيها إنها منطقه هاديه ويقدر الواحد يظهر برع بالليل ويتمشى بدون خوف..
وعلى الساعه 12 بالليل الكل كان فالبيت راقدين.. لأن باجر وراهم طلعات وتعارف عالمنطقه وأهلها..