منتديات بنوته - عرض مشاركة واحدة

07-15-2010, 12:10 AM

من يحبك كثر ماأحبك انا **
ومن بحبك حاول وياما إجتهد**
ومن بعينه شوفتك كل المنى**
لا ورب العرش ماغيري أحد**

غاليه يالسه تكلم أحمد على النت وتخبره بالي صار لبيت عمها وربيعتها فتون..
مزيون بوظبي: أنا جاسم هذا ما ارتحت له أبداااا
غالية أبوها: والله حرام فتون وايد تعبانه ونفسيتها Down
مزيون بوظبي: الله يفرج همها يارب.. وإنتي قوليلي عمج الحين شو أخباره..؟؟
غالية أبوها: يقولون بدا يستجيب للعلاج.. بس المشكله مب لاقين هالنذل جسوم..!!
مزيون بوظبي: حتى ناصر يدق له من يومين ومب لاقيه، حتى ربعه مب لاقينهم.. بس لاتحاتين إن شاءالله بنلاقيه وكل شي بيتصلح..
غالية أبوها: الله يسمع منك يارب..
مزيون بوظبي: غلووي حبي، أنا أباج بسالفه بس أحسج مب متفيجه لهالشي..
غالية أبوها: لا فديتك عادي، قول شو بخاطرك..!!
مزيون بوظبي: أمممممم بصراحه أنا خلاص نويت أتقدم لج..
غالية أبوها: .......................
مزيون بوظبي: والحمدلله كل شي متوفر عندي، الوظيفه والسياره والبيزات والسمعه الطيبه، ومب باجي غير زهرة حياتي تنور لي بيتي ودنيتي..
غالية أبوها: .......................
مزيون بوظبي: السكوت علامة الرضا وإلا التفكير..؟!!!!!!
غالية أبوها: من قلت بتقدم لج وأنا أفكر في ردة فعل أبويه عالموضوع، أكيد بيقولك لالالا...
مزيون بوظبي: وليش عاد.. أنا مب قاصرني شي، وإلا تتحرون عماركم أحسن عني..
غالية أبوها: ههههههههه مب قصدي، بس أنا في نظره بيبي..
مزيون بوظبي: وفي نظري شيخة البنات، وأميرة قلبي، ووردة حياتي..
غالية أبوها: أممممم أحمد لاتستعيل عالموضوع، تو الناس..
مزيون: شو تو الناس الله يهداج، نحن نعرف بعض من أكثر من سنه، ومتفاهمين ونحب بعض.. وخلاص أنا كبرت ومحتاج لوحده بقربي تهتم فيني وتجابلني..
غالية أبوها: أدري بس أنا بعدني صغيره، ومابي أترك أهلي..
مزيون بوظبي: ياقلبي منو قال بتتركينهم، هذي عمتج تزوجت وللحين رايحه وراده عليكم..
غالية أبوها: ....................
مزيون بوظبي: إنتي فكري على مهلج وردي لي خبر.. لأني صج صج خلاص نويت تكونين غالية منصور حرم أحمد الهاملي..
غالية أبوها: وععععععععع خلني غالية منصور وبس..
مزيون بوظبي: يالسباله الحين إسمي وععع..!!
غالية أبوها: ههههههههههه الحين بخليك بسير برقد وراي بلاوي باجر أخلصها..
مزيون بوظبي: ربي يعينج ويوفقج..
بندت غالية عنه وحطت راسها تبا ترقد، بس وين ترقد بعد الرمسه الي قالها أحمد، معقوله خلاص بتزوج من الي أحبه..!! وخلاص بترك بابا وماما والبيت..؟؟ لالا كيف أروح عنهم..!!
الحين أحس نفسي مابي أتزوج ولا أترك البيت، بس أحمد شو ذنبه علقته فيني والحين أقوله مابي أتزوج..!! يمكن هذا شعور طبيعي لكل بنيه قبل الزواج.. الله يعين على الي ياي..

باليوم الثاني...
ناصر كان يالس فالكوفي شوب مع أحمد ينتظرون ربيعهم الي قال لهم يعرف مكان جاسم..
أحمد: ناصر.. لاتشد فالرمسه معاه..!!
ناصر: الحين خلنا نلاقيه وبعدها يصير خير..
أحمد: أنا أقصد جاسم يوم بنلاقيه، بروحها السالفه عوده ومافينا نكبرها بعناده، تراك بتخسر عمك والبنيه بتخسر شرفها..
ناصر: أدري أدري..
أحمد: وإنت ليش مهموم وزعلان..؟؟
ناصر: أففففففففففففففففف
أحمد: خيبه حرقتني هالأف.. عسى ماشر ياخوي شو صاير لك..!!
ناصر: نجود.. متقدم لها واحد وأهلها يبون يزوجونها..
أحمد: وإنت ليش ماتتقدم لها..!!
ناصر: أبويه معند، يقولي سير إخطب بروحك دامك ودرت بنت عمك..
أحمد: الله يهداه بس.. الحين شروق وخلاص انخطبت شو الي مخلنه معاند ومب راضي..
ناصر وهو مستغرب: شو عرفك إنه شروق إنخطبت..؟!!!!!!
أحمد بإرتباك: أمس.. هيه أمس شفت غاليه فالسوق ونحن نسولف قالت لي.. عاد أنا قلت لها أحسن يوم إنخطبت شو تبا فنصور..
ناصر: هيه..
ناصر كانت سالفة نجود شاغله باله وما إنتبه لأحمد وإرتباكه، وبعدين سالفة جاسم بروحها مصيبه فكيف بينتبه لأي شي ثاني..
أحمد: الحمدلله وصل يوسف..
يوسف: السلام عليكم..
ناصر+أحمد: وعليكم السلام..
ناصر: إشحالك يوسف عساك بخير..
يوسف: الحمدلله تمام، إنتوا اشحالكم عساكم إلا بخير..
أحمد: الحمدلله مانشكي باس..
يوسف: دووم إن شاءالله..
ناصر: الله يخليك.. والحين خبرنا ماشي أخبار..؟؟
يوسف: بصراحه جاسم صار له أسبوع وزياده فالبحرين، وربيعي شايفنه هناك..
أحمد: البحرين..!! شوعنده هناك..؟؟
يوسف: علمي علمك..
ناصر: ورقمه عندك..؟؟
يوسف: عندي.. بس تراه مايرد على أرقام هله، ولو تبي تتصل به من تلفوني الحين بدق لك عليه..
ناصر: إتصل شو تتريا، أبوه مريض ويبي يشوفه، إنت كلمه وقوله أنا مابيرضى يرد علي..
اتصل يوسف لجاسم ومارد عليه، ورجع يتصل مره ثانيه وتم يرن فترة طويله قبل لايرد جاسم وكان شكله راقد..
يوسف: ياريال صار لي ساعه أدق عليك.. وينك راقد فالعسل..
جاسم: هههههههه شو تبا موعني من رقادي..؟؟
يوسف: جسوم اهلك يدورونك.. و.....
جاسم: حسبالي عندك سالفه، أنا شارد عنهم وإنت تقولي أهلك..
يوسف: جسوم أبوك مريض، طاح عليهم وياته جلطه..
جاسم: .......................
يوسف: حرام عليك إرجع أبوك يبا يشوفك، ويمكن ماتلاقيه يوم ترجع، الدنيا غداره إرجع وشوف أبوك..
جاسم يبلع ريجه: من متى هالكلام..؟؟
يوسف: من يومين ومب قادرين يوصلون لك.. والحين قلت لهم إني أعرف رقمك فالبحرين.. دخيلك ياجاسم إرجع أبوك وايد تعبان..
جاسم بند بدون حتى لايودع ربيعه..
ناصر: هااا بشر عسى تأثر وبيرد..؟؟
يوسف: إن شاءالله.. لأنه تم ساكت ومتأثر..
أحمد: الله يهديه يارب..

تفرقوا الجماعه وكلن راح لمكان.. وناصر راح المستشفى وطمنهم إنه لقى جاسم وإن شاءالله اليوم بالليل بيكون هني..
مر النهار على خير بدون أي حوادث، وحل الليل والكل ينتظر رجعة جاسم.. أبوجاسم بعده مايتحرك بس يفتح عينه ويحس في الي حواليه..
على الساعه تسع ونص الكل كانوا واقفين يودعون بوجاسم وبيروحون على بيوتهم.. بس دخل عليهم جاسم وهو متبهدل وشكله كان يركض يبا يلحق على أبوه..
طلال من شاف ولده تحركت إيده بس ماقدر يتحرك أكثر، وجاسم على طول سار لأبوه وطاح على راسه يبوسه ويلس يصيح مثل اليهال..
جاسم: أبويه شو صار فيك.. وليش فالمستشفى..؟؟
أبوغاليه: تعال ياجاسم.. تعال وخل أبوك يرتاح..
جاسم: أبا أعرف شو الي صار له، وليش متشلل..؟؟
أبوحميد: خل أبوك يرتاح الحين، وتعال معانا برع..
طلعوا كلهم برع وخلوا أبوجاسم يرتاح.. راح جاسم مع اخوه وعمامه للبيت.. وفالسياره قالوله إنه ياته جلطه وتشلل، والحين بدا يستجيب للعلاج وإن شاءالله بيقوم بخير..
ووصل للبيت مع أخوه هشام الي مسكه وماخلاه يدخل البيت..
جاسم: شو فيك..؟؟
هشام: تعال أباك بسالفه..
ودخل الميلس، جاسم يلس عالكنبه وهشام مجابلنه..
جاسم: خير..!!
هشام: من وين بيي الخير..؟؟ جسوم تعرف ليش أبوي فالمستشفى؟؟
جاسم: .................
هشام: لأنه سمع عن سالفتك مع فتون.. تعرفها البنيه وإلا نسيتها..!!
جاسم انصدم ونزل راسه..
هشام: نزل راسك لأن الي الي مسوي سواتك حرام يرفع راسه ببين الناس..
جاسم: منو خبره..؟؟
هشام: أنا الي قلت له، بعد مايتني غاليه تطلب مساعدتي، ودورتك ومالقيتك، وماكان عندي حل غير إني أخبر أبويه يحط حل لهالمهزله الي ولده مسونها..
جاسم حط يده على ويهه وبدا يصيح، وهشام خف عليه وماكمل الكلام الي مجهزنه له..
جاسم: خلاص بسوي الي تبونه بس أبويه مايصيبه شي..
هشام: باجر من الصبح تسير لأبويه المستشفى وتحب راسه وتقوله إنك خلاص بتتزوجها، وتطلع من عنده لأهل البنت وتخطبها وتاخذ معاك أمك إخواتك..
جاسم: إن شاءالله..
وقام هشام وراح عنه داخل، وجاسم يلس يلوم نفسه على الي صار لأبوه بسبته، بس شو فايدة الندم الي صار صار خلاص.. وباجر لازم يصلح غلطته..

باليوم الثاني ومن الساعه سبع ونص جاسم قايم من الرقاد، هو أصلا مارقد علشان يقوم..
قام ونزل لأمه فالصاله الي كانت يالسه مع البنات..
جاسم: صباح الخير..
أم جاسم: صباح النور.. شو الي موعنك من صباح الله ولابس وجاهز بعد..
جاسم: بروح لأبويه فالمسشتفى..
أم جاسم: بس بعدها الزياره، إنت تعال تريق والساعه ثمان كلنا بنروح معاك..
ويلس جاسم معاهم وهو سرحان وماله نفس ياكل..
شروق: جاسم تبا بيض..؟؟
جاسم: لا مالي نفس..
شذا: جسوم بقولك شي، شروق ياينها معرس..
جاسم الي انصدم: والله..!!
أم جاسم: يالملقوفه إنتي، إنطبي وكلي وإنتي ساكته..
جاسم: أميه السالفه صج..؟؟
أم جاسم: ناس تكلموا يبونها بس طاح أبوك وتأجلت السالفه..
جاسم: ماشاءالله.. ومنو ولده..؟؟
أم جاسم: أهلنا من الفجيره، أمس يوم ساروا البنات هناك تعرفوا عليهم وصار النصيب..
جاسم: الفجيره مره وحده, يالله الله يسعدها..
أم جاسم: خلاص أنا بقوم بتجهز والي تبا تسير منكم تقوم تلبس ولاتأخرونا..
قاموا البنات يتجهزون وجاسم ينتظرهم فالصاله وهو يرتب الكلام الي بيقوله لأبوه..
وبعد ربع ساعه تجمعوا كلهم وساروا المستشفى، وهناك لقوا أبوغاليه وغاليه وأمها، وناصر وهشام..
أم جاسم: هشام متى ظهرت من البيت..؟؟
هشام: الصبح الساعه سته، رحت أسوي رياضه عالبحر ورجعت تسبحت وظهرت من الباب الي ورا..
أبوغاليه: حرامي شو تظهر من الباب الي ورا..
غاليه: ههههههههههه أونك تسوي رياضه، تعوت على حياة الغرب..
هشام: شفتي عاد..
جاسم: وليش ماتدخلون عند أبويه..
ناصر: الدكتور داخل يفحصه، وقاللنا نقعد هني..
وبعد ربع ساعه طلع لهم الدكتور..
أبوغاليه: بشر يادكتور إن شاءالله أحسن الحين..!!
الدكتور: لا الحمدلله كل شي تماااام.. وبدا يتحرك وحالته تتحسن..
أبوغاليه: الحمدلله.. الحمدلله، ممكن ندخل له..؟؟
الدكتور: طبعا بس لاتجهدونه ولاتعطونه أكل من برع، والذات القهوه والتمر..
أم جاسم: إن شاءالله..
ودخلوا كلهم عليه ولقوه يالس عالسرير والنيرس تفحص له ضغطه، ومن شافهم التفت لهم شوي وإبتسم..
أبوغاليه: ماشاءالله شو هالإبتسامه الحلوه.. حمدلله على سلامتك ياخوي..
أم جاسم: الحمدلله على سلامتك يالغالي..
هشام: أميه لايغرج ضحكته، أكيد شايف له شوفه هني..
أم جاسم: هشووم وويعه.. أبوك مريض وين بيشوف له شوفه..
هشام: شوفي الحلوه الي تفحص ضغطه..
النيرس كانت فلبينيه وماتعرف عربي بس من شافت الكل يطالعها ويضحكون ضحكت وراهم..
غاليه: شكلها ماتعرف عربي..
أبوجاسم: إلتفت بويهه على جاسم ويلس يأشر بيده عليه يبا يقترب، راح له جاسم وبا راسه، ويلس يكلمه ويتسامح منه..
أبوجاسم حاول إنه ينطق ويقول بس مب قادر..
جاسم: أدري الي تبي تقوله يابويه وأنا حاظر، الحين بسويلك الي تبيه.. بس إنت إرتاح..
أبوجاسم غمض عيونه وهو مرتاح من رمسة ولده.. والكل مستغرب شو الي يباه طلال من ولده..
أبوغاليه: جاسم شو السالفه..؟؟
هشام: ولا شي ياعمي.. كل شي بيتصلح وإن شاءالله أبوي بيقوم بالسلامه..
الكل فهم إنه حالة طلال من شي سواه ولده جاسم.. يلسوا الجماعه نص ساعه زياده وبعدها ظهروا وخلوا بو جاسم يرتاح وقعدت عنده حرمته أم جاسم..
غاليه راحت مع أبوها وناصر الشركه، أونها من زمان مازارتهم هناك، سارت مع أبوها لمكتبه وبعدها راحت لناصر ويلست معاه شوي..
ناصر: أممممممممممم شخبار فتون..
غاليه كانت تلعب بالقلم يوم سألها ناصر عن فتون، فرفعت راسها بإستغراب ويلست تتطالعه ومن نظرته عرفت إنه يعرف السالفه..
غاليه: منو خبرك..؟؟
ناصر: هشام، لأنه مب عارف كيف يوصل لجسوم..
غاليه: الله يخليك خله سر من بينا، هذا شرف عيلة كامله..
ناصر: أفا عليج يا غاليه أنا مرباي عدل..
غاليه: خلاص عيل أنا بخليك بسير البيت بكمل رقادي..
ناصر: حظهم البطاليه..
غاليه: هههههههههه الله وأكبر عالحسد..
طلعت غاليه ومرت على أحمد وفتحت الباب شوي وطلت براسها لداخل بكل براءة وطفوليه.. وشافته يالس يكتب شي عالكمبيوتر..
غاليه: تعبت وأنا أوايج عليك وإنت مب حاس فيني..
أحمد رفع راسه: هلا وغلا بغاليه منصور..
غاليه: مشغــــول..!!
أحمد: ولو عندي مليون شغله أفضالج..
غاليه: أممممممم كنت عند ناصر وقلت قبل لا أروح أمر أسلم عليك و.......
أحمد: وشـــو..؟؟؟
غاليه يلست عالكرسي وحطت ريل على ريل ونزلت راسها..
احمد: قولي إنج وافقتي.
غاليه مارفعت راسها ولانطقت بس هزت راسها علامة القبول..
أحمد: فديتج والله، عسى الله لايحرمنا من بعض..
غاليه: بتكلم بابا..!!
أحمد: امممم لا.. أحس ببتدي بناصر وبفاتحه بالسالفه وبخليه هو الي يكلم الوالد ولو ماعنده مانع نتقدم رسمي..
غاليه: على راحتك.. يالله الحين بخليك..
أحمد: تو الناس.. إقعدي شوي..
غاليه: باجر بتمل مني..
أحمد: أنا أمل منج، إنتي لو الواحد يجابلج ميت سنه مابتكفيه..
غاليه: أونك عاد تجاملني...
أحمد يلس على الكرسي الي مجابلنها وهو مبتسم..
أحمد: وليش أجاملج.. كل الي أقوله ينطقه قلبي قبل لساني..
غاليه حطت إيدها على ركبتها ويلست تناظر عيونه وهي بحب..
أحمد بإرتباك: انا أقول لو تظهرين أحسن قبل لاأسوي شي وتزعلين مني..
غاليه: هههههههههههه خلاص باي
وطلعت غاليه وخلت أحمد طاير من الفرح أخيرا بيستقر مع الي يحبها الي هي أحلى مخلوقة شافتها عينه..
وغاليه بعد محد مثلها اليوم، الي تحبه خلاص بيتقدم لها، وبتعيش معاه بكل فرح وسعاده..