منتديات بنوته - عرض مشاركة واحدة

06-30-2010, 03:16 AM

الدنيا ليل والجو مظلم في بيت أم منصور العود.. فالصاله كل البنات يالسات على أعصابهن، والشباب مب موجودين..
بعد ماطلعوا من البيت عالكورنيش بحوالي ساعه، بدر طالح عليهم ونقلوه عالمستشفى ولمن ارجعوا وصلهم الخبر فراحوا الشباب وبقوا البنات ينتظرون أي خبر يوصلهم عن عمهم..
وعلى الساعه وحده ونص اتصل ناصر لمروى وطمنهم إنه عمه بخير.. تطمنوا البنات شوي وراحوا لغرفهم يرتاحون، بس غاليه بقت فالصاله تنتظر أي حد يرجع لها.. بعد ساعه تقريبا وصلوا الشباب وشافوا غاليه راقده بالصاله..
ناصر: غاليه.. غاليه قومي سيري داخل ارقدي..
غاليه: عمي شخباره..؟؟
أحمد: لاتحاتين.. هو بخير والحمدلله.. ياته غيبوبة سكر، الظاهر كان مهمل الدوا..
غاليه: الله يقومه بالسلامه..
ناصر: يالله قومي سيري داخل..
غاليه: إن شاءالله..
قامت غاليه وسارت غرفتها وهي بعدها متوتره من أشياء وايده، أولها سلطان الي خايفه منه وايد.. وعمها المريض الي مب عارفه شو تسوي له.. وأحمد الي لايمكن تتركه لو شو ماصار..
باليوم الثاني.. الكل راح المستشفى يتطمنون على عمهم.. الي قام بالسلامه الحمدلله وكان يالس ويضحك وياهم، وغاليه يالسه على سريره وتأكله..
غاليه: الحين لازم تخلص هالأكل كله، ومن اليوم ليومين زياده محد غيري بيأكك..
بدر: ههههههههه حاظر ياأمي..
غاليه: هيه جي أباك شطوووور..
أم منصور: ههههههههه
ناصر: غاليه اليوم عيل ماشي طلعه..!!
غاليه: لالالالا إنتوا روحوا أنا بقعد هني مع عميه فديته..
أحمد: عيل بيفوتج.. نبا نسير المنتجع الي في دبا..
غاليه: والله..!! أممممم لالا عمي أولى منه..
بدر: هههههه لاحبيبتي سيري معاهم، وأنا بقعد هني..
غاليه: والله مب سايره.. ماتنفع الروحه بدون قمرنا بدر..
أم منصور: ههههههه مينونه هالبنيه..
أحمد: صج مابتروحين..؟؟
غاليه: هيه.. مالي نفس..
مروى: عيل نحن بعد مب رايحين.. بنيلس فالبيت أحسن لنا..
شروق: ولو إنه يمدحونه هالمنتجع بس برايه.. لأنه بدون غاليه ماينفع..
غاليه: فديتكم والله.. عيل خلاص اليوم بنتغدا فالمزرعه..
أم منصور: يوم أقولكم مينونه محد صدقني..
غاليه: يدووووه.. ماشي مجال للنقاش اليوم يعني اليوم غدانا فالمزرعه.. والحين عميه إشرب هالشوربه الحلوه..

على الساعه 2 ونص الظهر الكل كان فالمزرعه يالسين وينتظرون الغدا.. أم منصور والشباب يالسين على جهة والبنات منعزلات بروحهن..
مروى: ليش ماعزمنا نسايب المستقبل..!!
شذا: منو..؟؟
مروى: يعني منو غير زايد، وإلا شو رايج شروق..
شروق بحيا: أسميج ماصخه.. بس جب أشوفج..
ناصر الي سمعهم: شروق.. دقي لميثه خليها تيينا هني، وتييب زايد وياها بالمره، خل نتعرف عليه..
شروق الي قامت من مكانها: أنا بسير للأرانب أحسن لي, قسما بالله إنكم ماصخين..
غاليه: ههههههههه ونحن شو قلنا.. نبا نتعرف عالأوادم..
شروق: سيروا بيتهم تعرفوا..
وراحت عنهم شروق بعيد عند الأرانب ويلست بكل ضيج الدنيا تنافخ.. هو شو مايحس بكل بساطه يبيني آخذ غيره، بكل سهوله يقولي سيري تزوجي.. لازم يوم عنده ست الحسن نجود اكيد مرتاح في بعادي.. اوووف لو يرجع بالزمن لورا كنت بتملكك للأبد ياناصر..
وفي عز ماهي سرحانه سمعت صوت حركه من وراها وخافت، قامت نقزت ولزقت بسور الأرانب.. وشافت في ويها سلطان الي كان واقف يطالعها..
سلطان بكل هدوء: سوري خوفتج..!!
شروق: لا بس كنت سرحانه.. حطوا الغدا..؟؟
سلطانه: هيه..
شروق: أوكي بسير بشوفهم..
بس سلطان وقف في ويها وماخلاها تروح..
سلطان: شروق... إنتي ليش خايفه مني..؟؟
شروق وهي مرتبكه: وليش أخاف..!! إنت ولد عمي وعادي..
سلطان وهو يتقرب منها: بس كلما شفتيني نقزتي.. ليش أنا شكلي يخوف..؟؟
شروق: بالعكس إنت إنسان وسيم ومستحيل حد يخاف منك..
سلطان ابتسم بغرور: أدري.. وأدري بعد أي بنيه أتمناها لازم أوصل لها لو كانت بنت منو..
شروق: الله يهنيك.. والحين اسمحلي أنا بروح لهم..
سلطان: شروق.. أبا منج خدمه..
شروق: نعم..
سلطان: أنــا أحب وحده وأباج تساعديني أوصل لها..
شروق: والله..!! منــو..؟؟
سلطان وهو يركز عينه فعينها: غـــاليه..
شروق شهقت بقوه وردت واسكتت، غاليه.. معقوله هالمجرم يبا غاليه.. والله لا أذبحه قبل لاياخذها..
شروق: اشمعنى غاليه..؟؟
سلطان: قلبي دق لها دون عن الكل..
شروق: والمطلوب..؟؟
سلطان: تبينين لها حبي.. وإني بسوي المستحيل علشانها، وأباج تقولين لها سلطان الي يبيه بيحصله ولو على جثته.. ولو ماصار الي أبيه والله مابيصير خير.. وإنت فاهمه معناة كلامي عدل..
شروق هني ماقدرت تتحمل وقامت تركض بسرعه عنه وهي قلبها خلاص طايح من الخوف، المجرم يهدد.. تاجر المخدرات الخسيس النذل يبي غاليه ويهددهم بعد..
وصلت شروق للبنات وهي ميته خوف وراحت وسحبت غاليه من مكانها وراحوا بعيد عن الكل..
غاليه: بسم الله شو صاير.. ؟!!
شروق حكت لها السالفه وهي تصيح ومب قادره تمسك نفسها..
غاليه: الحيوان.. شو يتحراني بضاعه عنده وإلا من ممتلكات أهله الخاصه، والله ماكون بنت منصور لو ما أدبته..
شروق: غاليه لاتتهورين إنتي نسيتي إنه تاجر مخدرات وممكن يسوي فيج أي شي..
غاليه: يخسي النذل الي مب مرباي..
ناصر من وراهم: منو الي مب مرباي..؟؟
غاليه وشروق اسكتوا وناصر اقترب منهم..
ناصر: شو السالفه..؟؟ وليش شروق خايفه..؟؟ ومنو الي بتأدبينه..!!
غاليه: مايخصك بالسالفه.. وبليز لاتتدخل..
ناصر عصب: إنتوا هني فحمايتي.. يعني أتدخل في كل شي.. يالله أشوف خبروني شو السالفه..
غاليه مالقت حل غير إنها تخبره بكل شي من الي سمعته شروق قبل يومين إلين سالفته الحين وهو يهدد..
ناصر: نحن وين عايشين في نيويورك.. أقصاها الفجيره، أي تجار مخدرات وأي خرابيط..؟؟
شروق: لاتتحرانا يهال.. أنا بإذني سمعته، وهو يقول البضاعه وحقك ومادري شو..
ناصر: سلطــــان... مستحيــــل.. وبعدين هو شو يبا بغاليه..؟؟
شروق: يعني شو يبا.. يا حب أو زواج..
ناصر: أنا بكلمه..
غاليه: أخاف يعصب ويكبر الموضوع..
ناصر: عيل شو تبوني أسوي.. ألم قشارنا ونشرد على دبي.. نحن رياييل ولازم نتفاهم.. شو فوضه الدنيا يهدد بنات عمه..
راح ناصر وهو معزم ينهي السالفه مع سلطان قبل الليل.. تغدوا الجماعه ويلسوا للعصر وبعدها إرجعوا على البيت العود..
غاليه والبنات ماحبوا يروحون مكان وقرروا يرقدون شوي.. وغاليه وشروق مالهم سيره غير عن الي بيصير والمشكله الي ممكن تكبر من بينهم..
على المغرب ناصر شاف سلطان يدخن سيجاره بالحوش فراح له ويلس معاه، بس مانطق ولا بكلمه..
سلطان: خاطري أسافر.. صار لي أكثر عن سنه ماظهرت من الفجيره..
ناصر: شكلك وايد مشغول.. حتى دبي أو بوظبي ماتوصلهم..!!
سلطان: تعرف مشاغل الحياة وايد..
ناصر: والتجاره والبضايع ماخذه كل وقتك..
سلطان استغرب: ياريال أنا وين والتجاره وين..راس مالي مزرعة أبوي..
ناصر: سلطان نحن رياييل ونفهم بعض.. خلنا نتكلم بصراحه..
سلطان فر السيجاره: خير ياناصر شو عندك..؟؟
ناصر خبره بالي سمعوه البنات وعن الشكوك الي بداخلهم.. ناصر يحكي وسلطان مبين عليه الصدمه واول ماخلص ناصر السالفه سلطان انفجر يضحك بصوت تردد صداه بكل مكان..
سلطان: وأنا أقول بلاها شروق كل ماشافتني قامت تتنافض.. هههههههههههههههه والله إنهم يهاااالوو
ناصر: شو السالفه وليش تضحك..؟!!!!
سلطان: الله يسلمك أنا كنت أكلم ربيعي عن بروجيكت التخرج، وهو مسافر برع الدوله وكنت اوصيه على شغلات أحتاجها من هناك، وأهم شي تكون أشياء حلوه ومحد عنده مثلها، عسب أقدر أسوي أحلى بروجكت.. والظاهر البنات إلتبس عليهم الأمر..
ناصر: يمكن. والله مادري شو أقولك بس أنا بعد شكيت بالسالفه وقلت مستحيل سلطان يسوي جي..
سلطان: ههههههههه والله عليهم سوالف..
ناصر: هذا وخلصنا منه.. ممكن أعرف شو تبي من غاليه..
سلطان انصدم وانحرج وتلون ويهه، معقوله خبروه عن هالسالفه بعد..
سلطان: البنيه وايد عايبتني وأنــا.......
ناصر: سلطان لاتكمل.. أعرف إنك تحبا، بس غاليه ماتصلحلك..
سلطان فار دمه: وليش عاد، أنا شو ناقصني عسب ما تصلحلي..
ناصر: سلطان إهدا.. غاليه ماتصلح لأي حد مب بس إنت.. بنت عمي مريضه بالقلب ولاتقدر تتزوج ولاتييب عيال..
سلطان وكأنه حد صب عليه ماي بارد، يلس ساكت وهو يطالع ناصر.. كان بين المصدوم والي مب مصدق.. معقوووووله غاليه مريضه ولاأقدر أتزوجها..!! كيف..؟؟ ليش..؟؟
ناصر: أدري الخبر وايد قوي عليك.. بس هذي الحقيقه..
ناصر تنهد ورجع يكمل..
ناصر: غاليه كلنا حبيناها وتمنيناها.. بس مانقدر نحرمها من الحياة.. كفايه إنها عايشه من بينا..
سلطان أخيرا نطق: وهي تعرف هالشي..؟؟
ناصر: لا... وأتمنى ماتقولها شي..
سلطن وقف وعطى ناصر ظهره..
ناصر: على وين..؟؟
سلطان: الله يخليك حاب إني أقعد بروحي..
ناصر خلاه يروح بدون لايوقفه وهو حاسس بالي داخله، قبل سنين مر ناصر بنفس الموقف.. حب بكل قلبه وعواطفه.. بس هالحب انجلع من قلبه مثل طلعة الروح.. وهالإحساس يعذب.. وهو يعرف شعور سلطان بهاللحظه، فخلاه بروحه يتقبل الصدمه ويبلعها..

رجع ناصر داخل ولقى الكل يالس.. وأم منصور حاشرتنهم..
أم منصور: اليوم الساعه عشر محد يقرب من التلفزيون سمعتوني..
شذا: هيه البرايم اليوم لازم ماتبين أي إزعاج..
أحمد: ههههههههههه والله صج إتابعينه يدوه..
أم منصور: هيه أتابعه.. وأشجع هالحليو أحمد الكويتي..
مروى: عيايز آخر زمن..
أم منصور: عيز حيلج يالدبه..
ناصر: ههههههه عاد مراوي مالج شغل بيدوه، إن شاءالله أحمد يكون الأول...
أم منصور: هيه فديتك صوت له..
ناصر: هههههههه حاظرين من العين..
أحمد: وينه سلطان..؟؟
ناصر: مادري قال بيظهر شوي وبيرد..
مر باجي اليوم بكل هدوء وسلام.. وسلطان تحاشى يجابل غاليه، بس آخر الليل كانت ظاهره من المطبخ سايره لغرفتها وشافته في الصاله منزل راسه وشكله مهموم..
غاليه خافت منه.. بشو يالس يفكر.. والله شكلي بذبحه وبفتك منه..
سلطان رفع راسه وشافها ويلس يتأملها.. هو نظراته كانت حزن على شفقه.. على حب، بس الليت كان خفيف وهي فسرت نظراته تحدي وغرور.. والله ماكون غاليه إن ماراويتك نجوم الليل بعز الظهر..
غاليه: تصبح على خير..
سلطان مارد عليها.. وخلاها تمر من جدامه وتسير لغرفتها.. واول ماسكرت الباب تنهد بكل قوه وغصب نزلت دمعه حااااره من عينه حرقت له ويهه..
سلطان: تصبحين على ألف خير، ياحبي الي مات قبل لاينولد..

اليوم السبت آخر يوم للجماعه في الفجيره، قامت غاليه كالعاده من الصبح وهي نشيطه، بس الي غير معتاد عليه بنات عمها وخالتها قاموا من وقت.. أونه يودعون آخر يوم لهم بالفجيره..
طلعت غاليه برع وهي لابسه بدله كويتيه زرقا.. وشيله زرقا.. شافت كالعاده يدوتها يالسة تتريق ومعاها أحمد وسلطان..
غاليه: صباح الخير لأحلى يدوووه بالدنيا..
وباستها على راسها ويلست مجابله أحمد وهي مبتسمه بهدوء..
أم منصور: وينهن البنات..؟؟
سلطان: أميه إنتي من أول يوم وصلوا هني وإنتي تنتظرينهم يقومون الصبح.. ودايما يخيبون ظنج..
غاليه: بس اليوم قاموا.. بنسير المزرعه نودعها وبعدين بنتمشى فالفرجان شوي.. وبنزور ميثووه ونواري.. وبنرجع نتغدا..
أحمد: ماشاءالله جدولكم عامر اليوم..
غاليه: آخر يوم وخلاص رادين لدبي..
سلطان: بس لازم تزرورنا كل إجازه.. استوينا أهل و.. وإخوان..
غاليه مافهمت عليه أول شي وتمت ساكته..
أحمد: أكيـــد.. ولازم إنتوا بعد تزورونا..
أم منصور: يوم عرسكم إن شاءالله..
استانسوا غاليه وأحمد لأن يدوووه جمعتهم بكلمه العرس..
غاليه: عاد يوم عرسي أباج تيلسين ويانا شهر.. لا شهرين..
أم منصور: آميييين يارب، الله يبلغني فيج وأعيش ليوم عرسج..
أحمد: آمين يارب..
سلطان ماتحمل يسمع هالكلام: أنا بظهر بسير المزرعه..
طلع سلطان وغاليه بخاطرها فراقك عيد أوووف لزقة.. والتفتت للبنات يوم دشوا عليهم الصاله وهم لابسات وكاشخات..
أم منصور: أشهد إنكن ماطاحكن المذهب، عيل الحين من أسبوع وأكثرعندنا ولاتقومن الصبح إلا آخر يوم..
غاليه: هههههههههه عليج بهن لاترحميهن..
مروى: ماعليه غلوووي دواج بعدين.
وراحت مروى تلوي على يدتها وهي تراضيها وتتدلع عليها..
مروى: فديتج يدوووه الله لايحرمني منج..
أم منصور: خوزي عني هناك.. الحين تتفداني..
غاليه: ههههههههههه هالحركات ماتمشي عليها إلا معاي أنا..
شروق: إنتــي عاد دايما ماخذه الغلا كله..
غاليه: فديـــــتني..
شذا: عن المصــاخه وقومي لبسي عباتج وخلينا نسير نخلص مشاويرنا قبل الغدا..
قامت غاليه ولبست عباتها ولحقت البنات وهي طالعه شافت أحمد ظاهر من ملحقهم..
غاليه: بتروح المزرعه..؟؟
أحمد: لا.. بسير مع خليفه وسعيد نودع رباعتهم الي تعرفوا عليهم هني...
غاليه حطت إيدها على خصرها: لايكون بنات..؟؟ أعرفها حركاتهم خلوف وسعود السبلان...
أحمد: ههههههههه لاتحتاتين ربعهم الي كانوا معاهم في مسابقة اليوله، أمس كنت يالس معاهم..
غاليه: أوكــــي..
وراحت غاليه مع البنات للمزرعه الي كانت هااااديه بشكل رومانسي، وغاليه على طول راحت تودع الأرانب وبالذات أرنبتها غاليه.. والبنات ساروا عند الخيول.. وشافوا سلطان راكب الخيل الأسود وكان شكله روووعه بالبدله ولابس كاب وشعره الطويل مبين من ورا..
مروى: ياربي هالريال عذااااب.. يستاهل يكون من دبي مب الفجيره..
شروق: هههههههههه علشان تجابلينه ليل نهار..
شذا: ههههههههه شكله جي..
مروى: بايخاااااااات
سلطان اتجه عليهم بالخيل وهو يمشي على راحته، ومروى تخبلت عليه..
سلطان: حد يبا يركب..؟؟ بمشي الخيل شوي شوي..
شذا: أنا أخااااااف..
شروق: وأنا أخس عنها..
سلطان: ومروى..؟؟
مروى: عادي.. بس يقولون مب زين الخيل للبنات..
سلطان: ههههههههه لا عادي أنا بس بمشيها على مهلها وإنتي إيلسي على جهة وحده براحتج..
مروى: أمممممممممممم أوكـــي..
دخلت عنده مروى وحاولت تركب بس ماقدرت، فساعدها سلطان وركبت..
مروى: أوييييه واااايد مرتفعه.. على الله ما أطيح..
سلطان: أفــا وأنــــا شو فايدتي هني..
وقعد يمشي فيها على طول وعرض المكان، وهي مستاااانسه.. شوي وياتهم غاليه الي تخبلت تبا تركب بس تعرف أحمد بيعصب عليها وفي نفس الوقت ماتبي تعطي سلطان أي مجال..
غاليه بصوت عالي: عسااااااج تطيحين يامراوي..
مروى: الله وأكبر عليج.. الله يخليك سلطان بنزل..
سلطان: إصبري شوي..
مروى: لالالالا غلوووي دعوتها والقبر..
سلطان: ههههههههههه يالله إنزلي..
ونزلها سلطان ووداها للبنات ووقف يطالع غاليه الي شوي وبتصفعه على ويه..
سلطان: غاليه..تبين تركبين..؟؟
غاليه: لا.. مشكوووور
سلطان: ما أعتقد إنج خوافه..!!!!
غاليه: لا.. بس الخيل مب من هواياتي.. يالله بنات خلونا نخلص جولتنا ورانا مشاوير إشكثر اليوم..
ومشوا البنات وبقت مروى تشكر سلطان وتودعه ولحقت بالبنات بسرعه..
عند البقر الي يلست غاليه تأكلهم، والبنات راحوا بعيد عنها لأنهم مايحبون ريحتهم.. إقترب سلطان منها وهي مب حاسه فيه..
غاليه: لاتزعلون عليهن هالغبيات هم مايفهمون فالحب، ومايدرون إنا صرنا ربع.. وبعدين هم الي ريحتهم سم، فديتكم والله بتوله عليكم..
سلطان: تودعين البقر..
غاليه ثبتت فكانها من الخوف بس رجعت وتماسكت: هيه..
وفرت الي في إيدها عالأرض ومشت..
سلطان: آسف مب قصدي أضايج فيج، خلاص خلج هني وأنا بروح..
غاليه وقفت وهو مر عدالها وراح وحست فلحظه إنها لازم تحط نهاية للي من بينهم، مايصير أظلمه أو أظلم حبه..
غاليه: سلطان.. ممكن كلمه...؟؟؟
التفت لها سلطان وهو مبتسم: آمريني..
غاليه: سلطان.. أنا مقدره شعورك تجاهي ولاتحط بخاطرك لإني بدون إحساس أو إني مب مراعيه لمشاعرك كل السالفه ياسلطان إني.. إني..
سلطان: إنج تحبين واحد غيري..
غاليه: كيف عرفت..؟!!
سلطان: إحساس قلبي.. المهم غاليه أنا بعد بخاطري شي أبا أقوله لج...
غاليه: تفضل..
سلطان: أنا صحيح بخاطري مشاعر تجاهج، وأحس بها لأول مره بس في نفس الوقت أنا ولد عرب ومرباي عالأصول.. ومستحيل أتعدى على الي يخص غيري.. وإنتي ملك لغيري والله يوفقج..
غاليه بفرح: صج والله..؟؟
سلطان وهو مبتسم: صج.. وبتم طول عمري أذكر غاليه منصور الي غيرت حياة سلطان.. للأبد..
غاليه: الله يوفجك إن شاءالله ويرزقك بالي تقدر حبك وقلبك الكبير..
سلطان: آمين يارب.. والحين أتمنى نبقى ربع ولا من بينا أي عداوه أو خصام..
غاليه: إن شاءالله.. ومن اليوم نحن إخوان..
سلطان: مع السلامه..
غاليه: في حفظ الله..
راحت غاليه لبنات عمها الي ينتظرونها وهي مستانسه حيل على الي صار.. الحمدلله إني قدرت أكسبك ياسلطان أخو وصديق، وربي يعوضه ويوفجه ويلقى البديله الي تقدره..
وخلصوا البنات من توديع المزرعه ويلسوا يتمشون بين الفرجان، وهم يتذكرون كل لحظاتهم الحلوه وكلما شافوا هندي وإلا ياهل سووله باي وودعوه..
ووصلوا أخيرا لبيت ميثه ونواري، الي إستقبلوهم وضيفوهم..
ميثه: حرااااام يعني اليوم آخر يوم..
نوره: إنزين مددوا شوي بعد..
غاليه: مصيرنا فالنهايه بنروح.. الحين يالله عطونا أحلى عصير عندكم.. عطشااانه..
ميثه: كوماري ييبي العصير لاتموت علينا غاليه المنصوري..
مروى: ههههههههههه وإنتوا قولولنا متى بتيون دبي..؟؟
نوره: نحن كل أسبوعين ننط هناك ولو ساعتين..
ميثه: بس الحين لا بنط لكم وبنيلس بالساعات..
غاليه: خل إنتي عاد.. منو غيرج ملقوف وثجيل بالزياره..
ميثه: تتمنينها لقافتي..
غاليه: هههههههههه
ميثه: بس شكلنا الأسبوع الياي عندكم نخطب..
شروق استحت بس ميثه مارحمتها..
ميثه: عاد زيووود متخبل علينا يقول مايخصني أبا العرس بسرعه..
شروق: وأنــا أقول خلونا نروح بسرعه..
نوره: هههههههههه لالا خليكم شوي..
غاليه: لازم نروح.. لأن أميه العوده تنتظرنا عالغدا.. والحين الساعه 12 ونص يعني مافي وقت..
نوره: خلاص عيل لازم نودعكم..
وقاموا البنات وسلموا على بعضهم وودعوهم على أمل يلتقون قريبا..
ورجعوا البنات للبيت وشافوا يدتهم تنتظرهم بالغدا.. تغدوا ودخلوا يرتاحون ويجهزون أغراضهم لأنهم بيردون دبي العصر بعد الصلاة..
على الساعه أربع ونص العصر الكل كان برع يودعون أهل دبي الي خلاص حملوا أغراضهم ومب باجي غير الوداع..
ناصر وغاليه وشذا بسياره.. وخليفه وشروق ومروى بسياره، وأحمد وسعيد بسياره.. خلاص ركبوا السيايير بعد ماودعوا يدتهم وعمهم بدر.. بس سلطان مب موجود ولايعرفون وين سار عنهم.. وقبل لاتركب غاليه السياره شافت سلطان ياي صوبهم وهو شايل الأرنبه غاليه..
غاليه: يايبنها تودعني..؟؟
سلطان: لا.. أنا قررت أهديها لج، علشان دايما تتذكرين الفجيره وهالزياره الحلوه وتعيدينها..
غاليه شالتها بيدها: والله..!!
ويلست تتأملها وتحسها خايفه منها..
غاليه: أنا عشت طول عمري وحيده بدون إخوان ولا إخوات، وتمنيت من كل قلبي لو بس أخو واحد.. بس الله حرمني منهم.. وأنا مابي غاليه الأرنبه تتعذب مثلي.. خلها مع إخوانها أحسن لها..
ورجعتها له: أوصيك فيها لاتهملها لا هي ولا باجي الأرانب ولا الخيول ولا البقر.. ولا المزرعه بكبرها.. والله يوفكم كلكم...
سلطان تم حاظن الأرنبه وهو يشوف غاليه تركب السياره وتروح..
راحت غاليه.. وراحت معاها أحلى أيام ممكن تجمعه مع غاليه، بس الأيام الي راحت بتظل ذكرى حلوه ماتمحيها السنين ولا لوعة ومرارة الأيام..