منتديات بنوته - عرض مشاركة واحدة

06-30-2010, 02:55 AM

الجزء الثامن..

اليوم ملجة فجر الي الكل مستانسين لها، وهي بروحها طايره من الفرح وخلاص ودها العرس يكون اليوم قبل باجر..
دخلت غاليه على عمتها الي كانت منسدحه ورايحه في أحلام اليقظه..
غاليه: بووووووووووو
فجر: بسم الله الرحمن الرحيم.. شوي شوي يالدبه..
غاليه: هههههههههه بشو سرحانه ست الكل..
فجر: أممممم أفكر بحالج من بعدي..
غاليه: يالله أحلى حال.. فرح وسعاده بفراقج..
فجر تفرها بالمخده: يالسبااااااله، حرام إنج بتصيحين علي..
غاليه: لا والله صدقيني إلا برقص وبغني وكل يوم بسوي عزيمه..
فجر: الأيام بينا وبنشوف..
غاليه: خل عنج هالخرابيط أشوف، وقومي تسبحي راعية الصالون الحين بتيي..
فجر: إنتي تسبحتي..
غاليه: أكيـــــــد وغسلت شعري وأنطرها توصل..
فجر قامت تسبح وهي تغني تحت الدش..(( إلين سنتين أنا صابر.. قالولي يجي باجر.. شخلصي الليل وظنونه على جيتك على باجر.. وأنا صابر أنا صابر على جيتك أنا صابر..))
خلصت فجر حمامها وطلعت ولبست جلابيه واسعه عسب عقب تقدر تبدل بسهوله.. وراحت تحت لقت غاليه تستقبل راعية الصالون ودخلتها..
غاليه: عموووه وين بتسوين التسريحه والمكياج..؟؟
فجر: في حجرتي أحسن شي..متى بيون بنات عمج..؟؟
غاليه: وليش بيون من الحين؟؟
فجر: أنا مب قايلة لج تخبرينهم إيون عسب يتعدلون هني..
غاليه: خليهن برايهن.. بيروحون أي صالون..
فجر كانت حاجزه خبيرة التجميل عذبه المشهوره بحلاة مكياجها، ودخلوا غرفة فجر عسب يبدون فالمكياج.. وغاليه مستانسه ويالسه تجرب السيديات للحفله.. وحاشره الدنيا..
فجر: ياغاليه قصري شوي الحرمه مب قادره تشتغل..
غاليه: إن شاءالله..
فجر: بس ماقلتيلي رتبوا مكان الحفله تحت..
غاليه وهي تاكل كاكاو: لاتحاتين كل شي جاهز، ماما مب مقصره من صباح الله على روسهن..
وخلصت فجر مكياجها وبدت فالتسريحه وقامت غاليه عسب تحطيلها الخبيره مكياج..
غاليه: عاد أنا أبا مكياج هادي.. يعني ماله داعي تسويني ساحره مثل عمووه..
فجر: انا ساحره يالعنز..
غاليه: هههههههههه
الخبيره عذبه: ولا يهمج.. وإنتي ماشاءالله عليج قمر ماتحتاجين مكياج ثجيل..
غاليه استانست عالمدح ويلست تأشر على فستانها عسب تسويلها المكياج..
على الساعه سته ونص الكل كان جاهز والبيت روعه بالزينه والليتات الي منورتنه..
أبوغاليه كان يالس بالصاله يسولف مع حرمته يوم نزلت عليهم غاليه وهي كاشخه بفستانها الأسود مع العنابي وشعرها المفتوح، شعرها قصير واحتارت الخبيره شو تسويه لها فخلته مفتوح..
أبوغاليه: يالله ياناس لو حد شاف فهالدنيا قمر احلى عن بنتي..
أم غاليه: لا إله إلا الله.. ربي يحفظج ياغاليه..
أبوغاليه: الله يحفظج لي يارب.. تعالي خليني أشوف هالحلاه كلها..
غاليه راحت عند أبوها وهي مستحيه ويلست على الكنبه تطالع أبوها وأمها، وأبوها وايد مستانس عليها..
أبوغاليه: عيل العروس وينها..؟؟ سيري خليها تنزل..
غاليه: لا بابا العروس ماتنزل إلا بعدين وإنت لو تبيها اطلع لها فوق..
أبوغاليه: بعد شغله اليوم.. خلاص بطلع فوق بسلم عليها..
طلع بوغاليه فوق ودخل على أخته الي كانت يالسه على السرير وحاضنه صوره بيدها.. دخل منصور ويلس حذالها وحط يده على جتفها ويوم شاف الصوره سحبها من يدها..
أبوغاليه: مشتاقة لهم..؟؟
فجر: عمري ماتمنيت شي كثر ماتمنيت إنهم يكونون موجودين بيوم مثل هذا..
أبوغاليه: الله يرحمهم إن شاءالله.. وانا يافجر مب كفايه..!!
فجر حطت راسها على صدره: فيك الخير ياخوي..
أبوغاليه: خلاص عيل عن هالزعل وقومي تجهزي ما أبيج تنزلين وانتي حزينه..
فجر: إن شاءالله..
طلع بوغاليه وسار عنها ولقى غاليه يالسه عند أمها وبنات أخوه..
أبوغاليه: ماشاءالله الكل هني..
ميعاد: هلا عمي اشحالك.. فجر فوق..؟؟
غاليه: هيه فوق.. قوموا نطلع لها..
أبوغاليه: خلاص بسير الميلس الحين بيون الرياييل..
طلعوا البنات فوق ويلسوا عند فجر وهن مرتبشات..
شذا: عمووه على أي أغنيه بتدخلين..؟؟
فجر: شودراني.. غاليه مجهزتها..
غاليه: بتدخل على أغنيه خاصه.. أنا مسوتنها لها إهداء مني.. شفت فالمنتدى وحده تسوي زفات عرايس وطلبت منها وعطيت إسم عموه ومواصفاتها..
ميعاد: خلينا نسمعها.
غاليه: لالالا بتسمعونها بعدين..
على الساعه تسع ونص الكل كان حاظر الحريم تحت في السرداب ينطرون العروس والرياييل بالميلس يملجون..
ناصر: انا حالف محد يخلي عموه توقع على عقد الزاج غيري أنا..
أبوغاليه: خلاص عيل تعال بنسير لها فوق..
وطلعوا فوق للبنات ودقوا الباب.. غاليه وشروق وشذا وشيماء تغشن.. ودخل ناصر وأبوغاليه..
ناصر: ماشاءالله عليج ياعمووه ربي يحفظج.. شو هالحلاه شو هالجمال.. والله ولا سندريلا بزمانها..
أبوغاليه: انت ياي تغازل.. يالله عطها الدفتر..
ناصر راح ويلس حذال عمته وحط الدفتر على ريلهاوعطاها القلم..
ناصر: غاليه وينج تعالي صوري هاللحظه التاريخيه..
غاليه: ههههههههه يالله خوز يدك عنها..
ناصر كان يالس يطالع غاليه كانت مغطيه ويها ومطلعه بس عيونها، وكانت محطيه عدسات بنيه ورهيب شكلها، بس غاليه رفعت راسها وشافته يطالعه واستغربت وهو ارتبك بس تدارك الموضوع وسألها بصوت واطي عن شروق..
غاليه: ههههه هناك ورا الباب.. وانت طالع اسرق لك نظرتين..
قام ناصر وخذ معاه الدفتر وطلع وهو عند الباب وقف يطالع شروق..
ناصر: دخيلج بس بشوف عيونج..
شروق نزلت طرف الشيله عن عين وحده وكانت عيونها وايد حلوه.. وناصر ابتسم لها وطلع..
وبعد نص ساعه نزلت فجر وحواليها البنات وراحوا عند ما الناس يالسين يتعشون وينتظرون العروس.. دخلت فجر على الأغنية الي مجهزتها غاليه والكل يطالعها ويسمي عليها..
فجر كانت واايد محلوه تسريحتها كانت مرفوعه على فوق مع خصل من شعرها الطويل نازله على ويها.. يلست فجر على الكوشه الي مسويينها لها والبنات اشتغلن رقص وربشه طول الليل..
وعند الشباب الكل يالس ويوصي علي بفجر وإنها غاليه عليهم.. وعلي مستانس وكأنه أول واحد يعرس..
ناصر: عزيز خلنا بنسير الصاله الثانيه..
عبدالعزيز: شو عندك هناك..؟؟
ناصر: ولا شي بس هني الشياب حشره خلنا نظهر عنهم..
طلعوا الشباب ووراهم خليفه وعبدالله..
خليفه: عبدالله متى بتسير تخطب..
عبدالله: إن شاءالله هاليومين.. قلنا خل نخلص موضوع فجر..
خليفه: والله واحلوت الدنيا وتزوجوا الشياب..
عبدالله: شياب بعينك.. كل الي عندي خمسه وثلاثين سنه..
خليفه: انت تعرف الي بعمرك الحين عيالهم طولك..
عبدالله: الله يخليلهم عيالهم، ويرزقني بعيال..
عبدالعزيز: خليفه سير ييب لي ماي نشفت لي ريجي من الضحك...
ناصر: أنا بسير وياك بخاطري الكيكه الي أكلت منها مساعه..
عبدالله: وأنا برد الميلس أخاف أبوي يعصب علينا لأنا ظهرنا كلنا..
طلعوا كلهم وبقى عزيز بروحه الصاله يطالع الثريا الي فوقه.. وهو يالس على كرسيه المتحرك ويطالع السقف حس بحد ينزل من الدري.. فنزل عينه وشاف على الدري ميعاد.. كانت نازله وهي لابسه فستان أخضر مخصر على جسمها والجتف عاري ومحطيه شال بس مب ساتر أي شي.. عزيز ماقدر ينزل عينه عن هالغزال الي ينزل الدري بكل هدوء، ولاهي مهتمه بولد عمها الي يالس يطالعها..
وصلت ميعاد لعند عزيز الي انتبه لنفسه ونزل عينه.. بس ميعاد ظلت واقفه..
عبدالعزيز: ميعاد ادخلي عند البنات..
ميعاد: ليش.. مكاني معاك.. وإنت هني وأنا..
عبدالعزيز بعصبيه: ميعاد نحن انتهينا من هالسالفه.. الله يخليج ارحميني..
ميعاد يلست في ويه عزيز على ركبتها.. ومسكت يده بين يديها وبينت حجم كف ايدها الصغير بحظن ايده الكبيره..
ميعاد: عزيز.... أحبك..
عزيز لف بويه الصوب الثاني: ميعاد لو حد من اخوانج شافنا جي والله بيذبحونج..
ميعاد: خلهم يذبحوني يفداك..
عبدالعزيز سحب يده: الله يخليج ياميعاد سيري داخل.. إخوانج فالمطبخ..
ميعاد: خايف علي..؟؟ خلهم يذبحوني ولا إني أعيش عمري وأنا ندمانه على حبي الي ضيعته بغبائي..
عبدالعزيز: ميعاد للمره المليون سيري غطي نفسج، ممكن أي حد يدخل ويشوفج جي.. وأنا.. أنا..
ميعاد: تغار علي..!! تخاف علي..!! كلها دليل عالحب عيل ليش تكابر على نفسك.. انزين عالأقل طالعني وانا أكلمك..
عبدالعزيز: ما أقدر ميعاد إنتي مب متحجبه ومايجوز..
ميعاد: انت ريلي الي أبوي حلف ما آخذ غيره.. انت الي بتسترني..
عبدالعزيز لف راسه وحاول إنه ماينزل عينه ومسك الشال ورفعه على فوق..
عبدالعزيز: والحين سيري داخل وبدق لج بعد الحفله..
ميعاد بدلع وهي مستانسه: والله. وعد!!
عبدالعزيز: وعد..
قامت ميعاد تبا تروح عنه بس مسكها من إيدها وهو يضغط عليها بكل قوته..
عبدالعزيز: ميعاد.. تحبيني..؟؟
ميعاد: أموت فالأرض الي تمشي عليها..
عبدالعزيز رخى أصابعه وخلاها تروح ومنع نفسه عن يطالع وراه ويشوفها وهي تروح.. ويلس يفكر في كل شي.. في حياته وميعاد ومستقبلهم.. وإعاقته..........
في هاللحظه دخل عليه عبدالله وهو يطالعه بنظرات غريبه..
عبدالعزيز: بلاك جي تتطالعني..؟؟
عبدالله: سمعت كل شي..
عبدالعزيز: شفت ميعاد..؟؟
عبدالله: لالا.. لمحتها شوي وعطيتكم ظهري وسمعت كل الرمسه..
عبدالعزيز: وشو رايك..؟؟
عبدالله: البنيه ندمانه.. وتستاهل فرصه ثانيه..
عبدالعزيز: بس انا على كرسي وأخاف أظلمها وياي..
عبدالله: الي يحب يصبر، وعمرك ماراح تلاقي الي تصبر عليك كثرها..
عبدالله دز كرسي عزيز ووداه الميلس وهو مستانس إنه أخوه بدا يفكر بميعاد مره ثانيه..
ونرجع للحفله الي رجعت لها ميعاد بكل فرح وحب، وشافت غاليه وسارت لها وحظنتها وخبرتها بالي صار.. غاليه طارت من الوناسه لأنها تعرف محد بيسعد وبيصبر على عزيز كثر ميعاد..
شوي وقاموا البنات يلبسن عباياتهن لأن المعرس بيدخل، وطلعت غاليه وبنات عمها فوق عند فجر وهن متغشيات.. وصعد علي على للكوشه مع أخته ووصل لفجر الي كانت واقفه ومنزله راسها، باسها على جبهتها ووقف يصور معاها..
علي: مبروك حبيبتي.. عسى الله لايحرمني منج..
فجر: ولا يحرمني منك..
علي: اوعدج يالغاليه عمري ماراح أتخلى عنج وأحاول أسعدج بعمري كله..
فجر قعدت تتطالع علي الي كان يطالع بكل حب.. وتحمد ربها الي جمع شملهم من عقب هالسنين كلها..
وانتهت ليله حلوه من الفرح.. ليله كانت بطلتها فجر الي كانت في قمة سعادتها وهي استوت أخيرا زوجة علي.. ومن ناحيه ثانيه ميعاد الي قدرت بأنوثتها تميل قلب عزيز مره ثانيه..
وإن شاءالله كل الأيام تكون سعيده على الجميع..

في بيت غاليه..
غاليه كانت يالسه على الكنبه بالصاله تطالع التلفزيون وأمها تسولف مع فجر عن تجهيزات العرس..
فجر: فاطمه بسير بفصل العبايات اليوم أحس ماشي وقت كلهم شهرين شو بسوي فيهم..
فاطمه: اسمعيني اليوم تسيرين تفصلين العبي وتاخذين وياج القطع الي شريتيهن وتخوريهن مره وحده..
فجر: والله معاج حق.. خلاص تروحين وياي..
فاطمه: أروح ليش ما أروح.. ومنصور اليوم قال بيتأخر بالليل فخلينا نخلص كم شغله زياده..
فجر: غاليه تروحين ويانا..؟؟
غاليه وهي لاهيه بالتلفزيون: لا اليوم بسير عند ميعاد..
فاطمه: خليها هاي تلحق على عزايمها وبس..
فجر: هههههههههه غلووي خبريني شو صار مع ميعاد..!!
غاليه: وليش تسإلين..؟؟
فجر: أحسها خلاص بترجع لعزيز..
غاليه: بس عاد قلنا تحبين مب معناته تفهمين كل الي يحبون..
أم غاليه: لا صج قوليلي شو صاير..!!
غاليه: زين جي اشتغل فضول فطيم..
أم غاليه تفرها بالمخده: فطيم فعينج جليلة الحيا..
غاليه: آآآآآآآآآآآي ماما.. والله مب قايلة لكم أي شي..
فجر: أويييييه عصبت ست الحسن..
غاليه: مب قايله..
وفي هاللحظه دخل بوغاليه وهو مسوي نفسه معصب، وراح ويلس حذال حرمته، غاليه قامت تبا تبوسه كالعاده بس هو رفع إيده ومنعها..
أم غاليه: منصور شوفيك عالبنيه..؟؟
غاليه: بابا أنا مب مسويه شي..
أبوغاليه يطالعها: متأكده..!!
غاليه وهي خايفه: هيه
أبوغاليه: اليوم اتصلت الوزاره وقدرت أييب نتيجتج..
غاليه يودت على راسها ويلست: بابا يبت نتيجتي..؟؟
أبوغاليه: هيه يبتها.. وينها الي بترفع راسي..؟؟
غاليه بدت الدموع تتجمع بعينها وتزلت راسها..
أبوغاليه: كله ولادموعج، والله كان بخاطري أعذبج أكثر بس هالدموع تذبحني..
وقام وسحب بنته وحظنها: مبروك حبيبتي 93%
غاليه صرخت من الفرحه وقامت أمها وعمتها يحظنونها ويباركون لها، وهي تصيح ومب قادره تمسك نفسها..
أم غاليه: حرام عليك والله خوفتنا..
غاليه: أنا حسبالي بييب فالثمانينات.. الحمدلله.. إنزين بابا وشروق ومروى وسعيد..
أبوغاليه: مروى أشطركن ماشاءالله عليها يابت 97%
غاليه: هيه معروفه هاي ايجيبشن..
أبوغاليه: هههههه وشروق 88% وسعيد77%
غاليه: والله وقدر اييب نسبه حلوه هالتعبان.. بسير ببشرهم..
وركضت غاليه تخبرهم بالنتايج وهي مستانسه أخيرا بترتاح من المدرسه وهمها..
أم غاليه: فديت بنتي.. الحمدلله إنها نجحت بهالنسبه العاليه..
فجر: هيه والله شدت حيلها والله عطاها على قد نيتها..
أم غاليه: تعالي اليوم كنا ناويين نسير السوق، عيل خلاص ماشي طلعه..
فجر: لا.. لازم نروح وبالمره نييب لها هديتها..
أبوغاليه: أنا برجع للشغل.. ياي أبشر الحلوه والحين بروح أكمل شغلي..
أم غاليه: الله يحفظك يالغالي..

مرت الأسابيع مثل البرق.. والأمور مستقره في كل البيوت.. غاليه سجلت في الجامعه الأمريكيه هي وسعيد، ومروى وشروق سجلوا بجامعة الشارجه، ومن ناحيه ثانيه عزيز وميعاد رجعوا لبعض وقبل يومين كانت ملجتهم سووها بسيطه والزواج بعد شهرين.. عبدالله راح مع أهله وشافوا جميله وخطبها والملجة والعرس بيوم واحد بعد أسبوعين تقريبا..
وبعد في شي صاير.. غاليه بدت تتدرب على السواقه وجريب بتاخذ الليسن وحاشره أبوها كل يوم في خاطرها سياره..

غاليه يالسه مع أبوها في مكتبه..
أبوغاليه: بابا إنتي الحين شو تبين؟؟
غاليه: أممممممم أبا رنج سبورت..
أبوغاليه: من عيوني..
غاليه: وأباها سوده..
أبوغاليه: على هالخشم..
غاليه: وأبا رقمها ثنائي..
أبوغاليه: ماطلبتي على راسي من فوق..
غاليه: لالالا أبا بورش
أبوغاليه: غاليه حبيبي حشرتيني استقري على راي واحد..
غاليه: إنزين بروح بستشير ناصر وبرد لك خبر..
راحت غاليه لناصر ومالقته فقامت وسارت لأحمد، دخلت وشافته يالس مع موظفه ويشتغلون..
غاليه بغيره واضحه: عسى ما أكون خربت عليكم..!!
أحمد بإحراج: لا ياغاليه حياج تفضلي..
غاليه وهي تتطالع البنيه من فوق لتحت: رحت أدور ناصر ومالقيته، قلت مالي غير أحمد أستشيره..
أحمد: من عيوني ياغاليه، سلمى ممكن تخلينا بروحنا..
طلعت الموظفه بكل هدوء وراحت غاليه وسحبت الكرسي الي كانت يالسه عليه سلمى وحطت كرسي ثاني ويلست عليه، أحمد ماعرف ليش خاف منها في هاللحظه..
احمد: حبيبي بلاج معصبه علي..
غاليه: أنا صح هاملتنك الفتره الي طافت بسبة ظروفي، بس مب معناته أرجع ألاقيك مع غيري..
أحمد: الله يهداج شو مع غيرج، والله إنها مجرد موظفه..
غاليه: موظفه وصار لها ساعه لازقه فيك..
أحمد: تغارين علي..!!
غاليه: لا..
أحمد: أفاااااا.. عمري والله مافي شي.. هههههههههههه
غاليه: أنا معصبه وانت تضحك..
أحمد: بصراحه.. والله والله إنه قلبي يدق وخايف منج.. أنا الريال وأنا الأكبر منج بخمس سنين..ومع ذلك خايف
غاليه لفت بويها الصوب الثاني.. وأحمد يلس على المكتب مجابلنها..
أحمد: والله إني ماحبيت حد كثر ماحبيتج، إنتي غيرتي حياتي كلها، طيبتج وحبج وروحج المرحه تغير كل إنسان..
غاليه بدت ملامحها تلين شوي: بس والله نار بصدري اشتعلت من شفتك وياها..
أحمد: والله ماتسواج..
وبحركة جريئه مد إيده ومسك يدها الصغيره بس غاليه سحبتها على طول ووقفت..
أحمد: آسف والله مب قصدي شي..
غاليه: الظاهر إني رخصت نفسي وايد لدرجة إنك تتحراني بسويلك الي تبيه..
أحمد: غاليه أنا ماصدقت إنج رضيتي عني.. وبعدين كل الي يحبون بعض يقعدون مع بعض ويمسكون أيادي بعض والله عادي..
غاليه بإشمئزاز: خلاص عيل سير للي بتخليك تمسك يدها وتيلس وياها.. أكرهك..
ومشت عنه وطلعت وهو يناديها بس ماسوت له سالفه، وماقدر يلحقها عسب محد يلاحظ شي..
غاليه راحت لناصروهي تحس أعصابها ثايره.. دخلت عليه لقته يالس ياكل..
ناصر: وصلت صاحبة الشركة الحين بتذلني على الأكل..
غاليه: مايخصني سوي الي تبيه..
ناصر راح لها: شو فيج غاليه.. شي صاير لج..؟؟
غاليه: لا.. بس أبا أختار سياره ومب عارفه شو آخذ وبابا عصب علي لأني مب مستقره على راي..
ناصر: ههههههههه خلاص انا بساعدج.. إنتي بشو محتاره..؟؟
غاليه: أنا قلت رنج أو بورش..
ناصر: أممممم ماتحسيهن شبابيين أكثر..
غاليه: عيل أنا شو عيوز..
ناصر: ههههههههه لا مب قصدي، أقصد للشباب مب البنات..
غاليه: باخذهن سبورت...
ناصر: أوكي خذيلج سياره بنوتيه صغيره حلوه..
غاليه: مب حلوات الصغار تحس نفسك صغير، أبا وحده كبيره تحسسني بالقوه..
ناصر: داشه حرب..!!
دخل أحمد وعطى ناصر أوراق وقال له إنه مستعيل عليهم، ناصر قام يخلص له المعامله وأحمد يالس يطالع غاليه ويترجاها بعيونه.. بس هي لفت عنه الصوب الثاني ويلست تتطالع من الدريشه..
ناصر: أحمد.. غاليه محتاره بين البورش والرنج.. إنت شو رايك..!
أحمد: كل شي يليق عليها لو شو ماركبت..
ناصر: هيه والله بنت عمي هاي..
غاليه: بس ساعات الواحد يختار وفجأة يكتشف غلطته..
أحمد: ويمكن مب غلطه.. زله..!!
ناصر: نحن بعدنا نرمس عن السياره..!!
أحمد: لا عن البيك أب الي راكبنه اليوم.. ههههههههه
ناصر: هههههههههه الله يخسك لاتفضحنا..
غاليه: شو السالفه..؟
ناصر: اليوم مريت المزرعه أقول لهم عن طلبيتهم وهناك لقيت أبوي وقالي خذ السياره وسير ييب ما ادري شو من مزرعه ثانيه وأنا طالع وإلا أشوف لج البيك أب.. لالالا انا ناصر المنصوري أركب هاي..
غاليه: هههههههههههههه
ناصر: وأبوي عصب وقالي لو ماركبتها قسما بالله أتبرا منك..
غاليه: حار عمي..
ناصر: وصار الي صار.. ولو تشوفيني متلثم بالسفره وأنا أسوق.. ياربي أسمينها كانت فظيحه..
غاليه: هههههههههه
أحمد: خلصت الأوراق..
ناصر: هيه يودهن.. وأنا الحين ياي وراك اكمل شغل شركة السماد.
أحمد: أوكي.. يالله باي..
غاليه: وأنا بعد بظهر أحس روحي تعبانه وبسير البيت..
طلعت غاليه عن ناصر وسارت البيت وهي للحين تتذكر حركة أحمد وكلامه.. شو هالجرأة الي ياته عسب يمسك يدي، أنا عمري مارخصت نفسي لأحد.. إنزين يمكن كلامه صح وهالشي يسوونه المحبين، وأكبر دليل ميعاد ظهرت جدام عزيز بدون شيله.. بس هو ولد عمها ولو ماخذته مابتاخذ غيره.. لالا ياغاليه لايقص عليج أحمد الي ترخص نفسها الكل بيلعب بها..
وصلت غاليه البيت وراحت لغرفتها وبدلت ثيابها لبست بدله سبورت لأنها بعد شوي بتسوي رياضه.. وفتحت النت.. شوي ويرن تلفونها شافته رقم غريب فطنشته، شوي ويوصلها مسج ويوم فتحته طلع من نفس الرقم غريب..

(( إعذريني ولو غلطت صعبه يعني تعذريني..))

غاليه قرته وحسته من احمد بس قالت لا أكيد حد ثاني أحمد شو عرفه برقمها.. وبعد دقايق وصلها مسج ثاني..

(( حني يالقلب الكبير انا هجرك ما أقدره.. الخطا مني صغير والعفوو في المقدره..))

غاليه تأكدت إنه أحمد فكتبت له..

(( إنت ماتحس الجروح الي من قلبي إنزفت ليته بإيدي تروح كان في لحظه اختفت..))

ووصلها مسج ثاني..

(( أفدي جرحج والدموع يانظر عيني أنا.. وأشعل أفراحي شموع لجل ينور حبنا.. سامحتيني))

طرشت له غاليه..
(( إدخل على النت بنتفاهم..))
طرش لها..
(( لا أبا أسمع صوتج.. الله يخليج أبا أكلمج لو ثواني..))

غاليه تمت محتاره أدق أو لا.. يالله أدق شو بيصير يعني..
أحمد: هلا والله بالغلا كله.. هلا بالي أستاهل الموت علشانها..
غاليه: لاتاخذني بشراع وميداف..
أحمد: بنت بحار حضرتج شراع وميداف..
غاليه: ههههههههههههههه
أحمد: ياربي اشكثر تسوى هالضحكه.. والله إنه روحي ردت لي..
غاليه: مب معناته دقيت وضحكت يعني أنا راضيه، أو حتى تتعود عالمكالمات..
أحمد: لافديتج كلما بنتضارب بنتصالح بالتلفون..
غاليه: عيل شكلك كل يوم بتضاربني..
أحمد: ههههههههه لاعمري والله ما أحب أشوفج معصبه علي..
غاليه: خلاص عيل أنا الحين بخليك بسير بسوي رياضه..
أحمد: خلاص غناتي ربي يحفظج..
غاليه: باي..
أحمد: حبـــــــي.. أحبــــــج..
بندت غاليه عنه وهي مستانسه.. ياربي هالإنسان فنــــان الله لايحرمني منه يارب..
نزلت غاليه وشافت عمتها بغرفة الرياضه تسوي تمارين..
غاليه: عاشت العروس الي تحافظ على لياقتها..
فجر: جب أشوفج وتعالي تمرني أخاف الفستان مايدش فيج، مستويه درام الفتره الأخيره..
غاليه: حرام عليج انا مب درام.. ماعليه إن ما استويت أضعف عنج وفي عرسج يتحروني العروس ما اكون بنت منصور وفاطمه..
فجر: هههههههههه

ودخلت عليهم أم غاليه: ياربي منكن ماتشبعن من هالتمارين، فجر فديتج علي يتصلبج على التفلون ورديت عليه وقالي بعد شوي بيدق..
فجر خذت التلفون وسارت به الحجره وغاليه يلست تكمل تمارينها..
أم غاليه: حبيبتي خلص فستانج لعرس عبدالله..
غاليه: هيه أمايه اليوم بسير بييبه..
أم غاليه: ومتى بنسير لخطيبة عبدالله.. لازم نسير نزورهم ونشوفهم لو يبوم شي..
غاليه: أمممممممم اليوم المغرب..
أم غاليه: خلاص إن شاءالله بكلم أم عبدالله وبخبرها إنا بنروح لهم يمكن تبا تسير..
راحت أم غاليه وخلت غاليه تسوي تمارينها.. وبعد نص ساعه راحت غرفتها تتسبح..
على الساعه سبع بالليل غاليه وأمها وحرمة عمها وفجر كانوا في بيت جميله البسيط.. الي استقبلتهم وقربتهم للميلس.. يلست غاليه حذال أبلتها وهي تسولف وياها..
جميله: حي الله من يانا.. عاد اسمحولي أمي مريضه وماتقدر تظهر تسلم عليكم..
أم عبدالله: لا فديتج خليها ترتاح ونحن ظاهرين بنسلم عليها..
جميله: غاليه شخبارج ومتى بتبدين دراسه..؟؟
غاليه: باجي أسبوعين وببدأ..
جميله: الله يوفجج يارب..
أم عبدالله: حبيبتي ماتبون شي، مب قاصر عليكم شي.. ترى العرس جريب ومب باجي عنه شي..
جميله: تسلمين عموه، عبدالله مب مقصر بأي شي.. كل شي إييبه لنا، حتى الي مانبيه إييبه..
أم عبدالله: الله يخليكم لبعض..
غاليه: أبله فصلتي فستان عرسج.. وخلصتي كل شي..
جميله: عاد قوليلي جميله أنا استويت منكم الحين..
غاليه: ههههههه والله ما أقدر الكلمه ثجيله بحلجي..
جميله: هههههههه أنا خلصت معظم الأغراض، بس عبدالله يبيني أختار أثاث البيت وأنا أقوله إختاره انت بس هو مصمم إلا أنا أختاره..
أم غاليه: لازم يابنتي هذا بيتج طول العمر..
جميله: إن شاءالله باجر بنروح وبنختار، غاليه تروحين ويانا..؟؟
غاليه: لا أبله.. باجر عموه بتسوي بروفة فستانها ولازم أكون وياها.. وبعد ميعاد تبيني أروح وياها نتسوق لعرسها..
جميله: عيل يمكن نتلاقى بالسوق..
غاليه: إن شاءالله..
روحوا الجماعه عن جميله بعد ماسلموا على أمها وردن على بيوتهن، غاليه رجعت لغرفتها ويلست تكلم أحمد عالمسن، الي متخبل ويبي يقنعها تكلمه بالتلفون بس هي هزبته ولا سوت له سالفه..
بعد ساعتين من السوالف والظرابه طلعت غاليه من النت ونزلت تحت عند أبوها الي كان يالس بالصاله يسولف مع حرمته.. ويلست من بينهم..
أم غاليه: ضاجت عليج الدنيا..
غاليه: راحتي من بينكم..
أبوغاليه: هههههههههه فديتها خليها على راحتها..
أم غاليه: خلاص قعدي بس خوزي عن كندورتي..
غاليه لصقت بأبوها أكثر وهي تقهر أمها..
أم غاليه: الحمدلله والشكر.. بسير بزهب العشا أحسن لي..
أبوغاليه: وين يافاطمه يلسي خلي الخدامه تحطه..
أم غاليه: لالا أنا بحطه..
أبوغاليه: زين ونادي فجر في طريجج..
غاليه: بابا عموه ظهرت مع ريلها.. وبيتعشون برع..
أبوغاليه: زين عيل حطيلنا العشا..
ويلست غاليه تسولف مع أبوها إلين حطوا العشا وقاموا يتعشون..
وعلى الساعه عشر ونص وصلت فجر.. الي كانت شايله أغراض وداشه من الباب وهي تغني..
(( لقيتي روحي بعد مانا لقيتك.. بعد اللقا أرجوك لالاتغيب.. صعب علي أبقى وأنا مانسيتك.. إحساسك إني بين ربعي غريبه..))
غاليه: أوب أوب فجر المنصوري من وين راده من المرقص..
فجر: ههههههههه شو أسوي ريلي يبيني أروح المرقص شو أسويله أرفض يعني.. هههههههههه
غاليه: تعالي تعالي، خليني أشوف شو شريتي..
فجر: مايخصج أغراض عرايس..
غاليه: ياربييييييييه أكيد شاريه من قمصان النوم وماتبيني أطالع..
فجر: ههههههههههههه أكيـــــد..
غاليه: وعاد منو الي مختارنهم إنتي وإلا روميو..!!
فجر شالت أغراضها: مايخصج.. وينها أمج..؟؟
غاليه وهي ماده بوزها: في غرفتها مع أبوي..
فجر: ههههههه ماكسرتي خاطري، يالله باي..
غاليه: باي
غاليه راحت على غرفتها واتصلت بميعاد الي كانت يالسه تجهز أغراضها..
غاليه: خلاص مب باجي شي عالعرس، شو شعورج..؟؟
ميعاد: والله ما أدري ياغاليه، خايفه ومتوتره.. تدرين عزيز مايقدر يمشي يعني مسؤوليتي بتزيد مرتين..
غاليه: الله يقويج.. وإنتي قدها وقدود..
ميعاد: تعرفين إنه اقتنع وبيرد يداوم في الشركه..
غاليه: والله أحلى خبر.. الله يوفقكم يارب..
ميعاد: ومتى بتبدون دراسه..؟؟
غاليه: خلاص مب باجي شي.. بعد عرس عبدالله على طوول..
ميعاد: وشخبار الليسن..!!
غاليه: تمام نجحت في أول تراي، وباجي لي واحد..
ميعاد: زين والله.. خلاص بخليج بسير بكلم عزيز..
غاليه: أوكي.. سلمي عليه..
ميعاد: باي..
بندت غاليه وحست بملل فحطت راسها تبا ترقد.. بس مافيها رقاد ويلست تفكر في أحمد ومتى تقدر تتكلم وياه على طول، متى بيتقدم لها وبيخطبها.. ههههههه والله إني استخفيت تو الناس عالعرس.. بس عالأقل خطوبه عسب أقدر اكلمه.. الله كريم إن شاءالله..

مرت الأيام مثل الطير الطاير على الكل، تزوج عبدالله من جميله وسافروا ماليزيا شهر العسل.. وبدت الدراسه بالجامعات والكل انشغل بالحياة اليديده.. وبعدها بشهر تزوجوا فجر وعلي وعرسهم كان رووووعه والكل رمس عنه وسافروا شهر العسل فرنسا..
ومابقى غير ميعاد الي سوالها عزيز عرس أحلامها الي تمنته طول عمرها بس كان قاصر إنه يدخل القاعه وياخذها بس طبعا مايقدر، فيلس بالسياره ينتظرهم إلين يخلصون وخذاها وطلعوا، وكان يبي يسافر بس ميعاد مارضت وقالت خلنا نقعد فالبلاد أحسن لنا.. وقضوا شهر العسل بين بوظبي ودبي..
وبالنسبه لطلاب العلم.. غاليه خذت الليسن واشترالها أبوها بورش سبورت سودا.. وتروح فيها الجامعه وهي مستانسه وعلاقتها بأحمد وايد تمام..
وشروق ومروى يدامون مع الدريول وساعات مع غاليه.. وسعيد بعد خذ الليسن واشترى سياره..
والكل عايش حياته ومستانس، وينتظرون الغد الي بيزيدهم فرح وسرور، بس مايدرون شو فيه باجر.. فرح وسعاده وإلا هم وكدر..