منتديات بنوته - عرض مشاركة واحدة

07-15-2010, 12:06 AM

الجزء الرابع عشر
في بيت بوغاليهغاليه وصلت من الفجيره بس مالقت حد فالبيت، لا أمها ولا أبوها..
غاليه: ماعليه.. مستغلين الفرصه وطالعين يتحوطون..
وركضت لغرفتها تبدل ثيابها بس مالحقت تفسخ العبايه إلا وأمها وراها..
أم غاليه: غلووووووي متى وصلتي..؟!!
غاليه: ماماااااااا
وركضت لها تبوسها وتحظنها: وحشتيني ماما.. وينكم صار لي ساعه أصارخ وأدوركم..
أم غاليه: فديتج حبيبتي.. كنت في بيت خالتج مريم.. وأبوج فالشركه..
غاليه: شو تسوين عند خالووه مريم..؟؟
أم غاليه: عندهم مفاجأة..
غاليه: شو هي..!!
أم غاليه: خمني..
غاليه: ماما يالله عاد قولي شو السالفه.. فيني فضول..!!
أم غاليه: هههههههههههه أدريبج فضوليه.. خليني أرتاح وعقب بخبرج..
غاليه: حراااااااااام قـــــولي..
أم غاليه: خلاص بقولج.. الله يسلمج هشام ولد خالتج وصل اليوم الفير من السفر ورحت أسلم عليه..
غاليه من الصدمه يلست على السرير.. هشام..!!! معقوووله..؟؟ صار له خمس سنين برع البلاد شو الي رجعه..!!!!!!!!!!!
أم غاليه: بسم الله عليج.. شو فيج انصدمتي..؟؟
غاليه: لا بس ماتوقعت أشوفه بعد كل هالسنين..
أم غاليه: الله يهداج إهني بلاده وأهله وأكيد في يوم بيرجع، المهم الحين بدلي وارتاحي ولو تبين بنسير عندهم..
غاليه: لالا.. باجر أحسن.. الحين أبا أشوف بابا مشتاقة له..
أم غاليه خلت بنتها وراحت لغرفتها، وغاليه يلست تتذكر هشام والي كان من بينهم، كان متعلق بها لآخر درجه ودايما يدافع عنها من كانوا صغار.. لدرجه إنه الكل كان له يقول هاي حرمتك..
غاليه فصخت عبايتها وراحت وفتحت الكبت وطلعت ألبومها.. ويلست تدور على صورة هشام إلين لقتها طلعتها ويلست تتطالعها.. بعد كل هالسنين راجع، شو الي رجعك..!! تذكرت أهلك وحنيت لهم، وإلا بعد ماجلعت قلبي من صدرك راجع تعيش حياتك....!!!! غاليه حست بغصه في حلجها لهالخبر.. مب عارفه كيف تواجه هشام، مب قادره تتواجد معاه بمكان واحد.. غاليه فرت الصوره فالألبوم وراحت وطاحت على سريرها.. لا.. خلاص هشام انتهى من حياتي، مايستاهل الحب ولا حتى إني أفكر فيه.. باجر بسير بيتهم وبعامله وكأنه ولاشي.. ولابحسسه بالجرح الي تركه بقلبي من سنين.. بخليه يعرف جيمة الي فاته..

باليوم الثاني الظهر.. غاليه قامت وسارت الصاله تدور على الغدا.. شافت أمها وأبوها يالسن يسولفون ويشوفون التلفزيون..
غاليه وهي تغني: مســـاء الخيـــر والإحســـاس والطيــــــبه.. مســــاء مايلـــــيق إلا بأحبـــــابه..
أبوغاليه: مســـــاء أحلى غاليه فالوجود..
أم غاليه: مســـاء غاليه منصور..
غاليه راحت وباستهم: ماما متى بنتغدا..؟؟
أم غاليه: الحين.. بسير المطبخ بحط لكم الغدا.. منصور تبا عصير وإلا لبن..؟؟
أبوغاليه: خليه لبن أحسن..
غاليه: منصــــور.. منصــــور..
أبوغاليه: ههههههههههه ياروح منصور..
غاليه: أنا قررت شي.. وأتمنى ماتعارضني فيه..
أبوغاليه: ياحبيبتي لو تامريني بعمري كله يفداج..
غاليه: فديتك يابويه.. أنا الي أفداك بعمري كله..
أبوغاليه: حبيبتي والله... والحين قولي شو تبين..؟؟
غاليه: أممممممم شو رايك أشتغل معاكم فالشركه، نص دوام يعني..
أبوغاليه: شو تبين بعوار الراس.. خلصي دراسه ووظيفتج تترياج..
غاليه: وظيفتي..!! لافديتك لا الغالي.. غاليه منصور بجلالة قدرها تبيها تتوظف..!! أنا لو مامسكت الشركه كلها ما أتسمى اشتغلت..
أبوغاليه: ههههههههههه بتورثني بالحيا هالبنيه.. حبيبتي كل الحلال حلالج.. ووقت ماتبين منصور بيقعد فالبيت وإنتي بتصرفين عليه..
غاليه: هههههههههه بابا.. افهمني.. أنا..
أم غاليه: يالله قوموا تغدوا..
أبوغاليه: الحمدلله وصل الغدا.. وإلا غاليه كانت بترفعني تقاعد..
غاليه: إنت قوم تغدا وبنتفاهم هناك..
يلسوا يتغدوا وغاليه صكت راسهم بالسالفه.. وأبوها مب مقتنع بسالفة إنها تشتغل بالشركه قبل لاتتخرج، في نظره هي بعدها صغيره عالجامعه فكيف بيخليها تشتغل..
بعد الغدا طلعوا كلهم على غرفهم على وعد إنهم يسيرون العصر لبيت خالة غاليه يسلمون على هشام.. غاليه تسبحت ويلست تطالع الكبت تبا تختار أحلى لبس عسب تلبسه وتقهر هشام الي تركها وراح.. وآخر شي استقرت على البدله السوده لأنها تعرف اشكثر هاللون يبرز جمالها..
على الساعه أربع ونص غاليه وأمها راحوا على بيت مريم خالة غاليه ودخلوا وسلموا على الكل ويلسوا البنات في الصاله بروحهم والحريم في الميلس..
غاليه: أممممم ماشي أخبار..؟؟
شذا: غير رجعة هشام لاجديد..
شيماء: بلى فيه.. أنا دخلت دورة كمبيوتر..
غاليه: زين زين.. وإدخلي بعد دورة إنجليزي بتفيدج وايد..
شيماء: أوكي..
غاليه: أنا أقصد أخبار خطوبه زواج أي شي..
شذا: والله شكلهم هالفجيره مب قد كلمتهم.. قالوا من توصلون الخبر واصل قبلكم..
شروق: الله وأكبر عليكن من بنات.. نحن أمس واصلين من عندهم تبونهم اليوم يدقون ويقولون نبا بنتكم.. صج إنكم يهاال..
غاليه: هههههههه والله نبا نفرح ونستانس..
شذا: نبا نلبس فساتين ونرقص..
شروق: في عروسكن إن شاءالله..
غاليه: خل عنج عاد.. أنا من أرجع بيتنا بدق حق ميثووه الدبه بقولها يالله تعالوا خذوا شروق حلال عليكم..
شروق: لا والله.. حبيبتي الشيخه شروق ماتظهر من بيت أهلها إلا بزفه ماسمعت عنها البلاد أبداااااااا..
غاليه: وععععععععع سكتي والي يعافيج.. المهم قوموا خلونا نسير حجركم ما أحب اليلسه بالصاله..
طلعوا البنات لغرفة شروق وظهروا ألبومات صور لأيام الطفوله، ويلسوا يتذكرون الطفوله وكل وحده ميته من الضحك على شكل الثانيه..
وهم يالسين اسمعوا دق على الباب.. راحت شيماء تفتح الباب ولقت هشام واقف وهو ماسك موبايلين في يده..
هشام: وينها شروق يايب لها موبا......!!
وانصدم اول مادخل الغرفه.. شاف غاليه يالسه على الأرض هي وشذا وكانت فاصخه عبايتها وماسكه ألبوم الصور، هشام قعد يطالعها وهو ساكت..
غاليه: اشحالك هشام..؟؟ حمدلله على سلامتك..!!!
بس هشام خبر خير.. واقف وهو ساكت ويطالع غاليه وهو مصدوم، الحين هذي هي غاليه الي أنا سافرت علشان أنساها.. تركت الطفله الصغيره الي خبلت فيني علشان أنسى حبها.. ورجعت ولقيتها كبرت وإحلوت أكثر عن قبل..!!! ليش ياربي ماقدرت أنساها..!!!
شروق: هشاااااااام.. غاليه تكلمك شو فيك..؟؟
هشام الي فاق من صدمته: سووووري بس سرحت شوي.. اشحالج بنت خالتي.. عساج طيبه..!!
غاليه بكل مرح وطفوليه: الحمدلله مرتاحه وعال العال..
قصدت بكلامها تبين له إن رحيله ما أثر فيها ولاهز شعره وحده من راسها.. وهو حس إنها مرتاحه ومب محتاجة له أو محتاجه لحبه..
هشام: الحمدلله على كل حال.. شروق هاج الموبايل الي أمس قلتي عيبج.. اشتريت لي واحد غيره..
شروق: الله ونااااسه.. مشكور حبيبي.. الحمدلله إنك رجعت لنا، وإلا جسوم مامنه فايده بيزاته كلها لربيعاته..
هشام: الله يهديه..
غاليه: عاد ماقلت لنا شو سويت برع خمس سنين..
هشام: اشتغلت هناك وفتحت لي سلسلة مطاعم.. والحين نقلت شغلي هني..
غاليه: الله يوفجك إن شاءالله.. يالله بنوتات خايسات أنا بسير..
شذا: تو الناس يالمعفنه..
غاليه: لا فديتج بسير باباتي بروحه فالبيت، قال اليوم مب رايح الشركه العصر.. فقلنا بنيي نسلم ونرد له..
قامت غاليه ولبست عبايتها وهشام أونه لاهي عنها مع شروق يعلمها عالموبايل اليديد.. ومرت من حذاله وطلعت لبرع وخلته متخبل عليها..
بعد غربة سنين ومحاولة نسيانها.. ومابقى صنف ولانوع من البنات إلا وشافه.. راجع الحين وقلبه يدق لها أكثر عن قبل... الله المستعان
في بيت عبدالله وجميله الي كبر بطنها وماشاءالله صارت فالشهر السابع.. عبدالله كان يالس يلعب مع علاوي أخو حرمته بلاي ستيشن.. دخلت عليهم جميله وهي شايله صحن المكسرات في إيدها..
جميله: بسكم من اللعب رحموا عيونكم شوي..
عبدالله: الحين بغلبه هذا الي مسوي عمره بطل..
علي: خل عنك أصلا إنت ماتعرف تلعب.. جمول عطيني مكسرات..
عبدالله: مايخصك فالمكسرات هذي بس لولدي..
علي: لا والله..!! مب على كيفك.. جمول شوفيه..
جميله: طلعوني أنا من ظرابتكم.. مريوووم وين سارت..؟؟
علي وهو يسرق المكسرات عنها: راحت الحديقه تشخبط في أوراقها، مسويه عمرها رسامه الأخت..
عبدالله: ماشاءالله عليها رسمها حلو، حبيبي إسأليها لو تبا تدخل معهد تطور مهاراتها أنا جاهز أدخلها..
جميله: ماتقصر ياقلبي.. بشوفها وبرد عليك.. والحين قوموا خلونا نتغدا.. ميته يوع..
علي: إنتي كله يوعانه، حشى هذا ولدج مايشبع..
عبدالله: الله واكبر عليك.. قوم سير إزقر أختك.. عليك عين أعوذ بالله منها..
وبعد دقايق كلهم كانوا على سفرة الأكل يتغدون، إلا أم جميله المريضه، المسكينه تتغدا قبلهم وترقد..
عبدالله: شو رايكم المغرب نسير نشوف فيلم فالسينما ونتعشى برع..
مريم: أنا موااااافقه..
علي: وأنا بعد..
عبدالله: وإنتي حبيبي..!!
جميله: ماعندي مانع، بس أمي مع منو بنخليها..؟؟
عبدالله: حبي الخدم هني بيهتمون فيها.. وأنا بوصي ليتا تيلس وياها إلين نرجع..
جميله: خلاص على راحتك.. وبالمره بتشرى شوية أغراض للبيبي..
عبدالله: إنزين قوليلي ولد وإلا بنيه..؟؟
جميله: إنت شو بخاطرك..؟؟
علي: بخاطري ولد علشان ألعب وياه..
عبدالله: إنت منو سألك تسألني أنا.. أنا بخاطري بنوته حلوه تشبهج..
جميله: أمممممممممم خلوها مفاجاة أحسن..
عبدالله: لاعاد خبرينا شو..!!
جميله: هههههههه الي إيي من الله حياه الله..
عبدالله: والنعم بالله بس بخاطري أعرف..
جميله: شي حلو وعسول وبيعيبك..
عبدالله: يالله عليج ياجمول كيف تحبين تلعبين بأعصابي..
جميله: ههههههههههههه
مريم: المهم الحين.. متى بنروح السينما..؟؟
عبدالله: أول ما أرجع من صلاة المغرب ألقاكم جاهزين..

وفعلا بعد صلاة المغرب عبدالله رجع ولقاهم جاهزين وينتظرونه.. ركبوا السياره وراحوا السينما.. قطعوا التذاكر ويلسوا يطالعون الفيلم الي كمل الساعتين ونص..
عبدالله: أنا وااااايد عيبني الفيلم.
علي: عجيــــــــب وكله أكشن وإثاره..
مريم: أنا ماعيبني وايد.. لو كان رعب بيكون أحلى..
جميله: والله أتحراه رومانسي طلع أكشن.. المره اليايه توديني فيلم رومانسي..
عبدالله مسك إيدها: وبنشوفه بروحنا مب معاهم..
مريم: علاوي قوم نسير ناخذ لنا آيس كريم.. النسيب بدا يخورها فالرمسه..
علي: هههههههههههه يالله قومي..
وراحوا علي ومريم ياخذون لهم من باكسن روبنز ويلسوا هناك ياكلون.. وعبدالله وجميله دخلوا محلات الأطفال يتشرون أغراض البيبي الي بعده ماشرف للدنيا..
عبدالله: شوفي شوفي هالدبدوب اشحلاته.. بس فيه لونين وردي وأزرق بس لو أعرف ولد وإلا بنت كنت بختار بدون حيره..
جميله: ههههههههههه إلعب غيرها..
عبدالله: أففففففف من عنادج..!!
وكملوا مشترياتهم وجميله تلعب بأعصاب عبدالله طول الوقت..
كانوا يتمشون عند باريس غاليري ودخلت جميله تاخذ عطور حقها وحق عبدالله الي كان واقف برع يسولف بالموبايل وكل شوي تطالعه ويتبسم لها ويكمل كلامه.. عبدالله خلص مكالمته مع عبدالعزيز أخوه وإلتفت يبا يرجع لحرمته بس شاف الي خلاه يتصنم في مكانه ويوقف الدم الي يمشي في عروقه..
جميله: حبيبي أنـا خلصت..
بس عبدالله مب حاس فيها وواقف وهو بعالم ثاني..
جميله وهي تهزه من كتفه: عبدالله.. عبدالله اشصاير..!!
عبدالله انتفض وكأنه قام من حلم مزعج.. ويلس يطالع جميله وهو شارد بفكره..
عبدالله: لا حبيبي مافيني شي.. خلصتي..؟؟
جميله: هيه خلصت.. بس بيزاتي ماتكفي..
عبدالله طلع بوكه ودخل يحاسب بدالها.. وهي مستغربه منه شو صار له وليش كان سرحان..!!
وبعد ماحاسب عن العطور أخذهم وطلع معاها ومبين عليه إنه مب مركز وياها وسرحان.. وجميله تفكر شو الي خلاه ينصدم ويسرح جي.. شو السالفه..!!
جميله: عبادي أنا يوعانه خلنا ناكل لنا شي..
عبدالله: قلبي الحين بوديكم المطعم..
جميله: لا بخاطري آكل من بورجر كينج..
عبدالله: من عيوني.. دقي لعلاوي خليهم يلحقونا..
وطلعوا على المطاعم ويلسوا ينتظرون إخوانها وبعدها راح عبدالله ومعاه علي يطلبون لهم الأكل.. وجميله على طول سحبت موبايل عبدالله ويلست تشيك عليه.. وشافت آخر مكالمه سواها يوم كلمها قبل لايظهرون.. والي تلقاها مساعه كانت من عزيز أخوها..
يعني مافي شي يكدره أو يخليه يتضايج، إلا لو زعله عزيز بكلمه أو قاله شي يضايج به..
رفعت راسها وشافت عبدالله واقف يكلم وحده وهي تتبسم له وتضحك وهو مبين عليه الضيج.. بس علاوي خلاهم وشال صينية الاكل ويابها لجميله..
جميله: علاوي.. منو الحرمه الي واقفه تكلم عبدالله..
علي وهو ياكل البطاطا: مادري دعمته وهي ماشيه ويلست تتأسف له وتتميع.. عاد أنا أدبتها قلت له يالله عبدالله حرمتك تترياك..
مريم: ههههههههههه أحسن تستاهل هالماصخه..
ووصل عبدالله ويلس عالطاوله وهو يتحاشى يطالع جميله..
عبدالله: يالله بسم الله.. مريوووم حاسبي لاتاكلين صبعج بدل البطاطا
مريم: ها ها ها بااااااااايخ
عبدالله: عداااااااااال يالحلوه.. جمول حبيبي ليش ماتاكلين..
جميله وبدون مقدمات: منو الي كنت تكلمها..؟؟
عبدالله انصدم من سؤالها بس ماكان يقدر يقول شي.. لأنه حس بنظراتها فيها شك..
علي: قلت لج.. وحده ماصخه دعمته و......
جميله: إنت إسكت..
عبدالله: جميله شوفيج..؟؟ وحده دعمتني وراحت لحالها..
جميله قعدت تاكل بكل هدوء.. وهي تتطالع عبدالله بنظرات شك، وهو مب قادر يرفع عينه في عينها.. وبعد الأكل قاموا يبون يروحون عالبيت..
مريم وعلي يمشون جدامهم، وعبدالله وجميله يمشون وراهم وعبدالله يحاول يمسك إيدها ومب قادر عليها.. وفجأة سمعوا صوت من وراهم..
الحرمه: لو سمحتي أختي..
جميله التفت لها ولقتها نفس الحرمه الي عبدالله كان يكلمها..
جميله وهي مستغربه: نعم..!!
الحرمه وهي مبتسمه: هالبودي طاح من الجيس الي إنتي شايلتنه..
جميله: مشكوره ماقصرتي..
الحرمه: العفو... عبدالله هذي حرمتك.. ماشاءالله عليك تعرف تختار..
عبدالله احترق ويهه وماقدر يرد عليها.. وجميله وقفت وهي منصدمه، منو هالحرمه..!! ومن وين تعرف عبدالله..!! وشو الي من بينهم..؟؟
بس الحرمه ماخلت لها أي مجال وخلتهم وراحت.. وجميله سكتت ولا تكلمت وفضلت تتناقش فالبيت.. كانت تمشي وتحس نفسها مب قادره تسيطر على أعصابها.. حاسه نفسها خلاص بتطيح من طولها وعبدالله يحاول يسندها وهي مب راضيه تخليه حتى يلمسها..
ووصلوا البيت وعلي ومريم راحوا على غرفهم وهم حاسين بتوتر من بين أختهم وريلها.. جميله راحت تتطمن على أمها ويلس معاها شوي.. ويوم رجعت الغرفه لقت عبدالله يالس على الكرسي ومحطي راسه بين إيديه..
جميله دخلت وسكرت الباب وراها.. دخلت غرفة الملابس وبدلت ثيابها وراحت ويلست على السرير مجابله عبدالله..
عبدالله: حبيبي سندي ظهرج إنتي..........
جميله: منو هالحرمه..؟؟
عبدالله: عمري بفهمج كل السالفه بس إنتي اسمعيني وخلج....
جميله بعصبيه: مايخصك فيني.. الي أبا أعرفه الحين منو هالحرمه الي كانت فالمول..؟؟ شكلها تعرفك ومن زمان..!!
عبدالله: كانت.. كانت حبيبتي..
جميله سكتت وهي تتطالعه ومب قادره تستوعب الرمسه..
عبدالله: كان عمري 22 سنه أول ماتعلقت بها وحبيتها.. وبحكم إنا كنا جيران تعلقت هي الثانيه فيني.. بس ما كنت أكلمها بالتلفون ولانتواعد ولا أي شي ثاني..
جميله وهي تبلع ريجها بصعوبه: وليش ما ارتبطتوا..؟؟
عبدالله: كنت بعدني فالجامعه.. ومستحيل أتزوج بدون لا أخلص.. وكنت أبا أكون نفسي قبل الزواج.. وهي ياها نصيبها وراحت..
جميله وهي تمسك على بطنها وظهرها: تحبها..؟؟
عبدالله: جميلة الله يخليج ارتاحي وأنا......
جميله صرخت فيه: جاوبني..!!
عبدالله: حبيبي قلت لج.. كنت أحبها.. والله العظيم حبها انتهى من حياتي من اليوم الي إنتي دخلتي فيها..
جميله قامت وتسندت بظهرها على السرير: قبل لاتخطبني قلت لي إنتي الوحيده الي دق لها قلبي لاتحرميني من هالشعور.. بس الظاهره قلبك دق قبلي وعلشانها تخليت عن الحب والزواج عمرك كله..
عبدالله وقف في مكانه: والله.. والله مب علشانها، هي من تزوجت وأنا ماطرى العرس على بالي.. كل همي الشغل وبس.. شفت بنات أشكال وألوان.. بنات صغار يطيرون بعقول مليون واحد من حلاتهن إلا أنا.. محد هز قلبي غيرج إنتي..
ومشى رايح لها: والله ياقلبي الي حسيته تجاهج عمري ماحسيته تجاه غدير طول سنين حبي لها..
جميله ودموعها على خدها: كيف تبيني أصدقك، وأنا اليوم شفت اللهفه بعينك.. شفتك وانت مب قادر تشيل عينك عنها..
عبدالله: حرام عليج... والله ماهزت فيني شعره..
عبدالله مسكها وحاول ياخذها بحظنه بس هي مارضت وقامت تبا توقف وتبتعد عنه.. بس حست بدوخه فراسها واختل توازنها وطاحت على الأرض..
عبدالله: جمــــــــــــول
في بيت بوغاليه..

أم غاليه كانت يالسه بالصاله تتطالع التلفزيون وتاكل كيك، ياتها الخدامه تقول لها عن العشا إنه جاهز ومتى مايبون يخبرونها وبتحطي لهم..
أم غاليه: ليندا.. سوي تبوله وعصير ليمون بالنعناع..
ليندا: أوكــي مدام..
وراحت ليندا ودخلت غاليه على أمها وهي شايله أغراض..
أم غاليه: حمدلله عالسلامه جان مارديتي البيت..
غاليه وهي تفر الأغراض: حرام عليج ماما ماكملت ساعتين من ظهرت من البيت..
أم غاليه: الحين الساعه عشر ونص إلين متى تبين تقعدين برع..
غاليه: ماما الحين قبل يوم كنت بالمدارس ماكنتي تحاسبيني جي.. الحين يوم كبرت يايه تحاسبيني..
أم غاليه: لو يوصل عمرج الميه بعدني بحاسبج..
غاليه: اللهم طولج ياروح.. ماما وينه أبويه..؟؟
أم غاليه: بس بدت تتهرب مني.. أبوج الحين بيوصل، سيري بدلي ثيابج وانزلي تعشي ولاتقولين اكلتي برع..
غاليه: لا.. بتعشى وياكم..
قامت غاليه تبدل ثيابها وتتطالع الأغراض الي اشترتها من السوق، وبدت تقيس البدلات اليديده وتلبس الجواتي والشنط.. وبعد نص ساعه نزلت تحت وشافت أمها ترمس بالتلفون..
أم غاليه: لاحول ولاقوة إلا بالله..
غاليه: فاطمه المنصوري.. حوووووه وين العشا..!!
أم غاليه وهي تأشر لها تسكت: وليش شو الي صار..؟؟ الله يعينهم..
غاليه يلست حذال أمها: بسم الله شو صاير..!!
أم غاليه: خلاص أختي بخليج.. وطمنيني لو صار أي شي.. مع السلامه..
غاليه: منو عندج..؟؟
أم غاليه: أم عبدالله..
غاليه: بسم الله شو صاير..!! ميعاد فيها شي..؟؟
أم غاليه وهي تمسح دمعتها: جميله حرمت عبدالله فالمستشفى..
غاليه: لييييييييييييش..!!
أم غاليه: طاحت عليهم ويالها نزيف حاد.. وشكلهم بيسوون لها عمليه وبيولدونها...
غاليه: حراااااااام.. بس هي بعدها فالسابع..!!
أم غاليه: هذا الي صار.. الله يصبرك ياعبدالله..
غاليه: وكيف طاحت ووينه عبدالله عنها..؟؟
أم غاليه: مادري.. سميره تقولي عبدالله ساكت ومب قادرين يفهمون منه أي شي.. يسألونه ولايرد عليهم.. والدكتور يقول جميله وايد تعبانه الله يستر ومايصيبها شي..
غاليه: فديتها.. الله يقومها بالسلامه..
أم غاليه: أبوج فحجرته سيري زقريه وخلينا نتعشى..
غاليه: انسدت نفسي عن الأكل..
أم غاليه: أنـا بعد.. بس لازم ناكل مع أبوج..
غاليه راحت تنادي أبوها وهي سرحانه، حرام ليش جي يصير معاهم، عبدالله وجميله وايد يحبون بعض ومرتاحين.. سبحان الله يمكن الله يختبرهم..
ويلست غاليه مع أبوها وأمها يتعشون وأم غاليه تخبر منصور عن الي صار.. وبعد العشا طلعت غاليه غرفتها وهي تعبانه ومرهقه وتبا تكلم حد.. فتحت النت ويلست تنتظر احمد.. الي دخل بعد نص ساعه..
غالية أبوها: ليش تأخرت..
مزيون بوظبي: عمري ماتأخرت.. قبل شوي ييت من برع تعشيت والحين يالس أكلمج..
غالية أبوها: أنا مضايجه ويالسه بروحي..
مزيون بوظبي: فديـــــت الملانــه أنــا..
غالية أبوها: أحمد خل عنك.. والله مالي خلق..
مزيون بوظبي: بسم الله عليج غناتي، شو صاير وياج.. ماظهرتي السوق اليوم..
غالية أبوها: بلى.. بس لمن رجعت انصدمت بشي صاير هني..
وخبرته عن عبدالله والي صار له..
مزيون بوظبي: لاحول ولاقوة إلا بالله.. الله يصبرهم إن شاءالله.. والبيبي شو صار عليه..
غالية أبوها: مادري بيولدونها وبعدها بيعرفون.. والله فيني صياح حرام مايستاهلون الي صار لهم..
مزيون بوظبي: حبيبي صياحج مابيفيدها بشي.. قومي صلي وإدعيلهم.. والله يقومها لكم بالسلامه..
غالية أبوها: الله كريم..
مزيون بوظبي: خلاص أباج الحين تقومين تتوضين وتصلين لج ركعتين وتقرين قرآن.. صدقيني بترتاحين واااايد..
غالية أبوها: إن شاءالله.. وانت بتنتظرني..
مزيون بوظبي: أنا بتصل لناصر وبشوفه لو عنده خبر وإلا إنه بالمستشفى عندهم.. ولو هناك بسير لهم..
غالية أبوها: فديتك والله.. فيك الخير.. وطمني عليهم..
مزيون بوظبي: من عيوني.. وإنتي لو يالج رقاد إرقدي لاتسهرين وتيلسين تفكرين وتحاتين.. مابيصير غير كل خير..
غالية أبوها: إن شاءالله.. تصبح على خير..
مزيون بوظبي: وإنتي من أهله ياقلبي..
بندت غاليه عن أحمد وراحت تتوضأ وتصلي.. وبعدها مسكت القرآن ويلست تقرا فيه.. دخلت عليها أمها وشافتها تقرا قرآن.. راحت لها ويلست حذالها.. غاليه سكرت المصحف وطاحت على صدر أمها..
أم غاليه: ليش تصيحين..؟؟
غاليه: خايفه على جميله.. وعبدالله كاسر خاطري..!!
أم غاليه: الحمدلله على كل حال.. توني كلمت ميعاد وقالت لي طلعوها من العمليات والياهل بخير بس شوي تعبان، وجميله بعد تعبانه وحطوها بالعنايه..
غاليه: يابت ولد..؟؟
ام غاليه: هيه..والحين قومي فديتج سيري غيري ثيابج وارقدي.. وباجر بسنير لهم المستشفى..
غاليه: إن شاءالله ماما..
بدلت غاليه ثيابها وحطت راسها عالمخده تبا ترقد وهي تفكر في عبدالله المسكين الي بعد ما إستقر وتهنى بحياته جي يصير له، وإلا جميله فديتها الله أنعم عليها ورزقها وآخرتها تتعب وتولد بالسابع وحالتها خطره وبالعنايه..
وقطع عليها أفكارها صوت الموبايل الي مخلتنه على الطاوله فقامت له وخذته.. وشفت الرقم غريب وترددت تشيله، بس تذكرت أحمد وإنه سار لهم المستشفى ويمكن حب يطمنها..
غاليه: ألووو....!!
: السلام عليكم.. سوري لو راقده وأزعجتج..
غاليه: لاعادي بعدني صاحيه.. بس إنتي منو..؟؟
: أنا فتون ماعرفتيني..؟؟
غاليه: فتوون متى غيرتي رقمج..؟؟
فتون: ماغيرته، هذا رقمي الثاني.. غاليه أنا محتاجة لج..
غاليه: خير شو صاير..؟؟
فتون: ما أقدر أرمس فالتلفون، ممكن أشوفج..؟؟
غاليه: الحين..؟؟
فتون: ياليت لأني صج صج محتاجة لج..
غاليه: الحين ما أقدر.. أنا فالبيت وخلاص برقد.. وبروحنا عندنا مصيبه ولازم من صباح الله أسير المستشفى..
فتون بضيج: خلاص برايج، باي..
غاليه: لحظه لحظه.. شو فيج عصبتي.. باجر الصبح بشوفج..
فتون: خلاص اول ماتكونين فاضيه دقي علي..
غاليه: أوكي..
فتون: باي..
وبندت حتى قبل لاترد عليها غاليه، ياربي شوفيها فتون وليش مضايجه، أحس وراها مصيبه الله يستر بس.

باليوم الثاني غاليه خذت أمها وراحوا المستشفى يزورون جميله الي كانت راقده ولاتدري بالدنيا.. وعبدالله مافارقها ولاثانيه، يالس برع ينتظرها تقوم وهو يحاتيها حتى البيبي ماراح يشوفه ولايتطمن عليه..
دخلت غاليه وامها المستشفى ولقوا عبدالله يالس عالكرسي ومسند راسه على ورا.. وأمه وعزيز وميعاد يالسين بعيد شوي عنه..
أم غاليه راحت وسلمت عليهم ويلست معاهم.. أما غاليه فراحت لعبدالله ووقفت تكلمه وهو ولاحتى رفع راسه حقها.. ويوم ملت منه راحت للباجين تسلم عليهم..
ميعاد: عبدالله كاسر خاطري.. من أمس على هالحال..
غاليه: مسكين يحاتيها.. وهي ماقامت..؟؟
ميعاد: لا بعدها.. تصدقين غلووي أحس في شي صاير من بينهم..
غاليه: شوووو..؟؟
ميعاد: مادري بس يوم طاحت جميله وعبدالله دق لعزيز يقوله، كان يصيح ومب في وعيه.. حتى أذكر عزيز إستغرب يوم قاله أنا السبب أنا الي خليتها تطيح..!!
غاليه: بسم الله.. وليش عاد..!!
ميعاد: مادري بس شكلهم كانت بينهم مشكله..
وفي هاللحظه دخلوا علي ومريم إخوان جميله وراحوا لعبدالله يكلمونه بس مارد عليهم.. فراحت أم عبدالله ويابتهم عندها..
غاليه: مريم تعالي هني..
راحت مريم ويلست معاهم: شخبارها جمول..؟؟
ميعاد: الحمدلله بخير.. يابت لكم ولد عسوول..
مريم نزلت راسها وسكتت..
غاليه: مريوووم ليش مب مستانسه لها..!!
مريم: لأن جمول مريضه وأحسها مابتقوم..
غاليه: بسم الله عليها.. لاحبيبتي بتقوم بالسلامه وبتستانس بالبيبي اليديد..
مريم: إن شاءالله.. بس ليش عبدالله ساكت، نكلمه ولايرد علينا..
ميعاد: يحاتي جميله.. إنتي لا تحاتين كل شي بيرد طبيعي..
غاليه: مريم.. شي صاير من بين جميله وعبدالله..
مريم نزلت راسها: ليش تسإلين..؟؟
غاليه: لأن عبدالله شكله حاس بالذنب..
مريم: هم ماقالولنا أي شي.. بس انا مب ياهل وعارفه السبب..
ميعاد: وشو السبب..؟؟
مريم: أممممم بس ماتخبرون أي أحد..
غاليه: أوكي بس قولي..
مريم: البارحه رحنا نتعشى برع وكانت في وحده واقفه تكلم عبدالله، وجمول تضايجت.. بس علي وعبدالله قالولها إنها دعمت عبدالله وهي ماشيه ووقفت تعتذر..
غاليه: وبعدين..
مريم: ونحن طالعين هي نفسها الحرمه وقفت تكلمهم وطلعت تعرف عبدالله.. وجمول قعدت ساكته طول الوقت.. بس لمن رجعنا البيت أنا قمت بالليل أبا أسير أشرب ماي وسمعت جمول تصارخ، وتقوله يعني تحبها.. وخدعتني ومن هالرمسه..
غاليه: أبييييييييه..
ميعاد: عبدالله..!! لالا مستحيل..!!
غاليه: مريووووم كيف شكلها هالبنيه..؟؟
مريوم: هي مبين عليها كبيره وحلوه.. بييييضا واااايد.. وعيونها عسليه.. وضعيفه وااايد..
غاليه تنهدت: بس عرفتها..
ميعاد: لايكون......!!
غاليه: هي بعينها.. حسبي الله عليها وعلى الي سوته..
مريم: منو هاي..؟؟ عبدالله كان يحبها قبل..؟؟
غاليه: هيه.. بس مريوم لاتخبرين أي حد عن الي سمعتيه بينهم ولا عن الي سمعتيه منا.. أوكــي..!!
مريم: أوكي..
وبعد نص ساعه من اليلسه والإنتظار.. يات النيرس وقالت حقهم إن جميله بخير ونقلوها على غرفة خاصه، ولو يبون يدخلون لها عادي.. بس بدون إزعاج..
أم عبدالله: والياهل..
النيرس: بصراحه الياهل واايد تعبان.. والله يعينه..
راحت النيرس وبقوا كلهم يدعون له إن الله يعيشه ويكتب له عمر يديد.. بس عبدالله على طول ركض على غرفة جمول وشافها راقده مثل الملاك.. راح لها ويلس على الكرسي ومد يده ومسك إيدها وباسها ويلس يمسح على شعرها..
عبدالله: جميله إنتي تعرفين بغلاج بقلبي، حرام تسيئين الظن فيني.. والله قلبي عمره مادق بهالقوه لغيرج.. إنتي قلبي وعمري وكل دنيتي.. لو تبين روحي فداج.. بس الله يخليج لاتتركيني..
ودخلوا عليه أهله وراحوا يهنونه بسلامتها وهو مب قادر يرد عليهم..
غاليه: عبدالله.. جميله بتقوم بالسلامه لاتحاتي..
أم عبدالله: فديتك ياولدي الله يقومها لك بالسلامه وتربون ولدكم مع بعض..
وفي هاللحظه طلع صوت أنين من جمول الي بدت تقوم.. عبدالله قام لها ويلس على السرير وهو ماسك إيدها..
فتحت جميله عينها وشافت عبدالله في ويها ولا إراديا ابتسمت له مثل ماهي متعوده كل يوم تسوي يوم تصحى من النوم، ورفعت إيدها الثانيه ومسحتها على راسه..
أم عبدالله: الحمدلله على سلامتج يالغاليه..
جميله الي انتبهت للموقف وإنه في حد معاهم، ويلست تتطالع الكل والمكان وبدت تتذكر الي صار لها أمس..
جميله: آآآآآه راسي يعورني..
عبدالله: سلامة راسج..
جميله لفت بويها عنه: قوم عني.. وين أمي..؟؟ أبا إخواني..
مريم: كلنا هني جمول..
عبدالله: حبيبي إرتاحي..
جميله وهي تكلم عمتها: أنا ليش هني..!! شو الي صار..؟؟
أم عبدالله: البارحه طحتي ويالج نزيف ويبناج هني..
جميله وهي تحسس على بطنها: ولدي وينه..؟؟ شو الي صار له..!! عبدالله وين ولدي..!! والله عمري ماراح أسامحك لو صار فيه شي.. عبدالله ولدي ويــــــــــن..؟؟
عبدالله: حبيبي هدي الولد بخير.. الدكاتره إضطروا يسوون لج عميله لأن النزيف كان قوي.. و......
جميله: يعني هو بخير..؟؟
عبدالله: بخير والله بخير..
جميله: عموووه الله يخليج قوليلي اشحال ولدي..!!
ام عبدالله الي قلبها معورنها عليها: بخير ياجميله بس إنتي إهدي..
جميله: عيل ييبونه حقي أبا أشوفه..
أم غاليه: حبيبتي هو الحين فالحظانه لأنه قاصر ومابيظهرونه الحين.. بس إنتي قومي بالسلامه وبتروحين تشوفينه..
جميله وهي تحاول تقوم: الحين بقوم له، أبا أشوفه..
عبدالله مسكها من كتفها: فديتج مب الحين خلج مرتاحه..
جميله وهي تصارخ: لاااااتلمسني.. ولاتكلمني.. أنا أكرهك..
وطاحت على السرير وغطت ويها ويلست تصيح.. عمتها سارت لها وحظنتها ويلست تهديها..
غاليه: عبدالله لو تظهر برع إلين تهدا شوي..
عبدالله: لا.. بقعد وياها ولو تظربني المهم ما أخليها بروحها..
جميله: مابيك هني.. خلني بروحي، إطلع بــرع..
أم غاليه: ياعبدالله إظهر الحين وبعدين بتشوفها..
علي مسك عبدالله وسحبه لبرع وعبدالله من القهر عيونه تدمع.. راح برع ويلس على الكرسي الي كان عليه مساعه وهو مضايج حيل، وعلي يحاول يهديه..
وداخل أم عبدالله يلست تقرأ قرآن على جميله إلين هدت وغمضت عيونها، فقامت غاليه ويلست حذال جميله وتمسح على شعرها علشان ترقد..
أم غاليه: خلوها ترقد ولاحد يصحيها، ولو تمنعون عنها الزياره يكون أحسن، لأن حالتها وايد تعبانه..
أم عبدالله: خلاص إنتوا خذوا مريم وعلي معاكم وأنا ببقى هني معاها..
ميعاد: أنا بسير معاكم ظهري يعورني.. وعزيز عنده مراجعه بعد ساعه فالمستشفى..
أم عبدالله: خلاص سيروا كلكم وأنا بقعد معاها..
طلعوا كلهم وشافوا عبدالله يالس وهو علامات الحزن والقهر على ويهه.. ومن شافهم نقز لهم وهو يمسك أم غاليه..
عبدالله: عمووه الله يخليج خليني أدخل لها..
أم غاليه: عبدالله إذكر الله وإقعد شوي..
عبدالله يلس عالكرسي وأم غاليه يلست بعد..
أم غاليه: أنا مب عارفه شو سبب الخلاف الي من بينكم، بس الي أعرفه إنه جميله ولدت وهي الحين في فترة صعبه.. يعني وجودك معاها وهي كارهتنك بهالطريقه ممكن يأثر عليها وعلى نفسيتها.. فأنا أقترح عليك لو تخليها اليوم ترتاح هني وباجر او حتى إلين تهدأ أعصابها ترجع لها وتراضيها..
عبدالله: ياعمتي ماقدر، والله مب بإيدي.. أنا قلبي يتقطع عليها، ومابيها تظلمني وأخاف البعد يقسي القلوب..
غاليه: لو هي صج تحبك صدقني بتعطيك فرصه ثانيه..
ميعاد: صح.. وإنت لازم تصبر وتعطيها فرصه..
غاليه: عبدالله قوم معانا وروح بيتك.. ووالله أول ماتتحسن حالتها هي بروحها بتقول تبيك..
ميعاد: هي للحين مصدومه من الي صار بينكم.. وإنها ولدت بالسابع هاي بروحها مصيبه فنظرها، وطبعا كل هذا انت الملوم فيه من وجهة نظرها طبعا..
عبدالله خذ نفس عميق: خلاص بروح البيت.. بس خل أمي تكلمني أول ماتتحسن..
غاليه: بنخليها تتصل بك كل ربع ساعه وتطمنك..
عبدالله بعد صعوبه ومعاناة رضى يخليهم ويروح البيت، غاليه وأمها وصلوا علي ومريم لبيتهم وراحوا عالبيت، غاليه وصلت أمها وقالت لها إنها لازم تروح لفتون ربيعتها، نزلت امها ودقت غاليه لفتون وتوقعتها راقده لأن الساعه بعدها عشر ونص الصبح بس فتون خيبت ظنها وكانت صاحيه، فقالت لها تجهز لأنها الحين بتمر عليها..
وبعد ربع ساعه بالضبط فتون كانت يالسه مع غاليه فسيارتها، وعلى غير عادتها فالفترة الأخيره فتون كانت مب كاشخه وويها شاحب وضعفانه..
غاليه: الي يشوفج الحين مايشوفج قبل أسبوعين يوم كنتي كاشخه وحالتج حاله..
فتون تنهدت بقهر ولفت بويها تتطالع المباني برع..
غاليه: فتون.. شو السالفه..!! ما اعتقد ظهرتي وياي لأن العماير الي هني وحشتج..
فتون: أنا طايحه في مشكله ومحتاجة لج إنتي دونا عن الغير..
غاليه: كل مشكله ولها حل بس إنتي هدي أعصابج وبنلاقي لج حل..
فتون: مشكلتي عوووده وحلها مب بإيدي..
غاليه: عيل بيد من..؟؟
فتون: غاليه.. أنــا انــا.. مب عارفه كيف أبتدي..
غاليه: أنا بقولج من وين تبدين.. إبتدي من الغنى الي بين عليج بين يوم وليله..
فتون: أوكــي.. بآخر أيام الثانويه العامه.. تع.. تعرفت على واحد، كان وايد طيوب وحنون ووايد تعلقت به..
غاليه: أقدر أسألج منو هذا..؟؟
فتون وهي تبلع ريجها بصعوبه: ج.. جاسم ولد عمج..
غاليه وهي تبتسم: توقعت.. وبعدين..!!
فتون: تعارفنا فاليوم الي عرفتيني عليه فالسينما..وأخذت رقمه وكلمته.. بقينا نتكلم عالتلفون ونتعرف على بعض لخمس شهور..
غاليه: وماتقابلتوا طول هالفترة..؟!!
فتون: أول خمس شهور لا.. بس بعدها طلب إنه يشوفني ويقعد وياي، فالبدايه خفت ومارضيت بس هو أصر وهددني بإنه يتركني وماقدرت أرد له طلب.. بس قلت له نتواعد بكوفي أو أي مكان عام، ووافق وتقابلنا وكان يايب لي هديه عطور ولوشنات وأشياء وايده..
غاليه: يعرف كيف يلعب عالوحده.. إستغل حالتج وأغراج بهالأشياء..!!
فتون: وأنا أعترف إني مغفله وطاوعته، وبعد يومين قالي إنه ملان ومضايج ويبي يظهر وياي، ورضيت وطبعا في مكان عام، وهالمره كان يايب لي موبايل آخر موديل..
غاليه: آآآه كملي وبعدين..
فتون: وكل مره كنا نتواعد كان يفاجئني بهديه أحلى عن الي قبلها، وأنا كنت مينونه وطايره عقلي بالهدايا.. وفي يوم قالي قومي نتمشى بالسياره إنتي عمرج ماركبتي سيارتي.. انا خفت ولارضيت وهددني إنه يتركني..
غاليه: وطبعا إنتي كان عقلج طاير فالهدايا والماركات والبيزات ولا ودج تتخلين عن هالحياة..!!
فتون: بصراحه هيه.. وخفت إنه يتركني وأضيع يدونه.. ووافقت وركبت معاه سيارته ويلسنا نتحوط بها تقريبا ربع ساعه ونحن نسولف و.. وبعدها وقف السياره والتفت لي ومد إيده ومسك إيدي.. أنا خفت وحاولت أسحبها بس هو ظل ماسكها ويقولي إنتي حبيبتي وجريب بتصيرين خطيبتي الله يخليج خليني أمسكج وأحلم بحرمتي ومستقبلنا، كان يكلمني بكل حب وشاعريه..
غاليه بعصبيه: كملي كملي.. حركاته كشوفه وإنتي غبيه تمشين وراه..
فتون الي بدت تصيح: أدري إني غبيه وكنت أغبى يوم خليته يتمادى و.. ويبوسني وهو يقولي إنه بيخطبني..
غاليه وقفت السياره عالبحر ولفت على فتون ويلست تتطالعها بإحتقار..
غاليه: كملي وبعدين..
فتون: وبعد يومين طلب إنه يقابل أبويه، وتجرأت وقلت لأمي الي مهدت الطريج له.. ويانا البيت يتعرف على أهلي..
غاليه: معقووووله راح يخطبج..!! بدون أهله..؟؟
فتون: هيه.. كلم أبويه وأميه وخطبني منهم، ويوم إسإلوه عن أهله قالهم عندهم ظروف بس أكيد فأقرب فرصه بيون يتعرفون عليهم، وهو الحين ياي يكلمهم علشان محد ياخذني منه..
غاليه: آآآآآآآآخ يالوغد ياللعاب..
فتون: أبويه وايد استانس لأنه بيناسب الناس الي إشتغل عندهم، وبنته بتعيش بعز وبتبتعد عن الفقر..
غاليه وهي تلعب بمفاتيح السياره: وبعدين كملي..
فتون: وصار دايما يزورنا وإييب لإخواني ألعاب وهدايا ولأميه ذهب وأغراض للبيت..
غاليه: يعني لحس عقولكم كلكم.. والحين وين المشكله..!! شو الي تبين له حل..
فتون بتردد: غاليه.. أنا.. انا ظهرت مع جاسم وااايد.. وغلطت وياه وأنا الحين.. أنا..
غاليه: شووووو..!!!!!!!!!!!
فتون وهي تصيح: أنــا حـــامل.. حـــامل من جاسم وهو مب راضي يعترف به ويتهرب مني..
غاليه تمت تطالع فتون وهي منصدمه، معقوله ربيعة عمرها تغلط هالغلطه وتنزل راس اهلها بالقاع.. غاليه تصنمت ثواني وبعدها رفعت إيدها وعطت فتون كف على ويها..
غاليه: حيوااااانه حقييييييره كيف خليتيه يستغلج، كيف قدر يلمسج..؟؟ كيف تخلينه يلعب بشرفج.. الله يلعنج مافكرتي في هلج..مافكرتي الناس شو بتقول عنج..؟؟
فتون وهي تصارخ: بس هو خطبني وكلم هلي..
غاليه: ولو.. بس بعده غريب وهذا زنا.. تعرفين شو يعني زنا.. الله يلعنج شو بتسوين بهالمصيبه الي طحتي فيها..
فتون: الله يخليج ياغاليه كلمي جاسم، قوليله يستر علي.. قوليله هالولد ولده وأنا محتاجة له..
غاليه: شو أقوله. جاسم حيوااان ولاحد يقدر عليه..
فتون بدت تصفع ويها: وااافضيحتي شو بسوي الحين..!! والله بيذبحني أخوي..
غاليه تنهدت ولفت ويها عن فتون وهي تفكر فهالمصيبه وكيف بتقدر تعالجها.. وفتون تصيح ومب قادره تسكت وهي تفكر لو ماقدرت تقنع جاسم شو بيكون مصيرها..
غاليه: خلاص بوديج بيتكم وأنا بحاول أتصرف وأشوف لج حل..
وصلت غاليه ربيعتها الي ظلت ساكته طول الطريج.. ومن نزلتها غاليه على طول راحت عالبيت وطلعت على غرفتها وهي ميته من الضيج والخوف.. كيف بتقدر تساعدها..؟؟