منتديات بنوته - عرض مشاركة واحدة

06-30-2010, 03:06 AM

الفصل الثاني عشر..

اليوم الثاني فالفجيره الحريم قاموا من الصبح كالعاده وتريقوا ويلسوا يسولفون، وبعدهم قاموا الرياييل الي يلسوا وياهم يتريقون، والبنات والشباب راقدين..
أم منصور: عيل وينهم عيالكم زقروهم يتريقون..
أبوحميد: الله يهداج أمايه العيال شو بيصحيهم الحين الساعه بعدها سبع ونص الصبح..
أم منصور: والعثره.. الحين الساعه سبع ونص وتقولي تو الناس..
أبوغاليه: عاد لو أسير أوعي غاليه الحين والله لاتفرني بالمخده.. ههههههههههههههه
أم منصور: واابوي أنا على عيال اليوم الي يرقدون للظهر..
أم غاليه: خلاص أمايه كلها ساعتين وبيقومون لأنهم يايـين بلاد يديده ولازم يتمشون فيها..
أم منصور: منصور.. صب لي قهوه.. بدل هالرمسه الماصخه..
أم عبدالله: هههههه بلاج أميه محرجه..!!
أم منصور: أول مره أشوف عيال يمشون رمستهم على أهلهم..
أبوغاليه: هههههههه الزمن تغير يا أميه..
دخل عليهم سلطان ولد بدر: السلام عليكم..
وسلم على الكل ويلس على يمين يدته..
سلطان: يدووه اشحالج اليوم.. عسى ركبج ماتعورج..؟؟
أم منصور: لا الحمدلله، بشوفة الغاليين كل شي طاب..
سلطان: أفاااااا وإحنا كنا سبب مرضج..!!
أم منصور:لافديتك.. بس الغاليين ردوا وردت الروح وراهم..
فهاللحظه دشت عليهم غاليه وهي لابسه تنوره سوده وقميص أحمر على أبيض وشيلتها أحمر على أبيض..
غاليه: صبــاح الخيــر لأحلى أهل بالدنيا كلها..
الكل: صباح النور..
إلا سلطان: صباح الورد..
أم منصور: هيه هاي هي بنتي الي تقوم من الصبح..
غاليه بعد ماباست الكل (إلا سلطان طبعا خخخ): وأنا أقدر أكون في بيت يدووه ولا أقوم من الصبح أجابلها.. فديتج إنتي حبيبتي والله..
أم منصور: تعالي الغاليه إيلسي يمي تتريقين..
غاليه: إن شاءالله يدوووه..
وراحت ويلست وعيون سلطان بتاكلها، بس هي ما انتبهت ولا حست به..ويلست تتطالع الريوق وهي منصدمه.. الريوق كان بلاليط وبيض وقرص محلى وشاي حليب..
غاليه: ماما وين الكورن فليكس..؟؟
أم غاليه: هههههههه هذا الريوق ماشي غيره..
أم منصور: شو مالته هذا بعد كوفكس..؟؟
أبوغاليه: ههههههههه أميه هذا ريوق عيال هاليوم..
أم منصور: لالالا بتاكلين من ريوقنا وخل عنج الدلع..
أم غاليه: ههههههههههه يالله بشوفج اشقايل بتتدلعين الحين..
غاليه بدلع: يدوووه حرام أنا بنت ولدج العود والغاليه على قلبج، الله يخليج مابي هالأكل..
أم منصور لوت عليها: فديتج يانظر عيني.. خلاص من وين أييبه لج هالأكل..
غاليه وبنظرة انتصار على أمها: من الجمعيه.. أو أي مكان..
أم منصور: سلطان قوم فديتك سير ييب لبنت عمك الي تبيه..
سلطان وهو متشقق: أفا عليج كلها ربع ساعه وكل الي تبينه بيكون عندج ياغاليه..
غاليه: مشكووور..
أم منصور: عيل وينهن البنات..؟؟
غاليه: راقدات.. عيزت أوعيهن ومب راضيات يقومن..
أم منصور: وميعاد وعبدالعزيز وينهم..؟؟
أم عبدالله: راقدين.. ميعاد البارحه ياتني تتشكى من ظهرها.. شكله الطريج تعبها..
أم منصور: الله يرحم زمانا.. نركب اليبال ونييب الحطب.. ونرجع البيت نسوي الأكل وكروشنا مترين جدامنا ولا اشتكينا..
أم غاليه: الله يرحم زمان أول.. الحين من أقل شي يتعبون..
غاليه: يدووه وين بنسير اليوم..
أم منصور: خلي أهلج يودونج المزرعه بتستانسين فيها..
غاليه: وإنتي يدووه مب يايه ويانا..!!
أم منصور: لافديتج ماروم ركبي تعورني..
غاليه: فديتج يدووه.. أسويلج مساج..!!
أم منصور: شو هذا بعد..؟؟؟؟
أبوغاليه: هههههههه يعني تهمز لج ريولج..
أم منصور: هيه فديتج.. والله حصلانه ماروم أحركها..
يلست غاليه تمسح على ريل يدتها الي تتشكى من ركبتها، والكل يضحك على غاليه الي ماتعرف تسوي شي، ودخل عليهم سطان بالأكل وسار المطبخ يعطيه للخدامات يحطون لغاليه الريوق..
سلطان: يبت لج كورن فليكس ومربى وتوست.. وشيبسات وكاكاوات..
غاليه: الله شو من الكاكاوات يبت..
سلطان: باونتي وليو وسنيكرز وجالكسي...
غاليه: ياسلاااام شكلي بمتن زياده هاليومين..
أم منصور: ياليت لو تمتنين صايرة لي خيزرانه..
غاليه: ههههههههههه حرام عليج يدوه والله إني متينه.. عيل شروق شو تقولين عنها..
أم غاليه: ههههههههه يالله تريقي ووعي بنات خالتج بسهن رقاد..
غاليه: إن شاءالله.. بس ما قلتوا لي متى بنسير المزرعه..؟؟
بدر: شو رايج تتريقين وتوعين البنات وبوديكن..؟؟
غاليه: أنا عادي عندي بس أدريبهن مابيقومن للظهر.. وبالذات شروق بتعبني.. فشو رايك نسير بروحنا.. والعصر نطلع طلعه ثانيه..
بدر: طلباتج أوامر يالغاليه..
غاليه: مشكووووووووووور ياأحلى عم بالدنيا..
بدر: ومنو منكم يبا يسير..!!
فجر: أنا بروح بزور بيت جيرانا الأوليين من بعد سنين الفراق..
أم غاليه: أنا اسمحولي بقعد عند عموووه..
أم عبدالله: أنا بعد مافيني أروح بسير العصر مع البنات..
غاليه: خلاص عميه مافي غيري أنا وياك..
سلطان: وأنا شطبتيني وإلا ماتبيني..!!
غاليه: سوووري ما انتبهت لك.. خلاص لو تبي حياك ويانا..
سلطان: أكيـــد بسير مابفوت الفرصه..
وعلى الساعه عشر ونص راحوا المزرعه الي كانت كبييييره وواسعه، وغاليه تخبلت عليها.. راحوا للزيبة الي فيها الغنم وغاليه تبا تدخل عندهم..
بدر: ههههههه لو بايعه روحج إدخلي..
غاليه: يعني شو بيسون بياكلوني..
سلطان: ههههههههههه لا بس غنمنا شوي متوحشين عالصبح..
غاليه: خلاص برايهم يالله اشحلاتهم..
وكملوا المشوار ووصلوا للأرانب..
غاليه: ياربي اشحلاتهم.. منو الي يربيهم..؟؟
سلطان: أنا.. من صغري أحب الأرانب.. وهاذولا أحفاد أحفاد أحفادي..
غاليه: هههههههههه اشحلاتهم...
سلطان: تشوفين الأرنبه البيضه الي هناك.. مب لاقي لها اسم.. شو رايج نسميها غاليه..!!
غاليه: هيه هيه موافقه.. غلووووي تعالي هني.. تعااااالي..
سلطان بخاطره.. ياربي هالبنيه وايد طفوليه وعسوله..
بدر: يالله تعالي بوديج المكان السحري..
راحت غاليه ورا عمها بس بدر ماسار وياهم، وداها عمها لمكان رهيييييييييب بمعنى الكلمه، كان عباره عن مظليه من سعف النخيل وفيها أعمده تسندها، وتحتها جلسه عربيه مرتفعه عن الأرض شوي..
غاليه: يالله شو هالمكان الحلوووو
بدر: عيبج حبيبتي..!!
غاليه: وااااايد روووعه عميه.. شو رايكم اليوم بالليل نسهر هني..؟؟
بدر: هههههههه ليش لأ..
راحت غاليه ويلست على الجلسات وهي مستانسه، وصل سلطان ومعاه ورد أحمر.. وراح ويلس وياهم وعطاها الورد..
غاليه: الله حقي.. يسلمووو
بدر: بسير بعطي البقر أكلهم..
غاليه: بقر..!! بسير بشوفهم..
بدر: ههههههه لاحبيبتي اصبري شوي، بربطهم وعقب بزقرج، لأنهم من يشوفون حد غريب يخافون..
غاليه: أوكــي..
سلطان: تحبين الطبيعه..؟؟
غاليه: وااايد.. بس أحب الأماكن اليديده الي عمري ماسرتها علشان جي تلاقيني متخبله عالمزرعه..
سلطان: أهاااا
غاليه وهي تلعب بالورد: مره بابا وداني لندن ووايد عيبتني واستانست عليها، والسنه الي بعدها بعد وداني لأني المره الي طافت استانست فيها، بس ماحسيت بنفس فرحتي أول مره..
سلطان: يعني تحبين تزورين المكان مره وحده..
غاليه: لا أحب اول شعور.. يعني ذكريات أول مره تكون دايما أحلى عن ثاني مره..
سلطان: أمممممم عندي سؤال بس لاتفهميني غلط..
غاليه: عادي إسأل..
سلطان: شو رايج بالحب..؟؟؟؟
غاليه: الحب عاطفه حلوه، شعور حساس يحس فيه الواحد تجاه الي متعلق بهم..وبنفس الوقت مب أي حد يقدر يوصل له..
سلطان: كلامج حلو.. بس هل معناته إنج جربتي الحب..؟؟
غاليه وهي تقوم عنه: قلت لك.. مب أي حد يقدر يوصل للحب..
وراحت وهو يالس يطالعها ويحاول يستنتج من كلامها إنها للحين ماجربت الحب.. بس مع سلطان بتتعلمين الحب على أصوله..
راحت غاليه للبقر وهي متشققه من الوناسه.. يالله لو أعيش هني على طول صج حياتهم حلوه وتهبل..
غاليه: عميه بدر.. شو رايكم تتبنوني وأعيش وياكم هني..
بدر: ههههههههههه والله إنج سوالف..
سلطان: صدقيني الفجيره كلها بتستانس على وجودج هني.. وبيسوون لج يوله ليومين..
غاليه بخاطرها أويييه مب جنه يالس يغازلني: عميه ماعندكم خيول..؟؟
بدر: بلى فديتج، تشوفين الإسطبل الي هناك سري وبتشوفينهم..
سلطان: بيي وياج..
راحت غاليه ورا سلطان وشافت الخيول واتخبلت عليها..
غاليه: الله الخيل الأسود واااايد جذاااب
سلطان: هذا أحلى خيل عندي، اشتريته قبل شهرين بس للحين أدربه..
غاليه: يعني إنت تركب خيل..
سلطان: طال عمرج أنا خيال.. وهالسنه بشارك في سباق الخيول..
غاليه: ناااااايس، يالله نرجع لعميه..
سلطان: يالله.. بس ماجاوبتي على سؤالي..
غاليه وهي تمشي: أي سؤال..!!
سلطان: يوم سألتج عن الحب..
غاليه: جاوبتك وقلت لك مب أي حد يوصل له..
سلطان: وأنا سؤالي محدد.. هل غاليه منصور وصلت للحب بأي مرحله من حياتها..؟؟
غاليه بكل غرور وكبرياء: أنا غاليه المنصوري.. انا حر ٍ مالي مثيل .. لا يصيدني صياد .. و لا لي بديل ..
ومشت عنه وهو متخبل عليها من الخاااطر، وغاليه راحت لعمها وهي قلبها يدق بالقوو.. هي ليش قالت له جي، هي تحب أحمد بس ماتبي حد يعرف بالسالفه، بس هو شكله يبا يتحرش فيها وهي حسسته بإنها ماجربت الحب والحين هو بيحاول بكل الي يقدر عليه إنه يخليها تحبه.. ياربي شو هالورطه..
بدر: غاليه.. غاليه وين سرحتي؟؟؟
غاليه: لاعمي ماسرحت، بس تعبت من المشي خلنا نرد البيت..
وروحوا على البيت بس سلطان قعد فالمزرعه ومارجع وياهم.. وفالبيت لقت أمها ويدتها يسولفون..
غاليه: السلام عليكم..
أم غاليه: هلا حبيبتي.. عيل وينه عمج..؟!!
غاليه: وصلني ورجع المزرعه.. وينهن البنات ماقامن..؟؟
أم منصور: وين يقومن هالخايسات.. والله لا أقوم لهن بالعصا..
أم غاليه: خليهن عنج أمييه الحين بيقومن..
غاليه: لالالا لا يدوه قومي لهن، أعرفهن مابيقومن إلا بالضرب..
أم منصور: وينها عصاتي..؟؟
غاليه: هاج العصايه.. عليج بهن..ههههههههه
أم غاليه: حرام عليج ياغلوووي
غاليه: ههههههههه ماما خوزي عني بسير بضحك عليهن..
راحت غاليه ورا يدوتها الي دخلت عالبنات وبدت تسحب عنهن اللحاف وتضربهن بالعصا الي بإيدها..
شروق: آآآآآآآخ يدوووه والله حرام يعور..
أم منصور: مسودات العين، الدنيا بتظلم وإنتن للحين راقدات.. نشن لابارك الله بطبايعكن..
شذا: يدووووه بس شوي وبنقوم..
غاليه: لالالا يدوووه يقصن عليج ضربيهن زياده..
أم منصور: والله يابنات عندكن خمس دقايق لو مالقيتكن بالصاله لا أأدبكن بالعصا..
وطلعت عنهم وغاليه بتمووت من الضحك عليهم..
شروق: كله منج يالدبه إنتي الي زقرتيها لنا..
غاليه: هههههههههه عيل نحن يايين نستانس وإنتن راقدات للظهر.. أنا سرت المزرعه وشفت البقر والخيول والأرانب وإنتن راقدات..
مروى: وليش ماوعيتينا يالخاينه..!!!!
غاليه: ههههههههه العصر بنسير مره ثانيه..
شذا: شي ريوق وإلا شو..؟؟
غاليه: هههههههه لو تشوفون الصبح يوم قمت لقيت البلاليط والمادري شو.. شوي وبصيح.. بس يدووه فديتها خلت سلطان يروح إييب لي كورن فليكس من الجمعيه..
مروى: أشهد إني ماشفت بحلاة هالسلطان.. عليه حلاه ماتلقينها عند أي حد..
شروق: هيه الله يحفظه طالع على أبوه.. أقول غلوووي هو بعده هني..
غاليه: لا سار ويانا المزرعه وقعد هناك..
مروى: حظج صبحتي بويه غاوي عالصبح..
غاليه: هههههههههههه يالله قومن انتهت المهله.. وإلا بزقر لكم يدووه بخيزرانتها..
شروق: غلوووي عاد بلا حركات بايخه، نحن يايين نستانس مب ننضرب من صباح الله..
غاليه: الحين الساعه 11 ونص ولو ماقمتن صج يدوه بتعصب..
وراحت عنهن غاليه وشافت يدتها يالسه مع سلطان يشربون قهوه.. راحت ويلست وياهم..
أم منصور: هااا قامن الخايسات..
غاليه: هيه يدووه بيبدلن ثيابهن وبيون.. يدوه أبا شاي حليب..
ام منصور: عندي قهوه..
غاليه: لالالالا ما أشربها.. لو عندج تركش كوفي زين..!!
أم منصور: لاتعوين لي لسانج، شو هذا بعد..؟؟
سلطان: ههههههههه يدوه هاي قهوه تركيه تكون بالسكر..
أم منصور: سيري عني ياغاليه.. مادري من وين تييبون هالسوالف..
غاليه: ههههههه بسير المطبخ بخلي ليندا تسويلي شاي.. يدوه أنا اليوم بسويلج كيكه من ايدي..
أم منصور: بنت منصور تعرف تسوي شي.. ماظنتي بحياتج شفتيه المطبخ..
غاليه: ههههههههه لايدوه بس أسوي كيك غيره ماعرف..
أم منصور: يالله عيل بنشوف اليوم كيكتج، عاد لاتترسينها سكر..
بعد نص ساعه طلعن البنات وشافوا يدتهم وغاليه وسلطان متيلسين بالصاله يسولفون، مروى تخبلت على سلطان الي ماعبرهن حتى بنظره، ويلس يسولف مع يدته وغاليه..
مروى: يدوه متى بتودينا المزرعه..؟؟ غاليه تقول عنها وايد حلوه..
أم منصور: خلن الرقاد يوديكم.. إنتوا ماتستحون على ويوهكم رقاد للظهر.. شو بقى فاليوم..
شروق: خلاص يدووه آسفين..
غاليه: يدوه اليوم شفت فالمزرعه مكان واااايد حلو وقلت لعميه شو رايك نسهر هني اليوم قالي أوكــي..
أم منصور: أشهد إنج مينونه..
سلطان: ههههههههههههههههههه
غاليه: ليش يدوووووووه..
أم منصور: يالخبله المزرعه مب زين يدخلونها بالليل, فيها ين..
مروى بدلع: بسم الله الرحمن الرحيم.. لا غلوي أنا أخاف..
غاليه: عاااااااادي ونحن شو بنسوي بنسولف ويمكن بندق شوي وبنغني..
سلطان: هههههههه بتغنين بعد.. عيل بنرقص الين ويانا..
دخل عليهم بدر: السلام عليكم..
غاليه: وعليكم السلام.. عميه تعال شوف يدووه ماتباني أسير المزرعه بالليل نسوي سمر ونستانس..
أم منصور: تبا تسوي سحر الساحره..
بدر: ههههههه أميه خلي البنيه على راحتها.. حبيبتي غاليه المزرعه مب زين يدخلونها بالليل.. وبعدين اليوم عندنا عرس..
غاليه: الله.. عرس منوووو؟؟
بدر: عرس سالم بن ضاحي.. ولازم نحظر لهم..
غاليه: عادي نحن نحظر بعد..؟؟
بدر: هذا عرس رياييل بس تقدرين تركبين فوق السطح وتشوفينا..
غاليه: يدوه عادي نقعد فوق السطح نطالعهم..؟؟
أم منصور: كل البنات بيكونون فوق سيروا إنتوا بعد..
بدر: هااا سلطان مجهز سلاحك لليوله..؟؟
سلطان: أكيييييد مايبيله كلام..
مروى: ياسلام تيول بعد..
سلطان: أكيد طال عمرج..
شروق: عيل التحدي بيبدأ.. خليفه وسعيد وسلطان..
سلطان: أفااا عليكم محد غيري بيفوز فاليوله..
بدر: عليكم بهم لأن بن ضاحي محطي خيل للي بيفوز..
غاليه: كيف يعني..؟؟
بدر: الله يسلمج بن ضاحي هذا الله عطاه من الأولاد ماعطى غيره، تزوج ثلاث حريم وكلهن يابوله أولاد ماعنده غير بنت وحده متزوجه وساكنه في بوظبي عند ريلها.. وكل سنه يزوج واحد..
سلطان: وكل عرس يحط جائزه لحسن يويل.. مره يحط خيل ومره بيزات وكل يوم شي..
أم منصور: وماشاءالله عليه سلطان من سنتين يفوز.. مره فاز بعشرة آلاف والعام فايز بخيل بني غاااوي..
غاليه: الخيل الي شفناه فالمزرعه..؟؟
سلطان: هو ماغيره..
بدر: بس السنه غير.. الخيل عربيه أصيله وتستاهل الموت علشانها..
سلطان: محد بياخذها غيري وأنا ولد بدر..
مروى: عيل بنشجعك كلنا..
شروق: هيه شجعيه ولو تبين الموت, والله بيذبحج خلوف..
مروى: يولي خلوف ملينا من يولته..
شذا: لا أنا أقول سعيد بيفوز باليوله، ماشاءالله عليه محترف..
غاليه: القرد في عين أمه غزال..
شذا: شو قصدج.. تاج راسج سعود..
غاليه: يخسي والله.. قبل لاتدافعين سيري شوفيه كيف مغربل بنات الجامعه، ومابقت وحده مارافجها..
أم منصور: غاليه شو هالرمسه..؟؟
غاليه: وأنا الصاجه يدوه، سعود الكل يعرف سوالفه ويدرس وياي بالجامعه وأشوفه بعيني..
سلطان: خلوا الولد يستانس شو تبون فيه.. مب حرام يحب..
غاليه: يحب غير عن يلعب.. بسير لماما أشوف غداها أحسن لي..
سارت غاليه عنهم وهي مب حاسه بشذا الي يالسه تحترق من كلامها عن سعيد..
على الساعه أربع العصر الكل سار المزرعه ماعدا أم منصور وبدر.. وهناك شافوا كل الي شافته غاليه.. وعرفتهم على الأرنبه غاليه..
شروق: بس تعبت من المشي خلونا نرجع البيت..
غاليه: صح والله الساعه صارت 6 ونص..
فجر: سلطان متى بتبدي اليوله..؟؟
سلطان: الساعه ثمان.. هاا شباب تحدي اليوم..!!!
سعيد: عالميدان ياحميدان..
خليفه: لا وإنت الصاج ياسعيدان.. ههههههههههههه
الكل ضحكوا وكملوا طريجهم للبيت وهم مستانسين.. الشباب راحوا ورا سلطان يعطيهم سلاح لليوله.. والبنات راحوا يسبحون ويتجهزون للحفله بالليل..

***********______________*************

على الساعه سبع ونص غاليه راحت لأمها المطبخ وهي لابسه البدله الكويتيه العنابيه وفاتحه شعرها وشكلها كان واااايد حلووو..
أم غاليه: غلوووي سيري البسي شيله لايدخلون عيال عمج..
غاليه: ماما محد فالبيت.. أنا أباج تسكرين لي السحاب..
أم غاليه وهي تسكره لها: ووينهن بنات عمج..؟؟
غاليه: كل وحده مشغوله.. ماما أنا يوعانه مابنتعشى قبل لانسير فوق..
أم غاليه: يدوتج تقول خلي البنات يطلعون عالسطح يستانسون، وإنتوا ودولهم العشا فوق..
غاليه: أوكـــي.. خلاص أنا بسير بخلص عدول وباخذ البنات وبنسير فوق..
وفهاللحظه سمعوا صوت سلطان محتشر.. غاليه انخشت ورا الطاوله وأمها غطت عليها..
سلطان: الله ياخذ شركم.. السلام عليج عموووه
أم غاليه: هلا بسلطان.. بلاك حاشر البقعه..
سلطان: هاذولا عيال دبي خقاااااقين يقولون لي سلاحك تعبان، عيل ليش ماتييبون سلاحكم وياكم لو إنتوا يويله..
أم غاليه: إنت طحت بسعيد وخليفه، هاذولا ميانين..
سلطان: خلاص عمووه أنا بسير أتزهب تبين شي..
ام غاليه: سلامتك يالغالي..
راح سلطان وقامت غاليه من مكانها وهي تحمد ربها إنه ماشافها وهي ماتدري إنه شافها وزادته خبال..
راحت غاليه الغرفه ويلست تحطي على ويها شوية مكياج، والبنات يتعدلون ويتكشخون.. وغاليه سرحانه في كلام سلطان لها اليوم الصبح.. وتذكرت أحمد واشتاقت له.. ياربي بخاطري أشوفه أو أكلمه.. حرام والله بخاطري..
شروق: غلوووووووي وين سرحانه..
غاليه: لاسرحانه ولا شي.. شو عندج تصارخين..؟؟؟؟
شروق: أي شيله بتلبسين؟؟ لأني أبا شيلتج البيج مع الذهبي..
غاليه: أوكي خذيها أنا بلبس العنابيه..
خلصوا البنات لبس وطلعوا على السطح.. وخذولهم زاويه وحطوا الكراسي فيها ويلسوا عليها.. وماشاءالله كانوا بنات الجيران عن اليمين وعن الشمال.. والشباب تحت عند بيت بن ضاحي الي كان مجابل بيت يدتهم..
غاليه: اشكثرهن هالبنات.. والله وناسه.. حظهم يقعدون فوق ويشوفون اليوله..
شروق: هههههههه حلوه حياتهم هني..
غاليه: خلونا نتعرف عليهم..
مروى: لاتفضحينا غلوي خلج ساكته..
غاليه: أوين فضيحه عادي.. بنتعرف على بنات مب شباب..

وعلى السطح الثاني البنات كانوا يالسات..
ميثه: نواري شوفي البنيه الي هناك مثل القمر.. ياربي اشحلاتها..
نوره: ميثوه شكلهم مب من هني.. يمكن يايين زياره..!!
ميثه: هيه صح.. أمي تقول أم منصور يايينها عيالها من دبي..
غاليه الي سمعت رمستهم: قلت لكم خلونا نسلم عليهم.. السلام عليكم جيرانا..
ميثه: وعليكم السلام.. اشحالكم عرب زايد..
غاليه: ربي يخليج ويبجيج.. إنتوا اشحالكم عساكم بخير..
ميثه: الحمدلله بخير.. إنتوا من دبي صح..؟؟
غاليه: هيه.. الشيخه ماعرفتينا على نفسج..!!
ميثه: أنا إسمي ميثه وهاي أختي نوره..
نوره: مرحبا الغاليه..
غاليه: مرحبتين الشيخه.. عساج بخير..
نوره: بخير وعافيه الحمدلله..
غاليه: وأنا غاليه المنصوري.. وهاذولا شروق وشذا بنات خالتي، وهاي مروى بنت عمي..
مروى: مرحبا ملايين بأهل الفجيره..
نوره: ربي يخليكم إن شاءالله.. وإن شاءالله تعيبكم اليوله..
مروى: أخوي خليفه مشارك وياهم.. وسعيد ولد عمنا بعد..
ميثه: الله يوفجهم إن شاءالله..
وبدت اليوله وصخوا البنات فوق يطالعونهم.. كانوا الشباب اول شي منقسمين لحزبين متجابلين.. وبدت الأغنيه الأولى الي الكل يال عليها.. والجو كان ربشه ولا أرووووع..

جيتك على الموعد ولاجيت... وش عن لقانا مانعنك...
كنك عن الموعد تخليت.. ياويل يالي عاشقنك..

وماشاءالله عليهم كل واحد من الشباب كان أحلى عن الثاني.. وسعيد وخليفه مميزين لأنهم يداد في المجموعه.. بس الي صج بارز من بينهم هو سلطان ماشاءالله عليه.. سلطان يحب الكنادير الملونه الي تبرز هيبته.. ولابس اليوم كندوره كركميه وسفره حمرا.. وكان شكله رووووعه..
والكل مرتبشين وإيولون.. وكل واحد يستعرض مهاراته وحركاته اليديده الي متعلمنها.. وسعيد وخليفه يسوون حركات مشتركه مع بعض ويتخققون بحركاتهم عسب يخبلون فالبنات..
ويوم خلصت الأغنيه يلسوا شوي يرتاحون ويتعشون.. ووصل عشا البنات الي قاموا ياكلون..
غاليه: ميثه نوره حياكن ويانا عالعشا..
ميثه: مشكوره حبيبتي متعشيين..
شروق: أوكي لاتاكلون بس تعالوا اقعدوا جريب منا..
نوره: إن شاءالله.. بس كيف بنظهر من البيت وتحت كله شباب..
غاليه: وليش تظهرون اشقحن من السطح..
ميثه: هههههههههه غاليه إنتي مينونه ممكن نطيح..
غاليه: تعالي من هني.. السطح مشترك وعادي..
ميثه: أممممم بدق لامي وبسألها..
دقت ميثه لأمها الي وافقت وبدوا المغامره لسطح الجيران.. وغاليه وشروق وقفوا لهم يساعدونهم..
ميثه: والله لو طحنا ياغاليه ياويلج منا...
غاليه: هههههههه لا أنا بمسكج..
والحمدلله وصلن البنات بالسلامه وتعرفوا على أم غاليه وأم عبدالله.. ويلسوا يسولفون ويتعشون معاهم..
غاليه: منو توها تقول متعشيه وشبعانه.. هههههههههه
ميثه: يالزطيه.. باكل غصبن عليج..
ام غاليه: غاليه عيب.. خلي البنات ياكلن..
مروى: كلوا بسرعه لايبدون اليوله..
وخلصوا البنات أكلهم ورجعوا يقعدون عالكراسي ويسولفون ويضحكون، وماشاءالله عليها ميثه واااايد حبوبه وتحب السوالف على عكس نوره الهاديه الي ماينسمع لها صوت..
مروى: شوفوا هناك الي لابسين كنادير سود.. الطويل أخوي خليفه والأقصر شوي سعيد ولد عمنا..
ميثه: ماشاءالله عليه سعيد جمييييييييل..
مروى: هااا ميثووه عينج على ولد عمنا..
ميثه: ياليت ياخذني دبي وأغير عيشتي..
غاليه: هههههههههههههه ماله داعي خلج هني أبرك لج..
ميثه: أفاااا وأنا تحريتج بتقولين باخذج لأخوي..
غاليه: بسم الله علي.. لا أبد ماطرالي أبتلي فيج.. وبعدين حبيبتي أنا وحيده أهلي لا أخو ولا أخت..
ميثه: حظج مب نحن من كثرنا مب قادرين نتذكر أسامي بعض..
شذا: هههههههههه ماشاءالله عليكم..
غاليه: يالله اسكتوا إبتدت المنافسه..
شذا: ياسلام سعيد أول واحد..
ابتدت اليوله والكل مرتبش بدوها بسعيد الي يال بكل حماس والكل تخبل عليه وعلى يولته.. وبعد يالوا ثلاثه ومن بعدهم وصل دور سلطان الي ابتكر لهم احلى وأغرب الحركات.. وخليفه كان من بعد سلطان بإثنينه.. وبعد ماشاءالله عليه يال بكل حلاوه بس آخر شي طاح عنه سلاحه..
شروق: حرااااااااام طاح سلاحه..
مروى: حليله خرب على نفسه.. الله يعينا مايحطي حرته علينا ويردنا البيت اليوم بالليل..
غاليه: ههههههههههه
ميثه: لا عادي.. بيكمل المسابقه، شو تتحرون برنامج الميدان شو..
غاليه: عيل كيف يقررون الفايز..؟؟
نوره: الحكام يشوفون احسن واحد ويتوجونه الفايز..
شروق: الله يوفجهم كلهم..
وعلى الساعه عشر ونص خلصوا كلوا اليويله وبدا الحكام يتشاورون عسب يختارون منو هو فارس الميدان..
غاليه: مايندرى منو هو فارس الفجيره فاليوله...!!!!
مروى: هههههههههههههه
ميثه: لاتتطنزين فديت شبابنا ماشي مثلهم..
وبعد نص ساعه من المشاورات طلعت النتيجه والكل على أعصابه.. الكل ينتظر الفايز. الكل متحمس..
والفايز هووو...
((سلطان))

سلطان هو الفايز للسنه الثالثه على التوالي، الكل استانس له وباركوا له، ماشاءالله عليهم عندهم روح رياضيه..
غاليه: حليلهم عيال عمامي مافازوا..
شذا: مره ثانيه إن شاءالله..
ميثه: إنتوا إلين متى بتقعدون هني..؟؟
غاليه: بابا والشباب ماخذين إجازه الأربعاء والخميس وطبعا الويك إند الجمعه والسبت، يمكن عالسبت بالليل نحن مروحين على دبي..
ميثه: خلاص عيل غداكم باجر عندنا..
شروق: مشكوره حبيبتي بس ماله داعي..
نوره: أفا عليكم إنتوا ضيوفنا، والحين صرنا ربع ولازم نكرمكم..
غاليه: لايرد الكريم إلا اللئيم.. خلاص موافقين.. نحن بس وإلا أهلنا كلهم..؟؟
ميثه: الكل طبعا.. حياكم على الراس والعين..

***********____________***********

باليوم الثاني الكل قام من صباح الله خير وبالذات البنات الي خافن من ضرب يدتهم لهم.. وغاليه هي الوحيده الي ماقامت..
أم منصور: عيل وينها غاليه البارحه من صباح الله نشت..!!
شروق بخبث: يمكن يبالها ضربة خيزران مثلنا أمس..
مروى: قومي لها يدووه..
أبوغاليه: يالشريرات مالكن شغل في بنتي أنا بسير بوعيها..
راح منصور لبنته الي كانت متكوره على نفسها ومب قادره تتحرك وتإن تحت اللحاف..
أبوغاليه: بسم الله عليج حبيبتي شو صار فيج.. يعورج شي.. غاليه بابا ردي علي..
غاليه: بابا خاصرتي تعورني.. آآآآآي والله بموووت..
أبوغاليه فز من مكانه وركض لأخوه بدر..
أبوغاليه: بدر شغل السياره غاليه تعبانه..
البنات كلهم قاموا يشوفونها شوفيها والشباب يالسين ينتظرونها.. بعد خمس دقايق طلعت غاليه مع امها وأبوها وعمها بدر للمستشفى.. المستشفى كان شوي بعيد عن البيت.. وغاليه تزيد آلامها وبدت تصارخ وهي بحظن أمها..
بدر: إستحملي شوي ياغاليه خلاص وصلنا..
وصلوا المستشفى ونقلوها على غرفة المعاينه، والدكتوره هناك فحصتها وسوت لها تحاليل سريعه..
الدكتوره: إنت أبوها..؟؟
أبوغاليه: هيه.. دكتوره بنتي شو فيها..؟؟
الدكتوره: بنتك فيها الدوده الزايده ولازم نستأصلها حالا وإلا بتنفجر..
أبوغاليه: الزايده.. خلاص بحولها على دبي..
الدكتوره: حالتها ماتتحمل لازم نسويلها العمليه وإلا ممكن تموت..
أبوغاليه استسلم للأمر ووقع عالعمليه.. ويلس مع حرمته ينتظرون تخلص العمليه.. واتصل بوغاليه بأهله وخبرهم بالي صار..
أم منصور: فديتها بنيتي، بدر قوم ودني عندهم..
بدر: أمي وين بتسيرين أول ماتقوم بالسلامه إن شاءالله بوديج لها..
ناصر: خلاص أنا والشباب بنسير عندهم..
أم منصور: عيل لازم كلنا نروح حرام نخليها بروحها..
بدر: خلاص عيل بنسير وياكم.. بس البنات يقعدن هني..
وراحوا الجماعه كلهم وبقوا شروق وشذا ومروى وميعاد..
شروق: تعلوا نسينا نعتذر من ميثووه ونواري..
ميعاد: خلاص سيري لهم وخبريهم..
شروق: يالله مروى نروح..
مروى: لالا أنا خايفه على غاليه ومابي أروح بيلس أنتظر أي خبر..
شذا: لاتتطالعيني أنا ما أحب أدخل بيوت ماعرفها..
شروق: مااالت محد يعتمد عليكم..
ولبست عبايتها وشيلتها وسارت لبيت جيرانهم.. ودقت الباب ووقفت تنتظر.. بس محد فتح فرجعت ادق الجرس مره ثانيه.. ووقفت.. ووقفت.. ووقفت.. وبعد دقايق انفتح الباب فجأة وطلع واحد طويل وهي من الخوف ردت على ورا..
زايد: السموحه ماكنت أعرف إنج ورا الباب.. الجرس خربان..
شروق وهي مستحيه: ميثه هني..!!
زايد: هيه.. حياج تفضلي..
شروق: لا مشكور بنتظرها هني..
زايد التفت على ورا وهو يصارخ: ميثاني.. ميثاااااااني وريل..
ميثه: آآآآآآمين يارب إييني ريل وأفتك منك..
زايد: مادري منو الي يبيج.. تعالي في وحده تبيج عند الباب..
وصلت ميثه: شرووووق هلا وغلا حياج..
زايد سار داخل عنهم..
شروق: لاحبيبتي مب داخله..
ميثه: أنا قلت غاليه أول وحده بتوصل عالغدا لأنها مفجوعه، بس إنتي ييتي والغدا بعده ماسويناه..
شروق: أنا يايه أعتذر لأنا مابنقدر نتغدا عندكم..
ميثه: ليش عسى المانع خير..؟؟
شروق: غاليه فالمستشفى، طلعت عندها الدوده الزايده والحين فالعمليات..
ميثه: فدييييييييييتها... حرااااااام، ماتشوف شر إن شاءالله..
شروق: الشر ماييج يالغاليه.. والحين اسمحيلي بسير بنتظر أي خبر عنها..
ميثه: أوكي.. بس طمنيني عليها..
راحت شروق لبيتهم ودخلت ميثه البيت ولقت زايد وهو يالس فالحوش..
ميثه: بسم الله يني حضرتك..
زايد: لا عفريت.. هه هه هه
ميثه: ياربي على ثقل دمك.. خوز عني بسير لنواري..
زايد: انزين اصبري، أممممممم منو هالبنيه..
ميثه: هاي بنت من دبي أهلهم هني ويايه تزورهم..
زايد: منو بنته..
ميثه: أففففف تعرف أم منصور.. مادري شو تقرب لها..
زايد: أهاااا
ميثه: خلصت تحقيقك يالله بروح لنواري..
راحت ميثوه لنواري تخبرها بالي صار وزايد ظهر من البيت وهو يفكر في شروق..

نرجع للمستشفى.. أبوغاليه واقف يدعي لبنته وهو خايف عليها، وأم غاليه تقرا قرآن بكل هدوء..
دخلوا عليهم الشباب وراحوا لهم..
ناصر: عمي بشر عسى خير..
أبوغاليه: مادري بعده محد طمني بشي..
بدر: إن شاءالله خير يارب..
أبوحميد: منصور خبرتهم عن قلبها..
أبوغاليه: هيه قلت لهم.. يارب تقومها لي بالسلامه..
أم منصور: إن شاءالله بتقوم بالسلامه ياولدي لاتحاتيها..
أم غاليه: الله يسمع منج ياعموووه..
يلسوا الجماعه ينتظرون أي خبر يوصلهم عن غاليه..
وطلع لهم الدكتور بعد أكثر من ساعه وهو مبتسم..
الدكتور: تطمن يا أخ منصور، بنتك بصحه وسلامه والعمليه نجحت.. حمدلله على سلامتها..
أبوغاليه من خلص الدكتور كلامه.. خر على الأرض وسجد سجدة شكر لله.. وإخوانه إرفعوه وهم يتحمدون له بسلامة بنته..

بعد ساعه من طلعت غاليه من غرفة العمليات الكل كان يالس وياها ومحاوطنها بالمستشفى..
غاليه: ماما.. أبا مـــاي..
أم غاليه: إن شاءالله حبيبتي..
ناصر: غاليه.. شو سالفة هالدوده..؟؟
غاليه بتعب: شو دراني شكلي أكلت دوده خايسه..
ناصر: ههههههههههههههه
غاليه: سلطان.. مبرووك الفوز تستاهل كل خير..
سلطان: الله يخليج يابنت عمي.. المهم قومتج بالسلامه..
غاليه: بابا..
أبوغاليه: أدري الي بتقولينه.. متى بظهر..
غاليه: ههههههه فاهمني..
أبوغاليه: حبيبي هاي عمليه يعني اصبري يومين..
غاليه: بصبر بس بشرط..
أبوغاليه: عيوني لج..
غاليه: نقعد فالفجيره بعد يومين عسب أعوض عن هاليومين الي بقضيهم فالمستشفى..
أم غاليه: لهالدرجه حبيتي الفجيره..؟؟
غاليه: لا حبيت يدووه أكثر..
أم منصور: فديتج حبيبتي يلسي عندي كثر ماتبين لو سنه..
أبوغاليه: خلاص حبيبتي بنقعد زياده المهم صحتج..

غاليه قعدت فالمستشفى من الخميس إلين السبت الصبح، وطبعا العاشق المتيم سلطان مافارقها ودايما يزورها ويهديها الورود والحلويات.. وفي مره صور لها الأرنبه غاليه وكتب عليها حمدلله على سلامة أغلى البشر.. وطرش لها بالبلوتوث.. ووايد استانست عليها.. هو يعتقد إنه بدا الطريج لقلبها وطلبها من أبوها إنها تبقى هني يعني إنها تبا تكون وياه..

************_____________************

في بيت أم منصور الي كانت يالسه تزهب الغدا لعيالها ومعاها بناتها وحرمة ولدها..
أم غاليه: بسير بشوف غاليه.. عمووه منو هالبنات الي زايرينها..؟؟
أم منصور: بنات فاطمه حرمة سعد الشحي..
أم غاليه: أهااا فديتهن والله طيبات..
أم حميد: سيري شوفي غاليه وعزمي البنات يتغدن هني..
أم غاليه: مايحتاي تلاقي غاليه ربطتهن عسب يتغدون..
راحت أم غاليه وشافت الي توقعته، غاليه مب راضيه تخليهن يروحون على بيوتهم..
ميثه: خالووه شوفي بنتج اللزقه خليها تفجني..
أم غاليه: ههههههه لا حبيبتي إنتوا اليوم بتاكلون عندنا..
ميثه: نبيج عون صرتي فرعون..
غاليه: ماما مب فرعون يالفيل..
نوره: هههههههه خلاص لو تغدينا عندكم باجر إنتوا تتغدون عندنا..
غاليه: وليش باجر اليوم عالعشا..
ميثه: خل إنتي همج على بطنج..
أم غاليه: خلاص عيل دقوا حق الوالده وخبروها..
وطلعت أم غاليه وخلت البنات يسولفون..
ميثه: يوم طاحت غاليه بالمستشفى في ناس تعنوا وخبرونا بالسالفه، وأخوي الي شافهم تخبل عليهم، وكل يوم ينشد عن علومهم..
شذا: منوووووووو؟؟؟
مروى: شروق هي الي راحت تخبركم..
نوره: ههههههههههه والله إنج خايسه ياميثوه ليش تحرجين البنيه..
شروق وهي ذايبه فثيابها: ماااالت عليج يالدبه..
الكل ضحك على شروق الي وااايد تستحي..
ميثه: إلا بسألكم وينه الغاوي سعيد ماشفناه من يوم العرس..
شذا: وإنتي شو تبين في سعيد..؟؟
ميثه: حبيبتي إن الله جميل يحب الجمال..
مروى: والله إنج سوالف ياميثووه..
ميعاد: الحين بييج الفارس المغوار.. متعودين هالوقت يخلصون غدا ويمرون يسلمون على غاليه وبعدها يرقدون..
نوره: المزيون سلطان شو يقرب لكم..
غاليه: ولد عمنا.. هو أخو بابا بالرضاعه..
نوره: أهااا يعني مب لزم..
مروى: لا بس بالرضاعه..
وبعد خمس دقايق من السوالف والضرابه وصلوا الشباب الي دخلوا عليهم وهم ميتين من الضحك..
غاليه: ضحكونا معاكم..
خليفه: يقولكم غرشوب دبي رقم 2 الي هو سعيد.. وبالمناسبه أنا رقم واحد.. إحم إحم..
مروى: مطول بالرمسه.. يالله اخلص..
خليفه: جب جب يالسوده.. المهم اليوم سار صوب الزرعه يبا يستهبل عالمزارعين..
سعيد: حلفتك بأغلى شي بحياتك ماتكمل..
غاليه: حراااااام قولنا..
سعيد: لا ماشي.. سمعتي الي بنيتها مابيها تنهدم..
مروى: خقااااااااااق
ناصر: غاليه اشحالج اليوم.. إن شاءالله أحسن..؟؟
غاليه: الحمدلله واااايد أوكي ومن باجر بظهر وياكم..
سلطان: لاتستعيلين المهم صحتج..
غاليه: لاتحاتي صحتي فوووق الريح..
خليفه: خلاص عيل بنسير نرقد.. ولاتنسين مراوي تصحيني العصر لأن عندي موعد مهم..
ميعاد: حتى هني مواعيد.. إرحم نفسك شوي..
خليفه: إنتي يودي الي فبطنج لايطيح ومايخصج فيني..
عبدالعزيز: مايخصك في حرمتي.. يالله خلونا نظهر..
وراحوا الشباب وبقت غاليه والبنات سوالف للعصر.. وظهرت شروق مع نواري وميثوه توصلهن للباب..
ميثه: على فكره أنا ماكنت أمزح يوم رمست عن زايد أخوي..
شروق: شو قصدج..؟؟
ميثه: أخوي وايد معجب فيج.. ويمكن بدا يحبج..
نوره: والله ياشروق عمره ماتكلم عن بنيه كثر ماتكلم عنج، مع إنه ماشافج غير ثواني..
شروق: إنتوا الحينه شو تبون..؟؟
ميثه: أمممممم نباج حق أخونا..
شروق: شو يعني..؟؟!!!
نوره: يعني تعالي اليوم زورينا وبتعرفين..
شروق: عقب هالرمسه كلها وتبوني أزروكم لالالالالا
ميثه: ههههههه حساسه البنيه..
نوره: حبيبتي لاتخافين أخوي مب من النوع الي يلعب، ويحسج مناسبه له ونحن بعد..
شروق: يصير خير..
ميثه: خلاص نحن بنروح واليوم بالليل تعالي تعشي عندنا. بروحج..
شروق: يصير خير..
رجعت شروق للبنات وهي سرحانه فالي صار.. هي للحين بداخلها حب ناصر ماتقدر تغامر بحب يديد يكن تفشل فيه.. وبعدين إنها تسكن بعيد عن أهلها لالا صعبه.. وليش لأ..؟؟ يمكن بهالطريقه بنسى ناصر وبقدر أعيش بدونه..
وصحت من أفكارها على صوت سلطان وهو واقف فالمطبخ يرمس فالموبايل ولاحس فيها..
سلطان: هااا عادل الحين شو قلت.. لالا مايخصني في مشروعك أنا أتكلم عن بضاعتي أنا..
والتفت على ورا يتطمن إنه محد يسمعه: شوف يا عادل هالبضاعه وايد غاليه وأنا دفعت فيها دم قلبي لاتخليني أندم عليها..
شروق خافت أي بضاعه وأي فلوس الي يتكلم عنها، هو يشتغل فالديوان ولاخصه فالتجاره..
سلطان: خلاص الغالي اول مايوصلك أي خبر خبرني.. وأكييييد سهمك محفوظ.. ههههههههه يالله بــاي..
شروق من حسته بيظهر من المطبخ على طول انخشت في غرفة الخدامات وسوت نفسه توها طالعه وشايله الفوط..
شروق: هلا سلطان..
سلطان: هلا بنت عمي.. اشحالها غاليه..؟؟
شروق: تمام.. سوري بسير بوديلها الفوط..
راحت غاليه عنه وهي ميته من الخوف، بخاطرها تقول لأي حد بس مب عارفه، يعني هو ممكن يكون تاجر مخدرات أو أي شي ثاني.. ياربي شو هالورطه.. أكلم منو..؟؟ أقول لمنو..؟؟