بدت إمتحانات الثانويه العامه والكل إنشغل فيها، وحتي الي ماعنده إمتحانات يلس يساعد ويدعي للطلاب المجتهدين.. غاليه من صوب شدت حيلها لأبعد درجه، مذاكره ودراسه ليل نهار.. وشروق ومروى معاها طول الوقت يذاكرون مع بعض..
وفي الطرف الثاني عبدالعزيز ظهر من المستشفى وبدا يتعود على الكرسي الي بيرافقه طول عمره، ورافض تماما يكلم ميعاد أو يرجع لها.. وناصر معاه على طول بس مب قادر يقنعه إنه يرجع يداوم بالشركه..
يعني الأوضاع في جميع العوايل ماشيه بكل هدوء.. إلا فجر، الي اتفقت مع علي إنه يخطبها من أخوها ويواجهون المصير.. وعايشه على أعصابها من الي بيصير..
اليوم خلصت الإمتحانات وغاليه مسويه حشره وزوبعه وهي تراكض وتغني على كبر البيت..وأمها وعمتها يضحكون عليها.. دخل أبوها وشافها تناقز على الدري وتغني.. الناجح يرفع إيده ونغني بعيدنا وعيده<< مال أول غاليه أغانيج..
أبوغاليه: غلوووي بابا شوي شوي لاتطيحين..
غاليه ركضت تبوس أبوها: بابا باركلي ارتحت من الإمتحانات..
أبوغاليه: هههههههههه مايندرى النسبه بترفع الراس وإلا.....
غاليه: لاتكمل لاتكمل.. إن شاءالله النسبه فالتسعينات.. ولاتنسى وعدك لي..
أم غاليه: أي وعد بعد.. لايكون الجامعه..!!
أبوغاليه: هيه طبعا.. هذي الغاليه ولازم أنفذ لها أوامرها..
أم غاليه: بس يامنصور........!!!!!!
أبوغاليه: أنا قلت كلمتي ومب متراجع عنها أبداااااا.. غاليه بتدخل الجامعه الأمريكيه يعني بتدخل..
الكل سكت إلا غاليه الي رجعت تناقز شرات السبال من صاله لغرفه لميلس لحديقه.. الله يديم عليج السعاده يارب..
أبوغاليه: فاطمه.. فجر اليوم بيونا ضيوف وأبيكم تزهبون الميالس..
أم غاليه: منو الي بيونا..؟؟
أبوغاليه: والله شو أقولج اتصل فيني سلطان الخيلي تعرفينه، وقالي اليوم بنزورك عندنا موضوع ومعاي جماعه.. وبعد طلب مني يكونون إخواني موجودين..
أم غاليه: خير إن شاءالله، الحين بنجهز لكم كل شي..
راحت أم غاليه للمطبخ تجهز لعزومة الليله وفجر مب قادره تتحكم بدقات قلبها الفرحان..
غاليه: عموووه أكيد من طرف علي..!!
فجر: أكيد لأنه قالي بيخلي سلطان الخيلي واسطة خير من بينا..
غاليه بتعب: الله يلين راس أبوي ويوافق إن شاءالله..
فجر: بلاج حبيبتي يعورج شي..؟؟
غاليه: لا عموووه بس شكلي راكضت وايد اليوم، بسير حجرتي بتجهز لليله..
فجر: مب حفله بس رياييل..
غاليه: إنتي بعد لازم تتعدلين، يمكن بيون حريم..
فجر: منو الحريم ياحسره.. أمه والله يرحمها، وما أعتقد عنده خالات أو عمات لأنه عمره ماقالي عنهن.. وآمنه تعرفينها في بوظبي مع زوجها..
غاليه: ويمكن علي خبرها عن الخطبه وقررت إنها تحظر.. المهم حطي كل الإحتمالات وخلينا نستعد..
طلعوا البنات فوق ويلسن يتجهزن.. وفاطمه تجهز الأكل وهي حاسه السالفه فيها خطوبه بس إن شاءالله ماتكون لغاليه مافينا عالملام والمشاكل..
على الساعه ثمان ونص وصل سلطان الخيلي ومعاه أولاده الأربعه وريالين كبار بالسن من أهلهم..وواحد غريب مب من أهلهم..
أبوغاليه وإخوانه وعيالهم كلهم كانوا متواجدين حتى عبدالعزيز كان حاظر على كرسيه، ورحبوا بالضيوف واستقبلوهم أحسن استقبال وحطوا العشا.. وتعشوا وقاموا للفواله..
ناصر وخليفه قاموا يصبون القهوه للجماعه.. بس سلطان الخيلي نزل الفنيال على الطاوله.. والكل سوا مثله..
أبوغاليه: أفاا يابو مروان، الي تبيه على راسي من فوق بس اشرب قهوتك..
أبومروان: بس الي نبيه كبير وغالي.. وقهوتك بنشربها بعد ماتقولنا تم..
أبوغاليه: والله لو عساك تبي راس بن لادن أييبه لك، كله ولابومروان..
أبو مروان: ههههههههه تسلم ياخوي.. خل بن لادن عند لهله.. ياخوي تشوف هالريال الطيب
ويأشر على علي الي كان يالس على يمين سلطان..
أبوغاليه: هيه نعم.. بس أنا ما أعرفه..!!
أبو مروان: هذا علي الكعبي ولد المرحوم راشد سيف..
أبو غاليه: بعدني ماعرفته..!!
أبومروان: ولا بتعرفه أبدا.. هذا الولد الطيب ياني يطلب واسطتي، يبا يخطب أختك.. وهو سبق له وخطبها قبل عشرين سنه وإنت رفضته لأنكم أحسن منه بكل شي.. والحين رد وهو أكبر من قبل وطالب القرب منكم..
أبوغاليه: علي..!! علي الكعبي ماغيره.
وسكت منصور وهو منزل راسه بالأرض ومبين عليه إنه يفكر وويه معتفس، ومبين عليه الحزن أكثر.. قام بوغاليه شوي..
أبوغاليه: عن إذنكم.. دقايق وبرجع لكم..
طلع بوغاليه وراح لصالة الحريم وشاف حرمته وبنته وأخته، ويلس يطالع فجر فتره طويله وعقبها زقرها..
أبوغاليه: فجر.. إلبسي عباتج وتعالي وراي..
أم غاليه: بسم الله عليك.. وين بتودي البنيه بين الرياييل..!!
أبوغاليه: بعدين بتفهمين.. يالله فجر..
فجر قامت ولبست عياتها وراحت ورا أخوها وهي ترتجف..
أم غاليه: منصور شوفيه..؟؟ صوته متغير وفيه حزن..!!!!
غاليه: الله يستر..
أبوغاليه وأخته دخلوا على الرياييل.. وفجر الي تغشت بالشيله منزله راسها ومب قادره ترفعه من المستحى..
أبوغاليه: بو مروان.. هذي أختي فجر.. وأنا يبتها عسب الرمسه تصير جدامها وتعرف أخوها عدل..
بومروان: خير يابوغاليه شو الي تبي تقوله جدام أختك..؟؟
بوغاليه: قبل عشرين سنه أنا حطمت قلبين يبون بعض بالحلال..ومع إني أخذت حرمتي عن حب واحترام متبادل إلا إني ماقدرت الحب الي غيري عايشنه..
سكت بوغاليه شوي وهو يتذكر الماضي..
أبوغاليه: ومن يومها والله يعاقبني بكل شي اسويه، تشوفون هالبيت الكبير الي أنا ساكننه هذا عقاب مب جنه.. تشوفون شركاتي وممتلكاتي هذا كله نقمه مب نعمه..
أبوحميد: إذكر الله ياخوي، انت شو يالس تقول..!!
أبوغاليه: لا إله إلا الله.. بس الي أقوله هو الصدق.. أنا عندي المال والجاه والسمعه وكل الي يتمناه الإنسان، بس مفتقد شي واحد.. الولد.. الولد الي يحمل إسمي بعد ماتروح روحي عن الدنيا..
فجر بصوت واطي: بعد عمر طويل ياخوي..
أبو عبدالله: البركه في غاليه يابوغاليه..
أبوغاليه: غاليه.. هي الي كاسره ظهري.. كلكم تدرون بمرضها، كلكم عايشين وياي مأساتها.. الله يعوضني خير فيها.. وكلما طالعتها يلست أقول ليش الله ماخلقها صاحيه.. ليش الله ماعطاني الولد..
ناصر: استغفر الله العظيم.. عمي هذا إبتلاء من رب العالمين. والمبتلي يصبر..
أبوغاليه: والنعم بالله, بس صدقوني كلكم الي صار لبنتي أنا السبب فيه.. السبب إني ظلمت اختي في شي مالها ذنب فيه.. ظلمتها وكانت النتيجه إنها حرمت نفسها الزواج طول العمر بسببي.. وأدري إنها دعت علي في هذاك اليوم، ودعاؤها استجاب..
فجر تكلمت بصوت عالي: لا ياخوي عمري مادعيت عليك، حتى يوم صار الي صار قلت عسى الله يهدي أخوي.. بس والله مادعيت..
أبوغاليه: علي.. هذي أختي لو إنت تبيها خذها.. ولو تبيها بالعبايه الي عليها أنا راضي بس سامحوني إنتوا الإثنين عسى الله يغفر لي في يوم علي الي سويته فيكم..
علي: عمي.. فجر أنا أبيها على سنة الله ورسوله.. وحالها من حال البنات باخذها بعرس وزفه.. وأنا الحمدلله مقتدر والله كرمني من خيره وبوفر لها كل الي تبيه.. وأنا اشتريت بيت يديد وبخليها هي الي تأثثه على راحتها..
أبوغاليه: أنا مطمن عليها معاك ولو بتسكنها بغرفه وحده.. دامك انتظرتها هالسنين كلها أكيد بتحط بالك عليها..
بومروان: يعني موافق..!!
أبوغاليه: طبعا موافق.. وتفضلوا اشربوا قهوتكم..
أبومروان: بنشربها طبعا بس نبي غيرها وتكون حاره..
أبوغاليه: ههههههههه ناصر خليفه صبوا القهوه..
فجر قامت وطلعت عنهم وهي تصيح من الفرحه.. وراحت لحرمة أخوها وطاحت بحظنها..
أم غاليه:بسم الله عليج شو استوى داخل..
دخلوا عليهم عبدالله وحميد..
عبدالله: مبروك ياعمتي.. أثاريج كنتي عايشه قصة حب ونحن وماندري..
أم غاليه: فهموني شو السالفه..!!
حميد: خالتي باركي لفجراليوم انخطبت وعمي وافق..
أم غاليه: والله..!!!!!!! فديتج يافجر..
ويلست تبوسها وغاليه قامت تحظن عمتها وتبارك لها.. ودخل عليهم بوغاليه الي سحب أخته من حظنهم وحظنها.. كان اول مره بحياته يحظن اخته، ودمعت عينه في هاللحظه..
فجر: منصور.. إنت تصيح..!!
أبوغاليه: سامحيني يافجر الي حرمتج من العرس كل هالسنين..
فجر: لاتتسامح ياخوي.. أنا مسامحتنك من عشرين سنه..
دخلوا عليهم كل الرياييل والشباب يباركون لفجر الي يالسه تصيح والكل يهدي فيها..
ناصر: عموووه يقولج المعرس يبي الملجه الأسبوع الياي والعرس عقب شهرين.. شو رايج..؟؟
خليفه: أي راي الله يهداك الي تسأل عنه.. انت شوف الوناسه والخدود الحمر وبتعرف رايها..
الكل اضحكوا عليها هي ميته من المستحى..
فجر: خل عنك خلوووف.. الشور شور إخواني..
أيوحميد: خلاص عيل جهزوا نفسكم الأسبوع الياي ملجة فجر..
وفي وسط اليلسه والوناسه غاليه قامت تبا تدخل المطبخ بس ماقدرت توصل لآخر الصاله حست بدوخه وبألم بصدرها..
غاليه: بابا..
أبوغاليه: غاااااليه.. شوفيج..؟؟
ركض منصور لبنته الي كانت متسنده على الكنبه ومب قادره تتنفس.. وحاول يشيلها بس ماقدر.. فقام ناصر وشالها بإدينه الثنتين ورقدها على الكنبه..
أبوغاليه: حبيبتي شو صاير لج..
أم غاليه: منصور قوم نوديها المستشفى، اخاف فيها شي..
قام منصور وطلب الإسعاف لبنته الي طايحه ومب حاسه بالدنيا حواليها.. وبعد ربع ساعه وصلت الإسعاف ونقلوها للمستشفى والكل سار معاها..

في المستشفى الكل كان يالس يحاتي غاليه الي دخلوها غرفة الكشف وللحين محد ظهر لهم يطمنهم، أم غاليه قعدت تقرا قرآن وتدعي لبنتها بالشفا.. لكن أبوغاليه مب قادر يمسك نفسه من الخوف ومسك المستشفى من أوله لآخره وهو رايح راد من التوتر والخوف..
الكل يعرف إنه غاليه عزيزه عليه، بس من تطيح عليهم الكل يلاحظ إنه منصور يخاف ويتوتر أكثر عن فاطمه..
بعد دقايق طلع لهم الدكتور وهو ماسك بيده الإبره ويأشر بها فويه بوغاليه..
دكتور راشد: يابوغاليه قلت لك لاتخلي البنيه تبذل جهد.. شفت شو استوى فيها..!!!!
أبوغاليه: شو أسوي يادكتور.. كانت شاده حيلها بالدراسه وعقبها يلست تناقز وهي مستانسه إنها خلصت ولا ريحت نفسها..
دكتور راشد: لاحول ولاقوة إلا بالله.. يابوغاليه دير بالك على البنيه صحتها كل يوم بالنازل..
أم غاليه: بسم الله عليها، والحين شخبارها..؟؟
دكتور راشد: ههههههههه كالعاده شافت الإبره وأغمى عليها، والحين بنسويلها التحاليل اللازمه وبتظهر بعد يومين..
ناصر: بتنام هني..؟؟
دكتور راشد: لازم.. لأن صحتها مخوفتني.. وأبا أسوي تحاليل عسب أتأكد من سلامتها..
أم غاليه: خلاص دام فيها مصلحتها خلها هني يومين.. والله يعينا..
أبوغاليه: المهم تظهر بالسلامه..
نقلوا غاليه على غرفة خاصه مثل ماطلب أبوها، وبقت عندها أمها والباجين ارجعوا على بيوتهم..
على الساعه 12 ونص بالليل صحت غاليه وشافت نفسها بمكان غريب وأمها على يمينها على الكرسي راقده..
غاليه بصوت تعبان: ماما.. ماما..!!
قامت امها: هلا حبيبتي صحيتي.. شخبارج الحين..!!
غاليه: الحمدلله.. يالله قولي للدكتور أبا أظهر.. ماحب المستشفى..
أم غاليه: حبيبتي اليوم بنام هني.. ويمكن باجر نظهر..
غاليه بدلع: لا ماما مابي.. أبا أروح البيت..
أم غاليه: لافديتج باجر بنكلم الدكتور، بس الحين ارقدي إنتي للحين تعبانه، وباجر بخلي أبوج يكلمه..
وحطت غاليه راسها على المخده وتحس روحها ماراح تقدر ترقد بالمستشفى، بس من غمضت عينها راحت بسابع نومه.. ومن شافتها أمها رقدت قامت وسارت على السرير الثاني ترقد عليه..
****************
باليوم الثاني الصبح أبوغاليه وصل المستشفى وهو شايل باقة ورد جوري أحمر من الي تحبه غاليه.. ودخل عليهن الغرفه ولقاهن يالسات يتريقن..
أبوغاليه: السلام عليكم.. اشحالها الحلوه اليوم..؟؟ والله افتقدكم امس بالبيت، حسيته كبير ومايسوى بدونكم..
أم غاليه: عساه مايخلى منك إن شاءالله..
أبوغاليه: ولا يخلى منج ومن غزالي الصغير..
غاليه: بابا تعال تريق وياي..
أبوغاليه يلس على سرير بنته وهو لامنها بيده: الله شو هالريوق الحلوو.. مامر عليكم الدكتور..؟؟
أم غاليه: لا والله بعده..
غاليه: بابا الله يخليك قوله ابا أظهر اليوم.. ما أحب المستشفيات..
أبوغاليه: أممممممم بحاول بس بشرط..
غاليه: موافقه بس قوله يظهرني..
أبوغاليه: مابي أشوفج تنطين وتناقزين أبداااااا وتاكلين دواج بمواعيده.. وماشي حواطه لتالي الليل برع.. و...
غاليه: بس بابا شو بقى.. قولي إربطي نفسج بالبيت..
أبوغاليه: ههههههههههههه والله لو يصير كنت بسويها..
وفي هاللحظه دخل عليهم الدكتور راشد، وسلم على منصور الي يلس يسأله عن صحة غاليه والدكتور طمنه بس مارضى يكتب لها على خروج إلين تخلص تحاليلها كلها.. وظهر الدكتور وخلى غاليه تنافخ..
أم غاليه: كلمت خالتج مريومه بتيي بعد شوي هي وبناتها وبخليهم عندج وبسير البيت بغير ثيابي وبرد لج العصر..
غاليه: أوكي..
وعلى الساعه عشر ونص الصبح الكل كان عند غاليه من عيال عمها وخالتها.. إلا عزيز الي رفض يروح لأنه عرف إن ميعاد أكيد بتكون هناك.. وعبدالله الي كان مشغول وقالهم إنه بيمرها العصر..
غاليه: قولوا لعزيز إني زعلانه عليه..
شروق: يصير خير المهم قومي بالسلامه وعقبها تشرهي على راحتج..
مروى: الي المفروض ينزعل عليها هي عمتي الغاليه الي مافكرت تخبرنا عن خطوبتها..
فجر: ههههههههه طحت بلسانكن الله يعيني عيل..
ميعاد: مبرووك عموه والله فرحنالج..
فجر: الله يبارك بحياتج حبيبتي..
غاليه: إلا وينه ناصر ظهر عنا..؟؟
شروق: شو دراني عن ولد عمج.. الظاهر المستشفيات عايبتنه..
ميعاد: هههههههههه بدت الغيره..
شروق: إنتي محد كلمج عسب تضحكين..
الكل عرف إنه التوتر بينهم بعده موجود وماحبوا يتدخلون أو يكبرون السالفه أكثر..
أم حميد: حبيبتي غاليه متى بتظهرين؟؟
غاليه: شو دراني عمووه قاهرني هالدكتور مب راضي يظهرني، أونه بيسويلي فحوصات زياده..
أم غاليه: خلاص عيل الي بيروح يوديني وياه.. وخلوا البنات مع غاليه والعصر بنرد لها..
قاموا الشباب والحرمات وخلوا شروق ومروى وشذا وميعاد، بس خليفه مارضى يخلي ميعاد وخلاها غصب ترد وياهم البيت..
غاليه: حليلها ميعاد الحين الكل يلومها على الي صار بعزيز..
شروق: ياسلام أشوفج واقفه بصفها وأخوي الفقير اللهم تشلل بس، والحلوه ميعاد عايشه حياتها فري..
شذا: ياشروق كبري عقلج شوي.. الي صار صار وعزيز أخوي مثل ماهو أخوج، بس مب معناته إني أكره ميعاد وأسوي المشاكل بين العيلتين..
مروى: وبعدين ميعاد ندمانه.. وكل يوم تصيح..!!
شروق: دموع التماسيح..
غاليه: عاد خلاص ياشروق السالفه مر عليها فتره طويله، وخلي الكبار يحلونها بروحهم نحن مايخصنا..
ويلسوا البنات يسولفون إلين العصر، وعلى الساعه أربع ونص كانت شذا منسدحه وراقده ومروى وشروق يالسات يتذكرون المدرسه وكيف بيشتاقون لها..
غاليه: عاد أكثر شي بشتاق له........
مروى+شروق: أبله جميله.. هههههههههه
غاليه: هههههههههههه فديتها والله..
وفي هاللحظه دخل عليهم عبدالله وهو شايل باقة ورد كبيره..
عبدالله: حمدلله عالسلامه يا أحلى غاليه بالكون..
غاليه: الله يسلمك ياعبدالله، الله شو هالورد الحلو..
عبدالله يلس على الكرسي: الحين طمنيني عنج.. عساج بخير..
غاليه: لاتخاف علي غزال فديتني..
عبدالله: ههههههه الله يحفظج يارب.. عيل هالبقره راقده..
غاليه: ههههههههههههههه
شذا: بقره حرمتك.. أنا بس منسدحه..
عبدالله: ههههههههه وبعدين انا ولد عمج وداش عليكم عالأقل تغطي..
شذا: بعدني ياهل، خلني أتهنى يوم بكبر بتحجب عنك..
عبدالله: والله عيال اليوم محد يروم عليهم..
وسمعوا دق على الباب والتفتوا كلهم للي دخلت وهي شايله باقة ورد صغيره وكيس حلاوه، الكل شافها إلا عبدالله الي كان عاطنها ظهره، بس فز من مكانه يوم سمع غاليه ترحب بأبلتها وإلتفت وشاف جميله الإنسانه السيطه في كل شي، في لبسها ومكياجها وهدوؤها.. على عكس بنات عمه الي تعود عليهن كاشخات..
جميله: اشحالج غاليه اليوم إن شاءالله أحسن..
غاليه: الحمدلله أبله انا بخير..
عبدالله: حياج تفضلي..
جميله يلست على الكرسي الي كان عليه وهو طلع برع..
غاليه: عبدالله وين ساير..؟؟
عبدالله: بسير شوي وبرد لكم، بعدني ماخلصت سوالف مع البقره..
شذا: عبدالله والله بخبر أبويه عليك..
عبدالله: هههههههههههه مره خوفيتيني الحين.. يالله باي
غاليه: باي.. أبله شو هالزياره الحلوه..
جميله: شو أسوي بعد، قالولي دلوعة المدرسه تعبانه قلت خلني أزورها وأشوف دلعها..
شروق: أبله.. ماشي أخبار عن النتايج..
جميله: هههههههههه خايفات..
مروى: والله كلما دق تلفوني أفز حسبالي النتايج ظهرت..
جميله: ههههههههههه لا إن شاءالله بتنجحن وبتييبن أعلى الدرجات..
غاليه: آمين يارب.. إنزين أبله منو قالج إني مريضه..
جميله: أبله ليلى أحمد تعرف نجود ربيعتكم وهي الي قالتلها ووصلت لي الخبر..
غاليه: نجوووود..!! مالت على الرباعه يوم هي منهم..
جميله: عيب ياغاليه..
غاليه: أبله يعني هي تعرف إني مريضه وقايمه تنشر الخبر، وهي حتى ماكلفت خاطرها بإتصال تهنيني بالسلامه..
شذا: من كثر ما إطيحين بالمستشفيات إستوى الأمر عادي..
شروق: هههههههههه صح والله..
جميله: خلاص بنات إسمحولي أنا سايره.. وحمدلله على سلامتج مره ثانيه..
غاليه: أبله تو الناس ماضيفناج للحين..
جميله: مره ثانيه إن شاءالله.. يالله مع السلامه..
طلعت جميله عنهم وقبل لاتبتعد عن الغرفه شافت عبدالله ياي صوبها، ولا إراديا وقفت تتطالعه..
عبدالله: خلاص رايحه البيت..!!
جميله: هيه أهلي ينتظروني..
عبدالله وهو متردد: إنزين.. تبين أوصلج..!!
جميله: لا مشكور، سيارتي برع.. عن إذنك..
بس قبل لاتمشي ناداها عبدالله..: أبله جميله..
التفتت له وهي مبتسمه..
عبدالله: أدري تضحكين علي وتقولين شو قصده بأبله، بس البنات دايما ينادونج جي..
جميله: ههههههههههههه
ياربي محلات ضحكتها..: جميله لو.. لو تقدمت لج بتوافقين علي..؟؟
جميله من الصدمه ماتت الضحكه على شفايفها ويلست تتطالعه وهي مصدومه.. بس هو ارتبك أكثر منها..
عبدالله: أنا آسف بس والله قلتها بدون احساس، أدري المفروض أخلي حد من البنات أو عمتي أو أمي يكلمونج بس والله ما أدري شو الي صار لي وخلاني أفتح الموضوع وياج..
جميله: حصل خير بس.. بس أنا ما أصلح لك..
عبدالله: ليش يعني..؟؟ أنت شايفه فيني عيب.. وإلا مب عايبنج.. وإلا........!!
جميله: لالا بالعكس إنت تنشرى بفلوس الدنيا، بس انا ظروفي صعبه..
عبدالله: كيف يعني فهميني..!!!!!!!
جميله: عبدالله لا المكان ولا الزمان يسمح لنا بهالرمسه.. ومب حلوه حد يشوفني واقفه وياك..
عبدالله: عيل متى.. وكيف.. جميله والله أنا قلبي مادق إلا لج.. والحينه يايه تحرميني من هالشعور..
جميله: عبدالله عن إذنك مافيني على رمسة الناس..
عبدالله: خلاص برايج سيري إلا ما ألقالي طريقه وأعرف كل شي..
جميله: مع السلامه..
وأول ما ابتعدت عنه دخل على البنات بعد مادق الباب..
غاليه: وين سرت.. يالسين ننتظرك..
عبدالله: غاليه أبا أكلمج ضروري.. وبروحنا..
شروق: يعني طرده..!!
عبدالله: إنتوا للحين هني..!! يالله بــــــــرع..
وطلعوا البنات برع.. وعبدالله رد يطالع غاليه الي كانت يالسه على السرير ولابسه شيله ورديه ومبين عليها للحين التعب..
عبدالله: شكلج تعبانه..
غاليه: لاعادي.. يالله قولي شو عندك..!!!
وخبرها عبدالله عن الي صار قبل شوي..
غاليه: صح إنزين الكل يعرف إنه أبله جميله أهلها ناس وايد فقراء..
عبدالله: عيل لازم تستانس إنها بتتزوج وأهلها بيرتاحون من المصاريف شوي..
غاليه: والله ما أعرف شو سالفتها.. تبيني أكلمها لك..
عبدالله: أبيج تدقين لها الحين وجدامي وأنا الي أبا أكلمها..
غاليه: بنشوف..
ومسكت تلفونها ودقت على جميله الي ردت عليها على طول..
جميله: بهالسرعه اشتقتيلي..
غاليه: شفتي عاد الشوق شو يسوي.. أمممممممم أبله..!!!
جميله: لاتقولين عبدالله كلمج..!!
غاليه: هيه.. وهو الحين عندي ويبا يكلمج.. ممكن..؟؟
جميله: لا ياغاليه ما أعتقد ترضينها لي أكلم ريال غريب..
غاليه: بس هو مصر ويبا يفهم.. أوكي كلميني وأنا بقوله..
عبدالله: لالا.. أبا أكلمها وأسمعها وهي تتكلم..
غاليه: عبدالله لاتعقدها..
جميله: غاليه اعذريني بس ما أقدر..
عبدالله: إنزين شو رايج تحطه على السبيكر وتتكلمين..
جميله: أممممممممممممممم
غاليه: خلاص وافقي.. هاااااااه أحطه..!!
جميله: أوكي..
وحطته غاليه على السبيكر.. وعبدالله اقترب منها أكثر وهو حاط يده على السرير عسب ماتفوته ولا كلمه..
جميله: شو تبا تعرف..؟؟
عبدالله: أنا أعرف إنج وأهلج والسموحه يعني على قد حالكم، بس ليش ماتبين تتزوجين وتخففين الحمل عن أهلج..
جميله: بكلمك بكل صراحه.. أنا أبوي متوفي من خمس سنين.. ومن يومها وأنا الوحيده الي أشتغل عندي أخو متوفي وأخت متزوجه وساكنه بعيد وريلها مايخليها تزورنا وإخواني صغار واحد صف ثاني إعدادي والبنيه صف خامس إبتدائي.. وأمي حرمه كبيره، الأيام الي تمرضها أكثر عن الي تكون صاحيه فيها..
غاليه: الله يشفيها إن شاءالله..
جميله: ومالهم غير راتبي وراتب أبوي التقاعدي.. ولو قلنا البيزات مب هي المشكله وبظل اعطيهم راتبي لو تزوجت.. أنا ما أقدر أتركهم بروحهم وهم مالهم حد فالدنيا غيري..
عبدالله: إنتي أكيد بتظلين تزورينهم وتهتمين فيهم..
جميله: ولو لاقدر الله حد مرض بالليل.. أو احتاجوا شي ومحد عندهم يوديهم وإييبهن..
عبدالله ظل ساكت وغاليه الي تكلمت: يعني أبله إلين متى بتظلين على هالحال..
جميله: مايهمني.. المهم أمي وإخواني مايعانون بسبتي..
غاليه: الله يعينج..
جميله: عبدالله أشوفك سكت.. خلاص الله يوفقك وتلاقي الي تسعدك وتهنيك..
عبدالله: جميله.. ولو قلت لج أهلج بيسكنون وياج حتى عقب العرس.. شو رايج..؟؟
جميله: كيف يعني..!!!!
عبدالله: بصراحه أنا كنت ناوي أسكن مع أهلي بس من سمعت منج عن ظروفج.. شو المانع من إني أشتري بيت يديد وأخلي أهلج يعيشون معانا.. الحمدلله مب قاصرني شي وأقدر أشتري بيت..
غاليه: أحلى فكره الصراحه.. عبدالله عليك عقل عجييييييييب..
جميله: بس شو ذنبك تتحمل عايله كامله، انت بتتزوج عسب ترتاح مب تتزوج وحده وأهلها وراها.. عبدالله أنا الي مب راضيه على هذا الإقتراح..
عبدالله: خلينا نقابل اهلج ونشوف إخوانج ونقرر.. أنا أعرف الناس من أشوفهم.. ومن شفتج عرفت إنج الي بعيش وياها العمر كله..
جميله: ..................................
غاليه: أبله وافقي.. وصدقيني مابتندمين..
جميله: بخبر أمي ولو تبون حياكم الله الأسبوع الياي..
عبدالله من الوناسه نقز من مكانه وقام إيول بالغرفه.. وغاليه انفجرت من الضحك عليه..
غاليه: أبله جميله بكلمج بعدين عبدالله استخف علينا..
وسكرت غاليه وهي ميته ضحك على عبدالله الي ودرها بدون وداع وركض يخبر أهله بنيته للزواج..

طلعت غاليه من المستشفى بالسلامه بعد ماسوت كل الفحوصات اللازمه.. وأبوها ذبحها كل شوي لاتقومين لاتمشين ولاتركضين..
بس هي كالعاده مسويه طاف للكل وتسوي الي تبيه..
اليوم قررت تسير الشركه لأنها من دشت المستشفى لاشافت أحمد ولاكلمته عالمسن وعيزت أمها وهي تقولها لاتروحين أبوج بيزعل عليج بس هي أصرت عليها إلين وافقت..
راحت غاليه على الساعه عشر ونص ودخلت الشركه الي الكل إستقبلها وهناها بالسلامه وأولهم أحمد الي شافها من دخلت من الباب.. ووقفت تسولف وياه بعيد عن الكل..
أحمد: الحين بس نورت الشركه..
غاليه: وقبل شو كانت..؟؟
أحمد: الظاهر كانوا نسيانين يدفعون فاتورة الكهرباء..
غاليه: هههههههههههههههههه
أحمد: تسلملي هالضحكه.. إنزين يايب لج هديه ومخليها بمكتبي وجني حاسس إني بشوفج اليوم..
غاليه: أممممممممم وشو يايب لي..؟؟
أحمد: يعني بتاخذينها..؟؟
غاليه: أكيد وليش ما آخذها.. يالله عطني..
أحمد: بسير مكتبي بييبها..
غاليه: تعال تعال.. أنا بسير عند أبوي وبعدها بشوفك وباخذها.. أمممممممممم هي كبيره..؟؟
أحمد: احم احم لا وين كبيره.. شي على مستواي..
غاليه: فديــــــت مستواك.. خلاص باخذها بالدس عقب..
أحمد: يالله بــــاي..
راحت غاليه ويلست عند أبوها شوي وهو ماقصر فيها قعد يلومها ليش ظهرت من البيت المفروض ترتاح..
شوي ويدق تلفونها..
غاليه: هلا عموووه الحمدلله بخير.. وين..؟؟ هيه أكيد بروح أنا عند أبوي.. ومتى بتروحين..؟؟ خلاص عيل بخلي السواق يروح وإنتي مري علي.. أوكي.. يالله بــــــاي..
أبوغاليه: على وين بعد..!!
غاليه: بابا عموه فجر بتروح تييب فستان الملجه من عند المصمم، تدري ملجتها بعد يومين..
أبوغاليه: حشى لحقت تفصل فستان..
غاليه: هيه تدري يوم أنا دشيت المستشفى يومين أجلوا الحفله لأسبوع ثاني وصارت فرصه إنها تفصله، وعطت المصمم بيزات زياده وخلصه لها بسرعه..
أبوغاليه: إنزين انتي ليش تروحين، روحي البيت وهي خلها تسير بروحها..
غاليه: لا بابا أنا بسير الحين وياها وبشوفك بالبيت..
أبوغاليه: أوكي حبيبتي بس ديري بالج ولاترهقين نفسج وايد..
غاليه: إن شاءالله.. يالله باااااااي
راحت غاليه وشافت أحمد الي واقف عند باب الشركه وضحكت على حركته وشكله كان مرتبك.. والسيكيوريتي محد شكله خلاه يروح مكان..
أحمد: يالله افتحي الشنطه بسرعه.. ماشي رقابه..
غاليه: هههههههههه يالله عطني البضاعه خخخخخخخ
وعطاها أحمد علبه صغير حطتها بجنطتها وراحت عنه.. وأول ماظهرت شافت فجر تبا تنزل من السياره بس أشرت لها إنها خلاص طلعت وراحت وركبت السياره..
فجر: إنزين اصبري بسلم على أخوي..
غاليه: لالالا أنا ماصدقت أقنعه إني بروح وياج.. يالله خلينا نروح لاحقه على أخوج..
فجر: هههههههه على أمرج.. وإنتي شو بتلبسين في ملجتي..؟؟
غاليه: أمممممممم مب قايله..
فجر: يالخايسه يالله قولي عاد..
غاليه: يعني وحده توها ظاهره من المستشفى وهاي أول طلعه لها من وين بتحصل لها فستان..
فجر: يعني ماعندج فستان..؟؟ امممممممم هالمصمم عنده فساتين خبااااااال يمكن يعيبج شي..
وصلوا البنات عند المحل ودخلوا، استقبلتهم الفلبينيه ويلستهم.. وبعد شوي أخذتهم للمصمم الي طلع لفجر الفستان وتخبلت عليه غاليه..
غاليه: رووووووووعه عمووه..
فجر: ماشاءالله عليك شغلك وايد حلوو..
آدم: الحمدلله إنه عجبك..
فجر: أنا بدخل بقيسه.. أمممم أستاذ آدم ممكن نلاقي عندك فستان لبنت أختي..
آدم: أكيد من عيوني.. وهالحلوه كل شي بتلبسوا بيلبق لها.. جاهز وإلا بدك نفصلك إياه..؟؟
غاليه: لاجاهز الحفله بعد يومين.. بس مايكون أحد شايفنه ويديد..
آدم: تكرم عينك ياست الحسن.. Linda... Go with Miss Fager
ليندا: ok sir,
راحت فجر مع ليندا تقيس فستانها وغاليه راحت مع المصمم وفلبينيه ثانيه تدور لها على فساتين.. دخلت غرفه كبيره فيها أشكال وأنواع من الفساتين..
آدم: هايدي الغرفه بس لكبار الشخصيات.. يعني مو أي حدا بيدخلها..
غاليه: روعه الفساتين.. بس للحين مب عارفه أي لون بلبس..!!
آدم: حضرتك ماشاءالله عليكي كتير بيضا فلو تلبسي شي غامق بيبرز جمالك أكتر..
غاليه: أمممممممممم
آدم: شو الألوان الي تعودتي تلبسيها..
غاليه: أنا أحب الوردي موووت.. وبعدين الأحمر والأزرق..
آدم: أمممم شورايك بفستان أسود مع عنابي..
غاليه: ألوان غريبه علي.. بس أجرب شو وراي..
آدم: عندي فستان جديد لساته ماحدا شافوو.. ليندا..
ويأشر على فستان كيووووت.. أسود دانتيل والعنابي بدرجاته على الطرف اليمين.. والكتف حمالات من الدانتيل، مع ذيل خفيف من ورا وفتحه بسيطه لتحت الركبه على الريل اليمين..
الفستان كان خبااااا وغاليه عيبها وايد..
آدم: وعندي كمان فستان بنفسجي قطعتين.. تنوره وقميص..
وأشر على ليندا تييب الفستان الثاني.. الي كان بعد رهيييب، القميص كان كله كريستال ويلمع حتى بدون إضاءه قويه والكتف عاري بدون حمالات.. والتنوره قصيره من جدام ومن ورا طويل وبذيل وعلى الجنب اليمين كريستالات متناثرعلى طول الجنب الأيمن وعلى الجنب اليسار ورود بنفس لون الفستان وفي وسط كل ورده كرستاله صغيره..
آدم: طبعا الإثنين إذا بدك تلبسي معهم بوت طويل بوفرلك إياهن بلون مناسب..
غاليه: بصراحه أنا وايد محتاره.. أمممممممم خل عمتي تخلص وبجربهم جدامها وبنختار..
آدم: على راحتك.. وانا بروح لمكتبي وإنتي خدي راحتك وإطلعي فيهن على راحتك إلين تجي الآنسه فجر..
راح آدم وخلى غاليه تتطالع الفستانين وهي محتاره فقامت ولبست الأول وطلع رهيب عليها وعلى قياسها.. ودخلت عليها فجر وشافتها..
فجر: واااااايد روعه.. إخترتي هذا..؟؟
غاليه: لا اصبري بلبس الثاني وخلينا نقارن..
فجر: أوكي..
لبست غاليه الفستان البنفسجي وبعد كان روووعه عليها.. وزادت الحيره بينهم ويلسوا نص ساعه وغاليه مب قادره تختار.. وآخر شي إختارت الأسود مع العنابي..
وطلعوا من المحل بعد ما حاسبوا المصمم وأخذوا فساتينهم وراحوا على بيوتهم..
في البيت كانت فاطمه يالسه تنتظرهم.. وهي متملله من اليلسه بروحها.. دخلوا عليها كل وحده بفستانها..
أم غاليه: زين وصلتوا والله إني ملانه من اليلسه روحي..
فجر: أفا عليج يايين نسليج نحن..
غاليه: ماما اشتريت فستان رهييييييييييب لملجة عموه..
أم غاليه: والله..!! يالله سيرن إلبسن وأنا بقول منو أحلى..
غاليه: أوكي..
سارن البنات ولبسن الفساتين وطلعوا لفاطمه الي يلست تتطالعهم وهي متخبله عليهم.. فجر كان فستانها مكس ألوان بس عجييييييييب بأبه عاليه وسلاسل على الصدر والإيد والكتف عارين.. ومن تحت منفوش وشكله وااااااايد روووعه..
فاطمه: بصراحه وووايد حلوات أشكالكن تخبل الواحد، الحمدلله إني بنيه يافجر وإلا كنت خطبتج قبل علي، وإنتي ياغاليه محد يقدر ينافس هالجمال ولو بعد مليون سنه..
فجر: فديتج ياحرمة أخوي، عسى الله لايحرمني منج طول العمر..
غاليه: ولايحرمني منها بعد..
أم غاليه: بس ياغاليه تلبسين بوت طويل تحت..
غاليه: ماما ماله داعي..
أم غاليه: لافديتج أخاف عليج من العين..
غاليه: خلاص ماما.. يالله عمووه خلينا نبدل ونرتاح عسب بالليل بنوديج الصالون تسوين تنظيف بشره وبخار وبلاوي..
فجر: يالله سرينا..
مايقى غير يومين على ملجة فجر الي كانت طايره من الوناسه، وغاليه أكثر عنها تحس نفسها هي العروس..