منتديات بنوته - عرض مشاركة واحدة

06-30-2010, 02:59 AM

الجزء التاسع..

غاليه كانت تسوق بسرعه وهي مستعيله لأنها تأخرت عالمحاظره، و انتبهت للسياره الي وراها تأشر لها..
غاليه: هذا أحمد شو عنده هني..!!
خففت غاليه السرعه بس ماوقفت وأحمد بسيارته البي إم يحاول يكلمها بس مب قادر فاتصل على موبايلها..
غاليه: ألوووو أحمد.. شو هالحركات تبا توقفني في نص الطريج!!
أحمد: وانتي شو هالسرعه الجنونيه؟؟ بتخبرج بايعه نفسج..؟؟
غاليه: حبي والله متأخره عالمحاظره..
أحمد: ولو.. لاتسرعين جي مره ثانيه..
غاليه: حاااااااظر في أوامر ثانيه..
أحمد: لا..
غاليه: عيل خلاص خلني أروح.. وبشوفك بالليل.. وماله داعي هالمكالمات..
أحمد: بظل وراج إلين تدخلين الجامعه..
غاليه: كيفك..
وبندت عنه وراحت على جامعتها، وهو يوم شافها تدخل تطمن عليها ورجع على الشركه.. وراح على مكتبه يخلص شغله وهو طاير من الوناسه.. ياربي اشكثر أحبها هالبنيه.. حبوبه وطيبه وحلوه.. يالله فديت هالعيون الي ذابحتني..
وهو يشتغل عالكمبيوتر ويدخل البيانات دخلت عليه الموظفه سلمى.. وعطته الأوراق، أخذ الأوراق وبدا يراجعها وهو يتذكر كيف غاليه عصبت عليه يوم شافتها وياه هذاك اليوم..
أحمد: سلمى سيري مكتبج ويوم بخلصهن بزقرج..
سلمى: ماعندي شغل بيلس هني أنتظرك..
أحمد توهق: لا.. أبا أراجعهم على راحتي.. ممكن..!!
سلمى: عادي خذ راحتك وانا هني يالسه......
أحمد قطع كلامها وهو مضايج: أووووووف إنتي ليش ماتفهمين..
سلمى وقفت وهي معصبه: وليش تزاعج!!
أحمد: قلت لج بناديج يوم بخلص ليش تعانديني..؟؟
سلمى: طول عمري أيلس وأنتظرك لين بتخلص إشمعنى الحين..
أحمد: لاتطولينها وهي قصيره.. يالله على مكتبج..
سلمى: انت شو ماتحس!!حرام عليك.. أكرهك.
ظهرت سلمى بسرعه وهي مضايجه وخلت أحمد معصب ليش جي عصبت وشو معناتها أكرهك هاي بعد.. وشو الي أنا مب حاسس فيه..
أحمد قام وسار لمكتبها، مكتبها كان مشترك مع بنتين ثانيات..
أحمد: السلام عليكم.. اشحالكن بنات..
وفاء: مرحبا الساع أحمد حياك تفضل، تو ماتبارك المكان..
أحمد: ربي يسلمج ياوفاء.. عيل وينها سلمى..؟؟
ندى: اظهرت سارت للمدير وبترد، تبيها في شي..!!
أحمد: أمممم لا خلاص برجع بعد شوي..
ظهر أحمد وشاف في ويهه سلمى الي كان مبين عليها الصياح.. خدودها حمر وبقايا دموع في عينها.. أحمد حس بالذنب حرام البنيه حساسه وقمت أنا وزاعجت عليها..
أحمد: سلمى ممكن كلمه..!!
سلمى لفت بويها عنه: لا
ودخلت مكتبها وخلت أحمد واقف مصدوم من ردها لطلبه.. بس قبل لايتحرك شافها ظاهره من المكتب وشايله شنطتها فوقف في ويها..
أحمد: سلمى انا آسف لأني كلمتج بهالأسلوب.. والله مب قصدي أجرحج او.....
سلمى: حصل خير.. والحين عن إذنك..
أحمد: على وين بعده الدوام..!!
سلمى: إستأذنت من المدير والحين بروح البيت..
راحت سلمى وخلت أحمد يطالعها وهو مستغرب، يعني ماله داعي ردة فعلها القويه، كلهن كلمتين وإعتذر منها.. والله البنات حساسات بطريقه فظيعه..
رجع أحمد لمكتبه وطرش مسج لغاليه..
(( قلبي منتبه للمحاظره وإلا تلعب بالمسجات..))
غاليه شافت المسج وردت عليه..
(( حسبي الله عليه هالإنجليزي ذبحنا من القرقه شكلي بفره بنعالي.. وانت ليش تطرش مسجات، مب قلنا تنسى الرقم خلاص..))
أحمد شاف المسج ونقع من الضحك..
(( ههههه عمري ركزي فالمحاظره، وبالنسبه للمسجات أمممم بفكر وبرد لج خبر..))
غاليه قرت المسج وانقهرت..
(( بركز وانت سير اشتغل.. وإلا بخلي البابا يخصم من راتبك..))
طرشت غاليه المسج وهي تتخيله يقراه ويضحك ويقول قويه المنصوريه مب هينه ..-وهذا فعلا الي صار-
غاليه يلست فالمحاظره وهي منتبهه لها عدل، غاليه وايد مستانسة عالتخصص الي اختارته.. إدارة الأعمال.. هي بخاطرها تكون مثل أبوها طموحه وشاطره وناجحه وتكسب إحترام الكل لها.. أبوها هو مثلها الأعلى بالحياة وإن شاءالله تقدر ترفع راس أهلها وتحقق كل أمنياتها..
وسعيد حذالها متخبل يغازل البنات ولامنتبه للمحاظرة.. غاليه تضايجت منه.. بس هو ولا على باله يرقم ويقردن البنات.. ويوم خلصت المحاظره طلعوا برع وغاليه يلست تحطي كتبها في اللوكر وسعيد وياها..
سعيد: بتحظرين ال English
غاليه: إكيد، ليش انت مابتحظر..؟؟
سعيد: بلى بس بتأخر شوي، بسير باكل من الكافتيريا مع ربعي..
غاليه: ياربي على هالبطن الي مايشبع..
سار عنها سعيد وهو يضحك وهي يلست تتطالعه، سعيد ماخذ جمال أخوه عبدالله المشهور بوسامته ونعومة شعر عبدالعزيز الطويل وجسم عمر أخوه الي معروف بعضلاته.. يعني ماخذ من كل بستان زهره.. وطالع أحلاهم ماشاءالله عليه..
رجعت غاليه لمحاظراتها واندمجت فيها وهي مستانسه ومرتاحه في كل شي.. وعلى الساعه خمس ونص خلصت كل محاظراتها وراحت تبا تركب سيارتها بس شافت سعيد واقف ينتظرها..
غاليه: ليش للحين هني..؟؟
سعيد: ولا شي حبيت أشوفج قبل لاتروحين..
غاليه: أدري تبي دفتر المحاظرات..
سعيد: ماشاءالله عليج ذكيه..
غاليه: ياسعيد حرام عليك ركز شوي، هو مب بس نقل محاظرات..
سعيد: أوكي أوكي.. بس عطيني
غاليه: إندوك..
سعيد: شو اندوك هاي بعد.. الناس تقول تفضل.. خذ take it
غاليه: ماااااااااالت.. والحين خلني أسير باااااااي..
سعيد: هههههههه بايات..
وصلت غاليه البيت وهي تعبانه وبخاطرها ترقد.. بس أمها قالت لها فجر بتييهم عالمغرب.. وهي وايد مشتاقة لها وبخاطرها تيلس وياها لو شوي.. فبدلت ثيابها ويلست تنتظرها بالصاله..
أم غاليه: من وين ظاهره الشمس اليوم..
غاليه: ماما.. خلاص عاد..
أم غاليه: لا خليني أمتع عيوني بهالمنظر الجميل..
غاليه: ماما
أم غاليه: هههههههههههه خليني مستانسه وأخيرا جبرتي بخاطري ولبستي جلابيه بالبيت.. ربي لاتحرمني من هالسعاده..
غاليه: ما أكون بنت منصور إن ما غيرتها..
أم غاليه: تعالي تعالي.. حلفت عليج تردين..
غاليه من عالدري: صومي ثلاثة أيام.. أنا الغلطانه الي ألبس لكم شي محترم.. مستواكم بناطلين وبس..
راحت غاليه ولبست بدله ورديه وشيله ورديه ونزلت الصاله وماشافت أمها فشغلت التلفزيون ويلست تشوف أغنية راشد الماجد..
(( عانيت ياما لأجل أرضي خواطرهم.. وداريت همي وكنت أشقى وريحهم..))
ودخل عليها أبوها: غاليه فديتج قصري شوي حشره..
غاليه راحت تسلم عليه: هلا بابا..اشتقت لك..
أبوغاليه: انا بعد فديتج، متعود أتريق وياج الصبح وأتغدا وياج، بس الحين دواماتج ماتسمح لنا..
غاليه: هههههههههه عسب أعرف قدري عندك..
أبوغاليه: يعني للحين ماتعرفينه..؟؟ قوليلي شخبار سيارتج..؟؟
غاليه: تمااااااام ووايد مريحه، والكل حاسدني عليها..
يات أمها: وهذا بس الي تبينه الكل يحسدج عليها..
غاليه: أنا ماكلمج..
أبوغاليه: لا غاليه إلا أمج.. انتي صح بنوتي الحلوه بس أمج تاج الراس ليش ماتكلمينها..؟؟
غاليه: بابا تعلق علي... لبست جلابيه فيلست تتطنز..
أم غاليه: خل عنج عاد.. قلت لج خليني أستانس بهالشوفه مب كل يوم غاليه المنصوري بتلبس جلابيه وبس..
أبوغاليه: لالالا مالج حق فالي قلتيه يافاطمه، الحين هالعسل لابسه جلابيه وانتي تعلقين عليها..
أم غاليه: والله مادري آخرة دلعك فهالبنيه شو بيكون..
في هاللحظات دخلت عليهم فجر وهي كاشخه ومتعدله، وركضت عليها غاليه تحظنها وتبوسها..
فجر: ههههههههه اشتقتيلي..!!
غاليه: لا بعدني حاسه بفرح على فرقاج..
أم غاليه: ماعليج منها هالدلوعه البارحه تصيح تبا تشوفج..
فجر سلمت عليهم كلهم..
أبوغاليه: عيل وينه علي..؟؟
فجر: واقف برع مب راضي يدخل.. أونه سويلي درب..
غاليه: يتحرا عمره غريب انا بسير له..
وسارت غاليه للباب وشافته واقف يلعب بالموبايل..
غاليه: علي الكعبي هذا آخر إنذار لك.. المره اليايه طرد على طول..
علي: ههههههههههه وأنا شو سويت..
غاليه: شو يعني تقول لعموه تاخذلك درب.. انت ترفس الباب وتدخل خلاص صرت من العيله حتى عمتي ماوصلت لمكانتك..
فجر: أسمعج يالدبه أسمعج..
علي: ههههههههههه ربي يخليج ياغاليه..
غاليه: تعال حياك تفضل..
دخل علي وسلم على منصور وفاطمه ويلس وياهم يسولفون..
فجر: شخبار الجامعه غاليه منصور..
غاليه: تماااااام
فجر: وسعيد اشحاله عالدراسه..!!
غاليه: مالت عليه طايح لي مغازل وترقيم، أوين بيفلح..
أبوغاليه: مسود الويه، راقبيه وسيري خبري عمج خل يأدبه لج..
غاليه: ههههههههه بهدده باجر وبشوفه لو ما اصطلب بخبر عمي..
علي: فجر إنتي خلج هني وأنا بسير عند ربعي وبرد لج..
فجر: بس لاتتأخر وراي شغل لازم أخلصه بالبيت..
علي ابتسم لها: إن شاءالله طويلة العمر..
طلع علي ومنصور سار على حجرته هو وفاطمه.. ويلست غاليه مع عمتها يسولفون..
غاليه: عاد يالله بشرينا مافي شي فالطريج..
فجر: هههههههه لو شي بقولج.. بس ماشي..
غاليه: يالله ربي يرزقج كل خير..
فجر بحزن: إدعيلي ياغاليه الله يرزقني بعيال..
غاليه: إن شاءالله بس ليش زعلانه..
فجر: خايفه.. أنا مب صغيره والي بعمري صعب تحمل..
غاليه: منو قالج صعب.. لاصعب ولاشياته.. توكلي على رب العالمين وإن شاءالله بتييبين بدل الواحد عشرة..
فجر: يــــــارب.. والحين قومي على حجرتي سابقا عندي أغراض أبا آخذهن..
وسارت فجر تلم شوية أغراض نستها في بيت أخوها.. خذت اللاب توب وجينزات وبديات..
غاليه: إنزين إنتي شاريه يداد ليش تاخذين الجديم..
فجر: حرام عليج هاذول يداد ماكملوا السنه.. وحبيت أغير لايمل مني ريلي لو ماغيرت له..
غاليه: إنزين يخليج تلبسين بناطلين فالدوام..؟؟
فجر: لا.. مايخليني بس ألبسهم حقه فالبيت..
غاليه: اهااا
يلست فجر وغاليه يسولفون في غرفة فجر وهم يضحكون ومرتبشين إلين دق علي وقال حق فجر إنه خلاص يبي يروح البيت..
غاليه: تو الناس ماشبعت منج..
فجر: علي ينتظرني..
غاليه: قوليله برقد هني.. من تزوجتي مارقدتي عندنا..
فجر: حبيبتي وريلي وين أوديه.. الي تتزوج لازم تترك كل شي وتروح مع زوجها.. يالله باي..
راحت فجر وخلت غاليه متملله بروحها بالبيت شغلت التلفزيون وماشافت شي يسوى.. قامت وسارت غرفتها ويلست تذاكر ويوم خلصت قامت تبا ترقد بس شافت الساعه عشر ونص..
غاليه: خيييييبه تو الناس بعدها الساعه عشر.. خلني أفتح النت أحسن لي..
فتحت المسن بس مالقت حد أون لاين.. أووووف شو هالحظ وينه أحمد.. وينهن البنات.. أووووووف
بندت المسن ويلست عالسرير تتطالع السقف.. هي مسويه ديكور فوق على شكل سحب وطيور وأطفال صغار يطيرون مع الطيور..
يلست تتأمل المنظر وتتخيل نفسها طير مع الطيور تطير وتطوف عالدنيا كلها..
غاليه: ياربي إن يلست هني دقيقه زياده بستخف..
وقامت على المطبخ تتطالعه ودخلت عليها الخدامه ليندا..
ليندا: شو يريد غاليه..
غاليه: أمممممم ليندا علميني كيف أسوي كيكة..
ليندا وهي مستغربه: ليش ماما..؟؟
غاليه: شو ليش بعد أبا أتعلم..
ويلست ليندا تعلمها كيف تسوي الكيك ويلست تتفنن لها وتعلمها طرق ثانيه وحلويات..
غاليه: خلاص ليندا الحين أنا بروحي بسوي كيكه..
وسوت غاليه كيكة بالشوكلاته وزينتها بالكاكاو والفراوله.. أممممممممم لذيذه..
غاليه: ليندا خليه داخل ثلاجه ولاتخلين ماما تشوفه..
ليندا: أوكي..
غاليه راحت ترقد وهي مستانسه إنها تعلمت تطبخ الكيك عسب توديه لأحمد باجر بالشركه..

في بيت ثنائي غابوا عنا شوي.. إلتهوا بحياتهم اليديده والحب الي يكبر من بينهم.. والمشاعر الي بدت تلتهب وتخلي حياتهم كلها سعاده وحب.. عبدالله وجميله..
جميله كانت فالمطبخ تجهز الغدا لعبدالله الي وصل وراح يتسحب للمطبخ بدون لاتحس فيه.. دخل وهي كانت واقفه تجهز السلطه وعاطيته ظهرها.. وقف وراها ولمها من خصرها وباسها على خدها، هي من حست فيه نقزت وصرخت بصوت واطي..
جميله: عبدالله حرام عليك خوفتني..
عبدالله: فديت روحج خفتي..
جميله إلتفتت له وشاف خدودها حمر وضحك عليها..
عبدالله: حياتي الحين بتمر أربع شهور على زواجنا وإنتي للحين تستحين مني.. فديت هالخدود الحمر..
جميله: عبادي قوم عني أخاف حد من إخواني يدخلون علينا..
عبدالله وهو يبتعد عنها: محلات عبادي من حلجج.. اممممممم شو مسويه غدا اليوم..
جميله: الي تحبه..
عبدالله: برياني دياي..
جميله: وسلطة الروب الي تموت عليها..
عبدالله مسك إيدها: أموت عليج إنتي أكثر..
جميله: ردينا لحركاتك.. حبيبي روح بدل ثيابك وثواني وكل شي بيجهز..
عبدالله: لو مطاوعتني ومخلتني أييب لج خدامه مب أحسن لج..
جميله: مب كفايه إني تركت التدريس علشانك.. خلني أعيش براحتي في بيتي..
عبدالله: على راحتج فديتج.. أمج تغدت..!!
جميله: هيه تغدت وكلت رقدت..
عبدالله: الله يخليها لنا إن شاءالله.. خلاص غناتي بسير ببدل ومن أنزل ألقى الأكل جاهز..
جميله: من عيوني..
عبدالله وهو يناظر عيونها بحب: فديت هالعيون الحلوه..
ودخلت عليهم مرايم أخت جميله..
مرايم: جمول يوعانه..
جميله: الحين بحط لكم الغدا.. وينه علاوي..!!
مرايم: بالصاله يطالع التلفزيون.. يالله بسرعه..
عبدالله: هههههههه يوعانه الدلوعه..
مرايم: هيه وااااايد..
عبدالله: خلاص عمري بسير ببدل وإنتي حطي الغدا..
مرايم: لاتقولها هالرمسه جدامنا مب زين بعدني ياهل..
عبدالله يبا يقهر مرايم قام وحظن جميله وباسها..
جميله: هههههههه بس قوم عني عيب عليك..
مرايم: والله هالريال مايستحي..
عبدالله: هههههههههههههه
راح عبدالله يبدل وخلى جميله تجهز الغدا وهو مستانس واايد، هالجميله تستاهل كل خير.. طيبه وحبوبه والكل يحبها وعبدالله مب مقصر وياها طيب وحنون وياها لأبعد درجه.. الله لايغير عليهم..

نرجع للمزعجه غاليه الي قسمت الكيكه وعطت أمها الي استانست على الكيكه وخذت الباجي لأبوها فالشركه..
دخلت أول شي على أحمد وهي تبا تفاجأه بس ماشافته فحطت الكيكه على الطاوله وكتبت له ورقه صغيره..
(( إهداء للغلا كله...
حبك الجنوني..))

وراحت لأبوها وعطته من كيكتها ووايد عيبته..
أبوغاليه: معقوله إنتي الي مسويتها.. مب مصدق..
غاليه: بابا والله أنا سويتها البارحه بالليل ويبت لك منها شوي..
أبوغاليه: بس شوي.. وأنا تحريتها كلها لي..
غاليه: فديييييتك والله بسويلك أحلى عنها بعد شو تبي كم بابا منصور عندي.. بس واحد..
أبوغاليه: فديت روحج يالغاليه..
غاليه: خلاص بسير بعطي ناصر شوي منها..
راحت غاليه لمكتب ناصر الي كان مشغول بالأوراق والمعاملات والموظفه سلمى واقفه تنتظره يخلص..
غاليه: السلام عليكم.. فاضي وإلا أرجع بعدين..
ناصر: والله لو مشغول أفضالج..
غاليه: زين عيل لأن غاليه المنصوري بنفسها مسويه كيكه ويايه تذوقك منها..
ناصر: لالا شي صاير بالدنيا.. من وين ظاهره الشمس..!!
غاليه: أمممممم من الشرق.. هههههههههههههه
ناصر: ههههههههههههه
سلمى: اشحالج غاليه..
غاليه بدون نفس: زينه.. يالله ناصر ذوقها وعطني رايك..
ناصر: ههههههههههه سلمى مستعيله عالأوراق..
سلمى: الصراحه هيه لأن المدير طالبنهم..
غاليه: والمدير أبويه يعني عادي.. سيري مكتبج ويوم بيخلص بيناديج..
سلمى: بس....
ودخل عليهم أحمد الي كان ماكل كيكته ومخلصنها..
أحمد: مرحبا الساع.. وأنا أقول شو النور الي غطا الشركه..
غاليه: أمممممممم نور غاليه.. هههههههههههههههه
أحمد: لا وإنتي الصاجه نور الحلو الي يشع من مكتب ناصر.. نصور من وين لك هالكيكه أفااااااا وليش ماتعزمني..
غاليه: وإنت بس همك على بطنك..
أحمد: مب كل الأكل.. الكيك وبس هو الي أموت عليه..
ناصر: لا وأزيدك من الشعر بيت.. غااااليه بجلالة قدرها هي الي مسوتنها..
أحمد: صج والله.. محلاتها عيل..
ناصر: عيل خلاص مابيبقالي شي..
أحمد: يفداني..
غاليه: ههههههههههههه
ناصر: سلمى سيري على مكتبج وأول ما أخلص بزقرج..
سلمى: أوكي.. بس أحمد خبرتني ندى إنك كنت تدورني مساعه وييتني المكتب مرتين.. خير..
أحمد توهق وحس إن سلمى تصطاد فالماي العكر.. وحس من نظرات سلمى إنها حاسه بمشاعره تجاه غاليه وتبا تحرجه او تخرب من بينهم.. ومن الجهة الثانيه غاليه تطالعه وهي تنتظر إجابته..
أحمد: طبعا بدورج.. فاره الفايل عندي من أمس وفيه مليون غلط لازم يتصلحون.. ولازم اليوم يكون على مكتب المدير عسب إجتماع باجر..
ناصر: لايكون ملف شركة البترول..؟؟
أحمد: هيه عيل شو بعد..
ناصر: سلمى تطيرين على مكتب أحمد وتاخذين الملف وتخلصينه وماشي روحه للبيت قبل لاتخلصينه.. صار لج ساعه مرتزه عندي وتقولين ماوراي شي.. وإنتي عندج بلاوي..
سلمى انحرجت وحب أحمد يرد لها الحركه السخيفه الي سوتها فيه..
أحمد: هالسالفه بتنحط في ملفج لو ماصلحتي غلطتج.. وصدقيني أنا ما أتهاون مثل ناصر وأسامح..
سلمى طلعت بسرعه وهي مقهور من كلام أحمد ونظرات غاليه الي قطعتها من الطنازه..
أحمد: والحين يا دور الحب.. تعـــــــــــاالي..
غاليه: ههههههههههههه
ناصر: بس شوي شوي خل حقي..
كلوا الشباب وغاليه يالسه تطالعهم وتضحك عليهم..
غاليه: يالله بخليكم لازم ألحق على محاظراتي..
أحمد: بحفظ الله..
ناصر: خلاص برايج سيري يالمجتهده.
غاليه: باي..
ظهرت غاليه ووراها أحمد.. الي يلس يطالعها وهي تعدل شيلتها بصبعها الصغير..
غاليه: كنت أحترق وأنا أسمعها تقول إنك تسأل عنها..
أحمد: خليها تولي هاي تحب الخراب..
غاليه: شو يعني..؟؟
أحمد: ماعلينا منها غناتي المهم كيكتج وايد حلوه تسلم يدج..
غاليه: على فكره تراني حطيت لك قطعه كبيره على مكتبك، بس شكلك ييت لناصر على طول..
أحمد: لافديتج شفتها وكليتها وييت أخلص على كيكة ناصر..
غاليه: ههههههههههههه يالشيطان.. حليله ناصر أكلت عنه كل الكيكه..
أحمد: ههههههههههههههه
راحت غاليه على محاظراتها وهي مستانسه تحس نفسها كل يوم تتجدد وتطور حياتها للأحسن.. يارب تديم علي السعاده..

مانسيتهم ماجفيتهم.. لو نسوني لايمكن أنا أنساهم..
لو جفوني باقي على ذكراهم.. عل وعسى يردون..
مالي غيرهم وحبهم.. قلبي عمره ماهوى إلا هواهم..
ولاعيني ملاها سواهم.. هم أغلى مافي الكون.

اليوم ميعاد مسويه عزيمه بسيطه لبنات عمها.. من تزوجت وهي بخاطرها تجتمع وياهن بس الظروف ماسمحت، واليوم قررت تسويها وتعزم الكل..
على الساعه ثمان ونص وصلوا شذا وشروق ويلسوا مع ميعاد بالميلس..
ميعاد: عيل وينها غاليه..؟؟
شروق: هاي تخلص محاظراتها متأخر ولين ترجع البيت وتتعدل يبيلها ساعه..
شذا: ميعاد شو مسويه لنا أكل..
ميعاد: كل خير.. عيل شيماء مابتيي..!!
شروق: لا تبا تذاكر وترقد عندها إمتحان باجر..
وبعد عشر دقايق دخلت عليهم غاليه وهي بقمة شياكتها..
غاليه: السلام عليكم..
الكل: وعليكم السلام..
غاليه: سوري تأخرت عليكم.. عسى ماتعشيتوا عني..
ميعاد: لاتخافين ننتظرج..
غاليه: أشوى.. يالله عيل حطي الأكل ميته يوووع.. توني راده من الكليه وتعبانه بس قلت أكل ميعاد مايتفوت..
شروق: هههههههه الله يعينج على هالدوامات..
شذا: ميعاد وينها مروى..
ميعاد: الحين بتيي.. بس قالت بتتأخر لأن عندها بحث لازم تخلصه..
حطوا العشا وبدوا البنات ياكلون وهم يسولفون ويضحكون على سوالف بعض.. وغاليه تحكيلهم عن الدراسه وسوالف سعيد مع البنات هناك..
شروق: ههههههههههه والله هالسعيد مصيبه..
غاليه: لا والبنات متخبلات عليه بالقووو
شذا: من حقه الصراحه كل شي فيه يذبح..
ميعاد: الله يحفظه بسكن من الرمسه عن حميي فقير لايطيح وإلا يصير به شي..
غاليه: لاتخافين عليه.. قطو بسبعة أرواح..
ضحكوا البنات وكملوا أكلهم.. شوي ويسمعون صوت من برع باب الميلس..
سعيد: ميعاد.. الحلوات كلهن وياج.. متغطيات وإلا لأ..؟؟ إذا لأ خبريني عسب أطب عليهن بسرعه..
ميعاد: هههههههههه حياك تفضل..
سعيد دخل: السلام عليكن يا أحلى وألطف مخلوقات الله..
غاليه: ههههههه وعليكم السلام..
شروق: اشحالك غرشوب دبي..
سعيد: لالا.. ما اتحمل لقب يديد ينظاف لقائمة ألقابي..
شذا: هههههههه والله قاص على روحك..
سعيد: هههههههه تغارين يالصغيرونه..
شذا: صغيرونه بعينك..
سعيد: أنا كبرت ودخلت الجامعه، وإنتي للحين تناقزين بين الصفوف والأبلات.. وانا صرت أروح للكلاسات والدكاتره..
شذا: من بونك خقاق وش اليديد بالسالفه..
ميعاد: عاد هو وخليفه أخوي يكونون ثنائي العيلة الخقاااااااق..
سعيد: فديت خلوف محد يقدر الجمال غيره هو.. يالله أترخص منكن يالعسولات.. غاليه see you in college
غاليه: استخف الولد..
ميعاد: تلاقينه كان مواعد والحين راد لنا دايخ بعيونها..
شروق: والله إنه مينون..
غاليه: خلونا منه مللني بسوالفه عن الجامعه.. أممممممم ميعاد ماشي أخبار فالطريق إلينا..!!
ميعاد: أمممممم لا.. باجي لي سنه وبتخرج إن شاءالله والدراسه كلها تمام وأوكي..
غاليه: تستعبطين، شو أبا بالدراسه أقصد شي ثاني..
ميعاد: أممممممممم مثل شو..!!
شروق: ميعاد كلنا فهمنا قولي عاد..
غاليه: تبا ظرب الخايسه، هدوني عليها شويه بس..
ميعاد: لو مديتي يدج بيذحج عزيز، يخاف على ولده الغالي..
صرخت غاليه: يعني حااااااااامل.
ميعاد وهي مستحيه: هيه
قاموا البنات يحظنونها ويباركون لها وهي مستحيه وااايد..
غاليه: كم شهر..؟؟
ميعاد: شهر ونص..
شروق: يالخايسه ولاتقول لنا..
ميعاد: توني من أسبوعين بس من دريت..
غاليه: تستاهلين كل خير، وعزيز بعد بيكون أبو صالح..
ميعاد: لا أبو سعود..
غاليه: ههههههههه تنكتين بعد وياراسج..
ويلسوا البنات ضحك وسوالف وهم مرتبشين وفرحانين لميعاد وعزيز وعلى الساعه عشر ونص قرروا يردون لبيوتهم.. وغاليه طبعا الدريول الي وصلهم..
وصلوا لبيوتهم بس غاليه مسكت شروق لاتنزل، ويلست تسولف وياها..
شروق: ماتعبتي من السوالف، يالله خليني أسير داخل..
غاليه: أممممممممم شخبارج مع ناصر..
شروق: ناصر..!! لاتسأليني عنه..
غاليه: ليش عاد..!!
شروق: لأني ماعرف عنه ولاشي.. لايسأل ولو بمسج، لايزورنا ويتطمن علي.. ولاحتى سلام من بعيد..
غاليه: غريبه..!!!! ناصر وايد رومانسي ويحب يدلع..
شروق: غاليه.. ناصر مايحبني..
غاليه: ليش تقولين جي.. حرام عليج ناصر ماعنده خرابيط وبنات ويوم فكر يخطب خطبج إنتي..
شروق لفت بويها تتطالع الشارع: ما أعتقد إنه شايل بداخله أي حب تجاهي.. لأن الي يحب يسأل ويحن بس هو ولاحتى يطريني..
غاليه: أنا بكلمه وبشوفه لج..
شروق: وقوليله شروق لها مشاعر.. ممكن تهتم فيها ولو ثواني فاليوم..
نزلت شروق وخلت غاليه محتاره من ناصر والي صار له.. وقررت تروح باجر الشركه قبل دوامها فالجامعه..

غاليه ماصدقت الصبح يطلع.. قامت وتلبست ونزلت عند أمها الي يالسه تتطالع التلفزيون..
أم غاليه: شو عندج قايمه من وقت، بعدها الساعه 11 ونص..!!
غاليه: عندي دوام..
أم غاليه: دوامج الساعه ثنتين..
غاليه: أمممممممم عندي شغل قبل الدوام.. ماما أبا ريوق..
أم غاليه: سيري غرفة الأكل بتشوفين كل شي هناك..
غاليه: أمواااااااااح ياأحلى أم بالدنيا..
راحت غاليه تاكل وهي تفكر شو بتقول لناصر.. وعلى الساعه 12 ونص كانت تركب سيارتها تبا تسير للمكتب..
غاليه: ألووو هلا سعيد..
سعيد: اشحالج بنت عمي.. إنتي وين..؟؟
غاليه: انا بخير الحمدلله.. وراكبه سيارتي بسير لأبوي الشركه شوي قبل الدوام..
سعيد: اهااا.. غاليه بليييييييييز أبا منج خدمه..
غاليه: الله المستعان.. خير إن شاءالله شو صاير بعد..!!
سعيد: أمممممم ممكن سيارتج بالويك إند بليييييييييز
غاليه: نعم نعم.. منو مواعد هالمره..
سعيد: يالله فديتها هاي عاد غيييييييييير.. غاليه بليز لاتردي ولد عمج الجميل..
غاليه: خلاص برايك خذها..
وبندت عنه غاليه وسارت للشركه ودخلت على ناصر بدون لاتمر على أبوها..
ناصر: هلا وغلا بغاليه المنصوري..
غاليه: هلا فيك.. يايتنك بسالفه..
ناصر: أوكي بس اصبري علي دقايق أخلص الي بيدي.. ألووو سلمى ييبي الملف الي طلبت منج تخلصينه وخبري ندا لو ماخلصت الشغل الي طالبنه منها قبل أسبوع صدقيني بعطيها إنذار.. باي..
غاليه: ياوحش..
ناصر: والله ضايجوبي الشغل من صوب وإهمالهم من صوب.. أووووووووف تعبت والله تعبت..
غاليه: هدي أعصابك..
ناصر: أوووف ثواني وبرد لج خلج هني..
غاليه: لو مشغول بيي مره ثانيه..
ناصر: لا شوي وبرجع..
راح ناصر ويلست غاليه تتطالع موبايله وفيها فضول تفتحه وتشوفه بس خافت يشوفها وهو بروحه معصب اليوم.. وفجأة رن الموبايل وشافت عليه (( حب تالي العمر)) يتصل بك
وجاسها فضوووول تعرف منو هالحب.. بنت أو شووو مستحيل يكون ولد.. يعني أكيد بنيه..
ودخل عليها ناصر.. وشاف التلفون يرن وارتبك من شاف المتصل..
ناصر: ألووو.. هلا الغالي الحمدلله بخير.. ههههههه لا ما أتغلى عليك.. خلاص فديتك أكلمك بعد شوي وااايد مشغول.. أهااا me too باي..
غاليه: منو المتصل..!!
ناصر: ربيعي.. فهد ربيعي..
غاليه: أهااا.. ناصر شروق تسأل عنك..
ناصر: أوكي..
غاليه: شو أوكي.. انت بلاك متغير عليها.. هاي خطيبتك وإنت....
ناصر يقاطعها: غاليه لاتتدخلين من بينا.. وأنا أعرف كيف أعيش حياتي..
غاليه: إنت ماتعرف شي.. تخطب البنيه والحين مب راضي تسأل عنها، والله شروق مجروحه منك..
ناصر: خلاص بدق لها اليوم وبطيب خاطرها..
غاليه: مب مسألة اتصال ياناصر.. هاي مشاعر بين إثنين.. إنت تحبها..؟؟
ناصر نزل راسه وتم ساكت.
غاليه: خل الحب.. في فحياتك حد ثاني..؟؟
ناصر: شو تقصدين..؟؟
غاليه: ناصر انت تحب وحده ثانيه صح..!!!!
ناصر: لو على الحب تراه القلب انجرح من قبل ولاحد حس فيه..
غاليه: منو تقصد..؟؟
ناصر: ياغاليه لاتفتحين الجروح القديمه الي فيني مكفيني..
غاليه: خلاص خلك من الجروح القديمه.. منو في حياتك الحين..
ناصر قام من مكانه وعطى غاليه ظهره.. ويلس يظرب بيده على الدريشه.. غاليه خافت منه..
ناصر: مصره تعرفين السالفه..؟؟
غاليه: هيه..
ناصر: ولو كانت تجرح..!!
غاليه: قول أحسن من إنا نظلمك..
ناصر تنهد بصوت عالي.. ورجع يقعد بس لاف بويهه الجهة الثانيه..
ناصر: من كم سنه كنت أحب وحده، ويمكن للحين أحبها بس الظروف منعتني عنها..
غاليه: منو..؟؟
ناصر: ماله داعي لأنج.. لأنج ماتعرفينها.. المهم إني تخليت عنها وتركتها مع إنه المفروض أتمسك فيها أكثر.. الحب تضحيه وأنا تخليت عنها لأني أناني.. ولافكرت فيها فكرت بنفسي وبس..
غاليه: الله يعينك.. إنزين كمل..
ناصر: وقعدت فترة طويله مافكرت احب غيرها، وفي يوم كنت يالس مع جسوم ويات شروق ويلست تسولف وتنكت وعيبتني شخصيتها فقلت يمكن هي الي بتنسيني الحب القديم.. بس من خطبتها وقربت منها أكثر حسيتها.. حسيتها ياهل بعدها ماتعدت مرحلة المراهقة..
غاليه: فعلا شروق تفكيرها طفولي..
ناصر: يعني إنتي بنفس عمرها بس ماشاءالله عليج عاقل..
غاليه: حاسه بهالشي..
ناصر: فما حسيت تجاها بأي انجذاب وحسيت بندم لخطبتي لها..
غاليه: حرام ياناصر تودرها..
ناصر وهو مب مهتم لمقاطعتها له: وفي يوم تعرفت على وحده وايد تفهمني وتحس فيني.. يمكن علاقتنا بالتلفون غلط.. بس والله جذبتني لها بعقلها الكبير ورزانتها..
غاليه: ومنو هاي..!! لاتقولي بعد مابتعرفينها..
ناصر: بقولج بس إوعديني يتم سر من بينا..
غاليه: وعد..
ناصر: تذكرين النيرس نجود..
غاليه: هيه
ناصر: هي الي أحبها.. وبديت أتغير علشانها..
غاليه: وشروق..!!!!!!!
ناصر: مادري ياغاليه مادري.. محتار ومتردد.. أمشي ورا قلبي وإلا ورا أهلي ورمسة الناس.. شروق مافي بداخلي أي شي تجاهها.. بس نجود والله إني وايد أحبها وأعزها..
غاليه: وشو أقول لشروق..؟؟
ناصر: لاتقولين لها شي.. خليني انا أخطط للسالفه واتفاهم مع الكل..
غاليه: على راحتك..
طلعت عنه غاليه وهي متفاجأة من الي صار وخايفه على ناصر أكثر من شروق.. عمها إنسان صعب ولو قال لهم إنه بيفصخ الخطوبه والله لايدفنه عمي على طول.. الله يستر من الي ياي