هل تريد التسجيل في منتديات بنوته ؟
إحصائيات المنتدى: المواضيع: , المشاركات: , الأعضاء:
إحصائيات المنتدى: المواضيع: , المشاركات: , الأعضاء:
|
|  |
| التميز خلال 24 ساعة | |||
 العضو الأكثر نشاطاً هذا اليوم | الموضوع النشط هذا اليوم | المشرف المميزلهذا اليوم |
المشرفة المميزه |
قريبا | بقلم :  | قريبا | قريبا |
| |||||||
 |
| | LinkBack | أدوات الموضوع | انواع عرض الموضوع |
02-04-2011, 03:19 AM
| #41 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif 
| 
رد: حقك علي ان كنت زعلان انا :
رونق الاحساس (في مستشفى المملكــة...) ,,كان مشاري جالس على كراسي الإنتظار ومصدوم وسرحان ومشبك إيدينه ببعض.. ,,بعد مرور نص ساعة دخلت الممرضه عنده وقالت: الأخ مشاري.. مشاري: هااه... إيه إيه.. الممرضة:تفضل معاي عند الدكتورة تبيك.. مشاري:طيب.. ,,راح مشاري عند الدكتورة وهو يالله يالله قادر يمشي ويحس حيله مهدود وحاس بصداع فظيع.. مشاري:السلام عليكم الدكتورة: وعليكم السلام.. مشاري:دكتورة رهف وشفيها؟؟ الدكتورة:لا تخاف مافيها إلا كل خير بس بسألك شوية أسئلة.. الأيام هذي رهف قاعدة تمر بمشاكل؟؟ مشاري وهويبلع ريقه:هااه.. إيه يعني.. الدكتورة:آآآه.. طيب.. بصراحة يا أخ مشاري رهف تعاني من صدمة عصبية.. أثرت عليها وسببت لها هالإغماءة الشديدة.. زيادة على كذا إنه عندها فقر دم حاد ناتج عن سوء تغذية.. والأهم من هذا كله رهف حـــامل في الأسبوع السابع.. ,,,إنصدم مشاري وفتح عيونه عالآخر وقال: حـــــــامل؟؟ الدكتورة: إي نعم.. وبسبب سوء التغذية عندها.. والضغوط النفسية اللي عندها جسمها الضعيف ما إستحمل هذا كله.. الحين إحنا حطينا لها مغذي واكسجين بسبب صعوبة التنفس عندها.. ويمكن بعد ثلاث ساعات أو أربع صحتها شوي تتحسن وتسترد وعيها.. ,,, نزل مشاري راسه وتكى على ركبيتينه بيديه وحط راسه بين يدينه وهو مصدوم بشكل كبير ويقول بنفسه: لا...لالا.. مستحيل.. مستحيــــــــل.. الدكتورة: أخ مشاري في شي؟؟ يالله يالله طالع فيها مشاري وقال: لا.... ولاشي.. يعني متى تقدر ترجع البيت؟؟ الدكتورة: اليوم انشالله ماتبات إلا في بيتها إذا إنت وهي حبيتوا... لكن إذا تبيها تقعد معنا إلين بكرة تتطمن على صحتها مو مشكلة.. مشاري وهو يالله يالله قادر يقوم: خلاص أنا الحين بروح أشوفها.. ,,,طلع مشاري من عند الدكتورة وهو يسحب رجوله سحب وموقادر يفكر ولاقادر يشوف شي ... وحس إن كل الدنيا حوليه سودا.. وقف مشاري قدام الغرفة اللي رهف متنومة فيها وهويناظر للغرفة بكل قهر وخوف وضياع.. بعد مرور دقايق على وقوف مشاري... تشجع ودخل لرهف.. دخل مشاري وناظر لرهف وهوعاقد حواجبة.. ,,كانت رهف لازالت فاقدة للوعي ومتمددة عالسرير وفاتحة عيونها نص فتحة ومن تحت عيونها سواد كبير وفمها مفتوح بألم فتحة بسيطة وأبر المغذي بيدها... لاإراديآ مشاري ضرب يده بالباب ورجع طلع من الغرفة وهو معصب ودموعه بعيونه ومو شايف شي من الزعل.. يا اللـــه ... يا اللــــه أنا كنت شايل هم رهف.. الحين سرت شايل هم رهف وولدها.. ,, وطلع مشاري وركب سيارته وحرك وانطلق لبيته.. *** **** ***** (في بيت أم عبدالرحمن..) ,,تحديدآ في الصالة والكل كان مجتمع... لطيفة: يا تركي ارجع دق عليه له فوق الساعتين هو وزوجته برا.. تركي:دقيت فوق التسع مرات ما رد يمه.. فيصل:خلاص ياجدة.. إهدي.. الغايب عذره معه.. أسيل:ياربي الله يستر.. لطيفة:الله يهديك يا أسيل كان يوم داخت أول مرة جيتي وقلتيلي... موأخذتي عباتك ورحتي مشوارك.. أسيل والعبرة خانقتها: ياجدة والله هي قالت لاتنادين أحد وبسير كويسة.. لطيفة:الحين هالولد وينه.. مايقول عندي أهل بدق وطمنهم.. شوف ياتركي بعد ساعة إذا مادق علينا وطمنا..تروح وتسأل عنه بجميع المستشفيات.. ,,بعد ماقالت لطيفة هالكلمة شوي ولا عبدالرحمن ولد تركي داخل من الحوش يركض ويقول: جدة.. جدة ترى عمي مشاري وصل وقاعد يدخل سيارته الحوش.. ,,الكل وقف وعلى وقفتهم دخل مشاري.. دخل مشاري وهو منزل راسه وسرحانه.. ولما رفع راسه وانتبه للناس اللي حوالينه قال: بسم الله وشفيكم؟؟ لطيفة:مشاري وين حرمتك؟؟ مشاري:هااه.. رهف؟؟ فيصل: لا ميمونة.. إي رهف كم متزوج وحدة إنت؟؟ مشاري وهو يبلع ريقه ويحك راسه: إيه إيه بالمستشفى.. تركي:سلامتها وشفيها.. مشاري:هااه.. فقر دم وسوء تغذية.. [سكت مشاري شوي وموعارف شيقول بعدين قال] وطلعت حامل.. لطيفة:الحمدالله... الحمدالله..ياربي لك الحمد... تركي:مبرووك.. مبرووك.. أسيل وهي تمسح دموعها:الحمدالله ياربي الحمدالله.. فيصل وهو يضرب عمه مشاري على كتفه: إخس ياشديــــــد.. عبدالرحمن: فيصل استح على وجهك قدام خواتك.... مبروك يامشاري مبروك.. منى وإيمان: مبروك يامشاري.. مشاري وهو مصدع من الزحمه:الله يبارك فيكم.. لطيفة:طيب يامشاري ورى مارديت على اتصالتنا؟؟ مشاري:الظاهر نسيت الجوال فوق.. لطيفة:طيب ياولدي وش اللي جابك ومخلي حرمتك لحالها.. مشاري يوم تذكر رهف قال: هااه.. إيه رجعت آخذلها طرحة ونعال.. لأني شلتها بعبايتها بس.. وبرجع المستشفى من طريقي.. لطيفة:خلاص ياولدي إرتاح.. أسماء ادخلي غرفة عمك مشاري وجيبي طرحة لعمتك رهف وجيبيلها نعال وحطيهم بشنطة صغيرة ولا كيس.. وانتي يا أسيل قومي جيبي لعمك عصيربارد يشربه.. مشاري: لالا. مايحتاج أنا بطلع أجيب الأغراض وأغير وأغسل .. عرقان حالتي حالة.. لطيفة: ومتى بتطلع من المستشفى؟؟ مشاري:بعد ساعة ولا ساعتين الدكتورة تقول إنها طيبة ماعليها.. لطيفة:أروح معاك؟؟ مشاري:لامايحتاج أباخذها وارجع على طول.. لطيفة:خلاص أجل بنجهز لها أكل إلين تجي... ,,, وطلع مشاري لغرفته وغير ملابسه وقعد عالسرير.. ياربي ليه قلتهم إنها حامل... وليه قلت لأمي إني برجع من طريقي.. ليه كذبت أنا بكرة عندي امتحان ونفسيتي تعبانة ومن سابع المستحيلات أذاكر بعد اللي سار.. ولا لي نفس أرجع لرهف... رهف... آآآآه يارهف... لمين أخليك لحالك بالمستشفى... وياليتك لحالك شايله ببطنك ولدي.. هذا اللي ماكنت حاسب حسابه.. ,,شال مشاري الأغراض وتوجه للمستشفى... (في مستشفى المملكة..) ,,فتحت عيونها بألم وهي تحس بصداع فظيع.. تلفتت يمين ويسار وهي في قمة العطش.. ياربي أنا وين؟؟ ..حاولت ترفع يدها عشان تمسك حلقها(رقبتها) لكنها انتبهت للمغذي.. وشهقت لما شافته... الممرضة:حاسبي... حاسبي.. ,,التفتت رهف بخوف وقالت: إشفيـــه.. الممرضة:مافيش حاقه.. بس ماتحركيش ايدك كتير عشان إبرة المغزي ماتتكسرش.. سواني لحد مانده الدكتوره.. ,,كشرت رهف ولسه حاسه الدنيا تلف وتدور فيها وحلقها يعورها بشكل كبير.. الدكتوره:حمدالله عالسلامة.. رهف يالله قادرة تحكي:الله يسلمك.. أنا ليه هنا؟؟ الدكتوره:أنتي ليه هنا!!!..بعد شنسوي بالدلع الزايد.. رهف:أنا من اللي جابني هنا؟؟ الدكتوره:رهف حبيبتي اهدي وشفيك متوترة.. رهف:مو متوترة بس من اللي جابني هنا؟؟ الدكتوره:زوجك مشاري.. رهف:طب هو وينه؟؟ الدكتوره:ما أدري بس هو قبل ساعة كان عندي بالمكتب وقال إنه بيروح لك.. ,,سكتت رهف ونزلت راسها وقالت لنفسها.. الظاهر إنه سمع كلامي وطلقني.. شكله طلقني.. يا ويلي وين أروح؟؟ ,,يقطع تفكيرها صوت الدكتورة: رهف ممكن تهدين.. لأني بحكي معك شوي.. رهف ودموعها تنزل غصبن عنها:أبي موية عطشانة حلقي يعورني.. الدكتوره:رهف استني ربع ساعة وبعدين نعطيك تشربين.. الحين مايصلح وانتي في إيدك المغذي.. خلاص اتفقنى بعد ربع ساعة تشربين!!؟؟ هزت رهف راسها وهي تمسح دموعها بيدها.. الدكتوره:رهف حبيبتي إحنا سوينالك تحاليل ولقينا عندك فقر دم حاد باين إن تغذيتك سيئة.. زيادة على كذا الظاهر إنك تجهدين نفسك بسهر أو عمل وتضغطين على نفسك.. لازم يارهف ترتاحين وتهتمين بتغذيتك وبنفسيتك.. والحين انتي مو مسؤولة عن نفسك وبس... إنتي مسؤولة عن روح.. ,التفتت رهف للدكتورة وعيونها مليـــــــانة دموع وقالت: أي روح؟؟ الدكتوره: مالحظتي تغيرات سارتلك بالأسابيع الأخيرة..مبروك يارهف إنتي حامل.. ,, نزلت دموع رهف على خدودها لاإراديآ وقالت: حــــــــــــامل؟؟ [وبصوت واطي] لاااا... مستحيــــــــــــــل.. الدكتوره:انتي الحين ارتاحي ولاتجهدين نفسك إلين يخلص المحلول بعدين أكشف عليك عالسريع وتقدرين ترجعين البيت.. ,,طلعت الدكتوره وخلت رهف في حالة صدمة شديدة.. عدلت جلستها وضمت رجولها على صدرها وحطت راسها على ركبتينها وجلست تبكي وتبكي... يا الله ياالله.. مومعقول حامل؟؟ حـــامل..أنا كنت شايلة همي إذا طلقني مشاري وين أروح ؟؟ الحين أنا مو لحالي... معاي طفل.. وين أروح أنا وياه... ,,استمرت رهف تبكي وتفكر وتهوجس..... وللأسف بعد ما قامت من الإغماءة سار عندها كحة شديدة... ,,. وصل مشاري المستشفى وتوجه للغرفة عند رهف.. ,,دخل مشاري للغرفة .... مشى وجلس عالكرسي اللي بواجهة السرير وعينه مانزلت من عليها.. كانت رهف على نفس جلستهاومستمرة تبكي.. وكانت تكح بشكل مؤلم وباين من كحتها ونحنحتها إنها عطشانة.. ..وفجأة.. مشاري:.. رهـــف تبين موية؟؟ ,,تفاجأت رهف وخافت ورفعت راسها بهدوء وطالعت بمشاري.. لقته يناظرها بقسوة.. شالت راسها من على رجولها وجلست تمسح خدودها ودموعها بإيدينها.. ,,قام مشاري وطلع من الغرفة وخلص أوراق خروجها وراح جابلها موية صحة ورجع مره ثانية عندها.. ,,كانت الممرضة واقفة تحط بلسترعلى يد رهف بعد ماشالت المغذي.. ,,بعد ماراحت الممرضة مشى مشاري بكل هدوء وجلس جنب رهف وفك لها غطاء الموية وقال: خذي اشربي.. ,,صدت رهف بوجهها للجهة الثانية.. لأنها موطايقة مشاري بعد الكلام اللي سمعته.. ,,لا إراديآ مد مشاري يده ومسك رهف من خدودها ولف وجهها وحط موية الصحة عند فمها وقال: خذي اشربي... ,,بسرعة رهف نفضت يد مشاري وبعدتها عن وجهها والتفتت للجهة الثانية مع إنها كانت بتموت وتشرب.. بس مالها نفس تاخذ أي شي من يد مشاري... ,,عصب مشاري ولف فمه على جنب وهو مقهور وقال بنفسه: هين يارهف أنا تدفين يدي, لكن حسابك في السيارة.. مشاري بعصبية:يللاه البسي عباتك وامشي أنا أستناك برا.. ,,كانت رهف تطالع بمشاري بعد ماأعطاها ظهره إلين طلع من الغرفة وعينها مانزلت من عليه ... نزلت رجولها بصعوبة شديدة وهي تحس الدنيا تلف وتدور فيها... دخلت الممرضة وساعدت رهف بلبس عباتها وطرحتها.. وطلعت لمشاري برا وأول ماشافها مشى بسرعة وخلاها وراه وتوجه للسيارة.. وكلت رهف أمرها لله ومشت وراه وهي خايفة تطيح أو يرجع يغمى عليها.. ,,ركب مشاري السيارة قبلها واستنى قرابة الثلاث دقايق إلين أمداها تمشي وتركب.. ركبت السيارة رهف بهدوء وسكرت الباب من غير ماتقول ولاكلمة.. حرك مشاري السيارة وعلى طول قال: الحين أبفهم أنا شتكلم عربي ولا فرنسي.. ماقلتلك مابيك تحملين؟؟ ,,نزلت راسها رهف ورجعت التفتت لجهة اليمين من غير ماترد عليه. مشاري:رهف أنا لما أكلمك ماتسفهين.. ردي علي أحسلك.. ماقلتلك لا تحملين.. ليش حملتي.. [وبنبرة صوت عاليه] تستهبليـــــــــن؟؟ ,,كانت رهف ودها تشيل غطوتها وتصرخ بأعلى صوت وتبكي إلين ترتاح من شدة الضغط النفسي اللي معيشها مشاري فيه.. بس ماتقدر لأنه مافيها حيل أبدآ واكتفت بالبكاء فقط.. مشاري:شوفي رهف هالحركات مي علي أبدآ... سالفة إنك تعاندين وتكسرين كلمتي... وتمشين اللي براسك وتحملين عشان بس تضمنين إني ما أطلقك,وعشان تخليني أتمسك فيك.. وتحطيني قدام الأمر الواقع فأنا الحين قاعد أقولك لأ يا ماما.. والله لو إن اللي ببطنك هذا مو واحد لو أنهم عشر... عشر يارهف.. وأنا مابيك بطلقك.. وخلي تخطيطك ينفعك.. وبخليك بهالبيت رحمة وشفقة مثلك مثل أي شغالة بالبيت إلين تولدين وأوريك شغلك.. ,,بعد هالكلام رجعت رهف راسها لورى واستمرت تبكي بحرقة شديدة وألم وهي فاقدة الأمل وموحاسة بشي حوليها.. إلا الخيبة والخسارة.. ,, بعد مادخل مشاري السيارة الحوش قال: يللاه إنزلي.. وأقسم بالله يارهف.. لو تقولين كلمة وحدة لأمي لتلومين نفسك.. ,,نزل مشاري من السيارة وسكر الباب بأقوى ماعنده ودخل الصالة وتفاجأ وقال: للحين مانمتوا؟؟ الكل: وين رهف؟؟ مشاري:بسم الله .. وراي ... وراي... لاتخافون مافيها إلا العافية.. ,, دخلت رهف الصالة ومنزلة راسها ودايخة وماتشوف شي وكل مامرت جنب شي تسندت عليه.. أسماء وأسيل: عمتي رهــــــــف.. وانطلقوا أسيل وأسماء لعندها وحضنوها بفرحة وقالوا: مبروك ياعمة مبروك.. رهف وهي تمسح دموعها:الله يبارك فيكم.. منى:هات إيدك يارهف.. تعالي ريحي بغرفتك فوق تعالي... رهف بصعوبة: عمتي نامت؟؟ منى :لا بالمطبخ تسويلك عشاك.. أسيل:خلاص يمه أنا بطلعها فوق.. ..طلعت رهف لفوق بمساعدة أسيل وأسماء.. فيصل:ورى ماخليتها بالمستشفى يومين شكلها تعبانة؟؟ مشاري بعصبية: وانت وشدراك إنها تعبانة..؟؟ فيصل بحياء:هاه.. لا بس من صوتها.. وا.. واضح إنها تعبانة.. مشاري:صوتها.. ولا من أول مادخلت وأنت عيونك مانزلت من عليها.. ,,نزل فيصل راسه وهو متفشل ومستغرب من عصبية مشاري عليه.. | ||||||||
 |
|
02-04-2011, 03:20 AM
| #42 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس ,,,بغرفة رهف.. تمددت رهف على سريرها وقعدت ترجع شعرها على ورى وتلمه بشباصتها.. أسيل:رهف إشرايك تتروشين يمكن تصحصحين شوي؟؟ رهف وهي تبلع ريقها:تروشت قبل ما روح المستشفى.. ,,شوي ولا لطيفة تدخل والشغالة وراها وهي شايلة صينية الأكل.. لطيفة:السلام عليكم...مبروووك... مبرووووك.. ,,رفعت راسها رهف ببرود وجت تبي تقوم عشان تسلم على عمتها لكن لطيفة حلفت عليها ماتقوم وجلست جنب رهف وهي اللي سلمت عليها.. لطيفة وهي تاخذ الصينية من يد الشغالة وتحطها على حجر رهف: يللاه يارهف ابيك تشربين هالشوربة وتاكلين هالكفتة وتشربين عصيرك كله.. رهف بتعب شديد:معليش عمتي والله مالي نفس.. لطيفة:هـــــوو... وش اللي مالك نفس.. انتي الحين حامل وفيك فقردم ماهو زين لالك ولا لولدك.. لازم تاكلين.. رهف وهي شوي وتصيح:الله يخليك ياعمه والله مالي نفس بس أبي أنام.. ,,كل اللي موجودين بالغرفة تلفتوا على بعض وحسوا إن رهف تعبانة مرة ومو باين عليها الفرحة أبدآ.. لطيفة:شوفي يارهف ماني بمخليتك إلا بعد ماتشربين هالشوربة.. رهف:خلاص خليها بعدين.. لطيفة:بعدين متى يعني منتي شايفة كم الساعة.. لا الحين تشربينها.. ,,مدت رهف يدها ومسكت الملعقة وخذت فيها شوية شوربة ورفعتها لفمها وهي ترتجف بس للأسف من التعب والصدمة.. كبت (كتت) الشوربة على صدرها قبل مايوصل أي شي لفمها... الشوربة كانت حارة جدآ وأحرقت رهف وماقدرت تستحمل ورجعت تبكي بألم وهي تمسح نفسها بالمنديل.. لطيفة خافت وشهقت وطارت عيونها وقالت: بسم الله عليك.. لايكون احترقتي؟؟ ,,من جهة أسماء وأسيل قاموا يطالعون ببعض.. وهم خايفين ومستغربين من شكل رهف والبرود اللي هي فيه.. منى وهي تجلس جنب رهف من الجهة الثانية للسريروتاخذ الملعقة: خلاص يارهف أنا بشربك.. رهف وهي مستمرة تبكي:والله مابي.. واللـــــهي مابي.. مالي نفس.. منى:خلاص.. خلاص يارهف.. لاتبكين ..دام مالك نفس اليوم مومشكلة بنزل هالأكل تحت لكن بكرة لاتداومين.. وإذا راح مشاري دوامه.. أنا رح أجي لغرفتك وأجيبلك فطور وتاكلينه كله.. ,,ماردت رهف وجلست تمسح خدودها وعيونها بالمنديل.. منى:يللاه يابنات خلوا عمتكم ترتاح و روحوا ناموا... الصباح عندكم دوامات.. ,,طلعوا منى وبناتها وشالوا معهم صينية الأكل وتركوا لطيفة مع رهف.. لطيفة: رهف وشفيك؟؟ رهف انتبهت لنفسها إنها زودتها:مافيني شي..بس دايخة شوي لطيفة:وشلون مافيك شي.. كل هالصياح والنفسية التعبانة من الدوخة؟؟ تكلمي يارهف مشاري زعلك صار شي بينكم..؟؟ ,,امتلت عيون رهف دموع وحست نفسها ودها تصرخ وتشكي وترمي نفسها بين أيدين لطيفة عشان تحس بالأمان وتقولها كل شي عشان تفضفض وترتاح... لكن تذكرت كلمة مشاري لها قبل ماينزل من السيارة لما قال (أقسم بالله يارهف.. لو تقولين كلمة وحدة لأمي لاتلومين إلا نفسك) ..خافت وقالت: ياعمتي مشاري ماصدر منه إلا كل خير لاتخافين إحنا مرتاحين مع بعض.. بس يمكن عشان طحت ودخت متأزمة نفسيتي شوي.. لطيفة:يابنيتي هذا الحمال.. وحم وتعب ومشقة.. الوحدة لازم تستحمل.. رهف وهي تمسح وجهها بيدينها: الله يعين.. لطيفة: أجل يابنيتي أخليك ترتاحين وتنامين وبكرة لاتداومين ارتاحي.. رهف: انشالله.. ,, وطلعت لطيفة من عند رهف وعلى طول رهف قامت من عالسرير بكل تعب وجابتلها مخدة ولحاف ورمت نفسها عالكنبة ودموعها تنزل على جنبات خدودها... ياربي ليه كذا يسير فيني ليه.. ليه هالعذاب كله حتى وأنا تعبانة ومنهارة مارحمني.. أبعرف ليه يهاوش ليه .. ليه زعلان؟؟ أنا حملت من الشارع... يعني هاللي ببطني مو ضناه؟؟ بس خلاص... خلااااص .. أنا مافيني حيل تعبت..تعبـــــت.. تعبت من الخوف وانعدام الإحساس بالأمان والتشرد والغربة.. (تنهدت رهف بقوة واطلقت آآآهات بألم) غربـــــــة وسط أهلي وناسي.. كل اللي بمثل سني وأعرفهم مستقرات ومرتاحات وعايشين أحسن عيشة.. وأنا حتى أهل زي الناس ماعندي.. وصبرت وقلت هذا حظي ونصيبي... تزوجت وقلت يللاه يابنت أخيرآ بتستقرين.. لقيت نار أهلي وجحيم أبوي أرحم بكثير.. الحين أبفهم شي واحد يعني هو بيخليني عنده هنا بالبيت إلين أولد وياخذ ولده مني... لاااا.. لاااا مستحيـــل مستحيل... مستحيل أخلي ولدي يعيش نفس المعاناة اللي أنا عشتها مستحيل... (وتحط رهف ايدينها الثنتين على جبينها) ياربي فرجك ورحمتك.. يــــارب مالي سواك..يارب أنا مابي سفريات برا ولا أبي ملايين ولاعيشة الملوك أنا مابي إلا الستر والأمان والحب والأستقراروإني ما أنحرم من ولدي أوبنتي اللي بالطريق يارب بس...بس هذا اللي أبيه... ,, وحضنت رهف مخدة صغيرة بين إيدينها ومن التعب وآثار الصدمة وكثرة التفكير رجعت نامت بسرعة من غير ماتحس بأي شي... ::: في الديوانية.. الساعة 2,30 الليل.. مشاري: ياربي أنا ألعب على مين .. لي ساعة أقلب بالكتاب مو قادر أركز على كلمة وحدة.. يللاه بغيب وأرجع أختبره مرة ثانية.. للحين منصدم وأرتجف.. ومومصدق اللي صار.. ولاني قادر أنسى شكلها يوم طاحت.. بس هذي هي قامت مثل الجنية مافيها شي.. تعبت من التفكير.. صراحة ميت ودايخ من النوم.. خلني أطلع فوق أنام أصرف.. ,,, دخل مشاري غرفته ولقاها ظلمة وهدوء..فتح الأبجورة ولما شاف رهف نايمة عالكنبة قال: أحسن.. سبحان الله أخيرآ حست وسار عندها دم.. لكن هين... هيـــــــــن... غير مشاري ثيابه ورمى نفسه عالسرير بكل عصبية وراح بسابع نومة.. *** **** ***** ,,,بعد مرور قرابة الأسبوعين... (في بيت أبوصالح...) ,,الساعة 1 الليل.. ناصر:صدق ياأبرار.. أبرار وهي مستحية: إي صدق.. ناصر: أخيرآ... أخيــــــــرآ .. مومصدق.. أبرار بغنج: ههههههههههه ناصر: متى بكرة؟؟ أبرار:لآآآآ مو بكرة.... يوم الأربعاء إنشالله.. ناصر: طب ليه مو بكرة؟؟ أبرار:ناصر كلها ثلاث أيام اصبر.. ناصر:خلاص.. طب وشتبين أجيبلك معي؟؟ أبرار:ياحياتي إنت... ولا شي سلامتك.. بس أبي أشوفك سالم غانم.. ناصر: آآآه متى تمر هالثلاث الأيام واشوفك.. *** **** ***** (في بيت أم عبدالرحمن) ,,تحديدآ بغرفة رهف.. ,,الساعة 4 الفجر.. ,,دق منبه جوال مشاري ومد يده وطفاه.. وفتح عيونه وهو لسه فيه النوم وتنهد وكان ناوي يرجع يكمل نومته لكنه تذكر إنه بعد هواشه مع رهف ساريعتمد على منبه الجوال وعلى نفسه لأن رهف بطلت تصحيه ولو يطاوع نفسه ويرجع ينام بتروح عليه صلاة الفجر... تعوذ مشاري من ابليس ونزل رجوله عالأرض وشال لحافه وتوجه للحمام... لكن لقى نور الحمام مفتوح وعرف إن رهف فيه وتأفف وقال وهو راجع للسرير: إنا لله حتى بالحمام ناشبتلي... ,,لكن قطع كلامه صوت رهف بالحمام ورجع وقف عند الباب مره ثانيه عشان يشوف وشفيه.. ,,كان صوت رهف وهي تستفرغ وتتأوه.. مشاري بنفسه: إنا لله .. هذي لها أسبوع وهذي حالتها.. ,,لكن فجأة.. سمع صوت رهف وهي تقول [آآآآآآآآآه] من قلب... وبعدها جلست تبكي... مشاري بنفسه:ياربي بس اليوم بزيادة...كل هذا وحم.. ,,مشى مشاري ورجع جلس على طرف السرير وشبك إيدينه ببعض وعينه على باب الحمام.. ,,بعد دقايق فتحت رهف باب الحمام ببرود وهي ترتجف وطلعت منه وهي تجر خطوتها وتكح كحة قوية..وإيدها على بطنها وتتنفس بقوة.. ,,طارت عيون مشاري من شكل رهف كان وجهها أحمر ودموعها على خدها وعيونها حمر وتمشي ببطئ.. مشت رهف من دون ماتطالع لمشاري ولو حتى بنظرة مع إنها حاسة بوجودة.. إلين وصلت للكنبة ورمت نفسها بقوة وانسدحت وتغطت وهي لازالت ترتجف وتكح.. ,,قام مشاري وأخذ منشفته وراح للحمام وقال بنفسه: ولا كني قاعد استناها...رجعت نامت ولاعبرتني... لكن هين كل شي بحسابه.. ,,راح مشاري المسجد وصلى ورجع ينام له كم ساعة قبل مايروح للجامعة... وعلى الساعة ثمانية قام من نومته عشان محاضرته الأولى تبدا تسع.. لما دق جواله صحى واستغرب لأنه لقى رهف زي ماهي نايمة قال: وشسالفتها هذي يوم تداوم وعشرة لأ... قام مشاري من سريره وراح غسل ووقف عند دولاب الملابس.. وقعد يحوس وتم فترة واقف وقال: حتى مالي خلق أطلعلي لبس وألبس ... عودتني إنها هي اللي تطلعلي كل شي وتزهبه.. الحين أقعد ساعة عشان أطلعلي سروال وفنيلة... ::: ::: في الصالة.. ,,كانت جالسه لطيفة وقدامها صينية القهوة والحلا.. ورهف جالسة بين أسيل وأسماء.. وكانت أسيل حاطة لاب توبها بحضنها وفاتحة النت.. أسيل:واللهي ماعندك سالفة يارهف... رهف:والله موحلو وبعدين مايصلح.. أسيل وهي معصبة:ياخبلة هالفساتين من تصميم باسل صودا.. أرقى مصمم لبناني.. رهف:حمدالله.. أقولك ولا فستان يصلحلي.. أسماء:رهف صادقة يا أسيل ... الحين طالعي كرشتها وشكبرها اشلون إذا جا يوم زواجك أكيد بتكون أكبر.. وانتي تبين تلبسينها فستان ضيق مايلبسه إلا وحدة موحامل ولابطنها فاظي.. أسيل وهي تطالع بطن رهف:هااه... بطنها موكبير مره... رهف وهي تضحك: إذا جا يوم زواجك بيكبر... بعدين أنا صراحة مالي خلق أروح عند خياطات ولا مصممين ومصممات أبشتري جاهز وأفتك... رهف :دامك مصره على رايك خلاص روحي عند بوتيك الفساتين اللي بعماير السريكون اللي دايمآ أمي وعمتي إيمان يروحونه ... هالبوتيك راقي جدآ وكل اللي يشتغلون فيه سعوديات وفي فساتين للحوامل بعد ومايبيع من التصميم الواحد قطعتين أبدآ .. يعني إذا لبستي من عندهم شي تطمني مابتلقين أحد لابس زيك.. بس ترى هاه أقل فستان عندهم بـ10 ألف.. رهف:خلاص في هالويك إند أروح أنا وياك ونشوفه..إلا صح ياعمتي دينا حامل؟؟ لطيفة:إي دقوا علي قبل أمس وقالوا لي.. أسماء:ياالله كل حريم أعمامي حوامل.. مابقى إلا أمي.. صح يا أسيل يمكن عمتي إيمان ماتقدر تحضر زواجك لأنها بتكون والدة.. لطيفة:لا..لا يمديها تولد وترتاح كذا أسبوع بعد وتحضر.. أسيل:إي الحمدالله صراحة مابي أحد من عايلتي مايحضر زواجي.. ,, ,,شوي ولا مشاري يدخل و يسلم ويجلس جنب أمه.. مشاري:وشفاتحين عليه.. أسماء وهي تبتسم وتغمز لأسيل:فاتحين عالشات.. مشاري:لاااا والله.. ومن اللي قاعدة تشتشت فيكم؟؟ أسيل:حمدالله ماتشوفنا الثلاث قاعدين عليه.. مشاري وهو عارف إنهم يستهبلون: لا... طب وش النك حقكم؟؟ أسيل:طويلة وجسمي حلو وأجنن.. مشاري:لاااا... ومن فيكم اللي طويلة ومن اللي جسمها حلو ومن اللي تجنن.. مع إني ماشوف شي من هالنك أبد.. أسماء:عمي ميشو إحترم نفسك.. والله إنا نهبل... ,,ناظر مشاري لرهف عشان يشوف ردة فعلها من كل هالحكي والمزح ولقاها مبوزة وعينها باللآب توب ومطنشة العالم.. شوي ولا لطيفة جت تبي تقوم من جلستها.. مشاري وهو يمسك يدها:وين رايحة يمه؟ لطيفة:أبصبلك قهوة.. مشاري وهو يرجع يسحبها ويجلسها:والله ماتقومين... ,,,ويناظر لرهف بكل عصبية وبنبرة صوت عالية,,, رهف قومي صبي قهوة.. ,,,رفعت راسها بكل برود وناظرت للصينية.. وقامت ببرود شديد يالله يالله تتحرك وخذت الدلة وصبت قهوة وعطته وهي ماتناظر فيه.. سحب مشاري الفنجال من يدها وهو يناظرها من فوق لتحت... لكن رهف ماحست لهالنظرات أبدآ لإنها أصلآ ماطالعت فيه ورجعت جلست جنب أسيل... مشاري يحاكي عمره وهو وده يقوم ويذبحها: أول لاجيت عندهم تفز وتقوم وتصب القهوة والشاهي وتتبسم.. الحين بعد ماتمكنت وحملت حتى ماسارت تتنازل تطالع.. لكن كل شي بحسابه.. *** **** ***** يوم الأربعاء أمام كلية أبرار... ,,,الساعة 7 الصباح... أبرار وهي ماسكة الجوال:ناصر ماشوف سيارتك.. ناصر:معقول للحين ماحفظتي سيارتي.. أبرار: خلاص.. خلاص... لقيتها.. ناصر:حتى أنا شفتك اركبي يللاه.. أبرار بعد ماصكت باب السيارة: صباح الخير.. ناصر:صباح الفل.. ,, ويحرك ناصر السيارة وبعد مابعد عن مبنى الكلية شوي... مد يده ومسك يد أبرار ورفعها لفمه وباسها وقال: كيفك حياتي.. أبرار وهي متشققة: الحمدالله.. ,,بعد ناصر السيارة عن محيط الكلية ووقف عند عماره كلها مطاعم إلى الآن مافتح منها شي.. ناصر بعد ماوقف:خذي حبيبتي... قبل لاآخذك مريت كوفي وشريتلك كبتشينو عشان ما أوقف وانتي معي وأخليك لحالك.. أبرار وهي تاخذ كوب القهوة: شكرآ.. ناصر:طب ممكن أشوف القمر.. معليش طلبي صعب وعارف إن الشمس والقمر مايجتمعون.. بس ولو عارف إن طلبي بيتحقق.. أبرار استحت ونزلت راسها وبعدين شالت الطرحة من وجهها... ,,ناصر تنهد لما شافها وابتسم ... أبرار:ناصر ترى إذا جت ثمان إلا عشر ضروري ترجعني الكلية.. ناصر وهو مبتسم: ليه ياعمري؟؟ أبرار:عشان بعد هالوقت يقفلون باب الكلية واللي تدخل يسوون لها سالفة.. ناصر:خلاص ولايهمك.. أبرار وهي تمسك راسها:ناصر.. ناصر:ياعيون ناصر.. أبرار ولسانها ثقيل:ناصر راسي.. راسي.. مادري بس أحس نفسي دايخة.. ,, وتثقل يد أبرار اللي فيها القهوة ...لكن ناصر لحق مسك كوب القهوة اللي كان مليان حبوب منومة.. قبل لايطيح وخذه وفتح الشباك ورماه... التفت على أبرار لقاها فاقدة وعيها وشوي ويطيح راسها على قدام.. رجعها على ورى وسكر عليها حزام الأمان ورمى الطرحة على وجهها وحرك بالسيارة...  | ||||||||
| |
|
02-04-2011, 03:21 AM
| #43 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في جامعة الملك سعود..) ,,طلع مشاري وطارق من المحاضرة ومشاري كان طفشان ويفتح أزرار ياقة الثوب بكل ملل.. وهم ماشين ومتوجهين للكافتريا ولا يوقفهم واحد... الشخص:السلام عليكم.. طارق ومشاري:عليكم السلام.. الشخص:إنتم أصدقاء عزام.. طارق وهومستغرب:إيه.. الشخص:أنا زميله بالشعبة بس بغيت أسألكم له فترة طويلة عزام ماداوم وشفيه وأنا صراحة ماعرف رقمه ولاكان دقيت وتطمنت.. طارق:لا بس مسافر عنده ظروف.. الشخص:رجاء اللي يكلمه منكم قريب يقوله يجيب معاه أعذار طبية لأنه بمادة (اللنقوستك) أخذ حرمان من دخول الإمتحان وأتوقع كمان أخذ حرمان بمادة ثانية بس والله ماعرف بالضبط وشي هالمادة.. ياليت تقولونله.. مشاري:يعطيك العافية أخوي ماقصرت.. ,,بعد ماراح الشخص اللي كلمهم... طارق:ياخي وينه هالولد أدق عليه لي يومين مايرد؟؟ مشاري:حتى أنا مشغول بالي عليه مره... أدق عليه مايرد.. طارق:الله يستر..ياخي حتى مانعرف رقم شخص مقرب له مثل أخ أوعم ندق عليهم نسألهم.. مشاري:ياخي أنا وياك الوحيدين المقربين لعزام وتكفى لوعنده أخ أوعم نقدر ندق عليهم ونسألهم بتسير هذي حالته؟؟ *** **** ***** ,,في أحد استراحات شرق الرياض... فتحت عيونها بتثاقل شديد وهي حاسة بصداع قوي وأطرافها منملة.. لما استوعبت المكان والسرير اللي هي نايمة فيه شهقت بقوة وحاولت تقوم لكن فجأة حست بيد تمسكها بهدوء وترجع تنومها عالسرير... ناصر:ارتاحي حبيبتي ارتاحي... ,,طارت عيون أبرار وناظرت لناصر بكل خوف.. كان ناصر عليه ثوبه وجالس على طرف السرير وماعليه لا شماغ ولا شي ومبسوط عالآخر.. أبرار وهي تنفض إيده:أنا وين؟؟ ناصر:أبرار حبيبتي لاتخافين .. ارتاحي.. أبراروهي تبكي:ناصر ليه أنا هنا؟؟ ناصر وهو مبتسم: أبرار لاتخافين إنتي بأمان.. وبعدين هذي حركة تسوينها فيني؟؟ ,,كشرت أبرار وهي مستغربة ومو عارفة وشقصد ناصر بكلمة (حركة).. ناصر:خوفتيني عليك.. كنتي تسولفين وفجأة أغمى عليك.. أبرار وهي تشيل اللحاف من عليها وتحاول تقوم بخوف: خلاص.. خلاص.. أنا الحين كويسه رجعني الكلية.. ناصر وهو يقرب من أبرار ويجلس جنبها ويحط إيدينه على أعلى كتوفها وهو مبتسم: أبرار حبيبي... أي كلية الساعة 10 الحين لو تدخلين بيسير لك مشاكل.. أبرار وهي تشهق وكل عيونها دموع: عشر؟؟ ناصر:أبرار لاتخافين إقعدي معي إلين يخلص الدوام وإذا خلص بوديك لين باب الكلية واركبي سيارتك وارجعي بيتك.. أبرار وهي تبعد يدين ناصر: وين إقعد؟؟ ناصر:إقعدي معي هنا.. وبعدين ارتاحي وخذي اشربي كاسة عصير البرتقال هذي عشان تصحصحين شوي.. أبرار وهي بتموت من الخوف: لا مابي .. مابي أشرب شي.. [وتتلفت أبرار] أنا وين؟؟ ناصر: باستراحة واحد من الشباب... أبرار: استـــــــــــــراحة... [وتلفتت لحواليها.. لقت الغرفة اللي نايمة فيها موجود فيها تلفزيون عالكمدينة وفيديو وأشرطة منثرة بكل مكان وكاسات فاضية ووصخة وشواحن جوال ومخدات وشراشف مسفطة بزاوية الغرفة...] ,,شوي ولا يفتح باب الغرفة شاب ثاني أول مره أبرار تشوفه كان أسمر ومن زمان ماحلق دقنه وباين إنه وصخ وقذر.. ولما طالع بأبرار وناصر ضحك لناصر وقال: أووووف... للحين مـــا... ,,ويفز ناصر ويدف هالشاب برا وهو بعد يضحك وصكر الباب ورجع التفت لأبرار.. أبرار وهي ميته خوف وهي تقوم من السرير: خلاص.. رجعني الكلية حتى لو يكتبوني محضر وتعهد.. خلاص رجعني.. ناصر:وشفيـــك؟؟ أبرار وهي ترتجف:وش اللي وشفيني ماشفت اللي تو.. وشقال.. ناصر:وانتي اشعليك منه .. دامك معي لاتخافين.. أبرار:لامابي خلاص رجعني الكلية.. ناصر وهو معصب: مو الحين.. أبرار وهي تبكي: لااا.. الحين.. ,,وتقعد أبرار تدور بالغرفة تدور عباتها وشنطتها.. لكن فجأة فز ناصر وهو متوتر ولف إيدينه حاولينها... أبرار وهي تبكي وتصرخ: إبعد عني....... ناصر وهو ماسكها بإيد ويفك أزارير ثوبه بيده الثانية: موعلى كيفك... ,,كانت منهارة وترتجف وإيدينها الثنتين على فمها وقاعدة تحت البطانية اللي كان الغبار معشش فيها ومو مصدقة اللي صار.. ,,كان جالس على الطرف الثاني للسرير ومعطيها ظهره ويدخن.. قام بكل برود ولبس ملابسه وفتح باب الغرفة وطلع.. بس طلع سارت تسمع أبرار أصوات زي أصوات المجانين.. اللي يصرخ واللي يضحك واللي يزغرط.. ...: مبرووووووك ...: كفـــــو والله كفـــــــو.. ...: أخيرآ أخيرآ طاح اللي براسك.. ...: يللاه دام الشي اللي تستناه من زمان سار عشانا اليوم عليك.. ,, بس سمعت أبرار هالكلام لمت رجولها بألم لصدرها وحطت راسها على ركبتينها وجلست تبكي وهي تتمنى الموت بهالساعة.. قامت من السرير بألم شديد عشان تاخذ ملابسها اللي عالأرض وتلبس .. وهي قاعدة تزرر أزارير بلوزتها... تتفاجأ بأحد يمسكها مع يدها.. وتشهق أبرار وتلتفت ولا تلقاه نفس الشخص اللي دخل عليها هي وناصر.. الشخص:وين.. وين.. أبرار تنهار وتجلس عالأرض وتتكور على نفسها وتصرخ تقول: يمــــــــــــــــه... يمـــــــــــــــه... الشخص: إذا أمك تشبهلك وناسة.. ,, ناصر وهويبعده من يده : خلاص إبعد.. الشخص:ياسلام.. وشمعنى هذي اللي لحالك.. ناصر وهو متنرفز: قلتلك إطلع برا.. إطلـــــــــع.. ,,ويمسكه ناصر ويدفه لبرا ويصك الباب بالمفتاح بعده.. أبرار وهي تبكي:ليه ياناصر ليه هذا جزاي إني وثقت فيك.. ناصر:ولاااا كلمة... إقعدي هنا إلين تفتح كليتك للخروج وبروح أرميك مكان ماأخذتك.. أبرار: ناصر.. ناصر أنا شبيسير فيني.. بتخليني؟؟ ناصر: وين تبين أوديك.. أبرار: إنت اللي مسؤول عن هالشي... ولازم تصلح غلطتك.. ناصر: هاهاهااا... أي غلطة يا ماما.. إنتي ماطلعتي معي غصبن عنك إنتي جيتي معي برغبتك.. وإذا مو عاجبك اللي صار ..روحي عند أهلك وقوليلهم واشتكيني.. أبرار: ناصر بس أنا أحبك.. ناصر:ههههههه.. أنا رقم كم.. أبرار:وشو؟؟ ناصر:يعني أنا وفلان وعلان وغيري بالعشرات بس أنا مابي حب أنا عندي اللي يحبني.. أنا أبي شي واحد بس وأخذته يا أبرار.. ولاتحسبين المكالمات اللي بالساعات والهدايا وبطاقات الشحن اللي أشتريها عشان أشحن جوالك عشان سواد عيونك.. مسيكينة يا أبرار كل شي سويتيه برغبتك وأنا ماغصبتك على شي.. ,, بعد هالحكي إنهارت أبرار وجلست مكومة على نفسها إلما الساعة 12 الظهر وأخذها ناصر ورماها عند مبنى الكلية وهو يلعن ويسب ويشتم.. ؛؛؛بعد مرور أسابيع قليلة؛؛؛ """""""""""""""""""""" (في بيت أم عبدالرحمن..) ,,تحديدآ بغرفة رهف.. ,,الساعة 6,30 المغرب.. ,,جوال مشاري يدق ... مشاري يرد وهو نايم: ..آلـــو.. طارق: مشاري... نايم؟؟ مشاري: لاأرقص.. طارق:خلاص قوم توضى وصلي الحين بيأذن.. مشاري: الحين داق عشان تقومني للصلاة؟؟ طارق: لاوالله ..بس بعد الصلاة بمرك وآخذك ونروح عند عزام.. مشاري وهو يفتح عيونه:ليه وصل؟؟ طارق: إيه له أسبوع الدلخ واصل ولا علمنا .. واليوم دقيت على تليفون البيت رد علي سليم وقالي.. مشاري: أسبوع واصل ولاعلمنا وتبيني أروح معك لاماني برايح.. طارق:لا مشاري تكفى.. هالمرة عشاني نروح نشوفه دقايق ونتطمن عليه ونرجع.. مشاري:الله يزعجك انت وياه.. بس اسمع خلها بعد صلاة العشاء لأني أعرفه هالحزة نايم لا صلاة ولاعبادة.. طارق:خلاص صار.. ,,,قفل مشاري التليفون .. | ||||||||
| |
|
02-04-2011, 03:21 AM
| #44 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في بيت عزام..) الساعة 9بعد صلاة العشاء... مشاري:ياخي خلاص لنا خمس دقايق واحنا ندق الجرس ماحد فتح.. طارق:يا مشاري استنى ماتشوف أنوار الدور الثاني كلها مفتوحة.. عزام بالبيت بس مادري ليه ماحد يفتح.. ,,,ثواني ولا سليم يفتح باب الحوش وهو متضايق ووجهه متغير.. طارق وهو يدخل الحوش:سليم ساعة ندق الباب يالله فتحت.. سليم وهو ماوده طارق ومشاري دخلوا: معليش مافي يسمع جرس.. مشاري وهو يكمل طريقه لداخل البيت:بابا عزام فيه؟؟ سليم : أيوا.. ,,,دخلوا طارق ومشاري لداخل الصالة وكل واحد منهم طارت عيونه وشهق.. طارق: وأنا أقول ليش يا سليم تأخرت.. مشاري وهو يهز راسه بقرف: حسبي الله عليك ياعزام.. ,, كانت الصالة مليانة بنات اللي جالسة تطالع التلفزيون واللي واقفة واللي توها طالعة من المطبخ واللي ترقص واللي سماعات الجوال بإذنها وتكلم.. وكانت الطاولة مليانة شوكولاتات وحلويات وعلب كولا.... بجانب قوارير الخمر والكاسات... ,,مع دخول مشاري وطارق كل هالبنات تنحوا في هالثنين وقاموا يطالعونهم وهم مبتسمات.. ,,ناظر مشاري بكل قرف.. وتقزز من هالأشكال اللي يشوفها وبكل عصبية التفت على ورى وجا يبي يطلع.. طارق وهو ماسك يد مشاري: مشاري وين رايح؟؟ مشاري:طارق تمشي معي ولا اروح لحالي.. طارق: مشاري هد أعصابك واستنى شوي وخلنا نشوف عزام وينه.. مشاري: وين استنى ... أنا مستحيل أقعد هنا دقيقة وحدة.. طارق وهو ملتفت لسليم ولا زال ماسك يد مشاري: سليم وين عزام؟؟ سليم: هوا فوق في نوم.. هوا تعبان ومايبغى أحد يصحيه.. مشاري: هذا هو قالك .. فوق نايم.. أكيد دام معه كل هالبنات ليش مايطلع ينام ويغير جو.. طارق: سليم روح ناده.. سليم بخوف: بابا أنا مافي يقدر يطلع لباباعزام فوق هو عصبي وانا خوف يصرخ على أنا.. طارق بحياء: طب معاه أحد فوق؟؟ سليم: لا بابا بس هوا.. طارق: خلاص أنا بطلع أصحيه وأشوف وشفيه؟؟ مشاري: خلاص انت إطلع مع إني شايف إن عزام مايستاهل أحد يسأل عليه وأنا بقعد برا بالحوش استناك.. ,, طلع طارق للدور الثاني عشان يشوف عزام ومشاري طلع بالحوش وجلس على واحد من كراسي الحديقة.. كان مشاري متوتر ومتنرفز ويهز رجله بكل عصبية.. لكنه تفاجأ لما شاف وحدة من هالبنات اللي موجودات تطلع للحوش وبيدها كاسة عصير وتمشي لم مشاري.. ,,مشاري رفع حاجبه وناظر فيها من فوق لتحت وهو مستغرب.. البنت: هاي.. ,,مشاري ساكت ويناظر فيها بكل استحقار.. البنت: ليش قاعد برا بالحر.. ليه ماتدخل جوا؟؟ ,, مشاري على نفس حالته.. ,,قربت البنت وسحبت كرسي وجلست قريب من مشاري ومدت يدها بكاسة العصير.. البنت: تفضل.. مشاري بعصبية : لأ شكرآ البنت: ليش خذ برد على قلبك.. مشاري: انتي ماتفهمين قلتلك مابي.. ابتسمت البنت وقالت: إنت أكيد مشاري.. دايمآ عزام يحكيني عنك ويقول إنك عصبي .. بس قلبك طيب.. عاد تصدق لما شفتك انصدمت.. عزام قالي إنك متزوج بس أنا أحسك صغير عالزواج.. ,,كان مشاري ياكل شفته بكل عصبيه وقهر ومقهور إن عزام يتكلم عنه قدام هالأشكال.. ,,فجأة قربت البنت من مشاري وهي تناظر بعيونه وشوي بكل وقاحة ثنت أصابعا وحطتها تحت دقن مشاري وقالت: اللي مثلك يعيش حياته.. ويعيش شبابه مو يدفن نفسه بالحياء.. ,,لآ إراديآ رمى مشاري يد البنت وبعدها عنه وفز من عالكرسي وقال: ماسويت هالحركات وانا شاب لين أسويها الحين وأنا متزوج.. ,, مشى مشاري لداخل وهو متنرفز وينادي طارق عشان ياخذه ويطلعون برا.. لكن فجأة سمع صوت طارق يصرخ ويقول : لاااااا... لااااااا... لاااااا ياعزام لااااا ,, انهبل مشاري ورفع ثوبه بيده وركض لفوق.. أول ماطلع مشاري للدور الثاني لقى غرفة عزام مفتوحه وباب حمامه مفتوح وصوت طارق طالع من الحمام.. ركض مشاري للحمام وانفجع وشهق من المنظر اللي شافه.. كان عزام وجهه أحمر وقاعد على طرف البانيو... وماعليه إلا منشفة لافها على خصره .. وشعره مبلول ويقطر موية... والأهم والأخطر من هذا كله إنه ماسك بيده مسدس وموجهه لراسه ودموعه على خده.. مشاري:عــــــــــــــزاااام... عزام: قلت بــــــــــراااا... إطلعوا برا مابي أشوف أحد إطلعوا براااااا... طارق: عزام تعوذ من ابليس تعوذ من ابليس.. وهات المسدس.. عزام: انتم ماتفهمون... ماتفهمووون إطلعوا برا.. (ويوجه عزام المسدس لمشاري وطارق) ولا والله لأذبحكم وأذبح نفسي بعدكم.. طارق: شوف عزام إذا ذبحك لي يريحك إذبحني بس تكفى تكفى ياعزام لا تأذي نفسك.. عزام ووجهه أحمر ويبكي ويرجع يوجه المسدس لراسه: مالك شغل فيني... مالكم شغل فيني كلكم.. خلوني بحالي إطلعوا برا.. طارق وهو يبكي: عزام وشصار لهذا كله؟؟ وشفيك وشصار؟؟ عزام: يا اللــــــــــه... يا اللـــــــــه انتم ماتفهمون ... خلوني بحالي .. ماحد له شغل فيني بطلوا تمثيل .. خلاص اطلعوا برا... أنا ما أستاهل أعيش بهالحياة ما أستاهل.. أنا مالي داعي مالي داااااعي... ,,,,وبعد هالكلمة نزل عزام راسه للأرض وغمض عيونه بكل ألم وهو يبكي... ,,,,في هاللحظه استغل مشاري وضع عزام إنه مقفل عيونه وبسرعه ركض اتجاه عزام وبأقوى ماعنده رفع يده وضرب يد عزام على ورى إلين ماطار المسدس لآخر الحمام.. فتح عزام عيونه بكل عصبية بعد الضربة اللي سارت له وجى يبي يركض جهة المسدس عشان يرجع ياخذه لكن مشاري لحق عليه ولف إيدينه حولين صدر عزام وضغط عليه بأقوى ماعنده وهويحاول يثبته.. عزام بعصبية: فكني يابن××××× فكنــــــي.. مشاري: والله لو تسب أهلي كلهم مو بس أنا.. ماني بفاكك ولاني بشارهن عليك... عزام وهو يحاول يحرر نفسه:فكني يامشاري لاتندم.. ,,فهاللحظه طالع مشاري بطارق لقاه منهار عند الباب وواقف وهو مصدوم ولايدري شيسوي... مشاري وهو يتنفس بسرعه:طارق... ياخي تصرف سو أي شي واقف كنك تطالع في فيلم.. ,,استوعب طارق وحس انه بالفعل لازم يسوي شي وركض بسرعه لعند المسدس وخذه وطلع من الحمام وهو خايف كأن أحد لاحقه ومايدري وين يودي المسدس اللي بيده.. آخر شي طاحت عينه على حوض السمك اللي موجود داخل غرفة عزام.. ولا إراديآ رمى المسدس فيه... ورجع الحمام عندهم.. مشاري أول ماشاف طارق: طارق يرحم والديك تعال ساعدني على هالثور ماني بقادر عليه لحالي كسرني.. ,, مشى طارق بسرعه ومسك عزام من جهه ومشاري من جهه وشالوه مثل الطفل وهو يقاوم ويصرخ ويسب.. وحطوه على سريره.. أول ما حطوه على سريره رجع عزام راسه على ورى وحط إيدينه على عيونه ومدد جسمه عالسريروهو يبكي ويطلق صرخات تقطع القلب.. طارق ودموعه على خده:عزام قل لا اله الا الله...وش سبب هذا كله؟؟ وش صار؟؟ ,,,عزام ما يرد ومستمر يبكي وايدينه على عيونه.. مشاري وهو يفرك صدره بألم بسبب ضغطه على عزام لما حاول يحرر نفسه: انت شفيك؟؟انجنيت..انجنيت..حد يذبح نفسه ويموت كافر تبي تخسر دنياك واخرتك؟؟ عزام وهو يبكي وايدينه على عيونه:ليه ما خليتوني افتك من هالحياة ليه منعتوني؟؟ انا ولا شي...ولااااااااااشي..انا مالي داعي بالحياة..امي اللي هي امي ماتبيني..تقول انه انا مجرد فاشل.. وماعندي طموح زي ابوي.. حتى انتم اعز الناس احسكم ماشين معي رحمه وشفقه لا اكثر ولا اقل.. طارق: حرام عليك يا عزام لا تظلمنا...احنا نحبك.. ونخاف عليك أكثر من نفسك...ولو مانحبك كان ما انقذناك وخليناك تسوي فنفسك اللي تبي.. مشاري:وبعدين تعال هنا بالله تسمي امك هذي ام؟؟؟اصلا هذي ما تستاهل كلمه ام ولوفيها خير ما رمتك عند ابوك يوم تطلقت....وبعد عدتها بيومين تزوجت.. بعدين اللي يضيق صدره ويحس كل شي ضده ويحس انه مظلوم في هالدنيا يتوضى ويصلي ركعتين ويلجأ لربه.. مايسوي سواتك..مجمعلي من هالصايعات.. وحاط قوارير الخمر قدامك بالله وشلون تبي تلقى الراحه.. ياخي انتبه لنفسك.. وصلي فرضك.. وانتبه لدراستك.. الين الله ييسر لك وتلقى بنت الحلال اللي تعوضك الحرمان اللي انت عشته.. ,,,ويفز مشاري من فوق السرير وهويتنفس بصعوبه من المجهود اللي بذله مع عزام.. طارق: وين رايح؟؟ مشاري :ابلعن والدي هالبنات اللي مرتزات تحت واطردهم من البيت واكب قوارير الخمر في المغسله.. ,,,بعدماطلع مشاري من الغرفه لا اراديا قرب طارق من عزام ومال عليه واخذه وحطه بين ايدينه.. طارق وهويمسح دموع عزام بإيده:كلام مشاري صح ياعزام..اللي صار فيك ابتلاء من الله وانت كإنسان مسلم عاقل لازم تؤمن بالقضاء والقدر..وتعرف ان الله بيعوضك.. عزام طلبتك.. عزام بعد ماهدى نوعآ ما: وش تبي يا طارق؟؟؟ طارق:شوف ياعزام بكره ابمرك واخذك ونسافر على مكه ناخذ عمره ونريح فيها يومين الين تهدا نفسيتك ونرجع الجمعة..وها بنسافربالسيارة مو بالطيارة...عشان ناخذ راحتنا ونشغل بالمسجل قرآن ولانختلط بأحد أبد...والسبت بتداوم في الجامعة ورجلك فوق راسك.. ,,,عزام ساكت ويمسح دموعه بيدينه.. طارق:سمعتني يا عزام بتجي معي غصبن عنك.. ,,,شوي ولا مشاري داخل وهو معصب ووجهه احمر ويتنفس بسرعة ويلعن ويسب ويشتم.. اول ماشافه طارق ضحك بصوت عالي وعزام لا اراديا ابتسم ونزل راسه تحت.. مشاري:ايه ايه اضحكوا.. تكسر ظهري وانا اسحب في هالبنات حشى مو بنات لزقات ظهر... وجع انشالله كل ما أجي أطلع وحدة برا نشبت في خويتها ونشبوا الثنتين بالباب... لاااا وصدق شين وقوي عين.. يقولونلي وين عزام.. قليلات أدب... شوف ياعزاموه.. يااااويلك وسواد ليلك إن وصلني خبر ولاسمعت إنك رجعت لهالسوالف أنا اللي بذبحك.. طارق:لا لا..خلاص إنشالله إن عزام بيداوم عالصلاة وينتبه لنفسه ومحاضراته ويبطل هالحركات... مشاري:موبكيفه غصبن عنه... والحين يللاه ...يللاه أشوف قدامي عالحمام.. روح تروش مره ثانية..تروش زيــــــن بنية الغسل .. عشان تصلي العشاء... لأنه واضح إنك ماركعتها أبد... من شاف غرفة نومك وهالشراشف اللي مرمية حولين السرير..وكاسات هالزفت اللي عالكمدينه... عرف إنك جبت العيد مع هالبنات ولافكرت تصلي.. ,,,قام عزام من عالسرير وهو دايخ ويجر خطوته جر.. وهو حاس بالفعل إنه بحاجه إنه يصلي ويتوب لربه من هالسوايا ويبطل ظلم لنفسه.. طارق وهو يمشي ورى عزام: عزام تبيني أدخل معك الحمام.. عزام يلتفت وهو مصدع: حلوة ذي... لامايحتاج.. طارق:عزام تكفى خلني أدخل معك والله ماطالع بس بقعد بآخر الحمام وانت تروش بالبانيو.. مشاري وهو رافع كم ثوبه ويطلع المسدس من حوض السمك: أنا من يوم ماشفتك ترمي المسدس بحوض السمك وأنا غاسلن يدي منك.. خل الرجال يتروش براحته ويصلي .. وانت تعال ساعدني نغير مفرش السرير ونرتب البيت من هالحوسه.. ** ** ,, طلع عزام من الحمام وهو دايخ بعد ماتروش ... ولبس ملابسه وفرش سجادته وابتدى يصلي.. بعد ركعتين لاإراديآ انخرط عزام بموجة من البكاء وجلس يبكي..ويبكي.. بهاللحظه طالع مشاري بطارق.. وحسوا إنه من الأفضل يكملون ترتيب الغرفة بعدين ويخلون عزام براحته يصلي.. وطلعوا وصكوا باب الغرفة وراهم وراح طارق يجيب العشاء وجلس مشاري بكل شرود وقلبه يعوره على الكنب اللي في الصالة وهو ماسك بيده شرشف السرير.. مشاري: يا الله معقول.. معقول عزام فكر بالإنتحار بمجرد إن أمه هزأته وقست عليه.. يا الله قد إيش الطلاق مخيف ويخرب بيوت.. الأم ولأب يتطلقون عشان يرتاحون من بعض بزعم انه ينهون المشاكل لكن مايدرون إن المشاكل تتضاعف ومايروح فيها إلا هالعيال المساكين.. أنا أشلون فكرت في يوم من الأيام إني أطلق رهف... طب وبعدين وولدي؟؟ ضناي.. وين يروح.. إذا أنا وأنا عبدالرحمن أحسه أحن علي من نفسي عانيت من موت أبوي... أشلون ولدي اللي بأحرمه من أمه وهي عايشه.. لا لا مستحيل...ولدي لازم يعيش عيشه سويه بين أبوه وأمه لازم.. ,, ولا إراديآ يشد مشاري ايديه عالشرشف وهو مكشر.. ,,, بعد مرور زمن بسيط رجع طارق وتعشوا وسولفوا مع عزام وجلسوا ينكتون معه عشان يطلعونه شوي من الحالة اللي كان فيها.. وبعدين تطمنوا عليه ووصوا سليم عليه وكلن راح لبيته.. *** **** ***** (في بيت أبوصالح...) ,,سلطان وهو ماسك جواله.. سلطان: انشالله بإذن الله.. عبدالرحمن: كلكم لازم تجون.. أنا عارف إن بطاقات الدعوة وصلتكم بس قلت لازم ءأكد عليك بالتليفون يابوصالح.. سلطان:لا لاإرقد وآمن إنشالله تلقاني أول الحاضرين.. ,, وبعد ماأنهى سلطان المكالمة... سلطان: إي يسير خير هذا وجهي إن حظرت.. منيرة: وليه ماتحضر؟؟ الرجال عزمك وانت بتروح مثلك مثل كل اللي عزموهم ومنت أقل منهم.. سلطان: يخسون .. أنا أروح لهم وأحضر مناسباتهم بعد ماولدهم البزر ذاك طردني.. منيرة:أنت منت رايح بيتهم أنت رايح للقاعة ... وبتقعد معزز مكرم.. سلطان: عالعموم الزواج بقاله أسبوعين ولكل حادثن حديث.. ,,, بكل ألم وقهر قام صالح وهو يتأفف ويبي يطلع من الصالة اللي كان جالس فيها مع أمه وأبوه.. منيرة:صالح وين تروح.. صالح من غير مايلتفت: ولامكان.. ,,طلع صالح من البيت وركب سيارته وهو مقهور وحاس إن روحه بتطلع.. ولاهو عارف وين يروح.. ,,, ,,, بعد المكالمة هذي طلعت أثير وركضت لغرفتها فوق ودخلت الغرفة.. كانت أبرار منسدحة عالسرير ومعطيه ظهرها للباب وتناظر لفوق وهي سرحانة.. أثير: أبرار وشفيك؟؟ أبرار: هااه.. مافيني شي.. أثير: أبرار انتي لك فتره وانتي على هالحال تبين أقول لأمي توديك المستشفى.. أبرار: لا لا مافيني شي بس يمكن صداع.. أثير: ماشالله ياأبرار تو أخو مشاري الكبير اللي اسمه عبدالرحمن دق على أبوي وعزمه على زواج بنته أسيل... ماشالله واللي بتاخذه يقول أبوي إنه ولد نعمه وعز...ماشالله يابختها... شوفي أبرار بكرة لازم ننزل السوق عشان نشتري لنا فساتين.. أبرار.. أبرار وشفيك ساكته أبراااار.. أبرار:أثير تكفين ابعدي عني وخليني بحالي... تكفيييين.. أثير:أبرار انتي اشفيك.. ياتبكين يا نايمة.. ياسرحانة.. أبرار:قلتلك مافيني شي بس مصدعة وابي اقعد لحالي بهدوووء.. أثير:خلاص طيب لا تصرخين.. بس إذا حسيتي إنك تبين تحكين وتفضفضين تذكري إني إختك وأنا بنتظارك بأي وقت.. ,,,,طلعت أثير وسكرت الباب وتركت أبرار بحالة يرثى لها وهي تبكي وتصيح ولا إراديآ تضرب خدها بكفها.. وتعض أصابع الندم على لحظة غباء.. كلفتها دنيتها وشرفها وسمعتها.. *** **** ***** مرت الأيام وولدت إيمان زوجة تركي وجابت بنوته سموها لطيفة على جدتها مع إن الكل كان يتمنى أنه ولد عشان يسمونه خالد ... وكانت رهف داخله ببداية شهرها الخامس وبدا بطنها يكبر... ولازال الصمت والتجاهل مخيم بينها وبين مشاري لدرجة انه حتى لما جى رمضان وعيد الفطر مافكر مشاري إنه يقولها كل عام وانتي بخير أو حتى يطلعها مشوار .. وكانت تعتمد على سواقين العايلة بمشاويرها وتبين للكل إنها مبسوطة على عكس الواقع.. وحتى لما كانت تكبر عقلها وتبدا بالكلام معاه.. يتركها ويروح ويخليها ولا كأنها تتكلم معاه.. وبالنسبه لعزام فكان يجاهد نفسه إنه مايرجع للطريق اللي كان ماشي فيه.. وطارق ومشاري كانوا ماشين معه خطوة بخطوة.. ولاخلوه ولايوم وكانوا يحرصون عليه إنه يصلي بالمسجد ويقومونه لصلاة الفجر.. إلين تحسنت نفسيته.. وصار أحسن من أول.. ,.,., ,.,.,., ,.,.,.,., في أفخم قاعات الرياض.. أثير بعد ماجلست عالطاولة هي وأمها: يمه ... الله يهديك إشلون تمرين قدام رهف من غير ماتسلمين عليها.. مع إنك سلمتي على كل أهل زوجها إلا هي .. منيرة: أثير.. كلي تبن واسكتي.. ترى مرفوع ضغطي من أختك أبرار هالزفت اللي مارضت تجي معنا وقعدت بالبيت.. لوجت كان يمكن يشوفونها عايلة من هالشبعانين ويعجبون فيها ويخطبونها... لكنها عندت وانطقت بالبيت.. يعني أنا الحين ماني بناقصتك تقعدين تتفلسفين .. ماتتذكرين وشسوت فينا وفي أبوك؟؟ أثير: بس ولو مهما صار هذا مو وقت تأديب وانتقام.. فشلة لرهف وإحراج إنا نمر من قدامها ولانسلم .. مهما صار إحنا أهلها.. ..يمه لوشفتيها يوم سفهناها تغير وجهها وشوي وتصيح... منيرة: أثير.. طالعي قدام .. وطالعي بخلق الله وانتي ساكته.. ,,, جت الساعة 2وجى وقت زفة أسيل.. إنزفت أسيل وجلست بكوشتها الفخمة جدآ واللي تعبر عن ذوق راقي.. وكل العيون مانزلت من عليها.. كانت أسيل جميلة جميلة بمعنى الكلمة... كان فستانها من تصميم المصممة السعودية زاكي عبود ...كان مليان بالكرستالات الفخمة.. وشرعتها فخمة جدآ وفيها حركات جديدة... وكانت أسيل مسوية تسريحة تمويج بشعرها بحيث أنه مفلول على ظهرها وبف من قدام... وطقم الألماس اللي مغطي صدرها يلمع من أول ماطلعت قدام الحضور.. وغنى المطرب فيها أحلى الأغاني... وأسماء ورهف ومنى جاهدوا إنهم يمسكون أنفسهم لايبكون.. حزنآ على فرقا أسيل.. ,,بعد ماتصورت أسيل في كوشتها وجلست فيها شوي.. توجهت لغرفتها اللي بتقابل فيها معاذ .. ... ... دخل معاذ لعند أسيل وكان فرحان فيها ومبسوط وبدون أي خجل أخذها بين إيديه وحضنها وباسها على جبينها... ودمعت عيون أعمامها وأبوها وأخوها فيصل.. تصوروا كلهم مع بعض.. وبعدين طلبت المصورة من أهل أسيل يطلعون عشان تصورهم صور خاصة.. كانت أسيل جريئة وتعامل معاذ بكل راحة من غير أي خوف أو توتر وتصورت معاه أحلى الصور وهي مبسوطة وفرحانة.. بعد ماخلصوا تصوير طلع معاذ لسيارته يستنى أسيل ودخلت لطيفة وحريم عيالها كلهم وأسماء عند أسيل عشان يودعونها لأنه رحلتها على لندن عشان شهر العسل الساعة 8 الصباح ومارح يشوفونها قبل ماتسافر.. كان الكل يجاهد نفسه إنه مايبكي بس بعدين ماقدروا أكثر من كذا وكلهم جلسوا يبكون.. وبعدين ركبت أسيل مع زوجها وتوجه للفندق وهو طاير من الفرحة.. *** **** ***** | ||||||||
| |
|
02-04-2011, 03:22 AM
| #45 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في الإستراحة...) ,, كان صالح قاعد بزاوية الغرفة اللي متجمعين فيها الشباب قدام التلفزيون والكل ملاحظ وجهه إنه أحمر وزعلان ومعصب.. وسرحان ولاهو خلق أحد.. واحد من الشباب:صالح إنت تعبان؟؟ صالح وهو يالله يالله يطالع:هااه.. لا لا.. ....: طب وشفيك؟؟ صالح:مافيني شي بس يمكن نعسان شوي.. ,,, سكت صالح وتنهد وهو مهموم ومتألم وقال في نفسه: يا اللـــــه.. وشلون ما أتعب وأموت واليوم زواجها... يعني خلاص مافي أمل.. خلاص تزوجت.. لا لا مستحيل.. مستحيل أسيل تسير لغيري... مستحيل.. مستحيل أتخيل إن أسيل تنام بحضن واحد غيري... (ويحط صالح يده على صدره) يا الله أحس بنار نــــــار جوى صدري تحرقني.. أحس نفسي موقادر أتنفس.. أحس إني بموت بموووووت... أسيل تسير لغيري.. وأنا مشلول موقادر أسوي شي طب وأنا...وأنا؟؟ آآآآه .... آآآآه يالحظ... ,,وياخذ صالح جواله ومفاتيحه ويطلع من الإستراحه وهو ماسك دموعه لاتنزل قدام أحد وتفضحه هالدموع.... *** **** ***** (في بيت أم عبدالرحمن...) الساعة 4 الفجر.. في غرفة رهف... ,,,بعد مارجعت رهف من الزواج طلعت غرفتها وهي تحس بتعب خفيف.. جلست على كرسي الكمدينة وهي سرحانة وفرحانة لأسيل وبنفس الوقت شايلة هم فراقها والفراغ اللي بتخليه بالبيت.. ,,قطع تفكير رهف دخول مشاري للغرفة وهو ماسك الجوال ويكلم طارق.. مشاري: إيه.. إيه.. خلاص.. وإنت للحين مارجعت عند أمك وخواتك؟؟ .. خلاص.. اسمع وين عزام؟؟ لآاا.... أجل إقعد معه إلين يأذن وروح إنت وياه صلوا.. ههههههه... ياخي أتطمن عليكم.. منتم أصدقائي.. ههههههه أجل يللاه إذلف... انتبه لعزام.... مع السلامه... ,,, ,,,من أول مادخل مشاري للغرفة وهو حاس بوجود رهف لكن كالعادة ماأعطاها أي اهتمام ولانظرلها حتى مجرد نظره.. جلس مشاري عالسرير وفتح كمدينة السرير وجلس يدور ويحوس.. رهف: شتدور عليه؟؟ ,,مشاري كالعادة سفهها ولارد عليها.. ,,لكن هالمرة عندت رهف وحطت براسها إلا يرد عليها صحيح إنها تعبانة بس حست إنها محتاجة إنها تكلم أحد.. رهف: مشــــاري شتدور؟؟ مشاري من دون نفس:بنادول.. ,,قامت رهف وفتحت الثلاجة وخذت حبتين بنادول وموية صحة وجلست جنب مشاري وقالت: سلامتك.. هاك البنادول.. ,, أخذ مشاري البندول والموية ... أكل البنادول ولما جا يشرب الموية رفع نظره وطاحت عينه على رهف.. وغصبن عنه ماقدر ينزل نظره.. ,, كانت رهف تجنن بمعنى الكلمة كان فستانها راقي جدآ ومكياجها ملائكي مبرز ملامح الجمال فيها ومسوية شعرها بف وكيرلي وكان مفلول على ظهرها وكتوفها وباينه كثافته وروعته.. والأحلى من هذا كله بطن رهف وشلون كبران أكثر من أول وواضح إنها حامل بشكل ناعم.. ومزود نعومتها وجمالها.. ,,تنح مشاري بعيون رهف اللي دايمآ كانت تعجبه ويهيم فيها بالمكياج ومن غير المكياج حتى.. لف مشاري بنظره على ملامح رهف كلها... وابتسمت رهف وقالت: مبروك زواج أسيل.. ,,تنحنح مشاري ولف وجهه بسرعه للجهه الثانية وقال وهوحاط موية الصحة عند فمه: الله يبارك فيك.. مشاري بنفسه: يا الله وشفيني أنا دلخ وخبل.. بس جت جنبي وشفتها وهفت علي ريحة عطرها.. رحت فيها.. ,,رفع مشاري حاجبه وكالعادة مايخلي اللعانة وتخريب اللحظات الحلوة.. مشاري بنفسية شينة: تدرين يا إخت رهف إن أبوك المحترم مر من جنبي ولاسلم علي.. رهف وهي تضحك: عادي حتى أنا أمي وخواتي مروا من جنبي ولا سلموا.. ,,استغرب مشاري من ردة فعل رهف إنها جلست تضحك ولازعلت وتفشلت كالعادة.. مشاري بعصبية: بس أنا غير أنا رجال.. موحلوة أبدآ إن أبوك يسلم على كل أخواني ويعديني ولايسلم علي كني بزر عنده.. رهف: أنا ماعلي منه (وتحط رهف رجل على رجل وترجع جسمها على ورى وتكي بيدينها الثنتين على ورى) أظنك سمعته بإذنك إنه تبرا مني.. ,,جلس مشاري ياكل شفته اللي تحت بقهر.. لكنه لاحظ شي غريب ورجع التفت لرهف.. مشاري:لحظه لحظه.. الحين هالفستان اللي عليك متى شريتيه.. رهف وهي لازالت مبتسمه: قبل أسبوعين.. رحت أنا وأسيل وأسماء لبوتيك وصفوه لي وعجبني وشريته.. مشاري: بكم شريتيه؟؟ رهف: أمممم... بــ12 ألف... مشاري: لاااا... ومن وين جبتي الفلوس؟؟ رهف: إشلون من وين جبتي الفلوس... سحبت فلوس ودفعت.. مشاري:إحلفي يا شيخة... ألحين أنا ماقلتلك أي شي تبينه قوليلي وأنا أعطيك.. (وبنبرة صوت عالية) ولا أخذتي بطاقتك وسرتي تصرفين على كيفك وحسبتي نفسك استقليتي.. رهف ببرود: يعني هذا اللي هامك إنك تدفع الفلوس وبس.. ,,مسك نفسه مشاري إنه مايعصب وبالذات لما سمع أذان الفجر...وقام من عالسرير وهو وده يذبح رهف.. لكنه قبل لايطلع من الغرفة رجع عند رهف ودنق عليها وقرب من وجهها بشكل كبير وقال وهو يتكلم بطريق غريبة: تصدقين يا رهف إنك محظوظة.. رهف ببرود وهي مبتسمه: أكيد محظوظة دامني زوجتك.. مشاري وهو يضحك باستهزاء: لاهين هالشي الكل عارف إنك محظوظة فيه.. لكن أنا أقصد إنك محظوظة إنك لبستي هالفستان وطلعتي للزواج من غير ما أشوفك.. ولا لو شفتك يارهف قســـــــمآ بالله ماتلبسينه.. وأخليك تحضرين الزواج بأي شي عشان ثاني مرة تحرمين تشترين وتشيلين وتحطين على كيفك.. ,, وعطى مشاري ظهره لرهف وتوجه للباب عشان يطلع لكنه تفاجأ بإن رهف مسكت يده ووقفت قدامه ولزقت فيه وحطت يدها ورى رقبته وقالت: طب اشرايك فيه مو حلو..وبشكل عام إشرايك فيني موحلوة؟؟؟ مشاري وهو يبعد يد رهف ويبلع ريقه وهومبتسم: إي مره كنك عبدالناصر الدرويش يوم قلد حليمة بولند.. ,,, تفاجأت رهف وغصبن عنها جلست تضحك بصوت عالي وتصفق يد بيد على هالصدمة.. وطلع مشاري من الغرفة وهو ماسك نفسه لكنه لما سكر الباب جلس يضحك ويضحك الين وصل لسيارته وبعدها راح يصلي... ولما رجع من الصلاة كان بالفعل محتاج إنه يجلس مع رهف ويسولف معها شوي لكنه لما دخل الغرفة تفاجأ إن رهف تروشت وصلت ورجعت نامت مكانها عالكنبه.. مشاري: تستهبل وتتميلح وتنام وتخليني.. ,,بعدها غير مشاري ملابسه وحط راسه ونام.... *** **** ***** (في بيت أبوصالح...) ,,الساعة 4 العصر... منيرة:أثير إطلعي فوق صحي إختك من أمس وهي نايمة.. وشفيها هالبنت لاتاكل ولاتشرب ومسكرة على نفسها بغرفتها طول الوقت.. أثير: والله يمه إني ما أدري وشفيها... خلاص بطلع لها االحين.. ,,طلعت أثير ودخلت على أبرار لقتها ماسكة الجوال وحاطته بحضنها وتطالع مسجات ناصر وهي تبكي.. ومومصدقة إن كل رسايل الحب والغرام هذي أرسلها واحد خاين ووحش مفترس.. أثير: أبــــرار وشفيك؟؟ أبرار وهي تممسح دموعها: مافيني شي.. أثير ببراءة: أبرار إنتي وناصر تهاوشتوا؟؟ أبرار خلاص إبعدي عنه خليه.. أبرار بخوف: هاااه.. لا لاماصار شي.. ماصارشي.. أثيرباستغراب: أبرار بسم الله عليك اشفيك خفتي؟؟ أبرار:خلاص أثير وشفيك بس تسألين وتحققين أزعجتيني... إنتي تبين شي.. أثير: إيه إنزلي تغدي.. أبرار: مابي أتغدى.. أثير: يوووه يا أبرار نسيت أحكيك.. فاتك زواج أسيل فاااتك... طالعه تهبل تهبــــــل.. ملكة جمال.. والقاعة فخمه بشكل ماتتصورينه.. وكل شي فخم.. صراحة متكلفين بشكل خيالي.. ,, أبرار تغير وجهها وناظرت تحت بكل حسرة لأنها عارفة إنها مستحيل تمر بهاللحظات وتفرح مثل كل العرايس.. أثير: وكله كوم وأهل زوجها كوم.. شفتي إشلون أهل مشاري شبعانين وأغنياء أهل زوج أسيل أكثر منهم.. وطايرين فيها وفرحانين بشكل خيالي.. ورهف يا أبرار رهــــــــف.... تجنن.. تجنن... ياحبيلها حامل... لابسه فستان خيااااالي.. وطقم ألماس شي شـــــي... تصدقين أول مادخلنا أمي ماسلمت عليها ومنعتني إني أسلم عليها.. بس لما جى وقت الزفة وطفوا الأنوار قلت لأمي بروح للحمامات ...وقابلت رهف وأسماء وسلمت عليها.. حضنتني وجلست تصيح... ياحبيلها ماتتخيلين قد إيش مشتاقة لنا.. يا الله قد ايش أبوي قاسي إنه يمنعها من شوفتنا.. ,,,أبرار وهي تحط إيدها على راسها وخانقتها العبرة: أثيـــــر تكفين.. تكفين.. خليني بحالي.. أثير: أبرار وشفيك؟؟ أبرار وهي منقهره من السعادة اللي الكل عايش فيها إلا هي: مافيني شي.. قلتلك مافيني شي.. ماتفهمين... إطلعي برا وخليني... إطلعــــــي.. ,, طلعت أثير برا الغرفة وهي مستغربه من عصبية أبرار وحالتها النفسيه اللي كل مالها تتدهور.. *** **** ***** (في لندن....) """في فندق جميرا كارلتون تاور... ,,,طلعت من الحمام كانت لابسه روب الحمام وشعرها غرقان .... واول ما شافته جالس ينتظرها على السرير نزلت راسها وإحمرت خدودها من الحياء... أول ما شافها معاذ اشر جنبه بيده وقال:تعالي جنبي... تعالي... ابتسمت اسيل وجلست جنبه.. وحط معاذ يده ورى راسها...وقرب راسها منه وباسها على جبينها وقال: هاحبيبتي انشالله مرتاحه؟؟ اسيل :الحمدلله مرتاحه... معاذ:خلاص البسي علشان نطلع بعد شوي نتمشى ونتغدى برا... اسيل:انشالله ثواني وأجهز... معاذ:خلاص انا بروح اتروش لين تجهزين.. ,,,دخل معاذ الحمام واسيل تطالع فيه بكل حب وراحه نفسيه... ياالله قد ايش انا كنت خايفه منه..بس طلع ابن حلال..الود وده يحطني بعيونه ويقفل علي ...من يوم زواجنا الى هاللحظه وهو حاطني فوق راسه..الله يخلينا لبعض ولا يحرمني منه... *** **** ***** (في بيت أم عبدالرحمن..) ,,الساعة 9 الليل.. ,,بغرفة فيصل... فيصل: إنا لله ماعندكم إلا إنا... روح فيصل وتعال يافيصل لايكوني سواق وأنا مادري.. منى: استح على وجهك عمك عبدالإله لاوديته المطار سرت سواق.. فيصل: وليه مايوديه واحد من هالسواويق اللي متسدحين بهالملاحق.. ليه أنا أطق مشوار إلما المطار.. وشفيها إذا ودوه؟؟ منى: الحين ماسمعت أبوك يوم قالك ودهم يافيصل... خلاص استح على وجهك وروح.. فيصل: إنا لله وإنا إليه راجعون.. كرفتوني بزواج أسيل لين قلت آمين.. حتى بعد ماتزوجت أسيل وافتكيت من المشاوير.. رجعتوا تطلعونلي مشاوير من تحت الأرض.. منى: خلاص.. يعني أروح عند أبوك وأقوله حكيك هذا وهو يتصرف معك؟؟ فيصل: إنا لله .. خلاص بألبس وانزل.. أووووف.. ::: ::: كانت لطيفة جالسه بالديوانية مع عيالها اللي كانوا متجمعين إلا مشاري كان بغرفته فوق يتحمم.. وكانت منى وأسماء ورهف وإيمان جالسين بغرفة الجلوس مع دينا يسولفون معها قبل ماتسافر.. ,,, ,,, لبس فيصل ملابسه وتعطر وجهز وطلع من غرفته ونزل تحت بالديوانية.. فيصل: يللاه عمي عبدالإله مشينا؟؟ عبدالإله:يللاه فيصل.. معليش بنعذبك.. فيصل من ورى قلبه: لاياعمي عذابك راحه.. عبدالإله:أجل افتح سيارتك عشان الخدامات يحطون الشنط فيها.. ,,حط فيصل يده على جيبه عشان يطلع مفتاح السيارة.. ومالقاه وتذكر إنه نساه عالكمدينة بغرفته فوق.. فيصل:يووه نسيت مفتاحي فوق ثواني ياعمي بطلع أجيبه وأجي.. ,,وينطلق فيصل لفوق عشان يجيب المفتاح.. لطيفة: الله يهدي مشاري طوَل وهو فوق... خلنيٍِِِ أقول لرهف تطلع تناديه عشان يسلم عليك ياعبدالإله قبل لاتسافر.. ,,وتروح لطيفة عند حريم عيالها .. لطيفة: رهف.. رهف: سمي ياعمه؟؟ لطيفة: روحي اطلعي نادي مشاري عشان يسلم على أخوه قبل لايسافر.. رهف: انشالله.. ,,وتقوم رهف بسرعه وتطلع من الغرفة وتتوجه للدرج.. صحيح إن رهف حامل بس كان جسمها خفيف والحمل مو مثقل عليها أبد.. ,,, طلع فيصل من غرفته وهو مسرع ويركض وبيده المفتاح.. بعد ماطلع فيصل من غرفته وسكر الباب وراه ونزل من الدرج على طول طلع مشاري من الغرفة وهو يشوف فيصل يمشي قدامه وينزل.. كان مشاري منشغل يسكر كبكات ثوبه ومنتعش بعد التسبيحة.. ويوم وصل أول الدرج تنح وانقلب مزاجه وحس إن كل الدنيا حوليه سوداء من الشي اللي قدامه.. ,, للأسف كان فيصل نازل بأسرع ماعنده ومو منتبه للي قدامه ولما وصل لآخر أربع درجات كانت رهف طالعة الدرج عشان تنادي مشاري .. لكنها تفاجأت بنزول فيصل السريع الغير متوقع... وللأسف ضرب فيصل رهف بكل جسمه وهو موقادر يسيطر على سرعته أو يمسك نفسه.. مع الضربة اللي سارت لرهف والصدمة القوية رجعت رهف على ورى وبغت تطيح على ظهرها.. لكن فيصل تدارك الموضوع ولحق عليها ومسكها بإيدينه الثنتين مع خصرها وقربها منه وحضنها غصبن عنه عشان ماتطيح.. من الروعه والصدمه تمسكت رهف بجسم فيصل بأقوى ماعندها وهي خايفة وحطت راسها على صدره وهي مغمضة عيونها وتتنفس بسرعه.. فيصل غصبن عنه حط يده على راسها وقال: بسم الله عليك.. ,,استوعبت رهف الموقف والصوت وبعدت بسرعه من عند فيصل وهي تطالع فيه بكل صدمه.. فيصل بخوف: رهف عورتك.. لايكون صارلك شي؟؟ رهف وهي تعدل شالها على راسها: لالا.. مافيني شي.. فيصل وهو يحاول يمد يده ويمسك بطن رهف: لايكون ضربتك ببطنك.. رهف كش جسمها وبعدت يد فيصل بخوف: خلاص فيصل قلتلك مافيني شي... ,,بعد هالكلمتين اللي قالتهم رهف بخوف كملت طريقها وطلعت لغرفتها فوق.. وكمل فيصل طريقه للديوانية... ولكن قبل لاتطلع رهف.. رجع مشاري غرفته وهومصدوم ومو مستوعب اللي صار قدامه وماله نفس ينزل ويشوف أحد... ::: دخلت رهف غرفتها وهي ترتجف وبطنها يعورها من قوة ضربة جسم فيصل عليه.. ,,كان مشاري جالس متنرفز ومعصب على طرف السرير ومعطي الباب ظهره وهو مصدوم ومايشوف قدامه إلا سواد... ويهز رجله بعصبية.. ويفرك بإيدينه بقوة.. رهف بصوت مرتجف: مشاري.. مشاري من غير مايلتفت: نعم.. رهف: عمتي تناديك.. تقولك تعال سلم على عبدالإله قبل لايسافر.. ,, قام مشاري وهو ماوده يناظر برهف حتى مجرد نظره ولاوده يقرب منها.. لأنه لويسير مجرد احتكاك بسيط بينها وبينه .. بيمسكها ويضربها إلين يبرد حرته.. ,, نزل مشاري للديوانية ونزلت رهف بعده على طول لغرفة الجلوس عشان يودعون عبدالإله وزوجته.. وبعدما راحت دينا.. طلعت رهف لفوق وهي تجر خطواتها بألم.. وبطنها يعورها وحاسته بينفجر من قوة ضربة فيصل لها.. دخلت غرفتها وتمددت عالسرير بكل ألم وراحت بسابع نومة.. ,, وبعد ماراح عبدالإله ركب مشاري سيارته وهو مايشوف الطريق من زود العصبية ويتوعد ويتحلف برهف.. *** **** ***** (في سيارة مشاري..) ,,كان مشاري وجهه أسود ويفتح عيونه ويقفلها بصعوبة وكل شوي يتنهد بحرقه.. كان طارق قاعد بالمرتبة الخلفية وملاحظ ملامح مشاري اللي كل شوي تسوء أكثر من قبل.. ..وبنفس الوقت لاحظ عزام نفس الشي والتفت لطارق ورى وهو رافع حاجبه باستغراب.. رجع عزام ناظر في مشاري وقال: مشاري وشفيك.. تبي ترتاح وأسوق أنا؟؟ مشاري وهو متنكد: لاءء.. عزام: مشاري وشفيك... فيه شي؟؟ مشاري: لآءء.. مافيني شي.. طارق: حمدالله .. مشاري وشفيك.. فرفرنا بهالشارع يجي سبع مرات وكل ماطلعنا منه ترجعله... ومن يوم مامريتنا وأخذتنا وانت ساكت.. ,, مشاري ساكت ومايرد وماهو يم طارق وعزام أبدآ وكل شوي الموقف ينعاد قدامه.. وتزيد النار بقلبه... عزام: مشاري خلاص وصلني البيت... وانت ياطارق تعال معي.. مشاري وهو ماوده يخلونه: خلكم شوي بدري.. طارق: لايابن الحلال تكفى.. صدع راسي من الفرفرة بالشوارع... عزام: وانت بعد يا مشاري تعال عندي ريح.. وبعدين ارجع بيتك.. ,,حس مشاري إن طارق وعزام تضايقوا من سرحانه ونفسيته وشاف من الأحسن إنه يرجعهم بيتهم وهو يروح البيت... مشاري: معليش والله إني عارف إني نكدت عليكم وخربت عليكم سهرتكم ... بس معليش إعذروني راسي يعورني شوي.. عزام: مو مشكله إنت رجعنا.. وبعدين روح بيتك... ,, وصل مشاري طارق وعزام لبيت عزام.. وحرك بالسيارة وهو حاس نفسه ضايع ومكتوم ومومصدق اللي شافه بعيونه ... مشاري.. لا لا... أنا مومصدق اللي صار.. هذي انهبلت.. وصلت فيها المواصيل... تلحق ورى فيصل... ورى فيصل... ليه موشايفتني رجال... عشاني تركتها طول الفترة اللي فاتت طمعت في فيصل.. آآآه يارهف.. بس برجع البيت وأوريك شغلك... والله لأقطعك بيديني.. والله لأنتفك... حامل ولا موحامل... أنا مايشرفني يكون لي ولد من وحده زيك... إذا مارميتك عند باب بيت أبوك... ما أكون أنا مشاري... وانت ..انت يافيصل... تطاوعها.. لكن أنا مالي تصرف معك.. تصرفي مع هالحيوانة رهف... والله لأخليك يارهف تندمين عالساعة اللي عرفتيني فيها.. ,,,, وساق مشاري سيارته بسرعه جنونيه واتجه للبيت... الجزء الثالث عشر (في بيت أم عبدالرحمن...) ,,,الساعة 1 الليل.. كان البيت هادي والكل بغرفته... اللي نايم واللي سهران واللي يكلم بالتليفون.. دخل البيت وهو مايشوف طريقه ... كان عاقد حواجبه.. ومعرق.. ووجهه أحمر والوساوس تلعب براسه لعب.. رفع ثوبه بيده وركض لفوق ودخل غرفته وسكر الباب وراه.. ,, كانت الغرفة هدوء ومظلمة وباردة... فتح أبجورة وحدة وقرب منها... كانت نايمة على الكنبة.. وباين على ملامح وجهها التعب... وحاطة يدها على بطنها.. ومتلحفه بلحافها وفي سابع نومه.. ,,, قرب منها ووقف وهو يناظر فيها بكل حقد.. وضام أصابعه ويضغطهم على بعض بكل قوة... عقد حواجبه وعض شفته.. وبأقوى ماعنده شال اللحاف من عليها.. ,, شهقت رهف وفتحت عيونها بكل خوف.. وطالعت في مشاري وهي مصدومة.. مشاري وهو يتنفس بسرعه وعيونه مليانه دموع: كان قلبي حاسس إنك وصخة وقذرة .. ومنتي أحسن من أبوك.. لكني كنت غبي.. وكنت أقول حرام مسكينة... نايمة بكل براءة ماكنك سويتي شي... لكن الله يحبني وكشفك لي.. ,, طارت عيون رهف.. وهي مي مستوعبه ولا كلمة من اللي قاعد يقولها مشاري وتطالع فيه بإستغراب .. وقلبها يرجف من الخوف.. مشاري:قومي.. قومي.. قومي أوقفي.. رهف بخوف: مشاري .. وشفيك.. ,,وبحركة مفاجأة مد مشاري يده وسحب رهف من شعرها.. ومن قوة الشد وقفت رهف وحطت إيدينها على إيده اللي ماسكه شعرها وقالت: آآآآه... مشاري .. إشفيـــــك؟؟؟ مشاري: أنا أبي أعرف شي واحد إنتي وشجنسك... مستحيل تسيرين إنسانه مستحيـــــل.. إنتي عقرب... حية... من يوم دخلتي حياتنا عفستينا كلنا فوق تحت... سيطرتي على أمي...وذبحتي خالد .. وجننتيني... رهف وهي تبكي: مشاري يرحم والديك .. فكني... فكني.. الله يخليك.. مشاري: الله لايخليني إن خليتك دقيقة وحدة بهالبيت.. ,,, وبأقوى ماعنده رمى رهف عالأرض وقال: لمي أغراضك ودقي على أخوك صالح ياخذك.. ,,رفعت رهف راسها وهي عالأرض وطالعت في مشاري ووجهها كله دموع وقالت وهي مومستوعبه ولاشي: أدق على صالح... ليه وشسويت؟؟ وشسويت يامشاري.. مشاري بعصبية: ولاكلمة... أنا مايشرفني وحدة زيك ياحقيرة يادنيئة تنطق أسمي.. شيلي أغراضك ولاتخلين ولاشي ولاشي يذكرني فيك وانقلعي لبيت أبوك.. ولاولدتي.. بأجي آخذ ولدي غصبن عنك.. لأني ما أرضى ولدي يبقى مع وحده زيك .. منتهيه وخربانه.. ,,رهف وهي عالأرض.. حطت إيدينها الثنتين على فمها ودموعها ممليه وجهها.. وقالت: أنا منتهيه.. وخربـــانه؟؟ مشاري: بطلي تمثيــــــل خلاص... خلاص يارهف.. مافي شي يشفعلك... عمري فحياتي يارهف ماتوقعت إنك تخونيني وتعضين اليد اللي أحسنت لك.. رهف بصدمه: أنا خنتك؟؟ مشاري وهو يجلس عالسرير ومنهار ويطالع لرهف بكل حقد: كذا.. كذا يابنت الناس.. إستغليتي طيبتنا ورحمتنا لك.. وقمتي تلعبين فينا على كيفك.. تخونيني يامحترمة يامتربية... ومع مين؟؟ مع فيـــــــــصل؟؟؟ ,,, فتحت فمها رهف وهي مو فاهمة شي وقالت بصوت واطي: فيصل.. مشاري وهو يقلد رهف: إي.. فيــسل.. مصدومه..هاااه.. ماتوقعتي إني أطيح عليكم.. يازبالة.. ماتوقعتي.. ,,ويرفع مشاري راسه لفوق ويحط يده على راسه ويغمض عيونه بقهر ويقول: اللي قاهرني ومجنني.. بالدرج.. بالدرج يارهف.. تحضنينه بالدرج.. لو أحد غيري شافكم.. وشيسير موقفي.. ,,,سكتت رهف ونزلت راسها تحت وهي موفاهمه شي لكنها تذكرت فجأة الموقف اللي سارلها مع فيصل بالدرج ورفعت راسها بسرعه وناظرت بمشاري وقالت: لاااااا.. مشاري: ولاكلمة... ولاكلمة... كل شي وضح.. كل شي بان.. قبل مايروح مشواره للمطار.. عطيتيه حضن عالطاير.. حضرتك شفتي إنه مافي أمل في العم... رحتي ضبطتي ولد أخوه عشان تضمنين مستقبلك.. لكن خلاص.. إلى هنا وكفاية.. هذا الشي مستحيل أسكت عليه يارهف.. مستحيل.. ولاتضنين إني رح أضر فيصل عشان خاطرك... فيصل قطعة مني وولد أخوي.. هو اللي قاعد وانتي اللي طالعه.. وحتى لوغلط فيصل.. إنتي السبب إنتي اللي أغويتيه.. هونازل من الدرج وانتي استقبلتيه بالأحضان.. رهف وهي تبكي: مشـــــــاري... مشاري:ولااااا...كلمة... الود ودي.. أمسكك وأقطعك بإيديني.. ولو أشرب من دمك مايشفي غليلي.. لكن أنا اكتشفت شي.. إن الضرب ماينفع فيك لأن هذا طبعك وصخ.. ولاينفع فيك التأديب... وإذا إنتي وصخه أنا مارح أوصخ إيديني فيك.. فلمي ملابسك ودقي على أخوك يجي ياخذك... ولا والله يارهف.. لأدفنك بغرفتك هنا.. وأفظحك طول عمرك.. ,,قامت رهف من عالأرض وهي ترتجف وجت تبي تقرب من مشاري عشان تفهمه الموضوع.. لكن مشاري قام بسرعه وبعد من عندها وقال: شوفي.. أنا بطلع برا البيت وبعد ساعة كاملة أبرجع إن لقيتك يارهف لسه موجوده.. موتك على إيدي.. ,,, ,,, طلع مشاري من الغرفة وترك رهف بحالة يرثى .. كانت واقفة مصدومة ومرعوبة.. وحاطه إيدينها الثنتين على فمها.. لا لا... لااااا.. ليه ياربي ..ليــــــه.. وشهالإتهام... معقول.. معقول مشاري فسر الموقف على كيفه ... بس هذا ظلم... ياربي ظلم.. والله ماشفته .. قسمآ بالله ماشفته.. قاعدة أطلع بهدوء.. فجأة لقيته بوجهي.. ومسكته غصبن عني لأني خفت أطيح على ورى..عالدرج... آآآه ياربي.. آآآه... وين أروح.. وين أروح.. حتى ماعطاني فرصة أتكلم... ماعطاني فرصة أدافع عن نفسي.. يبيني أرجع بيت أهلي... وشلـــــون... وشلــــــــون.. والله لأبوي ومنيرة يطردوني بالشارع... ,,, وتنهار رهف وتتكوم عالأرض.... وتجلس تبكي.. وتبكي.. وآخر شي رفعت راسها فوق وقالت: حسبي اللــــــــه عليك يامشاري... حسبي اللـــــــه عليك.. الله لايسامحك.. الله لايســـــامحك.. *** **** ***** (في سيارة مشاري...) كان يرتجف وحاس الدنيا تلف وتدور فيه وكل شي قدامه أسود... ,,جلس يلف ويدور بالسيارة وهو موعارف وين يروح وحاس إنه أغبى واحد بالدنيا.. فجأة نزلت من عينه دمعه وبسرعه مسحها بيده وقال: لاااا...لاااا.. هالإنسانة.. ماتستاهل دمعه من عيني.. ماتستااااهل... ,,, ويمر منظر رهف وهي في حضن فيصل قدام عيون مشاري.. ولا إراديآ.. داس عالبنزين بكل قوته.. وما انتبه للإشاره إنها حمرا.. وفجـــــــــــأة... ؟؟ | ||||||||
| |
|
02-04-2011, 03:23 AM
| #46 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في بيت أم عبدالرحمن..) ,,بغرفة عبدالرحمن والساعة كانت 2,30الليل.. جوال عبدالرحمن يهز لأنه عالسايلنت.. منى وهي تفتح الأبجورة وتمسك كتف عبدالرحمن: ..عبدالرحمن... عبدالرحمن... ,,عبدالرحمن وهو يالله يالله يفتح عيونه : هاااه... منى: جوالك دق مرتين ياعبدالرحمن... رد شوف اشفيه.. عبدالرحمن وهو يطالع ساعته: الساعه 2,30 من يدق الحين؟؟ منى: انشالله خير.. الله يستر رد شوف مين؟؟ عبدالرحمن وهو يتنحنح: ألو.. عليكم السلام... إي نعم أنا عبدالرحمن.. وشــــو.... لاحول ولا قوة إلا بالله.. لاحول ولاقوة إلا بالله.. والحين هو كيف حالته؟؟ خلاص مسافة الطريق وأنا جاي.. ,,, ويقوم عبدالرحمن من سريره وهو متغير وجهه وعاقد حواجبه.. منى بخوف: عبدالرحمن إشفيه؟ ,,عبدالرحمن ساكت مايرد ويفتح دولاب الملابس.. منى:عبدالرحمن تكلم وشفيه.. عبدالرحمن وهو يتنهد: مشاري سوى حادث وشالوه الإسعاف.. منى وهي تشهق وعيونها مليانه دموع: لا تقول.. عبدالرحمن: الله يستر.. الله يستر.. مشاري لو يسير فيه شي أمي هالمسكينة بتروح فيها.. خالد مات السنة اللي فاتت.. وعدت الأزمة.. لكن هالمـــ.. استغفرالله العظيم.. لاحول ولاقوة إلا بالله.. منى: خلاص لاتروح لحالك خذ فيصل وتركي معك.. ,,لا لا مايحتاج تركي.. الحين نايم ولوبصحيه كل البيت بيدري.. وأنا أبي أروح من غير ماتدري أمي.. بآخذ فيصل بس.. بس المصيبة الحين زوجته.. أخاف تقعد تستناه وتدق على جواله ويرد أحد من هالممرضين.. ولا تروح تصحي أمي.. مادري..مادري.. منى: خلاص إنت الحين روح مع فيصل..وأنا بروح عند رهف إذا نور غرفتها مفتوح أبدخل وأقولها وأقعد معها وانت كل شوي دق وطمني.. إذا النور مقفل مستحيل أدخل وأصحيها.. عبدالرحمن على عجله وهو عند الباب: لااا.. دقي الباب وادخلي عندها.. موشرط إذا النور مقفل تكون نايمة يمكن صاحية ومقفلة الأنوار إدخلي عندها وعلميها.. ,, ويطلع عبدالرحمن وياخذ معاه فيصل بعد ماقاله خبر الحادث .. وتوجهوا للمستشفى وهم متوترين وخايفين.. ,,, ,,, ,,, بغرفة رهف.. كانت قاعده على السرير جنب شنطة الملابس.. وراسها بين إيدينها وتبكي.. ومومستوعبة اللي صار أبدآ.. ,,ياربي.. ياربي.. شسوي.. هالإنسان مادري اشلون يفكر.. مادري.. يبيني أدق على صالح ... هالحزه... والله لينهبل صالح... مستحيل أدق عليه.. مستحيــــل.. ولو أدق على أبوي بيتشمت فيني ويمسح فيني الأرض.. والمشكلة إذا رجع مشاري ولقاني قدامه.. اشبيسوي؟؟ هوحلف لويجي ويلقاني بيذبحني...ولايفظحني بين أهله... يفظحني وأنا ماسويت شي...يفظحني وأنا مالي ذنب... يارب ساعدني أنا مالي غيرك.. ,,,باب الغرفة يدق.. خافت رهف ومسحت دموعها بسرعه وقالت بكل خوف: ميـــــن؟؟ منى: أنا منى.. نايمة يارهف؟؟ رهف قالت:منى هالحزة تدق عالباب... الله يستر.. الله يستر... أكيد مشاري قالهم... الله ياخذك يامشاري... الله ياخذك... من يوم أخذتك وأنا بمشاكل وعذاب.. عيشتني وعيشت نفسك بوساوس...مالها أساس... حسبي الله ونعم الوكيل.. ,,قامت رهف وشالت شنطة الملابس ودخلتها غرفة التبديل.... ومسحت دموعها.. وفتحت الباب.. فتحت رهف الباب وطلت وهي مرعوبه وقالت بخوف: منى.. إشفيه.. منى وهي مبتسمه: لايكون صحيتك.. يوم شافت رهف الإبتسامه هدت شوي بعدين قالت: لا.. لا..أنا مانمت أصلآ.. تعالي منى داخل.. ,,جلست منى عالكنبة اللي قدام سرير رهف وهي تطالع بالأرض.. رهف بنظرة رجاء: منى فيه شي.. شكلك تبين تقولين شي؟؟ منى وهي تبلع ريقها: لا مافي شي.. بس مشاري.. رهف وقلبها يدق بسرعه وعيونها مليانه دموع: مشاري إشفيه؟؟ منى: تو المستشفى دقوا على عبدالرحمن وقالوا إن مشاري صارله حادث وهو متنـــــ... ,, وقبل ماتكمل منى كلامها حطت رهف إيدينها على وجهها وقالت: لاااااا... ,,,, وعلى طول طاحت على وجهها عالأرض.. ,, منى خافت وراحت عند غرفة بنتها أسماء ونادتها وشالوا الثنتين رهف وحطوها عالسرير.. أسماء: يمه خلينا نشيلها أنا وياك ونوديها المستشفى.. منى : أسماء إنتي تبين جدتك تحس وتقوم... اشلون نشيلها ونوديها المستشفى هالحزه تعالي ساعديني نصحيها... ,,بعد محاولات كثيرة مع رهف إنها تصحى... فتحت رهف عيونها.. وأول ماشافت منى على طول شهقت ورجعت تبكي وإيدها على عيونها.. منى: رهف قولي لااله إلا الله تعوذي من ابليس.. أول مابيوصل عبدالرحمن للمستشفى بيدق علينا ويطمنا.. تكفين رهف إهدي... *** **** ***** (في لندن...) ,,في فندق جميرا كارلتون تاور.. ,,كانت منسدحه على آخر السرير.. ومتغطيه باللحاف.. وتطالع بالسقف.. مشى معاذ وجلس قبالها وهو يطالع فيها بكل حب.. معاذ: وشفيك ياقلبي مخليتني وقاعده هنا.. أسيل وهي تحاول تبتسم: ما فيني شي.. معاذ: إشلون مافيك شي..من لما رجعنا من برا وانتي ساكته وهاديه وسرحانه.. وكلك خمول.. أسيل وهي تعدل جلستها: صدقني مافيني شي.. بس يمكن مشتاقه لأهلي.. معاذ وهو مبتسم بحنان: أوووه مسرع طفشتي مني؟؟ أسيل: لاوالله يامعاذ ما أطفش منك.. بس أبي أسألك.. معاذ: إسألي حبيبتي؟؟ أسيل: إذا خلصنا شهر عسل في لندن بنروح أسبانيا على طول ولا نمر الرياض أول.. معاذ: أسيل حبيبتي.. تعرفين إنه بس نخلص شهر العسل على طول بيبدى دوامي بأسبانيا.. وضروري أروح وأباشر هناك.. وانشالله بنقعد بس أسبوعين وبعدين وعد ياأسيل آخذك ونسافر للرياض..بعدين بالله في عروس بالدنيا تفكر متى يخلص شهر العسل؟؟ أسيل وهي ماعاجبها الكلام:لا موسالفة أفكر.. بس قلتلك مشتاقه لأهلي.. معاذ: يابعد أهلي إنتي.. أنا أهلك وأمك وأبوك وحمودي الصغير لابغيتي.. أسيل وهي مبتسمه: خلاص يللاه تعال نطلع البلكونه نطالع بالمطر شوي.. *** **** ***** (في بيت أم عبدالرحمن..) ,,بغرفة رهف بعد مرور ساعه من معرفتها لخبر حادث مشاري""" ,,كانت رهف جالسه وضامه رجولها على صدرها وتبكي وتفكر.. ياويلي من الله ... ياويلي من الله أنا السبب... أنا السبب... دعيت وتحسبت عليه.. إلين صارله هالحادث.. أول مره بحياتي أدعي على أحد... بس تعبت من كثر الظلم.. يارب سامحني..وسامحه.. خلاص أنا مسامحته.. مابي منه شي بس أبيه يفهم إني مظلومه.. بس.. يارب خليه وقومه بالسلامه.. يارب خليه لعينن ترجيه.. يارب خله لأمه وأهله ولضناه.. إذا صار لمشاري شي.. من لي ومن لولده؟؟ لاحول ولاقوة إلا بالله إنا لله وإنا إليه راجعون.. ,,يقطع تفكيرها صوت جوال منى.. منى: هذا عبدالرحمن.. ,,رفعت رهف راسها وطالعت بمنى بكل خوف.. منى: هلا عبدالرحمن.. ها بشر؟؟ بشرك الله بالخير .. الحمدالله.. طب وشصارله؟؟ (تغير وجه منى وكشرت) لاحول ولاقوة إلابالله.. كل هذا.. هو صاحي؟؟ الله يقومه بالسلامه.. طب ماتدري متى يقوم؟؟ الله يستر.. طب بتجي تقول لعمتي؟؟ خلاص أجل انتبه لنفسك.. ,,,وتنهي منى المكالمة.. أسماء ورهف: ها.. إشفيه؟؟ منى: تطمنوا تطمنوا... إنشالله إنه بخير.. رهف: منى تكلمي مشاري إشفيه؟؟ منى: الحين مشاري بالعناية.. صحيح إنه وصل للمستشفى تعبان مره بس حالته الحين مستقره نوعآ ما.. بس للأسف ماسلم من هالحادث.. رهف وهي تبكي: إشلون ماسلم تكلمــــــي.. يامنى ارحميني.. منى: يقول عبدالرحمن إن فخذه انكسر.. واربع ضلوع من قفصه الصدري تكسرت وشقت الرئه.. والحين هوعنده نزيف بالرئه ومويات.. وعنده خلع بالكتف... وانكسر خشمه... ,,,رهف شهقت ورفعت راسها فوق وغمضت عيونها وقالت وهي تبكي: ياويلي كل هذا؟؟؟ أسماءماقدرت تمسك نفسها وانهارت عالسرير وهي تبكي وقالت: ياويلي على عمي مشاري.. منى وهي تمسك نفسها إنها ماتبكي: رهف خلاص قولي لاحول ولاقوة إلا بالله..إذكري الله.. إحمدي الله واشكريه كان ممكن الوضع يسير أسوأ من كذا... انشالله بيسير طيب.. ويقوم بالسلامه.. الحين أنا شايله هم عمتي ... عبدالرحمن يقول إنه بعد صلاة الفجر بيجي ويقولها ويقول لتركي... الله يستر.. أسماء وهي تمسح دموعها: يمه طب عمي مشاري الحين صاحي؟؟ منى: وين صاحي يا أسماء؟؟؟ أبوك يقول إنه فاقد الوعي.. والدكتور يقول يمكن بكره أوبعده يصحى.. ,,,سكتت رهف وحطت راسها على ركبتينها وهي تبكي وكارهه نفسها لأنها تظن إنها السبب بكل شي صار لمشاري وخالد الله يرحمه.. وإنها من أول مادخلت حياته وهي عافستها فوق تحت.. ,,, ,,, الساعة 4,30 الفجر.. كانت رهف على سجادتها منهارة وتبكي وتدعي لمشاري.. ورجعت منى وبنتها لغرفهم عشان يخلون رهف ترتاح شوي ويصلون.. ,,,, ,,,جوال منى يدق.. منى: هلاعبدالرحمن.. عبدالرحمن:تعالي أنا قدام غرفة أمي .. تعالي معي عشان نقولها.. منى: طيب الحين جايه.. ,,, كانت لطيفة على سجادتها تصلي.. دق عبدالرحمن الباب ودخل.. أول ماشافت لطيفة عبدالرحمن وزوجته داخلين ولاحظت ملامح التوتر والزعل بوجيهم...عرفت على طول إنه في شي.. كملت صلاتها وطوت سجادتها وجلست على طرف سريرها وهي تناظرلهم بكل خوف وقلبها حاسها إنه في مصيبة سايره.. ,,قرب عبدالرحمن من أمه وباسها على راسها وجلس جنبها وقال: صبحك الله بالخير يمه.. لطيفه:صبحك الله بالنور.. عبدالرحمن وهويبلع ريقه: كيفك يمه انشالله طيبه؟؟ لطيفه: بخير ياربي لك الحمد... عبدالرحمن تكلم إنا عارفه إن عندك شي إنت وزوجتك تكلم.. عبدالرحمن:لاتخافين يمه إهدي مافي شي... السالفه بسيطه.. لطيفه: عبدالرحمن تكلم وشفيه؟؟ عبدالرحمن:يمه مشاري سوى حادث بسيارته.. لطيفه وهي تشهق: مشــــــــاري؟؟؟ عبدالرحمن وهويحاول يهدي أمه:يمه لاتخافين هو الحين بخير وطيب ولاعليه.. بس كسور بسيطه.. لطيفه: طب هوالحين وينه؟؟ عبدالرحمن: متنوم بالمستشفى.. بس لاتخافين يمه حالته مستقره الحين... لطيفه وهي تقوم: ودني عنده أبشوفه.. منى وهي تمسك لطيفه مع كتفها:ياعمه.. إذكري الله وين تروحين ...ممنوع الزياره هالحزه.. لطيفه: وانت جاي ومخلي أخوك.. عبدالرحمن:يايمه ماخليته لحاله.. فيصل معه.. والحين بنادي تركي يروح عنده.. لطيفه وهي تتنفس بسرعه: خلاص ودوني له الظهر..أبي أشوف مشاري.. أبي أشوفه.. عبدالرحمن: خلاص يمه.. ابشري... انتي الحين اهدي.. منى قومي جيبي لأمي فطورها وكاسة عصير.. لطيفة: لاوالله ماآكل شي ولاأبي شي.. منى: ياعمه ليه.. عالأقل كاسة عصير.. لطيفه: مانيبماكله شي إلا لين أشوف ولدي وتطمن عليه.. ولابغيت العصير عندي في الثلاجه.. ,,, ,,, طلعوا منى وعبدالرحمن من عند لطيفة وهنا لطيفة مر على بالها ذكرى وفاة خالد.. واشلون ضغطت عليه ...إلين طلع من البيت وصارله الحادث.. وكمان قد ايش هي فاقدته وحاسه بتأنيب ضمير إنها هي السبب بوفاته.. وخايفه إنها تفقد مشاري بعد.. فرشت سجادتها.. ولفت جلالها.. وانهارت تبكي وتدعي ربها إنه يسلم ولدها ويقومه بالسلامه.. (في بيت أبوصالح..) منيرة: ها يا سلطان وشقلت؟؟ سلطان: دقي على إختك وقوليلها لا.. منيرة: ليه ياسلطان أقول لا؟؟ وشفيه ولد إختي؟؟ سلطان: مافيه شي.. بس لادراسه ولاوظيفه ولامستقبل.. منيرة:من قالك إنه مو موظف.. سلطان:كل الناس دارين...مايحتاج أحد يقولي.. منرة: لايا سلطان.. فراس ولد إختي موظف.. سلطان: الله والوظيفة.. كاتب في المحكمة.. منيرة: وشفيه الكاتب في المحكمة.. ماشالله يستلم راتب ومستعد يسكن أبرار بشقه لحالها..صحيح إنه على قد حاله بس المهم إنه انسان متدين ويخاف الله.. سلطان: وتتوقعين بنتك هالمدلعه بترضى بواحد على قدحاله.. منيرة: هذا اللي أنا شايله همه.. إنها ماتوافق عليه... لكن ما أخذها إلا بنتك رهف هالجاحده.. خذت واحد ماكانت تحلم فيه.. ويوم استغنت تنكرت لنا ولا كأنها تعرفنا... لكن أن واثقه بفراس إنه بيحب بنتي ويعيشها أحسن عيشه.. ..خلاص ياسلطان أنا بفاتح أبرار بالموضوع ولاوافقت بدق على إختي وزوجها يجون من الخرج ونتمم الخطبه.. | ||||||||
| |
|
02-04-2011, 03:24 AM
| #47 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في مستشفى المملكه...) ,,جلست عالكرسي وهي مصدومه ودموعها على خدها وقالت بألم وانكسار: يا ويـــــلي عليك ياولدي.. تركي وهويدنق على أمه: إذكري الله يمه إذكري الله... لاتخافين مشاري بيقوم بالسلامه ويرجع أحسن من أول... ,,قعدت لطيفه ترتجف وتحاول تتماسك وهي تناظر لولدها بكل خوف.. كان مشاري راسه ملفوف بشاش.. وداخل بخشمه أنبوب التنفس .. وعلى خشمه ضماده عشان الكسر..وموجود كذا غرزه بدقنه وخده.. وموملبسينه شي.. ويده مربوطه على صدره عشان الخلع اللي بكتفه.. وحاطين له جبيرة لرقبته.. وفخذه مجبس إلين الحوض ... وفي كيس محطوط على رافعه عالأرض موصل فيه أنبوب.. هالأنبوب موصل في رئة مشاري عشان يسحب الدم والسوائل من رئتة ويحطها بالكيس.. ويادوبك الشرشف محطوط على حوضه وبطنه وبس... ,,ماقدرت تمسك نفسها لطيفة وانهارت وجلست تبكي.. عبدالرحمن: خلاص يمه تعوذي من ابليس واذكري الله هدي نفسك.. لطيفه: وشلون تبيني أهدي نفسي.. ماتشوف أخوك وشلون حالته... متكسر من راسه لين رجوله... شوف وجهه وشلون منفخ ومليان غرز ورضوض.. شوف فمه كيف مفتوح موقادر حتى يسكره.. تركي: يايمه إحمدي الله واشكريه... إنتي ماشفتي سيارة مشاري وشلون صارت.. انعجنت واندمرت واللي يشوفها يحلف إن اللي فيها ماطلع حي... فيصل: يبه ترى عمي عبدالإله دق ويقول إنه جاي هو وزوجته بكره الصباح.. لطيفه شهقت والتفتت لعيالها: لا..لالالا... والله مايجي... دقوا عليه وقولوا له لايجي.. أنا في واحد أسير في إثنين.. عبدالرحمن:يايمه يبي يتطمن على مشاري... لطيفه: أنا قلت لاااا... دقوا لي عليه وأنا بكلمه وأقوله لايجي.. توه كان عندي ..يرجع مره ثانيه للرياض.. يتعب عمره وزوجته.. أنا ماني ناقصه إني أقعد أهوجس فيه هو الثاني.. دق لي ياعبدالرحمن وأنا بكلمه.. ,,, دقوا لطيفه وعيالها على عبدالإله وطمنوه وهدوه وأقنعوه إنه مايجي ويقعد بجده إلين تتحسن حالة مشاري ويجي هو وزوجته.... عبدالرحمن: خلاص يافيصل خذ جدتك وارجع البيت إنت من الفجر وانت مانمت وقاعد هنا.. لطيفه: لامانيبراجعه مع أحد بقعد مع ولدي مشاري.. فيصل: ياجده الله يهديك.. ترى طارق وعزام أصحاب عمي مشاري قاعدين بالسيب برا.. يستنونك تروحين عشان يدخلون عند مشاري .. بيموتون ويشوفونه.. تركي:وبعدين يايمه ترى كل قرايبنا الحين وأصحاب مشاري كلمونا ويبون يجون يزورونه ميبعدله يقعدون الرجال داخلين وطالعين عليك وانتي قاعده.. لطيفة: إنا لله الولد فاقد وعيه ولايدري وين الله حاطه وشيبون هالناس جايين ماعندهم دم مايحسون.. عبدالرحمن: عاد الشكوى لله يمه... نطردهم... ,,,بعد ما اقتنعت لطيفه إنها تروح مع فيصل.. قربت من راس مشاري وحطت راسها عليه وهي تبكي وتدعي الله إنه يحفظه ويقومه بالسلامه.. وباسته بكل خفه على راسه وخدوده .. وودعته وطلعت.. *** **** ***** (في بيت أبوصالح..) أبرار وهي ترتجف: يمه أنا قلتلك ما أفكر بالزواج.. منيرة: وليه حضرتك ماتفكرين... لادراسه نافعه فيها ولاشغل بيت سنعتن فيه.. ولاهو باب بيتنا تكسر من الخطابه اللي يجونك.. فراس ولد خالتك أول واحد يخطبك..شايفه عمرك ولاتبين تتزوجينه ليه؟؟ أبرار وهي مصدومه من كلام أمها:يمه اشهالكلام؟؟ أنا بنتك تقولينلي كذا؟؟ منيرة:وأنا أمك وأعرف مصلحتك زين وشايفه إن فراس يصلحلك ولا انتي لاقيه أحسن منه.. ,,نزلت راسها أبرار بالأرض وامتلت عيونها دموع وتذكرت قد إيش بنات خالتها يحبون أخوهم فراس ويمدحونه .. وتذكرته وهو صغير قد إيش كان عاقل وطيب وكريم والكل يحبه.. وتذكرت كلام صالح ومدحه له وثناءه عليه وعلى أخلاقه وإنه شخص متدين وملتزم ويخاف الله والتزامه إلتزام استقامه وخوف من الله مو بس لحيه ونفاق قدام الناس وقالت بنفسها: فراس.. ياخذني أنا.. ياخذني أنا... مستحيل.. مستحيل.. أنا ماأستاهل فراس ماأستاهله.. أنا تراب أنا ولاشي ولاشي... فراس اللي كنت شايفه نفسي عليه إنه فقير ومومن مستواي.. الحين أنا اللي سرت جزمه ومو من مستواه.. أبرار: يمه دقي على أختك وقوليلها إن أبرار ميموافقه وهذا آخر كلام عندي.. منيرة: ليه تبين تصكين الثلاثين وتقعدين على قلبي وتصكين على خواتك؟؟ أبرار: أنا موقاعده على قلب أحد ..وإذا بناتك تبين تزوجينهم أنا موصاكه على أحد اللي تبي تتزوج تتزوج..فراس واحد فقير وعلى قد حاله وأنا إذا فكرت في الزواج.. ما أفكر بواحد منتف ومعقد ومتخلف زي فراس.. منيرة:يا أبرار هذا ولد خالتك يعني لاتزوجتيه بتسير خالتك تحبك وتعاملك زين.. أبرار:قلت لأ يعني لأ.. منيرة: موعلى كيفك يا أبرار... أنا وأنا في سنك كان صالح عمره سنتين.. وانتي للحين قاعده ببيت أبوك.. تبين الناس يسموني أم العوانس.. يكفي إختك رهف هالتبن ماتزوجت إلا بعد ماجننتني أنا وأبوها.. أبرار: رهف ماقعدت ببيت أبوي على كيفها إنتي وزوجك اللي صكيتوا عليها.. منيرة: تراددين يا أبرار.. مومشكله.. شوفي.. فراس هو وأمه بيجون وبتلبسين وبتطلعين.. والولد يشوفك ويتم الزواج غصبن عنك يا أبرار.. ,,وتطلع منيرة من عند أبرار وهي مصدومه ومنهاره وتضرب بكفها على خدها وتبكي.. طارت أبرار إلما الباب وسكرته بالمفتاح وراحت عند دولاب الملابس وحاست فيه إلين طلعت جوالها الثاني اللي من زمان مامسكته.. وفتحته وعلى طول دقت على غلطة عمرها وسبب شقاها بهالدنيا... ناصر.. دقت ودقت لكنه مارد عليها.. حطت راسها بن إيدينها وجلست تبكي وهي منهاره وتدعي إن الله ياخذها وتفتك من الفظيحه اللي بتسير.. *** **** ***** (في بيت أم عبدالرحمن...) الساعه 8 الليل... ,, من يوم مارجع فيصل من المستشفى وهو نايم لأنه تعبان ولأنه مانام من الفجرمن لما راح المستشفى لمشاري.. دخلت أمه منى عنده وصحته عشان يصلي المغرب ويلحق على صلاة العشاء.. ,,قام فيصل بتثاقل وخمول وتوضى وصلى المغرب ونزل تحت عشان يروح المسجد يلحق على صلاة العشاء.. كان يمشي بالحوش ومنزل راسه ويسكر أزارير ثوبه ولايسمع صوت من خلفه يناديه... [فيـــــــصل..] ,,التفت فيصل وهو مستغرب... وشاف رهف شايله سيرين بنت تركي على يدها وجالسه على سور الحديقه ووجهها مره تعبان.. فيصل بخوف: عمتي رهف وشمجلسك هنا؟؟ اشفيك تعبانه؟؟ رهف: لاموتعبانه بس فيصل معليش تصلي العشاء بالبيت ولاتطلع.. لأني أبيك الحين بموضوع.. فيصل باستغراب: تبيني أنا؟؟ رهف وهي ماسكه دموعها: فيصل عارفة إنك مستغرب.. بس أنا استغليت عدم وجود أبوك وعمك تركي بالبيت عشان كذا ممكن تجي معي الديوانية أبي أكلمك .. فيصل: تفضلي ياعمه.. ,,دخلت رهف الديوانية وجلست بالزاوية وحطت سيرين بحضنها.. رهف كانت قاصدة تاخذ معها سيرين عشان لما تجلس مع فيصل مايكون فيه خلوه.. فيصل: ها ياعمه آمري؟؟ رهف وهي تبلع ريقها: فيصل أنا بورطة وماحد يقدر يساعدني غيرك.. فيصل:... [مايعلق وموفاهم أي شي] رهف:فيصل الحادث اللي سار لعمك مشاري أنا سببه.. ,,, وتنهار رهف وتبكي.. فيصل وهو متفاجئ: إنتي سببه إشلون.. ,, رفعت راسها رهف بألم وناظرت بفيصل وتوكلت على الله وقالت كل اللي سار بينها وبين مشاري.. بسبب الموقف اللي بالدرج... ,, هز راسه فيصل بقهر وقال: مجنــــون.. رهف: فيصل الله يخليك لاتشيل عليه.. ترى قلبه طيب.. فيصل بعصبيه: إلا تفكيره وصخ وحقير... يشك فيك بالطريقه البشعه هذي.. لاوبعد..يتهمني معك.. أنا أنا ولد أخوه اللي تربيت على يده.. مالت عليه الموسوس التعبان.. رهف: فيصل ارجوك أنا ماقلتلك هالكلام عشان أسوي مشاكل بينك وبينه.. أنا أبيك إذا صحى وقام بالسلامه.. تمسكه وتفهمه.. هو لوظلمني لحالي بآكل تبن واسكت.. لكن المره هذي اتهمك معي.. وهالشي حرام.. ,,, تنهد فيصل بقهر وشبك أصابعه ونزل راسه تحت وهو يحس نفسه مكتوم وموقادر يتنفس ومومصدق إن عمه يفكر فيه هالتفكير... لما شافت رهف حالة فيصل ونفسيته اشلون صارت ندمت وقالت: ياليتني ماقلتلك.. فيصل: إلا ياليتك قايله لجدتي ولأبوي عشان يأدبونه ويوقفونه عن حده.. رهف برجاء:فيصل أنا مابي أحد يأدب أحد ولاأبي مشاكل أمانه يافيصل بذمتك لاحد يدري ولاتقول لأحد عن أي شي.. الموقف اللي سار سوء تفاهم بسيط بس مشاري الله يهديه ماعطاني فرصه أدافع عن نفسي عشان كذا أنا لجأت لك.. فيصل وعيونه ينط منها الشرار: يتهمك بعرضك وشرفك.. وتقولين سوء تفاهم بسيط.. [تنهد بألم وغمض عيونه وهو يحاول يمسك نفسه] مومشكله يمكن معك حق.. شكل عمي ماشاف الموقف كله عشان كذا تسرع بحكمه عليك وعلي.. لكن إنشالله لما يقوم بالسلامه بهديه وافهمه كل شي وأخليه يعرف غلطه.. رهف وهي تقوم:خلاص يافيصل أنابدخل الحين... آسفه إني عذبتك معي.. فيصل: ولو ياعمه اعتبريني مثل صالح.. انتي ريحي قلبك وإهدي.. وانشالله الموضوع بينحل ولاتشيلين هم أبدآ.. ,,,بعد ماتطمنت رهف وحست براحة كبيرة من كلام فيصل دخلت داخل مع سيرين.. وتركت فيصل بالديوانية مقهور ويضرب كف بكف ومو مصدق اللي سمعه.. فيصل: وأنا أقول كل ماقلت كلمه عن رهف.. نافخ فيني وهزأني.. أثاريه موسوس.. لكن للأسف يامشاري انت أكبر صدمه بحياتي.. وخساره فيك هالرهف.. والله إنك ماتستاهلها.. الود ودي أقول لجدتي وأبوي عن تفكيرك الوصخ... لكن المره أمنتني وأنا موبزر زيك يامشاري أنا رجال وبخلي السالفة بيني وبينك وبعرف اشلون اتفاهم معاك.. ولاقمت بالسلامه لك مني أوضحلك الموقف اللي سار وبس.. ماتستاهل أكثر من كذا... *** **** ***** (في بيت أبوصالح..) بغرفة أبرار.. ,,الساعه 2 الليل.. بعد مئات المحاولات.. ناصر: نعـــــم.. أبرار وهي مومصدقه نفسها: نــــاصر.. أخيرآ رديت.. ناصر: إنا لله.. الحين انتي اشتبين ناشبتلي من أول اليوم تدقين.. أحرجتيني قدام أهلي.. كل شوي أطلع الجوال واحطه عالصامت وارجعه.. أبرار وهي منكسر خاطرها: معليش ناصر آسفه.. ناصر:نعم.. هذا أنا رديت..وشتبين. أبرار:ناصر أنا انخطبت.. ناصر:لااااا... مبرووووك.. ومنهو تعيس الحظ.. أبرار: ناصر.. وش اللي مبروك.. أقولك انخطبت وأمي مصره إني أتزوج هالشخص اللي خطبني.. ناصر: طيب.. قلنالك مبروك.. أبرارودموعها على خدودها:ناصر.. إنت تعرف إني إذا تزوجت أبنفظح.. ناصر:لااااا... مسكينه ماتستاهلين.. طيب والمطلوب وشتبين أزين لك.. أبرار: ناصر الله يخليك ساعدني.. أنا إذا تزوجت ابنفظح.. الله يخليك ياناصر..لازم تتزوجني.. ناصر: ههههههههههه لازم إيش!!!.. ماسمعتك زين عيدي... أبرار: ناصر إنت تدري إنك السبب بالشي اللي سار.. ليه مومصدق إنك الوحيد بحياتي.. ناصر تكفى ياناصر إنقذني وتزوجني.. ناصر: آسف.. أنا ماخذ وحده زيك... أبرار: ترضى إختك ياناصر يسير فيها كذا؟؟ ناصر:الله يكرم اختي.. أبرار وهي تصارخ:ناصر أنا أبــــــــــرار.. ناصر: والتراااااااب.. ولك وجه تنافخين وترفعين صوتك.. اسمعي ياحلوة أنا بعطيك من الآخر.. تعرفين هالرقم(×××××××050)؟؟؟ ,,شهقت أبراروهي تبكي... ناصر: أيوااا.. هذا رقم أبوك... اسمعي الكلام اللي بقولك إياه زين... قسمآ بالله ياأبرار أي إزعاج... أومكالمات أومسجات.. أوحتى تفكرين تدقين دقه وتقفلين.. لأدق على أبوك وأقوله كل شي عن بنته المتعلمه المحترمه اللي من الكليه للبيت ومن البيت للكليه.. وهو بيعرف يتصرف معاك.. أبرار وهي منهاره: ناصر حرام عليك.. ناصر: أقول انقلعي يللااه.. ,,, ويسكر ناصر الخط ويترك أبرار بحاله يرثى لها.. *** **** ***** (في بيت أم عبدالرحمن..) لطيفة: هايارهف وشرايك ؟؟ رهف: الله يعطيك العافية ياعمه ماقصرتي.. لطيفة:انشالله لاقام بالسلامه وطلع... تعجبه.. إيمان:والله ياعمه حركتك ذكية.. انشالله يقوم بالسلامه وينورها.. لطيفة: والله يا إيمان إني لما أروح أزوره.. أحس قلبي بيوقف.. واعليه.. مكسر من راسه لين رجوله.. بالله وشلون يقدر يطلع لغرفته.. شلت أثاث مجلس الرجال الثاني ورتبته وحطيتله غرفة نوم جديده .. عشان إذا رجع ينام فيها ويزورونه الناس فيها بدل مايتعذب بالقومه والقعده.. ,, شوي ولا يمر فيصل من قدامهم وهو لابس تيشيرت وبنطلون مايلبسهم إلا بالبيت.. ويبي يطلع غرفته فوق.. لطيفة بنبرة صوت عاليه: فيــــصل.. فيصل يلتفت: نعم؟؟ لطيفة: الحين أنا ملاحظه إن لك يومين مارحت لعمك المستشفى وقاعدلي بالبيت.. فيصل: طب وشفيها إذا مارحت؟؟ لطيفة: وش اللي وشفيها هذا عمك لاجوا الناس يزورونه ومالقوك شيقولون.. والأهم من هذا لاقام عمك ولقى الكل حوله إلا حظرتك.. شيقول عمك؟؟ فيصل بعدم اهتمام: الغايب عذره معه [ويكمل طريقه لفوق] ,, نزلت رهف راسها وقلبها يعورها وحاسه إنها هي السبب بحقد فيصل على عمه.. لطيفة: وشفي ولدك فيصل .. تعبان؟؟ منى: والله ياعمه مادري اشفيه.. كل ماقلتله روح لعمك يقول مشغول ولاتعبان... ,,,,,, شوي ولاجوال لطيفة يدق... لطيفة: ألو.. عبدالرحمن: هلا يمه.. لطيفة: هلا أبوي... عبدالرحمن: يمه خذي في واحد يبي يكلمك.. لطيفة وهي مستغربه: واحد.. الشخص بصوت مبحوح: ألـــــو... لطيفة: هلا... مين؟؟ الشخص: يمه... أنا مشاري.. لطيفة وهي مي مصدقة: مشاري... مشاري ياولدي.. إنت قمت يمه.. حمد الله على سلامتك يابوي... حمد الله على سلامتك.. ,,منى وإيمان ابتسموا وأسماء قعدت تطامر من الفرحه.. ورهف بس سمعت اسم مشاري طاحت دموعها غصبن عنها.. وهي ماتدري دموع فرح.. ولادموع خوف من المستقبل اللي منتظرها.. لطيفة: ياولدي.. كيفك الحين؟؟ مشاري وهوغصب يتكلم : بخير يمه الحمدالله لاتقلقين.. لطيفة: بشرني ياولدي تقدر تحرك إيدينك ورجولك.. مشاري: لايمه لاتخافين..أقدر أحرك كل شي بجسمي لاتخافين.. لطيفة: مشتهي شي تبيني أسويلكياه ياولدي.. مشاري: الله يهديك.. يمه... لاتعبين نفسك مابي شي.. لطيفة: خلاص ياولدي.. انشالله بزورك يا اليوم يابكرة أنا وحرمتك رهف.. ,, حس مشاري بنغزات بقلبه لمجرد إنه سمع إسم رهف... وتلفت حوله ومن حسن حظه تركي خذ جواله وطلع يكلم برا وعبدالرحمن راح عند مكتب الدكتور.. مشاري: رهف وينهي؟؟ لطيفة: هنا يابوي جنبي.. مشاري: عطينياها يمه.. لطيفة وهي تلتفت لرهف وعيونها مليانه دموع: خذي يارهف مشاري يبيك.. ,, تنحت رهف ولا إراديآ ابتسمت وقلبها من جوا طاير من الفرح إن مشاري طلبها ويبي يكلمها.. رهف بلهفه: ألـــو.. ألـــــو... مشاري؟؟؟ ألــــو... ,, سكت مشاري وغمض عيونه بقوه وهو منصت لهالصوت.. الصوت اللي من زمان ماسمعه.. الصوت اللي لما كان مشاري يسمعه في أشد حالات الغضب يهدى ويرتاح.. رهف بخوف: مشـــاري.. مشاري: رهف.. رهف وعيونها مليانه دموع: ها حبيبي.. مشاري بعصبية: لاشوف وجهك سمعتي.. ,, انصدمت رهف ونزلت دموعها غصبن عنها على خدودها وهي مي مستوعبه اللي سمعته.. ,, وثواني ولاسكر مشاري الخط بوجه رهف.. لطيفة:رهف وشفيه؟؟ رهف وهي تبلع ريقها:هااه... الظاهر مافي شبكة ولاشحن الجوال خلص.. ,, وتحاول رهف تسيطر على نفسها وتمسك دموعها ... وتساير لطيفة وحمواتها وأسماء بفرحتهم بقومة مشاري بالسلامه.. ,, قامت أسماء من الجلسه وتوجهت لغرفة فيصل فوق.. ,,, باب غرفة فيصل يدق... فيصل واللاب توب بحضنه: مين؟؟ أسماء وهي تفتح الباب: أنا أسماء.. فيصل: ماشالله ليه تدخلين وأنا ماسمحت لك.. أسماء: فيصل الحق عمي مشاري قام من الإغماءه اللي هوفيها.. تو كلم جدتي.. فيصل بعدم اهتمام: وخير ياطير.. أسماء: وش اللي خير ياطير.. أقولك عمي مشاري استرد وعيه وقام.. فيصل وهو يطقطق عالكي بورد: مبروك.. أسماء: فيصل.. اشفيك؟؟ هذا عمي مشاري.. اللي يوم دريت بالحادث اللي سارله بغيت تموت.. اشهالبرود اللي إنت فيه؟؟ فيصل: يلعن أووووم الإزعااج .. ممكن تطلعين وتصكين الباب وراك.. ,,تنحت أسماء وهي مي مصدقة اللي تشوفه بعيونها ومومستوعبة ردة فعل فيصل.. طالعت أسماء بفيصل من فوق لتحت وقالت: أوكي يافيصل خلك على هالنت..بس ياويلك من جدتي لطيفة.. ,, وجت تبي تطلع والا لقت أمها منى بوجهها داخله الغرفة... أسماء: أشوا إنك جيتي يمه .. تعالي شوفي ولدك.. منى باستغراب: فيصل للحين قاعد مالبست؟؟ فيصل: إنا لله.. وليــــــه ألبس؟؟ منى: وش اللي ليه تلبس.. فيصل عمك مشاري قام.. روح سلم عليه.. فيصل: آسف... مشغول.. منى: موب على كيفك .. أبوك دق عليك لقى جوالاتك الثنين مقفله.. ورجع دق علي وقال خلي فيصل يجي.. فيصل: تعبان.. وحامت كبدي من جلسة المستشفيات.. منى:فيصل.. خلك رجال وقوم.. وترى أبوك طلب أغراض لعمك مشاري.. وهذي هي رهف زهبتهم بشنطة.. روح ودهم.. فيصل بعصبية: وليه اللف والدوران... قوليها من أول.. انتي وزوجك ماتبوني أزوره.. تبوني أوديله أغراضه وخلاقينه.. طبعآ ساير سواق العايلة أنا... منى: فيصل وشفيك لما تزور عمك وتوصله أغراض تسير سواق؟؟ فيصل: مافيني شي.. وروحه لمستشفيات.. آسف.. عندكم بدل السواق إثنين.. واحد منهم يروح ويودي لدلوع العايله أغراضه.. أنا ماني سواق.. ,,, ويقفل فيصل لاب توبه وياخذ مفاتيحه وجواله ويطلع برا... وترك أمه وأخته في حالة إستغراب وهم موفاهمين شي.. ,,بغرفة مشاري الجديدة.. كانت رهف تفرش مفرش السرير... وترتب المخدات وموقادرة تشوف شي من دموعها وترتجف من الخوف.. آخر شي جلست عالسرير وهي موقادرة تشيل شكل مشاري من بالها أول مايدخل البيت وهو يطردها ويهزئها قدام أهله.. رهف: الله يستر... الله يهديك يافيصل.. الله يهديك ليه مو راضي تروح.. المفروض إنك أول ماسمعت إن مشاري استرد وعيه.. تروح عشان تفهمه ... أنا إشذنبي عايشة بضياع.. وحاسه بقلبي نار.. بس ماينلام.. فيصل ماله ذنب .. وأنا بعد مالي ذنب... يارب ... يارب ..رجيتك.. يارب مشاري يتفهم الموقف ويعرف إنه غلطان يارب... | ||||||||
| |
|
02-04-2011, 03:24 AM
| #48 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في مستشفى المملكة...) ,,,بعد ماعاين الدكتور مشاري.. الدكتور:ماشالله.. لا لا يامشاري.. كل مال حالتك تتحسن أكثر من اول.. ماشالله الدم والسوائل اللي برئتك كل مال كميتها تتضائل بشكل مفرح ويطمن.. وانشالله بكره بنشيل هالأنبوب اللي بصدرك.. وبالنسبه لرقبتك.. فلا تخاف هي سليمة.. بس ضروري تخلي الجبيرة عليها فترة بسيطه عشان سلامة عمودك الفقري.. مشاري بصعوبه يتكلم: بس دكتور موقادر أتنفس.. الدكتور: لاتنسى إن رئتك تأذت وكانت مليانه سوائل.. وزيادة على كذا خشمك مكسور.. بس لاتخاف كلها أسابيع بسيطة وينجبر كسر الخشم عندك وترجع تتنفس زين.. عبدالرحمن: واللون الأزرق اللي تحت عيونه؟؟ الدكتور: لاتخافون هالأشياء طبيعي إنها تظهر.. بسبب قوة الحادث.. وبالنسبه لموعد خروجك يامشاري من المستشفى... بنستنى نتائج التحاليل والإشعات وعلى طول انشالله نكتب لك خروج.. ,,, طلع الدكتور وترك عبدالرحمن وتركي مع مشاري.. جلس عبدالرحمن بكل عصبية عالكرسي وجواله بيده.. أجرى مكالمة.. وجلس يستنى أحد يرد عليه.. لكن ماحد رد.. ,,قفل لوحة المفاتيح لجواله وقال: الظاهر مايمشي مع هالولد إلا التهزيئ والعين الحمراء.. تركي:منهــو؟؟ عبدالرحمن: فيصل.. الحيوان لي يومين كل ما أدخل البيت وأسأل عنه يانايم يا يتحمم يابرا مع أصحابه.. ,,بس سمع مشاري اسم فيصل عقد حواجبه.. وتنهد.. تركي:ياعبدالرحمن إعذر الولد.. الحين وقت امتحانات وحوسه .. تلقاه ضايق صدره وشايل هم هالإمتحانات.. عبدالرحمن: الله وأكبر... معقول موب لاقي ربع ساعة يجي يسلم على عمه.. لكن برجع البيت ودواه عندي.. يقاطعه مشاري وهو يتكلم بتعب: لاياعبدالرحمن.. خل فيصل على راحته.. الحين وقت امتحانات وضغط نفسي وعصبي.. لاتشد عليه.. أكيد متى مالقى وقت بيجي.. ,,, ولف مشاري وجهه للجهه الثانية وهو يتنفس بصعوبة ويحس قلبه بيوقف من شدة الحزن والألم وقال بنفسه: ماينلام.. معقول يخلي ست الحسن .. ويجي يقابلني بالمستشفى.. أكيد إنهم مغتنمين فترة غيابي.. وطايحين ببعض حب وغرام.. لكن أنا منجن ومستغرب.. صدق إن ماعندها كرامة ووجهها مغسول بمرق.. كشفتها وواجهتها.. وطردتها.. وإلى الآن مرتزة وقاعدة بالبيت.. هذا أكبر دليل إنها غلطانه ووصخه.. إلا لو أنها مظلومة وبريئة.. كان ماجلست ولادقيقة عندي وراحت بيت أهلها.. بس شكل الحادث سار لصالحها.. وحسبت إني نسيت.. لكن وين أنسى؟؟ إصبري علي يارهف.. والله والله لجننك... وأذلك وأعذبك وأعاملك معاملة حيوانات تليق فيك.. إلين تولدين وأرميك وآخذ ولدي منك.. *** **** ***** (في لندن...) ,,في فندق جميرا كارلتون تاور... ,,طلعت من الحمام وهي تجر خطواتها وتتنفس بصعوبه ومشت كذا خطوة لكنها فقدت توازنها وجت تبي تطيح.. لكن معاذ لحقها عاللحظه الأخيره وشالها.. ,,حطها معاذ عالسرير وهويناظر لها بكل خوف.. معاذ:خلني أوديك المستشفى.. أسيل بعصبيه: معاذ قلتلك مافيني شي.. معاذ: أسيل حبيبتي ..لك يومين وهالغثيان موراضي يبعد عنك خليني أوديك واتطمن عليك.. أسيل بعصبية أكثر:إنا للــــــه إنت ماتفهم... أقولك مافيني شي.. معاذ: أسيل ماصارت.. طول وقتك نايمه ولاتبكين ولامعصبه.. وإذا طلعنا نتمشى برا تدوخين ونضطر إنا نرجع البيت.. أسيل إذا تحسين بشي ولافيك شي تكلمي.. لاتخليني كذا محتار وخايف عليك .. تراني أحترق من داخل عليك وعلى أسلوبك معاي وانتي موحاسه فيني.. ,, ويطلع معاذ من عند أسيل وهومعصب وزعلان... بعد ماطلع معاذ ناظرت أسيل بنفسها بالمراية وانهارت تبكي.. أسيل: ياربي إشفيني... إشفيني... أحس نفسي بموت.. مكتومة موقادرة آخذ نفس.. بموووت.. أبي أهلي.. أبي أرجع الرياض.. موقادرة أطالع بمعاذ ولاني طايقته.. ولاني طايقه أسمع صوته.. ,, وتحضن أسيل المخده وهي تبكي.. وحاسه بصداع فظيع وحاسه نفسها موقادرة تتنفس.. ومسيطر عليها ضيقة صدر.. قوية.. أول مرة تحس فيها بحياتها.. *** **** ***** (في مستشفى المملكة...) ,,,الساعة 11 الليل.. ,,كان مشاري حالته الصحية شوي تعبانه أكثر من أول بسبب آلام شديدة من الكسر اللي بفخذه.. حس إنها رح تشله.. لكن الدكتور عطاه مسكنات قوية .. ريحته شوي ونام عقب ما أخذها نومة عميقة... ,, كان عبدالرحمن جالس عالكرسي ويناظر لأخوه مشاري بكل رحمه.. وزعلان عليه بسبب الآلام اللي عذبته.. وخلته ينام مثل القتيل.. قطع تفكير عبدالرحمن صوت..... فيصــــــل.. فيصل بصوت واطي: السلام عليكم.. عبدالرحمن: عليكم السلام.. أخيرآ جيت.. فيصل: يبه تعرف هالفترة فترة امتحانات.. ولو اليوم موالخميس وبكرة ماعندي شي كان ماجيت.. عبدالرحمن:ماتستحي على وجهك عمك له أسبوع صاحي من الإغماءه اللي سارت له..وانت حضرتك مازرته ولاشفته ولاكلفت نفسك حتى تكلمه.. ,,سكت فيصل وهو حاس بقلبه نار ويقول بنفسه: لوتدري بأفكار أخوك مشاري ماقلت يبه هالحكي.. فيصل: خلاص يبه إنت روح البيت ارتاح وأنا بنام معه اليوم.. ,, حس عبدالرحمن بالفعل إنه تعبان ويحتاج إنه يرجع البيت يتحمم ويرتاح على سريره خاصة إن له يومين ورى بعض مرافق لمشاري بالمستشفى... عبدالرحمن: طب تنتبه لعمك؟؟ فيصل وهو يتنهد: ولو يبه عمي مشاري بعيوني.. عبدالرحمن: خلاص أجل أنا برجع البيت وبكره بعد صلاة الجمعه بكون هنا.. وتراه تعبان أي شي يسيرله دق علي على طول.. فيصل: إبشر يبه.. ,,, ويطلع عبدالرحمن ويترك فيصل جالس عالكرسي مقابل لمشاري.. كان فيصل مقهور ومشبك أصابعه ببعض ويطالع لمشاري بكل حقد.. دخل فيصل أصابعه بشعره وهو يحاول يهدي نفسه وشال نظره عن مشاري وقال: ما أقول إلا ... الله يقومك بالسلامة ياعمي... مهما حاولت أقسي قلبي عليك وأحقد عليك... ماقدرت.. طول الأيام اللي فاتت اللي كنت أكابر فيها ورافض إني أزورك بالي مو معي وحاس بتشتت كبير وبتأنيب ضمير ذابحني.. ,,مشى فيصل بكل هدوء ووقف عند الشباك وهوحزين ويناظر بالرايح واللي جاي.. ,,, ,,فتح عيونه مشاري وهويبلع ريقه بصعوبة شديدة وهويتمنى الموت من شدة الآلام اللي أتعبت جسمه.. انتبه لوجود فيصل اللي لسه كان واقف عند الشباك... وكشر وعقد حواجبه لكنه حس بنغزه قويه في رئته ولا إراديآ قال: آآآآه ,,التفت فيصل على عمه وانطلق عنده وقال: مشاري اشفيك؟؟ ,, كان مشاري يتلوى من شدة الألم ووجه إسود ولاإراديآ نزلت دموعه على جنبات خدوده.. ,,طار فيصل ونادى الدكاتره.. اللي جوا بسرعه وإلتموا حاولين مشاري.. الدكتور: الله يهديك يامشاري.. خوفتنا عليك.. فيصل باهتمام: دكتور وشفيه مشاري؟؟ الدكتور:لا.لا..مجرد آلام بسيطة.. مع المسكن انشالله تخف وتزول.. بس ها أنا أبيك تساعدني.. فيصل: أنا أساعدك؟؟ الدكتور: إيه أنت تساعدني.. الحين الممرضة بتجيب عشى مشاري وأبيك تحاول فيه إنه ياكل لأن أكله خفيف.. وأحيانآ ماياكل.. والحالة الصحية اللي هوفيها.. تتوجب عليه إنه ياكل.. فيصل:خلاص انشالله.. ,,طلعوا الدكاتره من الغرفة وتركوا فيصل واقف متنح وعينه مانزلت عن عمه.. كان مشاري يغمض عيونه لحظات ولحظات يلف وجهه للجهه الثانية.. لأنه كان يحس بالموت لاشاف فيصل.. ,,جابت الممرضة أكل مشاري وقربته منه..وشالت الأغطية اللي على الصحون.. وطلعت وخلتهم.. فيصل: مشاري يللاه كل عشاك.. ,,مشاري مايرد وساكت.. ,,انتبه فيصل إن يد مشاري اليمين ملفوفه ومضمومه على صدره.. قرب فيصل من مشاري وحط منديل على صدر مشاري.. وأخذ الملعقة وخذ من الشوربة وقربها من فم مشاري.. فيصل: مشاري يللاه سم بالرحمن.. ,,حس مشاري بضيق تنفس شديد.. وحس إن قلبه بيوقف.. لف وجهه للجهه الثانية وقال بصوت مبحوح: مو مشتهي شي.. فيصل: مشاري..تراك نحفان والوضع اللي إنت فيه يحتاج تاكل وتهتم بأكلك.. مايسير كذا تقعد صايم على هالأدوية والأبر.. مشاري بعصبية: إنـــــا لله إنت ماتفهم.. قلتلك مو مشتهي.. ,, لف فيصل فمه وطالع بمشاري بقهر ورجع الملعقة بالصينية وشالها من قدام مشاري وشال المنديل اللي على صدره وقال: يحقلك ماتطالع فيني.. ويحقلك إنك تتقرف تاكل من يد واحد زيي.. ,,ناظر مشاري بفيصل بإشمئزاز وهوموفاهم إشقصده.. فيصل: إشلون تاكل من يد واحد خاين؟؟ ,,مشاري ساكت ويطالع بفيصل وهو مستغرب.. فيصل: لو أقولك ياعمي شي تصدقني.. والله.. والله إني تمنيت الموت... ولا إنك تظن فيني هالظن.. مشاري.. رهف بعد الحادث اللي سارلك .. شافتني بالديوانية وقالتلي اللي سار بالتفصيل؟؟ مشاري وهويحس نفسه مخنوق: أكيد بتقولك.. فيصل بعصبية: مشـــاري.. استح على وجهك... أنا ماطالعت ببنات الناس اللي بالأسواق والمستشفيات وبنات الجامعه اللي كل وحده تترزز عندي وبتموت وأطالعها... إلين أطالع بحرمتك.. عرضي.. شعر وجهي.. مشاري إنت شفت رهف بين إيديني وبس.. لكن ماشفت الموقف كله.. مشاري يقاطعه: ماشفت ولايهمني أشوف شي.. فيصل: لا يهمـــــك.. مشاري أنا نسيت مفتاح السيارة فوق وقالي عمي عبدالإله افتح سيارتك عشان نحط الشنط لما دورت المفتاح ومالقيته.. طلعت فوق خذت مفتاحي ونزلت وأنا أركض.. وما انتبهت إلا زوجتك قدامي توها راقية تبي تناديك.. ولا إراديآ ضربتها ودفيتها وبغت تطيح لكني لحقت عليها ومسكتها قبل لاتطيح على ظهرها.. قسمآ بالله يامشاري هذا اللي سار.. مشاري والعبرة خانقته: قلتلك مايهمني... فيصل: إذا أنت مايهمك.. أنا يهمني إني أقولك.. أنا مومستعد أعيش طول عمري وحضرتك متهمني بالخيانة والحقارة.. وإذا إنت زعلان إن زوجتك جت وقالتلي... هذا لأنها مارظت بالظلم.. لالنفسها ولا لي.. وحست بالعجز.. والضياع مو عارفة شتسوي ولاتبي تقول لجدتي ولا أبوي.. عشان المشكلة لاتكبر.. لجأت لي لأني أنا الوحيد اللي مسؤول عن الشي اللي صار.. ومشاري إنت تعرف إن اتهامك لها قذف وسب في الشرف.. ولو وحده ثانية غير بنت الناس اللي إنت متزوجها.. كان راحت قالت لأبوها ولأخوها وكبرت السالفة.. لكنها شافت من الأفضل إن الموضوع ينحل ودي.. ,,,قام فيصل من الكرسي اللي هو جالس عليه وجلس على سرير مشاري جنبه ومسك وجه مشاري ولفه عليه وطالع بعيونه وقال: مشاري.. الله يصيبني بحادث أشد من الحادث اللي صارلك.. واتكسر وأتقطع مية قطعه وقطعه.. إن كان في شي بيني وبين رهف.. أو إن الشي اللي سار بالدرج عن قصد.. مشاري وهو ندمان ويبكي: فيصل لاتدعي على نفسك.. فيصل وهو يبكي بعد ماشاف دموع عمه: الله يهديك ياعمي .. شفت العصبية والإستعجال وين وصلوك.. عاجبتك نومتك عالسرير.. عاجبك امتحانات الفاينال بتفوتك .. عاجبك النفسية والوساوس اللي إنت فيها.. طول الأيام اللي فاتت وأنا أحاول أقسي قلبي عليك وأقول واحد اتهمك هالإتهام مايستاهل تزوره.. لكني ماقدرت.. كل ماتذكرت إنك قمت واسترديت وعيك وأنا ماشفتك وتطمنت عليك أحس قلبي بيوقف.. مشاري: فيصل.. سامحني يافيصل.. ظلمت نفسي وظلمتك معاي.. وظلمت بنت الناس.. فيصل وهو يمسح دموع مشاري: خلاص يامشاري ماصار إلا الخير.. سوء تفاهم وانحل.. بس بغيت أقولك قراري وأبي إذا قلت لأبوي هالقرار توقف معي وتساندني.. مشاري: أي قرار؟؟ فيصل: شفت لي شقه بعمارة حلوة كلها عزاب... بعد كذا يوم بشيل أغراضي وقشي وأروح أسكن فيها.. وأكيد أبوي إذا عرف بيعارض وأبيك توقف معي وتقنعه.. مشاري وهو مصدوم: تبي تسكن في شقه ليه؟؟ فيصل وهويحاول يخبي: من غير ليه .. أنا كبرت .. وسرت ماخذ راحتي بالبيت وشفت من الأحسن أسكن لحالي.. مشاري: إلا أنا اللي بعارض وأوقف بوجهك مو أبوك.. فيصل اللي سار خلاص انتهى أنا الغلطان مو إنت.. ليه تخلي بيتك وتروح تسكن بشقق تبيني أموت من تعذيب الضمير.. فيصل: ياعمي هالسالفه مالها دخل..بس خلاص أنا أشوف من الأحسن إني أسكن لحالي.. مشاري: فيصل لاتكذب .. سكن لحالك مافيه.. إذا أنت طلعت من البيت أنا بطلع وراك.. مستحيل أرتاح وانت مو بالبيت.. ,,تنهد فيصل وهو يطالع بعمه بنظرات رحمه وسماح وعتب وحب.. ولاإراديآ حط راسه على بطن مشاري ولمه برقه وهو يبكي.. مشاري وهويحط يده اليسار على راس فيصل:خلاص فيصل قل لااله الا الله.. فيصل: ليته فيني ياعمي ولافيك.. مشاري:فيصل خلاص قل لااله الا الله .. هاللي سار قضاء وقدر.. والحمدالله هذا أنا سليم وكلها أيام بسيطة وارجع البيت .. ,,قام فيصل ومسح دموعه وقال: خلاص.. أنا بروح أجيبلنا عشى زي الناس.. بدل أكل هالمستشفى اللي يزيد مرضك مرض.. تبي شي ثاني أجيبلك معاي؟؟ مشاري: لاسلامتك ... انتبه لنفسك.. إلا صح علمتوا أسيل بالحادث اللي صارلي؟؟ فيصل: لاياعمي.. أبوي وجدتي قالوا ماله داعي نضيق صدرها لأنه تعرفها صياحه وبكايه ولوتدري بتحوس رجلها مسيكين وتجيبه.. مشاري: وأنا أقول أحسن بعد.. فيصل: أجل خلاص أخليك الحين.. ,,,طلع فيصل وترك مشاري بحالة نفسية سيئة.. مشاري: يا الله متى بكبر.. متى بسير رجال قد المسؤوليه.. أنا وين عقلي يوم اتهمت فيصل هالإتهام.. بغيت أذبح نفسي .. وأخرب بيتنا وأفكك العايلة كلها وأخرب اللي بيني وبين فيصل.. ورهف.. آآآه يارهف.. ياكثر ماظلمتك.. مواقف كثيرة بينتي لي فيها إنك تسوين رجال.. اتهمتها ومديت يدي عليها... وصبرت وسترت علي وعلى غبائي.. وحتى بعد ماصارلي الحادث المكالمه الوحيده اللي كلمتني فيها تقولي (حبيبي) وأنا نفخت فيها وسكرت الخط بوجهها.. إلى متى وأنا عايش بضياع.. ومعيش هالإنسانة معي.. جننت نفسي وجننتها... أنا لازم أبدأ صفحة جديدة فحياتي.. عالأقل أرتاح واريح اللي حولي.. الحين إذا طلعت من المستشفى وشفت رهف.. ياترى إشلون لي وجه أقابلها.. وانت الصادق يامشاري موبأنت اللي بتقابلها.. هي اللي بتقابلك.. بالأحضان والإبتسامة والحب والحنان.. هذا اللي عودتني عليه رهف من يوم ماتزوجتها.. أغلط عليها وبس أقولها كلمتين.. ترضى ولا كأني سويت شي.. والظاهر إني تمردت وتعودت على الدلع.. ,,, ,,, بعد ثلث ساعة من الأفكار اللي تاخذ مشاري وتوديه.. رجع فيصل ومعاه العشاء وتعشى هو ومشاري ولا كأن شي صار بينهم.. *** **** ***** (في بيت أبوصالح..) ,,كانت منيرة تحوس بالبيت ترتب وتشيل وتحط.. استعدادآ لوصول إختها أم فراس وولدها فراس.. ""في غرفة أبرار.. أثير وهي تضرب خدودها: الله ياخذك يا أبرار... اللـــــــــه ياخذك.. ليه سويتي كذا ليـــــــــه؟؟ أبرار وهي تبكي: أثير تكفين ارحميني.. تكفين.. أثير:وإذا أنا رحمتك.. صالح وأبوي بيرحمونك.. ليه يا أبرار.. ليه فرطتي بنفسك بهالسهوله.. ليــــــــــه.. قلتلك ..قلتلك تراهم كلاب وكذابين لكن ماصدقتيني.. ماصدقتيني وهذي النتيجة.. أبرار: أثير.. تكفين قصري صوتك .. لاحد يسمعنا والله ليذبحوني.. أثير: الذبح بتشوفينه يا أبرار لاتزوجتي فراس.. أبرار وهي تضم إيدينها على صدرها بقوه: لا... لا لالا تكفين لاتجيبين سيرة فراس.. بس أسمع أسمه أحس موتي قرب.. أثير ساعديني شسوي.. أثير: أساعدك إشلون أساعدك إشلــــــووون.. هاللي صار مصيبة ماحد يقدر يساعدك فيها.. ليه مو من أول ما مسكتي نفسك ورجعتي لعقلك وبعدتي عن هالوصخ ناصر... يامانصحتك وحذرتك.. بس ماكنت أسمع منك إلا أنه ناصر غير ويحبني ويبيع نفسه ويشترينه.. هذا هو داس عليك.. وأخذ اللي يبي ورماك.. أبرار وهي منهارة من البكي وتحط إيديها على أذانيها: أثيــــــر... خلاص يا أثير اسكتي.. اسكتي... أمي ملزمه علي إلا أطلع لفراس بكرة إذا جاء.. وأخليه يشوفني.. طب وإذا شافني وأعجبته وتمت الخطبه.. أنا شسوي؟؟ أثير: يا أبرار حتى لوماتمت خطبتك على فراس وعدت هالسالفة على خير.. وإذا انخطبتي مره ثانيه.. شاللي بينقذك؟؟ أبرار: ياويلي..وين أروح شسوي بعمري.. أثير وهي تحاول تهدي أبرار: خلاص أبرار لاتبكين.. انشالله ماتتم الخطبة... ولايسير شي من اللي انتي خايفة منه خلاص إهدي.. ,, وتمت أبرار تبكي وتحسب ألف حساب للي بيسير إذا وصل فراس وأمه.. وأثير تهديها.. | ||||||||
| |
|
02-04-2011, 03:25 AM
| #49 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس (في مستشفى المملكة..) ,,,الساعة11 الصباح.. ,,وصل طارق المستشفى بعد ماخلص آخر إختبار من اختباراته.. طارق: هذا أنا جبتلك كل الأسئلة.. يعني انشالله بس تقوم بالسلامة وتتحدد مواعيد امتحاناتك .. ذاكر هالإسئلة زين والأشياء المهمة بالكتب.. وانشالله تنجح ومارح ينزل معدلك.. مشاري: وين عزام؟؟ طارق:امتحانه يبدا الساعه 12..الحين أمداه توه واصل الجامعه.. مشاري: خلص اختباراته ولالسه؟؟ طارق:بقاله مادتين.. [ويتأفف طارق] ياخي خلاص طفشتنا.. خلاص قوم مافيك إلا العافية... ,,مشاري يطالع فيه وهو مستغرب.. مشاري: ياخي اشعليك نايم على راسك.. طارق:لا بس ياخي طفشت طول الفتر اللي فاتت وأنا أذاكر لحالي.. وأنا وعزام فقدناك.. وبيني وبينك قعدة المستشفيات تزيد الواحد مرض.. مشاري: خلاص الدكتور قالي خلال هاليومين بيكتبلي خروج.. طارق: ماشالله من جابلك باقة هالورد.. تفتح النفس.. مشاري: صالح .. أخو زوجتي.. طارق: إي ماشالله.. صراحه هالولد تعب معاك تعب... عمري ماجيت عندك أنا وعزام إلا وألقاه موجود... باين عليه إنه أجودي وخلوق.. ,,سكت مشاري وقال بنفسه: أكيد صالح أجودي وخلوق.. دام عنده إخت مثل رهف.. طارق: خلاص مشاري أنا بروح الحين.. مشاري: وين تروح؟؟ إقعد معي ياخي.. طارق:مشاري الله يهديك.. تعرف هذا وقت خروج خواتي من مدارسهم.. مشاري:خلاص .. انتبه لنفسك.. ,,طلع طارق وترك مشاري طفشان وحاس بملل كبير وضيقة صدر قوية لأن الكل بدوامه ومشغول.. طلع جواله من الدرج اللي جنبه.. مشاري: أكيد الحين هي في الدوام.. خلني أدق على أمي وأشوف أخبارهم.. لطيفة: ألو.. مشاري: هلا يمه.. لطيفة:ياهلا حبيبي.. هلا أبوي.. مشاري: لايكون صحيتك؟؟ لطيفة: لاياولدي صاحية من زمان.. شخبارك؟؟ مشاري: الحمدالله.. انتم شخباركم؟؟ لطيفة: والله ياولدي إنا نستنى رجعتك للبيت على أحر من الجمر.. مشاري:خلال اليومين هذي يمه أنا عندكم انشالله.. [سكت مشاري شوي بعدين قال] يمــــــه.. لطيفة:نعم..يا أبوي. مشاري: رهف وينهي.. لطيفة: هنا ياولدي جنبي.. [ومن غير ماتسمع رد مشاري] رهف خذي مشاري يبيك وأنا بروح أتوضى عشان أصلي الظهر.. ,, وقامت لطيفة من الغرفة وتركت رهف جالسه لحالها ماسكة الجوال ومحتاره وخايفة.. ,,سكتت رهف وبلعت ريقها وقالت بنفسها الله يستر.. رهف بخوف: ألــو.. ,,مشاري بنفسه: الله يصلحك يايمه.. مافي تفاهم على طول عطتها الجوال.. رهف: ألو.. مشاري: السلام عليكم.. رهف: عليكم السلام.. .. الطرفين ساكتين.. رهف تحاكي عمرها: الله يستر.. لايكون بيقولي أنا بطلع قريب .. لمي أغراضك وارجعي بيت أهلك.. ,,يقطع تفكيرها صوت مشاري.. مشاري: كيفك يارهف.. ,,استغربت رهف وقالت بنفسها: مشــــاري يسأل عني؟؟ بلعت ريقها وقالت: حمدالله.. إنت كيفك؟؟انشالله أحسن؟؟ مشاري: ليه.. أهمك.. ,, سكتت رهف وماعرفت شتقول.. مشاري: لو أهمك كان تجين وتتطمنين بنفسك.. أو عالأقل تدقين وتسألين.. رهف والعبرة خانقتها:مشاري لاتظلمني.. يا كثر مافكرت إني أكلمك وأزورك بس .. يقاطعها مشاري: بس مالك نفس تشوفين وجهي.. صح.. رهف:بالعكس.. بموت وأشوفك.. بس إنت ماكلمتني ولاطلبتني.. وخفت إني أجيك وتهاوش وتعصب.. ,,بعد صمت لحظات.. مشاري: ظلمتك يارهف.. والله انتقم مني.. هاللي أنا فيه حوبتك.. رهف:مشاري لاتقول هالحكي.. مابين الزوجين انتقام.. مشاري:بعد كل اللي سويته فيك تسميني زوج.. رهف: أكيد زوجي.. وحبيبي وأبو ولدي اللي جاي بالطريق.. مشاري: والله يارهف ما أدري إشلون فكرت بهالطريقة.. بغيت أذبح نفسي.. وبغيت أضيعك وأضيع ولدنا وفيصل.. رهف: بسم الله عليك من الموت... مشاري بألم: رهف نفسي أفهم شي واحد.. رهف: وشو؟؟ مشاري: ولا أقول خليه إذا رجعت البيت .. بقولكياه ونتفاهم على كل شي.. ,,بعد لحظات صمت.. مشاري: وينك؟؟ رهف: معاك.. بس ماتتخيل قد ايش أنا مبسوطه إنك كلمتني.. مشاري وهويتنهد: الدكتور جاني وبقفل الحين تبين شي؟؟ رهف: أبيك ترجع بيتك وانت سالم.. مشاري: سلمي عالأهل.. مع السلامه.. ,, قفلت رهف من مشاري وهي مبسوطه والدنيا موسايعتها وبتطير من الفرح.. رهف: الحمدالله إن الموضوع انحل ومشاري عرف غلطه.. أنا كنت حاسه إنها غيمة صيف وبتعدي.. والله إني حاسه.. يا الله يا مشاري متى تطلع وترجع بيتك والله لشيلك من عالأرض شيل... الله يخليك لي ولضناك.. *** **** ***** ( في لندن...) ,, في فندق جميرا كارلتون تاور.. معاذ وهو يرتجف : أسيــــــل افتحي البااااب.. ,,أسيل ماترد وتبكي بصوت عالي وبشكل غريب.. معاذ: يا أسيل الدنيا ليل وانتي مقفله على عمرك الحمام وتبكين .. سمي بالرحمن وافتحي الباب.. أسيل: إنت ماتفهم.. ماتفهم.. مابيك مابي أشوفك.. طلقنـــــــي.. معاذ: يا بنت الناس أنا أبي أفهم إنتي اشفيك وشسويتلك.. فجأة قلبتي علي ومنتي طايقه تطالعين بوجهي.. وشفيك.. أسيل: يا اللــــه .. مارح أفتح الباب .. مابي أشوفك أبي أهلي.. رجعني الرياض.. معاذ: أسيل وعد.. وعد.. إذا فتحتي الباب وشفتك وتطمنت عليك.. بروح أزين حجز ونرجع الرياض.. بس انتي اطلعي.. تعوذي من ابليس.. ,,, بعد صمت دقايق.. فتحت أسيل باب الحمام وهي ترتجف وخايفة.. أول مافتحت جى معاذ يبي يلمها بإيدينه لكنها ارتجفت وكشت وبعدت عنه وقالت: يا اللــــه... قلتلك لا تمسكني.. ,, ومشت أسيل وهي دايخه وتجر خطوتها وترتجف ورمت نفسها عالسرير.. وهي تتنفس بصعوبة.. ,,كان معاذ يحس قلبه بيوقف من الخوف والألم على حال أسيل.. معاذ بنفسه: ياربي اشفي هالبنت.. ماكانت كذا أول الزواج.. كانت تهبل ونفسيتها مرتاحه.. وش اللي قلب حالها.. ما أقرب منها إلا تصيح وتبكي.. وبس تشوفني ينقلب وجهها ويتعكر مزاجها.. مع إني ما أعاملها إلا بمايرضي الله بكل رقه وحب.. حتى أكل ماتاكل بالأيام وبس دايخه وذابحها الغثيان.. وطول الوقت سيرة الطلاق على لسانها.. ,,لا إراديآ جلس عالسرير وقرب منها وحط يده على راسه وقام يمسح على شعرها.. معاذ: أسيل حبيبتي وشفيك وش اللي قلب حالك.. أنا أذيتك بشي .. زعلتك بشي؟؟ ,, أسيل ماترد وتبكي.. معاذ: أسيل إذا إنتي فاقده أهلك أو حاسه إنك تسرعتي بالزواج.. فلا تزعلين هذا شعور طبيعي.. كل العرايس يحسون فيه... بس بعدين يروح هالإحساس ويرتاحون مع أزواجهم.. وبعدين انشالله كم يوم ونروح عند أهلك خلاص جلسنا بلندن بمافيه الكفاية.. وبعد رجعتنا للرياض بنروح لأسبانيا عشان دوامي بيبدأ وتكملين دراستك هناك.. وتتعرفين على زوجات أصحابي.. كلهم سعوديات وخليجيات بتتأقلمين هناك.. أسيل وهي تبكي: معاذ تكفى خلني لحالي.. لاتمسكني.. أنا أبي أروح عند أهلي وبــــــس... معاذ: وإذا رجعنا عند أهلك توعديني ترجعين زي أول وتبعدين هالإكتئاب والزعل منك.. ولاتجيبين سيرة الطلاق مرة ثانية؟؟ ,,أسيل ماترد وتبكي.. ,,دنق معاذ وباس أسيل على راسها ولما حست فيه دفته وتنهدت بقهر... وقام من جنبها وهو ينظرلها بكل ألم وحيره.. وراح يزين الحجز عشان يرجعون للرياض.. *** **** ***** (في بيت أم عبدالرحمن..) ,,بغرفة رهف.. أسماء وهي جالسه على طرف سرير رهف.. أسماء: الله.. الله على هالشياكه.. كل هذا لعمي مشاري.. رهف: بالعكس والله أحس وجهي يجيب الهم... أسماء:هو صحيح إنتي نحفانه ووجهك تعبان.. بس أنا أعرف مشاري لاشاف عيونك بيروح فيها.. رهف وهي تبتسم: إي مره.. أسماء: هو صحيح إن تحت عيونك أسود وعيونك ذبلانه.. بس لاسمع صوتك هم بعد بيروح فيها.. رهف وهي تطالع بأسماء بقهر: أسماء حرام عليك .. ترى والله ماخليه يشوفني إذا كذا شكلي يخرع.. أسماء وهي تبتسم: طب أنا عندي حل.. البسي نقابك واطلعي عليه بالنقاب.. رهف: لا والله.... خير وضحى بنت عجلان.. أسماء: ههههههه.. والله أمزح عليك.. بس تبين الصراحه مره نحفتي يارهف ووجهك ذبلان.. واللي يشوفك مايقول حامل.. صحيح بطنك كبير بس جسمك ماتغير مثل باقي الحوامل.. رهف: شسوي يا أسماء.. الظروف اللي سارت هالأيام ماتخلي للواحد نفس إنه يشرب حتى مويه.. موكفايه اللي سار بمشاري مسكين.. مايندرى متى يرجع يمشي.. حتى لما يكلم بالتليفون صوته مقطوع وياللله يالله يتنفس.. وهم بعد مسكين امتحاناته تأجلت إلما يقوم.. أسماء: رهف لايضيق صدرك ترى كذا نظام الجامعه.. دامه منتظم وماعنده حرمان بولا ماده .. حتى لوفاتته امتحانات الفاينال.. في المستوى اللي بعده يقدر يمتحنها متى مايقوم بالسلامه.. رهف وهي تبتسم: بس أحلى مافي اليوم إنه بيرجع بيته.. أسماء: أقول رهوف.. مره غرفة مشاري الجديده اللي تحت تجنن... وتهبل وجوها جنان.. ممكن أنام معكم.. رهف وهي تضحك: الحين مشاري بينام على سريره وأنا بنام عالكنبه قباله عشان ما أضايقه انتي وين بتنامين؟؟ أسماء:يا بنت الحلال الوسع بالقلب مو بالأماكن.. هههههههه رهف: ههههههههههه *** **** ***** (في بيت أبوصالح..) ,,بمجلس الرجال.. كانت أبرار عيونها مليانه دموع ومصدومه وترتجف من الخوف وكسرت أصابعها من كثر ماتفرك فيهم.. فراس:أبرار انتي بأي كلية تدرسين.. ,,أبرار منزله راسها وتتنفس بسرعه وترتجف وقلبها يدق بسرعه.. صالح: أبرار اشفيك تكلمي.. منيرة: معليش يا فراس ياولدي تراها تستحي.. ,,حس صالح بخوف أخته وتوترها الزايد.. صالح: خلاص أبرار ادخلي داخل.. ,,قامت أبرار وهي ترتجف وتبلع ريقها.. ودخلت داخل وطلعت غرفتها وهي تصيح.. منيرة: معليش يافراس تراها حيوية مره.. عشان كذا ماقدرت تحكي.. بس لاتخاف بيتغير الوضع لاتعودتوا على بعض..بنتي وأعرفها هذرتها واجده.. ,, ابتسم فراس وانبسط مره من خجل أبرار اللي للأسف فراس ماكان يعرف سببه الأصلي.. وعجبه بشده ملامح أبرار وجمالها وطولها وشعرها.. اللي ماقدرت تحافظ عليه.. فراس: على خيرة الله.. الله يقدرني إني أسعدها وأعيشها أحسن عيشه.. منيرة وهي طايرة من الفرح:الله يوفقكم وصدقني يافراس مثل ماهي بنتي إنت بعد ولدي.. وتراني من زمان وانا أعدك بغلاوة صالح.. صالح بنفسه: إي مره.. والله ماجبتي خبره.. الله يهديك يايمه.. وإذا البنت عادت كذا سنه في الكليه ومي ماشيه بدراستها تروحين تزوجينها.. الله يتمم هالزواج على خير.. ,,, ,,, (بغرفة أبرار..) كانت أبرار جالسه عالسرير ولامه رجولها على صدرها وفاتحه عيونها عالآخر ومصدومه.. شوي ولادخلت أثير وهي تركض وعيونها مليانه دموع.. أثير: أبرار.. أبراااار.. أبرار وهي مفزوعه: وشفيـــــــه.. أثير وهي تبكي: الحقي يا أبرار.. أبوي وأمي حددوا زواجك بعد شهرين.. أبرار بصدمه: كذااااااااابــــه.. أثير: والله يا أبرار ما أكذب عليك.. أبرار منهاره: يا ويلـــــــي.. ياويلي وشسوي.. أثير: أبرار مافي حل إلا نقول لصالح هو اللي بيحل الموضوع.. أبرار: صااالح تبينه يذبحني.. أثير: مافي إلا هالحل.. أجل تبين يتم زواجك على فراس وتنفظحين يا أبرار.. أبرار وهي تمسح دموعها: إلا في حل ثاني.. أثير: وشــو؟؟ أبرار: أذبح نفسي.. وافتك.. أثير: انجنيتي... يعني إذا ذبحتي نفسك بتفتكين من الفظايح.. أبرار: مافي إلا هالحل.. أثير: الله ياخذك يا ناصر.. الله ياخذك.. أبرار وهي تكابر: لاتدعين عليه.. مثل ماناصر غلط أنا غلطت.. يعني ماله داعي أمثل دور الضحيه.. وأنا اللي رحتله برجولي.. أثير: أبرار شيلي من بالك إنك تموتين نفسك.. وادعي الله انه يستر عليك ويتفهم فراس الموضوع.. أبرار: هاها.. قال أيش يتفهم.. آآه يايمه.. آآآه .. كل اللي يسير فينا منك.. ,,وتمت أبرار وأثير يبكون مصدومين ومو عارفين شيسوون.. (في بيت أم عبدالرحمن...) ,, الكل كان قاعد بالصاله والعيون كلها متوجهه لباب المدخل.. والدنيا مليانه أنواع الكيك والحلويات والفطاير... والمشروبات والشوكولاتات الفاخره.. احتفالآ برجوع مشاري للبيت.. ,,شوي ولادخل تركي وهو شايل أكياس من المستشفى وشنطة مشاري.. ,, فزت لطيفة وقالت: جيتوا يا تركي وين مشاري؟؟ تركي: الله يهديكم أحد يجي ياخذ مني الأغراض.. ,,فزت إيمان هي وأسماء وخذوا الأغراض من تركي.. ,,ورهف عيونها معلقه على تركي وقلبها على يدها لأن مشاري مو معه.. لطيفة: تركي وين مشاري؟؟ تركي: دخله عبدالرحمن وفيصل من مدخل مجلس الرجال.. ,,بس قال تركي هالكلمة الكل توجه لمخرج الصالة اللي يودي للمجالس.. تركي بنبرة صوت عاليه: وين ويـــــن؟؟ لطيفة: وش اللي وين بنروح نشوف مشاري.. تركي: لاحد يروح.. جوا معانا من المستشفى صقر وفهد عيال عمتي.. وصالح أخو رهف.. وزملاء مشاري طارق وعزام.. يعني المجلس فل ... لاحد يدخل.. وجيبوا موية بارده لأن مشاري عطشان وبعدها جيبوا القهوه .. أسماء: يووووه... هذا وقته.. طول ماعمي بالمستشفى موقادرين نزوره.. لأنه غرفته مليانه رجال وزوار.. وحتى لما رجع بيته مو راضين يعتقونه.. لطيفه وهي تخبي إنها متضايقه: حياهم الله بأي وقت.. منى روحي عند الشغالات وقوليلهم يودون المويه عند مشاري.. ويودون القهوه.. ,, جلست رهف بقهر وقالت بنفسها: ياربي.. كان ودي أشوفه بعيني واتطمن عليه.. يللاه مومشكله.. بس أحسن شي إن صلوحي حبيبي موجود مع مشاري.. عالأقل يعوض غياب أبوي الله يصلحه.. ,,بعد ساعه انتظار إن هالرجال يروحون وتقوم تسلم على مشاري.. ناظرت رهف بساعتها بكل ملل وقهر والتفتت للطيفه وقالت: عمه.. بروح المطبخ.. أسوي لمشاري مرقة لحم .. عشان لاراحوا الضيوف يشربها حاره.. لطيفة : يارهف مايحتاج.. عبدالرحمن موصي المطعم على ذبيحه الحين بيوصلونها.. وتركي ماقصر.. ماخلى شي من حلويات وموالح إلا جابه.. رهف: كل هذي زينه.. وفيها الخير والبركه.. بس ودي يشرب مرقة لحم أحسن.. سبحان الله الشخص التعبان لاشرب منها.. يحس نفسه أحسن.. إيمان: رهف خلي الشغالات يسوونها.. رهف: لاأنا بروح أسويها.. عشان أضبط بهاراتها.. واتطمن إنه أكيد طعمها حلو.. ,, وتقوم رهف وتدخل المطبخ .. ,, بعد مرور ربع ساعه دخل فيصل الصاله وقال: يللاه.. يللاه.. تراهم راحوا.. عمي مشاري يبي يسلم عليكم كلكم.. ,, والكل طار للمجلس اللي حطوا فيه غرفة لمشاري.. عشان يسلمون عليه.. ومن الفرحه نسوا ينادون رهف.. ,,, ,,, ,,بغرفة مشاري الجديده.. كان مشاري جالس عالسري وعينه عالباب.. أول ماشاف الطابور اللي قدامه ابتسم واستعان بالله وبدا يسلم.. اسماء حضنت عمها بضميروهي تبكي وعبدالرحمن ولد تركي نفس الشي.. وساره وسيرين وحمودي كان فيصل يشيلهم إلين يوصلهم لعمه ويقدر يبوسهم.. ولطيفة الصغيره اللي كانت أمها شايلتها قربتها من مشاري لين باسها.. ولطيفه اللي ماصدقت ولدها رجع لبيته.. طاحت عليه وهي تبكي وجلست فوق الخمس دقايق ضامته وفرحانه فيه.. ومنى وإيمان اللي كانوا واقفين عند طرف السرير ويتحمدون لمشاري بالسلامه.. ,,كان مشاري يرد عالجميع ويسولف مع الكل وهو حاس بفرحتهم فيه.. بس كان باين عليه الحيره والزعل لأنه بقى أهم شخص ماشافته عينه.. كانت عيونه تدور بحيره للكل وترجع لاإراديآ تطالع بالباب أملآ إنه يشوف رهف داخله مبتسمه وتسلم عليه.. ,,ولكن يقطع تفكيره صوت لطيفة.. لطيفة: هـــو... وين رهف؟؟ أسماء: يوووه.. نسينا نناديها.. بروح أناديها.. منى: لايا أسماء اجلسي مع عمك وأنا بروح أناديها.. ,,سكت مشاري وقال بنفسه: [ينادونها]الظاهر العمه نايمه ولاجابت خبري.. ,,,, ,,,, ,,بالمطبخ.. منى: رهــف.. رهف: سمي.. منى: يارهف ترى الرجال اللي عند مشاري راحوا.. روحي سلمي عليه.. معليش والله من فرحتنا فيه طرنا عالمجلس ونسينا نناديك.. رهف وهي تغسل إيدينها بسرعه: لاعادي.. ,,بسرعه رهف جهزت المرق واللحم.. وحطتهم بصينية تقديم .. وحطت عطر على شعرها ويدها.. ولفت شالها على راسها زين.. وشالت الصينية وتوكلت على الله ودخلت غرفة مشاري.. ,,,, ,,,, ,,في غرفة مشاري.. رهف وعينها بالأرض: السلام عليكم.. الكل: وعليكم السلام.. ,,رفعت رهف نظرها ولا لقت عبدالرحمن وتركي جالسين عالكنبه.. وفيصل وأم عبدالرحمن جالسين على سرير مشاري.. وأسماء جالسه على كرسي جنب مشاري.. وعبدالرحمن وحمودي جالسين عالأرض... يعني أنواع الزحمه.. رهف بنفسها: ياربي فشله أسلم عليه قدامهم.. خلني أحط الأكل قدامه وأقوله حمدالله عالسلامه.. وبس.. ,, رهف وهي تحط الأكل قدام مشاري وبصوت واطي جدآ: حمدالله السلامه.. مشاري وهوملاحظ الخجل اللي مقيد رهف: الله يسلمك.. وش هذا اللي بيدك؟؟ ,,سكتت رهف وبلعت ريقها وماقدرت ترد.. لطيفة:هذي مرقة لحم.. أصرت رهف إلا تسويها لك بيدها.. مشاري وهومشتهي يشرب هالمرقه الي عرف طعمها من ريحتها: خليها يارهف مغطيه.. بشربها بعدين.. ,,تركت رهف الصحون مغطيه زي ماهي وجلست على كرسي بعيد وهي ماتدري شتسوي.. وكانت محتاره وخايفه.. ماتدري تقعد ولاتطلع.. إذا قعدت تخاف مشاري يعصب ويقولها شمجلسك بين أخواني.. وإذا طلعت تخاف كمان يعصب ويقولها إنها مومهتمه برجعته.. لكنها توكلت على الله وطلعت برا.. لأنها ماتحب تجلس بمكان يجمعها فيها أخوان مشاري وفيصل.. ,,سكت مشاري وقال بنفسه: هذا اللي الله قدرك عليه يارهف.. [حمدالله عالسلامه] وتطلعين.. لكن ماتنلام.. رهف أصلآ تتقطع من الحياء لاجلست بمكان فيه أخواني.. وعقب اللي صار مع فيصل ماتنلام تكره الجلسه معهم.. ,, ويقطع تفكيره صوت لطيفه.. لطيفه: مشاري ياولدي.. وشرايك تشرب هالمرق قبل لايبرد.. مشاري: إي والله يمه من ريحتها اشتهيتها.. هاتيها قبل لاتبرد.. ,, وقربت لطيفة الصينية من ولدها.. ومن الجوع أكل مشاري كل اللحم وشرب كل المرق.. وهويقول بنفسه اللـــــه يارهف على هالطبخ.. ,, وعقبها بكم ساعه وصل العشى اللي موصين عليه .. وكانت سهرة العايله غير شكل بسبب رجوع مشاري للبيت وهو طيب.. ,, بس في ثلاثه كان بالهم مشغول وموقادرين يبعدون التفكير عنهم.. &رهف.. اللي كانت موسايعتها الفرحه برجوع مشاري ومنتظره على أحر من الجمر إن الكل يروح غرفته ينام ويتركون مشاري.. عشان تروح تسلم عليه بدون أي قيود زي باقي الزوجات.. وتبين له إنها فرحانه برجعته وتاخذ وتعطي معه بالحكي لأنها مشتاقه لصوته .. بس مثل ماكانت فرحانه فيه كان مزاجها متعكر ومتضايقه جدآ من الجبس اللي بفخذ مشاري... ومن الغرز اللي شوهت خده ودقنه.. ومن الضماده اللي على خشمه.. وطريقته الصعبه في التنفس.. وخذت عهد على نفسها إنها تخدمه بعيونها وتريحه.. إلين يقوم بالسلامه.. ونفس الشي كان بالها مشغول بالسالفه اللي بغى يقولها لها بالتليفون بس قالها بقولها لك لما أشوفك... وتردد بنفسها إن الله يستر.. & والشخص الثاني اللي هو مشاري كان يبادل رهف نفس الشوق وينتظر الكل يروح عشان ترجع عنده ويشوفها ويفتحلها قلبه ويعتذرلها عن اللي صار.. & والشخص الثالث عبدالرحمن.. اللي كلمه معاذ وقاله عن حالة أسيل والمزاج السيئ اللي صارت فيه.. وعن وصولهم من لندن للرياض بعد يومين.. بس عبدالرحمن ماحب يخرب فرحة الكل برجوع مشاري وفضل إنه يكتم عالسالفه إلين توصل أسيل وزوجها.. وتم طول الوقت يفكر بهم ومشغول قلبه وباله.. | ||||||||
| |
|
02-04-2011, 03:26 AM
| #50 (permalink) | ||||||||
|
شخصيه هامہ ~
http://im28.gulfup.com/2012-06-13/1339541276441.gif
|
رد: حقك علي ان كنت زعلان انا :
رونق الاحساس ****الجزء الرابع عشر (في بيت أم عبدالرحمن...) ,,فتحت الباب بهدوء.. وطلت عليه لقته نايم.. سكرت الباب وراها.. وجلست بكل هدوء على طرف السرير.. وهي موقادره تنزل عينها من عليه.. .... يا الله قد ما أنا مشتاقتلك.. قد ماقلبي مليان عليك.. بس خلاص ليه أعيش نفسي بنكد.. وزعل.. وإنت عرفت غلطتك.. الأفضل إني أنسى وأسامحك عشان حياتي تمشي.. ,,قربت منه وضمت يده اليسار بين إيدينها الثنتين وتنهدت وقالت بنفسها: الله يحنن قلبك علي يامشاري.. وتحس وتفهم إني إنسانه أحبك وشاريتك... وتعقل وتبطل وساوس وتسرع... عشان أرتاح وترتاح ونريح هالطفل اللي ماله أي ذنب.. ,,جت تبي تفك إيدها وتقوم... لكن مشاري شد على يدها اليمين بيده... ولف وجهه عليها وفتح عيونه ببرود وناظر لرهف.. ,,أول ماطاحت عيون رهف بعيون مشاري نزلت راسها وداخلها أحاسيس كثيرة مختلطة.. إحساس بالخوف من المستقبل وإحساس بعدم الإستقرار والأمان.. وإحساس بإنها ثقيله وإنسانه غير مرغوبة من قبل مشاري... وإحساس بالغربة والوحشه والضياع.. رهف: معليش آسفه إني صحيتك.. مشاري:لا عادي.. أصلآ ماكنت نايم مره.. نزلت رهف راسها وبعدين قالت: مرتاح عالسرير.. مشاري: إي الحمدالله.. بس الله لايهينك زيني المخدات اللي تحت رجلي.. رهف باهتمام: طيب.. ,,راحت رهف عند رجل مشاري وقعدت تزين المخدات اللي تحت رجله.. بعدين حست إنه من الأفضل تحط هالمخدات تحت فخذه اللي عليه الجبس.. لاإراديآ بيدينها الثنتين شالت رجله برفق من عند ركبته وضمتها على صدرها وحطت المخدات تحتها.. ورجعت رجله مكانها وقالت وهي تتنفس بسرعه بسبب ثقل رجل مشاري: ها..كذا أحسن؟؟ مشاري وهومتنح: رهف بطنك.. إشلون تشيلين رجلي كذا ثقيله عليك؟؟ رهف وهي ترجع خصلات شعرها على ورى: لاموثقيله عادي.. بس إنت كذا مرتاح أكثر.. مشاري وعيونه مانزلت من على رهف: هااه.. إي إي مرتاح.. ,,بعد صمت لحظات.. مشاري:نحفتي يارهف.. رهف:جد... حتى أسماء تقولي كذا.. بس أنا مالاحظت.. مشاري: الظاهر إنك مهمله نفسك وأكلك.. رهف وهي مبتسمه: ولايهمك.. دامك قمت بالسلامه.. أببدأ أسوي حملة تغذيه لي ولك... ,,سكت مشاري ورهف سكتت وانشغلت تقرا وصفات الأدوية اللي جنب مشاري والكل وده إنه يحكي مع الثاني بس موعارفين إشلون.. رهف بعد ماملت من الصمت:خلاص مشاري أخليك ترتاح وتنام.. مشاري: وين تروحين؟؟ رهف: ولامكان... بس.. مشاري بنظرات رجاء:لابس ولاشي أنا مافيني نوم إقعدي معي.. ,, تنهدت رهف وهي تتفحص ملامح مشاري التعبانه وعيونه الذبلانه وتذكرت ملامحه أول يوم من زواجهم لما ارتفعت حرارته وداخ عليها.... وعورها قلبها على طول.. وبحركه مفاجئه لا إراديآ قربت منه ولمته بين إيدينها برفق وهي تبكي.. ,,رفع مشاري يده اليسار وقعد يمسح على شعر رهف وهويحس قلبه يعوره.. وقال: رهف لاتبكين.. رهف خلاص إهدي.. أوعدك يارهف إني مستحيل ءأذيك أو أمس شعره منك بعد اليوم.. أنا ظلمتك وتعديت عليك بمافيه الكفايه.. وإلين هنا وخلاص.. إنتي زوجتي وأم ولدي اللي بالطريق وياكثر ماصبرتي علي واحتويتيني بهدوءك وحنانك ورجاحة عقلك.. واللي مثلك يارهف ينحط فوق الراس.. رهف وهي تقوم من بين إيدين مشاري وتطالع مباشرة بعيونه: بس أنا مومرتاحه.. مشاري برجاء: رهف خلاص حلفت لك إني مارح أرجع ءأذيك وش اللي مو مريحك.. رهف وهي تمسح دموعها: مشاري حتى لوعشت معاي حياه هاديه وخاليه من المشاكل.. ولبيت لي كل طلباتي..برضه رح أبقى مو مرتاحه.. مشاري باستغراب: وش اللي مومريحك.. رهف: اللي مومريحني إني أسير أنانية.. إني أعيش مبسوطه ومتهنيه وطلباتي مستجابه.. وإنت مومقتنع ومجبور.. مشاري وهومصدوم ومو عارف شيرد: رهف... رهف... أنا.. رهف ودموعها تنزل غصبن عنها: مشاري أنا لوماسمعت بإذني كان ممكن أغالط هالشعور اللي بداخلي وأقول تهيآت.. بس أنا سمعتك.. وأدنى سوء تفاهم تنفجر علي وتعايرني بأبوي.. وتقول إني ذبحت خالد.. وإنك أحسنت علي بزواجك مني.. ليه موقادر تفهم إنه أنا مالي ذنب بكل اللي سار.. مشاري وهوندمان: رهف.. والله يارهف.. أناموكذا.. قسمآبالله إني إذا قلتلك هالحكي وإذا تصرفت معك هالتصرفات أستغرب من نفسي وألوم نفسي.. رهف: لاتلوم نفسك.. لأن هذا اللي بقلبك.. وهذي حقيقة شعورك تجاهي.. مشاري: واللي يقولك إنسي كل اللي فات ونبدا صفحة جديدة.. مستحيل ألقى وحده مثلك يارهف.. بجمالك ونعومتك ورقة مشاعرك وقلبك الأبيض ونيتك الصافيه.. رهف: مشاري .. أنا أحبك وأفديك بروحي.. بس إنت شعورك تجاهي مجرد تعايش وتعود.. موحب.. مشاري: رهف.. ليه ماتخلين الأيام تثبتلك حبي لك.. مثل ما أثبتتلي وبينتلي حبك لي.. ,, ويمسك مشاري يد رهف ويبوسها ويضغط عليها بيده.. مشاري:تكفين يارهف ودي أعيش زي باقي الناس مرتاح.. لاتخليني وتروحين.. ياكثر ماضايقتك وظلمتك.. وبكل المواقف تبينيلي إنك إنسانه بمعنى الكلمه وجوهره.. سرت ما أتخيل حياتي بدونك.. رهف بعد ما اقتنعت بكلام مشاري وارتاحت: خلاص يامشاري.. تعبتك بالحكي معاي.. وانت المفروض إنك ترتاح.. مشاري: بالعكس ماتتخيلين قد إيش جلسة هالصراحه ريحتني.. رهف وهي توها تتذكر: صح آخر مره كلمتني بالمستشفى قلتلي إنك تبي تقولي شي لما ترجع البيت.. وشو هالشي؟؟ مشاري: إممممم... ضروري تعرفين.. رهف: كيفك ماودي أضغط عليك.. بس ياليت تقولي.. مشاري: إنتي تشتاقين لي مثل ما أشتاقلك؟؟ رهف وهي تتنفس الصعداء: ماني قايلتلك.. مشاري: ليــــــه؟؟ رهف بحياء: خل الأيام تثبتلك.. ,,ابتسم مشاري وقال: خلاص.. بصراحه جاني النوم وودي أرتاح شوي.. رهف: خلاص .. بس ماتبي تروح الحمام قبل؟؟ مشاري: إلا والله بموت .. أبي الحمام.. بس مستحي أدق على فيصل وأناديه عشان يوديني.. أخاف مشغول ولاشي.. رهف باستغراب: وليه تدق عليه؟؟ مشاري: عشان يساعدني.. ماأقوى أشيل عمري .. رهف وهي تقرب من مشاري وتحط يدها حاولين خصره: يللاه قوم.. مشاري وهوطايره عيونه: ويــــن؟؟ رهف: ماتبي الحمام.. يللاه قوم.. أبحطك على كرسيك.. وأدفك إلين الحمام.. مايحتاج تنادي أحد وأنا موجوده.. مشاري: يابنت الحلال موسالفة دخولي الحمام هين ذي سهله.. المشكله لادخلت الحمام.. يبيلي أحد يساعدني.. رهف: طيب أنا أساعدك.. مشاري وهومستحي: لايارهف.. خلاص بنادي واحد من الشباب.. وبيجون الحين.. رهف: هـــــو... مشاري تستحي مني.. أنا زوجتك... ومارح أخلي أحد يساعدك غيري طول ماأنا موجوده.. ,,ابتسم مشاري وقال: كيفك إنتي حره.. بس لاتقولين حوم كبدي هالرجال.. رهف بعتب:ولو يا مشاري ينقطع لساني قبل ما أقول هالكلام.. , ,, ,,, ,,,, مرت اليومين الأولين على رهف ومشاري وهم بغاية السعاده والتفاهم والإنسجام.. وماكان يعكر صفوهم إلا الآلام اللي تتعب مشاري وتسهره إلما الصباح.. وكانت رهف لماتجيه هالآلام تحاول تسيطر على نفسها إنها ماتبكي قدامه وتحاول تخفف آلامه بإنها تكون جنبه وتهديه وتعطيه أدويته وتسويله مساج خفيف.. كان كل البيت ينظر لرهف بكل احترام وتقدير لأنها ماخلت مشاري دقيقه وحده وخذت إجازة استثنائية للترم الثاني كله.. عشان تتفرغ لزوجها وتراعيه .. كانت طول الوقت تسهر على راحته وهي اللي تشربه وتأكله وحتى تدخله الحمام وتروشه وتلبسه.. وكان دايمآ مشاري يعاتبها وينبهها إنها حامل ومو زين لها إنها تبذل مجهود كبير خاصة إنه بطنها بدا يكبر وهي بشهورها الأخيره.. لكن رهف دايمآ تطمنه وتقول إن كل الأمور ماشيه تمام.. , ,,,تحديدآ في الصاله.. كانت غرفة مشاري الجديده مليانه رجال وزوار..وأهم زائر بالنسبه للعائلة اللي هو عبدالإله... والشغالات رايحات جايات بالقهوه والشاي.. وكانت لطيفة جالسه بالصاله مع حريم عيالها.. يسولفون ويتقهوون... شوي ولاسمعوا بالحوش صوت صراخ حمودي وعبدالرحمن ولدتركي.. وساره وسيرين.. هنا لطيفة خافت وقالت: بسم الله وشفيهم العيال يصرخون.. منى بخوف: بسم الله.. أسماء طلي شوفي اشفيه.. ,,مشت أسماء بسرعه وهي متوجهه لباب الحوش لكنها انصدمت وقالت: أسيـــــــــل؟؟ ,,دخلت أسيل الصاله وهي مي مصدقه نفسها وطايره من الفرح وقامت تسلم عالكل وتحضنه وهي تبكي وترتجف.. ,,رمت نفسها أسيل عالكنب وهي فرحانه إنها رجعت لبيت أهلها.. كان الكل يناظر لأسيل باستغراب ومومصدقين إن اللي قدامهم أسيل.. كانت أسيل متغيره 360 درجه.... كانت نحفانه ومسمره ومن تحت عيونها سواد كبير ووجها أصفر وذبلان.. منى: أسيل وشرجعك يابنيتي الحين؟؟ أسيل بزعل وعصبيه: ليه ماتبيني؟؟ لطيفة: لايابنيتي اشلون ماتبيك.. بس احنا مستغربين لأننا عارفين إنه رجعتكم للرياض مي بعد أقل من شهرين.. أسيل: لا أعوذ بالله.. تبوني أقعد شهرين ماشوفكم.. إلا صح وين أبوي وأعمامي.. وغريبه عمتي دينا هنا.. شكلكم مارجعتوا جده من بعد زواجي.. ,,الكل استغرب وقاموا يناظرون ببعض وحسوا إن أسيل ماعندها علم عن الحادث اللي سار لمشاري.. ,,دخل فيصل وبدون ماينتبه لأسيل قال: يمه خلي الشغالات يجون يشيلون القهوه.. [وفجأه شهق وقال] أسيــــــل؟؟ أسيل وهي تضحك: صح النوم توك تنتبه.. وتقوم أسيل وتسلم علي فيصل.. فيصل: أسيل.. وش اللي جابك؟؟ أسيل وهي متنرفزه: حلوة ذي اللي وش اللي جابك.. فيصل: لابس أنا أقصد وين رجلك معاذ؟؟ أسيل كشرت لاإراديآ وقالت بدون إهتمام: الظاهر إنه لسه بالشارع برا.. الكل باستغراب: بالشـــــــارع؟؟؟ منى: فيصل بسرعه رح دخل رجل إختك .. قبل لايزعل بسرعه.. ,, وينطلق فيصل عند معاذ.. لطيفة: أسيل.. الحين تدخلين وتخلين رجلك برا.. أسيل: وشتبين أشيله على ظهري وأدخله.. من فرحتي إني وصلت بيتنا دخلت ونسيت أدخله.. ,, الكل جلس يناظر بأسيل باستغراب ومو مصدقين إن أسيل تحكي عن معاذ بهالطريقه..  | ||||||||
| |
|
| مواقع النشر (المفضلة) |
| الذين يشاهدون محتوى الموضوع الآن : 12 ( الأعضاء 0 والزوار 12) | |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| زعلان مين يراضيني؟؟؟؟ | εïз إخـ القمـــر ـت εïз | فسحـﮧ بنوته | 168 | 03-19-2011 01:24 AM |
| برد الشتاء زعلان وش فيه زعلااان...؟؟؟ | لمحة شجن | ڪل مآيشمل حۈآء العامه | 12 | 11-18-2010 01:29 AM |
| زعلان لكن عارف شلون اراضيك ... | Ǻ6ł8→βήŏţąђ | الشعر والخواطر والقصائد | 4 | 08-03-2010 09:21 PM |
| روآية انت لي مو لحد ثاني | قمرهم كلهم | للروايات المكتمله | 107 | 07-12-2010 07:37 PM |
| انا زعلان منك............ | دلوعة حبيبها | الشعر والخواطر والقصائد | 5 | 05-01-2009 01:42 AM |
| |
العرض العادي
