منتديات بنوته - عرض مشاركة واحدة - ودك.. تنامـــــــــي نا مــــــــــــــي..}~

07-15-2010, 05:16 PM

عوض : انشالله بنلتقي قريب .. ع العموم .. كانت احلى اجازة مع اوفى صديق ..
احمد ابتسم : تسلم .. نشوفك على خير ..
عوض : يللا مع السلامة ..

سكر عوض القزازة وفتحت الاشارة .. كل شي صار تحت عين احمد ..

بمجرد ما تقدم عوض يبغى يمر .. الا وتجي سيارة طايرة وتطير سيارة عوض .. وتقلبها فوق تحت .. وتدخل فيها ...

(( بيت ابو سعود ))

( الساعة 9 بالليل )

كانوا الكل تحت مجتمعين وفيصل معاهم .. والسوالف والضحك غالبة المكان .. الا سعود ودلع .. الاول طالع .. والثانية كانت في غرفتها ..

فيصل : ههههههههههههه تعالي يا حمارة .. صبيلي شاي ع الاقل...
لينا : ماعندك يد يعني...؟؟
فيصل: خخخخخخ الله يرجك ما تتغيرين .. اعقلي .. العقل زين ..
لينا انقهرت وشالت ابريق الشاي وقربت من فيصل تهدده : قسما بالله كلمة ثانية بحرقك بهالماي ....
فيصل فتح عيونه ع الاخير : تحرقيني ..؟؟!؟!؟ وببيتكم بعد .!.!؟!؟ ما هقيتها ...
لينا : لازم تتوقعها من اليوم ورايح اذا كذا بقى اسلوبك ..
سالم : ههههههههههه اخس يا شديد انتي !!!
فيصل : مدري عنها ..تحسب انها خوفتني الحين ... يا مامي ...
لينا : أي صح فيصلووو وينك من زمان ..؟؟
فيصل : ف البيت ... ليش شتبين ..؟
لينا : ولاشي .. بس ما سالت ولا قلت عندي اخت اسال عنها يعني .. باختصار قطعتنا..
فيصل : يختي كيفي .. ما ابغى اشوف وجهك .. !!!
لينا شهقت : هيييييييي .. كذا اجل ..يللا بسرعة برى البيت .. برى ..
فيصل : افااا ... طردة ..؟!؟؟!؟!
لينا تضربه بالمخدة وتقومه من مكانه غصب : أي طردة .. بيتي وحرة ..
فيصل : لاتخليني اضربك ...
لينا : بعد!!! تضربني ف بيتي ...؟؟!! انت شكلك نسيت مين لينا يعني ...؟
فيصل : ههه سالم شوف اختك .. والله لا افقع وجهها ان ما وخرت عني
سالم صرخ : يا بنت!!!! اجلسي مكانك ..
وخرت لينا بكل دلع وجلست : مو عشانك .. عشان خاطر سلووومي حبيبي اخوي ..
فيصل يقلدها : سلووومي ... خخخخخخخخ من زينك .. ترى ما يليق عليك الدلع ..
سالم : الا على طاري الدلع ... لينا وين دلع ..؟؟
لينا : فوق نايمة ..
سالم : هذي وش قصتها..؟؟ صارلي يومين ما شفتها ....
لينا تهز كتوفها : مدري ..

(( المستشفى .. ))

( الساعة 10 بالليل )

كانت اروى وامها وزوجة عمها وريم ف غرفة الانتظار .. وكل وحدة منهم على اعصابها وخايفة موت .. ام اروى كانت مقطعة عمرها من الصياح وام رائد تهدي فيها ..
اما اروى فكانت هادية .. بس من داخل ميتة خوووووف .. صح هي قوية .. بس في هالمواقف تصير ضعيفة مرة .. قعدت تدعي ربها وتقرا قرآن .. وتسبح .. وريم معاها تسوي نفس الشي ...

بعد 10 دقايق .. دخل رائد ... منزل راسه ..
رائد : احم ..
ام رائد : ادخل ...
دخل رائد وقال ببرود : امي .. ابوي وعمي يقولون يبغونك انتي وخالتي
رفعت ام اروى راسها وقالت : ليش..؟؟؟ شصاير...
رائد : ما صار شي يا خالتي .. عيني خير ..

طالعت ام اروى مع ام رائد .. وراحوا لابو عوض وابو رائد ..

ابو عوض اخذ ام عوض على جنب ..
ام عوض بصياح : صالح .. تكفى قول لي .. شلون ولدي ......؟؟
وقف ابو عوض يطالعها : صلي على النبي..
ام عوض : صلى الله عليه وسلم .. شفيه ..؟؟ تكفى قول لي...؟؟ لاتخبي علي ..
رفع راسه ابو عوض وطاحت من عيونه الدموع : ترحمي على ولدك يا ام عوض .. !!

ام عوض فتحت عيونها ع الاخير وبدى صراخها : صالح انت وش تقول..؟!؟!؟!
ابو عوض مسكها يهديها : ادعيله يا ام عوض .. الله يرحمه انشالله ..
طاحت ام عوض ف حضن ابو عوض تصيح وتصارخ وهو يهديها .. اما ام رائد فصاحت على عوض اللي كان في اول شبابه .. وقدامه المستقبل الطويل .. بس هذي قدرة الله ومحد له دخل فيها ...

اما في زاوية الممر .. كان احمد اللي جالس ع الارض ومغطي وجهه ويصيح ...
احمد : آآآآآآآآآه ...آآآآه يا اخوي .. آه يا صديقي ..آآآآآآآه يا اقرب انسان لي .. ليش رحت ..؟؟ ليش رحت يا عوض ليش..؟؟ ليش تخليني بروحي ..؟؟؟ انت قلت بنلتقي قريب... ليش رحت .....؟؟؟ ليش تخليني بروحي كذا ..؟؟ ارجع يا عوض تكفى .. آآآآآآآآآه يا حسرة عمري اللي بكمله من دونك يا اخوي .. !!!!!!!!

قرب منه رائد اللي كانت عيونه ماهي قادرة توقف دموع .. قعد جنبه وحط يده على ركبة احمد : اصبر يا رجال.. خلك قوي .. الله يرحمه انشالله ..
احمد : رائد .. والله يا رائد وصلنا الشرقية مع بعض .. والله كنا واقفين عند الاشارة وقال لي بيروح البيت .. واه بنلتقي قريب .. هو قال لي .. والله وعدني ..

سكت رائد واحترم حزن احمد وزعله .. لانه اقرب انسان كان منه ... واكيد بيتاثر ..

( بعد ربع ساعة .. ف غرفة الانتظار )

كانت اروى تنتفض من الخوف .. ماهي عارفة ليش امها طولت برى .. ومحد رد لهم خبر .. واخيرا قررت انها تطلع من الغرفة .. واللي فيها فيها .. طلعت وهي تركض وريم وراها تحاول توقفها ..

وصلت للمر وشافت الكل يصيح .. نغزها قلبها وضربها شك انه اخوها فيه شي ..

وقفت تتامل في وجه كل واحد فيهم .. لين ما جاها ابوها ..
اروى : يبا وين عوض..؟؟ شصار...؟؟
ابو عوض وقف قدامها ومسكها من كتوفها وقال : اروى .. حبيبتي .. بقولك شي .. وابغاك تكونين قوية طيب..؟؟ ما ابغاك تنهارين وتسوين مناحة ...
على طول اروى طاحت دموعها : يبا تكفى قول شصاير...؟؟
ابو عوض نزل راسه : اخوك توفى .........!!!!

وقفت اروى تطالع وجه ابوها ماهي مصدقة : ...... يبا انت شتقول ..؟؟ لاقعد تقص علي ...
ابو عوض : يا اروى استهدي بالله .. وترحمي على اخوك .. تراه محتاج دعاءك الحين ..
اروى تهز راسها برفض : لا لا لا لا ... اكيد هذي وحدة من حركاته .. انا اعرف عوض .. دايم يحب يخوفنا كذا .. يبا انا اعرف عوض دايما يمثل ..

سكتت تطالع وجوههم اللي كانت تطالها .. والدموع اللي كانت تنزل منها ...
اروى : يعني صدق .. م ... مات .. ؟؟

هز ابو عوض راسه بايجاب ..

احمد ورائد داروا وجيههم .. ما تحملوا هالموقف .. اللي انحطت اخته فيه .. اللي ينقال لها انه اخوه مات بدال ما يرجع بالسلامة ...

نزلت دموع اروى .. وبعدها بدى صوت ونتها يطلع .. وبعدها انهارت على الارض وقعدت تصيح وتصارخ ...........

اروى : لااااااااااااا ... عوض لااااااا ... لا اخويييييييييييييييي لاااااااااا ... اخوي ما مااااااااات كذااااااااااااابين .. هو قال لي بيرجع .. قالي بيرجع واله قال باقيله ساعة ونص ويوصل والله .. اخوي ما ماااااااات .. يمثل عليكم بس ... يمثل ... آآآآآآآآآآآآآآآآآه يا اخوي .. آآآآآآآآآآه يا عوض ......

والله يرحم كل الاموات برحمته .......... (( اليوم الثاني .. اول ايام العزا ))

( الساعة 11 الصباح )

مرت الساعات الماضية على بيت ابو عوض صعبة مرة .. كلها صياح وحزن وفراق لولدهم واخوهم الوحيد .. والعزيز عليهم .. واصعب لحظة كانت لحظة الدفن ... اللي اضطر الابو يدفن ولده اللي ما وصل الثلاثين .. بدال ما ولده يكون هو اللي بيدفنه .. كانت لحظات صعبة على ابو عوض .. اللي نزل شايل ولده للقبر وهو يصيح عليه ويدعي له بالمغفرة والرحمة .. واللحظة الاصعب .. اللي شاف ولده ينرمى عليه التراب ويندفن تحت الارض والكل يتركه لوحده ويروحون عنه .. ومايبقاله احد ..

اما ف البيت .. بدت تجهيزات بيت ابو عوض للعزا اللي قربوا الناس ويوصلون له ... ام عوض كانت حابسة عمرها في غرفتها .. واروى ف غرفتها ومعاها ريم .. وام رائد هي اللي قايمة بالشغل وتوجيه الخدامات .. اما ابو عوض كان مع ابو رائد ورائد يجهزون مجالس الرجال..

ابو رائد : يا صالح .. يبغالنا احد يروح يطلب ذبيحة
ابو عوض اللي كان مبين عليه التعب : خلاص الحين بروح اوصي عليها
رائد : لا والله يامي ما تروح مكان .. انا الحين بمر واطلب الذبايح .. واجيب لكم القهوة والشاهي وكل شي ..
ابو عوض : تسلم يا رائد .. الله يجزاك الخير

طلع رائد من البيت وكان لابس ثوب ابيض وشماغ احمر رسمي .. وعند الباب شاف سيارة احمد توقف .. ونزل منها احمد اللي كان بثوب وشماغ زيه .. بس ملامح الحزن كانت واضحة عليه ...

احمد : السلام عليكم ...
رائد : وعليكم السلام .. اخبارك ..؟
احمد : الحمدلله على كل حال.. شخبار عمي..؟؟
رائد : والله تبي الصدق .. تراه تعبان .. بس انشالله فترة وتعدي
احمد : انت وين رايح ..؟؟
رائد : بروح اشتري شوية اغراض قبل ما يجون المعزين ..
احمد : تبغى مساعدة ...؟؟
رائد : ا. .. لأ .. ولا تدري .. الا اذا ما كان عندك مانع
احمد : طيب بس انتظرني الله يخليك اروح اسلم على عمي واجيك
رائد : اوكي .. بكون ف السيارة ..

راح احمد يسلم على عمه ويعزيه .. اما رائد فقعد في سيارته .. وكلها كم دقيقة .. وطلع احمد وراح مع رائد يشترون الاغراض ..

(( في بيت ابو سعود .. ))

( الساعة 12 .. الظهر )

كررت سؤالها وهي ماسكة شعر دلع : تكلمي احسنلك .. مين ابووووه تكلمي .. والا والله يا دلع ما يصيرلك خير ...
دلع تصيح : والله العظيم مالي دخل .. والله مو ذنبي .. هو اللي مسكني ..
ام سعود شدت يدها : مين هو طيب..؟؟ تكلمي يابنت الناس لااذبحك بيدي هذي
دلع صارخت : آآآآآآآآآي مقدر مقدر اقولك والله مقدر
ام سعود : ما تقدرين ها..؟؟ طيب يا دلع .. انا بخليك تقدرين ..

طلعت من الغرفة بسرعة .. وقعدت دلع ع الارض تصيح .. من الصباح وام سعود تهاوشها وتضربها تبغاها تتكلم بس هي ماسكة نفسها لا تتكلم ..
تخاف تعلم على سعود وتسوي مشاكل بينه وبين امه .. صح هي ما تهتم له .. بس ما تحب الشر لاي احد .. ولو قالت انه هو .. بينظر من البيت وبتتشتت العائلة ويمكن يضيع سعود نفسه ..

كلها كم دقيقة ورجعت ام سعود ومعاها علبة دوا... وتلقائيا رجعت دلع على ورى وتسندت على الجدار ...

تقدمت ام سعود ومسكت فم دلع : افتحي فمك اشوف
دلع مسكرة فمها بقوة ومغمضة عيونها ...
ام سعود : افتحي فمك يا بنت الناس ...

دلع تحرك وجهها يمين يسار وتحاول توخر يد ام سعود عنها بس مافي فايدة ...
ام سعود : اجل هذي اللي ما تقدر تتكلم ها..؟؟ الحين اوريك لما تشربين هالدوا ويموت اللي ف بطنك على طول .. بتعرفين شلون بيكون اسهل لو تتكلمين ...

فتحت دلع عيونها ع الاخير ونزلت دموعها منها .. وبحركة سريعة قدرت تطلع من يدين ام سعود ..
دلع : لا يا خالتي ..لا الله يخليك .. الا هذا لااا .. واللي يعافيك ويخلي لك عيالك
ام سعود تلاحقها وتقرب منها : انا قلت لك تكلمي وقوليلي اللي صار والا والله لا احط هالشي ف بطنك .. وكلها كم ساعة وبينزل الولد لوحده بدون تعب ولا صراخ مني ..
سكتت دلع تصيح .. خايفة تتكلم .. خايفة تقول لها .. وخايفة على اللي بيصير فيها وباللي في بطنها ..
ام سعود : ها..؟؟ وش قلتي ..؟؟ تتكلمين ولا شربين ..؟؟ القرار يرجعلك ..
دلع صارخت : خلااااااااص .. بتكلم والله بتكلم .. والله

بدون ولا كلمة حطت ام سعود الدوا على الطاولة .. وكتفت يدينها : تكلمي اشوف

اخذت دلع نفس وقعدت على السرير : خالتي والله اللي بقولك اياه هو الصدق .. ابغاك بس تسمعيني للاخير ..
ام سعود : قولي..
دلع : يوم كنا ف البحرين .. ف الفندق .. يوم الرحلة البحرية .. انتي قلتي مين يطلع يقوم سعود
ام سعود : طيب...؟؟؟
دلع : ويوم رحت اقوم سعود .. قام .. وبعدين راح الحمام .. ويوم طلع قال لي .. ق .. قال ............ ( سكتت )
ام سعود بقلة صبر : ايش قال........؟؟ وايش دخل سعود اصلا ..؟؟
دلع بخوف : قال لي انه ضيع جواله وشكله داخل البطانية ف السرير .. ولما ... لما قدت ادوره .. صار اللي صار .... !!!!!!!!!!!!!!!!!!!!!!!!!!

فتحت ام سعود عيونها الثنتين : !!!!!!!!!! انتي وش تقولين ...؟؟؟
دلع : والله يا خالتي هذا الصدق .. ماني قاعدة أءلف ..
ام سعود بنظرة باردة : هذا كل شي ..؟
دلع : نزلت راسها : أي..
ام سعود قربت منها وجلست جنبها وقالت بكل حنية : دلع .. أنا آسفة
صاحت دلع وحضنت خالتها بقوة .. دفنت راسها بصدرها وطلعت كل اللي بقلبها ..

كل هذا صار قبل ما ترفع ام سعود راس دلع .. وتكب قارورة الدوا كلها في فمها .. وتخليها تبلعها غصب....وعلى وجهها ابتسامة نصر ...

طاحت دلع ع الارض وهي تكح وتحاول تطلع الدوا من فمها .. بس خلاص .. كان داخل بطنها .. ما يرجع .. طاحت ع الارض وقعدت تصيح : حرااام علييييييييك .. والله حرام عليك ... ليش سويتي كذا؟؟؟؟؟ حتى انتي اثق فيك وتسوين كذا يعني..؟!؟!؟!؟

ام سعود تصارخ : انطمي ولا كلمة .. هللي ناقص .. على بالك بصدقك واواسيك انشالله ..؟!؟!!؟ حبيبتي .. ترى السالفة هذي كلها ما دخلت بالي .. واذا بتكذبين .. اكذبي على وحدة هبلة .. مو باسمة ... فاهمة ...؟!؟!؟!؟

تركتها وطلعت من الغرفة .. وخلتها تصيح على ولدها اللي بدى يموت ف بطنها شوي شوي ....</b></i>