منتديات بنوته - عرض مشاركة واحدة - ودك.. تنامـــــــــي نا مــــــــــــــي..}~

07-15-2010, 05:07 PM

(( شركة ابو سعود ))

( بعد نص ساعة )

مسك الكوب اللي قدامه وشرب منه شوي يحاول يهدي اعصابه ونفسيته ...
احمد : افففففف ... قسم بالله موب حالة هذي
عوض : شفيك ..؟؟ من الصباح تنافخ وتافف ....؟؟
احمد : والله هالشغل ذابحني .. ماهو داخل مزاجي ... شي مقرف بصراحة ..!!
واحد من الموظفين : اوووووه .. اوووه .. شكلها اخلاقك موب معاك اليوم ...
احمد : وانت تستخف دمك ..؟؟ اقول اشتغل وانت مسكر فمك احسنلك ... ناقصني تنكيتك انا ...!!!؟!؟
عوض ضحك بصوت واطي ..
انتبه احمد لمكتب سعود الفاضي : والاخ هذا وينه بعد ...؟؟ ولا عنده اجازة زيادة بعد ..؟؟
عوض : انت ليش حاط راسك براسه .. خلاص كيفه متى ما جا .. جا .. !!!
احمد : شي يقهر احنا نشتغل ونتعب ونكرف وهو داقها نومة ...
عوض : هدّي شوي انت ... مايصير تسوي كذا .. اشرب الكوفي حقك وروّق ..

تسند احمد على الكرسي ..
احمد : انا افكر اشوف لي شغل ثاني ..
عوض : وين بتروح ..؟؟ ووش بتشتغل ..؟ انت في قسم الاعلانات ويالله فالح .. وش بتسوي ..؟؟
احمد : ياخي أي شي .. ع الاقل اكون مرتاح ف الشغل ...
عوض : سكر الموضوع الحين .. وبالليل نطلع انا وياك ونتناقش ..
تنهد احمد بتعب وضيق ....

(( بيت ابو سعود ... الساعة 11 الصباح ))

( غرفة دلع )

قامت النوم بتعب ... دخلت الحمام وغيرت ملابسها .. طلعت ولمت شعرها أي كلام ..
انتبهت للابتوب حقها .. من زمان ما قعدت عليه ... بس يوم مر سعود ف بالها كرهت الكمبيوتر والغرفة ...

طلعت من الغرفة ولمحت غرف سعود .. بابها كان مسكر ...
دلع : ههــ حتى شغل ما بيروح..؟!؟!؟ امحق رجال .. !!

نزلت تحت وقعدت .. كان المفروض اليوم تداوم ف الجامعة بس للحين تحس انها تعبانة وماهي قادر تتحرك اكثر من كم خطوة ..

فتحت التلفزيون وتفرجت شوي ....

بعد نص ساعة ..

طفشت .. سكرت التلفزيون وقامت .. طلعت فوق .. وهي على الدرج شافت الخدامة..
دلع : وين ماما ..؟
الخدامة : ماما نوم ..
دلع : طيب سعود نايم للحين ..؟
الخدامة : لاااا .. سعود قوم صباح روح شغل ...
دلع : اهااا ... خلاص طيب .. روحي كملي شغلك ..

جاها فضول تدخل غرفة سعود .. ماتدري ليش مع انها تكرهه كره العمى على اللي سواه فيها .. بس في شي يخليها تدخلها ..

فتحت الباب بهدوء ودخلت ... سكرت الباب وراها وفتحت النور ..
مررت نظرها على الغرفة بتمعن .. بعدين قعدت تتمشى ف الغرفة اللي اقل ما ينقال عنها انها عفسة وحوسة ....
قعدت على السرير .. وفتحت الدرج اللي قريب ... حصلت اوراق كثيرة .. ارقام .. صور جمعات شباب .. صور سيارات .. جواز سفر .. وجوالين ..

دلع : زي ما توقعت .. هالانسان لايمكن يكتفي بجوال واحد ..

اخذت واحد من الجوالين وفتحته .. ويوم طلب رمز البن كود توهقت .. ماعرفت وش تسوي ....
دلع : الحين شلون افتحه ...؟؟؟؟
طاحت عيونها على البطاقة حقت الشريحة ...
دلع : الحمدلله ...!!!
اخذت البطاقة وشافت البن كود .. وكتبته ف الجوال .. فتح ...

انتظرت لين ما فتح الجوال .. وعلى طول بدون تردد راحت على طول للرسائل ..
شافت رسايل كثيرة .. واكثرها من بنات ... حنان .. فرح .. كوثر .. وغيرها من الارقام اللي مسجلة بدون اسماء .. واغلب الرسايل غزل في غزل ..

طلعت من الرسايل وراحت للاستوديو ... شافت صور بعد كثيرة .. صوره وربعه .. جمعات شباب .. حفلات .. بس في شي خلاها تتعجب اكثر .. كان في صور بنات بعد .. قلوب واشياء حمرا ... والادهى .. صوره هو وربعه مع بنات .. !!!!!!!

حطت يدها على فمها مو مصدقة .. صح توقعت الكثير .. بس مو كذا .. تضايقت مرة .. وجاها فضول اكثر تفتح الجوال الثاني ...

ويوم فتحته .. شافت رسايل بنات كثيرة .. غير البنات اللي قبل .. رنا .. هيا .. لميس ..
دلع باستهزاء : هههه شكله يعرف كل بنات الشرقية !!!!

ويوم راحت للرسايل لمحت رسايل مع خالد .. كان يتكلم عن بنت ...

الرسالة الاولى من خالد ... وش فيك يا رجال..؟

رد عليه سعود .. هالبنت بتجنني !!!

دلع : مثل ما توقعت .. السالفة فيها بنت

رسالة من خالد .. ليش..؟ شسوت ..؟؟

سعود ... ماهي معطيتني فرصة عشان اتقرب لها .. كل ما اقرب تبعدني ..

دلع : غريبة ..!! احيي هالبنت بصراحة .. ع الاقل ما قطت وجهها عليك زي باقي البنات اللي ف الجوال ..

خالد ... زين وش بتسوي .. ؟؟

سعود .. وين بترووح عني..؟ جايبها جايبها ...!!! حتى لو بنت خالتي بجيب راسها .. انا سعود .. مو أي احد ..!!

فتح عيونها ع الاخير كانه احد صفقها كف .... اللي يتكلم عنها هي .. نفسها هي .. كان يخطط لهالشي من زمان ..!!!!

مر كل شي بينها وبين سعود كشريط من الذكريات بسرعة .. الحين استوعبت انه كل حركة منه كان يبغى يتقرب لها فيها .. وزي ما توقعت كان قصده كله انه يوريها لانها ما كانت تعطيه وجه مثل باقي البنات .....

رمت الجوال ف الدرج بعد ما سكرته ومسكت راسها بقوة وهي مغمضة عيونها ... تحاول تقوم من هالكابوس ...
دلع ودموعها بدت تنزل : ليش..!؟!؟! ليش انا لييييييييييييييييييش ؟!؟!!؟!؟
والله ما سويت شي فحياتي يستاهل اتعاقب عليه بهالطريقة .... ضيع مستقبلي الله يضيّع مستقبله .... !!!

قامت تلف وتدور ف الغرفة تفكر بمستقبلها .. مين بيرضى فيها وياخذها ؟؟؟.. مين اللي بيستر على وحدة زيها ؟؟... مين اللي بيفكر يخليها ام لعياله؟؟؟؟؟؟

دلع بهستيريا : بس .. بس انا م .. ما سويت شي .. هو اللي غدر فيني .. كان يبغاني اجيب جواله ...

كملت وهي تكلم المرايا وتصيح... وكانها انسان يتكلم معاها ويسمعها ..

دلع : والله والله العظيم كنت ابغى ادور على جواله لانه كان يقول انه حطه على السرير .. والله قصدي كان شريف .. هو اللي مسكني .. هو اللي اخذ اغلى شي عندي .. هو اللي غصبني على كل شي صار ... !!! صدقوووني .. والله مالي ذنب .. حاولت اصارخ بس .. سكر فمي .. والله ما قدرت اسوي شي ... !!

وعلى هالحالة قعدت تكلم عمرها وتصيح ف الغرفة ......

(( سيارة احمد ))

( الساعة 8 بالليل ... )
فكر عوض شوي ... عمه عنده شركة تشتغل في نفس مجال شركة ابو سعود ..
عوض : شلون ما فكرت بكذا من قبل..!؟!؟!؟
احمد وهو يسوق : وشو...؟؟؟
عوض : تعرف عمي عبدالهادي .....؟؟
احمد : أي اذكر مرة رحنا انا وياك نزوره يوم كان ف المستشفى يسوي عملية مدري ايش .....
عوض : ايوووووه ... هذا هو
احمد : طيب ...؟؟
عوض : تراه صاحب شركة عبدالهادي للمقاولات ...
احمد : وبعدين ....
عوض : اكيد بيحصل لنا شغل عنده .. ونفس الشغل اللي نشتغله الحين وبراتب احسن ...!..!.!.!
احمد : قول والله ...!!
عوض : والله العظيم ... اصبر بس كم يوم خليني اشوف عمي واتفاهم معاه اذا عندهم اماكن فاضية ووظايف ونشوف لنا حل انشالله
احمد وهو يوقف السيارة عنده احد الكوفي شوبات اللي ف الشرقية : الله يسهل انشالله .... انزل بس</b></i>