منتديات بنوته - عرض مشاركة واحدة - ++::بعد ماجفيت ترجع تقول احبك وانا احبك::++

06-20-2010, 06:57 PM

طلع خليفه و على ويهه ابتسامه فهمها ناصر و خالد ..طلعوا كلهم من البيت سايرين صوب اشغالهم ..اما فى بين بومحمد نرجع حق حمدوه للى قاعده تخطط علشان تشوف حمد للى اصر عليها ورضت بالامر الواقع و اتفقت انها تسير المول و تشوفه اهناك صوب الباركنات ..

على الساعه 8 بالليل طلعت حمدوه مع الدريول صوب العين مول وقالته يترياها و لا يتحرك شافت سياره اودى عليها رقم ازرق بوظبى نفس الوصف للى وصفه حمد حقها ..قعدت تمشى و بالصدفه مشت جدام سياره زايد للى من شاف البنيه طلع من السياره وعرف انها حمدووه شافها تدخل سياره اودى و سياره منو حمد قعد مصدووم ما عرف شو يسووى الا و اشووى حس بعزه نفسه تنهان شاف السياره تحركت ...وتبعها ..

::++فى سياره حمد::++
حمد: شحالج حمده
حمده(خايفه و مستحيه بنفس الوقت): بخير ربى يسلمك
حمد: ما بغينا انشوفج
حمده: ماصارلنا اسبوعين من نعرف بعض
حمد: هيه صح
حمدوه(شافته ساير صوب الفندق): انته وين ساير
حمد: الفندق علشان محد يشوفج
حمدوه: شو بس انته قلت بنوقف فى باركنات المول
حمد: لا بصراحه انا اخاف اوقف اهناك (ويسمع صوت حد يدعمه من ورى السياره )

::++وقف حمد ونزل ::++

شاف زايد و عيونه كلها غضب و شرار يمسكه زايد من رقبته و يضربه ذاك البوكس للى طيره وسار صوب الباب الثانى و فتحه اول ما شافته حمدوه حطت ايدها على ثمها و يسحبها من ايدها و يعطيها طراااق
زايد: ليش جذا اتسوووين هاا ليش
حمدوه(تصيح):.................................
زايد: ما تبين ترمسين على سواد ويهج منو يايبنج المول قولى (يصرخ)
حمدوه(ترتجف): الد د د رريو الدريول
زايد: ما توقعت منج هالشى لهدرجه انتى شو من البشر
حمدووه: و لله اسفه انا اعرف للى سويته غلطت (تصيح)
زايد: لا تصيحين ما بتنفعج دموعج الاسف كنت احسبج انسانه غير عن الباقى بس طلعتى و حده ما تستاهلين
حمدوه: زايد انا
زايد: جب و لا كلمه و لا تقولين اسمى على لسانج دخلى السياره
حمدوه: انزين

دخلت السياره ووقف زايد جدام حمد
زايد: ماتوقعت تخون ربيعك فى عرضه
حمد: انته فاهم الموضوع غلط
زايد: اى غلط و انا شفت بعيونى
حمد: ليش هذى من تكون
زايد: ليش ماقلتلك انها اخت خالد
حمد(مصدوم): شووو
زايد: الاسف شوهت صورتك كنت احسبك انسان مخلص و طلعت خاين فمان لله
حمد: زايد اسمعنى
زايد: روووح لالالاه

ركب زايد السياره وسار صوب المول وشاف سيارتهم واشر على حمدوه انها تنزل وتسير البيت ..نزلت وركبت سيارتهم و هيه متغشيه و دموعها على خدها اول ماوصلت البيت تحمد لله انها ماشافت حد فى الصاله وسارت فوق غرفتها ..طاحت على الكرسى اتصيح و تصيح ياربى زاايد معقوله ما اصدق اخافه يخبر خالد و بعدين بيذبحنى ولله بس فى عيون زايد شفت كلمه عتاب صدق انى احب زايد بس هو للى تخلى عنى ..

::++ فى سياره زايد::++

وقف زايد صوب باركنات العين مول و حط راسه على السكان ونزلت دمعته غصبا عنه معقول ياحمدووه تسووين جذا معقوله انا مب مصدق حرااام شو للى يصير ما اقدر استحمل للى انا فيه كنت احسبج تحبينى عثرج انسانه استغفر لله شو يالس اقول انا بعد ..

فى هالوقت يرن تلفون وكان خالد للى متصل اول ماشاف الرقم خذ فتره لين مارد عليه بعدها استسلم ورد
زايد: الووو
خالد: شو وينك عنبووه ليش ماترد
زايد: لا و لله خليت التلفون فى السياره
خالد: هيه ما بتخاوينا فى بيت حمد مع الشباب
زايد(تذكر موقف حمد): لا تعبان انا
خالد(مستغرب): اول مره
زايد: خالد ما اريد اروح و لله تعبان و مشغول بعد
خالد: مشغول فى شو
زايد: فى معاملات فى الشركه لازم اخلصهم
خالد: لا و لله عيل خلاص بستسمحلك منه
زايد: حصل خير

++:: بعد ما سكر خالد::++

زايد قعد يفكر حليلك ياخالد ماتعرف شو صار احسن لى ارد البيت وارتاح ....اول مادخل شاف ساروه و ابتسم لها وسار فوق ...
ساروه(اطالع مها): شو فيه ؟؟!!
مها: سيرى شوفيه
ساروه: هزرج
مها: هيه عيل شو يالله سيرى

ركضت سارووه ورى زايد قبل لا يسكر مسكت الباب ..
زايد: ساروه شو تبين
ساروه: اريد ارمسك ممكن ادخل
زايد: دخلى
ساروه: انزين (سكرت الباب وراها)
زايد: شو تبين
ساروه: زايد انته شى فيك
زايد: لا ما فينى شى لا تخافين
ساروه: انته فيك شى بس ماتريد تخبرنى
زايد: انا مصدوم بس
ساروه: مصدوم من شو زايد
زايد: شفت شى ما توقعتها (يرفع عيونها يطالع من الدريشه) شى يهز القلب
ساروه: زايد لا تخوفنى شو صاير
زايد: احمد ربى يا ساروه انى انا للى ربيتج
ساروه(مستغربه): الحمدلله
زايد: تعرفين انا اشقايل علمتج واريد اطلب منج طلب
ساروه: تفضل اخوى و امرك واجب
زايد: وان شاء لله تنفذين للى اقوله لج يا سويره ما اريد امووت من داخل اكثر
ساروه(خايفه): بسم لله عليك قول
زايد: اباج تحافظين على سمعتج و سمعه اهلج ترانا شوفتج وشرفج
ساروه(تبتسم): زايد ممكن ارمس بعد ما خلصت
زايد: تفضلى
ساروه: بعد ماتوفى المرحوم انته للى ربيتنى حتى بوجوده و علمتنى الصح من الغلط و لا تفكر فى يوم انى راح اغلط و احط راسك فى لارض لانك ابوى و اخوى (تحبه على راسه)
زايد: لله يبارك فيج و الحين فهمتى كلامى
ساروه: هيه نعم و حط ايدك فى ماى بارد منى انا
زايد: ان شاء لله
ساروه: بخليك علشان ترتاح و لا تنسى باجر بنسير بيت يدى (تذكر زايد حمدوه و موقفها)
زايد: يصير خير
ساروه: يالله برااايك

::++طلعت ساروه من غرفه زايد ::++

وقفت ساروه فى المرر اشوى تفكر شو فيه زايد مب على عوايده يعنى ما بيتعشى شو نزلت تحت عند امها بعد ماسمعت صوتها ...نزلت بسرعه اول ماوصلت سلمت على امها و قعدت عدال مها ...
ام زايد: شحالكن ؟؟!!
ساروه: بخير امااايه
مها: خالوه شو هذا كله ؟!
ام زايد: هذى لج يابنتى
مها: بس خالووه و لله واايد
ساروه: شو وايد بعد بعد باجر بيودينا فهد دبى يا سلام
ام زايد: لا و لله متى قاللكم
ساروه: انا سالته بس قال بيشاورج و لان العرس مب باقى عليه شى بنشترى فستان العرس من اى مصمم فى دبى و الا تعالى شو رايج ؟؟!! (اطالع مها)
مها: ما اعرف و لله
ام زايد: لا تستحين يابنتى الحين بيدخلون المندوس للى شيته لج و بحط اغراضج بنفسى
مها: عسانى ما انحرم منج (تحب راس خالتها)
ام زايد: انتى وسارووه واحد
ساروه: هيه واحد بس صح مها خلاص انا و نتى خواااات حتى لو حرمه اخوى
مها: ان شاء لله ..ربى لا يحرمنى منكم

::++دخل فهد فى هالوقت::++
فهد: السلام عليكم
الكل: و عليكم السلام ..
فهد: حد شاف زايد ؟؟!!(يطالع مها وساروه)
ساروه: زايد فى غرفته يمكن رقد
فهد(مستغرب):لا و لله شو فيه زايد
ام زايد(خايفه): شوو فيه ولدى (كانت تريد توقف وقفتها ساروه)
ساروه: امااايه اشفيج زايد مافيه الا كل خير لا تكبرين السالفه و هيه صغيره
ام زايد: اشفيه كلمج ؟!! قالج شى ؟؟!!
ساروه: هيه كلمنى
فهد: شو قال انزين
ساروه: قال اريد ارتاااح تعشوا ؟؟!!
ام زايد: مب طبيعى ولدى بسير اشووفه
ساروه: اماايه بلاج الحين
مها: ساروه خليها تسير اتشوفه
ساروه: بس يا مها
فهد: لا بس و لا شى اماايه سيرى شوفيه
ام زايد: برايكم (وهيه تمشى ) يالله ياولدى اشفيك

::++غرفه زايد++::

اول مره من توفى ابوووه تنزل دمعه من دموع زايد مب مصدق للى صار جدام او ماقدر يستوعب ان حمدوه تقدر اتسووى جذا قعد يتجلب يمين شمال بس شكلها و هيه خايفه كان مرسوم على السطح و الطراق للى عطاها ايااه مستحيل ينساه حط ايده مثل اليهال على ويهه ويصيح بقوه و اندافع......... زايد (مزيون العين) ينهد حيله و يضعف بهذى الطريقه ....اااااااااااااه يا حمدووه ليش تسوين جذا فينى انا حبيتج من بين بنات العين كلهن و اخترتج شريكه حياتى شكلى غلطت وشو غلطت بعد هذى بنت خالى و على حق عليها ااااه ياربى ....دموعه ماوقفت ودخلت امه و شافت الغرفه مظلمه سكرت الباب و بعدين ولعت لليت شافت زايد منسدح على السرير و يطالع فوق ودموعه على خده ما انتبه على امه للى تقربت منه و هيه خااايفه ..

ام زايد: زااايد ياولدى اشفيك؟؟!!
زايد: ماشى و لله
ام زايد: ليش كنت اتصيح

ولا اراديا طاحت دمعته على خده ويلتفت على امه و عدل قعدته وسار صوبها وحط راسه على ريولها: اماااايه انا تعبان و لله تعبان (يصيح)
ام زايد: بسم لله عليك ياولدى اشفيك قولى اناديلك فهد هو تحت يحاتيك
زايد: لا ما اريد
ام زايد: اشفيك ياولدى قولى
زايد(يقعد على الكرسى): اماايه و لله قلبى يعورنى من داخل فخاطرى اموت و افتك من الدنيا
ام زايد: استغفر لله العظيم لا تقول جيه ياولدى اذا انته مستغنى عن نفسك انا هب مستغنيه عنك
زايد: ان شاء لله (يحط ايده على راسه)
ام زايد: تريد عشا
زايد: لا ما اريد
ام زايد: ما يصير ياولدى لازم تتعشا اخوانك بيحاتونك
زايد: ماعليه
ام زايد: زايد اقعد اقرى لك قران اشويه تريح قلبك و تستريح
زايد: ان شاء لله امااايه
ام زايد: يدك يريدنا باجر عنده
زايد(تذكر الموقف): ان شاء لله بس متى
ام زايد: ان شاء لله على عشر الصبح بنسير
زايد: يصير خير ان شاء لله
ام زايد: ها ما تبا تتعشى
زايد: لا برقد
ام زايد: خلاص ياولدى برااايك اذا نزلت بالليل بتلقى عشاك فى الميكرويف
زايد: ان شاء لله

طلعت ام زايد من غرفه زايد للى قعد يفكر كيف باجر بيجابل حمدوه للى هدته و خلته انسان ضعيف ....

::++فى الصاله::++

نزلت ام زايد اول مادخلت الصاله سألها فهد عن اخوه ..
ام زايد: مايريد يتعشى و لله انه هالولد شى فيه
فهد: ماعليج اماااايه ان شاء لله بيكون بخير بس وينه عبوود
ام زايد: ما ادريبه

::++يدخل عبدالله::++

عبدالله: انا اهنيه
فهد: ولد حلال طويل عمرك
ام زيد: امين يارب العالمين (اطالع ساروه و مها) اتجهزن باجر بنسير بيت يدكم
ساروه: يا سلااااااااااااااااااااااااااااااااااااام
عبدالله: ليش قلتيلها ؟؟!!
ام زايد: اشعنه
عبدالله: باجر من الفير وااعيه
فهد: عفانا لله
ساروه: نعم نعم ؟؟!!
مها(وقفت): خالتى احط عشااا
فهد: قعدى الخدامه بتحطه (يطالع مها)
ام زايد: ليش يابنتى بتيبينه ترى فى خدامات
مها: ان شاء لله خالوووه
ساروه: تريد تعشى الريل مب نحن
فهد: عيل انسه ساره انتى ما بتعشينه ريلج
عبدالله: من المطعم بتيب اكل و بتقول انها مسوتنه
ساروه: و لله للى يبانى لازم هو يطبخ
عبدالله: هيه تعالى يا ابووج تمى فى بيتج احسن
ساروه: عدال على الحرمه للى بتاخذها
عبدالله: اماايه بتختار لى
مها: خالوووه
ام زايد: هلا يابنتى
مها: متى بتردون باجر من بيت يدى
فهد(يطالع مها): انتى اول وحده بتركبين السياره
مها: بس استحى ؟؟!!
ساروه: وابووى عليج انا شو تستحين بنقعد مع حمدوه و موزوه و ميرووه
عبدالله: كلهم دلعتهم
ساروه: ليش انته مب لاقى حد ادلعه
فهد: اووهوووو بس عاااد هذووه وصل العشا
ام زايد: هذا من طباخ مها و ساروه
عبدالله: سارووه تطبخ معقوله
فهد: و النعم فيها اختى ؟؟!!
ساروه: لله يخليك ياخوى ولو انى قطعت البصل بس وقلبت الاكل بس مها للى متعبله كل هذا
ام زايد: و لله انها حرمه يالله تعشوا و كلكم رقود ماشى سهر باجر من الساعه عشر عند يدكم
الكل: ان شاء لله

تعشوا عربنا وكلهم سار غرفته علشان يرقد فى غرفه ساروه ..........مها قاعده تفكر و اطالع برع تقربت منها ساروه: مها ؟؟!!
مها: هلا ساروه
ساروه: فى شو تفكرين
مها: لا و لله ماشى بس.....
ساروه: بس شو ؟؟!!
مها: احس انى مثجله عليكم
ساروه(تضرب كتفها): لا و لله منو قال هالكلام
مها: انا
ساروه: ماماتى انتى حرمه اخويه فاهمه يالله رقدى
مها: شو زعلانه؟؟!!
ساروه: هيه و ليش ما ازعل بعد شو
مها: سوويره عااد
ساروه: .............................
مها: علشان خاطر خليفه
ساروه: ااااااااااااااه لا تضربين على العوق و لله بصفعج
مها: ههههههههههههههههه بس هيه نقطه الضعف
ساروه: ههههه قولى و لله يالله رقدى
مها: ان شاء لله

رقدت مها بعد ما اختفت مخاوفها وانها بتواجه مستقبل كله حب و حنان مع فهد للى بتتحمل مسؤوليات كبيره ...