منتديات بنوته - عرض مشاركة واحدة - { احسب الدنيــآ مثل آمي ,, ازعلــهآ و ترآضيني } ...

06-17-2010, 06:15 PM

الجــــ 22 ــــــــزء

ركب راكان السيـاره وبدون همس وصلـنا المطـار ..
راكان : يـلا بسـرعه ترانا متأخريــن ..
رحت ورى راكان وهو يخـلص الاجراءات .. وصلنا عند باب الطيـاره ..
راكان : تخافيـن ..؟
قلت : مادري .. اول مره الحيـن بركب الطيـاره .. وما اعتقد اخااف ..
راكان ابتسم: عيل يلا جدامي ..
ركبت ووقفت عند باب الطياره انتظـر راكان .. لان ما اعرف وين اقعد ..
اشـر لي راكان وين نقعد وقعدت ..وقعد جنـبي راكان ..
راكان بصـوت واطـي : انا آسـف .. حسـيت اني سخيـف يوم قلت هالكـلام ..
انا عارفه عن شنو هو يتكلم .. بس سويـت روحي ما اعرف ..
قلت : تتأسف على شـنو ..؟
راكان : على .. على .. لا ولاشـي ..
نزلت راسـي .. وفي بالي اسأله واايد .. بس مب هاي المكـان المناسب اني اسأل فيـه ..
وشوي الا تمشي الطيـاره .. وقالوا لنا نربط الحزام .. وشوي الا تسـرع .. حسيـت بالخوف .. التفت على راكان شفت ملامحه عاديه .. مسكت قبظـة الكـرسي بقـوه .. وشوي الا الطيـاره تطيـر ..طلع مني صـوت وانا ما ادري عن روحي ..
قلت وانا مغمضـه عيوني: يمـــااااه ..
راكان : ههههههه شفيــج ..
طالعته وانا ساكته .. حسيـت اني ما اقدر اتكلم .. لاعت جبدي وحالتي مب حاله ..
راكان : شفيـج ..؟ تبيـن بندوول ..؟
قلت : لا مابي ..
راكان : حطـي راسـج رقدي .. جدامنا وقت طويـل ..
طالعته بنظـرة يأس .. وتسندت وتميت اطالع الـ tv ..
وما حسيـت بروحي .. على طوول نمــت .. حسيـت شـي على راسـي وقمت بسـرعه متخرعه ..
راكان : هههههه شفيـج ؟
حطيت يدي على قلبي : شي على راسي ..
راكان : ايه انا عدلت شيلتـج .. لانها طاحت وانتي غرقااانه في النووووم ..
انحرجت وعدلت يلســتي ..
قلت : ابي الحمام ..
راكان : روحي كاهو جدااامج ..
قلت: ويـن ..؟
قام راكان ووصلـني الحمام .. غسلت ويهي ونشطت عمـري وتعطـرت وطلعت ..
قعدت ..
قلت : متـى بنوصـل ..
راكان : بقـى شوي ..
تميت انتظـر ..
وبعــد فــتره طويـله وصـلنا .. وقبل لا تهبط الطياره صار فيني الاتـي ..
مسكــت راكان من يده : الطــياره تهتــــز ..
راكان : ايه ادري .. لانها بتهبــط الحيـن ..
قلت : قول لهم يخففون .. وايد مسرعه ..
راكان : هههههه .. ساره لا تصيـرين بزر .. شي طبيعي هاي .. بس انتي سكـري عيونـج ..
سكـرت عيني بقــوه وانا ما سكه راسـي .. وبعد فـتره ..
راكان : ههههههه خلاص وصلـنا ..
تنهدت وشفت ان يدي ماسكه يده بقـوه .. ومن زود القوه مستويه يدي صـفرا ..
هديت يده وانا حاسه بالاحــراااج .. وعقب نزلــنا ورحـنا الفندق على طول .. لان راكان كان مرتـب كل شـي ..
دخل راكان قبلي الفندق وانا دخلت وراه .. ورحت على طول على الكنبه وانسدحت وانا اتنهد ..
راكان مبتسم : تعبـتي ..
قلت وانا مسكره عيوني وحاطه يدي على راسي : وااايـد ..
ومن بعد هالبطحه ما حسيت بروحي .. رحت في نوم عميــق ..

وعيـت على صـوت جرس الباب .. قمت بسـرعه متخرعه .. رحت الغرفه بسـرعه بنادي راكان يفتح الباب .. بس ما لقيـته .. دورته في كل مكان ما لقيـته .. طليت من العين السحريه لقيت راكان هو اللي على الباب .. فتحت له الباب انا اتنهد ..
قلت : خرعــتني ..
راكان : هههههههه والله انتي اللي خرعتيني ..
قلت : ليـش ؟
راكان : لا ولاشي ..
وراح المطبخ وكانت في ايده اكياس .. وانا رحت الغرفه .. شفت نفسي في المظره تخرعت .. كانت العبايه ملتفه علي ومعفسـه ( مكرمشه ) وبدون شيله وشعري واقف وويهي باين عليه التعب .. من حقه يتخرع .. اهااا.. عيل مساعه يوم قال لي انتي اللي خرعتيني .. يعني انا اللي مخرعتــه ..! وي مالت علي ..
دخلت الحمام ورحت اتسبح ولبست جلابيـه حرير .. لونها هردي واحمـر هادي .. وفيها حركه في اليد ووسيعه من تحت ..وعلى السدر فيها كرستالات كأن عقد .. طلعت من الغرفه ومشطت شعـري .. ورديت لفيته بفوطه ثانيه غيـر الفوطه اللي علي .. عشان الفوطه القبليه انترست ماي .. المهم ..دخل علي راكان وانا احط لي كريـم ..
راكان : انتي هنيه ..؟
قلت : لا هنااك ..
راكان : هههه انا حسبالي في المطبخ تطبخيــن .. قلت يمكن تفاجأني وتطبخ .. وما دشيت عليـج عشان ما اخرب المفاجأه يا بلفيـت يعني ..
ضحكت : هههههههه .. اي طبــخ الله سلمك .. انا ما اعرف اطبــخ ..
راكان : هــا ؟
قلت : والله ..
راكان : والسبقيتي اللي سويتيها لنا قبـل .. في بيتـنا ..
قلت : ايه هاي الاكـله الوحيـده اللي اعرف اسويـها .. وعصيـر فراوله ..
راكان : اهاا ..
رديـت احط لي كريم وحطيت لي كحل ..
اخذ راكان الفوطه اللي على راسـي وتم يلعب في شعـري ..
راكان : عطيـني المشط ..
قلت : شبتسوي .؟
راكان : بمشط شعرج ..
قلت : لا انا مشطته خلاص ..
اخذ المشط اللي على التسريحه وطالعني بنظـره .. والي فهمته من هالنظـره .. ان اللي في راسه بيسويه .. ضحكت وتم يمشط شعـري وتميـنا نسولف ..

وقضيـنا اول يوم في الفندق .. لاني كنت تعبانه وما ابي اطـلع .. ووعدني راكان ان بكـره بيطلـعني ويونســني ..

قمنا الصبح انا وراكان وطلعنـا ..
واحنا في السيـاره ..
راكان : هــا .. وين تبيـن تطلعيــن ؟
قلت : اممم .. اي مكان ..
راكان : نروح فوق الجبل ..
قلت : ليش ما نروح برج ايفل ..
راكان : اممم .. بكـره احســن ..
قلت : اوكي ..
ورحنا صوب الجبل اللي قال عنه راكان ..
وقعدنا في مكـان حــلو .. بس الجو وايــــــد بااارد .. وحولـنا الثلـج .. قمت افرك يدي وانفخ عليها عشان ادفـى ..
راكان : بردانـه ؟
قلت : ايه .. موووت.. برد ..
حط يده ورى ظهـري وقربـني صـوبه عشان يدفيني .. ابتسمت له ..
وتميـنا نسولف ونضحك ..
راكان : هههههههههههههههه .. خلاص سكــتي .. بسج تعليـق في خلق الله ..
قلت : ههه شاسوي فيهم .. هم اللي يايبيـن حق روحهم الكـلام .. والا في هالثلـج يلبسـون جي .. ما يكفيـهم الصيـف ..
راكان : ههه لا لان الصيـف عندهم شوي ..
قلت : طاح حظهم ..
راكان : بسـج يالعيـوز ..
ضحكت : ههههههه والله ماخذتها من هجوور ..
راكان : ايه هاجر سوالفها سوالف عيايـز ..
قلت : يحليلها والله .. وحشــتني ..
راكان : مب حولج الحيـن .. قاعده مع الريـل .. وناسيه العالم ..
قلت : الله يهنيهم ..
راكان : ويهنيـنا احنا بعـد ..
ابتسمت ..
راكان قام ومد يده عشان اقوم ..
قلت : وين بنروح الحيـن ؟
راكان : بنتمشـى ..
مسكت يده ورحـنا نتمشـى .. ومشينا صوب طريـج يشبه الفريـج .. على يميـناوعلى يسارنا اسواق .. تميـنا نتمشـى وراكان يقول لي مغامراته هو وربعه في فرنسا ايام البعثه يوم كان في الثانويه ..
راكان : ويوم كنـا في السكـن .. الظهـر تقريـبا .. كنـت انا ورفيـجي متملليــن .. والمدير ما كان يبي يطلعنـا .. يقول العصـر بنطـلع .. عاد احنا مناحسيـن .. نبي نطـلع الحيـن .. وكان جدام السكن بحيـره وحولها شيـر ( شجر) .. نزلنا بالخــش .. ووصلـنا عند البحيـره وتميـنا قاعديـن .. يحليلنا ما باعدنـا .. الا المديـر يشوفنا من فوق .. واسمع صـرخه .. راااااااكاااااااان ووجـــع ..التفت وراي الا اللاقيـه فوق من السكن يطالعني .. والتفت جدامي ما لقيـت جبـر رفيـجي .. كان منخـش ورى الشيـره الخايـن .. ونزل المدير بسـرعه وسحبـني انا وياه ودخلنا داخل .. وطلع كل المجموعه وخلانا انا وجبـر وهو قاعدين بروحـنا .. صـج تمللنـا بس حسيـنا بحلاوه المغامرات ..
ضحكت : ههههههههههههههههههه والله طلعت مب هيـن ..ههههههههه ..
راكان : هاي ما سويـنا شـي .. كنا ناويـن نباعد .. بـس صادنا بو نظارات .. والله للحيـن عايـش ..
قلت : هههههههه للحيـن ..
راكان : ايــه .. كل ما اروح الجمعيه اشوفه هناك .. يقول لي .. ايوه يا راكان ازيـك .. والله كبرت .. ومن هالكلام .. والمشكله كل ما اشوفه يقول نفس الكلام ما يغيـره ..
ضحكت : ههههههههههههههه .. حلو انك تشوف مديـرك .. انا الحيـن ولا ادري عن رفيجاتي ولا مدرسـاتي .. حتى اسامي مدريراتي ناسيتهم ..
راكان : انا بعـض ربـعي القداااام .. يجوني يبوني احل لهم قضاياهم وادافع عنهم ..
قلت : ليـش الشيـخ انت مصلـح اجتماعي ؟
راكان : بـالله ..؟ انا محامي مدام ساره ..
قلت : ايــــــــه صـــــح ..
راكان : اللهم لا تبليـنا .. جان ما اجيـج بكـره تقولـيـن لي من انت ..
ضحكت :هههههههههههه لا مب لهالدرجه ..
وشوي الا واحد يوقف جدام راكان وقام يرطن عليه بالفرنسـي ..
قلت حق راكان : فهمت ..؟
راكان : شوي ..
قلت : شيبي ؟
راكان : ههههههه عرف ان احنا تونا متزوجيـن .. يقول شكلنا اعجبه ويبي يرسمـنا على ما اعتقد ..
قلت : يلا يلا .. خله يرسمـنا ..
وقعدنا على كرسـي مجابل حديقه صغيـره ..
راكان : يقول ما يبي حركتـنا تكون جامده .. يقول سولفوا وتحركوا وهو بيرسم ..
قلت : يعني بيطلع تفننه عليـنا ..
راكان : هههههه ايه عليـج نوور ..
تميـت اسولف مع راكان ونضحك وهم يرسمـنا .. وعقب عطانـا الرسمه وقال لنا انه يرسم تعابيـر الوجه مب الملامح .. وتم يتفلسف ومادري شيقول ..
قضيـنا يومـنا كله بـرع .. وفي الليل رجعنا الفندق هلكــانيــن ..

قضيــنا شـهر العسـل كله بضحك .. وتعرفت على راكان اكثــر .. طيــب وحنووون .. ما يحب حد يزعل منه .. حتى تعامله مع اللي يبيعون وخادمين الغرف بطيـب .. ويضحك لهم .. شخصيـته وايد عجبتـني .. وحمدت ربي ان راكان من نصيـبي .. الله يخليه لي ولا يحرمني منه .. وقال لي ان احنا بنسكـن في البيت اللي شراه ايام الملجه .. والحمدلله انه مأثث ومخلـص .. ما احب عباله التأثيث ..
امــس رجعـنا الدوحه واليوم بنروح بيت اهلي ..
راكان : يـــــلا سـاااارووه .. هالكثـــر لبـــــــس ..
قلت : اصبــــــر شووووووووي ..
هاي بعد ما يدري اني ما مشطت شعري ولا عدلت ويهي ..
مشطــت شعــري ورفعته ..
وحطيت لي بودره وكحل .. والا يفتح الباب ..
راكان شهق : ما خلصـــتي..
ضحكت : ههههههههههه راكان عاد .. خلني اكشــخ ..
راكان : كشخـي بس هالكثــر ..
قلت : والله شوي شوي بـس ..
راكان طلع واسمعه يقول : اللهم طولج ياروح .. طلعوا كل الحريـم جي مب بس هجووور ..
ضحكت وكملت تعدلي على السريـع وطلعت ..
راكان : يـلا عمتـي الشيـخه طال عمـرج .. تفضـلي ..
ابتسمت وطلعنـا ..
وصلت بيت اهلي ونزلت على طووول مشتاقه حق امي وابوي ومشتاقله لهم كلهم ..
دخلت : الســـــــــــلاااااااام عليــــــــــــــكم ..
امي : ويـــــه بنتــــي ..
رحت لها بـسرعه وضميــتها ..
امي : ما قلتي انج بتوصليــن اليــوووم .. الحمدلله على ســلامتــكم ..
قلت : الله يسلمج ..
وانا شوي واصيــح ..
قلت : وين ابووي وخالي وتركي وينهم كلهم وحشوووني ..
امي : هالحزه كلهم يتجمعون .. انتظــري شوي .. الا وين راكان ..
قلت : هـاا ؟
امي : ريلج وينه ؟
قلت وانا اتلفت : ما دخل ؟
امي : لا ..
طلعت برع لقيـته واقف مجابل باب الصاله ..
ضحكني شكله : هههههههه ليش ما دخلت ..؟
راكان : وانتي رايحه سيـده شاخطته ولا كأن في حد معاج ..
ضحكت : هههههههههه سوري والله ..
مسكته من يده ودخلته ..
امي : وينك انت ؟
راكان يسلم عليها ويمثل انه معصب : عند الباب انتظـر حد يدخلني ومدام ساره مطنشــتــني ..
ضحكت : سـوووري والله ما انتبهت ..
راكان اونه رضـا: اووكي خـلاص .. الا وين خالي وتركي ؟
امي : بيجون الحيـن ..
راكان : عيـل انا استأذن وبجــي في الليل يوم اخذ ساره ..
امي : وراك مستعيـل .. الحيـن بيجون .. اقعد تقهوى ..
راكان : ما سلمت على ابوي .. بعديـن مـره وحده ..
راكان مسك قبضه الباب وابوي في وجهه ..
ابوي : هـلااااااااااا راكــان .. جيـت وخليت بنتي في فرنــسا ؟
راكان : هههههه لا كاهي قاعده عند امهـا ..
وسلموا على بعـض وانا رحت حق ابوي اركـض ابي اسلم علـيه ..
ابوي : ههههههههه هـلا والله هـلا بالغـلا .. الحمدلله على سلامتكم ..
قلت : الله يسلمك من الشـر .. شخباارك يبـه ..؟
ابوي : ابشــرج طــيب .. وانتي اخباارج واخبار شهـر العسل ..
انحرجت شوي : تمام الحمدلله .. كل شي تمام ..
ابوي : عســاه دووم ان شالله .. عساه دووم ..
راكان : يـلا خالي انا الحيـن استأذن ..
ابوي : ويـن ..؟
راكان : والله رايـح اسلم على الوالد .. ما مريـت عليـه ..
ابوي : الله يحفـظك ..
طلع راكان وانا تميـت مع امي وابوي واقول لهم عن المغامرات الحلوه اللي صارت لي هناك .. وشوي الا تركي وغايوه وولدها النتفه جو واقحص اسلم عليهم ووراهم خالي وسلمت عليه .. وتميـنا نسولف ونضحك .. وعقب فتـر جاو خالتي وبناتها واكتملت الحشـره والوناسه ..
نجوى : الا بسألج سـاروه ..
قلت : خيـر ..؟
نجوى : مسـتانسـه مع ولد العمه ..؟
ضحكت : ههههههههههه انتي شرايـج .؟
نور : بس نجوى بلشـت بالاسأله اللي ما لها داعــي ..
غايوه : هههههههه .. خليها تسأل وتتفحص .. ساروه .. ترى نجووه تقول انا متحلفه فيـهـا .. بس خلها توصـل الدوحه وانا اذبحها بالاسأله ..
ضحكت : ههههههههههه اسأله شنو ؟
نجوى : ايه بسأل .. احــم ..
مسكت جولها يابلفيت مايك ..
نجوى : اول ما وصلتي الطيـاره .. شسويتي ووين رحتو ؟
وبديت اجاوبها على الاسأله .. والاسأله المحرجه اضيعها .. وماجاوب عليها .. وتميـنا نسولف ونضحك ليـن الساعه 11 ونـص ..
رن تلفوني .. والنغمه كانت ( مو خساره مو خسـاره . لا وربي موخساره . انت تستاهل احبك . ياغلا وعيون سـاره )
نجوى نطت تبي تشوف الاسم اللي بيطلع في الشاشه ..
ضحكت : هههههههههه يعني من بيكوون ..
نجوى : لا ابي اشوف شنو مسميـته ..
قلت : مسميـته راكان .. عــادي ..
ابتعدت عن الصاله شوي ورديـت ..
رديت : هـلا ..
راكان : اهليـن .. هاا ماشبعتـي ..
قلت : من شنو ؟
راكان : من القعده ..
قلت : ليــش بتجيــــني ..؟
راكان : ايـه حبيبتـي خـلاص .. بكـره وراي دواام ..
قلت : من صجك ؟
راكان : ايه خلصت اجازتـي ..
قلت : اوووووه ..
راكان : هههههه ليـش بعد ما شبعتـي ..؟
قلت : ههههه مادري .. بس تذكـرت الجامعه ..
راكان : متى بتداوميـن ..؟
قلت : بعد شهـر .. للحيـن ما خلصت اجازتـي ..
راكان : يـلا الحمدلله .. هذا اخـر كورس صـح .. من بعدها بتتخرجيـن ..
قلت : ايه الحمدلله ..
راكان : ترى احنا نسولف في التلفون ..
قلت : انزين وشالغريـب ؟
راكان : الغريـب ان انا عند باب بيتكم وابي ادخل ..
قلت : صــــج ؟
راكان : ايه ..
قلت : هههههه سوري ما قلت لي ..
راكان : يـلا انطـرج ..
قلت : اوكي ..
رحت الصاله ..
امي : ويـنج انتي من مسـاعه ..
قلت : راكان عند الباب ..
خالتي : شــــنهوووو ؟ تو الناس .. السهر توها باديه ..
قلت : بكـره عنده دوام .. ما يقدر يتأخـر ..
خالتي : خليـه يروح وقولي له احنا بنوصلـج ..
قلت : لا معليـه خالتي .. مره ثانيه لان هو عند الباب ..
امي : خليـه يدخل .. هو قال يوم بيـاخذج بيـدخل ..
قلت : ان شالله ..
لبست عباتي واتصلت له ..
راكان : ويـنج .؟
قلت : امي تقول لك انزل ..
راكان : لااا شنو انزل .. انا لابـس بدله ..
قلت : عادي ..
راكان : قولي لها بكـره ..
قلت : يمه راكان يقول لج بكـره ..
امي بصـوت عالي عشان يسمع: لا الحيــــن ..
قلت : سمعــــت ..؟
راكان : هههههه اوكي بنزل وامـري لله ..
سكرت ..
قلت : بينزل ..
امي : حســبالي ..
خالتي : عيـل انا بروح الصاله الثانيه ..
قلت : ليـش خالتي .. خله يسلم عليج ..
خالتي : لا يختي استـحي ..
نجوى : وااااهههههههههههههههههههههه .. شنو يمه .,.؟ شقلتــــي ..؟ مستحــى على كبــر .. ما ينــاااســب ..
خالتي : انتي انطمـي واسكــتي .. وتعالوا معاي ..
نجوى : لا ابي اشوفه ..
خالتي : تشوفيــن منو ؟
نجوى : ابي اشوف ريـلها .. ما شفته ..
خالتي : يعني لازم ..
نجوى : ايــه يمه ابي اشوفه ..
خالتي وهي رايحه : بنــات اخـر زمـن .. الام تستحـي والبنات قويـات العيـن ..
ضحكت على خالتي ونجوى ..
طق الباب وفتحته ..
راكان : السـلام عليـكم ..
الكل : وعليـكم الســلام ..
راكان قعد : شلونكم بـنات ..
ردوا : بخيــر ..
راكان : اوه غايه هنيه .. شخباارج ..؟
غايوه : طيبـه طاب حالك .. اخبارك انت .؟
راكان : زانت اخبــارج .. الا وين محمد ولدج ؟
غايوه : راقد .. اجيبه لك ..؟
راكان : لا اذا راقد خليـه ..
غايوه : لا الحيـن بقعده عشـان ياخذ الدوى .. بروح اجيـبه ..
راحت جابته له ..
راكان مد يده عشان ياخذه وسم باسم الله ..
راكان يطالع محمد : يحليــــه .. يشبهنـــــــي ..
ضحكت : هههههههههه عط نفسـك الراحه .. يشبه خالته ..
راكان : لا حبيبتـي .. شوف شوف العيـن ..
قلت : على كيفك ..؟
غايوه : لا يشبهك ولا يشبهها .. يشبــه ابووه فديته ..
راكان : فديته منو ؟؟ محمد والا ابوه ..
غايوه احمر ويهها : الاثنيــن ..
ضحكت : ههههههههههههههههههه ..
استانس اذا حد انحرج غيـري .. ^ــ^..
شرب راكان قهوته ..
راكان : يـلا سـاره ..
وطلع وانا حسيـت ان حد سحبـني دخلني داخل البيت مره ثانيه ..
قلت : شــنوووو ؟؟
نجوى فاتحه حلجها : هذي ريـلج ..؟
قلت : ايه ..
نجوى : هـااي راكان ..
قلت : ايه شفيــج ..
نجوى سوت عمـرها مغمى عليـها ..
ضحكت : شفيـج ؟؟
نجوى : عذااااااب .. يجـــــنن ساارووه .. سلفيـني اياه ..
قلت : يالحيـوووووانه .. استحـي على ويهج ..
نجوى : والله ساروه يجنن كشخه كشخه ..
قلت: ذكري ربج وصلي على النبــي .. ترى ابيه ريـلي ..
نجوى : ما شالله تبارك الرحمن .. هااي الريايل .. مب عيال عماتي وعيال عمامي .. كل واحد يحسـب نفسه محد قده .. مـااالت عليهم بـس ..
ضحكت : ههههه الله يخس ابليســج ..
واسمع ذااك الهرن اللي ينفضــني ..
نجوى : ويـــه روحي روحي لا يطلقج ..
قلت : فااال الله ولا فالج يالعنز .. يالله يالله باااي ..
رحت بسـرعه وركبت السياره وانا اتنهد ..
راكان : هالكثــر ؟
قلت : سوووري ..
راكان وهو يحرك السيـاره : يا كثــر ما تعذرتي اليوم ..
ورحنا البيـت وراكان على طول دخل وبدل ونام .. اما انا بدلت وتميـت قاعده انتظـر النوم يجيني .. رحت الصاله تميـت اطالع التلفزيون ليـن ما حسيـت بالنعـاااس ورحت ارقــد ..

وعيـت على اصوات ضايقتـني .. فتحت عيني وشفت الليت مفتووح .. يعني طلع الصبـح .. التفت ما لقيـت راكان .. واسمع صوت في الحمام .. قلت اكيـد راكان اليحن بيروح الدوام .. قمت على حيلي ورحت الحمام الثاني واغتسلت على السريـع وطلعت رحت المطبـخ على طول .. تميـت احووووس ابي اسوي له فطوور .. بس المشكله ما اعرف شنو ابي اسوي ..
دخل علي راكان ..
راكان : قااعده من صبــح شتسويـن ؟
قلت : بسوي لك فطـووور ..
راكان : اهااا .. يلا سوي عيـل .. انا بنتظــرج في الصاله ..
قلت : لا لا لا لا .. مافي ..
راكان وقف : شنو ؟
قلت : تسوي معـاي ..
راكان : ما اعرف اسوي شـي ..
قلت : حتى انا عادي .. حط اي شي على النار يستوي لك شي ..
راكان : ههههههههه شنو هاي بعد ..
قلت : هههه هاي نظـريتي ..
راكان : اوكي يـلا ..
قلت : طلع بيضتيـن ..
راح وجاب بيضتيـن .. وتميـنا نشتغل وطلع نص الاكل مالح ونصه ماصخ ونصه محرووق .. بس أكلناه .. لازم الواحد يفتخـر باللي يسويـه .. ^ــ^

مـر اسبوع .. ونور انخطبــت من ريال طيـب واهله زينين يصيـر رفيـج جاسم اخوها .. وملجتها الاسبووع الياي .. وعلاقتي مع راكان كل ماله وتصيـر احسـن ..

رجع راكان من الدوام ..
راكان : جهزي روحج .. على المغرب بنروح بيت ابوي ..
قلت : ليـش ؟
راكان : امي عازمتـنا ..
قلت : واعزمت هجوور ؟
راكان : والله مادري عنها ..
دخل الغرفه يبدل وانا رحت المطبخ اجهز الغدى ..
تغديـنا وراح راكان الغرفه ينام .. وانا انسدحت على الكنبـه طالع فلم .. وغطيـت ..

قمت وشفت راكان مجابلني ويطالعني وهو مبتسم ..
عدلت قعدتي بسـرعه : شفيــك ؟
راكان : ولا شـي ..
قلت : ليـش جي تطالعني ؟
راكان : ههههه شفيـج حبـي .. عادي .. بـس يـلا روحي تجهزي .. بنروح بنت ابوي الحيـن ..
قلت : راكـــان ..؟
راكان : عيـونه ..
ابتسمت : تسلم لي عيونك .. بـس بغيــت اسأل .. ابوك شخباره ..؟
راكان : بتروحين له الحين وبتشوفين اخباره ..
قلت : لا .. مـره من زمان قالت لي هاجر انه متغيـر وصايـر كلـه يهاوش ..
راكان : ايه هاي فتـره يات وعدت ..
قلت : من شنو ؟
راكان : مادري .. بس كله يسب في ذياب .. انتي ما عليـج .. يلا روحي لبسـي لا نتأخـر ..
قلت : اوكي ..
رحت تسبحت ولبـست تنوره زيتيه حرير وفيها من تحت دانيـل بيــج .. وبدي بيـج وفيـه شغلات بالزيتي .. وحطيت لي مكيـاج بيـج وشخطت الكحل في عيني وحطيت لي قلوس لونه نفس لون شفايفي .. مشطت شعري ورفعته بكليب زيتي ولبست عباتي وطلعت ..
ورحنـا بيـت بو غيـث .. اول ما دخلت الصاله ..
دخلت : الســلام عليــكم ..
عمتي قامت بابتسامه : عليـكم السـلام ..
رحت سلمت عليها ..
عمتي : الحمدلله على سلامتكم ..
قلت : الله يسلمج من الشـر ..
سلم عليها راكان ..
عمتـي : شخبااركم شمسويــن ..؟
راكان : الحمدلله بخيــر ..
قلت : عمتي الا وين هاجر ..
عمتي : للحيـن ما يات ..
عمتـي : الا ما سألتي عن اريـج ..
ابتسمت بفشيـله : لا انا ادري انها هنيه .. وعلى ما اعتقد هي تدري بعد ان احنا بنجـي .. يعني المفروض هي تسأل ..
عمتي طالعتني والتفتت .. طالعت راكان كان يطالعني وهو شكله كاتم الضحكه .. ابتسمت وطلعت جوالي لان ياني مسـج .. وكان المسج من لطووف ..
" قدرك بقلبي حي لا تحسبه مات ..
رغم المشاغل وانقطاع المراسيل ..
سامح من يعزك لو حصل منه تقصيـر ..
محد تجي دنياه حسب اختياره ..
ربك عطاك من الغلا لين خلااك ..
تسكن قلوب الناس لو كنت غاايب .. "

وااي فديتها لطوووف ... تميت ادور مسجات حلوه ما لقيـت .. مسجاتي كلها سوالف ..
قلت : راكان عندك مسجات حلوه ..
راكان عطاني جواله : هااج شوفي ..
خذته وتميت انبـر .. سمعت عمتي تقول ..
عمتي : وعاادي تعطيـها جوالك ..
راكان : ايه عادي .. شفيـها ؟
عمتي : لا بس محد سواها قبلك ..
راكان : هه شفيـها زيـن ..
عمتي : بعد ما تدري وين بتدخل ووين بتتعبث ..
كنت برد بس راكان سبقني ..
راكان : انا واثق فيها .. وخلها تسوي اللي تسويه في جوالي .. حلالها فديـتها ..
فديــــــــــتك والله انت .. محد حاس فيني وعارف قيمتي غيـرك .. فديت هالخشم والله .. لقيت مسج حلو وطرشته لي ومن جوالي طرشته لها ..
اريج : رااااااكااااااان رجعـــــت ..
راكان قام : لا توني في المطـار ..
اريـج راحت له مستنه : هههههههههه .. والله وحشتني ..شخبااارك ..
راكان : طيـب طااب حالج .. انتي شخباارج ..؟
اريج تنهدت : نفس كل يوم ..
واخيـرا التفتت علي ..
اريـج : اوه ساره .. شخباارج .." وسلمت علي "
قلت : بخيـــــــــر دام اني مع حبيبي ..
اريج طالعتني وطالعته وراحت فوق بسـرعه ..
عمتي : يعني انتــي متعمده تجرحيــنها ..
شهقت : ليــش انا شقــلت ..؟
عمتـي : يعني انتي ما تدريـن ان البنت تعقدت بعد ما انفصخت خطوبتها من ولد عمها ..
قلت : وانا شدراااني ..
عمتي رفعت ثيابها شوي عشان تمشي اسرع وراحت لها .. وانا تمـيت قاعده ومنزله راسـي ..
راكان : يـــــــه .. ماعليــج منهم اقوول .. كلهم خرااطيــن ..
قلت : والله ما كنت اقصد ..
راكان : خليهم يولون .. وولد عمها ما فصـخ الخطوبه منيه والدرب .. هاااي كله من سوواد ويهها .. بس خليني سـاكت ..