منتديات بنوته - عرض مشاركة واحدة - { احسب الدنيــآ مثل آمي ,, ازعلــهآ و ترآضيني } ...

06-17-2010, 06:14 PM

الجـــــــ 21 ـــــــزء ..

بعد فتـره طويـله من انتـظـارنـا.. طلعت السسـتر وشفت ماجد نقـز صـوبـها ..
ماجد : خيــر بشـــري ؟؟
السستـر : مبــرووك .. جاكم ولد ..
ماجد : الله يبارك فيـج الله يبارك فيـج .. انزين وغايه شأخبارها ؟
السستـر : الحمدلله .. الولاده عدت سليمه ..
وراحت .. وكل واحد فيـنا يبارك للثـاني .. وودو غايوه غرفه خاصه ورحـنا كلـنا عندهـا .. تميـنا شوي نتحمد لها بالسـلامه وعقب رحـنا عنها عشـان ترتحا واحنا بعد ننام ..

اول ما وصلت البيت نمت على طول بدووون مقدمــااات ..

وعيـت على الساعه 12 الظهـر وحاسه روحي متكســره .. قمت شفت 3 مكالمــات ..
وحده من لطوف و2 من راكـان .. رحت الحمام وتسبحت وخليت الفوطه على راسـي ورحت عند التلفوون ..
واااااي فديـــتها لــطوف .. والله لها وحشـــــه .. اتصلت لها ..
ردت : هــلا والله .. هلا بســاره ..
قلت : هلا وغلا فديـــتج .. شخبــارج وشخبـار خالـي ..؟
لطوف : الحمدلله كلـنا بخيــر ... انتو شخبااركم ..؟
قلت : الحمدلله بخيـر كلـنا .. وغايوه ربـــت ..
لطوف : صـــــــــج ..؟ شياابـت ؟
قلت : يابت ولد ..
لطوف : وااي فديـــــتها .. شسموووووه ؟؟
قلت : والله مادري تصدقيـن .. للحيـن ما سموه على ما اعتقد ..
سمعت لطوف تكلم خالي تقول : مشـاري غايه ربـت ..
خالي : صـج ؟ شيابت ؟
لطوف : يابت ولد ..
خالي : انتي من تكلميـن .؟
لطوف : اكلم ساروه ..
خالي : عطيني عطيـني ..
خالي : الووووووووووووووووووه ..
قلت : هــــــلاااااا بالمعــــــرس ..
خالي : هههههه اهليــــن .. شخبااااركم ..؟
قلت : الحمدلله كلـنا بخيـر ونسأل عنك يالقااطع ..
خالي : والله انا مشغول .. المفروظ انتو اللي تسألون ..
قلت : يـاااسـلاااام ..؟
خالي : بشوووف اذا خذتي راكان ورحتوا شهر العسـل بتسأليـن والا ..
ضحكت : ههههههههههههههههه ..
خالي : غايوه ربـت ولا تقول لـنا ..؟
قلت : ههههههه وهي شدراها ان هاليوم بتربــي ؟؟
خالي : المهم .. هي شأخبــارها الحيـن ..؟
قلت : الحمدلله .. هي امس ربـت .. واليوم ما رحت لها ..
خالي : وليش ما رحتـي ؟؟
قلت : توني قايمه من النوم ..
خالي : اهااا .. ومتى عرسج انتي الشيـخه ..
قلت : اذا رجعتـوا انت والشيـخه ..
خالي : واذا ما نبي نرجع ..
قلت : بيفووتكم العــرس ..
خالي : عااادي .. اصلا قعدتــي مع الشيـخه تسوى كل شـي ..
قلت : زين زين زين .. خلك قااعد مع الشــيخه ولا تحضــر عرســي .. انا الغلطــانه اللي رايحه عرسك انت وياها .. والبطــايق ولا بتدور عندكم .. وبشووف شلوون بتحضـرون ..
خالي : ههههههههههههههه الله يقطع سوالفـج .. مسويه روحج زعوله بعد .
قلت : من صـجي انا اتكلـم ..
خالي : روحي زيـن .. انا بدخل مع راكان .. وبدخل لطيفه مع الفرقه اللي بتجيبيـنها ..
ضحكت : ههههههه انا بجيـب فرقه ريايل ..
خالي : ايا جليله الحيـا ..
قلت : ايه صـج .. بخليـهم ورى الحاجر .. احسـن ..
خالي : مالت عليـج .. المنـه عليـج اصـلا .. انتي اللي بنتدميـن لو ما حضـرنا عرسـج ..
ضحكت : هههههههههههههههه عشـان سكـتك قلت المنه عليـج ..
خالي : تراج خسـرتيني ..
قلت : انا المتصـله ..
خالي : بعد خسـرتيني .. يـلا سكـري وسولفي مع راكان جان فيج سوالف ..
قلت : ايه ما تبي وقتك يضيـع بدون ما تسمع صوتـها ..
خالي : ايه تراج أخرتي عليـنا الطلـعه ..
ضحكت : ههههههه اوكي عيـل .. مع السـلامه .. وسلم على لطوووووف وااااايد .. وبوس خدها اليميـن واليسـار .. وقول لها من ساروه ..
خالي : ان شالله ما طلبـتي شـي .. اي اوامـر ثانيه ..
قلت: هههههه لا سلامتـك ..
خالي : يـلا مع السلامه وسلمي على اللي يسأل .. واللي ما يسأل مب لازم ..
قلت : ههههه اوكي ..
خالي : هههههه في امان الله ..
قلت: في امان الكريـم ..
سكـرت من عند خالي وما كان لي نفس اسولف مع راكان .. نزلت الصاله .. ما لقيـت غيـر خالد وريم يطالعون التلفزيون ..
قلت : وين ماما ..؟
خالد : امي طلعت من الصبـح ..
قلت : ووين مي مي وفوم ونصـور ..؟
خالد : فطوم وميمي معاها .. اما نصـور مادري ويـن ..
ريموه : امبـلا انا شفـته في المطبخ مع الخدااامه ..
قلت : ريموه لا تصاارخيــن صووتج مززززززززعج..
ريموه : كيـفي والله ..
قلت : والخدامه وين ؟
خالد : شفتها راحت الميلس ..
ريموه طلعت لي لسانها ..
قلت : مالت عليـج ..
رحت المطبخ وخذت لي خياره وشفت نصور ياكل تفاح مقطع .. طالعني ومد لي لسانه .. صديت عنه اوني زعلانه منه وطلعت ورحت غرفتي ..
شفت تلفوني يرن ..
رديت وانا امضغ الخيار : هـلا والله ..
راكان : هلا من ؟
قلت : هههههههه انا سـاره ..
راكان : ليش جي صـوتج خرعتيني ..
قلت : كنت اكل خيار .. هههه ..
راكان : بالعافيـه .. شخباارج ؟
قلت : الله يعافيـك .. الحمدلله بخيـر .. انت اخباارك ..؟
راكان : مب بخيـر ..
قلت : افااا .. ليـش ..؟
راكان : صـاروا يتغلون عليـنا الحبايـب ..
قلت : وي ما عندهم سالفه ..
راكان : تقوليـن لي ؟
قلت : اعذرهم يمكن مشغوليـن ..
راكان : لا ما اعذرهم .. الحيـن ابي ترضيـه ..
قلت : وشنو نوعـها هالترضيـه ..؟ ماديه معنويـه ؟؟
راكـان : انا الحيـن من عشـر دقايق طالع من شغلي .. ابيـج تفتحيـن لي باب بيتـكم لاني قريــــــــب ..
قلت منصدمه : هـاااااااااااااا ؟
راكـان : لا مافي ها ولا شنو .. مافي .. انا عند بابكم .. يلا .. طن طوووووون ..
قلت : شنو هاي طن طووون .؟
راكان : صوت الجرس ههه ..
قلت : ههههههههههههههههه بس جرسـنا مب جي ..
راكان : مب مهم .. وشوفي .. ابيج تطلعيـن لي جـي .. لا مكيـاج ولا لبست عدل ولا شـي .. ابيـج طبيعيـه ..
قلت : لاااااا .. خلني اكشخ لك شوي ..
راكان : نووووو .. يلا افتـحي الباب .. والله ان عند الباب .. تبيني اطق الجرس .؟
قلت : ايه ..
ورن الجرس ...
شهقت : يعني من صـــــجك ..
راكان : هههههههه عيل مساعه تحسبيني اشـلخ ..
جابلت المنظـره : لحظه شوي زين انشف شعري ..
راكان : نووويه .. انا قلت لج ابيج جي ..
قلت بترجي: راااكااااااان ...؟!
راكان يقلدني : سـااااااااره ..؟! يـلا ترى الشمس حرقــتني ..
قلت : الخدامه ما بطلت لك الباب ..؟
راكان : لا خالد بطل لي الباب .. بس ابيج انتي تطلعيـن لي ..
قلت : اوكي عيل يلا بااي ..
راكان : بباي ..
سكرت منه ورحت جابلت المنظـره عدلت ويهي بيدي وشلت الفوطه ومشطت شعري بسرعه وربطته وخليته كأنه ذيل الفرس .. وتميت ببجامتـي ورحت اركض تحت لقيته قاعد في الصاله .. انحرررررجت لاني جيـت اركـض
قلت : اوه انتي هنيه ..
راكان وقف : هههههه ايه تصدقيـن ..
شفت خالد وريموه يطالعوني ويطالعونه .. حسيـــت اني قاعده في ناار من كثـر الاحرااج ..
قلت : انزين تعال الميلس ..
راكان : يـلا ..
وسبقته ورحت الميـلس .. فتحت الباب لقيت الخدامه معطره الميلس ومبخـرته .. عاد شالمناسبه مادري .. توني ابي ادخل الميـليس الا راكان يسحبـني ..
تخرعت : شنو ؟
راكان : انتي ما لاحظـتي انج ما سلمـتي علي ..
ابتسمت بأحراج ومديت يدي ..
سحب يدي وقربني صوبه وباسني على خدي .. افتشـــــللللللت
قعد على الكرسـي وانا رحت قلت حق الخدامه تسوي عصيـر وجاي وقهوه ..
راكان : وينـهم ..؟ محد في البيـت ؟؟
قلت : مادري .. يمكن في المستشفـى ..
راكان : في المستشـــــفى ؟
قلت : ايه حق غايوه ولدت ..
راكان : صج والله ؟ شيابت .؟
قلت : ولد ..
راكان : بالمبـاارك ان شالله .. عيـل صـرتي خالـه ..
ابتسمت : ايـه ..
يات الخدامه وعطتـه العصيـر ..
راكان : حلو شكلج جـي .. ليـش تكشخيـن ..؟
ابتسمت ..
راكان : يـــه شهالحيــا سـاره ..؟ شالسالفه ؟؟ في التلفون صـوتج يلعلع ..
ضحكت : ههههههههه شاسوي بعد ..
راكان : شوفي انا الحيـن بروح .. ويوم الخميـس مابيج جي .. ابيج انتي تسولفين وانا سـاااكت ..
قلت : ان شالله ..
راكان : ما تبيني اوصلـج المستشفـى حق اهلـج ..؟
قلت : لا الحيـن بيجون ..
راكان : لا امبـلا بوصـلج ..
قلت : لااااا الحيـن بيجون والله ..
راكان : لا مالي خـص ..
شفته من شكله انه مصـر ..
قلت : اوكي بس بلـبس ..
راكان : يـلا انا بنتظـرج ..
طلعت من الميلس شفت الخدامه مساكه دلال القهوه والشاي ..
قلت : وديه داخل وصبيله شـاي زيـن ..
الخدامه : اوكي ..
ورحت طيـراااان فوق البـس ..
لبــست تنوره تركوازيـه وسوده وبدي اسود .. وحطيت لي كحل بني خفيــف ومسكت شنطـتي وطلعت ..
دخلت الميلس لقيـته يشرب شاي ..
راكان : هــا خلصتـي ..؟
قلت : ايه ..
راكان : انزين تعالي شربي شاي وقهوه ..
قلت : لا مابي ..
راكان : لا حـلو ..
ضحكت : ههههههه مابي .. بس انت شربت شاي ما شربت قهوه ..
راكان : ايه خلطتهم اثنينهم مع بعـض ..
قلت : هـاااااا .؟
راكان : هههههههه يـلا يـلا امـشي لا نأخـر ..
قلت : يـلا ..
طلع وانا وراه .. فتح لي الباب واستحيـت .. ركبـت جدام مع اني كنت ناويه اركب ورى .. وركب هو بعد السيـاره ..
حطـت اغنيـه فداك العيـن ..
راكان : هـذي الاغنيـه .. اهداء منـي لـج ..
قلـت : لـي انا ؟
راكان : هه ايه ..

انا لاجيت ابهديلك .. عيوني لك ابهديها ..

واذا ما كفت عيوني .. فداك العيـن وراعيها ..

انا عمري فدى عمرك .. انا كلي تحت امرك ..

لانك اغلى شي عندي .. في هالدنيا ومافيـها ..

انا من لي في هالدنيا ..عشانه اسهر واحيـا ..

ومن غيرك اذا شفته ..ينسيـني بلاويـها ..

اشوفك فرحه همومي ..واجمل شي في يومي ..

ويكفي يوم اناظر فيك .. أرى نفسي والاقيـها ..

انا من كثـر ما اغليـك .. واحبك حيل وميت فيك ..

ابي بس تطلب عيوني .. واقولك خذها مابيـها ..

وتدري يابعد هالنـاس ..كثر ما اعشقك باحسـاس ..

احس روحي تبي تسأل .. انا والا انت راعيـها ..

طول الاغنيه وانا اسمعـها كنت مستحيـــــــه ..
راكان : اعجبــتج ؟
قلت : واااايد ..
راكان : يلا مافي اغنيه اهداء لي ؟؟
قلت : اممممم .. ايه بس في جوالي .
راكان : اوكي .. اهم شي نسمع ..
طلعت جوالي وحطيت اغنيه .. عيون سـاره ..
قلت : هاي اهدااء مني لـك ..^.^
راكان يـلا نسمع ..

مو خساره مو خساره ..

لا وربي مو خساره ..

انت تستاهل احبك ..

يا غلا وعيون سـاره ..

يا غلا وعيون سـاره ..

لا تحاتي لا تحاتي ..

انت يا عمري وذاتي ..

انا اصلا لولا حبك..

مالها داعي حياتي ..

راكان : يـه .. صـج ؟
قلت : شنو ؟
راكان : هالكلام الي قالته صـج ؟
ضحكت : ههههههههه ايه صـج ..
كملـنا طريـجـنا .. بس شفت كأن الطريـج صار طويـل وغيـر ..
قلت : وين بتروح ..؟
راكان : بتشوفيـن الحيـن ..
قلت : لا صـج راكان .. ويـن بتروح .. خلاص ردنـي البيـت .. تلاقيـهم رجعـوا الحيـن ..
راكان : ههههه شفيـج خايفه ..
طالعته وكان يطالع الشارع .. التفت صوب الدريشـه اشوف السيارات .. وانا خايفـه ..حتى خايفه اتصل حق امي اقول لـها والا اي حد ..
راكان : يـلا وصـلنا ..
نزلت وكـنا مجابليـن مطعم السـاحه ..
قلت : شنو ؟
راكان : شنو اللي شنو انتي بعد .. ههههههههه ساره انتي شفيـج ؟
قلت : راكان لا تلومنـي .. اول مره اطلع معاك ولا عارفه وين بتوديـني ..
وياتني الصيحه ..
راكان قرب صـوبي ..
راكان : سـاره .؟ شفيـج يمه .. انا يايبـج مطعم مب مقصبـه .. شوفي حـتى ..
قلت : وانا شدراااني ..
راكان : هههههههههه .. يلا زين امشـي .. يالصيـاحه ..
حط يده ورى ظهري ودخلـنا المطـعم ..
قلت : راكان بتصل حق امي ..
راكان : ليـش ..؟
قلت : يمكن تنتظـرني والا شـي ؟؟
راكان : هي تعرف رقم تلفونـج ؟
قلت : ايه ..
راكان : لو تبيج بتتصل لج ..
سكت ..
راكان : شتبين تااكليـــن ؟
قلت : اممم انا ابي نفسـك ..
راكان : اوكي ..
طلعت تلفوني وتميت اطالعه .. كأني انتظـر امي تتصـل فيـني .. تسألني ويـن انا ..
راكان : شفيـج ؟
قلت : لا ولا شـي ..
راكان : تنتظـريـن حد يتصـل فيـج ..؟
قلت : ايه .. مب من عادة امي انها تتركني بروحي في البيت وما تسأل عني ..
راكان : بس انتي مب في البيت ..
قلت : ايه بس بروحي ..
راكان : ولا بروحج .. انتي معـاي ..
قلت : مايصيــر اطـلع معـاك بروحـنا ..
راكان : لـيش؟ انا مب زوجج ..؟
قلت : ايه بـس ....
راكان : لا بـس ولا شـي .. واذا انتي تحاتيـن هالكثـر عشـان محد يتصل لج .. انا قايل لهم لا تتصلون فيها ..
قلت : ليــــــــــش ؟
راكان : عشـان نبي نكون في جو هـادي ..
قلت : وانا احــاتي ..؟
راكان : لـيش تحاتيــن .. انا قايل لهم ان انا بمر عليـج وبنتغـدى بـرع ..
قلت : وعادي عندهم .. ما قالوا شـي ..
راكان : سـاره انا ولد عمـتج قبـل لا اصيـج زوجج .. انتي ملاحظه ..؟
قلت : ايه امبـلا ..
راكان : لا تفكريـن بشـي الحيـن .. بـس طالعيني وفكـري فيني ..
ابتسمت ونزلت راسـي ..
وصل الاكل وكلـنا واحنـا سااكتيـن .. وبعد الاكل تميـنا نتمـشـى انا وراكان على البحـر ..
راكان : تحبيـن البـحر ؟؟
تنهدت : عادي ..
راكان : يعني شلون ؟
قلت : يعني ما فكـرت يوم اني اروح البحـر .. لاني اخااف منه ..
راكان : تخـااافيـن ؟؟
قلت : ايه .. ولا مره جسمي طب البحـر ..
راكان : يعني تخافيـن تغرقيـن ؟
قلت : لا .. مادري .. يمكن .. بس ما جربت لاني اخاف ..
راكان : في حد يخــاف من البحــر ؟
قلت : انا ..
ابتسم ودخل يده في جيبه ..
راكان : عطيـني يدج ..
قلت : يــدي ؟
راكان : ايه ..
مديت له يدي .. مسكـها ولبـسـني خـاتم ..
راكان : شــرايــج ؟
ابتسمت : يـاااااااااي ..
ابتسم ..
قلت : واايد حــلو .. ذوقـك ..؟
راكان : ايه .. عجبـج .؟
قلت : يجـنن ..
راكان : قعدت ساعه اتحايل على هجور تجـي مـعاي عشـان تختار لـج شـي يعجبـج .. لانها هي تعرف ذوقـج .. بـس ما جـات .. قاعده مع الريـل ..
قلت : يحليــلها .. والله وحشــتني ..
مسك يدي وركبـنا السيـاره ..

حسيـت برااحه نفسيـــه .. استاانســت مع راكــان وحبيــته .. صـج اني ما ما اقول له كلام حب وعزل .. بس حسيــت انه يدري بحبـي له .. حـبي لراكـان غيـر عن حبـي القديم لحمد وذيـاب .. حمد وذيـاب حبيـتهم لاني ادور فيـهم الحـنان اللي فقـدته .. وكل واحد ابتعد عنـي بمزااجه .. متى ما شبـعوا من اللعب تركوونـي .. اما راكـان بيكـون غيـر .. ان شالله غيـر عنهم .. بيعيشــني احـلى واحســن عيشــه .. ما بيحدنـي اني انتظـر كلمه حلوه من احد .. آآه يا راكان لو تدري شكــثر حبيــتك ..

اليــــــــوم عرســــــــي ..

ياتني غايوه تركــض ..
غايوه : يــلا سااروه خلصيــني .. كلهم في السيـاره ينتظــرونـج ..وانتي قااعده ببجامتـج ..
قلت : غايووووووووه .. ما اقدر اتحــرك .. والله بموووووت ..
غايوه ياتني ومسـكت راسـي وحطـته في حظنـها : لا تخافيـن ولا تحاتيـن .. ان شالله يعدي كل شـي على خيـر ..
امي يات : سـاره يمه يـلا .. الكوافيـره والمـاكيـرا كلهم في الفندق ينتظــرونج ..
صحت : يمــاااااه ..
امي ياتني : وي شفيـج ..؟
قلت وانا اصيـح : خااايفـــه ..
امي : يـلا حبيبتـي .. كلنا خفنـا في هالوقـت .. بـس اكتشـفـنا ان خوفـنا هذا ماله دااعي ..
حطت يدها على راسـي وتمت تقـرى علـي ..
بعد ما خصـلت هديت شـوي ..
امـي : يلا قومي لبـسي ..
طلعوا وانا لبست وطلعت ..وكانوا خذوهم من قـبل .. ودوهم الفندق .. ركبت السياره وانا طول الوقت اهز ريلي من التوتر .. وصلـنا الفندق ونزلت وكـانت معـاي امي وغايوه ..
دخلت الغرفه وبدوا في مكـياجي على طول .. وسوو شعـري .. وانا سـااااااكته .. لبست فستاني وخلصـت .. ما بقـى الا يحطووون الطرحــه ..
انفـتح البـاب ..
لطوف : سـاروه فديـــــتج ..
صرخت : لطوووووووووووووووووووووف ..
ياتني تضـحك : فديــــــــت خشـمج والله .. وحشتيـــني ..
قلت : هالكثـر يالدبه شهــر عسـل ..؟
لطوف : شااسوي في مشـاري .. كل ما قلت له خلنا نرجع .. قال لا بعد شوي ..
قلت : الله يهنيــكم ..
لطوف : سـاروه تجننيــــن فديــتج ..
قلت : لطوووووووووف خاايفـه والله العظيـم .. احسـن قلبي في ريولي ..
لطوف : لا تخافيـن حبيبتـي .. انا في عرسـي بعد كنت خاايفـه .. بس انتي قلتيلي كلمه خليتيني افكـر عدل ..
قلت : شنو ؟
لطوف : خلي همومج وخوفج ورى ظهـرج وعيــشي فرحــــتج .... تتذكريــن ؟
قلت : ايه بـس ...
لطوف: لا حبيبتـي مافي بـس .. فكـري ان هاليوم ما راح ينعاد عليـج .. افرحـي وشوفـي كشخـة البنات .. لا تخليـن شـي يشغلـج ..
تنهدت ونزلت راسـي ..
لطوف : انا بنزل بسلم على الحريـم .. ترى انتي اول وحده مسلمه عليـها .. يـلا cu
راحت لطوف وانا تميـت قاعده .. خايفه وما اعرف شاسوي ؟؟ طالعت الساعه لقيـها 9 وربـع .. واااااااي الحيـن بدخل .. يمه يمه يمه .. شوي الا ياتني غايوه ..
غايوه : يلا ..
قلت : وين ؟
غايوه : بنمـر الجمعيـه بناخذ بصــل .. يـلاا امشـي نزلي بعد ويـن ..
قلت : غايوه انا مب نااقصـه سخاافتـج ..
ياتني وضمــتني : يلا يلا يالعروووووس ..
قلت : امـي ويـن ..؟
غايوه : يعني تبيـن امي تجيــج ؟
قلت : ايه عيـل .
غايوه : اممم .. بروح اقول لها .. وانتي في هالوقت هيئي نفسـج هاا ..
تنهدت وتميت ارتجــف .. مب عاارفه شاسوي ..
شوي الا امي ياتني ..
امي : شفيـج يمه ..؟
قلت : يمه انتي نزليني .. ما ابي انزل برووحي ..
امي : يلا عيل قومي ..
قمت وتموا يرتبون فستاني ويعدلوني على اللمسات الاخيـره .. ومسكت مسكتـي اللي هي باقه الورد اللي تمسكها العروس .. ونزلت شوي شوي .. ويوم وصلت عند باب القاعه وقفت بطلب من امي عشان يحطون زفتـي ..
امي : لا تدخليـن الا لين انا اقول لج ..
هزيت راسي بمعنى انزيـن ..
تميت واقفه انتظـر الزفه تبتدي ..
شوي الا ينفتح الباب وادخـل .. والكشاف علي وكل الانظـار متجهه صوبـي .. وانا خااايفـه ومنزله راسـي .. وامشـي بهدوووء .. والمصـوراات ورااي وجدامي ومن كل صــوب .. مشيـت وحااسه رووحي ثقيـله .. ليـن وصلت عند الكوشه .. وقفت لاني احس ما اقدر اركب .. من ثقل الفستاان .. يات المصوره وشلت معاي الفستان وركبـت شوي شوي .. وفي نص الكوشه قالت لي وقفي وطالعي الناس وابتسمي وخليني اصورج ..
عاد انا بروحي خايفه بعد تقول لي جي .. اووف ..
التفت يمين ويسار اطالع النااس وابتسم لهم مثل ما قالت لي .. وهي تصـورني .. وعقب وصلت عند الكرسـي وقعدت .. ويوني ناس وسلموا علي .. ومن الخوف ما ركزت من اللي سلم علي .. وشفت صديقاتي كلهم اللي في الجامعه وحتى دكاترتي .. صـج كنت مستانسه .. بس الخوف بعد كان اكثـر.. عقب حطوا اغنيه وتموا يرقصــون .. حتى نجوى قامت ترقـص اللي ما تعرف وتميـت اضحك على رقصـها .. واستغربت من اريج انها قامت ترقـص بعد .. ونجوى تسويلي حركات وهي ترقص .. وانا امسك بطـني من الضحك .. لان الاغنيه غيـر ورقصـها غيـــر .. ويات غايوه صوبي وتمت ترقــص .. ونور وهاجر واريج بعد .. وانا مستاانسه .. بس فقدت لطوف .. التفت لقيتها تطالعني وهي مبتسه وعقب ياتني ..
قلت وانا اصرخ عشان تسمعني : ليــش ما ترقصيــــــن ..؟
لطوف : شااسوي في خالج .. حالف علي ما ارقـص ..
شهقت : ليـــش ؟
لطوف ابتسمت : لاني حــامـل ..
صرخت : صـــــــــــــج .. الف الف مبــروووك .. من متى ولا تقووليـن ..
لطوف : اليوم كاشفه ..
ضميـتها وفي هاللحظه حسيت بفلاش ..طالعت التلفزيون الا لقيت صورتي وصوره لطوف موجوده والكل يطالع .. استحيـــــــــت ..
لطوف : هههههههههههه واي فشيـله ..
ضحكت : هههههههههه عادي .. يلا روحي رقصــي ..
لطوف : لا والله ..
قلت : شوي ..
لطوف : راحت ورقصــت على الخفيف ونزلت ..
عقب وقفت الاغاني وقالوا ان المـعرس بيـدخل ..
وانا في هاللحظه قمت ارجف وما عرفت شاسوي .. شوي وياتني هاجر ونزلت علي شي مثل المظله بحيـث محد يشوفـني .. بس انا اشوف شوي .. وعقب حطوا الاغنيه اللي بيدخل عليها راكان .. دخل وانا احاول اشوف من هاللي حطوه فوقي ..شفت ابوي وتركي وخالي .. وشفت بعد ذياب جنب راكان .. ولا اللي باط جبدي كااشخ بالبشــت .. اووف ياشينه .. بس اول مره اشوفه بالثوب .. كلش كلش مب حلو عليـه ..
كلهم وقفوا جدامي وتموا يصورون مع راكان وعقب ابوي وخالي وتركي راحوا وتم ذياب مع راكان .. وانا حاسه بالخوف من ذيااب .. خايفه يسوي شـي .. لان عقل ذياب عقل مجرم مب عقل بني آدم .. وعقب صـور معاه شوي وعقب راح .. ارتحت شوي .. وشل راكان اللي على راسي وانا وقفت .. طالعني وباسني على راسـي ..
راكان : مبـروك ..
قلت : الله يبارك فيـك ..
وعقب قعدنا .. ومسك يدي وانا منحرجه .. ابي اشيلها .. لان المصوره تحب هالسوالف .. بتصـور .. وكل اللي تصـوره ينعـرض على الشاشه الكبيـره والموجوده في كل زاويه من زوايا القااعه ..
خلص العــرس وطلعنا انا وراكان من القاعه وهو ماسك يدي .. حسيت اني بروحي .. ما عندي حد .. رغم انا راكان معاي .. وماسكني .. بس شفت امي وغايوه .. حسيت حياتي بتصيـر مثل ما صاارت وانا كنت في بيت عمتـي .. ياتني الصيـحه .. بس مسكتها بالغصــب .. وصلنا عند باب غرفه .. دخلنا ويات المصوره وتمت تصـور .. لوعت جبدي .. عقب طلعت ويات امي ..
قلت : الحمدلله انج يتي ..
امي: ليـش ؟
قلت : يمه ما اعرف شاسوي ..
امي : من جي انا جيتج ..
وعطتني امي التعليمات وانا انفذها ..
راكان : وينج انتي من مساعه ..؟
قلت : كنت عند امـي ..
راكان : شتسويـن ..؟
قلت : ولا شـي ..
تميـنا ساكتيـن ..
راكان : حلوه طالعه اليوم ..
ابتسمت : عيونك الاحـلى ..
راكان : صـج ..
ابتسمت وانا منزله راسي : ايه ..
راكان : انتي الاحـلى والله ..
تميـت سااكته وانا حااسه ان ويهي احمـر وحـاااااار ..
راكان : يـلا نروح الفندق ..؟
قلت : اوكـي ..
راكان : يلا لبسـي انا بروح برع شوي وبجي ..
يوم طلع راكان رحت بدلت ولبست عباتي وكنت توني بمسح المكيـاج الا هو داخل ..
راكان : يـلا سريـنا ..؟
قلت : اوكي ..
طلعنا من الفندق وانا مغطيـه ويهي والا اشوف شي جدامي .. تميت امشي جنب راكان .. ووعيت على نفسي اني ماسكه يده بقوه .. ^_^ .. كنت خايفه الا اطيــح .. هديتها ومشيت جنبه ..
ركبنا السياره وعلى طول حـنا .. وقضيـنا اول يـوم ..
قمت وانا حـاسه بالبـرد .. فتحت عيني واستغربت المكـان .. وعقب تذكـرت انـي عروس ^_^ .. قمت على طول ورحت الحمام وتسبحـت ..
طلعت وشفت راكان توه قايم من النوم .. وشعره واقف ومكشـر في ويهه ..
ضحكت : هههههه صباح الخيـر ..
راكان ابتسم : صـباح النـور والسرووور ..
دخل الحمام وانا رحت صوب التسريحه .. مشطت شعـري وخليته مفتوووح عشـان ينشـف اسـرع .. مع انه طويل لازم انشفه بالاستشوار .. بس استحـي اطلعه جدامه ..
حطيت لي كريـم مرطب على ويهي وحطيت لي بودره خفيفه وكحل بنـي على بدايه اطرااف رموشـي وحطيت لي مسكارا .. وكنت لابسـه جلابيه او دراعه كشــخه .. أخبـر انا وهاجر اخترناها مع بعـض .. وقال لي ان راكان يحب هالاوان .. اللي هي السماوي والبنفسـجي الفااتح .. ويحب الوردي على البنات .. وما يحب الالوان القامجه ( الداكنه ) ..
رحت الصاله ..
مادري عاد اسوي فطور والا بنتفطـر برع والا بنطلب والا مب لازم نتريـق ..
راكان : ليـش ما قعدتــــني معـاج .؟
تخرعت: هههههههه بسم الله .. انت من وين طلعت ..
راكان : ههههه من الحمام .. ليس ما قعدتيني ..؟
قلت : توني بقعدك الا انت قايم ..
راكان : امممم ..انزين يلا خلنا نطلع بنتريق تحت .. وعقب جهزي اغراضج بنروح المطـار سيــده ..
قلت : بدوون ما اودع امي وابوي ..
راكان : امبـلا .. اذا تبين تودعينهم جهزي بسـرعه ..
قلت : اوكي ..
ورحت بسـرعه اجهـز اغراضي .. وما كانوا وايد .. لاني ما طلعت من الشنطه شي اصـلا .. بس ترتيب سـريع ..
راكان : خلصـتي ؟
قلت : ايه بس بلبـس ..
دخلت جلابيتي اللي كانت علي في الشنطه .. تميت ادور جينز ما لقيـت .. خذت لي تنوره ورديه وفيها حركـات غريـبه ممزوجه مع اللون البني .. وبدي بـني .. خذت شنطة يدي ولبست عباتي وحطيت شيلتي على كتفـي ..
رحت الصاله : يـلا ..
راكان : سريـنا ..
اخذ الشناط وراح ورحت وراه .. ركبنا السياره ووداني بيت اهلي ونزل معـاي ..
دخلت الصاله لقيـت امي قاعده وجدامها دلة الشاي والقهوه وابوي قاعد بثوبه وكاشخ حق الدوام ..
قلت : الســــــــــلام عليــــــكم ..
امـي بابتسااامه عريــضه : وعليـــــــكم الســــــــلام ..
ورحت لها وسلمت عليها ..
امي : شحالج امي ..؟
قلت : الحمدلله بخيــر .. وين الباقي ..
امي : رقوود بعد وين .. ما قلتوا انكم بتيوون ..
قلت : مادري انا بعد .. الا الصبـح راكان قال لي ..
امي : راكـان شـحااالك ..؟
راح راكان وباسها على راسها : يسـرج الحال .. وانتي شحالج .؟
امي : الله يسلمك طـيبه طـاب حـالك ..
وراح يسلم على ابوي وانا وراه ..
قعدنا شوي نسولف ونضحك وما شفت تركي ولا حد غيـرهم ..
مرت ربع ساعه بسـرعه البـرق ..
راكان : يـلا سـاره .. بنتأخـر على الطيـاره ..
قلت : اوكـي يـلا ..
مع ان ما كان ودي اقوم .. ولا مـره قعدت الصبـح مع امي وابوي ..
ودعتهم ..
قلت : يمه سلمـي على غايوه وبنات خالتي وخالتي وعلى خالي ولطوف وتركي ومشاعل وعليهم كلهم ..
امي : يوصـل حبيبـتي .. انتي ديري بالج على نفسـج وعلى ريـلج .. ولا تزعلينه ولا تضايقينه .. وانت راكان .. ديـر بالك على بنيـتي .. تراها دلوعه .. وتحملوا تاكلون من هالمطاعم الخايسه .. وحاسبوا على ارواحكم من البرد ..
ابوي : بل بل .. الله يهدااج يا فاطمه .. هم رايحين يستانسون .. مب رايحين يجاهدووون ..
راكان : هههههه .. خلها على راحتها خـالي .. وترى ساره في عيوني ..
ابوي : بعدي والله ..
راكان : يـلا توصوني بشــي ..؟
ابوي وامـي : ســلامتـكم ..
ركبنا السياره وتميـنا ساكتيـن .. وقف راكان صوب بيتهم .. استغربـت ..
راكان مبتسم: يـلا نزلي ..
رديت له الابتسامه ونزلت ..
قلت : ليـش نازل هنيه ..
راكان : بجيـب كم غرض وبسلم على ابوي ..
قلت : وامـك ؟
راكان : اذا كانت موجوده ..
رحت وراه وشكله كان مستعيل .. دخلنا الصاله ما لقيـت فيها حد ..
راكان : قعدي هنيه بروح ثواني وبايي ..
قعدت وانا متردده .. اروح اسلم على بوغيث والا لا ..
وشوي الا اسمع صوت ريال يغني ..
.....: خلها تروح الله لا يردها .. حبها ماضـي راح وعـدى .. حـتى لو ماتت في بالي .. عساها بهالحال واردى .. >> عاكس الاغنيـه من مذكر الى مؤنت ^_^
نزلت راسـي لان هالصـوت اعـرفه عــدل ..
ذيـاب وهو ماسك عصيـر وطالع من المطبخ: اوه اوه .. العروووووس هنيـه .. ههههههه مب رايحين شهر العســل يا عسـل ..
تميت ساكته انتظـر راكان ينزل ..
ذياب قعد : ههههههه شفيـج ما ترديـن .. والا راكان اكـل لســانج .. هههههههاي ..
اوف هالسخيــف مب رااايـح ..
ذياب : اوووه سااروه انا احاجيـج ..
قلت : مابيني وبيـنك كـلام ..
وشوي الا ينزل راكان وحسيت براحه نفســيه ..
ذياب : شنو راكان .. مرتك ما عندها لسـان ..
راكان : والله انت اخبــر ..
ذياب سكت وطالعني ..
حسيــت ان راكان مستصغرني .. يعني شنو هو اخبـر .. يعني يعايره ويعايرني بعلاقتـنا القديـمه .. او بالاحـرى يعايرنـي انا .. لان ذياب من كثـر عيوبه يشوفونها وكأنها شـي عادي ..
نزلت راسـي وانا اكتم صيـحـتي ..
راكان : يـلا سريـنا ..
قمت وسبقت وسمعت هواش .. ما كنت اسمع عدل لان الصـوت ما كان عالي وايد .. وانا وصـلت السيـاره ..
لبست نظـارتي الشمسيـه وكتمت صيـحتـي قد ما اقدر ..