منتديات بنوته - عرض مشاركة واحدة - { احسب الدنيــآ مثل آمي ,, ازعلــهآ و ترآضيني } ...

06-17-2010, 06:10 PM

الجــــ 19 ــــــــزء

امي : وانتــي من مســاعه ماسكه هالجــوال .. ومب مراعيـه حاله مرت اخووج ..
قلت : يمه كنت اكلم خالي .. والحيـن هو ياي .. الا ابوي وينه ؟؟
امي التفتت عني : ابوج مع تركي .. مادري وين راحـو ..
فتحت شنطتها وطلعت قران صـغيـر وقعدت تقـرى .. وانا قعدت اسـمع بأنصاات ..
وشوي رن جوال .. امي التفتت علي بسـرعه .. ابتسمت لها
قلت : خالـي ..
رديـت : هلا خالي ..
خالي : انا عند باب الغرفه .. يلا طلعوا لي انتي وامـج ..
قلت : ليــش ..؟
خالي : طلعي انتي الحيـن بكلمج ..
قمت وطلعت له ..
قلت : خيـر خالي ..؟
خالي : وين راشد وتركي ..؟
قلت : ابوي وتركي مادري وين راحوا .. اعتقد عند الدكتـور ..
خالي : يـلا قولي حق امـج يـلا..
قلت : ويـن ..؟
خالي : يعني وين بنروح .. البيـت طبعا ..
قلت : ونخلي مشاعل بروحها ..؟
خالي : مشاعل معاها ريـلها .. يـلا قوومي نادي امـج ..
دخلت داخل الغرفه ..
قلت : يـمه ..
امي سكرت المصـحف : صدق الله العظيـم .. خيـر .؟
قلت : خالي يقول يـلا .. بنروح البيـت ..
امي : لا انا بقعد عند مشاعل .. مهب رايـحه ..
قلت : بـس خالي قال.. وهو عند الباب الحيـن ..
امي : قولي له مابي اتحرك ..
قعدت على الكرسي ..
قلت : انتي قولي له .. اذا قلت له الحيـن بصيـر مطراش لكم .. تفاهموا بروحكم ..
امي وهي رايـحه : جليلة حيـا ..
تميت قاعده اطالع هالمسكـينه .. مادري شحالتها الحيـن ..
ودخلت امي ..
امي : يـلا امشـي ..
قلت : اقتنعــــتي ؟!
امي : ايه .. لان بكره الصبـح بجي هنيه ..
قمت .. طلعنا من المستشفـى .. وخلال نــص ساعه وصلـنا البيــت .. من هالزحمه الواحد يقدر يمشـي ..
وصلت البيـت هلكاااااااانه .. رحت الغرفه بسرعه وتوضيـت وصليـت المغرب والعشـا .. لان اذن في الطريـج .. وحطيـت راسـي على المخده ونــمت ..

وعيـت وانا حاسه بالحـر .. لقيـت المكيـف مسكـر والدريشـه مفتـحه .. يااربي .. هاي اكيـد امي .. شفت الساعه 1 الظهـر .. قـمت وتوضيـت وصليـت ونزلت الصاله ..
ما لقيـت غيـر خالد ..
قلت : خلــووود ..!
خالد : نـعم ..؟
قلت : ويـــن امـــي ؟؟
خالد : امي طلعت من الصبـح وللحيـن ما ردت .. مادري وين راحــت ..
قلت : مـع منو راحـت ..؟
خالد : مـع ابوي بعد مع منـو ..
قلت : ابوي وتركي متـى ردو .؟
خالد : اووووف مادري مادري ..
وكمل لعبه على السـوني ..
قلت : مالــت على اللي يسألك ..
خالد : ومالت على اللي يجاوبـج ..
ضحكت عليـه ورحت غرفتـي بتصـل لهم .. شفت مكالمتيـن ورساله ..
المكالمتيـن وحده من راكان ووحده من هاجر ..والرساله من راكان ..
" سـاره شفيــكم ..؟ شصــاير ..؟ ليـش ما ترديــن علـي ..؟ "
مسكيــن يحااتيــني .. باتصل حق امي اول وبعديـن باتصـل له ..
اتصل في امي وردت : هلا سـاره ..
قلت : هلا يمه .. ويـنج .؟
امي : انا في المستشفى مع مشاعل ..
قلت : وليـــش ما قعدتيني عشـان اروح معااااج ..
امي : ما قلتيلي .. وانتي تدريـن اني بروح الصـبح لها ..
قلت : انزيـن ومتى بيطلعونها ..؟
امي: الحيـن قاعديـن يشطبون ..
قلت : يعــــني اليــــوم بتــطلع ..؟
امي : ايـه ان شالله ..
قلت : اوكي يـلا عيـل باي ..
امي : مع السـلامه ..
سكرت من امـي واتـصلـت على طول وبدون تردد حق راكان ..
رد : هــــلا ..
قلت : اهليــن ..
راكان : ها ســاره .. شخبـاركم .. ليــش ما ترديــن علـي ..؟
قلت : احنا الحمدلله .. كلنا بخيـــر ..
راكان : وليـش ما رديـتي علـي امـس .. ؟ خفت عليـكم ..
قلت : كنت في المستشفـى ..
راكان : في المستشفــــــى ؟؟! ليــش خيــر ان شالله ..؟
قلت : مشاعل مرت اخوي تعبت ووديـناها المستشفى .. والحيـن احسـن الحمدلله ..
راكان : اهاا .. الحمدلله على ســلااامتـهااا ..
قلت : الله يسـلمـك ..
راكان : عشـان جي بـس ما قدرتـي ترديـن علـي ..؟
قلت : لا ما كان لي نفـس اتكلم .. لاني كنت خايفه عليـها ..
راكان : اهاا .. سـاره انا الحيـن مشـغول .. بطلع من الدوام وبكلمـج .. اوكي ؟؟
قلت : اوكـي .. على راحتـك ..
راكان : يلا فمان الله ..
قلت في امان الكريـم ...
سكرت منه ونزلت احط لي غـدى .. ياني خالد ..
قلت : تغديـت ..؟
خالد : لا ..
قلت : تعال تغدى معـاي ..
قعد على الكرسـي وانا حطيـت لي وحطيـت له ..
وبعد ما خلصـنا غدى رحنا الصاله .. شوي الا ينفـتح الباب وامي وابوي وتركي ومشـاعل داخليــن ..
قلت : جيــــــــــــتووووووووو ..؟
امي ابتسمت : ايــه ..
رحت بسرعه اسلــم على مشــاعل ..
قلت : الحمدلله على الســـلامه فديـــتج ..
مشاعل ابتسمت : الله يسلـمج ..
تركي : يـلا مشاعل الغرفــه .. الدكتـور يقول لاززززززززززززم ترتااحيـن .. يـلا جدامـي ..
ياربي من هالتركـي .. حتى بأهتمامه جاسـي ..
مشاعل : ان شالله ..
وراحت فوق مع تركي وانا وامي وابوي تمينا في الصاله ..
ابوي : تغديـتو .؟
قلت : ايه الحمدلله .. الا ويـن نصور وفطوم وميمي ..؟
امي : عند خالتـج ..
قلت: شيســوون عند خالتـي ؟؟ ما عندها حـد كبـرهم ..؟
امي : خالـتج تبيـهم ..
وراحت امـي تحط الغدى ليـن ما يجي خالـي من الدوام ..
رحت غرفتـي وشفت تلفوني يـرن ..
رديـت : هــلا راكان ..
راكان : اهليــن .. شخبــارج مره ثـانيه ..
ابتسمت : الحمدلله بخيــر .. انت شخبارك بعد الشـغل ..؟
راكان : والله تمام دام ان القضيـه انتهت ..
قلت : الله يكون في عـونـك ..
راكان : وفي عونـج .. الا اقـول بـدور ..
قلت : شــنو ؟؟ بــدوووور ..؟
راكان : اوه اااأقصـد سـاره ..
سكـت .. ما عرفت شاقول .. من الصدمه ما قدرت افـج حلجـي ..
راكان : سـاره .؟
قلت : للحيـن تحبـها ..؟
راكان : سـاره شهالسـؤال الله يـهداااج ..
قلت : ليـش انت تشــوفه غريــب ؟؟
راكان : ايه غريــب .. لاني لو احبـها جان ما اتزوجتـج ..
سكت ..
راكان : والله انها زلت لسـان .. بس لا تكبـريـن السالفه ..
قلت : لا ما راح اكبـرها .. لانها ما تستااهل .. تقول اسـم وحده كنت تحبها قبـل حق زوجتك وما اكبـر السالفه .. صـج ان اعصابـك بارده ..
راكان : والله ما كنت قاصد ..
قلت : ادري انـك مب قاصـد .. ومن جي انا محتشـره .. على العمـوم انا مشغوله الحيـن .. مع السـلامه ..
راكان سكت ما سمعت منه حـس ..
وسكـرت وتميـت اصيـح .. يعني راكان للحيـن يحبـها .. بس ليــش تزوجنـي دام انه يحبـها ..؟ ياربي انت كاتـب لي التعاسـه في عمـري .. ليــش ياربي ليـش ..
سمعت طقه باب .. مسـحت دموعي وتغطيـت بألحافي ..
دخل خالي : شخبـارج ساره ..؟
قلت : زيـنه ..
خالي : ليـش ما تتغديـن ..؟
قلت : تغديـت ..
خالي : اهااا .. انزيـن ليـش جي تتكلميـن ..؟ من مضـايقـج .؟
قلت : محـد مضـايقني .. بس شوي تعباانه ..
خالي : ما تشوفيـن شـر ..
وطلع من الغرفه وانا تميـت افـكر .. ليـش قال اسمها وما قال اســمي .. يعني هو للحيـــن يحبـها ..؟ اذا يحبـها ليـش تزوجنـي .. ليـش ما تم عايـش على ذكـراها .. واذا ما يحبـها ونسـاها ليـش ذكـر اسمـها الحيــن ..؟
واللي قطـع افكـاري صوت امـي ..
امي : ســاروه شفيــج .. اقول لـج قومـي لبسـي ..
قلت : هااا .. ليـش ..؟
امي : بنروح بيـت خالتـج ..
قلت : هالحــزه ..؟
امي : ايـه لان خوانـج هناك ويصيـحون يبوني .. فخالتـج قالت نجيـها .. يـلا قوومي تأخرنا على اليـهال ..
قمت : ان شالله ..
فتحت الكبـت ولبـست بنطلـون جيـنز وبدي رصـاصـي وفيـه حركات بالوردي .. واستشورت غرتي وخليـت شعري مموج بالخفيف وحطيـت لي كحل ولبست عباتي ومسكت شيلتي وشنطتـي وطلعت ..
نزلت واشوف امي قاعده بعاباتها في الصاله ..
امي : للحيـن ما لبسـتي شيـلتـج بـعد ..؟
قلت : اووووه يمه .. تراج وايد مستعيـله عالفاضـي .. اخوانـي في بيـت اخـتج مو في الشارع ..
امي طالعتني بنظـره وطلعت .. لبسـت شيـلتي وطلعت وراها ..ركبـنا السيـاره بهدوء وطول الطريـج ساكتيـن .. وكان ابوي اللي موصـلنا طبعا ..
بعد ما وصلـنا نزلـت وانا احـس روحي مب طايقـه حـد ..
دخلـت ورى امـي ..
انا وامي : السـلام عليـكم ..
الكل : وعليــكم الســلام ..
نور : هلاااا هــلا .. هلا بالعــرووووس ..
شفت جاسم قام بعد ما سلم على امـي .. واستغربـت لانه ما سلـم علـي ..
ابتسمت : هلا فيـج ..
وبعد السـلام والسؤال عن الاخبـار ..
نور : امـشي سـاروه برويـج فسـتاني الي شريـته حق عـرس خالـي .,
قمت : اوووكي ..
ورحنـا غرفتــها وفتحت لـي الكبـت وطلعت لـي فسـتانها ..
نور : شراااايـــــــج ..؟
قلت : اللــــه .. حلــو نوروووه .. لا لا جي شكلـج بتغطيـن علـي ..
نور : ان شالله ..
قلت : لا والله ..
نجوى دخلت عليـنا : ايا الخايــناات .. تروحون بدوني .. والله لو غايوه هنيه جان ما خلتني بروحي ..
نور : دشي وانتي ساكتـه ..
نجوى : انتي ما تعرفيــن تقوليــن كلمه حلــوه .. ابي ساروه تقولي ..
ضحكت : هههههههههه دخلي حبيبتي انا مب طاردتج من بيـتج ..
قعدت جنبي ..
قلت : انزيـن نوروه ليـش اخترتي فستـان برتقالـي .. لو ماخذه اخضـر مثـله احـلى ..
نور : لا مـب شـي اخضـر ما احب هاللون ..
قلت : حـتى انا بـس هاي الموضـه ..
نجوى : لا خليـها .. عشان اذا غنـو يالبرتقاله تقوم ترقــص ..هع هع هع ..
نور : لا مب راقصــه .. بخلي الرقــص حق ســاروه ..
قلت : لا انا مب راقـصه ..
نجوى: لا بترقصــون ثنتيناتكم .. عيـل تبوني ارقـص بروحــي ..؟
نور : اذا رحنـا العـرس تكلمـي ..
قلت : وانتي نجوى .. مب مراويتني فسـتانـج ..
نجوى قحصــت : امبــلا .. شــلووون نســـــــــــيت ..؟
ضحكت : يـلا عيـل قــومـي ..
راحت وثواني جابت فسـتانها .. وكان لونه وردي ..
قلت : اللــــه .. حلـــووووووو .. بس ما يليـق عليـج الوردي ..
نجوى تخصـرت : لا والله ..
قلت : ايـه لانـج سـمرا شوي .. يعني حنطاويـه .. مب مثل اختـج نور .. فاتحه ..
نجوى : اصـلا اللون الوردي اخترعوه حقـي .. هه وتقول مايناسبني والله ..
نور : وانتي شلون فسـتانـج .؟
نجوى : فسـتانها بخيـر يسلم عليـج ..
ضحكت : ههههههههههههههههههههههه والله انج عجيـبه يا نجوي ..
نجوى : ايـه اعجبـج ..
نور : سخيــفه .. ساروه شلون فسـتاانـج ..؟
قلت : اســود ..
نور : بـل .. اسود عاااد ..؟ شهالتشــااؤم عاد ..؟
قلت : مـب تشاؤم بـس عجبـني الفستان وحركتـه ..
نجوى : سـاروه انتي حلـو عليـــج الاحمـر .. لانـج بيضـا يالعنـز ..
قلت اقلدها : اصـلا اللون الاحمــر اخترعوه حقـي .." وابتسمت "
نجوي : لاااه ؟؟ زيـن قلتيلي ..
نور : ايه صـح كلام نجوي .. لان مـره لبـستي بدي احمـر وكان حلــو عليــج .. لانج بيـضا على حمــار ..
نجوى : بيضـا على حمار .. ههههههههههههههههههه .. انا سـمرا على كلب .. ههههههههههههههه ..
ضحكت : هههههههههههه الله يخـس سوالفـج يا نجوي .. قصـدها اني حمـره .. مب حماره مالت على اسلوبـج ..
نور : هههههههههه زفتـه لانها ..
نجوى : ويه امي تنايـني .. بروح وبرجــع زيــن ..
نور : زيـن ذلفــي ..
طلعت نجوى ونور قفلت الباب من وراها ..
قلت : ليـش قفلتـي الباب ..
نور : ابي اقـول لـج سالفه ..
قلت : تخـص منـو ..؟
نور : تخـص جاسم اخوي ..
قلت : ايـه .. ليـش ما سلم علـي .. كنت بتكلم بقول له شخبارك .. بس ما وعيـت الا هو محد .. شسالفته ..؟
نور : بقول لـج بس ما ابيـج تقوليـن حق احد ..
قلت : زيـن قولي .. مب قايله حق احد ..
نور : جاسم كان يحـبـج ..!
قلت : شـــــنــــــو ...؟ يحبــني ..؟
نور : ايــه وطي صــوتـج انتي ..
قلت : ما يدري اني متزوجه ..
نور : يدري .. بس كان يحبـج قبـل لا تتزوجيـن وقبـل ..
قلت : شلـون ..؟
نور : يوم ملـجتـج .. هو جـا ياخذنـا من بيتكم ..
قلت : انزيـن ..
نور : واول ما وصلـنا البيــت دخل غرفتـه .. وهو من عادته انه يقـعد معانا في الصاله ويسـولف ويضـحك .. مب متعوديـن عليـه جي هادي ..
قلت : انزيـن ..
نور : تميـنا في الصاله نسولف عن الي صار في الملجـه .. وانا رحـت غرفتـه .. قلت يمكن راقـد مع انه ما ينام هالحـزه ..دخلت عليه لقيـته قاعد وحاط يده على راسـه ..قلت له : جاسـم شفيــك ..؟
جاسم : مافيـني شـي طلعـي وخليـني ..
سكرت الباب من وراي وقعدت جنبه : لا مب طالعه .. بتقولي شفيـك .. مب على نور بتخـش يا جاسم ..
جاسم : خـلاص .. راحـت ..
نور: مــنو ..؟
جاسم : سـاره ..!
نور : ويـن راحـت ؟؟
جاسم : راحـت عنــي ..
نور : ليـش انت كنت ناوي تتزوجها ..؟
جاسم : ايـه .. كنت ..
نور : وليـش ما قلت حق امـي ..؟؟والا حق حد ..
جاسم : عاد صـار اللي صـار .. وانا كنت ناوي اجمـع فلـوس حق الزواج .. واذا ترتبت اموري بقول .. بس سبقتـني وتزوجـت ..
نور : لا تزعل روحك يا اخوي .. عـسى ان تكرهوا شي فهو خيـر لكم ..
جاسم : بس انا حبيتــها ..
نور : ويمكن خيـر انها تزوجـت غيـرك .. ارضـى باللي الله كاتبـه لـك ..
نور تكلمـني : وبـس ..
نزلـت راسـي وانا افـكر .. لو متزوجه جاسـم يمكـن اعيـش مرتاحه .. لاني اعـرفه .. وماحب بنت .. ولا عمره فكر يحـب .. ويوم حـب حبني انا .. بنت خالته .. وهذا دليـل انه ما يكلم بنات ولا له علاقات .. " تنهدت " بس النصيــب ..
نور : ويــن رحــتي ؟؟
قلت : ويـاج .. بس ان شالله جاسم يـلاقي الزوجه المناسبـه له .. اللي يحبـها وتحبـه ..
نور : ان شالله ..
وشوي الا سمعنا طقه باب هزة البيـت .. نور راحت تركض تفتح الباب ..
نجوى : انــــــاااا ما قلــــت لكم بـــــرجـــــــــع .. شحقـــه قااااافليـن البــااااااب ..؟؟
نور : مالت على ويـهج .. خرعتيــني .. وقفتـي الدم في عرووقي .. حسبي الله عليـج ..
ضحكت : ههههههههههه ..
نجوى : امـي تقول صــلوا المغــرب .. اذن ..
قمنا وفرشـنا السـياده وصليـنا جماعه ..
بعد ما خلصـنا صـلاه رديـنا قـعدنـا مكـانا ..
نور : سـاروه ..؟
طالعتها بدون ما اتكلم ..
نور : شكلج اليوم مب عاجبنـي ..
قلت : ليـش ؟؟
نور : فيـج شـي .. شفيـج ..؟ من مضـايقـج ..؟
آآآه يا نور .. شاقول لـج بـس شااقول ,,. اقول لـج ان زوجي نطـق بأسم حبيبته القبليـه بدل ما ينطـق بأسـمي ..؟! والا اعبـر لـج عن حيـرتي اللي ما تنوصـف ..
نور تهزني : وين رحــتي ..؟
قلت : ويـاج .. مافيـني شـي ..
نور : انزيـن جاهزه حـق الجامعه ..؟
تنهدت : مادري مادري .. انا بروح عند امـي ..
طلعت وانا متضـايقه ولزقـت في امـي .. كان ودي اضمهـا وانام في حضـنها .. مادري ليـش حسـيت بهالشـعور .. كان ودي افـضفض لها عن اللي في قلـبي ..
خالتي : سـاره جاسـم بيمـر ..
لبسـت شيـلتي وعدلت قعدتـي ..
خالتي : اقلـط يمـه ..
مـر جاسم وهومنزل راسـه وطلـع بســكااات ..
امي : زيـنب ..
خالتي : نعـم ..؟
امي : شفيـه ولدج .. مب من عوايـد الهدوء .. اخبـر اذا مـر بس البيت يحتشـر ..
خالتي : مادري شفيـه .. بس هالايام ..
امي : الله يهديـه ..
وتمـوا يسولفـون ويات نور ووراها نجـوى وقعـدوا .. وانا فكـري مب معاهم ..
ويا وقت العشـا وتعشـو ورجعـنا البيـت من كثـر ما احـن على امـي ..
امي : وهذا البيـت .. شبتسويـن فيه يعني ..؟
قلت : مب مسويـه شـي ..
ورحت غرفـتي وانا حاسـه ودي اصيــــــــح ليـن ما تجف دموعـي ..
بدلت ملابـسي وانـسدحت على السرير .. وشوي ورن جوالي .. طلعت جوالي من الشنطه وشفت المتـصل راكان .. ما كان ودي ارد عليـه .. طنشت الجوال وخليـته صامـت ونـمت ..

وعيت على صـوت امـي ..
امي : ســاروه بســج نوووم .. قومي خـلاص .. صـايره انتي تحبيــن النوم ..
قلت بكسـل : ان شالله يمه .. بقووم ..
راحت امـي وانا قمت ورحت توضيـت وصليـت الظهـر .. وقعدت على سـريري افكـر ..
اوووف ياربي .. بكـره الجامعه .. بديـنا بالغــثـا وعوار الراااس ..
قحصـت من رنـه جوالي.. اووف تخرعت .. شفت راكان المتـصل .. كنت بطنشـه بس ليـمتى انا واطنـش كل شـي .. لازم اواجهه ..
رديـت : نعـم ..؟
راكان : بـل .. خوش استقبــاال .. شفيـج شايله الدنيـا على راسـج .. وليـش ما ترديـن علي من امـس ..
قلت : يــاااااســــــلااااام .. تتكلم ولا كأنك مسـوي شـي .. ولاه ..مطلعـني انا الغلطانه بعـد ..
راكان : اوه اوه .. ساره شفيـج يمه .. اهدي وفهمـني شفيـج ..؟
قلت : دام انـك ما تعـرف شـنو فيـني انا ما راح اقـول .. ومـع السـلامه ..
راكان : ايـه ايـه .. لحـظه .. سـاره فهميـني انا شسويـت .. لا تخليـني مثل الاطرش في الزفـه ..
قلت : يعــني انت ما تعــرف ..
راكان : عاد لا تصيـريـن مثل اليهال وتخليـني في الغاز .. ترى ادري ان السبب اللي زعلانـه عشانه تالفه ..
قلت : تـــــــــــافـــهه ..؟ تـافهه .. تغلط بأسـمي وتذكر اسـم بدور .. حبيبتك وتقول تااافه ..
راكان : يـعني انتي زعـلانه على هالسبب ..؟
قلت : وانت تشوفه تافهه مو جذي ..؟
راكان : لا سـاره انتي لـج الحـق انج تزعليـن .. بـس مو جي ..
قلت : وانت تبي تعلمـني بعد شلون ازعـل ..؟
راكان علا صوته شوي : سـاره عـاد لا تكلميــني وكأني ياهل جدامـج .. اصــحي تراج تكلميــن زوجج ..
قلت : آســـفه يا حضـرة المحامـي .. بس انت قـبل لا تحاسـب الناس شلون يتكلـمون حاسب روحك اول ..
وسكـرت منـه وتميـت اصيــح .. ما توقـعته بيتطنـز على مشـاعري وبيستخــف فيـها .. توقعـت اقل كلمه بيقولها لـي "آسـف " ..
انفتح الباب وانا مسـحت دموعي بسـرعه ..
امي : انتــي للحيـن ما قعدتــي ..؟
قلت : امـبلا يمه قـعدت وصليـت ..
اي : ليـش ما تنزليـن الصاله ..؟ بعد شوي بنحط الغدى ..
نزلت راسـي : مالي خلـق يمـه ..
امي : شفيـج يـمه ؟
ما قدرت اسـتحمل .. صـحت : مافيـني شــي ..
امي قربت صـوبي : ويــه سـاره يـمه .. شبـلااااج ..؟
قلت بصوت صيـاح : مافيـني شـي .. بس تهاوشـت مع راكان .
امي حطت يدها على قلبـها : طلــقــج ..؟
قلت : لا ما طلقـني ..
امي : عيـل ليـش تصيـحيـن ..؟ وشسبب خلافـكم ...
شاااقوول لـج يا يمه .. شاااقول ..؟ اقول لـج طرى اسمها .. خليـني سااكته بـس خليـني ساكته ..
امي : ســارووه تهاوشـتو في شنو ..؟ خلصيــني يمه قوليلي ..
قلت : خــلاص يمه انســي انســي .. خليني برووحي ..
امي قامت : لا حول ولا قوة الا بالله ..
سكرت الباب وانا طحت على الفراش .. ما عرفت اصيـح والا اسكت والا ارضى بالواقـع والا شاسوي ..؟ اذا تزوجنـا بيقعد يطريـلي اياها كل مـره .. وانا شدوووري ..؟ انا ابي اعـرف .. هو تزوجنـي على اساس اني سـاره والا بـدور .. ؟!؟!

صارت لـي سـاعات وانا داخل الغرفـه بروحـي .. توضيـت وصليـت العصـر .. ونزلت الصاله .. ما شفت احد فيـها .. قعدت على الكرسـي وضميـت المخده .. سمعت خطوات حد بينزل .. عرفت ان مشاعل لاني سمعت صـوتها ..
مشاعل : اوه سـاره هنيـه ..؟
ابتسمت لها وصديـت اطالع الفراغ ..
مشاعل : سـاره شفيـج .. انا حاسه ان فيـج شـي .. من الصبـح ما نزلتـي .. وحتى غدى ما تغديـتي .. شنو كل هاي رقـاد ..
قلت : لاا .. انا قاعده من الظهـر ..
مشاعل : وليـش ما نزلتـي ..؟
قلت : مالي خلـق ..
مشاعل : ليـش ؟؟ شفيـج .. حتى امج طلعت من غرفتـج زعلانه ..
قلت : شفتيـها ..؟
مشاعل : ايه شفتها وانا طالعه من غرفتـي .. بس ما قلتيلي شفيــج ..؟
ترددت .. ما ادري اقول لها السالفه والا لا ..؟ بعد تردد قلت لها كل السـالفه ..
مشاعل : وهذا اللي مزعـلج ومكدر خاطرج ..؟
قلت : وانتي تشوفيـنه شويه ..؟ انتي لو مكاني شبتسويـن ..؟
مشاعل : انا لو مكانـج بعذره ..
قلت : بتعــذريـــنه ..؟
مشاعل : ايه بعذره .. لانه حبـها .. واعتبريـها زلة لسـان ..
قلت : بس هاي مو اي زله ..
مشاعل : امبـلا .. هو غلط بأسمها لانه متعود كان يكلمها الله يرحمهـا وما ينطق الا بأسمها ..
سكت ابيها تكمـل ..
مشاعل : مب مقتنعه ..؟
قلت : مادري ..
مشاعل : دام انه اول مره نطق بأسمها سامحيـه .. وهي الحيـن ميـته .. ليـش زعلانـه هالكثـر .. ما راح يرجع لها ..
قلت : انا يا مشـاعل مـب خايفه يرجع لها ..لانه ما يقدر ادري .. بس .. بــس ..
قاطعتني : بس انتي ما عندج سالفه .. روحي راضـي بعلـج .. ترى اذا نمتـي وهو زعـلان منـج .. بتقعد الملائكه تلعنـج ليـن تصبـحيـن ..وانتي صاير رقادج وايد ..
ابتسمت وقمت رحت الغرفه .. مسكت جوالي لالقيـت مكالمتـين ما فـتحتهم .. متردده.. اتصـل له والا ما اتصـل ..؟ شاسوي ؟؟ وشوي الا يهتـز جوالي .. ياني مسـج .. اكيـد مـن راكان ..
" يا ترديـن على مكالماتي والا والله ثم والله ثم والله يا سـاره اجيـكم البيـت واتصـرف معاج "
شفيـــه هذا .. يهدد .. مب راده زيــن .. وبشوووفـك شتسوي ..
رن جوالي وتخرعت ..
رديـت : الوووه ..
راكان : ما بغيــتي ترديـن .. لازم مسـج تهديد ..
قلت : خيـر ..
راكان : للحيـن انتي على هالحال .. ؟
تذكرت كلام مشـاعل .. فسـكت ..
راكان : شوفي سـاره .. انا مب بالغصـب افهمـج اني يوم قلت اسمها كانت زله .. لانـج وعلى حسـب ظنـي انج عاقله وفاهمه .. وما اعتقد هالكلمه راح تسوي شرخ في علاقـتنا ..
قلت : وانت الصـاج .. بس اوعدنـي ما تجيـب اسمها على لسـانك ..
راكان : اوعـدج ما اجيـب سيـرتها .. ترى انا يوم جبـت سيـرتها ما كنت متعمد ..
سكت ..
راكان بصـوت هادي : رضيـتي ..؟
ابتسمت ووجهي احمـر كأنه يشوفنـي ..
راكان : هاا رضيـيتي والا اجي بيتـكم ..
ضحكت : هههههههه خلاص رضيــت ..
راكان : بــل .. يعني ما تبيــني اطب بيــتكم ..
قلت : احنا خصصنا يوم الخميـس على ما اعتقد ..
راكان : ايه بـس عادي اجي يوم السبــت .. الثـلاثـا .. كيــفي صـح ..
قلت : ههههههه ايه كيـفـك .. لانه بيـت خالك مب بيـتي ..
راكان : فديـت هالضحـكه ..
هنيه حسيـت بشـي غريـب .. لان راكان من كلمتـه ما قال لي كلمه غـزل.. بس قلت يمكن هالكلمه عربـون صلـح ..
راكان : هههههههههههه شفيـج سكـتي ..؟
ابتسمت بخـجل : لا ولاشــي .. " حبيت اضيـع السالفه " الا حجزت حق العـرس ..
راكان : ايـــــــــــه زيـن ذكرتيـني ..
قلت : خير .,؟
راكان : حجـزت وبيـكون اممممممم هم عطوني التاريـخ مـتى .. يمكن يعني تقريـبا بـعد شهـريـن ..
قلت : شــنووووو ؟؟
راكان : شـنو .؟ بعيـد صـح ..؟
قلت بتطنـز : ايــــه وايد بعيـد .. جان خليـته الاسبـوع الياي ..
راكان : ايــه قلـت لهم .. بس قالوا اقـرب يوم بـعد شهـريـن ..
قلت : راكان انت من صـجك .. ؟
راكان : شـنو ..
قلت : من صـجك بعد شهـريـن .. حرام عليـك .. متـى اتجهـز ومتـى اخلـص اموووري ..؟
راكان : وشهريـن ما يكفـون ؟؟.. اللي جهزو في شهريـن مب احسـن منـج ..
قلت : يــــــــــه ..
راكان : لا تتحنـديـن .. صـدقيني بيـكفوون .. يعني شنو اللي بتشتريـنه ..؟ الفسـتان وبتشتريـه في يوم واحد .. والكوشه بنحجزها وبنفـك في يوم واحد .. والقاعه وحجزت انا امـس .. بعـد شنو التجهيـزات ..؟ الحرمه اللي بتعدل ويـهج خليـها تعـدل شـعرج مره وحده .. وخلصـت السالفه .. كل هاي بتسويـنه في يوم واحد بعد مو في شهريـن ..
قلت : هه .. راكان انت وايـد مبـسط الامـــووور .. في وايـد اشيـاء بشتـريـها .. هاي اللي قلته السـهل والمـعروف ..
راكان : يعني شـنو بتشتريـن مـثلا ..
قلت : ملاااابـس .. ومكيـاج وعطور وبودرات .. وحجز وحده حق المكيـاج واحجز وحده حـق الشـعر ووحده حق الاظـافر .. وافـصل فسـتان العـرس .. ووايــد اشـياء ما ذكـرتها ..
راكان : شنهي الاشيـاء اللي ما ذكرتيـها ..؟
قلت : اشيـاء مابي اذكـرها .. اشيـاء تخصـني ..
راكان : مافي خصـوصيـات بين المره وزوجـها ..
قلت : امبـلا فـي ..
راكان : اوكي الحيـن بخليـج ما تقوليـن لي .. بس خلني اشوفـج فيـس توفيـس .. والله لا اسـحب منـج الكـلام سـحاب ..
قلت: ههههههههههه ماراح يـطلع منـي كـلام انا مابي اقـوله ..
راكان : لا بس بيـطلع بطريـقتي الخاصـه ..
وسمعت تلفون يرن من عنده ..
راكان : اوه .. سـاره بـعديـن اكلـمج اوكي .. ياني اتصـال ..
قلت : من جوالك الثاني ..؟
راكان : ايه .. جوال الشـغل ..
قلت : اوكي .. مع السـلامه ..
راكان : في امان الله ..
سكرت منـه ورحت الصاله .. لقيـت نجوى قاعده مع مشـاعل ..
قلت : اوه اوه .. نجووووى عندنـااااااااا ..؟
نجوى بدون نفـس : هلا ..
قلت : بل بل بل .. شفيـج مخيـسه النفــس .,
نجوى : لا تخليــني انفـجر الحيــن .. بروحها الصيـحه واصـله خلاص ..
رحت عندها : وي نجوه اسم الله عليـج .. شفيــج ؟؟
نجوى بدت عيونها تلمع : والله هالطــفـس .. صـاير ما يعرف يتعامل بأسلوب عدل نفس الاوادم ..
قلت : من هاي ..؟
نجوى : يعني من بيكون غيـر جاسم .,.
قلت : جــاااسم ..؟ ليـش شسووووى ..؟
نجوى : شوفـي .. الحيـن انا لبـست وكشـخت عشـان اروح معـاهم .. لان كلهم بيروحون السـوق مادري شيبون وانا لزقت وياهم ..
قلت : انزيـن ..
نجوى : ومن عادتي اقعد اسولف واضـحك وانتطـنز مع نوروه .. وانا اضـحك استفزيـتها .. ونوروه قالت حـق جاسم .. جــاسم شووووف نجووووووه .. " وكانت تقولها بـس جي " وعاد هو ما صدق خبر .. كأنه يبي اشاره علـي .. وتم يصـارخ ويهاوووشني .. على اتفـه الاسبـاااب .. وعاد انا ما اعرف اسـكت .. رديـت عليـه .. وهاوشـني ونزلني عندكم .. الحمدلله لإنا كنـا قراب من بيـتكم .. والا نزلـني في الشاارع ..
قلت : ليـش جي يسوي فيـج ..؟
نجوى: والله العظيـم ياساروه مادري .. مادري شفيــه ..؟
معقوووله كل اللي يسويـه جاسم عشـان ما صار نصيـب بيني وبيـنه ..؟ مو معقوول .. وهو عقله كبـير .. مب صغيـر لهالدرجه ..
نجوى : انا خـلاص مب راجعه بيــتناا .. ليـن ما يعدتـل هالخايـس ,.
مشاعل : لا يا نجوى .. مب حـل هذا انـج تتميـن هنيه ..
نجوى : يعني ما تبوني .. خلاص عيل بروح بيـت عمـي ,,
مشاعل :لا والله العظيـم مو هاي قصـدي .. وانتي تدريـن بعد .. بـس لازم تكلميـنه وتعرفيـنه منه شسبب هالعصبيـه الزايده ..
قلت : لا خلها تتم عندنا كم يوم .. يمكن بعد يتهاوشون وتكبـر السالفه ..
شفت خالد يررررررركض بجوالي ..
قلت : من المتـصل ..
خالد يلهث : مادري شوفي ..
خذت عنه الجوال وشفت هاجر المتـصله .. بيني بيـنكم ما كان لي خاطر ارد لها .. ابي اواسـي هالمسـكيـنه .. حاسـه فيها والله ..
رديـت : هلا هجووووووور ..
هاجر : اهليـــــــــــــــــن .. شنو شريــتي حق عرررررررسـي ..؟
قلت : ههههههههههه .. لا ما شريـــــت ..
هاجر : ليــــش .. باقي سبوعيـن ..
قلت : لا باقي 3 اسابيـع ..
هاجر : نفس الشــي ..
قلت : ههههههههه مستعيـله ..
هاجر : ايه ابي الفكـه من البيـت ..
قلت : مب خايـفه ..؟
هاجر : ليــش اخااف .؟
قلت : يعني .. لانـج عروس .. وبتروحيـن بيـت ثاني وحيـاه ثانيه ..
هاجر : ايه هاي اللي متحمسه له .. بيت ثاني وحياه ثانيه ..
قلت: والله انا خايـفه يا هجوور .. خااايفه ..
هاجر : لا والله راكان ما يخوف قسم بالله ..
قلت : شـي طبيعي ما راح تخافيـن من اخوج ..
هاجر : لا بس لو تعرفيـن راكان عدل بتحمديـن ربـج انه صـار من نصيـبج ..
قلت : ما جنج تدمحيـن اخوج وايد ..
هاجر : هههههههه فديت اخووي .. كيفي ..
قلت : من يمدح اخوه يبيـله رفسـه ..
هاجر : بس عكســـــت المــثل ..
سمعتها تقول : ايـــــه ايــــه شفيــــك .. لا مب ماعطتـك .. ايــــــــه يالخااااايــــس ..
وي شسالفتـها ؟؟
وسمعت صوت خـشـن : الووووو ..
قلت : الووه .. راكان ؟؟
.....:لا مب راكان ..
قلت : مــنووو ..؟؟
....: نسيــتي صووتي .. هههههههههههههههههههه .. ما يمديـنا ..
ذيـــااب!! ..
قلت : ذ .. ذيـاب ؟
ذياب : عليــــــــج نووووووووور .. ذياب حبيبج السـابق ..
قلت : ايا النذل يالحقيــــــر ..
ذياب : لاه لاه لاه .. ليـش تسبيـن اخو زوجج .. يمديـج تطيـحيـن الميـانه وتضيعيـنها بعـد ..؟
قلت بعصبيه : شتبــي انت ..؟ شتبــي ؟؟
ذياب ببروود : لا ما ابي شـي .. بس قلـت دام انـي ما باركت لـج ابارك لـج بالحبيب الثالث .. بس هالمره لعبتيـها صـح يا بنت فاطمه .. خليـتيه يملج عليـج هااا .. يـلا الله يهنيـكم مع بـعض .. بس انتي ما اختـرتي الا راكان هالطيـب .؟. ريـال مصلي وخايف ربـه وعلى نيـاته .. وخطفتيه من اهله .. هو شسوى لـج .. بـس عشـان سحبـني عنـج ذاك اليوم .. بس تدريـن .. كان يوم حـلو .. في احداث خطيـره .. هههههههههههههههه .. كل ما اذكر ذاك اليوم اذكرج يوم تصيـحيـن .. هههههه والله ان شكلج يضحــك .. اخبـرج انتي متعوده على .....
وسكــرت على طوووول ما قدرت اسمع الباقي .. مادري شاللي خلانـي اسمع الكـلام اللي قاله الخااايــــــس الحقيــــــــر ..
ورحت اركـض غرفتـي وتميت اصيــح بصوت عالي .. حسيــت انـي مفضــوحه .. انا ليــش احــب بسـرعه .. كلهم يقصـوووووون علــي .. كلــهم .. كلهم قالوا انهم يحبــوني .. وطلعوا يحبوون يعذبوووني .. محد بيفهمني ويفهم معاناااتـي .. آآآآخ ياربي آآخ .. انا ما راح اعيــش بســلام ما دام ذيـاب عاايـش وعلى وجه الارض .. ما رااح ارتااااح ..
غطيـت ويهي بالمخـده وتميـت اصيــح .. ونمـت على صيـاحي وقهــري ..