منتديات بنوته - عرض مشاركة واحدة

10-27-2011, 10:47 PM

منصور : مممم افاا عليج انتي فصلي وانا البس ..
يزوي : كفوووو والله .. ها العشم فيك ياصرصور ..
منصور : اقول ترا المره الاولى طوفتها لج قلت يمكن بتحترم عمرها
بس مابسمحلج مرتين تقوليلي صرصور واسكت ..
يزوي : هههههه عصب الغلام ..
منصور : هههههههه غلام فـ عينج .. بس ماقلتيلي شو خطتج ..؟
يزوي : ممم انا افكر نجمعهم فـ مكان واحد .. بس ما احسها اوكي
يعني يبالي افكر بغيرها ..
منصور : مممم انتي صبري عليه .. بفكر انا بخطه احسن وبرد لج خبر ..
يزوي : عيل خلاص اترياك بس لا طول ترا والله روضه مب هاينه عليه
اطالعها جيه وما اسوي شي ..
منصور : ولا يهمج انا برتب كل شي .. وفيج الخير والله ..
يزوي : ولو هاي قطعه منيه ..
منصور : يعله فـ ميزان حسناتج .. يلا عيل اشوفج ع خير ..
يزوي : اميين .. بس لا تنسى الرصيد هااا..
منصور : ههههه والله مابنسى ..
يزوي : باااي خسرتني وايدات ..
منصور بضحكه : بااي راعيه الوايدات ..
.
.
اول ماسكرت عن منصور عقت ثقل جسمها ع الشبريه
كانت تحس ببعض الراحه انها راح تسوي شي لـ توئم روحها روضه ..
تكره الفراق وماتبا احد من اللي تحبهم يذوق طعمه مووول حتى لو على حسابها ..
لانها عاهدت نفسها ماتخلي احد يذوق طعم الالم اللي هي حست فيه ..
الا فراق شخصين يحبون بعض يسم البدن سم ..
مسحت دمعتها اللي سالت ع خدها غصب عنها بعنف ..
وحاولت تتطرد اي شي يذكرها بـ الماضي لانها تكره ذكراه ..
.
.
>
<
.
.
كان يطالع على البحر وجنه يشكى همه للبحر ..
كان يحس انه بيموت من الضيجه ماعاد يستحمل اكثر ..
كل الدنيا استوت ضده ..
حتى الشخص الوحيد اللي كان كل شي بالنسبه له
و واقف ويـاه تخلى عنه وابتعد والسبب الاول والاخير غباءه ..
مسك نايف راسه وهو يحس انه بينفجر من التفكير
روضه مووول ماتفارج تفكيره ..
صرخ نايف من زود الالم اللي يحسه بقلبه : خسرتها .. خسرتها .. خسرتهااااااااااااااااااااااا ..
خسرتج يا قلبي .. خسرتج ياقلب نايف .. دخيلج سامحيني ..
وربي ماعدت اتحمل من دوونج ..
انتي اللي كنتي مهونه عليه الم وعذاب اربع سنوات من فراق هلي ..
واحين انتي تركتيني شرات ماتركني الكل ..
دخيلج يا روضه لا تستوين شراتهم .. انتي بنتيـه وتربايه ايديه ..
لاتستوين شراتهم ..
( نزلت دمعه حااااره منه وهو يحس ان الدنيا انتهت بالنسبه له ...
لا اهل ولا اخ يونسه ولا بنته وحبيبته روضه ) ..
.
فـ ذيج الساعه كان منصور يدق على نايف يبا يطمن عليه
بس نايف كان محطي فونه فـ السياره ولا داري عنه ..
رد يدق مره ومرتين وثلاث بس بعد مالقى رد منـه ..
وقرر يسير له فلته من عقب مايرد من المقهى ..
.
نش من قعده بتثاقل وهو متوجه لـ سيارته ..
كانت كل ملامحه تدل ع الهم اللي يشله فـ يوفه ..
والضعف واضح فـ ويهه وجسمه ..
ركب سيارته وهو يتحرك من المكان اللي كان فيه ..
كان يسوق من غير وعي .. وموول مب فـ الدنيا ..
كان ساهي وسرحان فـ عالمه وفـ روضه ..
كانت مول ماتفارج تفكيره .. ابتسامتها .. صوتها ..
نظراتها كل شي فيها ..
كان يسوق بلا مبالاه وجنه بايع الدنيا ..
فجـــــــــــأه
بدون سابق انذار ظهرت جدامه تريلا فـ نص الطريج ..
وبحركه سريعه منه حاول يتدارك الوضع ويبتعد عنها
بس تفاجأ ان فـ الصوب الثاني كانت يايه سياره وهي فـ قمه السرعه
ما كان فيه مجال الا انه يسلم نفسه للامر الواقع ..
لكن وبحكمه من الله سياره نايف انحرفت لـ برع الشارع وتجلبت ..
.
.
كانت ام سالم ويا الخدم فـ المطبخ تشرف على الطبيخ
لانها ماتحب تعتمد ع الخدم فـ كل شي ..
فجـأه طاحت السجين من ايدها وطاح كل شي من ايدينها وهي تحس بنغزه فـ قلبها
ماتدري شو سببها وكانت دقات قلبها سريعه جدا ..
بسرعه ميشيل اتجرب منها وتاخذ السجين من الارض :
ماما فيـه شي .. انتا تعبان ..؟
ام سالم وهي محطيه ايدها ع قلبها : اعوذ بالله من الشيطان الرجيم ..
اللهم اجعله خيــر .. اللهم اجعلـه خيـر ..!!
ظهرت من المطبخ وهي موول مب مطمنه من اللي تحس فـيه ..
.
.
كـان فاقد الوعي ولا يحس بأي شي يدور حوله ..
كل اللي يحس فـيه الم فـ كل اطرافه ..
واصوات ريايل من حوله .. بس ماقدر يميز الاصوات لـ كثرتها ..
كان يحاول يرمس او يحرك طرف عسب يطمنهم انه لا زال حي ..
بس كل محاولاته كانت تبدي بالفشل يحس ان كل جسمه مشلول الحركه ولسانه مربوط ..
بس فجــأه وبعد عده محاولات فاشله اطلق كلمـه بدون اي وعي منه وبصعووبه تامه :
روضـ ـ.... ـ ـه ....!!
(وفجـأه عم الظلام والسكون من حولـه وارتخى كل جسمه لـ يسلم نفسه للقدر ) ..
وتم نقلـه بسرعه فائقه لـ اقرب مستشفى ..
.
.
وصـل منصور لـ فله نايف وعلى طول حدر ..
بس تفاجى ان الفلـه محد فيها ..
استغرب وين ممكن يكون لـحد هـ الفتره ..!!
كان مول مب مطمن .. وبسرعه رفع سماعه فونه ودق على
" خاليه الصغنون "
كان يرن ويرن بس محد يرد ..
حاول مره ومرتين بس بعد مافي رد ..
دق لـ اخر مره وقبل لا يبند سمع صوت غريب عليه فـ الجهه الثانيه ..
..... : الوووو ..!!
منصور : مرحباا ..
..... : مرحبتين اخوويه ..
منصور : هذا مب فون نايف الـ .... ؟؟
..... : الا هو طولي بعمرك .. انت قريب الاخ نايف ..؟
منصور بخوف : هيه نعم .. نايف خاليـه .. ليش هو فيه شي ..؟؟
الشرطي عيسى : لا تتطمن ان شاء الله مافيه الاكل خير ...
منصور وهو واصله حده : اخوويه دخيلك قولي شو مستوي فـ خاليه نايف ..؟؟؟
الشرطي : الاخ نايف تعرض لـ حادث مروري ..
والحمد لله ربك كتب له عمر جديد وقدرنا نلحق عليه
واحين هو فـ المستشفى ..
منصور كان يحس بأنه تشلل وريوله ماعادت تشيله : حـ ـ .. حـ .. ـادث ؟؟؟؟
الشرطي : هيه نعم اخويه .. ومافي داعي اتخاف عليه هو الحمد لله مافيه الا كل خير
وتقدر اتيا تتطمن عليه بنفسك ..
منصور وبسرعه : فـ اي مستشفى اخوويه ..؟
الشرطي : مستشفى الـ ....
منصور : تسلم اخوويه وماقصرت ..
.
( بند منصور عن الشرطي وبلمحه بصر انطلق للمستشفى
اللي دله الشرطي عليها ) ..
.
.
كان يربع ربع وهو يدور ع الغرفه اللي دلوه اياها ..
بسرعه وبدون اي تردد فج باب الحجره و.....
.
.
>
<
.
.
كانت توها ناشه من الرقاد واول مانشت بسرعه تتطالع على فونها
لقت منصور داق عليها 6 مكالمات لم يرد عليها ويزوي 9 مكالمات ..
دق قلبها وبقووه ..
وبسرعه تدق على منصور ..
منصور وبضيجه : هلا روضه ..
روضه وبخوف من صوت منصور : منصور شي مستوي دخيلك طمني ..!!
منصور : روضه اباج فـ رمسه ضروريه ولا زم اشوفج احين ..
روضه وهي حدهااا ميته من الخوف : منصوووور دخيلك ارمس لا تخوفني زياده حد من البنات تعبان ..؟
منصور : لا روضه انا احين ياي بيتكم وبفهمج كل شي ..
روضه وبخوف : لا تتأخر دخيلك ..
منصور : انا جريب البيت عاده ..
روضه : اوك ثواني وبنزل ..
( صكرت روضه عن منصور وبسرعه ع الحمام (وانتو بكرامه )
تاخذلها شور )
تلبست وطيراااان على تحت ..
وكانت تربع ربع فـ الدري ومحطيه ايدينها ع قلبها لان صوت منصور ما كان يطمن موول ..
لقت منصور يترياها فـ وحده من الصالات ..
وبسرعه توجهت من وين منصور ..
روضه وبخوف : منصور ارمس حرقت اعصابي ..؟
منصور : روضه بقولج شي بس اباج تمسكين اعصابج وتهدين شوي ..
روضه : منصوووور ارررمس بس عااااااده ..
منصور : نايـف ..
روضه جنه احد صب عليها ماي بااااارد
صرخت وبنبره خووف واضحه : بلااااااااه .. ارمس منصور ناايف فيه شي ..؟؟؟
منصور وهو شال هم الدنيا : نايف سوى حادث واحين بين الحيا والموت ويبا يشوفج قبل لا ...
(مارام يكمل ونزل راسه )
روضه من هول الرمس اللي سمعتها ردت على وراء
كانت تتطالع على منصور وهي فاجه عيونها ..
مارامت توقف على ريولها اكثر ..
ونزلت بقوووووه على الارض جنه مصيبه حلت عليها ..
حست ان الدنيا كلها توقفت .. والرؤيا عندها انعدمت ماعادت تتطالع شي جدامها ..
منصور من طالع حالتها خااف عليها وااايد ونزل لمستواها وهو يحركها من جتوفها ..
: روضـــه .. روضــــه ...
(روضه كانت مثل الجثه بليا روح كان يهزها وجسمها يتمايل ويا هزات منصور )
خـافت لاتفقـده شرات مافقدت عهـود ,,
{ ليــش اي شيء أحبـه لازم أفقــده } ..
روضه وهي مول ماترمش لها عين : أبـ ـ ـا أ .. أ.. أشووفـ ـه ..
منصور رفعها من الارض وسدنها عليه وصرخ ع بشكارتها ميشيل :
ميشيـــــل ... ميشيــــل ...
ميشل اول ماسمعت صوت منصور وهو يزاعج طيراان على الصاله :
Yes sir
منصور : Go and Bring Abah and Shelah to Miss Rawda
ميشيل : Okay sir ..
( ربعت ميشيل اتييب لـ روضه شيلتها وعباتها عسب اتسير المستشفى ويا منصور )
منصور : روضه قلبي البسي العباه ..
(لبست روضه عباتها وشيلتها وطيران على المستشفى )
.
كانت تركض بدون احساس كل ذره فيها تصرخ ألم وحسره
ع الايام اللي طافت وهي زعلانه على ابوها وقلبها ..
كان ودها تفجر براكين من الدموع وطلع كل اللي فـ قلبها ..
بس الا هـ الشي ماتروم عليه جدام الكل ..
كانت تحس بكل خطوه تخطيها لـ حجره نايف ان نهايتها جربت ..
بسرعه فتحت الباب بكــــــل قوتها ..
وهـي تطـالع .........
.
.