منتديات بنوته - عرض مشاركة واحدة

10-21-2011, 03:35 PM

,
،
سارت ناحيه امها وهي تقعد حذالها وكانو يسولفون سوالف عاديه ..
اما عن روضه فـ كانت تغلي من الداخل ..
فجأه التفتت ام سالم وهي تقول لـ روضه : اميه فديتج سيري قولي
( وجنها غيرت رايها ) وبأبتسامه حنونه : ولا اقولج سيري احسن بروحج
سوي حق ولد عمج شي يشربه ..
ابتسمت روضه وهي مستغربه ولـ اول مره امها تقول لها سيري المطبخ
همست بهدوء : ان شاء الله اميه .. ( انسحبت عنهم بهدوء وهي تندب حظها اللي ما خلاها تقعد تتطالع على ملامح هزاع ) ..
حدرت جناح المطبخ وبسرعه توجهت على المطبخ وسارت تقعد على الطاوله اللي جنب المطبخ
ورفعت عيونها وهي تتطالع على البشاكير جدامها وقالت بهدوء:
سالي سوي عصير برتقال ..
( فجاه سكتت وهي تقول بهمس ) : لا يمكن هو مايحب عصير البرتقال
( فجت عيونها للاخر وهي تسمع الرد وراها )
بسرعه التفتت وهي تتطالعه وراها تماما وقال وهو يبتسم :
مممم احبه .. ( كان يطالع عليها) ضحك وكمل :
أقصد احب عصير البرتقال ..
( نزلت راسها وهي تفكر فـ شو قصده .. )!!
: هـ الهزاع بييبلي الجلطه .. دخيلك لا تضحك .. آآه ياربي فديت هـ الضحكه ..
حوو رواضي شو قاعده تقولين .. كنترول ماما كنترول ...
( كان بس يطالع عليها ويبتسم .. متأكد انه فهمت قصده )
حست على عمرها وقالت بسرعه تفاديا للموضوع :
سالي خلاص سوي عصير برتقال ..
التفت هزاع على سالي بعد ما كان يطالع على روضه بنظرات غريبه
وقال : سوي اثنين ..
التفتت عليه روضه وهي ترفع راسها على فوق عسب تتطالع عليه
وهي مستغربه .. حق منو الثاااني ..!!
ابتسم وهو فاهم قصدها ونظراتها وقال : ممم واحد حقي والثاني حق روضه
( وابتسم وهو يظهر جزء من اسنانه اللي جنها لولو مرصوص )
بسرعه نزلت راسها وهي تقول فـ خاطرها : حرام عليك يا هزاع
ارحمني بس عااده ..
( وجنها تذكرت شي ) : بس تعااالي ليش احس انه وياه عادي
مب جنه توه شايفني ويا واحد وهو يسحبني ..!!
معقوله مب هو اللي ياني ..!!
( حبت تفتح الموضوع تدريجيا وقالت وهي تأشر على الكرسي :
تعال اقعد .. (وكأنها تذكرت شي ) اووه صح مايستوي تقعد هني ..
ابتسم وهو يتوجه للكرسي وهو متجاهل رمستها عسب يثبت لها العكس
وقعد ع الكرسي اللي جدامها وقال وهو يبتسم :
منو قالج .. اصلا انا ياي عسب اقعد وياج ..
( حست بالصدمه تجتاحها .. معقوله هو ياي يقعد ويايه !! )
لكن وفجــأه خاب ضنها وهي تسمعه يقول : هيه بلاج مصدومه
لان خالوه ياها اتصال .. وحبيت اعطيها الحريه ف التحدث ..
( ابتسمت وهي تقول فـ خاطرها ) : انا قلت مستحيل يوم واحد
يكون فـ صالحي ..
( فاقت من افكارها وهي تقول وتحاول تستدركه فـ الرمسه ) :
ممم عيل وين اخوانيه والشله عنك ..!!
حط ايده على خده وقال : ممم كنت فـ المقهى بس انا رديت ..
( كانت بتمووت من الصدمه احين تكدت شكوكها ..
هوو محد غيره يا عسب يردها من المول ) ..
قالت بهدوء وبنبره خوف لكن كانت بالنسبه لـ هزاع غريبه نوعا ما : ليش رديت ؟؟
حست على عمرها وهي تستجوبه وبسرعه قالت : تقول مسوي جريمه وانا قاعده استجوبك ..
( اكتفت بالابتسامه وهي تخفي وراها التوتر والارتباك ) ..
وبأبتسامه وهو يسمع رمستها قال : لا عادي .. خذي راحتج
( ورفع عيونه عليها وثبتهن فـ عيونها وغمز لها ) : انتي
الوحيد اللي تقدرين تسألين فـ اللي تبينه ..
حست بالخجل من حركته بس مسرع ما انتبهت للكلمات الاخيره
وقالت فـ خاطرها : شو يقصد هـ الهزاع ..
بييبلي الجلطه لازم يوقف عن هـ الحركات
انا نسيته خلاص هو فتره حلوه فـ حياتيه ومرت ..
قالت بمرح وهي تحاول تفهمه انه لا يتعدى حدوده وانه هو اللي بنفسه نهى اللي كان بينهم : حسنــأً .. هزاعوه وين كنت وليش راد .. يلا اعترف ..
ابتسم بـ هدوء وفهم قصدها
على انه ما بتعامله جيه شرات ما تعامل سيف وعبدالباسط لو ماكان مجرد اخ لها ..
قال وهو يبا ..... : ليش ( ثبت عيونه عليها ) تسألين ..
مسويه شي اخت روضه ومتزيغه منه ..!!
( حست قلبها طااح فـ الارض .. خلاص كل شي انفهم ..
وهزاع وعرف بالسالفه شو باجي )
انتشرت ضحكته بين ارجاء المطبخ وهو محطي ايده بخفه على خده
وهو يطالع على روضه بنظرات وقال : روضه الخبله بديت اشك انج
صج مسويه شي ..!!
كنت اسولف وياج .. ( سكت لما ما لقى منها رد ) وقال : اوك
برد على جوابج .. ممم رديت عسب ايي اخذ فونه لاني نسيته
وعقب ... ( سكت ) ..
( حست انه احين بتنتهي حياتها .. اكيد انه احين بيقولها عن السالفه)
وكمل : ويوم كنت ابا ارد المقهى سمعت ام سالم نازله وعاده قعدت وياها
( حست انه شي ينلعب من وراها وهي ماتعرفه )
قالت بخوف وهي حابه تعرف اذا هو اللي ياها .. لان حمدوه
قالت هزاع يترياج تحت يعني معقوله تكون حمدوه جذابه ..!!
بس لا مستحيل عيل هااك سياره منوو ..!!
وربي هاك سيارته .. اووووف .. احسه يجذب عليه ..
ومايبا يقول الحقيقه ..
( فاقت من افكارها على صوت هزاع وهو يقول ) : وين وصلتي ..!!
قالت بلعثمه : هـ ـ ـأه .. لا هني .. بس .. ( سكتت وماعرفت شو تقول )
قال هزاع وهو شاك فـ الموضوع : روضه بلاج مستوي شي وماتبين احد يعرفه .. ؟؟!
رفعت بسرعه عيونها عليه وهي تتطالعه وتقول فـ خاطرها :
اكيد يعرف .. اكيد ..
قالت بصوت مسموع بدون وعي : يعني انت ما سرت مكان عقب ما رديت ..!!
قال وهو يطالع عليها بنظرات غريبه ما فهمتها .. : لا ماسرت
رفعت ايدها وهي تحركها : مووليـه ..!!
قال وبدا يوضح فـ صوته نبره غريبه : مووليه ..
( سكتت لانها بدت تجلب لنفسها الشكوك وفجاه وعت من افكارها على صوت الفون وبسرعه ردت ) : الـــوو حمدووه ..!!
سمعت فـ الجانب الثاني ضحكه وعرفت شو سبب هـ الضحكه ..
( يتحرنها ركبت ويا هزاع )
رفعت عيونها وهي تتطالع على هزاع بنظرات وبسرعه نشت
وهي تاركه هزاع مكانه فـ المطبخ ..
وظهرت من المطبخ وهي تقول لـ حمدوه بعصبيه : بسسسسسسرعه
قوليلي شو السالفه لا اذبحج ..
خافت حمدوه من صوت روضه العصبي وفرت الفوت فـ حضن يزوي
وبادلتها يزوي الحركه وردته فـ حضن حمدوه وهي تقول :
مابااا رمسيها انتي ..
طالعت حمدوه على يزوي بنظرات على انه ( ورطيني )
قالت بسرعه : والله بقول كل السالفه بس لا تصارخي
كانت روضه فـ قمه العصبيه .. لان لو ما سالفتهن هاي
ما كان الفيصل بيركبها وياه ..
ووصلت لحد انه يمد ايده عليها ..
قالت بصوت مملؤء بالعصبيه : قوولي لا اجتلج ..
حمدوه : انزين ..
اول ما طالع روضه ظهرت وسمع اسم حمدوه بين شفتين روضه
بسرعه حط ايده على راسه جنه وياه مصيبه وقال بصوت هامس :
اكيد احين بتقولها كل السالفه ..
بتعرف روضه بكل شي ..
ابحر هزاع فـ عالمه وهو يتذكر اللي استوى قبل ساعه تقريبا ..
بسرعه حدر فله قوم بو سالم وهو متوجهه على الباب حدر
الصالات وهو قاعد يدور على فونه ولقى فونه فوق الغنفه
رفعه وبسرعه فج عيونه على وسعهن وهو يقول : اؤؤؤؤؤؤله
منو داق عليه هـ الكثر ..!!
فحتح القائمه وهو يطالع رقم غريب ..
استغرب منو يكون اللي داق عليه هـ الكثر ..!!
بس وفجأه رد الرقم الغريب يدق عليه ..
رد عليه وهو يسمع الجانب الثاني يقول : الــوو

( استغرب هزاع وهو يسمع صوت انثوي وقال وهو متأكد
انه السيناريو اللي كل مره يستوي ينعاد احين " المعجبات " ) :
خيــــر ...!!
سمع الجانب الثاني يضحك وارتفع ضغطه اكثر وتأكد ساعتها اكثر
انه وحده من المعجبات اللي متعود عليهن ..
قالت البنت اللي ترمسه : هدى اعصابك انت هزاع صح ..؟؟
قال هزاع بعصبيه وممزوجه بنبره الثقه : هيه هـــزاع .. خيير ..!!
سمع الضحكه مره ثانيه تنعاد وقالت : مافي داعي لـ كل هـ العصبيه
اكيد ان المعجبات مأذياتنك ( وضحكت بسخريه )
وقالت : انا بنت عمك ..
هدن ملامح هزاع وهو يسمع انها وحده من بنات هله ..
وبسرعه قال شرات الصوت العصبي : منو من بنات عمامي ..!!
..... : انا بنت عمك سعيد .. انا حمده ..
ابتسم وهو يقول وملامح ويهه تهدى : هلا حمده ..
فيه شي ..!! عسى ماشر !!
ابتسمت حمدوه وهي تضرب عسب تسكت يزوي وقالت له :
لا ماشر بس حبيت اقولك نحن كنا فـ المول وفجأه يانا اتصال
وقالو لنا انه اخويه مريض وعسب جيه ردينا بدريوليه روضه
( عقد حيانه وهو يسمع رمستها وقال فخاطره : وانا شلي فـ السالفه )
كملت حمدوه : واخوانيه وولاد عميه كلهم فـ المقهى منجلعين يطالعون
المباراه .. مصكرين اجهزتهم ..
( وبمرح ) : والحمــــــد لله .. لما دقينا عليك لقينا ان فونك مفتوح
وعاده قلنا الق ما تلحق .. لان كنا نباك تسير لـ روضه
لانها وحليلها قاعده بروحها فـ المول .. وتتريا منو اللي بسير يردها
لان نحن ما رمنا نردها ويانا ..
لانا مرينا اول البيت وعقب درب المستشفى .. وبعدين هي مستحيل
تظهر وهي ما مخلصه تسوق ..
وكل هـ السالفه اسوت فجأه اصلا ..
قال بسرعه وهو شاك فـ الموضوع ومن الطلب اللي بينطلب منه :
والمطلووب ..!!
حمدوه وبأبتسامه الخبث توضح على ويها : نباك تسير ويا روضه
عسب تردها .. لان دريوليتها ويانا .. والدريوليه
اللي فـ بوتنا مشغولين وقلنا عاده محد غيرك ..
نزل هزاع راسه وفكر شوي وهو يقول : اوكي خلاص انا بردها ..
قالت حمدوه بوناسه : مشكوووووور هزاع .. وربي ماتقصر شكراا ..
وصكرت عنه بسرعه ..
قعد هزاع على الغنفه وهو يرمي ثقل جسمه ويقول : وانا اللي مابا
اطالعها احين يقولن لي اسير اردها ..
لا مستحيل مابا اطالع عليها .. مابا اطالع ..
يكفي من اطالع عليها اتهور لابعد الحدود ..
احسن اظل جيه لا طالعها ولا اسمع صوتها ..
فكر بسرعه شو يسوي عسب يحل هـ المشكله وطرى على باله
بسرعه دريوله اللي برع ..
بسرعه ظهر برع الفله وهو يدق عليه ..
ماثواني ير يرد الهندي وفهمه بسرعه وين يسير ..
اما عنه فـ رد مره ثانيه لداخل الصاله وابحر فـ عالمه المتناسي ..
.
.
>
<
.
.
وهـاي كل السـالفه ..
روضـه بـ قهر : أبـا افهم شيء واحد .. ليش سويتن هـ الحركـه هاه .!.
( نزلت حمدوه رأسـها .. وحاولت تكتم الضحـكه ..
بس تفجــأت بـ صرخـه من روضـه .. )
صرخت روضـه : يامسودات الويـه .. شو اللي يضحك هاه .!
( فرت حمدوه الفون بسرعه فوق حضـن يزوي ..
وشردت من الحجره .. عسب يزوي ترد على روضه غصب .. )
.
طـالعت يزوي على حمدوه اللي شردت بـ قهر ..
وتمتمت كلمات مب مفهومه فـ خاطرها ..
وبـ هدوء : ألــو
صرخت روضـه بـ عصبيه : شو هـ الحركه اللي سويتنها هاه ..
ابا افهم ليش هـ الحركـه ..
( بلعت يزوي ريـجها .. تدري بـ روضـه من تعصب ماتعرف حد .. )
وقـالت تحاول تهديـها : والله يارواض انـه كان قصدنـا شريف ..
( حســت روضـه بالقهر اللي بـ داخلها يكبـر ,, )
يردن ويقولن شريف .. : أأي شريــف هاه ...
يزوي : والله كان قصدنـا ان نجمعج ويـا هزاع ..
لانـه حسينـا من نظراته انه يحبــج ..!
وقلنـا بنسوي خيـر ..
.
أبتســم بـ هدوء وهو يطـالع عصبيـه روضـه الحـاده ,,
وبسـرعه فهم السـالفه عقب ماسمـع رمسـتها ..
وقـال فـ خاطره : لـ هالدرجـه تكرهين وجودي حولـج ياروضـه ..
( أبتســم بـ هدوء مخفـي بـداخلـه الالـم اللي سببته لـه هـ السالفه )
مشـى وهو يحـاول يرد الثقـه والغرور ..
اللي كان يحميـه ..
وترك روضـه .. فـ عصبيــها الحـادده ..
وماتدري انـه كان يسمـع رمسـتها ..
.
.
قـالت بـ قهر : يعني انتن ماتدرن انـي انا رفضـته ..
ليش تسببن لي وله الاحراج .. هاه .!
يزوي تحاول تهدي روضـه : اوووف .. رواض بسج ... تعبت وانا افهمج
أقولـج شيء ...
( سـكتت .. ومسرع ماكملـت ) : السـالفه ومافيـها ..
أنـه انا وحمدوه .. كنا بنردلـج الملقـب اللي سويـتيه فيـنا أول مارديتـي البلاد ..
( فــجت عيونـها للأخـر .. ظهرن البنـات متحمقـات وأنا ما أدري ) !
وتمتمـت بـ قهر .. وتهديد : معليـــه ..!
( وأنهت المكـالمه .. وهي تحس بـ قهر .. )
ليش حطـنها بـ هالموقف ..
لو مب لعانتهن .. جان حتى ماطـالعت ع ويـه هاك الكريـه ..
ولا تنهدم ثقـه هزاع فيـها ..
.
بسـرعه مشـت وهي متوجـه ع المطبـخ .. تبا تلحق بـ هزاع ..
بس تتفأجـى أنـه محــــد فـ المطبـخ ..
( غمضــت عيونـها ... وهي تتنهـد .. وتترك المطبـخ .. )
توجـهت بـ سرعه ع الصـاله عسب تدوره ..
بس تفأجـــات أنـه هزاع محــد ..!
.
فـــجأه أنفتح باب الفلـه .. وحدرت أم سـالم ..
فـجت عيونـها للأخر .. وبسرعه جربت من أمـها وقـالت : ماماتي من وين يايـه .!.
أبتسمت أم سـالم وهي تقول : من بــرع .. موصـله هزاع ..
( وتوجـهت ع الصـاله عسب تقعد ,, )
تبعتـها روضـه .. وهي الاف الافكـار تدور فـ بالها ..
ليــش شو أستوى عسـب يسيـر ...!
( تنهدت وسـارت تقعد حذال أمــها ..)
نزلت الشيـله على جتوفـها وحطت رأسـها بـ حضن أمـها ..
وقـالت بـ هدوء : ماما ملانـه ..!
أبتسمت أم سـالم وهي تمسـح على رأس بنتها .. و تقول : ويديـه .. توج راده ..
.
فــجأه ..
نزلــت شمـا من فوق وهي تطـالع روضـه فـ حضن أمــها ..
وتمسـح عليـها .. حسـت بـ القهر ..
بس حاولت تخفيـه ..
ييت وقـعدت حذالهـن ..
و أندمـجت بـ سوالف أم سـالم .. و روضـه ..!
.
.
<
>
.
.
الســـاعه 4 بـ توقيـت غرينتـش ..!
وفـ بلـجيـكا تحديدً ..!
.
رفـعت الفون وهـي تبتسـم ..
وقـالت بـ دلعها المعتـاد : هلا رورو ..!
...... : هلا والله .. وينج يالقـاطعه .. اشتقنـالج .!
ضحكـت بـ وناسـه وهي تقول : والله .. واي فديـتك ..!
والله مي تو .. بس انت ليـش احيـن ماتيي ..
أحسـك قطعتنـا ..
قـال .. وابتسـامته المعهوده فـ محيـاه : أموون بسـج عاده .. ردي البلاد
أنتي وهاك اللي أسمـها رانـيووه ..
.. ابـاج فـ سالفه ضروووريــه ..

أطلقـت ضحكـه طوويلـه .. وقـالت وهي تحس انها طايره من الوناسه ..

من لما رمسـت حيـاتها : قليــل الادب رانيووه على قولـتك .. أمــك ..

.... : أنزيـن ويـنها .. أبـا ارمسـها ..

( نزلـت رأسـها وهي تطـالع الاجيــاس اللي معبيـه المكان تحتـها .. )

ورفـعت رأسـها وهي تقول : أنــا بـ السوق ..

وأحيـن قاعده بـ الستار بكس .. ولا أزيدك بعد من الشعر بيت ..

قاعده ع الطـاوله اللي تحبـها ..!

( وجنـها ذكرت شيء ) : هيــه .. ومامـي تتحوط بـ السوق ..

( حرك رأسـه بـ اسى وقـال ) : مـاشي أمــل .. لامنج ولا من أمـج ..

الظـاهر انا بروحي بيي وبسحبكن عسب تردن البلاد ..!

وجنـها صدقت أنـه بيي : راكـــانووه .. صـــدق والله ..

( ضــحك .. ودرى انـه .. أختـه الخبلـه صدقــت ) ..

وقـال وهو يرفـع رأسـه ويطـالع مـانع وعبدالله يايـن وياه: أووك حبيبـتي عقب بنتفـاهم ..!

بوزت أمــنه وهي تقول : واحد من ربعك حذالك هاه ..

شلتــك أكرهــا .. أوووووف ..!

( وصكرت وهي مبــوزه .. ) !!

أطلـق ضحكـه طويـله وهو يقول : مشكله الخبـل مايتغيــر ..

قـعد مانع حذال راكان وقـال : الاهــل ..!!

راكــان : هيـه ..

( والتفت جنـه يدور على شيء ) : عيـل ويـن فصـول و ثويـني ..

تسـدح عبدالله ع الكرسـي وهو يقول : فصـول يبجـي ع الاطـــلال ..

وثويـني ع ما اظــن ويـا نوافووه .. نايف يعني ..

( وضـحك .. وهو يفرك شعــره النـاعم )

طـالعوا الشـباب على عبدالله ..

هذا هو عبدالله مايتغير كـل حيـاته ضحك وبــس ..

قـال راكـان بـ سرعه : وليـش يبجـي ع الاطــلال ع قولتـك ..!

مـانع : ما ادري بس يـاه أتصـــال وعفـس لـه مزاجــه فوق حدر ..

كان يسولف ويضحك .. وفجـــأه .. تغيــر ..!

.

أبتسم .. وهو يقول : روضـه ..

( كلــهم التفتوا يطـالعون على عبدالله .. )!!

ســاعت عبدالله يخوف ..

مع انه شخصيـته من النوع الطيـب واللي قلبـه مفتوح للكل ..

بس يفأجك بـ أنــه يعرف كل شيء يدور حولـك ..

.

،

.

،

.

فـ بيت بو راشــــد ...

يزوي وعبدالله كانو يطالعون الـ tv

ويزوي تاكل ايس كريم وتسوي صوت عسب تغايض فـ عبدالله لانه مووته الايس كريم

عبدالله وهو مقهور : دزيــز قسم لجتلج تـــــــــرا ..

يزوي مارامت تمسك عمرها : ههههههههههه

دزيز فـ عين حرمتـــك ان شاء الله قول اميين ..

عبدالله ومسوي عمره معصب : نشــي سيري يبـيلي قلاس ماي

يزوي ما قالت لا وسارت ع طول : اندين

عبدالله بقهر : انديـن فـ عينج ( وقال فـ خاطره ) : تعالي بس يالنذله وانا براويج..

بطلعه منج تغايضيني ..

يزوي يابت قلاس الماي فـ ايد والايد الثانيه فيها الايس كريم مالها وقالت : هاك يود

عبدالله : جيه الناس ترمس اخوها العود ..

يزوي ببرائه : ماقلت شي .. قلت هاك يود .. شو تباني اقولك عيل ..؟

عبدالله : قولي يود عمي الشيخ عبدالله ..

يزوي بخبالها المعتاد : يود عمي بوكشه متروسه قمل عبدالله ..

عبدالله فـ خاطره بينفجر من الضحك بس ماسك عمره وقال : شووو

شووو .. ماسمعت اقين ..

يزوي وهي تبا الفكه منه : ههههه عبدالله حبيبي هاك قلاس الماي ذليتني عااده

عبدالله : ماباااه شو هـ القلاس انا ماحبه سيري غيريه

يزوي وهي طفرانه : عبدالـلــــــــــه ..

حراام عليك والله انه تعب اضرب خط بس عسب

القلاس ما عيبك .. ماروم ريولتي تعورني ..

عبدالله : قسم بعدلج لحد الثلاثه يا الايرانيه وان ماسرتي تغيري القلاس

بحرمج من هـ الايس كريم مالج ..

يزوي : ههههه هيه قووول جيه من ساعه .. بتموت عسب الايس كريم مالي قوول ..

عبدالله : هاتي ايس كريمج وانا بزخه وانتي سيري يبيلي ماي...

يزوي وهي ماده بوزها : مابـــــاااا بتاكله

عبدالله : شووو .. شوو ... ماسمعت

يزوي وتعلي صوتها : مابـــــــــــــــــــــاااا

عبدالله مسك ايد يزوي ولواها وقال : هاتي الايس كريم قلتلج

يزوي وهي مغمضه عيونها من الالم وقالت : مابااا ..

( ومن كثر ما عبدالله يلوي ايدها الفقيره طاح الايس كريم فـ الارض )

عبدالله وهو شاق الحلج من الونااسه: هههههههه تستاااهلين

يزوي وهي تتألم من قبضه عبدالله ومغمضه عيونها قالت : عبوود يالخايس ودر ايديه عورتني ..

عبدالله : ما بـ بودرج .. اول قولي انا اسفه عمي الشيخ الامير عبدالله .. ببوس ريولك ودر ايديه ..

يزوي : خســــــــــــــــــــي واللـــــــه مابقووول ..

عبدالله وهو يلوي ايد يزوي اكثر : عيل خلج تتألمين

يزوي وهي موول مب مستحمله الالم .. صرخــت بقوووه :

آآآآآآآآآآآآآآآآآآآآآآآآآآآآآآآآآآآآآآي ... وبدا صوتها يتغير على انه بدت اتصيح ..

يزوي وهي تصيح : عبـ ـوود ودرنـ ـ ـي والله انك تعـ ـورني

عبدالله وهو يضحك : هههههه قلتلج قولي انا اسفه عمي الشيخ الامير عبدالله ..

ببوس لك ريولك .. ودر ايديه ..

وبودرج ..

يزوي وهي تصيح : حراااام عليك ودر ايديه ..

.

فجـــــــــآه ..

ينفج باب الصالـــه بالقووو وما يطالعون غيــر سيف ياي صوب عبدالله

وكل علامات الغضب واضحه على ويهه وماسك فـ ايده شماعه حديد ..

.

سيف وهو يصرخ : عبداللـــــــــــــــــــــــــــــه

عبدالله من الخوووف فز على فووق وبطل ايد يزوي

وسار يركض ركض صوب المطبخ ويقفل الباب بسرعه ...

سيف وهو بين غضبـه وكان زاخ فـ ايده شماعه ويضرب على باب المطبخ بأيده ويقول:

بطل الباب يالحقيييير .. ماتباني انا اقول عمي الشيخ..

تعاال انا بقولك وبراويك الادب ..

عبدالله من ورا الباب : لا خلاص مابا والله

سيف وبعصبيه : مالقيت تضارب الا يزوي يالخاااااايس ..

شو سوتلك .. هااا .. ماتروم اتسير بروحك الدكان ولا ريولك مجسره ..

عبدالله : والله توبه .. ومابقولها شي موول .. والله

.

يزوي وهي بين دموعها كانت قاعده فـ الارض وزاخه ايدها وتمسح عليها من الالم ..

(سيف ماقدر يطالع على يزوي اتسوي جيه وتتألم ومايسير لها ..)

.

قرب سيف صوب يزوي وبكل حنيه وخووف واضح قالها : يزووي حيااتي تعورتي ؟

(يزوي من طالعت سيف ما رامت تمسك عمرها وقعدت اتصيح )

.

سيف فـ ذيج الساعه ما رام يطالع دموع يزوي ...

هـ البنت يموووت فيها يحبها من كل قلبه ..

خذها وحضنها بقووه وضمها بين صدره .. وقال لها بكل حنيه :

يزوي غلايه بس عاد لا تعورين قلبي ..

وربي دموعج غاليه عليه .. لا تنزليها لناس ماتستاهل ..

وقعد يمسح دموع يزوي بأيده ..

وهي فـ حضن سيف وبين دموعها : والله ماسويتبه شي ..

ونبره صوته كلها حنيـه : ادري قلبي انج ماسويتي شي .. بس انتي تعرفين ان عبدالله جتليه ولا يطالع ايس كريم .. مستفرط هـ الولد ..

يوم قال جيه سيف مارامت يزوي ماتضحك : هههههههه

سيف : وه وه فديييت ياااربي هـ الضحكه انا .. يعلي مانحرم منها ..

حط صبعه فـ غمازه يزوي وقال : اضحكي مره ثانيه اضحكي

يزوي : ههههه مااباا ..

سيف خذ يزوي ولمها بين ايدينه وقال : والله والله لجتل اي شخص يلمس منج شعره

.

يزوي اكتفت بانها تبتسم حق سيف ..وكانت كل ذره من كيانها تصرخ وتقول

احبـــه والله احبه يا ناااس... الله لا يحرمني منه ..

.

.

<

>

.

.

فجهه ثانيه كان فيه انسان حاقد يبا ينتقم من روضه شر انتقام

والحقد والغيره عمـى قلبهـا ..

هدى وهي تدق على محمود : هلا محمود .. انا جاهزه تعال مر عليه ..

محمود : ثواني وبكون ويـاج ..

هدى : اوك اترياك .. باي ..

( هدى ماكانت تبا روضه تتطالع عليها عسب لا تكشف لعبتها

فـ دقت ع وحده من ربيعاتها واتفقت وياها عسب تبدي تنفذ خطتها )

مشت بخطواتها البطيئه وهي تتجه لـ حجره امها المشلوله

وحطت ايدها على الباب وقالت : اميه انا بظهر ويا ربيعتي

عندي جمن شغله ابا اخلصهم ..

حركت امها راسها بالموافقه وظهرت ..

.

.

اول ما وصلو للمكان اللي اتفقو عليه ..

هدى : محمود انت يبت اللي طلبته منك ..!!

محمود وبأبتسامه خبث : ولو .. افاا عليج .. سجلي وياج ..

سجلت هدى رقم الفيصل فـ جهازها وبادلت محمود نفس الابتسامه ..

سوسن : وانا شو دوري احين ..؟

هدى : انتي الدور الاهم احين .. اسمعي عدل ..

احين بدقين على روضه وتقولين اللي بقوله لج بالحرف الواحد

وتحاولين قد ماتقدرين تتعاملين وياها بهدوء وبلطف عسب تثق فيج

سوسن : افاا عليج لا توصين ..

هدى : اسمعي عيل ...

.

.

<

>

.

.
.
كانت متسدحه ع الشبريه بهدوء وهي تقرا روايه فرنسيـه ..
لحد ما اعلن الفون عن قدوم اتصال اللي بحد ذاته كسر حاجز الصمت
اللي كان عام ع المكان ..
تزيغت روضه من صوت الفون وهي تنش من قعدتها وتتطالع ع شاشه
الفون ..
استغربت من الرقم الغريب اللي داق عليها ..
بس ماعارته اي اهتمام وسوت طاااف .. لانها ماترد ع الارقام الغريبه ..
حطته سايلنت وردت تقرى روايتها ..
ماثواني غير توصلها مسج من نفس الرقم اللي داق عليها
كشرت وهي تتطالع نفس الرقم وقال فـ خاطرها :
خير ان شاء الله منو هاا اللي محتشر جيه ..!!
قرت المسج وعلامات الاستغراب بدت توضح على ملامحها..!!
( مساء الخير .. روضه انا بنت شراتج .. واباج فـ موضوع لو سمحتي
ممكن تردين عليـه ) ..
روضه وبين دهشتها : روضـــه ...!!!
وتعرف اسمي بعد ..!!!
( ماثواني الا والرقم الغريب يدق مره ثانيه )
رفعت روضه السماعه وما قالت اي شي ..
روضه : .........
...... : هلا روضه شحالج حبيبتي ..!!
روضه وبأستغراب : اختيـه ماعرفتج انتي منو ..!!
وشقايل تعرفيني ..!!
....... : انا سوسن .. واذا ع سؤالج شقايل عرفتج
فـ ها اللي حدني اني ادق عليج ..
روضه وهي مب فاهمه شي : لا تقعدين ترمسين بالالغاز ..
قولي اللي عندج ولا ببند ..
سوسن : والله ياروضه مايستاهل شي تعصبين عليه ..
ترا انا بنت شراتج وداقه عليج عسب اقولج كل السالفه ..
روضه وهي بدت تهدي : اوك انا اسمعج ارمسي ..
سوسن : انا بقولج هني اللي اقدر عليه ..
والباجي لازم اشوفج ويه بويه عسب اقدر اسلمج الامانه ياروضه
من ايدي لايدج ..
روضه والف علامه استفهام فوقها : امااانه ..!!! امانه شو اللي قاعده ترمسين عنها ..!!!؟
سوسن : السالفه كلها بقولها لج من اشوفج ..
روضه : وليش ماتقولينها هني .. لا تتوقعين اني بظهر وياج ..
سوسن بطيبه مصطنعه وتحاول تأثر على روضه :
حتى لو قلتلج ياروضه ان السالفه تخص عهود ..!!
روضه من سمعت الاسم انشل كل عرج بنبض فيها ..
روضه وهي بلعثمه : عـ.. عـهـ... عهـ ـود ..!!!
سوسن وابتسامه الخبث انرسمت على محياها : هيه ياروضه
عهود .. وعهود مابترتاح فـ قبرها الا لما اسلمج الامانه ..
احسها قاعده تتعذب فـ القبر والسبب هـ الامانه ..
عسب جيه لازم اشوفج فأسرع وقت ياروضه ..
روضه كانت تحس ان الدنيا كلها توقفت خلاص ماعادت تتحمل
بسرعه وبدون وعي قالت : انتي ووووين ...!!!
سوسن وهي شاقه الحلج : انا فـ *****
انهت روضه المكالمه وبسرعه توجهت للمكان اللي وصفتها اياه سوسن
كانت تحس بشعور غريبه فـ داخلها ..
.
.
سوسن وبلعانه : ههههههه الهبله يايه ..
هدى : كفوو عليج واحين الخطوه اللي عقبها ..
اول ما وصلت روضه للمكان اللي وصفوها اياه كانت تتريا فـ سيارتها وموول ماتحركت منها ..
لحد ما طالعت انه بنت محجبه كانت تتجه على صوبها
واول ما طالعت روضه ابتسمت بأبتسامه يظهر منها البرائه
عكس اللي فـ داخلها ..
روضه اول ما طالعت عليها فتحت دريشتها شوي لحد ما اقتربت البنت
منها اكثر ..
البنت وهي متوجهه لـ روضه وبأبتسامه : انتي روضه مب جيه ..!!
روضه وهي تبادلها الابتسامه عكس الاضطراب اللي تحس فيه :
هيه نعم انا روضه .. اكيد انتي سوسن ..!!
سوسن : عليج نور .. ممكن اركب وياج ..
روضه وبطيب نيه : حياج ..
ركبت سوسن حذال روضه وهي تخفي كل ملامح الحقد فـ داخلها
عكس مظهرها الخارجي اللي يدل ع الطيب والعفه ..
روضه : انتي قلتي تبيني فـ سالفه تخص عهود ..
سوسن : هيه ياروضه اباج فموضوع يخص عهود ..
وعهود كانت مأمنتني على سر اقولج اياه ..
وماحبيت اقوله لج فـ الفون لان مابناخذ راحتنا كثر احين ..
روضه وهي تحس بخوف : اوك ارمسي انا اسمعج ..
سوسن وهي تتطالع على برع السياره يمين وشمال :
ممم خليني اييب شي نشربه لان الجو بارد وعسب ترخين
اعصابج بعد لان من شكلج يوضح عليج ان اعصابج مشدوده ..
( روضه أكتفت انها تبتسم للبنت اللي جدامها )
وبحركه سريعه ظهرت سوسن من السياره وفـ ثواني كانت يايه وهي
فـ ايدينها قلاسين كوفي ..
خذته روضه بطيب نيه وهي ترشف منه ..
سوسن : واحين بقولج السالفه ..
روضه : اسمعج .. قولي اللي فـ خاطرج ..
بدت سوسن ترمس ببطئ وجنها تتريا شي ..
.
.
<
>
.
.
وفـ الجهه الثانيه ..
واحين الدور على الغبي الثاني ..
فجت هدى فونها وهي تدور على رقم الفيصل وتدق عليه ..
الفيصل كان مبحر فـ عالمه ويتذكر اخر شي سواه فـ روضه
وكان يحس بلوم .. بس فجــأه قطع عليه صوت فونه
اللي كان بيحترق وهو يدق ..
رفع فونه وهو يطالع على اللي داق ..
استغرب من الرقم الغريب بس على طول رد بصوته الشامخ الواثق :
الــوو ..
هدى وهي تحاول تتصنع الدلع : هلا ومسهلا ..
الفيصل من سمع الصوت واللي يظهر فيه الدلع المصطنع حس بالتقزز وبسرعه قال :
خيـــــر ..!!!
هدى من سمعت نبره صوته اطلقت ضحكه كانت كافيه انها تنرفز الفيصل : ههههههههه الخير بويهك يا حلوو
بس حبيت اقولك ان حبيبت قلبك بين الحياه والموت
فـ مستشفى الـ ****** ويمكن لو طالعتها
احين وهي بـ هالشكل راح تخلص عليها بنفسك .. هههههههه
فـ بليز يا حلوو لا تتأخر لان التأخير مب من صالحك ولا من صالح
حبيبت قلبك .." روووضه " ههههههه
( وانهت المكالمه من دون لا تسمع رده ) ..
الفيصل فـ ذيج الساعه كانً نيران الغضب مشتعله فـ يوفه
يحس انه بيمووت من القهر ..
مايدري ليش .. من اسلوب البنت اللي دقت عليه ولا من سمع ان روضه
قاعده تعاني وبين الحياه والموت ..
بسرعه وبدون احساس منه توجه للمكان اللي دلوه ايااه ..
.
.
فجـــأه حست روضه بدوخه مب طبيعيه
كان كل شي حولها يدور والدنيا بدت تستوي كلها ضباب
مسكت راسها وهي تحاول تتماسك ..
سوسن بخوف مصطنع : رووضه حبيبتي فيج شي ..!!
رووووضه انتي تسمعيني ..!
ارتخى جسم روضه من بين ايدين سوسن واغمي عليها ..
بسرعه ظهرت سوسن من سياره روضه وهي تزقر محمود وهدى
على ان المهمه تمت ..
نقلو محمود وهدى روضه للمستشفى اللي دلوها للفيصـل
ونظره الخبث والانتقام كانت تعلى فـ ملامحهم ..
.
.
الفيصل كان موول مب فـ الدنيا كان كل تفكيره شو اللي ممكن
يكون فـ روضه ..
وشو مصلحه البنت اللي دقت عليه ..
كانت الافكار تتعاصف فـ راس الفيصل كان موول وعيه
لحد ما وصل للمكان اللي دلوه وتوجهه على رقم
الغرفه اللي انعطى اياها ..
اول ما وصل للغرفه طالع روضه وهي علامات التعب واضحه فـ ويها
كان يطالع عليها بخووف وصدمه ..
.
وجنه احد قالها ارفعي راسج
واول ما رفعت راسها انصعقت وبقوووه من طالعت على الفيصل ..
هو شو اللي يابه هنــي ..!!!!
ومنو اللي قاله اني انا فـ هالمكان ..!!!
.
الدكتوره اللي كانت حذال روضه بأبتسامه : اطمن يافندم
انتا اكيد قوز المدام ..
ماتخافش دي حاله تحصل لكل الحريم ..
الفيصل وهو مب مستوعب شي ..
ولا روضه اللي كانت تتطالع على الدكتوره بقهر وخاطرها تجتلها ..
الفيصل كان يرمس بدون احساس : دكتوره طمنيني هي شو فيها ..!!
الدكتوره وتزيد من ابتسامتها : مبـــــــــروووك هي حـــــامل ..
.
.
.
انتظروني فـ البارت القادم ان شاء الله
مع تطورات جديده فـ احداث روايتنا ..
.
واكرر

اضضن انه هالاسبوع كثرت من البارت تكفي لاني تعبت وابغى استريح وتقريباً ما اقدر ادخل الا بعد اسبوع بسبب الاختبارات ووقتها برجع لكم بالبارت الجديد

اوكي استأذنكم

ــــــــــــــــــــــــــــــــــــــــ

يمكن اطول وما ادخل لاسبوع او اكثر سوري انتظروني يوم الاربعاء الجاي ووالله تعبت مررة صح اني ما كتبتهم بس النقل صعب واعتذر لكم من كل قلبي وادري ما حد بيحس اللي انا فيه والشكوى لله وحده .. بااي

اختكم في الله

جالكسي والدنيآ عكسي

وانتظر توقعاتكم ..