منتديات بنوته - عرض مشاركة واحدة

02-04-2011, 03:14 AM

(في بيت أبوصالح..)
سلطان: أفنان وين خواتك؟؟
أفنان:فوق..
سلطان: إلاصح يامنيرة بنتك ذي نجحت ولا لا؟؟
منيرة:تقول يوم راحت للكلية قالولها إن النتايج بتطلع مع بداية السنة الجديدة..
سلطان:والله ماندري عن بنتك ذي شكلها ميب وجه دراسة..
منيرة:لاياشيخ .. وليه ميب وجه دراسه يعني ماحد درس ودخل كليات وتوظف إلا بنتك؟.
سلطان:والله رهف درست ونجحت وتوظفت ولادريت عنها..
لكن بنتك هذي بهذلتنا يالله يالله درست ويالله ويالله دخلناها هالكلية...
:::
:::
,, في غرفة أبرار وأثير..
أبرار: واااو ريحته تجنن..
أثير: الحين شالمناسبة يهديك هالعطور وهالساعات..
أبرار: بمناسبة أول لقاء بيني وبينه..
أثير: وانتي الصادقة أول لقاء وآخر لقاء..
أبرار: ليه بسم الله علينا بنموت..
أثير:ابرار خلاص اذا هالمرة عدت ماتدرين المرة الجاية شيسير..
أبرار:يووه قامت توسوس.. أمممم أقول أثورة حبيبتي ممكن طلب؟؟
أثير:إيه ماقلتي أثورة إلا وانتي تبيني أطلع..
أبرار:شاطرة حبيبتي ممكن تطلعين..
أثير:اطلع عشان تكلمينه..
أبرار: وانتي اشدخلك اطلعي وصكي الباب..
أثير: ياخوفي هالسعادة اللي انتي فيها تتحول لجحيم..
,, وتطلع أثير وتصك الباب..
***
****
*****
(في بيت أم عبدالرحمن..)
,,في غرفة أم عبدالرحمن..
,,الباب يدق..
لطيفة وهي تمسح دموعها: ..مين؟؟
تركي: أنا يمه..
لطيفة وهي تخبي اللي بيدها تحت مخدتها: تعال ياتركي..
تركي وهو يطالع بعيون أمه وعارف إنها تبكي:
كيفك يمه؟؟
لطيفة: الحمدالله..
تركي: يمه وشفيك تبكين ؟؟
لطيفة: ولاشي ياولدي سلامتك..
تركي:يمه وش اللي خبيتيه تحت المخدة ..
لطيفة: ولاشي ..
تركي: ممكن أشوف.. ,,, ويدخل تركي يده تحت مخدة أمه ويطلع اللي تحت المخدة ويوم شافه لاإراديآ نزلت دموعه..
,, ورجعت لطيفة تبكي..
,,كان هالشي اللي أبكى تركي وأمه هو جاكيت جينز لخالد يحب يلبسه دايمآ..
تركي:يمه اللي قاعدة تسوينه مايفيد ولارح يرجع خالد..
لطيفة:ماني قادرة أنسى إني السبب بموته..
تركي: لايمه لاتقولين كذا الأعمار بيد الله وانتي حرمة كبيرة وعاقلة ومؤمنة بالله..
لطيفة: إنا لله وإنا إليه راجعون... الله يرحمه..
تركي:يمه قومي غسلي وجهك وتوضي وصليلك كم ركعة..
لطيفة:انشالله.. هذا أنا بقوم..
***
***
***
وصل مشاري من المستشفى للبيت اليوم الثاني على الساعة 10 الصباح ولقى رهف نايمة وعلى طول حط راسه ونام...
::::
::::
الساعة 4 العصر..
رهف:أشوف ياعمتي..
لطيفة:لا مو تشوفين انتي وجودك ضروري .. أول مرة يجتمعون عندي حريم الجيران من بعد زواجكم.. وانا ابيهم يشوفونك..
أنا عارفة إنك طفشتي.. أمس عمات مشاري واليوم الجيران.. بس أبيك تكونين معي..
رهف:لا والله ياعمتي.. ماطفشت خلاص تامرين..
بس هم متى بيجون..
لطيفة: يمكن بعد ساعة تعرفين قهوة عصرية موب مطولين..
رهف:خلاص..
,, شوي ولا مشاري داخل وتوه قايم من النوم..
مشاري:السلام عليكم..
الكل: وعليكم السلام..
مشاري وهو يكلم رهف: جيبي غداي هنا..
رهف وهي قايمة: طيب..
لطيفة: هايامشاري بشر كيف أم طارق..
مشاري: للحين بغيبوبة ولا ندري متى تقوم..
لطيفة: تبيني أروح أزورها؟؟
مشاري:مو الحين يمه خليها إلين تتحسن صحتها..
,,,
,,,
عطت رهف مشاري غداه وطلعت فوق عشان تلبس وتتجهز..
,,بعد ماخلص مشاري غداه وقعد مع امه وسولف.... على طول طلع لفوق عند رهف..
:::
:::
أول ما دخل مشاري طارت عيونه برهف وقام يطالع وهو مستغرب..
كانت رهف لابسة تنورة ميدي مشجرة تشجيرات ناعمة أسود بأبيض وعليها بلوزة سوداء فتحة الصدر واسعة و تحت البلوزة بدي أبيض ولابسة شبب أبيض زحف..
وقاعدة عالكمدينة وتستشور شعرها.. لكنها خلصته بسرعة ..
حطت كحل ومسكرة وقاعدة تكمل مكياجها..
مشاري وهو متمدد عالسرير:رهف عسى ماشر وين رايحة؟؟
رهف:ولا مكان بس جارات عمتي بيجون وقالتلي اقعد معاها واستقبلهم..
مشاري:وكل يوم جاينا حريم مرتزات بهالمجلس..
رهف:هم يجون عشان عمتي وماشالله عمتي كريمة قلبها مفتوح للكل..
مشاري:يعني بتنزلين..
رهف: إيه..
مشاري:لا معليش ماله داعي تحضرين جمعة الجيران..
رهف التفتت لمشاري: بس عمتي طلبت مني اني انزل وقلتلها طيب.
مشاري:مو مشكلة قوليلها مشغولة ولا أقدر أقعد معكم ياعمة..
رهف:ليه؟؟
مشاري:وش اللي ليه أنا رجلك ومو موافق إنك تنزلين .. وأبيك تقعدين معي..
مشتاقلك..
,,رهف فهمت غرض مشاري.. وتذكرت كلمته أمس لما زاعق عليها وقالها (كله منك)... وقالت بنفسها:
إيه لما يبي شي .. يقول مشتاقلك .. ولما يطيح اللي براسه يهاوش ويزاعق لكن لأ يامشاري مو على كيفك زودتها..
رهف وهي تلبس خواتمها: لأ يامشاري أنا واعدة عمتي وما أقدر أخلف بوعدي..
مشاري : لا مو مشكلة إخلفي بوعدك هالمرة ودقي على أمي وقوليلها بقعد مع مشاري..
رهف: مرة ثانية انشالله..
مشاري:أنا مو قاعد أعزمك أنا قاعد ءأمرك رهف اعتذري من امي وقوليلها ماتقدرين..
رهف:مشاري.. شوف مو سالفة أني أعاندك بس أنا ما أبي..
,,مشاري عصب وقعد يناظر لرهف بكل حقد.. وقال بنفسه:
هين يارهف ماتبيني أوريك..
,,وقام مشاري وقرب من رهف وهي كانت جالسة عالكمدينة وبكل قوته شالها..
رهف بخوف وصدمة: مشاري وشبتسوي..
مشاري وهو يمشي: لا تخافين لاتخافين مانيبمسوي فيك شي..
اللي مايبيني ما أبيه..
,, ويكمل مشاري طريقه ويروح الحمام ويحط رهف بالبانيو...؟؟؟؟؟
رهف : مشـــــــــاري..
,,مشاري من غير مايرد عليها.. ثبتها بيده اليمين وبيده اليسار فتح دش الموية عليها...
,,رهف اشهقت شهقة قوية وانصدمت وفتحت فمها عالآخر..
وقف مشاري جنب البانيو وهو مكتف ايدينه ويضحك بصوت عالي ويطالع برهف وهي مصدومة..
رهف قعدت تتنفس بقوة بعد الفجعة اللي سارتلها... وبعدين بيدها رفعت شعرها اللي لزق من الموية على وجهها ورفعت راسها لفوق وطالعت لمشاري وقالت:
ليه سويت كذا؟؟
مشاري:عشان ثاني مرة تسمعين الكلام.. أنا لا قلتلك شي قولي طيب يا مشاري موتقعدين تعاندين..
يللاه الله لايهينك ارجعي البسي من أول وجديد وسشوري كشتك من جديد وانزلي لعمتك وخلي الجيران ينفعونك....
,, وطلع مشاري لغرفة النوم وهو متنرفز وأخذ جواله وبوكه ومفاتيحه وطلع ..
::
قعدت رهف في البانيو لمدة خمس دقايق وهي مو مستوعبة اللي سواه مشاري والموية تصب عليها..
استجمعت رهف قواها من جديد وسكرت الموية وطلعت من البانيو هي تقطر موية وترتجف..
غيرت ملابسها المبلولة ونشفت شعرها وجسمها ولبست لها بجامة ثقيلة وقعدت تمسح آثار الكحل اللي تحت عيونها.. ودموعها ما وقفت..
,,صوت الباب يدق..
رهف بصوت مرتجف: مين؟؟
أسماء:أنا أسماء..
رهف وهي تمسح دموعها: ادخلي حبيبتي..
أسماء وهي مستغربة: عمتي رهف مابعد لبستي.. ترى الجيران جوا وجدتي تسأل عنك..
رهف وهي دايخة:معليش أسماء قولي لعمتي إني تعبانة ولا أقدر أنزل..
أسماء:رهف وشفيك ترتجفين؟؟
رهف: بس بردانة شوي.. مشاري وينه؟؟
أسماء: بعد مانزل من عندك على طول طلع وراح لصديقه طارق..
تبين تروحين المستشفى يارهف شكلك تعبانة مرة..
رهف: لاحبيبتي... ابتلحف الحين وأبدفى بس تكفين اعتذريلي من عمتي..
أسماء:لاتخافين رهف جدتي لادرت إنك تعبانة.. مارح تشره عليك أبد..
تبين اجيبلك شي دافي؟؟
رهف: لاحبيبتي تسلمين..
,, وتطلع أسماء وتخلي رهف عايشة بحالة دوامة..
***
****
*****
(في مستشفى دلة...)
كانوا مشاري وعزام قاعدين بسيب الإنتظار وطارق راح عند خواته عشان يتطمن عليهم..
عزام: مشاري تتوقع أم طارق تقوم بالسلامة؟؟
مشاري: انشالله وبعدين جلطة المخ صحيح إنها تسدح بس ماتذبح إذا كانت من أول مرة..
عزام:الله يخليها لهم ويقومها بالسلامة..لو يسير لها شي طارق بينهبل ماله إلا الله ثم هي .. وبعدين إخت طارق الكبيرة اللي معاقة يقول طارق إنها من يوم ماتنومت أمه وهي تصيح وتصرخ وتبكي وفاقدتها وخواته الصغار بس يصيحون ونفسياتهم تعبانة..
مشاري : لاحول ولاقوة إلا بالله.. الله يشفيها ويخليها لهم..
,,سند راسه مشاري وتذكر فجأة شكل رهف وهي تحت الموية ومكياجها كله سايح وشعرها غرقان..
دنق راسه وجلس يضحك..
عزام: مشاري بسم الله عليك شيضحكك..؟؟
مشاري:لا ولاشي ..
,,جوال عزام يدق..
عزام من غير نفس: هلا..
وإذا... لاماظنيت...
لاماقدر...مشغول... قلت مشغول..
الحين من قال هالحكي.. لاأتهرب ولاهم يحزنون..
أنا هالأيام ماني بفاظي أحك راسي..
[ويتنهد].... خلاص..خلاص..
يسير خير..
,, قفل عزام الخط ومشاري يناظرله وهو وده يمحطه بالعقال لين يقول آمين..
عزام: مشاري.. ممكن ماتعلق..
مشاري:لا والله الود ودي أعلقك برجولك الين تبطل تنزل مستواك لهالتافهات..
عزام: مساكين ياشيخ..
مشاري:والله انت اللي مسكين.. هذولي عقارب يستغلونك ويستفيدون منك وتتزوج الوحدة وتسحب عليك وانت كنه العيد عندك..
عزام:عادي أنا راضي..
مشاري:عزام تصدق أنا ودي أسوي شي واحد بس آخذ مخك واركبه براسي عشان أعرف اشلون تفكر..
عزام: لا لا تاخذه ... بس إنت تعال عندي يوم من الأيام وهم موجودات وبتعرف اشلون أفكر..
مشاري: الله لايقوله..
***
****
*****
(في بيت أم عبدالرحمن..)
,,,,الساعة 10,30الليل..
,,دخل مشاري البيت ولقى أهله توهم قايمين من على العشاء..
أسماء: يوه ميشو ليتك بكرت شوي تونا قايمين من عالعشاء..
مشاري:لااا..... مومشكلة قولي لرهف تجهزه وتجيبه الديوانية..
أسماء: لاعمي رهف مرة تعبانة.. بقول للشغالة تجهزلك عشاك..
مشاري وهو موباين عليه الاهتمام أبدآ: وشفيها؟؟
أسماء: شكلها مسخنة ..
,,كمل مشاري طريقه للديوانية لكنه بسرعة تذكر ورجع من طريقه وقال:
هي نزلت لما جوا عندكم الجيران..
أسماء:لأ..ارسلتني جدتي لها يوم تأخرت عشان أناديها لكني لما طلعتلها كانت تعبانة واعتذرت..
,,مشاري ضحك وقال:
خلاص خلي الشغالة تجيب عشاي الديوانية..
:::
راح مشاري للديوانية وهو مبسوط ومتشقق إنه كسر خشم رهف ومشاها على كيفه..
وبعدين تعشى لما جاه عشاه..
وقرر يطلع غرفته عشان يكمل شماته في رهف..
::::
::::
كانت رهف قاعدة عالسرير ومعطيه ظهرها الباب وفاتحة أبجورة وحدة بس وسرحانة بالأرض ودموعها على خدها وشايلة من بالها تمامآ إنه مشاري رح يجي بدري ومتوقعه إنه كالعادة مارح يجي إلابعد الفجر...
رهف تفكر وهي شايلة هموم الدنيا على راسها..
"يعني إيش أنا بقعد طول عمري عايشة بهالخوف.. مارح أحس بالأمان ...
عاندته مره ضربني إلين أغمى علي..
وعاندته مره ثانية حطني بالبانيو وفتح الدش علي..
المرة الثالثة شبيسوي؟؟
أنا ليه مكتوب لي أعيش بخوف طول عمري..
ليه مشاري مو راضي يتقبلني.. ليه؟؟
ليه دايمآ يعاملني كحشرة؟؟
ليه يهيني ويعاملني أسوأ معامله؟؟
دامه مايبيني ويكرهني ليش تزوجني...ليه؟؟
أنا وين أروح.. بس أبي أعرف وين اروح؟؟
أبوي ماتقبلني وأنا بنت بيتقبلني وأنا مطلقة..
لا حول ولا قوة إلا بالله.. لاااااحول ولاقوة إلا بالله..
,, حطت رهف راسها بين إيدينها واستمرت تبكي وتبكي..
.. وفجأة...
مشاري:ذكرتيني بأسيل لما أمها كانت تمنعها ماتروح تلعب مع عيال الجيران كانت تبكي وتجلس مثل جلستك هذي..
,,رهف شهقت وتفاجأت لما فجأة مشاري تكلم من وراها لأنها ماحست فيه وهو يدخل الغرفة وبمنديلها اللي بيدها قعدت تمسح دموعها..
مشاري:كل هذا زعل عشانك ماقعدتي مع الجيران.. ولايهمك بكرة باخذك وافرفر فيك على بيوت هالجارات وحدة وحدة..
,,رهف على نفس وضعيتها ما التفتت عليه واستمرت تمسح دموعها وقالت..
مشاري أسألك بالله إنت ليه تزوجتني؟؟
,,مشاري وقف بعد ماكان يمشي ومتجه لغرفة التبديل عشان يبدل وقال وهوعاقد حواجبه:
إيــــــــش.. شقلتي..
رهف وهي على نفس وضعيتها:
مشاري إنت ليه تزوجتني ليـــــــــه..
مشاري بعصبية: الظاهر إنك ماتتأدبين يارهف..
ليه عسى ماشر ماني من مستواك ياصاحبة السمو.. ولاكنتي تطمحين بواحد أغنى وأوسم..
لااا عرفت إنتي وشتبين الظاهر إني كبير عليك وانتي تدورينلك واحد خامس ابتدائي تاخذينه..
رهف تلتفت لمشاري ووجهها كله دموع وتقول:
أنا مابي لا فلوس ولا وسامة ولاواحد أصغر مني ولا أكبر.. كل هالتوافه ماتهممني..
مشاري أسألك بالله في واحد يعامل زوجته بهالطريقة..
هاللي سويته يامشاري لي صحيح ضحكك وخلاك مستانس لكن هذا إهانة لي..
إهااااااانة..
مشاري وهو يعطيها ظهره ويغير ملابسه:
ماحد قالك تعاندين... مرة ثانية اسمعي الكلام..
رهف: مشاري المتزوجين يسير بينهم عناد واختلاف بوجهات النظر.. موشرط كل واحد يعند واللي براسه يمشي..
أنا مرة أمتثـل لرغبتك وأتنازل عن شي أبيه.. ومرة إنت تتنازل..
كذا الحياة الزوجية..
مشاري: اللـــــه ياحليلك سايرة تقولين حكم..
رهف: أنا ما أتفلسف عليك....
[وتشاهق رهف] أنا خاااايفة خااايفة منك..
,,وترجع رهف تجلس وتعطي مشاري ظهرها وتبكي..
,,,بعد ثواني بسيطة...
,,ماحست رهف ولا بيد مشاري وهي على كتفها وهو جالس قريب منها..
مشاري وهو متردد:خلاص رهف لاتبكين أنا غرقتك بالموية لأني ما أبيك تروحين وتخليني.. مادري اشلون سويت كذا..
مادري.. أحس إني انقهرت لما قلتي كلمة (مابي) انقهرت لأني أنا أبيك وانتي ماتبيني..
,,سكتت رهف ورجعت تمسح دموعها بمنديلها..
,,تضايق مشاري من نفسه وحس إنه تصرفه غبي وطفولي ..
ومهما صار هاللي بين إيدينه إنسانه.. مايجوز أبدآ إنه يعاملها بهالطريقة..
تنهد مشاري وقام من جنب رهف وراح من الجهة اللي ينام فيها وفتح اللحاف وقال:
تصبحين على خير..
حط مشاري راسه على مخدته وهو يحس بتأنيب ضمير وقرر إنه ماعد يمد يده على رهف أو يعاملها معاملة سيئة..وحتى لوكان مايبيها يايمسكها بمعروف يا يسرحها بإحسان..
,, هدت رهف شوي بعد ما تأسف مشاري.. صحيح ما تأسف الأسف اللي يعبر عن ندمه لكنه أهم شي عبر هالدموع اللي نزلتهم رهف..
قامت رهف وراحت الحمام وغسلت وجهها وسكرت النور ودخلت تحت اللحاف ومدت يدها ومسكت يد مشاري وقالت:
تصبح على خير..
,,تنهد مشاري وحس بطيبة رهف لأنها على طول رضت وشد على يدها بأصابعه وقال:
وانتي من اهله..