قمر حالد

06-27-2010, 06:10 PM

انا : قمرهم كلهم

اضفني كصديق

بو ناصر اللي قال لبو خليفة كل شي فرح .. لان بو خليفه ما رفض بالعكس.. قربهم اكثر وكثر.. وعلىحسب كلام نورة بنته امس له ان البنت بعد موافقة .. بس الشكليات لازمة.. تنسل البنت ويتقدمون لها رسمي لابراهيم وسعد . وعيال عمومتها.. واخوانها..

وعلى صلاه العصر وصل طلال البيت ويا ناصر اللي ما رضى انه يخليه يقعد في المزرعة لحاله وحلف عليه انه يروح البيت وياه مع ان طلال ماكان طايق يروح البيت..

ناصر ما قال له ان البيت كلهم وياه حسباله انه بروحه جاي له.. واهو مو طايق البيت لان هناك هزأ شيخة الحريم.. اااه يا شيخه... ما هقيت انج تصيرين في قلبي مثل العوق.. لا انتي يمي .. ويم انااقرب منج.. تبعديني.. شكلها ما تحبني.. بس كان اعجاب ووهم في مخي انها تحبني..

يوم وصلو البيت.. شاف طلال خالته واستغرب

طلال: هلا والله خالتي.. ما قال لي ناصر انكم هني..

ام ناصر: شدراني فيه يمكن مستحي ولا مو عاجبته جيتنا وياه

ناصر: انا يمه افا عليييج بس كنت حاب اخليها مفاجاة.. انا اعرف طلال شكثر يحبنا ويحب شوفتنا

طلال لكزه... اشكره نغزة وفهمتها ام خليفة..

ام خليفه: هههههههههههههههههه اصلا طلال من روحتو ياناصر واهو مخلنا وهاجرنا .. رايح للمزرعه يطفي نار جويته في برد ليلها..

ناصر: ههههههههههههههههههههههههه هههههههه اثريه يحترق ابن الخالة

طلال: يعني تتغشمرون.. خلاص انا راجع المزرعة..
هيلة المكان واهم يقعدونه ويتحايلون عليه يقعد.. اخيرا قعد طلال.. اللي كان مبين عليه انه حالته حاله.. شعره طويل ولحيته واصله لركبته ( صوري مو حقيقي) وكانة روميو زمانه ولا احد حب غيره..

صج ان طلال انسان عاطفي وحساس لدليل ان هيئته تبين على شكله واهم شي.. على حالته الشخصية

ام خليفة: ما سمعت؟؟

طلال: عن شنو؟

ام خلية: ناصر خطب اختك نوفة..

طلال واهو يلتفت لناصر: لا لا ..

ناصر: اي اليوم خطبتها ( واهو شاق الحلج)

طلال: وياي لي وانت طام هالثم ليش ان شالله مو ارفيجك ولا ولد خالتك.. والا العروس ما تقرب لي طبعا؟؟

ناصر: لا مو جذي بس انا ما اهتميت اني القنك اخباري اكثر من حالتك هذي اللي كاسر خاطري بها..

طلال: انا مافيني شي بس اهناك في المزرعة ما عندك وقت انك تتزقرت ولا انك تتعدل.. هناك اصحى على الفروس وانا في الاسطبلات ساعات..

ناصر: الله يعينك على بلواك..

طلال يلتقت لامه: وشنورديتو؟؟ اكيد يعني رفضتوا

ام ناصر: وليش ترفضون

طلال: بعد.. ما نبي المصابيح.. قاصرين مصابيح احنه.. لا ما نبي مصابيح ترى الكهربا بيصير على ضغط وينقطع التيار.. مافينا على الحر

ا ناصر: ويييييييييييه عاد. . وشلكم بالكهربا الشتا جاي والبروده ما تخلي احد يشره على الكهربا..

طلال يبتسم: الا هذا اكبر فخر لنا يا خالتي.. والله انا تمنيت هالشي يصير.. بس.. الحمد لله يوم انه صار ويا ناصر..

ام ناصر لطلال: ومن يدري يمكن بعد يصير لك انت..

طلال: شلون؟؟

ام ناصر سيده: بنت سلفي.. اسمها اعتدال.. واحلى منها ماكوو.. شفتيها انتي يا خويتي.. يوم كانت صغيرة شيطانه وحبوبه والحين صارت ملكة جمال..

طلال كان يحسب ان خالته تعني حبيبه قلبه شيخه.. لكن حتى خالته ما تفكر انها تقرب وحد من بناتها له.. صج انه مقروووود..

ام خليفة: واحنه عاد وشلنا بالغرب.. يا خويتي مالنا الا الدم وما يحن العرج الا للدم..

طلال: يالله اخليكم الحين..

ناصر: لا تنسى تنزل بعدين ومرة وحده اتصل في عيال عمك عشان ايووون بنخطب رسمي..

طلال: امتى؟

ناصر: بعد صلاه المغرب..

طلال: الحين بتصل في خليل اقول له.. واقول لعمي جاسم..

ام ناصر: اليوم تخطبون رسمي؟؟ وعمامكم.. ما يدرون بشي..

ناصر: ابوي بيخبرهم واليوم بييوونا.. من زودهم عاد الحين ماكو الا عمي ضاري وعمي سعود..

ام ناصر: بعد هذا الواجب.. ولازم عمامك كلهم ايحضرون عشان يوم اللي اعيالهم يخطبون ماينسون ابوك..

ناصر: اهااا.. جذي يعني.. يعزمون ابوي لو يعزمونج انتي بعد..

ام ناصر: نصووور.. ايا الشقردي.. الحين انا جذي..

ناصر: مادري انتي قوليلي..

ام خليفة: ههههههههههههههههههههههههه يحليلك والله يا ولد اختي .. صدت اختي في عوقها..

ناصر: اعجبج خالتي.. كفج بس كفج..

******************

اول ما صعد طلال الطابق الفوقي حس لحشرة احد هناك.. يمكن نوفو بروح اشوفها اطفر بعمرها شوي..
كانت الشرفة مفتوحة وهوى بارد ينسم منها.. كان الشتي قريب.. والجو يبرد في المسى.. كانت البنت قاعدة وما عطته ظهرها.. طلال عرفها من هي.. ووقف مكانها..

يمكن تحس بوجوده في المكان .. ولكن شيخة ما حست بوجود طلال.. كانت قاعده واهي تطالع في الصور اللي على الطاولة اللي عند الزاوية.. كانت صورة طلال وقمر واهم عيال في سن المراهقه.. كانت الصورة اسرة نظرا لوجود طلال فيها واهو يضحك بمل ثمه..

وقمر بعد كانت صغيرة ولكن شكلها كان جنان .. قمر وطلال تقريبا من اوسم اعيال بو خليفة.. واحلاهم.. في الضحك..

شيخة كانت تبتسم والدمعة طافرة بعينها.. وما اوتعت لطلال اللي ياها وقعد جدامها يتامل ملامحها.. وانتبهت له ولكن من غير صدمة او شي ثاني.. وابتسمت له..

طلال: كان من الممكن انج تملكين كل هذا.. لكن انتي.. ما تبين..

غضنت حواجبها شيخة من كلام طلال . انا اسف .. على اخر مرة .. تناجرت معاج من غير سبب وانتي ما تستاهلين.. بس انا ما كنت قادر اتقبل فكرة .. فكرة انج ما تبيني..

وحاولت اني احط الحرة فيج بس.. هذا نصيبنا من الله
شيخة كانت قاعدة تسمعه واهي مو مصدقه.. كان يفكر بطريقه غريبة عليها.. يظن انها ما تبيه.. صج انه غبي

طلال: انا اسف.. وان شاء الله اكون عند حسن ظنج.. وآنا مو خسران.. انتي ان ما كنتي زوجتي بتظلين قريبتي.. بنت خالتي العزيزة والنعم فيها..

وراح طلال عنها..

وقفت له: طلال..

طلال تنهد يوم سمع اسمه في لسانها: .. لبيه

التفت لها وكانت واقفة مكانها بهدوء.. على عكس اللي قالته .. لا

شيخه ياست : اهاا....

وراحت عنه توها بتدخل الغرفه اللي بطريق طلال ويمسك ذراعها

تصدقون انها تمنت انه يمسك ذراعها وياخذها عنده ولا يرده الا بعد ما تموت..

طلال: .. شوفي.. انا بعود وبطلبج من خالتي.. وان رفضتي يا شيخو...( التفت لها ولفها) والله يا شيخو ان رفضتي.. لا ذبحج بهاليد.. بذبحج واذبح روحي وراج..

شيخه ببسمه عذبه: خلصت؟

طلال بصمود واهو يفك يدها￹fprivate "type=pict;alt=" . اي.. خلصت..

شيخه تقرب راسها منه واهي تهمس: .. احبك..

وشردت عنه لغرفة نوفه وطلال واقف مكانه.. لا اراديا ابتسم ابتسامة شقت حلجه كله وعصر روحه ونقز من

مكانه : هيااااااااااااااااااااااا اااااااااااااااااااااا

الا ونوفه تطلع من الغرفة واهي مرتبكة: طلال.. الحق علي..

طلال يلتفت لها والابتسامة للحين على شفاته بس الخوف اللي على وجه نوفة اربكه: علامج نويف..

نوفه: طلال خالد في المستشفى خذوه بالاسعاف من شقته وقمرهناك.. يقولون حالته الصحية متضعضعه ..

طلال: لالا.. ووين قمر؟

نوفه: مريم اللي اتصلت لي.. قمرمعاه بالمستشفى ويا عمي جاسم وعمي ابراهيم .

طلال: انزين انا رايح الحين. .بس لا تخبرين امي ولا شي.. خليني اشوف الوضع كله .. سمعيني نويف.. لاتقولين لامي .. سامعة

نوفه واهي خايفة: ان شاء الله.. ان شاء الله ..

راح طلال يبدل هدومه على السريع لبس بانطلون وقميص وراح يشوف ولد عمه.. حاول انه يطلع من غير ما تحس امه بطلعته ..

نزل تحت واشوى انها كانت مختفية.. يمكن رايحة المطبخ ولا شي

وقبل لا يطلع ناداه ناصر: طلال وين رايح؟

طلال: تعال معاي .. ولا كلمة ..

ناصر سكت وليما طلعو راحو عند سيارة ناصر

ناصر واهو يشغل السيارة: علامك طلال.. شصاير؟

طلال: خالد ولد عمي في المستشفى خذوه بالاسعاف .. حالته الصحية متازمة شوي..

ناصر: اعوذ بالله.. وشخباره الحين

طلال واهو يلبس النظارة: مادري.. الحين خلنا نروح نشوفه

ناصر: مافيه الا العافية

طلال: اللله يسمع منك

***************************

>>>>>>يتبـــــــــــــــــــ ــع<<<<<<<<

قمر قاعدة عند باب الغرفة ويا جاسم واهي ساكتة.. خليل اللي راح للحين ما رجع.. كان قاعد في البيت ويا امه ومريم .. وبعد شوي بيرجع المستشفى..

خالد حالته للحين متازمة.. وبو خليل ماقدر يقعد اكثر

بو خليل: جاسم روح لهم شوفهم يمكن يخلونا ندخل عليه

جاسم: ماظن ياخوي.. للحين اهو حالته متازمة وما ظن يخلونا ندخل عليه

قمر كانت ساكته وتطالع الفراغ

بو خليل :ان كان مو عشاني عشان هالمسكينة روح واسالهم..

جاسم: ان شاء الله.. بروح

وراح جاسم .. بو خليل ظل واقف يطالعه واهو رايح ويوم غاب جاسم التفت لقمر اللي كانت قاعدة وشكلها يكسر القلب. معقوله .. قمر البشوشه دايما الابتساااام.. يصير معاها جذي.. ياويلي لو اني ظلمتج يا قمر.. يا ويلي لو اني ظلمتج.. وعذبتج بهالزواج.. وانا اللي كنت اظن اني صاج به..

قعد يمها ومسك يدها.. قمر كانت سرحانه ودليل السرحان اهي النفضه اللي سرت فيها يوم لمستها يد عمها الدافية الحنون.. التفتت له وابتسمت ..

وبو خليل ما تغيرت ملامحه.. كان في عيونه بريق.. ما قط شافته بعيونه .. وكانها دمعة مغصوبه مذلوله.. ما يطيع ينزلها..

بو خليل: .. يا بوج... انا مادري.. وبسالج.. يمكن اطلع غلطان

قمر استعجبت: شنو عمي.. امرني ..

بو خليل: .. انا ظلمتج.. بهالزواج يا قمر؟

قمر هاجت مشاعرها... سؤااااال عمها جاها متاخر.. توه يسال.. ان كان ظالمها بهالزواج ولا لاء..

ما سالها يوم كانت تجر الدمعة في عيونها بزفه العرس..

ما سالها قبل لا تسافر وتتجدد حياتها ويا خالد..

ما سالها يوم جاهم بيتهم بهذاك اليوم طالب يدها .. وما عطوها فرصة ترفض ولا توافق..
لسبب ما.. انقهرت قمر من عمها.. لان مثل ما يقولون.. يمشي الكل على هواه..

بو خليل : قمر.. انا سالتج سؤال.. جاوبيني يابوج.. حاير في امري

قمر: يبا... ماعليك من هالكلام.. انت لاظلمتني ولا ظلمت احد.. هذا شي مقدر.. مقدر ومكتوب.. والواحد لو يجري جري الوحوش.. غير نصيبه ما يحوش..

بو خليل ما تطمن من جواب قمر.. لانه كان مبطن.. حس انه ضايع اكثر.. ولسبب عجيب تاكد هالشك عنده..

بو خليل: .. انا ما غلطت.. لكن .. انا خطيت باختياري..

قمر: شلون؟؟

بو خليل : انتي ما تستاهلين خالد.. ولا خالد يستاهلج..

خالد .. طول عمره كان متمرد.. طول عمره كان.. متفرد بتصرفاته.. الظاهر اني ماعرفت ااربيه

تجمدت يد قمر اللي كانت مخفية في يد عمها.. كان الغضب فيها يتاجج من هالكلام

بو خليل: .. انتي ما ينفعج واحد .. واحد متحرر مثل خالد.. انتي كان لازم ياخذج واحد.. يحترم اهله.. ومربى على يد رياجيل..

قمر تصلب الحين جسمها كله.. وتمت تتمنى من ربها انها ما تطلع من طورها..

بو خليل ..

شنو؟؟؟؟؟؟؟؟؟؟؟؟؟؟؟؟؟

بو خليل انصدم لها.. علامج يبا

قمر.. : عيد الكلام اللي قلته؟؟

بو خليل: .... علامج

قمر: ابيك تعيد الكلام يبا.. عشان اسمعك عدل.. ما سمعت..

بوخليل لا تتدخل في مصيرنا انا وخالد.. انت زوجتنا.. ولا ترجع وتقول .. ان خالد محد رباه.. ترى انت اللي ربيته وانت اللي تحكمت في مصيره..

بو خليل ظل ساكت وصاخ مكانه.. مو مصدق اللي يسمعه.. وينقال له.. قمر اللي تتكلم.. وكان خالد اللي يتكلم له.. صج انه قدر يستفحل فيها ويعلمها من اسلوبه

قمر: انه ارجوك.. بس.. كل هذا اللي ابيه منك..

ما تكلم بو خليل.. ماقدر ينطق بولا كلمة .. وقمر توها بتقعد الا وجاسم وراها

قمر: شصار..

جاسم: الدكتور سمح لواحد بس يدخل عليه.. دخلي انتي..

شاف هدوء غريب في المكان وقمر كانت واقفه..

جاسم: شصاير

بو خليل: ما صاير شي.. بس .. انا بروح البيت.. وانتو خبروني باللي يصير..

ما خلى احد يقدر يتكلم ..

وراح عنهم كلهم..

قمر واقفة تطالع روحه عمها بخوف.. متلومه من موقفها معاه. .ياربي.. شصار.. شسوييت.. لكن.. ماله حق.. ماله حق..

جاسم: قمر علامج.. شصار ويا اخوي؟؟

قمر واهي تخفي الخوف من على ويهها.. : ما صار شي.. متى اقدر ادخل على خالد؟

جاسم: الحين.. نادي على الممرضة واهي تلبسج اللي لازم تلبسينة..

قمر دخلت للممرضة.. ولبستها غطى على الثم والخشم.. ونوع من الردى..

الممرضة: المريض في حالة صعبة.. اطلب منج انج ما تكلمينه ولا تخلينه يتكلم.. يحتاج لاقصى الراحه الممكنة..
قمر هزت راسها موافقة على كلام النرس.. ودخلت اكثر لعند خالد..

واول ما وصلت لعنده هلت دموووعها.. كان شكله تعبان.. وحواجبه متغضنة.. يبين عليه انه في الم..

قعدت قمر يمه.. مسحت على جبينه بيدها .. مسكت يده اللي كان فيها نوع الجهاز اللي يوصل نبضات القلب للجهاز ويخليها في مراقبة مستمرة.. وكان ثمه مغطى بقناع الاوكسيجين..

مسكت قمر يده وحطتها على خدها تحس ببرودتها اللي تصقع قلب اي احد.. وتمت ماسكه يده تمسح عليها تحاول انها تبردها بقوتها... وتمت تتكلم معاه بقلبها .. وتناجيه..

خالد لا تتركني.. احبك.. وابيك معاي طول عمري.. لا تروح عني .. ولا خطوة..ماقدر على بعادك.. ماقدر..

حبيبي.. ارجع لي.. انا مالي احد غيرك.. ارجع وعذبني مثل ما كانت تعذبني.. عذبني وخلني ارثي حالي .. واكرهك ونفس الوقت اعرف اني اموت فيك.. احبك خالد احبك..

خالد كان مسكر عيونه لكن عارف ان قمر معاه.. لان اول ما دخلت قمر تكلمت مع الدكتورة وخالد اللي كان مسكر عيونه سمع صوتها واهي تتكلم بشكل خفيف.. بس ما فتح عيونه لانه دايخ ..

ويوم قعدت قمر مسحت على جبينه حس لدفى يدينها اللي انحرم منه في الفترة الاخيرة.. احبها.. احبها يا ناس..
قمر تمت تبوس يده واهي تمسح عليها.. رفعت نفسها عشان تطالع وجهه..

وراحت لعنده اتامل في ملامحه واهي في قلبها تصميم ان خالد لازم يرجع للحياه.. انا ماكان لاحد.. فيكون لها.. بكت قمر .. بكت قمر على نصيبها ومجرى حياتها..

وسالت دمعاتها على خدودها وطفر منها على يد خالد.. اهو كان تعبان ومسترخي ما يقدر يحرك اي شي في جسمه.. لكن من وين جاب الطاقه انه يضغط على يدها .. ما يدري..

يوم ضغط خالد على يد قمر مسحت دموعها.. واتفاجات.. خالد صاحي.. صاحي معاي.. راحت عند راسها وشافته يفتح عيونه.. وتمت تناظره وتناظره واهو يفتح عيونه..

قمر: حمد لله على سلامتك حبيبي..

شال كمامه الاكسجين يبي يتكلم لكن قمر ما خلته

وحطت صبعها على حلجه واهي تهز راسها نفي..

قمر: لا. لا تتكلم.. الكلام يتعبك..

خالد سمع كلامها.. وتموا يناظرن بعض.. وشوي شوي

تزيد ضغط يد خالد على اصابع قمر.. خالد رسم ابتسامة ولا اروع على ويهه خلت ويه قمر يشرق منها.. باسته على خشمه.. ولمت بكل قوتها.. وبكل حبها له.. وعرفت من ذيج اللحظه.. ان الحب يتجدد.. في ابسط اللحظات.. يمكن تكون غير ملاحظه.. اوانها تكون غير مفهومه.. لكن.. تتصير..

ومرت الالام.. وانكمشت غيوم الاحزان اللي ابعدت نور الشمس انه يلامس الارض ويطهر الشرور كلها..

مرت سحايب الاحزان المحملة بالدموع المالحة الحارقة.. واشرقت.. شمس الامل.. تنشر الفرح والرونق والعبير.. تفتح الورود وتنعشها.. تبعد الكوابيس وتنشر صباح جميل.. وتفتح باب الافراح على كل الناس

ومن اول هالافراح.. زواج مريم وسعود..

كان ولا احلى.. زواج من سالف الزمان.. حتى ان مريم ما صدقت ان الزواج اللي اهي كانت تمشي فيه بجناح السرعة.. صار مثل هالزواج الجميل..

كانت الحفلة في حديقة بيتهم..والاناقة كانت عنوان يحمله الزواج.. واللون الابيض الكلاسيكي كان اهو اللي ملك الجو.. حتى ان مريم وصلت فيها انها خبرت الكل انه لازم يلبس اللون الابيض من البنات..

كان فراقها صعب.. فراق اهلها وفراق احبابها .. وفراق بيتها صعب عليها .. لكن تحملت.. تحملت وتجرعت الالم بفرحة انها راح تكون بين عائلة يديده..

عائلة حبيبها وزوجها الغالي.. اللي عمرها ما تخيلت انها تلقى مثله.. لان سعود .. شالها فوق راسه وتحمل فيها اكبر تحمل .. والا من اللي بيتحمل معافى 7 شهووور من بدايه الخطوبه غيره.. فديته سعود.. يحبني.. وعلمني شلون احبه.. وشلون اعشقه..

التميز خلال 24 ساعة
العضو الأكثر نشاطاً هذا اليوم	الموضوع النشط هذا اليوم	المشرف المميزلهذا اليوم	المشرفة المميزه
قريبا	بقلم :	قريبا	قريبا

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
قصة ثلاث بنات وثلاث شباب في خيمه في الصحراء	صدى الالم	ڪآن يآمآ ڪآن	3	10-01-2011 07:36 PM
{ احسب الدنيــآ مثل آمي ,, ازعلــهآ و ترآضيني } ...	قمرهم كلهم	للروايات المكتمله	33	03-11-2011 10:51 AM
ماكان الفراق اختياري	قمرهم كلهم	للروايات المكتمله	22	06-23-2010 02:53 AM
حامد زيد لحقو يصلح توبك ماسنجر	لا يغرك زمانك	الشعر والخواطر والقصائد	8	06-01-2009 12:36 AM
قصص خطف أشبه بالخيال	لا يغرك زمانك	ڪآن يآمآ ڪآن	2	03-24-2009 04:52 PM

الذين يشاهدون محتوى الموضوع الآن : 2 ( الأعضاء 0 والزوار 2)

قمر حالد

للروايات المكتمله