وشلون جبت هالمعلومه هذي ؟ هم قالوآ لي

03-20-2010, 05:40 AM

انا : مرومه

اضفني كصديق

من اللي قالكـ هالشي ؟

- هاهـ , هم قالوا لي ..

طيب , وشلون جبت هالمعلومه هذي ؟

- وشلون ؟ ايه مدري بس يعني هم قالوا لي ..

على اي اساس استندت ؟

- على هذاكـ .. ياخي هم قالوا لي ..

ياكثر مانسمع هالجمله .. او مثيلاتها ..

كم معلومه مغلوطه يتداولها الناس على انها معلومات صحيحه ؟

كثير .. كثير
..

خلونا نستعرض على السريع بعض من هالمعلومات المغلوطه ../

..

( مشينا نهظّم ؟ ) ..

امر شائع عن اغلب الناس ..

بعد مايضرب لكـ وجبه دسمه .. يآخذ له واحد من ربعه ..

ويمترون المكان اللي هم فيه .. ويعدون الكيلوات ..

طيب ليش ؟ يقولكـ ( والله ودنا نهظّم الأكل اللي تو أكلنا ) ..

غلط !

الحركه هذي بتقلل تدفق الدم للجهاز الهظمي .. وبالتالي تقل عملية او سرعة الهظم عن الوضع الطبيعي ..

فينصح بعد أكل وجبه دسمه .. انكـ تمدد رجيلاتكـ وتروق .. وتخلي الباقي على الجهاز الهظمي .. هو يعرف شغله ..

حتى ان العلماء يقولون ان ( الأسد ) بعد مايجرش احد الفرائس يتكّي تحت شجرهـ ويمدد .. ما شافوهـ يمتر المكان ومن كيلو لـ كيلو ..

حلاو بقر .. للأبد ..

( لا تآكل حلو وآجد , يجيكـ السكّر )

فيه اعتقاد خاطئ .. بأن أكل السكريات هو اللي يجيب مرض السكر ..!

يعني لو أكلت سكر كثير تراكـ بتمرض بـ مرض السكر ..

وهو السبب الرئيسي ..

برضو غلط .. :/

مرض السكر سببه هو تلف في خلايا ( بيتا في البنكرياس ) ..

او عدم فعالية الأنسولين المفرز داخل جسم الإنسان ..

ولحدوث هالشي اسباب متعددهـ .. ولكـ ان تتخيل ان اكل السكريات ماينطوي تحت هالأسباب !

( إلهم بس إلهم , اذا مانفعكـ ماضركـ ! )

وش اللي اذا مانفعني ماضرني .. ليش يعني وش السر في ( الاعشاب الطبيّه ) ..

الواحد يآكلها اذا تعب .. اما انها تنفعه او مستحيل تضرهـ ..!

المشكله ان هالشي متداول حتى في ( الصيدليات ) ..

الصيدلي المفروض عارف ودارس ..

يبربر عليكـ المصري : العلاق دا متكون من اعشاب طبيعيه .. موش حتزُركـ .. ماتخفش !

وكل هالبربرهـ علشان بس يبيع السلعه ويلهف من وراكـ دراهم .. ولو تموت .. ماعليه منكـ ..

ياجماعه .. بعض الأعشاب (( ســـــام )) .. !

وبعضها يسبب حساسيّه لناس معينه ..

الاعشاب " تحوي على مواد كيميائيه " .. مثلها مثل بقيّة الأدويه , بس انها طبيعيه .. وماتم تحضيرها في المصنع !

( قلبكـ .. في الشق الأيسر ) ..

من قال انه في الجهه اليسرى تماماً للإنسان ؟

القلب موجود ( بين الرئتين ) بالضبط .. لكنه يميل بشي بسيط للجههة اليسرى ..

( طف المكيف الحار .. تبي تمرضني انت !؟ )

في (جونا الحالي) .. وضروسكـ تتصافق من قوة البرد ..

راكب سيارتكـ ومشغل المكيف على الحار .. تبي الدفاء ..

بعد ماتحس ان جسمكـ نشب في المرتبه من الحرارهـ .. وتفق كشركـ مستانس .. لأن وجهكـ بدأ يرجع طبيعي ويتحركـ ..

يركب معكـ واحد .. تبي توصله لـ مشوار .. اول مايركب يزأر بوجهكـ .. ياخي طف المكيف !

انا ابنزل بعد شوي لمكان بارد .. تبي تمرضني ..

من اللي قالكـ ؟

نظرياً .. كلامه غير صحيح ..! بس انه خايف على نفسه زيادهـ (بعذرهـ من هالبرد اللي يشق الوجه ) ..

يعني اذا كان الأمر (متتابع) ممكن .. كلامه صحيح ..

لكن اذا انت راعي طويله .. وبتجلس في الجو هذا وقت .. وفي الجو الثاني وقت .. لا , نظريتكـ غلط !

- في الصيف تلقاكـ مشغل المكيف على البارد في اقصى سرعته .. تسمع صوت المكيف اقوى من صوت المكينه ..

وتنزل للهواء الحار ..! طيب تعال انت ياللي ركبت قبل شوي .. ليش هنا ماسكرت المكيف ؟

موب برضو فيه إنتقال من درجة حرارهـ لـ درجة اخرى ؟

طيب ليش ماجاكـ شي ؟

علمياً .. ونظرياً .. هذا مجرد خوف لا أكثر .. وافتراضات مالها صحه ..

لكن .. هم ينصحون ( بتدفئة الجو العام ) , يعني المكان يكون دافئ ( السيارهـ , او الغرفه ) افضل من انه يكون بارد او متعدل على حرارة الجو الطبيعيه .. الدفاء مامنه ضرر ابد .. لكن البرودهـ تأثر على الشعب الهوائيه والجهاز التنفسي ككل .. وتسبب الحمى ..

فيقولون .. لازم تدفئ المكان المحيط بكـ .. او إنكـ تلبس خلاقين وخاصه الصغار ..

علشان يكون محيط جسمكـ .. دافئ لـ درجة حرارهـ ثابته ..

- فالإنتقال من دفاء لـ برودهـ .. او العكس .. مامنه ضرر ..

( غسل يديكـ بالصابون , عقّمها من الجراثيم ) ..

هذا الكلام موب زين ..

الصابون ( يُنظف ) فقط ولا يُعقم الجراثيم (مايقتلها) ..

فـ محتاجين لـ معقمات للجراثيم ..

نستعملها على الأقل ثلاث مرات في اليوم ..

عموماً فيه الحين انواع معينه من الصابون ( تنظف و تُعقم ) ..

مثل ( ديتول , لايف بوي ) .. وخصوصاً في الاستحمام ..

فيه صابون استحمام ديتول .. ممتاز .. شي يعني صدق زين ..

يالله هه ياديتول .. دعايه بـ بلاش ..

( الأسد , ملكـ الغابه ) ..

لاعبين علينا ؟

المشكله حتى في المدارس يكررون هالكلام ..! الأسد ملكـ الغابه .. ملكـ الغابه ..

والله يا اني ضحكت لين تمزعت من القهر .. طول هالوقت لاعبين علينا !

الصدمه :

الأسد ماعمرهـ وطوط عند طريف الغابه !

ماعمرهـ طب شي اسمه غابه !!

الأسد يعيش في ( مناطق الحشائش , السهول ) .. مايسكن ابداً في الغابات الأستوائيه ..

الله لايوفق من كتب قصة الأسد هذاكـ المريض .. يوم يعالجه الثعلب ويصير صديقه ولا يآكله ..

طيب تدرون وش الصدمه الثانيه !

ان الاسد مايآكل الثعالب ! ههههههههههههههههههه

لاعبين علينا قسم بالله ..

( الأم تخاطب الأب وهو يشوّت القطوهـ في الحوش نآحر بها باب البيت : خلها , خلها يابوسليمان في البيت , تآكل الفيران ) ..

نصابه , والله انتس نصابه وملعوب عليتس ..

حتى كلنا ملعوب علينا في هالمناهج ..!

الصدمه الأخرى :

القط لا يأكل الفئران !

القط يلاحق الفار من باب التسليه واللعب بس ..

- سُجلت حالات أكل من قبل القطط للفئران .. لقوا القط اللي أكل الفار ميت من الجوع وبطنه وآصلن ظهرهـ ..

نفس الوضع .. الآدمي اذا اضطر وذبحه الجوع .. يآكل الجيفه ..

يصير الآدمي أكآل الجيف ؟

( الحشرات , مالها دم ) ..

برضو خرابيط ..

الحشرات مثلها مثل غيرها في مملكة الحيوان ..

لها دم .. لكنه يختلف لونه ولزوجته عن باقي الحيوانات ..

( إن كان حبيبكـ ثور , إلبس لوهـ أحمر )

الصدمه الـ 78 :

الثور , مثله مثل باقي الحيوانات .. يشوف اللون الأحمر رمادي ..

انتحر ؟

حتى الأسبانيين .. مسوين فيها يعني اننا نعرف للثيران .. !

يمسكـ له طربال أحمر .. ويمرمرهـ على خشة الثور ..

مسوي يعني انا جالس الحين اثير غريزته الحمراويه ..

نصابين بعينكم ..

والأنصب منكم اخو اللي كتب قصة الاسد في مناهجنا ,

لأن عندي احساس انه هو اللي كتب قصة الثور اللي مايبي اللون الأحمر ..

( افصل البطاريه عن اللاب اذا بتشتغل على الكهرب ) ..

ياكثر ما اسويها ..

وياكثر مايضيق صدري اذا نسيتها مركبه في اللاب توب وانا شابكـ السلكـ في الكهرب ..

كثير منا يسوي هالحركه .. ليش ؟ يقولكـ علشان يطول عمر البطاريه وماتخرب ..

فيه نوعين من البطاريات الشائعه ../

- بطاريه نيكل :

هذي لازم تشحنها أول مرهـ 8 ساعات .. وماتشحنها مرهـ ثانيه لين تخلص البطاريه وتصير فارغه مرهـ ..

وبعدين وجودتها تتأثر اذا طولت مشبوكه في شاحن الكهرب ..

- بطاريه ليثيوم :

هذا النوع من البطاريات .. له عمر افتراضي .. من سنتين إلى ثلاث سنين ..

وهالنوع هذا .. خربان خربان بعد عمرها الافتراضي حتى لو ما استخدمتها ابد !

اشحنها على كيفكـ .. اشبكها وانت تشتغل .. ان بغيت وصلها بعداد الكهرب ..

هالنوع هذا ريحنا من سلبيات بطاريات الـ نيكل .. بس ان عمرهـ قصير ..

طيب .. تدرون ان اغلب البطاريات اللي نستخدمها في ( اللاب توب , الجوال , الكفّي , ... ) وغيرها .. تستخدم النوع الثاني من البطاريات .. ( بطاريات ليثوم ) ..

ياحسافة ضيقة الصدر بس ..

اتمنى اني ما اكون طولت بس ..

03-20-2010, 06:51 AM

انا : تخ’ـــفي غلآإهـــآ

اضفني كصديق

معلوومـات فعلاً اول مره تمـر علي !!

بس عجيبه هههههههه

صج احنا اغبياء نصدق اي شي ينقال بدون مانتحقق منه!

يعطيــج ألف عافيـه عالطـرح القيـم

لكِ أطــيب التح ـآيآإ

03-20-2010, 06:56 AM

انا : مرومه

اضفني كصديق

يسلموووو عسوله
مشكوره على ردك

03-21-2010, 07:07 AM

انا : دلوقتي

اضفني كصديق

بس معلومه عن الاسد ترى هم سموه ملك الغابه بس علشان هو الحيوان الوحيد الي ما يشيل باقي غنيمته ويخلي الحيوانات تاكلها يعني مايكل غير طازه
تحياتي لك ويعطيك العافيه على المعلومات

التميز خلال 24 ساعة
العضو الأكثر نشاطاً هذا اليوم	الموضوع النشط هذا اليوم	المشرف المميزلهذا اليوم	المشرفة المميزه
قريبا	بقلم :	قريبا	قريبا

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ابنشدك عن نور القمر وشلون نوره	شآأإآدن	ڪآن يآمآ ڪآن	1	11-14-2009 06:48 AM
أنا وشلون ابرر لــك...!!!	اسمر فصله	الشعر والخواطر والقصائد	6	05-04-2007 02:15 AM

الذين يشاهدون محتوى الموضوع الآن : 1 ( الأعضاء 0 والزوار 1)

وشلون جبت هالمعلومه هذي ؟ هم قالوآ لي

زآۈيـﮧ حرهـﮧ