سرقتك بالزمن لحظه ...وعشتك بالفراق اوقات

05-31-2011, 02:55 AM

انا : رونق الاحساس

اضفني كصديق

^
^
فقط ..اتمنى من كل قلبي ..الدعاء لبلادي بالخير والامن والامان ..
واتمنى ..تشاركوني بدعاء صادق ..لابونا الغالي وفقيدنا فهد العروبه ..
اللهم أرحم هذا الرجل
الكريم الفذ المعطاء
الشهم
هل بالكلام سوف أوفيه حقه!!
اللهم اغفر للملك فهد واعف عنه ونقه من الذنوب والخطايا كما ينقى الثوب الابيض من الدنس واغسله بالماء بالثلج والبرد واجعله مع النبيين والصديقين والشهداء في الفردوس الاعلى يارب العالمين
(اللهم امين)
^
^

سكرت جود الجوال ونزلت الا تشوف ندا متخرعه .."خير شصاير"
ندى بتوتر "اظن اريام جتها الولاده "
بغى يغمى على جود "يوه صدق "
ندى "ايه صدقين "
جود وهي تتلفت بخوف "وينها "
ندى تحاول تخفف عن نفسها بالمزح"راحت المستشفى ياذكيه "
جود بربكه"ايه صح من معها ياقلبي ياريووووومتي يارب يسهل عليها يارب "
ندى "معها امي وامال ياعمري الله يسهل لها ميته خوووووووف "
جود بربشه "وين رهوفه "
ندى "مع البتول بصاله "
جود "اشوا على بالي نسيتيها "
ندة "انا انسى رهوف يالله تعالي نروح للصاله ..."
بالصاله كانت البتول جالسه وترتجف الالم المعاناه والشقا ..كانت مرتسمه بملامح اريام رحمتها مره اريام الي عمرها ماشافت دموعها خانتها الشجاعه وفرت منها دمعتين من قو الالم ماعاد تقدر تتحكم بانفعالاتها ... الخوف شعور مرعب مخيف ..يشل الواحد ويخليه بلا قدره بلا اراده ومايقدر يواجه واقعه بشجاعه .. فكرت البتول بنفسها .. لو طلعت حامل فهذا معناه اني بعاني ..بتالم ..بذوق الويل
والاهم بيكون في بزر يربطني بشخص علاقتي فيه متذبذبه ..مره في تناغم ومره العكس .. ليش انحرمت من ابسط حقوقي ليه ..كانت افكارها تعذيب اعدام بطيء .. مايكفي تعبها الجسماني .. تكمل بعد بتعب نفسي ..ضمت رهف النايمه لحظات ونزلتها على فراشها وغطتها ..الا بدخلت البنات ...
جود "نامت "
البتول بابتسامه "ايه نامت .."
شوي الا تسال "تهقون بتبطي بغرفه الولاده "
ندى وهي ترجع شعرها ورى بتوتر "ما ادري على حسب"
جود "بس هي من العصر مو طيبه "
ندى "ايه صح شكلها تحملت لين وصلت اخر حدود طاقتها "
وكل كلمه كان وقعها على قلب البتول مدمــــــر ...غريب كيف لانسان يوصل مراحل الخوف للدرجه ذي؟
/
مر الوقت بطيء .. مميت ... قاتل ..
في المستشفى كانت امال وام بندر جالسات بالرسبشن وامال رايحه جايه ...وبالبيت كانت جود تتصل عليهم ولاسكرت تستلم ندى ... اما البتول متفرجه مستمعه وقلبها يرقع من الخوف ...
قاطعهن صوت رجال "اريام كيفها "
زينت امال غطاها على عيونها "هلا سلمان هد اعصابك ان شاء الله خير انا كنت عندها قبل ثواني وهي طيبه"
سلمان بخوف وكانه ولد ضايع عنه ااهله او شخص خايف على شي ما يتثمن "اقدر اشوفها اكون معها "
ناظرت امال بامها الي قالت "اجلس يا وليدي الحين بتطلع الممرضه وتعلمنا "
ماقدر يجلس وصار يمشي رايح جاي ويفرك كفوفه ببعض ...تصفد العرق عن جبهته وقلبه زادت دقاته .. ورى هالباب زوجته تعاني ..تتالم .. تقاتل عشان تقوم بالمعجزه الي وهبها الله لها وهو هنا مستريح ,,
مرت ساعتين ... على الانتظار وامال تدخل عليها وتبلغهم بالاخبار .. وبالاخير طلعت تبشرهم انها ولدت وجابت بنت زي القمر ...
بالبيت ... كلمت جود وعرفت ان اريام ولدت وجابت بنوته صغنونه وصراخ وضحك وبكا بالبيت فرحه بالمولوده وبسلامه اختهن ..الي اثبتت قوتها وتحملها ..وبالنهايه عوضها الله ببنت قمر .. وجهها ينسي الواحد تعبه وشقاه ...
ضحكت جود وسط دموعها الي تمسحها "صرت خاله للمره الثالثه "
ندى الي تمسح دموعها هي الثانيه "ايه وانا بعد "
البتول "هههههههههه الحمد لله على سلامتها ياقلبي عليها "
جود "أي والله الحمد لله على سلامتها "
دق جوال ندى ...(مملكة عمري) ......
غمزت للبنات وطلعت..مسحت دموعها "الو "
مشاري بهدوء وكلمه كلمه "ندى فيك شي"
ضحكت وهي تمسح دموعها "صرت خاله اريام ولدت "
ضحك من قلبها وقال بعتاب احباب "حرام عليك روعتيني حسبت فيك شي "
ندى "ههههههههههههه لا ياحياتي مافيني شي الفرحه ماثره علي اصلا هذي هي الطقوس لا ولدت وحده من خواتي "
مشاري "هههههههههههههه الله يصلحها لها متى جابتها "
ندى " قبل شوي ...امال واني معها وزوجها "
مشاري "انا بطلع من الدوام بعد شوي المدير رحمني "
ندى "ههههههههههههه ياعمري والله "
مشاري "انتي عمري .. اسمعي اليوم نامي عند اهلك "
ندى "هاه وشو لا ياعيني مافيه نوم بلحالي رجلي على رجلك مانفترق "
مشاري "هههههههههههه اول مره اسمع وحده ماتبي اهلها "
ندى "الله يخليلي اهلي بس انا مقدر استغني عنك " وحمر وجهها ...
مشاري "هههههههههههههههههههه كبر راسي يابنت "
ندى " هههههههه اهم شي مو علي "
مشاري "يكبر عليك يا الغاليه افا بس..لا جد انتي استانسي عند خواتك ومتى مابغيتي ترجعين علميني حاس انك تبين تجلسين معهن "
ابتسمت ندى من قلب رغم المسافه وبعده عن الشوف الا انه يعرفها زين ..ندى "الله لايحرمني منك ياقلبي .."
مشاري "ولامنك ان شاء الله تامرين بشي انا راجع بيتنا الحين "
ندى "ابيك سالم حبيبي ولا تسرع وانت تسوق ولا تكلم بالجوال "
مشاري "ههههههههههههه غيره"
ندى "ههههههههههههه خلاص سلامتك"
مشاري "سلمتي ياقلبي مع السلامه "
ندى "الله يحفظك "
ابتسمت بحب وضمت جهازها لصدرها كنها تضمه هو ...تحبه .. كلمه ماتوفي شعورها ناحيه ولد عمها الي خطبها وتزوجها وكان نعم الزوج لها ..مراعي طيب حنون .. يكفي انه يحبها بصوره ما تنوصف .. تمتمت في نفسها / الله يحفظك لي يارب ... من كل شر
/
/
/
/

05-31-2011, 02:55 AM

انا : رونق الاحساس

اضفني كصديق

مرت الايام سريعه رجعت اريام بيت ابوها وعها احلى مولوده بالوجود بشره بيضاء خدود زهريه وشعر اشقر خفيف ... سمتها نجد على اسم احلى منطقه بالوجود باحلى وطن بالعالم ... نجد الخيروالعز والكرامه ... نجد الكرم والجود .. نجد الي اهلها يبدون الضيف على انفسهم وارواحهم يكرمونه ويرفعونه لاعلى المراتب ..نجد الي من صغيرها الى كبيرها مضيافه ..مانرد ضيف ولا محتاج ولاسائل ..من حبها لنجد سمت بنتها باسمها ..اسمها الي مخارج حروفه ..مثل ماء خرج من نبع عذب زلال ...اما جود فكانت مشغوله بالتجهيزات لزواجها الي مابقي عليه شي وخواتها معها مو مقصرات بشي حتى ازواجهن كانو مراعين للطوارئ الي هن فيها ومعطينهن الحريه ..
،
،
>>ببيت بندر ...
كانت البتول طالعه من المطبخ رايحه للصاله فجاه داخت دوخه قويه وطاحت مغمى عليها ..فجاه تلاشى كل شي وكل نور ومابقى الا الظلام
ظلت طايحه بمكانها محد يدري عنها الا يوم طلع بندر لبيته بعد ماجلس مع اريام وبنتها الصغيره وقت ..
طلعت عيونه قدام بخوف وصارت ملامحه بلا لون ... جا يركض وجلس عندها رفعها بين يدينه ورجع شعرها الطويل ورى ضربها على وجهها خفيف قال بصوت مرتجف "البتول اصحي وش فيك البتول "
كان ضايع تايه ما يدري وش يسوي ..نزلها من يده وركض ينادي امه .. الي تروعت
قالت اريام "يمه مو كانه بندر "
فزت جود من محلها "يمه شفيه يصارخ "
وطلعت هي وامها الي يالله تطلع الدرج ...لقوه واقف عن باب بيته وجهه يخوف .. حتى شعر راس جود وقف من الي شافته .. قالت بخوف وهي تحس بيدينها تعرق من الي بيقوله "شفيك بندر خير "
قال "يمه البتول طايحه مدري شفيها"
شهقت جود وتروعت امه بشكل ما ينوصف ..ودخلوا ركض لقوها للان غايبه عن الوعي .وقف بندر وهو يدخل يدينه بشعره بياس عمر جود ماشافت هالخوف على وجهه الا بس يوم طاح ابوهم ..بندر يحبهااااااااااااااااااااااا ..يخاف يفقدها..كيف كانت عميا ومالاحظت هالشي عليه ...بدت البتول تحت محاولات امهم وخبرتها تصحى شوي شوي .. قالت لجود "يمه جيبي عبايه اختك بنوديها مستشفى الوضع ماينسكت عليه "
وناظرت في بندر "وانت زوجتك مريضه وماوديتها مستشفى "
بندر لاول مره بحياته يكون متردد ومرتبك خوفه عليها سلبه من ارادته "يمه مدري هي رفضت و .."
جابت جود العبايه ولبستها ام بندر وقالت "مشينا مستشفى ..
اخذ شماغه ومفتاح سيارته وساعد جود في تنزيلها لين وصلوا السياره ...
/
>>في المستشفى ..
طلعت الطبيبه وقالت "المدام طيبه بس سبب الاغماء هو سوء التغذيه والمفروض في الفتره ذي تكونون منتبهين لاكلها وشربها ولازم يكون مغذي لان الجنين يمتص الفوائد من الاشياء القليله الي تاكلها الفتره الماضيه وهي مابقالها شي فصارت ضعيفه جدا ومهدده بالاعياء والاغماء ....... (وكملت محاضرتها) "
تعلقت كلمات الدكتوره بالهواء يوم قالت _جنين_
قال بهمس "جنين "
ناظرته الطبيبه بصدمه "ماتدري ان المدام حامل "
بندر "ماعندي فكره "
الدكتوره شوي ويغمى عليها قالت له تهزءه " الزواج يالف بين القلوب .. وانت حتى بالفحص مادخلت معها ولا تعرف ان زوجتك حامل يمكن لها شهرين او اقل بشوي وانت زوجها المفروض شي زي ذا ما يفوتك ..."
بندر بهدوء وهو يخزها "اقدر اشوفها الحين "
الدكتوره فهمت التلميح والي هو تقضب لسانها "ايه شفها بالغرفه الثانيه لا انتهى المغذي الي بالوريد تقدر تاخذها لكن اهم شي الغذاء والراحه وعدم الانفعال باين ان زوجتك عصبيه "
وراحت وتركتهم ..قالت امه اخيرا "مبروووووووووووك يمه "
ابتسم ابتسامه سطحيه "الله يبارك فيك "
وراح لغرفتها ومعه امه ...كانت البتول تمسح دموعها يوم دخلوا .. سلمت عليها عمتها وباركت لها اما بندر كان واقف بمكانه ماتكلم غمزت له امه وما بان منه أي ردة فعل .. جلس على الكرسي ومانطق بكلمه ..وش يقول وزوجته تبكي لانها حامل ...جلس كل دقيقه يناظر بساعته .. وامه معصبه عليه حتى كلمه ما قال للبنت ...
ناظرته البتول وهو ساهي عنها ..ماكلف عمره يقول لي شي زين ان عمتي معه ولا تهاوشنا كالعاده ...
دخلت الممرضه الغرفه وشالت الابره عنها وقالت يقدرون يرجعون البيت ..مسكتها عمتها بيدها لا تطيح وطلعوا من المستشفى وبندر طول هالوقت ساكت مانطق بحرف واحد
وصلوا البيت ودخل السياره داخل ونزل ..مسك البتول عن امه ودخلوا البيت ناظرته بعصبيه ماتبيه يمسكها من زين فعايله معها اليوم ...همس "ولا حرف "
عضت على شفايفها لا تصارخ وتنفضح باهله ع العموم تتفاهم معه بالبيت على رواقه طلعت جود وهي خايفه من قلب "بشروا تاخرتوا مره "
ام بندر بفرحه كبيره "البتول حامل "جلست جود تناقز من الفرح وضمت البتول "مبروووووووك ياقلبي ياربي بصير عمه "
ابتسمت البتول ابتسامه سطحيه والي مايعرف البركان الثاير بصدرها بيحسبه من التعب والاجهاد ..قالت امه له بعتب وتوعد قريب "اخذ زوجتك لبيتكم "
قال "حاضر " اذا فاتتهم نبره الاستهزاء فما فاتتها هي...
طلعوا بيتهم واول ماسكر الباب نفضت يده عنها بقرف وقالت بعصبيه "وخر عني "
صارخ عليها من القهر والحزن والجرح الي سببته بقلبه بفعايلها الشينه وتصرفاتها المستفزه "ومن قال اني ابي قربك لا تاخذين بنفسك مقلب "
البتول وهي تصارخ "شعور متبادل ..(وتهدج صوتها) ياليتني مت قبل لا احمل ياليت "
انصدم وصار وجهه بشحوب الموت "ايش.؟"
قالت وهي تمسح دموعها وشعرها يتطاير مع انفعالاتها وحركات يدينها اليائسه "صار فيه ضيحيتين برقبتك انا والي في بطني ..مايكفي الي سويتوه فيني بتجنون على البريء الي بينولد لاب ماعنده احساس وكرامه "
كان كلامها قاااااااااسي بقساوه الحجر وقساوة قلب ماعرف طعم السعاده في يوم ...
مسكها مع ذراعها وقال بهمس وعيونه حمراء من دمه الفاير براسه والي يطن طنين "لانك حامل بس ولا وريتك السنع بعقالي "
نفضت يده وعجزت تتحرر صرخت بعنفوان "انا بنت سلمان ماعاش من يمد يده علي حتى انت ...ياليت حملي مايتم ياليت "
دفها عنه بقرف وقال وهو يناظرها باحتقار "قلبك حجر ..لا لا الحجر ممكن يلين قدامه ..انتي قاسيه قاسيه انانيه (جت بكلم وصرخ) ولاكلمه ولا حرف ولا نفس اكرهك فهمتيني اكرهك كره العمى من جد ومن قلب خليني اسحب شرف هالدعاء منك واقول ليتني مت او انشلت يدي قبل لا اوقع واتزوجك لاني خسرت وخسارتي مو بسيطه خسرت 12 سنه من عمري انتظر وحده ما تستاهل حتى ثانيه انتظار "
وطلع من البيت وخلاها شاحبه ترتجف وتحس بالبرد وصل لعظامها شوي وتتكسر ...زواجهم كارثه كارثه ...
انهارت تبكي من قلب ... بعد ساعه طلعت لها جود بالعشاء وكانت هدت نوعا ما ...
جود بابتسامه "وهذا العشاء طال عمرك"
ابتسمت البتول شي كانه ابتسامه "تعبتي عمرك"
جود "تعبك راحه ...اهم شي تغذي يالله بنزل عشان تتعشين وترتاحين وجهك شاحب مره"
البتول "ان شاء الله "
وطلعت جود بلباقه على بالها بندر عندها ..اكلت البتول شوي من العشاء ووخرته عنها بعد ربع ساعه دخلت المطبخ تنظف الصحون ..تحس بملل بالبيت اخذت الصحون وطلعت من باب بيتها وتذكرت انها نست جوالها تاففت ونزلت الصينيه على الطاوله الي عند الباب وهي طالعه طاح الجوال منها وانفك وبدون ما تنتبه دعست على غطا الجوال وطاحت طيحه مولمه على الدرج من فوق الى تحت ...
الي صار لها كان زي الحلم كانت عيونها متحجره ما استوعبت شي من الصدمه بعد شوي ضربها الالم على بطنها بقوه ما تتخيلها وصرخت صرخه قويه ... قالت جود "ياساااااتر يارب " وجت تركض باقصى قوتها وقفت في مكانها مذهوله وتهدج صوتها ويدينها على فمها "ياويلي البتول "
كانت البتول تتالم وتبكي وماسكه بطنها بقوه بقدره قادر قدرت جود تكلم الاسعاف ونادت امها الي جت تركض ونست شيخوختها والم الروماتيزم مع هالمصيبه ...وبعد وقت بسيط اغمى على البتول ..كان كل شي يخرع ..جاء الاسعاف وبظرف دقايق طاروا لاقرب مستشفى لان حالة الام والجنين خطيره كان معها جود وام بندر ...رجعت البتول لوعيها وهي ماسكه بطنها بالم وهمست "ولدي ياعمه "
ام بندر وهي تمسك يدها "مابه الا العافيه رجعي الاكسجين لوجهك "
سبحان الله يجي الفرح من هنا ويسرقه الحزن فجاه ..!
اول ماوصلوا قسم الطوارئ وشافها الطبيب قال بسرعه للممرضات "العمليات يالله وسال جود وام بندر وين زوجها لازم يوقع على الاوراق "
قالت جود "انا اخته مايصير اوقع عنه "
الطبيب كان ومن حسن الحظ متفهم ومتساهل "لان حاله المريضه حرجه فراح اتغاضى عن غيابه بشرط حضوره باسرع وقت راح اشوف المريضه اذا تقدر توقع "
وبقدرة قادر شخطت البتول المتخدره بسبب الالم الي تحول لشي ماعاد تحس به .على الورقه شي يسمونه توقيع ودخلت العمليات ...
كلمت جود بندر "الو وينك "
بندر بهدوء "خير "
جود "أي خير زوجتك بالمستشفى "
انصدم بندر وطلع من مجلس اصدقاءه "وش تقولين انتي مستشفى ايش وش السالفه "
جود "البتول طاحت من الدرج والحين هي بغرفه العمليات كلمنا الاسعاف ونقلها هناك لازم تكون فيه "

05-31-2011, 02:56 AM

انا : رونق الاحساس

اضفني كصديق

بندر ماقد عصب في حياته زي هاليوم سويتيها يا البتول انتي انهيتي الي بينا بقتلك لها الروح البريئه ..خلاصـ عافكـ الخاطر !!
طلع برا ولقى انه نسي مفتاحه بالمجلس ورجع ياخذه ساله ماجد وهو يشوف ملامحه ما فيها علم طيب "خير"
بندر بهمس "أي خير البتول بغرفه العمليات الحين " فز ماجد من مكانه بصدمه اخته الي رباها بغرفه العمليات اخته الي شافها تكبر ورعاها طول عمرها مريضه "وشو "
بندر وهو يكلم اصدقاءه " يالله نترخص "
"تونا بدرررري العشا "
بندر " مره ثانيه سلام "
وطلع ماجد معه وماعبر احتجاجاتهم لانه ببساطه عقله مو معه ولا قلبه الي يضرب بجنون ... لحق بندر للمستشفى ...
كانت جود جالسه مع امها وبيدها كوب فيه شويه مويه ...رفعت عيونها وشافته يمشي مع اخوها كانه توأمه مو ولد عمه حتى الناس جلسوا يناظرون هالرجالين الي نسخه تقريبيه عن بعض ..طاح كوب الماء من يدها لا لا لا هذا مو عدل.. مو انصاف ... احاول ابني احلامي على انقاض حلمنا ..ليه شفتك..ليه تجي..ليه !
جمد ماجد بمكانه ..ليه القسوه ليه..؟ وش هالخطوات الي جابتني لمرأها ...لمراى حبيبة (ن) مو حبيبته ..باقي اسبوع وساعتين على زواجها... هل صدفه انه يعرف موعد زواجها بالتحديد ولا كل ليله يحسب الايام والساعات !
سلم على الجميع بشكل عام ... وقال لبندر "هذا هو الطبيب صح "
لكن الطبيب ما انتبه لعلاقتهم مع المريضه ولا البنت الجالسه والي توجه لها على طول قال بابتسامه "زوجه اخوك طيبه ابشرك "
وما امداها تتكلم الا ماجد واقف بوجهه وبندر معه "انا اخوها "
بندر "وانا زوجها بشر يادكتور "
الدكتور باسف "للاسف المدام فقدت الجنين طيحتها كانت قويه جدا ..وحنا عملنا لها عمليه تنظيف العمليه بسيطه وبكره ان شاء الله تطلع بيتها الله يعوضكم خير "
وراح ... كانت ملامحه قاسيه مايفضح شعوره الا عرق برقبته يضرب بقوه وعيون متحجره حزن غضب وكره ..
حط ماجد يده على كتف ولد عمه "الله يعوضكم خير عنه والحمد لله على سلامتها "
بندر بصوت بارد "الله يسلمك"
ناظره ماجد بعين خبيره بطبايع بندر ..وسكت الكلام الحين معه بيكون ضايع وبندر بركان ثاير لا هدا بيتكلمون ...
قالت امه "انا بجلس معها " قالت جود "لا يمه انا بجلس "
بندر كان بعالم ثاني ...
قال ماجد بصرامه "يا ام بندر البنت مخدره ومو داريه عنك والصبح تعالي لها "
قالت جود عناد بتقهره "انا برافق معها "
ناظرها بعصبيه وقال "قلت البنت مخدره تجلسين وش تسوين والرايح والجاي يقلل من احترامه لك بهالليل والمستشفى الكبير "
سكتت جود من قله الادب تجلس تراده وسط خلق الله .. قال بندر "يالله مشينا "
امه "يالله "
جت جود بتمشي وكان ماجد واقف في مكانه بعناد .. ماهي متنازله هي اعند منه ... ناظرته امها تحتريها تجي من وراه وتمشي لكنها كانت واقفه تستناه هو الي يوخر ..لكنه كان اعند وبقهر مشت من وراه بكبرياء..
الا وتشوفه يتحرك ويمشي مع اخوها وهم يتكلمون بصوت واطي ماينسمع على انهم كانوا قريب منهن ...
عند المواقف توادعوا ...وكلا ركب سيارته ...
كان الجو بالسياره كئيب وبندر كان منيع قدام محاولات امه لمواساته واخر شي استسلمت وسكتت كان يوم حافل بالمصايب والصدمات ...
دخلوا البيت ... كانت اريام تتمشى بالصاله ..قالت لهم "هاه بشروا " بندر طلع بيته وامها طلعت غرفتها عشان زوجها موجود بالبيت ...قالت جود وهي تنزل عبايتها "اففففف بس تعب البتول اجهضت "
انصدمت اريام "لااااااااا وكيفها "
جود "زينه ماعليها بندر طل عليها قبل لا نمشي كانت نايمه "
اريام "يالله صدمه "
جود "بقوه بعد ...يالله مشهد ماراح انساه بحياتي وين بنتك صدق "
اريام بالغرفه تعالي نروح هناك ونسولف ...وراحن غرفه اريام الجديده الي تحت ..
سكرت جود الباب وقالت "تخيلي من جا هناك "
رفعت اريام راسها "من "
جود بحرقه قلب "ماجد "
اريام بهدوء تذكرها "جود "
رفعت يدينها "عارفه عارفه ..." وعلمتها بكل شي صار ....
قالت اريام ..."بندر مو طبيعي "
جود "من يلووووووومه ما امداه يفرح الا وهو منصدم"
قالت اريام بتركيز "جود ملامحه مو ملامح حزن لا فيها شي عصبيه او قهر مدري مو متطمنه انا "
جود بصدمه "و تقولين انتي "
قالت اريام تشرح لها "شوفي انا متزوجه ومدري تعودت من زوجي افهم الملامح واميز الانفعالات لو الوضع طبيعي كان تقبل بندر الموضوع البتول مو اول وحده تجهض انا قبلها اجهضت وماكان زوجي كذا ..بندر معصب من شي متاكده وشو مدري "
جود وهي عاقده حواجبها "الله يستر زواجي الظاهر مو خير علينا "
عصبت عليها اريام "لا تقولين كذا "
وكملت "ايه صح ابوي وصل قبلكم بعشر دقايق وطلع غرفته يحسبني نايمه "
جود وهي تبوس بنت اختها "زين عشان امي تبلغه بطريقتها "
اريام "أي والله "
/
/
>>بعد صلاة الفجر ...
طلع ماجد ومشاري للصلاه ...وبعد مافاضوا ... قال لاخوه "وين فارس "
مشاري "مو بغرفته "
ماجد "لا"
مشاري "مداوم اجل "
ماجد "اسمع البتول منومه بالمستشفى "
شهق مشاري "هاه وشو "
ماجد "اهجد مافيها شي كانت حامل وطاحت من الدرج وراح الي في بطنها اليوم بتطلع من المستشفى عسى بندر يوافق تجي لبيتنا ترتاح "
مشاري تنكد "ياقلبي يا وخيتي توها بزره وش بتتحمل وش بتخلي"
ماجد بواقعيه ولا قلبه الف قطعه عشانها "امنا جابتني وهي ماكملت يمكن 15 سنه وبتول خلاص بتنصف العشرينات "
مشاري "الله يقومها بالسلامه "
ماجد "امين انا لا صحيت الساعه 7 بعلم امي عشان تروح معي تزورها ..مابي اقول لها من الحين واحرق قلبها هالساعتين "
مشاري "شورك وهدايه الله "
دخلوا بيتهم وطلع مشاري غرفته لقى ندى تنزل الجلال عن راسها وتحطه بوسط السجاده حقت الصلاه جلس على السرير وناداها تجي وهو ماد يده لها جت له وحطت يدها بيده ..كانت بدون ميك اب شعرها الاشقر كنه حرير على كتوفها وملامحها فتنه في ظروف ثانيه كان الكلام اخر شي يفكر به مشاري قال لها بهدوء "البتول طاحت امس ودخلت المستشفى "
شقهت ندى وتوترت ملامحها ... كمل "كانت حامل ومات الي ببطنها وبتطلع اليوم "
ندى بخوف "من قال لك متى هالكلام "
مشاري امس كان ماجد مع بندر سهران يوم كلموه بالمستشفى "
ندى "ياقلببببببببي يالبتول مادريت انها كانت حامل كنت شاكه "
مشاري "توهم امس دروا عن الحمل وامس فقدوه"
ابتسمت بضعف "خيره ان شاء الله "
مشاري "ربك كريم"
/
/
/
الساعه 7 ونص ...
كانت البتول تاخذ الدواء من الممرضه وجهها رمادي من التعب وفمها جاااااف من العطش ..وتعش بدوخه من البنج الي للحين باقي له بقايا..
قلبها يتقطع بالم ..والدموع الحين في الوقت الي محتاجتها فيه عصيه ماتنزل ...مسحت جبهتها بيد ترتجف ..وغمضت عيونها تدور الراحه بعالم خيالها حيث لا الم لا حزن لاا دموع ...
فتحت عيونها الا تشوف بندر واقف يناظرها باحتقار ...
دمعت عيونها ...في وقت ما كانت تتمنى هالدموع تنزل وتطيعها في وقت ما تمنت اكثر انها تتلاشى ولا تبين ضعفها ...
قال بقوه وغضب ومرار "اعرفك قاسيه بس مو مجرمه ..."
قلب لون وجهها للون مخيف ما ينوصف لكن بندر ما تاثر ...وكمل "امس كنت اكرهك بس الحين معها احتقرك انتي انسانه بلا مشاعر واحساس ...حتى الحيوانات ما تذبح عيالها بالي سويته انهيتي الي بيننا بجداره اهنيك عليها "
كانت بتعترض بتحتج بتبين اللبس ..لكن لسانها ماطاعها كانت بطور الصدمه ...جلست ترتجف وتبكي بصمت وتشاهق وهو ما رحمها ..."اكرهك واكره كل شي يذكرني بوجودك بحياتي ..من المستشفى بتطلعين لبيت اهلك ولا عاد ابي اشوفك مره ثانيه بحياتي ابدااااااااا ابدااااااااااااااا "
زادت شهقاتها ورجفتها ودموعها ...
على قد ماكانت دموعها لاحاسيسه قاتله الا انها هي مارحمته يوم ذبحته بدال المره الف مره ...دخلت الممرضه وانذهلت من الي تشوفه صارخت عليه "ياخي حرام عليك ماتشوفها مريضه ضعيفه ماتقدر تشيل نفسها انت ماتحس"
قال بقسوه "عساه دووووووووم ومن هالحال واردى "
كملت البتول بكاها قالت الممرضه بعصبيه قويه وهي تشوف البنت شوي وتتشنج من البكا "انت ماتحس البنت توها طالعه من العمليات بسببك انت .. وبحاله صدمه تبيها تنتكس اطلع برا لا انادي الامن اطلع "
ناظر الممرضه من فوق وتحت وطلع ...
جلست تهدي البتول المنهاره وبالاخير ماقدرت واضطرت تعطيها ابره مهدئه ... بعد دقايق تراخت يدينها ونامت ..دخل ماجد وامه القلقانه على بنتها الغرفه ولقوها نايمه شعرها ولها ووجهها تعبان وعلى وجهها بقايا دموع ...
جلست امها معها وهي تبوس راسها وماجد طلع برا يسال الطبيب عنها والي طمنه وقال انها بتكون بخير بس لازم تتغذا عشان تعوض الدم الي فقدته ....
جلست امها معها لان اليوم يوم زياره مفتوح وطلع ماجد يشوف اشغاله ..العصر زارها ابو متعب واخوانها وندى وجلسوا معها ... كلم ابو متعب ولده "وينك الطبيب كاتب لزوجتك خروج تعال طلعها "
غصب عنه قال "جاي بالطريق"

05-31-2011, 02:56 AM

انا : رونق الاحساس

اضفني كصديق

ولما وصل ماناظرها قال بشكل عام "جاهزه "
هزت راسها ...وقالت له ام ماجد "يمه خلها تجي عندي البيت "
ابتسم "مالك الا الي يرضيك يا عمه "
وطلع ومافكر يساعدها تركب السياره وخلى هالشرف للممرضه ....دخل سيارته للبيت مو عشانها عسان المظاهر ... ولا عشانها !!!!!!! من يعرف !
ولما جت تنزل طلع فلوس من بوكه "خذي ذي خليها معك "
ناظرته من فوق لتحت ودفت يده بقفا يدها "مابي منك شي "
قال بقسوه "مادامك زوجتي انا مسؤول عنك لا تشمئزين ماراح تبطين وانتي زوجتي ايام بس "
شحب لونها لدرجه ماتنوصف وحط الفلوس بشطنتها بعنف ..وركب سيارته وطلع واختفى ..!
كانت واقفه تناظر في اثاره ونست انها تعبانه وهلكانه ...ما درت الا باماني الي اول مادرت جت البيت ركض .."الحمد لله ع السلامه يا قلبي "
مالقت البتول نفسها الا بحضن اختها وتصيح ...قالت اماني وهي تملس شعرها بحنان "بسم الله عليك الرحمن الرحيم " واخذتها ودخلن البيت ...ساعدتها تتحمم وتغير ملابسها وبالغصبيه خلتها تاكل ...
قالت اماني وهي تبوس جبهتها "نامي وارتاحي "
قالت البتول بتعب "والله ماقصدت اطيح من الدرج "
انصدمت اماني "طبعا ياقلبي من قاله انتي نامي بس "
وراحت بسابع نومه ...جلست اماني معها لين تاكدت انها مرتاحه وسكرت النور وطلعت
/
بعد صلاه الظهر >>>
دخل بندر المحكمه عشان يطلقها ويرتاح منها ...دخل مكتب الشيخ الي رفض طلبه وقال "راح اعطيك فرصه ثلاثه شهور ان رجعت وانت لسى مصر راح اوافق على الطلاق "
حاول بندر فيه لكن الشيخ رفض قطعيا يوافق .,وطلع من المحكمه معصب وطفشان
جلس بسيارته مصدوم وشالمصيبه الي كان بيهببها..لو طلقها بيخسر ماجد وعيال عمه ورضى ابوه عنه ..ضرب الباب بيده بقووه ..ماخلت فيه عقل او حكمه او بعد نظر ...
الكره كلمه ما توصف الشعور الي بصدره تجاه هالانسانه الي دمرت احاسيسه بقسوه ومازالت ...
*
انا ..ما اقوى عذابكـ ..
لاصار في قربك عذاب !
وفي بعدكـ عذاب!!!
*
ببيت ماجد ...>>
كانت ندى عند البتول ...
قالت لها البتول "ندوش متى بتروحين بيتنا ..." طلعت منها كلمه بيتنا عفويه وحست بوقعها زي سكين انغرس بقلبها الدامي ...
ندى "اليوم بروح عقب العصر ...ليش تبين شي "
البتول بغصه .."ابيك تجيبين لي كل اغراضي"
انصدمت ندى "وشو"
البتول "الي سمعتيه كلها "
ندى وقفت وقفلت الباب عن العيله لا تسمع "مجنونه انتي وش قصدك "
البتول بغصه "بنتطلق خلاص "
ندى و شوي ويغمى عليها "مريضه انتي طلاق ايش الله لا يقوله "
البتول بحزن "ياندى حياتنا مع بعض عذاب موت بطيء وبندر مايطيقني خصوصا بعد ما مات ولدنا "
ناظرتها ندى "بندر مايطيقك قولي بندر مايطيق يعيش بدوني عميا انتي ماتشوفين كيف لاجلسنا سوا يناظر فيك"
البتول وهي تبكي"انتي ماتفهمين المظاهر خداعه "
ندى بقوه "انا افهم الحب اذا شفته لا تتهورين يا البتول وتندمين عقب "
البتول "مابقي حتى مكان للندم ان ماجبتيها بخلي امي تجيبها عاد تخيلي وضعها كيف بيكون "
ضغط على وتر حساس ووافقت ندى بدون ارادتها "انتم اثنين اغبياء بدال مايقربكم الي صار يبعدكم عمري ماشفت سطحيه زي كذا "
البتول "يقربنا لا تضحكيني كيف يقربنا وهو يحسلبني تعمدت اطيح عشان يروح الحمل "
انفجعت ندى وجلست تناظر بنت عمها بذهول وصدمه ...وش تقول بعد ..مافي مجال للكلام .!
وفعلا لما راحت بيت اهلها طلعت بيت البتول وبدت تجمع اغراضها ..فجعها صوت معصب "وش تسوين"
للكنها تماسكت وكملت شغلها "اجمع ملابس البتول بطلب منها "
ابتسم بدون نفس "ماصدقت خبر "
ناظرته ندى من فوق لتحت "ماتوقعتها منك يا بندر كيف تقول ان زوجتك تعمدت تذبح ولدها "
ناظرها بهدوء وقال ببروده "لانها قالت انها تتمنى موته "
وانفجعت من الصدمه .. من تصدق فيهم ..الاثنين ذولي باين ان حياتهم جحيم ما ينطاق ...قال بيبين انه عادي راضي بها القرار "كملي شغلك ولا تبين مساعده "
ناظرته بعصبيه بروده يقهر "بندر انا متضايقه على الاخر لا تزيدني "
هز كتوفه ب بلا مبالاة وطلع وهو يدور انفاس حريه للتنفيس عن كبت بصدره يجتثه ..
/
/
مرت الايام بسرعه ووفت ندى بوعدها وجابت اغراض البتول كلها ... بعد الغداء كانت العايله مجتمعه وكانت البتول تناجي ماجد بنظراتها بين لحظه والثانيه ..واه من اللحظات !
وقف وراح لمكتبه ..وبالطريق قال للشغاله تنادي البتول ..
الشغاله "ماما البتول بابا ماجد يبغا انتي "
ارتجفت يدها ووقفت ..راحت للمكتب وطقت بخفه "ادخلي"
دخلت وقالت باحترام لاخوها "بغيتني يا ماجد "
ماجد "تعالي اجلسي "
جت وجلست جا وجلس جنبها ..قال برقه "والحين علميني بالسالفه كلها "
ناظرت فيه بعيون غرقانه دموع وشفه ترتجف ...حس بطعنه حبه لها ولحمايتها تخترق صدره ..
قال وهو ماسك يدها "اسمعي ما ابي دموع ...ابي تكلميني كبنت كبيره فاهمه ..(قال يمزح) تعرفين ان بكيتي ممكن ارتكب ببندر جريمه شنيعه "
ضحكت غصب ومسحت دموعها وقالت له "بندر يحسب اني تعمدت اطيح نفسي عشان يموت الجنين " تغير لون وجه ماجد "منت بصاحي يا بندر "
قالت لانها ماتبي تكذب على اخوها او تخون ثقته "انا لما دريت بالحمل تهاوشنا وقلت له اني اتمنى لو ماحملت و...و... و( دمعت عيونها وهزت كتوفها) تعرف طبعي الشين قلت اشياء عشان اقهره وطلع زعلان عقب طلعت من بيتي بانزل وطاح جوالي وزلحقت على غطاه وطحت وهو يحسبني متعمده .."كان ماجد مستمع وبحاول يكبح تعنيفه الي بيرميه بوجهها دلعه لها خرب اخلاقها ما عدلها على الاقل فيها صفه حميده لسى وهي الصدق ..
كملت وهي منزله راسها "طول فتره زواجنا مشاكل وهواش ومصايب لا انا مرتاحه ولا هو اخر مره شفته فيها قال بيطلقني (وبكت على كتف اخوها ) "
رفع عيونه للسقف يدور الصبر والسلوان وتنفس بقوه مسكها مع كتوفها وقال وهو يحاول يخفف من تانيبه لها "الي سويتيه مو طبيعي يا البتول خطا كبير ما ادري هل من الممكن تصليحه ولا لا وما ادري العيب من مين وياخوفي لا يكون مني انا الي تجاهلت اعتراضاتك وخليت الزواج يتم .. ع العموم هذا بيتك دايم وعشانك وعشان كرامتك بنتظر بندر يبدا هو بالخطوه الاولى عقبها يصير خير "
قالت بضعف "منت زعلان مني "
ماجد بحزن داخلي تجلا بنظراته "زعلان عليك مو منك "
ارتجفت شفتها "لاتزعل ماجد كل شي يهون بالعالم ولاضيقتك نسيت انك بمقام ابوي "
قال بحنيه "ماني متضايق انا اشيل حمول كبر جبال ولا انهز روحي للبنات واستانسي وخلى بكره لبكره "
حبت راسه وطلعت من المكتب ...توقعت ماجد يعصب عليها يصارخ يهزئها ...بس تقبل الواقع بصدر رحب ..
راحت وجلست مع اماني وندى وما انتبهت لامها الي دخلت مكتب اخوها ..كان ماجد جالس ومسند يدينه للطاوله ويدور القلم بحركه دائريه ..ناظر بامه "هلا يمه "
جلست امه على الصوفا وقالت "وشصار بينك وبين اختك "
ماجد بتعب "ماصار شي مشكلتها مع زوجها كبيره وحلها بيدهم هم "
امه "منت متدخل "
ماجد "بنتظر بندر يكلمني عقب بشوف "
امه "بس يمه "
ماجد بهدوء "اظن الي سببناه بتدخلاتنا اضراره للحين جسيمه "
تقبلت امه رايه وقالت بعد شوي "وزوجتك الي لها شهر وزود عند اهلها وش بتسوي فيها "
ماجد ببرود "ولا شي خليها تنطق عند ابوها فراقها عيد "
امه " امساك بمعروف او تسريح باحسن "
ماجد "كل شي بوقته حلو يمه "
^
^
^
^

05-31-2011, 02:56 AM

انا : رونق الاحساس

اضفني كصديق

^%^ يوم زواج جود ^%^
بقاعه الزواج
:
غرفه العروس
كانت ملكه بوسط خواتها وبنات عمها ...شعرها على طوله ملفف كيرلي عريض وطرحه نافشه طويله ..وفستان روووووووووعه ما ينوصف ماسك على جسمها ونافش بذيل طويل منثور عليه ورد احمر طبيعي ريحه يفوح بالمكان ..
كان مكياجها خفيف ... مبين جمال عيونها النجلا ..وبشرتها المخمليه ...وشعرها الاسود الفاحم ...حتى ريوف لما شافتها انهبلت ومسكت نفسها لاتبكي لان جود راسها والف سيف الا تمر ريووف وتخليها تشوفها بالفستان والمكياج ومن حسن الحظ ان امه زوجها نايمه وسلوى تكتم خبر جيت جود عشان كلاام الناس الفاضي ... وان سالها احد بتقول انه مشاري ولافارس مر بيسلم ..
قالت ندى "بسم الله عليك من العين "
اريام "ماتوقعت اني احضر زواجك ابداااااا "
كانت جود مشوشه بين الحزن والخوف والزهو بنفسها وجمالها ..قالت بضحكه مرتجفه "امي مو راضيه على حضورك توك ما خلصتي الارربعين "
اريام وهي تغمز "لاجل عين تكرم مدينه "
جت امال وهي تتالق بفستانها البني الروعه "ام المعرس وبناتها بيسلمن "
قالت جود "الزفه بعد شوي ورى ما ينتظرن "
امال "مادري عنهم بدخلهم زين "
راحت ندى تعدل طرحت جود وتعطرها ثم راحت تشيك على فستانها الاحمر والجوريه الي بشعرها ...وشوي الا داخله امه لابسه جلابيه فخمه حلوه وبناتها معها ..
ضمتها امه وهي تكبر وتذكر الله على زوجه ولدها الي تطير العقل بجمالها ...ابتسمت لها جود بحيا وسلمت على خواته الي كانن باردات نوعا ما ...
بعد شوي دخلت البتول الي كان لابسه فستان زهر وفضي وطالعه فيه ملفته للانتباه وكيوت .."يالله الزفه بتبدا "
بدت الزفه وسط سكون الكل كانت شعريه ...رومممنسيه على ضو الشموع وانفاس الجوري الي عم الصاله كلها ...والكل كان يحبس انفاسه ترقب ... انبهار .. وبيشبع نظره من الي يشوف ...
كانت ضربات قلبها تدوي ودموعها بالمحاجر ... *&الا ليت الزمن يرجع ورا والا الليال تدور&* بتصميم وعناد رجعت تبتسم اليووووووووم يومها ..عرسها ..امنيه كل بنت ..وليله العمر ..لازم تنفض الماضي وتعيش الحاضر لازم ...
جلست بالكرسي الخاص فيها ...وهي تبتسم للمصوره وللي يسلمون عليها ...
/
>>بقاعه الرجال ...
كان صوت الزفه واصلهم ... والقاعه عندهم تعم بريح العود وقهوة النشامى ..وبمعرس كاشخ ويسولف مع عمه ابو زوجته ويبتسم للمعازيم ...
سلم ماجد عليه وجلس ...من الانتحار انك تفكر بعرض مشاعرك للانتحار ..لكن الواجب فوق الكل وفوق كل اعتبار ...

*
ثوبها بعيونهم ثوب الزفاف ..
وثوبها بعيون خفاقي كفن
الزغاريد في فرحها iiوالهتاف
التراب الي على حلمي iiدفن
والزهر والورد في دربه iiيلاف
كالنصايب عالي القبر iiنصبن
دمعي وصمتي والاحزان اعتراف
عن غرام كان لاحلامي iiوطن
ادمعي ياعين واغرق iiياجفاف
واجزعي يانفس واضحك iiيازمن
*
((عبدالرحمن الرشيد))
*
دمعي
وصمتي
والاحزان اعتراف
عن
غرام كان
لاحلامي i

وطن
/
/
بقسم الحريم ....
قالت ام طارق لبنتها "قومي سلمي على عمتك لا تفضحينا "
نجوى بدون اهتمام "انتي وراك مكبره السالفه بقوم "
وقفت تعدل فستانها الاسود ..هل جا لونه صدفه ولا رد لحركه جود يوم زواجها بماجد .!!
وطلعت وسلمت عليها ...شافت جود التشفي بملامحها وابتسمت ابتسامه عذبه ..
نجوى بدون نفس "مبروك ياعمه "
جود بنفس النبره "يبارك فيك يابنت اخوي "
ناظرتها بابتسامه مافهمها الا جود ونزلت تحت ... قالت لها اسماء "اخيرا سلمتي فشله كلنا مسلمين قبلك"
نجوى بحقد "ماشوف زادت شي يوم سلمت عليها "
اسماء "طيب لاحد يسمعك ترانا بوسط ناس "
ناظر اختها بنص عين واخذت فنجالها تتقهوى ...
طلعت الجده ام صالح عشان تسلم على جود "ووقفت جود وضمت جدتها الغاليه الي صايره تقضي اغلب اوقاتها ببيت ابوها الي بالديره عند جيرانها وعيال عمها وكل من عرفته بحياتها الطويله ...
ام صالح "مبروك يا بنيتي الله يوفقك يارب "
جود "مشكوره ياجده الله لايحرمني منك ويطول بعمرك "
نزلت الجده وصارت جود تستقبل المباركين وتسلم ... جابت لها مها اخت فيصل كاس عصير "خذي بردي على قلبك اهلكوك الناس"
ضحكت جود ضحكه سريعه "جا بوقته تسلمين يارب "
ابتسمت مها "حاضرين "
وراحت تدور اختها وشافتها مشغوله بالتنظيم والاستقبال ...هذا زواج اخوهن الكبير ولازم يكون ممتاز ومميز ...
مضى وقت والبنات يرقصن ويصورن مع العروس ...قالت اريج باذن اغلى صديقه لها بالعالم "كفكفي الدموع يا جود تراها وصلت "
ناظرتها جود ورمشت بقوه ..ويدها بيد صديقتها ...
لاتضعفين..لاتنهارين ...
/
كلمت ام فيصل ام ماجد باذنها وقالت لها ان ولدها بيدخل اعلنوا عن هالشي وتغطن الحريم ..ودخل كانت جود مدنقه ..سلم عليها ابوها ...
وبارك لها واخوانها الوليد وبندر وعمر ويزيد ... وابو طارق ..
قال طارق وهو يبتسم "اخيرا شفتك عروس" ابتسمت جود وضمته بقوه تحبهم كلهم الا طارق غييييييييير الناس عندها ...سلم عليها ابو زوجها والي كان كبير بالسن مثل ابوها ...اما فيصل كان مبلم فيها من كلام امه كان يعرف انها حلوه بس مو ملكه ...طلعوا الرجال وبقى فيصل جن خواته وخالاته وكل قريباته وسلمن ...وبعدين التصوير الي كان سريع وبسيط ومريح لجود بعد تحذيرات البتول لها ...
البتول الي كانت تبكي تحت غطا وجهها لشوفه بندر الي ماعبرها من يوم ماطلعت من المستشفى ولا سال فيها !!
ودعت جود امها وخواتها وسط الدموع .... وركبت مع زوجها وراحوا للفندق الي حاجزه لهم ...

/
/
/
/

لكل بدايه..نهايهـ
ولكل نهايه..
بدايهـ

====================================

06-22-2011, 06:43 PM

انا : مـآجستك

اضفني كصديق

موضوع جميل تسلمي

التميز خلال 24 ساعة
العضو الأكثر نشاطاً هذا اليوم	الموضوع النشط هذا اليوم	المشرف المميزلهذا اليوم	المشرفة المميزه
قريبا	بقلم :	قريبا	قريبا

الذين يشاهدون محتوى الموضوع الآن : 9 ( الأعضاء 0 والزوار 9)

سرقتك بالزمن لحظه ...وعشتك بالفراق اوقات

للروايات المكتمله