منتديات بنوته - عرض مشاركة واحدة

09-28-2010, 08:15 AM

" بعد ان اتمت ابنتي الصغيره سنتين كاملتين"

كلنا ملتمين حوالين بنتي فطيم "سميه عمتي" منصور ماسكها وهو خايف عليها .. لانها شيطانه كل ساعه بتروح تطفي الشموع بيدها ومعاه عمتي فاطمة .. تقول مااقدر اخلي سميتي بروحها ..

اما انا .. فكنت اوزع على الكل اقنعه وصفارات وكيس صغير فيه مجموعه من الحلويات والصفارات وتمثال مصاصه ذكرى بيوم ميلاد بنتي .. سواء كان كبير ولا صغير

سمعت سالم يقول لمريوم : مريييييوم لحقي مرت اخوي من الحين تخش لولدنا

التفتت له وضحكت بااستغراب: اي ولد؟؟

ضحك سالم ومريوم ويهها قلب عشرين لون من الاحراج .. مسك بطنها بجرأة : جوزتي حبلا ..

فتحت عيوني وباركت لمريوم : فديتج مريوووم الف الف مبروووووووك

انحرجت مريوم وذربت يد سالم بخفه : سلوووووم

طالعتني وهي مبرطمه من سالم وحركاته ..وكملت باابتسامه خجوله : الله يبارك فيج ..

تحركت من عندهم وانا ابتسم .. منصور للحين مايتجرأ يمسك يدي جدام اهله .. او حتى يقول لي كلمة غزل جدام اهله .. على قولته .. مايحب حد يشاركنا هاللحظات.. مشاعرنا تكون لنا بروحنا مب جدام العالم كله .. عكس سالم ..!

محمد وعياله كانو موجودين بعد .. سلمت عليهم .. ومنيرة وميرة اصروا يوزعون وياي .. ابتسمت لهم ياحلوهم ..

طالعت ولد محمد الصغير .. ياحليلك .. مسكين .. اشلون عايش بدون امه .. بس اكيد عبير عوضته .. انا اعرف عبوور .. طيبه .. وحبوبة ..

محمد : كل سنه وانتو طيبين .. اجوفها وينها الشيطونه .؟ خطيبه ولدي ؟؟

ضحكت وانا ااشر عليها وهي تتعافر بيدين منصور: كاهي هناك مااتقر ؟؟ .. هههههه فديت بنتي .. يوسفوه بعد حاط العين عليها ..

ضحك محمد وهو يقول : اي ادري .. امس يقول لي .. اذا ماشلت فطوم عنكم .. بيبها بيتنا وولدك مايلعب وياها .. يهددني النسيب من الحين

هههههههههههههههههه

ضحكت على حركات يسوف ..اشرت لي ام منصور على يوسف وولد محمد وهم يتهاوشون من يمسك بنتي قبل ..ابتسمت بسعادة .. التفتت يمين.. جفت عبدالله اخوي وماجد وعيالهم ويا بعض .. ونسوانهم قاعدين يسولفون .. وزعت عليهم وانا اضحك على تعليق يسوفي : عمة ليش فطوم ماتعطيني انتي تعطيني؟؟

ياسللاااااااام؟

سلوى كانت توها داشه .. وجفت فيصل يغمز لها وياشر لها بخفوت على التلفون حتى محد ينتبه .. ضحكت عليهم .. الله يسعدكم .. سلوى للحين مااحملت لانها مقررة اذا صارت بااخر سنه او بعد التخرج بتحمل وفيصل راضي بس يحب يطفشها كل مرة ..

اشرت لسلوي على مكان الحريم .. وراحت لهم وهي تضحك

دخلت عذووب ويا ريلها وعيالها.. التمينا كلنا حولها نتحمد لها السلامة .. توها واصله من الامارات .. وبيستقرون فقطر .. لان علي تشافى من مرض حب لولوة .. ولان مشاريعه خلاص استقرت .. وفرعه الي فاتحهه في الاماارات .. خلاص صار جاهز لاي احد يكون موجود فيه بدل علي .. وقرر يرد لاهله وناسه ..

ابتسمت وانا اطرش مسج لروضه : مكانكم يبين .. فديت التوأم سلمي عليهم .. وعلى راس المال ابو العيال

ردت بمسج : "الله يسلمج .. خخ .. عاد احنا نجدد شهر عسلنا .. مرة ثانيه نييكم .. التوائم يننوني "

ابتسمت يوم قريت المسج .. سمعت منصور يرحب برفيجه .. حميد ..ويدخله مدخل الرياييل .. الرييايل الي كانو فالصاله دخلو الميلس عشان يفترقون الحريم عن الريايل (بما انهم من ريايل العايله فكانو في الصاله .. بس علي ريل عذووب كان قاعد بااخر الميلس للحين يستحي يوم يزورنا) ومرت حميد يات لنا الصاله .. صراااحة وايد كانت حليوووة .. احلا شي فيها عيونها كبااااااااار وناعسات من النهايه ماشاءالله .. اسمها "حمده" .. كانت مستحيه شوي .. وبيدها هديه حلوة حق بنتي الشيطونه ..ووبنتها كانت مستحيه مووت ومدعسه راسها فريل امها

طلعت برع جفت ثاني .. ابتسمت له ورحبت فيه يدخل لميلس الريايل .. للحين ماتزوج بعد مافج خطبته من خطيبته ..!! .. ابتسمت على نفسي .. كنت مراهقه .. وتعلقي فيه كان كبيييير ..

رحت متوجهه للصاله وانا امشي في الممر حسيت اني متوترة وناسيه اشيا وايدة .. بعد من ناقص حتى اتصل له واييي ؟؟ .. همممم ,,, ...؟؟

حسيت بيد تسد عيوني .. عقدت حياتي اخمن من؟ .. بس شميت ريحه عطره وقررت العب بااعصابه : من؟؟ ..

........:لارد؟

شل يده وهو يقول : ماعرفتيني ..؟؟ ..

ابتسمت وقلت بمكر : لاء ..

قال وهو يضيق عيونه : افــــــــــــا ام فاطمة زعلتيني ..!!

ابتسمت و قرصته بخفه: روح للرييايل ينتظرونك

ابتسم: اشتقت لج يالعنز .. ماتعرفين للرومانسيه انتي

ضحكت .. ومارديت .. تحركت باروح للصاله .. قال لي : حياتي؟

التفتت عليه .. قال لي وهو يأشر ع التلفون الي عند اذنه : مااكلمج انتي؟؟ .... اتكلم فالتلفون انا ..

بغيره مديت يدي اطقه بخفه ع جتوفه.. ضحك وهو يقول : فديت الي يغارون .. اكلمج انتي مب متصل لاحد

ابتسمت بدلع ومسكت ياقه ثوبه اعدله له : ادري .. واثقه

ابتسم وقرب لي : اشرايج نطنشهم؟

عضيت شفايفي وانا ارتب على جتفه وقلت بضحكه: اشرايك تروح الميلس؟

ضحك بصوت عالي وهو يقول: امرج حظرة النقيب

ابتسمت وانا اجوفه يروح للميلس واشر لي ع قلبه وعفس ويهه يعني قلبه تعبان .. ضحكت واشرت له بيالله يالله دش الميلس .. سوا لي حركه هين .. ابتسمت يوم جفته يخطي خطواته الواثقه للميلس.. راقبته بحنان .. طاحت دمعه من عيني اليسار ..تمنيتج يايمه وياي عضيت على شفايفي بحسرة .. تمنيتك يايبه تجوفني متزوجة وبنتي وياي .. سعيدة ويا ريلي .. نزلت عيوني ..مسحت دموعي .. وانا افكر بمنصور .. عمري ماطالعته الا من منظور واحد .. منظور كان خاص فيني .. كان فوق عيني غمامه .. ولولا حكمته بدايه زواجنا .. كان انهار زواجنا .. وحبنا ..!
تنهدت سمعت صوت صراخ بنتي وهي تصيح .. ابتسمت .. الحين اكيد تدورني هالدلوعه .. كله من منصور .. هو الي مدلعها وااايد .. الله لا يحرمنا منك يا عمود بيتنا !

التفتت لكم .. لين هني واكتفي بسرد حكايتي .. اتمنى انكم استفدتوا من تجربتي ولو شي قليل ..!! ..

..تمت ..

:: وراء الكواليس ::

اول شي احب اقولكم ان فكرة القصه كلها كانت على فكرتين .. وحدة وهي المرضى النفسيين وعلاجهم .. وبعض الامراض النفسيه ..اغلبيه الناس يجوفون المريض النفسي "متخلف عقليا" وهذا غير صحيح .. في فرق بين المرض النفسي والمرض العقلي .. لاتقولون هذا كان اول والحين لاء مافي احد يفكر بهالطريقه .. للاسف الواقع يخالف .. ولو تقدم ريال لاي بنت ومجرد ان عرفوا انه كان يتعالج فعيادة نفسيه فهو امر غير قابل للنقاش مرفوض رفض قاطع ليش؟ .. مينون .. الفكره الي احنا حطيناها فبالنا ومازلنا مصرين عليها غلط .. وللاسف احنا مانتعالج .. او نحاول نعالج اخطائنا .. نخليها مع الزمان لين تتأصل فينا هالفكره .. الدكتور النفسي مثل اي دكتور يعالج مرض عضوي .. على فكره الدكتور النفسي ممكن يحقق توازن متكامل فالشخص وممكن يساعدك فبعض الاستشارات بس على شان اسمه دكتور نفسي فالكل يبتعد عنه .. هالدكتور درس المجتمع وعلم الاجتماع وهو يقدر يحقق التوازن والتماثل للشخص .. مهب عيب انك تتعالج عنده ..اغلبيه الامريكان بمعدل 82% عندهم دكاترة نفسيين وهذا قلل من نسبه الانتحار في امريكا بالنسبه للسنوات السابقه .. وشي ثاني حبيت اوضحه .. وهو عند الاهل تعصب .. لهالفكرة .. اذا الولد فيه شي .. او مريض .. او مثلا صايع .. شنو الحل .. ؟؟ يتزوج ..!!! هذا اول الحلول .. وهذا خطأ .. مش دايما نحل هالامراض والعقد بالزواج .. ليش نبلش بنات الناس مع انسان لايمكن يتغير في يوم .. مثل "سالم"

والفكرة الثانيه .. الاحلام .. دايما او اغلبنا اذا احد حلم حلم مهب زين فهو يتوقع حياته مع هالشخص راح تكون مهب زينه مثل الحلم .. احب اقول ان الحلم مهب دايما يتحقق .. والاحترام بين الزوجين هو اهم عامل من عوامل نجاح الحياه الزوجيه .. ونجاح اي علاقه سواء علاقه صداقه او زماله او حتى زواج .. اذا احترم الشخص الشخص الاخر وقدر كفائته حتى لو انه شافه يغلط .. هذا شي طيب .. والنصيحه .. حبيت اوضح فكرة البنات المتزوجات .. مش كل المتزوجات وفيات .. لاحظت ان اغلبيه القصص ان الزوجه تكون وفيه لزوجها وتطيعه .. وان حتى لو كانت لها علاقات قبل الزواج مجرد ماتتزوج تقطعهم .. هذا مش فالواقع هذا من الخيال الصفات السيئه فينا ماتروح بسهوله مثل شربه الماي ..

فكرة ثانيه ياتني الا وهي كما تدين تدان .. مثل ما كان سالم يسوي فخلق الله يا ريال وخطب اخته وعاملها بنفس المعامله ..
فكرة المطلقات وبالاحرى المنبوذات في مجتمعاتنا ...هذي من الواقع .. المطلقات كانو منبوذات في مجتمعاتنا الخليجيه للاسف كانو ينظرون للفتاه بانها هي الغلط حتى ولو كانت هي الصح .. ينتظرون من البنت تكافح وتكافح وتكافح وحتى لو ماتت يبغونها تكافح في حياتها ولا انها تتطلق ؟ .. هل الطلاق عار؟؟ .. نعم هو ابغض "الـــــــــــحلال" لكنه مهب حرام .. يعني الي تتطلق تعيش منبوذه وكل تصرف تتصرفه المجتمع يبتدي يدقق فيه ..

ايضا حبيت اوضح فكره في بعض البنات مايستهويهم الا الريايل المتزوجين لان هالشي يرفع معدل انوثتهم و ثقتهم بنفسهم وشعارهم "متزوج وطاح تحت ريلي " " متزوج وقدرت عليه مابقدر على ريال عادي" يخربون بيوت .. يهدمون مستقبل الكثيرات .. وفالنهايه .. يطلبون فك الخطبه .. ليش؟ .. شالسبب؟؟ .. كنت اتسلى ...؟ .. كنت حابه اجوف لاي مدى هالمتزوج بيتعلق فيني .. ياخواتي اتقو الله .. اتقوا الله ..

و فكرة ثانيه وهي اذا حبيت من قبل مستحيل احب من يديد .. وهالفكره خطأ .. هناك هرمونات فالجسم اسمها الحب العشق الاعجاب الخ الخ.. ولكل منها دور في الحب ..مش معناته اني انعجبت فشخص ما يعني مستحيل احب من يديد؟؟ ... ومش معناته اني حبيت شخص وخانني معناته اعيش طول عمري مع هالخيانه واعذب نفسي واكبر نقطه صغيرة في حياتي واخليها اكبر من اي حدث مهم فيها اخليها محور حياتي .. الانسان يقدر بنفسه يصغر ويكبر المشكله هالشي يرجع للارادة ...اما بقيه الاحداث الي ماكانت لها وجود قوي فكانت هي مشاكل حياتيه يوميه ماحبيت اتعمق فيها اكثر تجنبا للملل ..

وبعد احب اوضح ايضا ان ابطالي ابدا ابدا ماانوصفوا بالكمال .. بالعكس كانت فيهم الكثير والكثير من العيوب .. ولكن يظهر لانكم حبيتوا الشخصيات وايد فتغاضيتوا عن غبائهم وعيوبهم الكبيرة .. الكثير كان يسأل ليش سارة وهي بطله القصه ما كانت بجمال لولوة ذات الجمال االاسطوري .. الي عشقها منصور؟؟ .. احب اوضح ان الجمال متفاوت .. وكل جميل وفيه الاجمل منه .. وليش مريم وعلى الرغم من جمالها الاسطوري ماحبها سالم كثر ماحب حياه الي جمالها كان معتدل ؟؟ .. احب اقول ان الشخص ممكن يجذبنا بشكله الجميل والحلو .. بس بالنهايه الجمال زائل .. ممكن بأي لحظة طيش او اي لحظه يزول هالجمال .. وغير هذا .. الجمال الظاهري يكون له طابع خاص فالنفس ولكن الجمال المعنوي او تأثير الشخص من تصرفاته يكون له الاثر الاكبر والاعمق على الانسان

هم بعد كنت ابغي اتكلم عن حكمنا للاشخاص الثانين .. ساعات نحكم عليهم غلط .. او ناخذ منهم موقف بسبة موقف معين وبعدين بعد هالموقف يتغير فكرنا نهائيا عنهم وفكرتنا تختلف تماما عنهم حتى ان بعدها مانقدر نفرق بين حسناتهم وومميزاتهم وهذا الي صار ويا بطلتنا سارة

نروح للشخصيات .. احب اقول لكم ان عايله منصور هي محور القصه ككل .. منصور .. سالم .. سلوى ... هم الابطال الاساسين الي رسمت لهم القصه .. وسارة طبعا..لولوة وعلي ... هم اساس القصه اما بقيه الشخصيات فكانت مكمله لتوابع عايله منصور ..

كل الشخصيات كانت مكمله لابطالي السته الرئيسين.. النهايه كنت بحطها حزينة على عنوان القصه بس بما ان القصه كانت فيها وايد احزان .. فحبيت احطها نهايه حلوة .. خصوصا انها قصه يعني فيها من الخيال .. ولاني ماتعمقت وايد فالخيال .. فحبيت اخلي النهايه تكون سعيدة ..@<ليحين ودكم تذبحوني ؟؟ خخ

فالنهايه .. اتمنى ماتعمقت وايد فالحزن .. ولا تعمقت وايد فالفرح .. لمحات الرومانسيه اتوقع انها ماتعدت حدود الادب ..اتمنى القصه كانت متوازنه في جميع النواحي ماتعمقت فشي ونسيت الاخر .. واتمنى ان القصه ككل نالت اعجابكم .. ومشاعر الابطال .. شخصيا عشت بعض منها .. فشاركتني بعض مشاعري .. وبعض الامي .. اتمنى وصلت لكم فكره صغيره ولو صغيره وايد عن الافكار الي كانت تراودني .. وبالنسبه لمشاعر ابطالي "الريايل" .. اسمحو لي لو كانت شوي جامده .. او غامضه .. فهي بالنسبه لي ولكم عزيزاتي غموض لا يحل ! ..

واخيرا .. حبيت اقول لكم .. حبيت اكون بسيطة في اسلوبي .. حتى يوصل لكم .. وماحبيت ابالغ في اسلوبي وسردي .. ولا حبيت اتكلف فالاسلوب .. حبيت ابطالي يكونون بسطاء .. " الكثير سأل ليش ماكنت اهتم في امور كشخة الابطال .." لكني حبيت يوصلون لكم مثل مااهم ببساطة بدون اي نوع من الحلي والزينه ..

اتمنى عجبتكم وردتي الصغيرة ..::]][[ دفنت روحي بالثرى معاك يا ولد عمي ]][[::..
واتمنى اني ماطولت عليكم ..