منتديات بنوته - عرض مشاركة واحدة

09-28-2010, 08:02 AM

(اسامح مين ولا مين؟؟ .. اسامح قلبك القاسي؟ ولا عيونك الحلوين؟؟ )

"سلوى"

:سالم .. انا مب صغيرة .. وهذي حياتي .. انا ماطلبت شي صعب .. انا بس ابي اسمع الي قاله لي فيصل صحيح ؟؟

حسيت صوته ارتبك : شقال لج فيصل؟؟ ..

فتحت عيوني مصدومة ..يعني فعلا سالم مسوي شي لفيصل .. ولا ماكان ارتبك .. حسيت بألم يطغي جوفي وقلت بصوت مخنوق : سالم بتقول وبتبري نفسك ولا اصدق كلام فيصل ؟؟ ..

قال سالم باانفعال : يعني تتوقعين اني بدمر حياة بنت عفيفه؟؟ .. هو اصلا مايعرف يختار .. البنت الي حبها بالصدفه كانت رفيجتي .. ايام ماكنت بالثانويه .. سلوى لا تصدقينه ترى انا بس طلعت معاها ورب البيت اني مارقدت وياها .. مارقدت وياها .. يعني مااراح انتهك شرفها يا سلوى .. البنت صايعه .. وكانت مب .. مب بنت ..!! .. وقالت لريلج اني انا الي ... سكت .. ورد قال باانفعال .. سلوى .. صدقيني مشاعل اوصخ بنت مرت علي .. صدقيني انا ماكنت اعرف انها حبيبة فيصل .. هي فرقتنا يا سلوى والله اني مادري انها حبيبته .. ولا ادري انه خاطبها اصلا .. سلوى ..الو .. الو ..

صحت بعمق وقلت بصدق : طحتوا من عيني .. وربي طحت من عيني يا سالم ..

صكرت من عند سالم وانا اصيح واربط القصه .. فيصل كان خاطب .. والبنت الي خطبها كانت صايعه .. وكانت مب شريفه .. وطلعت ويا سالم .. وعشان ترقع السالفه .. قالت لفيصل ان سالم رفيجه العزيز هو الي انتهك شرفها .. غطيت حلجي وصحت صياح قوي .. وفيصل يعتقد ان سالم هو الي انتهك شرف خطيبته .. عشان جذي يبي ينتقم من سالم .. ماينلام .. ماينلام .. سالم .. سالم .. دمرت حياتك وحياتي .. دمرت صداقتك .. ودمرت مستقبلي .. صحت بلوعه .. وحسيت قلبي يتقطع مع كل شهقه .. حسيت نفسي خلاص مب قادره اخذ نفسي ..

رن اليتلفون .. وطنشته .. سمعت رنينه يرن بااصرار .. وطنشت .. وبعدها بربع ساعه بالضبط رن الجرس .. غريبه فيصل عنده مفتاح الشقه ليش مادخل .. يكون ضيع المفتاح؟؟ ..

طلعت من غرفتي .. ورحت الحمام غسلت ويهي ع السريع .. وكان محمر .. وشفايفي محمره وحتى اذني محمرة من الصياااح .. ضغطت على ويهي بالماي البااارد .. مسحت ويهي .. وتوجهت للباب .. فتحته.. واول مافتحته انصدمت بالبوسه الي ياتني

وقفت مسبهه والي باستني اصلا وقفت بعد مسبهه ..بحلقت عيوني فيها .. هاي اشلون تبوس جي .. لو مثلا فيصل الي فتح لها الباب ..!! فتحت عيوني تخيلت لو هالشي يصير .. صج جريييئه .. مسحت خدي بقرف ..

قالت لي : انتي ميييييين؟؟!!

عقدت حياتي .. وقلت بربكه : انتي الي من؟؟ ..

رفعت حياتها وهي تطالع رقم الشقه : شو هيدي منا شئه فيصال؟؟ .. ( شنو هاي مب شقه فيصل؟)

عقدت حياتي وقلت .. : امبلا شقته .. بس انتي من واشتبين؟؟

طالعتني بغضب : انتي الي شو بتعملي هون الشئه.. هايدي الشئه شراكيه بينا نحنا الاتنين .. شو كيف بيسمح لنفسو بيخليكي تتشاركي معو الشئا ؟

عقدت حياتي وانا افكر بقرف .. يعني بوستها كانت مقصوده .. هه .. راعي الشرف .. يعني يعصب على سالم ليش رافج خطيبته .. وهالحبيبه شتسوي وياه فالشقه .. حسيت بقرف اتجاه فيصل .. واتجاه هالمخلوقه .. الغبيه ..

: انتي من؟؟ ..

رفعت خشمها بغرور : انا ماريا .. رفيئتو لفيصال وشريكتو بالشئا.. وانتي حضرتك مين بتكوني؟؟

: انا مرته ..

طاحت شنطتها .. وقالت بصدمة : شوووووووووووووووووووووووووووووووووووووووو فيصال اتجواااز؟؟

رفعت حياتي .. وعقدت يديني يدام صدري وقلت بغضب : اي تزوج .. ولو سمحتي دوري لج شقه غير هالشقه ..

صكرت فويهها الباب .. تسندت ع الباب .. حسيت نفسي قليله ادب اشلون صكرت فويها .. بس احسن تستاهل .. قعدت عند الباب وصحت .. شهالمصايب الي تنحذف فوق راسي .. اول شي سالم .. والحين فيصل ... والخبله هذي شكلها بايعتها والله يعين شصار بعد منك يا فيصل ..

غطيت ويهي وصحت وصحت وصحت .. لين ماحسيت نفسي تعبانه .. تحركت من الممر .. ورحت لغرفتي .. طحت ع السرير اكمل صياحي .. تذكرت ان باجر علي امتحان اخر محاظرة .. ولازم ادرس له .. رحت للحمام برع الغرفه وغسلت ويهي ونشفته .. طلعت من الحمام وانا للحين اشاهق بسبة صياحي .. قعدت السرير .. وابتديت اراجع .. وبين فترة والثانيه اتذكر الي صار لي فهالفترة وارد اصيح .. سارة اتصلت فيني كذا مرة .. وريم نفس الشي .. خلصت من 3 محاظرات وبقت لي محاظرتين .. درستهم امس .. فتحت الملخصات الي تشاركنا انا وسارة وسويناهم .. اتصلت فسارة .. وكانت تبي تجوف انا لوين وصلت .. بس يوم كلمت ريم كنت راح اصيح لاني اعتبر ريم الاقرب لي .. وخصوصا انها تفهمني وانها كبيرة وممكن تنصحني .. بس شقول لها.. استحي اقول لها عن سواد ويه اخوي وريلي ..!! ..

تكلمت وياهم شوي .. ورديت ادرس .. خلصت الملخصات وخلصت الدروس .. فتحت اخر درس عشان اقراه لاني احس اني مب مستوعبه شي خصوصا ان كل شي بالانجليزي الدروس كلها انا مترجمتها عشان افهمها وبعدين احفظها بس اخر درس كنت للحين ماترجمته ودرسته بدون لا اترجمه عشان جي احس اني مب فاهمه السالفه عدل ..

انفتح باب غرفتي بقوة.. وانصدمت فـ فيصل واقف وعيونه حمر من العصبيه وصرخ علي : انتي شلون تسمحين لنفسج تدخلين وتطردين على كيفج ؟؟ انتي من فاكرة روحج؟؟ .. ولا يكون عبالج قاعدة فبيتج انتي ؟؟ .. تراج ضيفه .. وضيفه ثقيله بعد ..

رجفت من الخوف .. وارتبكت .. يكون هذي ماريا مادري شسمها اتصلت فيه وتشكت له .. جفته يقرب مني رجعت لورا وهو قرب مني اكثر وشد شعري : سمعي يا سلوووه .. هذي اخر مرة تتدخلين فشي مايخصج سامعه؟؟ ..

ابتديت اصيح وانا اقول له : هد شعري .. يالحقير .. هد شعري .. اصلا انته لو ريال مارضيت تسكن ويا بنت

عصب فيصل وصرخ : وشوووو ؟؟ .. اشقلتي يالخايسه؟؟ .. اصلا زين مني مستحملج لا بارك الله فيج ولا في اخوج ولا فالساعه الي عرفتكم وناسبتكم فيها

صرخت فيه بقوه : اطلللللللع برع .. اطلع من غرفتي .. صحت زيادة .. وير شعري زيادة له ..

كان مصكر على اسنانه وقال بقوه : شتقولين؟؟ ولج ويه تتحجين بعد تتحجين ولج ويه؟؟ ..

صحت زياده وانا احاول احرر يده من شعري : وخر عني .. وخر اصلا انته مو ريال .. لو انت ريال جان مامديت يدك على مرة .. ااااااي "المني ير شعري بدفاشه اكثر واكثر " مب رياااااااااال .. " تذكرت كلام ريم انه ممكن انه شاذ او مريض " مب ريااااااااااااااااااااااال

دز راسي بالقو على المخده وضربت راسي ع الخشب متألمه .. فتحت عيني وانا اجوفه يفصخ قميصه وايرني بالقو : انا اعلمج منهو الريال الحين ...

.........................

" حميد "

نزلت تحت وتنحنحت عشان لو لولوة قاعده تلبس شيلتها .. دخلت .. جفت لولوة .. قاعده عند امي وثنينتهم يتقهوون .. ماشاااااءالله عليييييها هالبنت خطييرة .. جميييله جميييله عمري ماجفت وحده بجمالها .. وشكلها اخلاااق بعد .. صراحه انعجبت فيها .. فجمالها .. واخلاقها .. من يوم يات عندنا وماجفت منها شي غلط .. او عمرها ماطلبت تروح مكان .. مسكينه هالبنت .. اشلون اهلها ضيعوها فالمطار ولان بيتنا قريب من منطقه المطار مشت ومشت لين وصلت بيتنا .. وخصوصا لانه باب بيتنا على طول مفتوح .. دخلت .. ياقسوه اهلها اشلون للحين مابلغو عنها؟؟ .. مسكينه ..

كانت عفاري هي الثانيه قاعده وياهم وتتقهوى .. سمعت حس امي : ابويه حميد تعال تقهوى

نزلت عيوني : لا اميه وراي شغل .. يالله فداعة الله ..

تحركت للباب .. وسمعت صوت لولوة تناديني .. حسيت قلبي يدق .. والتفت لها : هلا .. هلا لولوة ...!

طالعتني ورمشت ببراءة .. سحرتني ..: سوري بس مشغول؟؟ ..

طالعتها وحسيت اني تنحت .. تنحنحت اخفي ارتباكي :/ هلا امري ..!؟

مسكت طرف شيلتها ولعبت فيه ابتسمت على حركتها وهي تطالع تحت .. سبحان الله الي خلق هالجمال كله .. نزلت عيوني بسرعه .. قبل تنبته علي .. : مايامر عليك عدو ... بس .. بس .. بتبلغ ع وجودي عندكم؟؟ ...

طالعتها وقلت بشهامه : اكيد هلج يدورون عليج يا لولوة .. واكيد تعبو وهم يدورون عليج ..

رفعت عيونها وكانت غرقانه دموع .. سكت .. وقلت لها بهدوء واستغراب : ليش انتي ماتبين تروحين لهم؟؟ ..

قالت بسرعه : امبلا .. بس .. اقصد يعني .. انا حبيتكم .. ومابي افارقكم ..

ابتسمت وحسيت بااحراج طفيف : الله يسلمج .. بنتزاور انشالله ..!! .. عن اذنج تأخرت ...

التفت بروح .. نادتني بصوتها الي يدوخ : حمييد ..

التفت لها .. يالبيه .. بدون ماارد ..

ابتسمت وهي تمسك الباب : فداعه الله .. رمشت بهدوء ..

" الله عطاك عيون خدر"ن" ونعاس
تذبح عشاشيق الهوى ماتبالي

ورموش عينك كنها صف حراس
من ناظرك صارت يمينه شمالي "

طلعت وانا احس قلبي ينتفض .. وانا طالع جفت حمده وبنت اخوها ياسمين .. الي صارت تلبس شيله بس خصل شعرها ساعات تطلع .. حسيت بااحراج من نفسي .. اشلون اطالع غير حمده .. وهي الحين زوجتي ..

ابتسمت من قلبي وانا اجوفها مبتسمه وتكلم ياسمين مب منتبهه : هلا حمده

طالعتني بصدمة .. واحمرت خدودها وعيونها الكبار الناعسات زايدين حلا بخطه الكحل : هـ هـلا حميد ..

التفت لياسمين : شحالج ياسمين ؟؟ ..

ياسمين : بهير .. انته شهالك؟؟

ابتسمت : بخير ربي يسلمج ..

ياسمين طالعتنا بااحراج .. : عن اذنكم
تحركت ياسمين ودخلت البيت .. جفت حمدوووه .. يالله اشتقت لها يا نااااس .. فديتها وفديت مستحاها ياربي .. من اسبوعين ماجفت حمدوووه وحشتنني .. ومن اربع ايام مااتصلت لها .. تقريبا من يوم يات لعندنا لولوة ..

ابتسمت بوسعه واحس دقات قلبي تزيد وتزيد : شحالج حمدة ؟؟ ..

نزلت عيونها بمستحى .. بخير ربي يسلمك .. وانته شحالك ..!؟

ابتسمت : بخييييييير دامج بخييييييير يالغلا ..

نزلت راسها مبتسمه .. قلت محاول احراجها : شو حمدوه ..طولت سالفة الملجة .. متى بنتزوج ؟! ..

طالعتني ونزلت عيونها : ع كيفك .. بس شاور محمد .. لانه غيث مثل ماانت عارف راح يعتمر ..

ابتسمت : ايه ادري .. والفضل طبعا يرد لج ..

ابتسمت بخفه : الحمدلله ..

طالعتها وقلت بصدق : كأنج ضعفانه حمدوه ..

رفعت عيونها لي : اي لان تعبنا فالعمرة .. تدري اخر ايام رمضان زحمه فمكه .. وجي يعني ..

ابتسمت :اخ شو رايج اطنش الشغل ونقعد فالميلس .. تراني مشتاق لج .. من زمان مب جايفج .. واجوفج سافرتي ويا اخوج .. وعياله ونسيتي حميد .. ورديتي ويا عيال اخوج وبعد ناسيتني ...

ابتسمت هي .. وقالت بااحراج : حميييييييد

ضحكت وانا ااشر لها : بينا تلفون .. يالله عيل .. بروح ماتمرين بحايه حبيبي!!

هزيت راسها .. بخجل : الله يحفظك ويرعاك ..

ابتسمت وحسيت نفسي متشقق .. من اجوفها انسى الدنيا .. وسمعت رنت جوالي للمرة العشرين وكان خليفه الي تخيس عند الباب : خلوف بيذبحني .. يالله فمان الله

حمدوه ببسمه: فمان الكريم

رحت لخلوف وانا افكر فحمدوووه يااااناااااس احبها.. عيل ليش احس بمشاعر ثانيه لـ لولوة؟؟ .. معقوله القلب يقدر يحب مرتين بنفس الوقت؟؟ .: خلوف؟؟ ..

خليفه وهو يتحرطم : شتبي بعد ؟؟ مب كفايه منقعني ربع ساعه فالجو الثلجي ؟

ضحكت : اسفه حقك علي راسي من فوق .. بس اتعرف الحرمه هني .. وسلمت عليها ..

ضحك خليفه : هيييه دام جي ماتنلام

قلت : خلوف يصير تحب مرتين بنفس الوقت؟؟

وقف خلوف عن السواقه : شهالسؤال الغريب؟؟ .. رد يسوق .. طبعا مايستوي .. جي قلبك فندق ؟؟ ..

ضحكت على تعليقه .. وقلت فنفسي اعجاب ناحيه لولوة لا اكثر ولا القلب من زمااااااااااااااااان لحمده

................

"لولوة "

جفتها بحقد .. هذي اشتبي بـ حميد ؟؟ .. اصلا واضح وباين انه ميت فيني .. ويحبني .. ليش هاللزقه واقفه تسولف وياه .. وحتى جدام بنت اخوها وقفت وسولفت وياه .. وهو يقول لي مستعيل وراه شغل مااجوفه استعيل وهو يكلم بنت عمه .. اوفف ماادانيها من يوم جفتها وانا ماحبيتها ...

دخلت حمدوه .. طبعا انا طليت عليهم من الدريشه وجفتهم واقفين وحمدوه شاقه الحلج اما حميد فماكان يبين كان ماعطني ظهره ومتوجه للباب .. انقهرت .. وقررت احرج حمدوه .. عشان ابين لهم انها مب زينه .. وتبتعد عن حميد .. بس لولوة .. حتى لو ابتعدت عن حميد .. انتي متزوجة الحين غانم ؟؟! .. شو يعني .. بتطلق منه وباخذ حميد .. حميد شكله ريال والنعم .. ويعتمد عليه .. مب غانم .. وعععععععع .. واذا توثق حب حميد لي .. بيسهل علي اتطلق وانا متطمنه .. ومابخبرهم اني تطلقت مرتين مرة وتكفي .!

سلمت حمدوه وقعدت بخجل بين عفاري وشموه .. خوات حميد .. قلت بمكر : الا حمده تأخرتي برع ..!!

طالعتني حمده مصدومة وقالت بااحراج : هيييه .. تأخرت وايد ؟؟

هذا مب موضوعنا .. اشلون احرجها وابين انها سولفت ويا حميد .. : اشوي .. اكيد كنتي تشوفين الزراعه انا عجبتني وااايد ... خصوصا الفل الي زارعهم حمييد ..

رمشت بعيوني وجفتها بمكر .. اما هي انحرجت واحمر ويها : لا ماكنت اشوف الزراعه

قاطعتها بسرعه استغل الموقف : عيل شنو الي اخرج ..!

طالعتني مستغربه من تحقيقي وحسيت ام حميد تضايقت .. وانا اهم شي عندي اقردن ام حميد : سوري لا تعتبرينه تدخل .. ماقصدت بس سؤال عابر يعني ..

ابتسمت حمدوه بااحراج طفيف : لا عادي مافيها شي .. كنت اتكلم ويا حميد ..!! ...

رفعت حواجبي وانا اطالع ويه ام حميد الي كان هادي ومايبين انها عصبت لانها كلمت ولدها : اها ...

ضحكت عفاري وقالت / شو حمدوه مواعيد ومراسيل غرام ها .. هههههه

طالعتها بنص عين اوفف يا شينها لا تفلسفت .. اما حمدوه ويها استوى احمررر ..

كملت عفاري بغشمره وهي تكلمني : شوفي لولوة ..تراها حرم اخوي العزيز هالله الله فيها

طاح الفنيال من ايدي وقلت بصدمه : شنوووووووو ؟!!!

................

" حمده "

طالعتها مستغربه .. اشفيها هاي فاتحه لي تحقيق .. تضايقت من وجودها فبيت عمي .. خصوصا وانها جميييييله وفاتنه لابعد حد اذا انا الي بنت تسبهت وانا اجوفها .. اشلون بـ ريال عمره ماتزوج او رفع عينه فالبنات ..!! .. لاحظت انها تميل لحميد وهالشي اشعل غيرتي نيرااان .. انا خسرت فمعركة وحدة والشاطر يكسب المعركة الاخيرة .. ماراح اخسرك ياحميد ماراح اخسرك ..

طالعت لولوة بتحدي .. وقالت عفاري : شوفي لولوة تراها حرم اخوي العزيز هالله الله فيها

طاح الفنيال .. وصرخت متألمه آآآآآآه .. كانت تصب قهوه وعطتني الفنيال .. ويوم تكلمت عفاري .. طاح الفنيال على ريلي .. مع كلمتها بصدمة : شنووووو ..

حسيت بحرقان في ريلي .. وياسمين .. عصبت .. وركضت تيب لي ثلج .. وغسلو ريلي وحطو عليها مرهم .. وثلج .. لولوة شكلها تضايقت .. واعتذرت بس كان اعتذارها عابر .. وراحت غرفتها بسرعه ..

عقدت حياتي : اشفيها؟؟ ..

عفاري بااستغراب : مادري ؟؟ .. مساعه اشزينها تسولف وتضحك ؟؟ ..

رفعت حياتي : اها ..

طالعت ياسمين وهي تحرك شعرها وحك فروة راسها وتتأفف .. تذكرت .. موقف صار لنا يوم رحنا المول .. كانت ياسمين ظاهره من محل مكياج .. وانا وياها.. طبعا انا كنت لابسه الباس محتشم وشعري مب باين منه شعره .. اما ياسمين فكانت الشيله ع الجتف ..

رحت اشتري ايسكريم .. ويوم رجعت شفت ياسمين تصرخ .. وريال ماسك شعرها .. وخصوصا ان المول فاضي ومافي حد لانه رحنا الصبح .. الصبح من وهل والمول كان فاااااضي من قلب ..

ياسمين : انته شو مشكلتك؟؟ ليش يمسك my hear ابعد ايدك احسن لك

الريال : شو؟؟ ..

ياسمين بعصبيه : ليش اتجوفني جذي؟؟ ..

الريال : يعني اونج محترمه ؟؟!! مع لباسج ها؟؟

ياسمين بعصبيه : هي مهترمه

ضحك بسخريه : محترمه وشعرج كله ظاهر .. ياااه لو انتي محترمه شو خليتي للبنات الزباله

رفعت ياسمين يدها ومسكها بقوة : اخر مرة ترفعين ايدج ... يا ... هه .. يا محترمه ...

كنت واقفه ومصدومة من الموقف .. راح الريال وظلت ياسمين تطالعني وبعدين ركضت لعندي وقعدت تصيييح .. وقالت لي انها تبي ترد البيت ... ومن بعدها تغيرت ياسمين .. حتى ان غيث تغير .. من تأثيري وبالاخص من تأثير ياسمين .. لانه يموت فشي اسمه ياسمين .. ولها تأثير قوي ..عليه .. الحمدلله .. الحمدللله ..