وصعدت فوق .. جفت شوق قاعده فمكانها وعيونها شوي وتطيح .. اول ماجافتني وقفت وفجت حلجها رفعت يدي بمعنى بس .. ودخلت المكتب .. تذكرت اني كنت طالع من المكتب بسألها عن شي .. وجفت مريم وانصدمت وصارت هالسالفه طلعت من المكتب برد اسألها .. ولا اسمعها تقول : بس مريووم بس فديتج ..
كانت ماعطتني ظهرها .. وحاطة يد ع خصرها ويد فيها التلفون : انزين سمعي .. انا بعد جي نص ساعه ساعه بالكثير وبكون عندج وبنتكلم اوكي ؟؟ ..
.. تنهدت : يامريييييم هدي اعصابج ..! انزين شسوى لج؟؟ .. مالحق عليج؟!اها.. اي عقب ماانتي نزلتي هو نزل .. ورد صعد .. اشوا يابنت الحلال مالحق عليج حسيته معـ "قطعت كلمتها شكلها مريم قاطعتها " ... اوكي اوكي .. خلاص .. ع الوعد .. اوكيك .. سلمي ع حبيبج ههههههه يالله باي .!
حبيبج ؟؟ .. رفعت حاجب واحد بغيض .. مخطوبه؟؟ متزوجة؟؟ .. حسيت بالقهر يتصاعد فداخلي.. التفتت تبي تروح مكتبها .. وانصدمت وقفت يدها فالهوا وبعدين ع طول نزلتها ورفعتها من يديد ترتب شيلتها ..
:استاذ انـ
قلت مقاطع لها : لو سمحتي انسه شوق .. طلعي لي الفواتير القديمه واليديده .. وتعالي المكتب قبل لا تطلعين ..!!!
دخلت المكتب وصكرت الباب .. قعدت ع الكرسي وانا احس اني راكض اشواط .. بتتزوج ؟؟ معقوله .. افتريت بالكرسي نص التفاته .. وانا ؟؟؟ ....
.........................
"سارة "
حسيت بااحد يقعدني من الرقاد .. بس انا فعلا مب قادره افتح عيوني .. تقلبت للجهة الثانيه .. حسيت بشي تحت يدي خشن .. مررت يدي عليه اكثر .. وبعدها سحبت يدي ورديت انقلبت للجهة الثانيه .. ليحين احس بحركة حواليني ..بس مب فاضيه افتح عيوني .. قلت بهمس منزعجه من الحركه: اوووووه .. ابي ارقد ..
صكرت عيوني اقوى وانا عاقدة حياتي .. شوي شوي رديت انام .. وبعد فترة بعد حسيت بنفس الحركه .. فتحت عيوني معصبه .. طالعت هالشي مب مستوعبه .. ومن استوعبت .. شهقت ... وابتعدت بسرعه منحرجة من شكلي .. يالله فضييييييييييييييييييييييييييييييييييييييييحه ..
منصور كان راقد .. وانا .. كنت .. آآآآ ... ممم .. كح كح .. كنت داعسه راسي فشعره .. فشيييييييله وقسم بالله .. حكيت يبهتي منحرجة وحكيت خشمي .. وطرف رقبتي .. ياربي فشله .. اشوه انه راقد .. قمت من الفراش .. وانا رايحة للحمام تعثرت بفانيله منصور .. شكله فلعها وهو راقد... حسيت ويهي يطبخ من الاحراج من تذكرت اشلون انا كنت راقده ..
دشيت الحمام .. تسبحت .. وانعادت علي ذكريات زواجي اول الايام الي قضيناها في الشاليهات .. عقدت حياتي افكر ..
طلعت من الحمام على اطراف اصابعي .. ومشيت بسرعه للتسريحه .. خذت عطر وكريم ومزيل الرائحه .. وانا اتلفت جني حراميه .. وركضت بسرعه للحمام .. وبعدين فتحت الباب .. وطليت .. جفت منصور على حالته .. مشيت مرة ثانيه على اطراف اصابيعي وانا ارد اغراضي للشنطة ونص للتسريحه .. نقزت من سمعت حس .. وكان منصور يتثاوب .. ارتبكت .. وتذكرت نومتنا .. اشلون الصبح اول ماوصلنا مارضيت ارقد وياه بنفس الشاليه .. وقلت له ان خاطري ارقد عند امي والبنات .. ومسكين ماعارض ولا قال شي .. بس قال لي اوكي .. بس لازم تمرين ع شاليهنا مايصير كله ويا البنات .. بس امي الله يهديها مارضت ارقد ويا البنيات حلفت علي ارقد فشاليهنا وعاد انا .. برقد بس اليوم هني وباجر برقد عند البنات ..
رتبت قميصي وانا اتأكد من فتحه القميص .. وارفع البدي شوي ..طالعته من المنظرة .. جفته يطالعني وهو حاط يد تحت رقبته ويد ثانيه على عينه .. رفع يده عن عينه .. وقال لي : صباح الخير ..
ارد ولا ماارد؟؟ .. ليش ماتردين هو ماله خص اذا امج لزمت عليج اتين ترقدين هني .. يعني ارد؟؟ ... ممم .. : صباح .. النور ..!
تلحف زياده حتى مابقى الا ويهه : متى قمتي؟؟...
رفعت عيوني للسقف وانا افكر : ممممم تقريبا من ساعه ..!!
..: تعالي ...!!
هــــــــا ؟؟؟ .. وين اييي .. سويت نفسي ماسمعت .. ومسكت شيلتي تعطرت .. ولبست عبايتي ويت باطلع : تعالي ..!!
اشيبي ذي اوففف .. رحت وقفت مجابله السرير : ها ..
قال بعصبيه : وصماه .. حد يقول لريله ها؟؟
عقدت حياتي : عيل اتقول لي وصماه؟؟ .. انا؟؟ ..
قعد بعد ماكان منبطح : اي انتي اقول لج وصماه .. زين؟؟ .. شبتسوين يعني؟؟ ..
التفت يمين يسار .. : انا بقول لك شـ بسوي يعني .. " استقرت عيني على فانيلته الي ع الارض وابتسمت بخبث وقربت لعنده دنعت ومسكت الفانيله .. جفته يطالعني مستغرب ومتنح .. وقفت عند راسه .. ودزيته ع السرير .. ومسكت الفانيه ويت لفيتها ع ويهه " منصور مرتب وااايد عمره مافلع شي ع الارض بااستثناء فانيلته يوم يرقد .. او قميص البجاما .. يكون لابسه قبل لايدش السرير .. وعقب مايدش السرير يتم يتقلب لين مايفصخها عشان يرقد .. حفظت هالاسطوانه
مسكت المخدات وقعدت افلعه .. اما هو فكان يضحك وصوته مب واضح لاني لافه ويهه: انتي ياخبله وخري ..وخري عني ..
ضحكت : مب انت الي تقول لي وصماه انزين؟؟ .. فرصته فااذنه : اييييي يالوحش وخري.. سوييير وعمى شيلي يدج ..
انا مت من الضحك عليه كنت مغطيه ويهه بفانيلته .. ومدخله يدي وفاره اذنه بالقووو ولا راضيه افج اذنه ... مسكني بيده الثاني الي مب متكي عليها .. وحاول يرفع يدي وانا ارص ع اذنه : يالدبه .. حسبي الله على ابليسج من بنت .. حشى مب ادميه شيطانه .. وخري يدج ..
ضحكت وقلت : مب موخرتها شبتسوي ..
كان طايح ع يد وحدة ومايقدر يحرك الثانيه .. وانا ماسكته بحيث مايقدر يتحرك ويدي الثانيه تقرص اذونه ..
حرك يده مرة وحدة ومسك يدي وسحبني .. حتى طحت وياه ع السرير .. وانقلبت الايه .. فتح الفانيله من ويهه .. وكان ويهه مستوي احمــــــر احمر .. واذنه الي فرصتها كانت صايرة جمر .. كانت حاااره .. وحمررره حسيت الدم تيمع كله فيها ..
عض على شفايفه : انا يالمعصقله جي تسوين فيني ؟؟ ..
كنت ميته من الضحك : لاخلاص .. ههههههه توبه ..
كان يدغدغني وانا ميتة من الضحك واتحرك يمين يساار .. قرب ويهه مني : اعتذري يالله
ضحكت وانا احرك راسي بـ لا ..
ثبت ويهي بيده : يالله اعتذري لا اصيحج
:ههههههه ماتقدر .. هههه خلاااص .. هههه
رد يدلدغني .. وانا ميتة من الضحك .. حاولت ابعد يدينه عني بس ماكنت اقدر احرك شي لاني كنت اضحك ومب قادرة اتحكم فااعصاب يدي .. دق راسه براسي بتعمد .. : مابتعتذرين ؟؟
ضحكت وانا اقول : توء توء
رن تيلفونه .. وابتعد عني راح يشيله .. وانا انتبهت ع وضعنا ... وتحركت بسرعه من السرير .. اشرلي اصبر .. بس تجاهلته وطلعت بسرعه .. احس جسمي يرجف رجف مب طبيعي ..
مسكت خدودي .. وانا منحرررجة مووت ..
رحت لشاليه امي ..لان هناك الريوق .. الحين الساعه 9 ونص .. الصبح .. رحت لشاليهم الي مايبعد عن شاليهنا الا كم متر .. دخلت سلمت ع الكل .. ورحت قعدت عند امي .. بست راسها .. اشتاق لهاالانسانه شوق مب طبيعي .. احبها ياناااس .. فديت امي والله ..
امي : سارة يمه وين ريلج؟؟
توهقت وحسيت مرة ثانيه ويهي اشتعل ضو : ها ؟؟ .. اي اي فالشاليه ..
عقدت امي حياتها : وليش مايه وياج راقد؟؟
قلت بسرعه: لالا .. قايم .. آآآ راح يتسبح .. لمعت عيوني .. اييي راح يتسبح ..
خزتني امي : ساروة .. اعرفج انا شمسويه؟؟ ليش هاده ريلج ويايه بدونه؟؟
حسيت امي كاشفتني .. وجفت غدور يايه مطنقره وقعدت بكل دفاشه صوبي .. جان استغل الفرصه : حيالله غدييييييير ..
غدور طالعتني بنص عين : اشطاري عليج؟ اشتبين قولي؟؟
ضحكت : بال بال شالنفسيه الخايسه هي هييييييي تحجي عدل وياي ..
طالعتني بطرف عينها : عشتاو مرت ولد السفير تحجت
ضحكت : بال سالفه قولي بنت اخوه وخلاص ..
طالعتني بطرف عينها : اقول اكلي تبن ..
عصبت : انجبي .. انتي الي تاكلينه ..
سكتت غدور وطنشت .. اما انا فكنت معصبه .. التفت لامي .. اشرت لي .. شصاير؟؟ ... هزيت جتوفي وسكت .. شكل امي ماريحني .. كان فيها شي بس ماتبي تبين .. عيونها تعبانه .. رحت قعدت عندها : يمه اشفيج؟؟
طالعتني : مافيني شي يمه .. اتصلي لريلج تأخر ..
قلت بااحراج : انزين .. مسكت التلفون ومثلت اني اتصل له .. وصكرت ..فشيله اتصل .. بعد .... اممم يوعانه .. مسكت بطني ..
شميت ريحه كريهه .. وهي ريحه البيض .. غريبه اموت ع البيض انا ؟؟ .. مسكت طرف خشمي .. اوففف ريحه خااايسه ..
حسيت بطني يقلب .. تحركت بخفه .. ورحت غرفه من الغرف .. رحت الحمام ... وافرغت كل الي فبطني .. حسيت بلعومي يحترق .. شربت شوي ماي عقب ماتمضمت .. مسحت ويهي .. وانسدحت ع السرير بخفه .. احس بتركب علي اصخونه ..
صكرت عيوني بتعب .. وقمت وانا احس بوهن .. تحركت من على السرير وانا مستغربه هاي غرفه من؟؟ .. رحت الحمام غسلت ويهي وعدلت شيلتي .. مع اني حسيتها تخنقني ..
طلعت برع الغرفه جفت الكل متيمع ع السفره واول مادخلت كان منصور توه يدخل .. سلم .. وقعد على طرف .. كنت احس نفسي دايخه ...
قعدت عند غدور بتعب : اشفيج ساروة؟؟
طالعتها معصبه منها ومالي بارض لها : مافيني شي ؟؟ ..
غدور وهي تدقق في ويهي : لا صج اشفيج شكلج مارقدتي عدل؟؟
هزيت راسي بـ اي .. وسكتت هي .. وسكت انا ..
الكل قام يتريق .. وانا على الرغم من يوعي بس احس مب قادره اكل اي شي .. كليت جبن .. وكليت شويه بيض عن خاطري .. مع انه ريحته صكت راسي .. بس كان خاطري فيه مع عسل .. على الريوق موزة كانت قاعده جدامي ... بعد ماقامت تغسل يدها لحقتها ...
..: موزة ؟؟ ..
موزة وقفت عن غسل يدها والتفتت لي .. قلت باانحراج من نفسي : انا اسفه .. ماقصدت احرجج .. مادري ليش تصرفت هالتصرفات ..
ابتسمت موزة وقالت بوسعه صدر : لاعادي مازعلت ... انا بعد قلت مستحيل ساروة تتصرف هالتصرفات ..
سكت منحرجة من نفسي مستحيه ... اشلون سامحتني بدون عتاب وانا الي كنت اتعمد اضايقها .. مادري ليش كنت اتصرف هالتصرف .. يمكن عشانها عاشت فترة خطوبه حلوة .. واختارها ثاني بااختيارة وهي وافقت عليه بااختيارها .. يمكن حسيت انه من حقي بعد اني اختار مثل ماهي تختار .. وحبيت احرجها .. واحطها فمواقف سخيفه بس عشان اثبت لنفسي ان هي بعد مغصوبه مثلي .. ماعرف .. تصرف اناني .. عارفه .!! .. نزلت راسي .. وتوجهت لهم .. وهي نفس الشي .. قعدت عندي واندمجنا فسوالف الجامعه .. نظرا لانها في الجامعه وانا للحين مادخلتها وخايفه وكنت اسألها عن التخصصات والدكاترة واهم شي سألت عنه برنامج التأسيسي والتوفل والايلز ..
عقب ماتريقنا بنص ساعه الشباب قالو بيدشون البحر .. وانا كنت كسلانه ومالي بارض لـ اي شي .. حتى ان غدور قالت لي بيروحون يتمشون ع البحر .. وانا قلت لها اني مابي اروح .. كنت فعلا احس بكسل يفتت عظامي .. من شنو ماادري .. تميت ويا النسوان كانو يسولفون ويضحكون .. وانا حاطة راسي ع جتف امي واطالعهم بهدوء .. كنت متأكدة ان امي فيها شي ويهها متغير .. فيه شي متغير .. بس شنو مادري ؟؟ ..
عبود بعدها بشوي خذا مرته وموزة وولده وامه وردوا الدوحة .. اصروا عليهم يتغدون بس خالتي ام عبدالله كانت تبي ترد الدوحة ..
ماجد ومنصور وثاني راحو يشترون لنا غدى .. وتمينا احنا الحريم بالشاليه ..
دخلت غرفه امي جفتها متمددة احذا "جنب" السيادة .. ومصكرة عيونها .. اعرف عادتها تحب تتمدد جنب السيادة .. رحت عندها وناديتها : يمه .. يمه .. اذن قومي صلي ...!!
ماكانت تتحرك .. وقفت متخرعه .. وبعدها بسرعه رحت لها .. وهزيتها يمه قومي .. يمه ... هزيتها بقوة اكثر .. يمه قومي .. حطيت راسي ع صدرها وماحسيت بدقات قلبها قعدت اصيح وانا اهزها ..تذكرت ان القلب جهة اليسار بسرعه حطيت راسي ع صدرها اليسار وسمعت نبض خفيف .. اتصلت بماجد وكان جواله مغلق .. واتصلت بمنصور وجواله نفس الشي .. اتصلت بثاني وبعد نفس الشي .. صحت بقووة.. اتصل لمن؟؟ .. من .. طرا فبالي سالم .. بسرعه اتصلت له .. وبعد فترة رد علي بااستغراب : نعم اختي ..من انتي؟؟..
صحت بقوة انا اقول لسالم: الحقني ياسالم .. امي .. هئ هئ .. سالم امي بتموت ..
على صراخي دشو الحريم الغرفه والي تحاول تهوي امي .. والي تجيس نبضها .. والي تصيح وياي ..
حسيت صوت سالم متخسبق وهو يقول : سارة ؟؟ .. اشفيكم اشصاير؟؟ ..
صحت وانا اقول له : تعااال سالم الله يخلييييييك امي بتموت الله يخليييك .. صحت بقوة .. وسمعت كلامه وهو يحاول يهديني
: تعوذي من ابليس يا سارة .. مافيها شي انشالله .. انا اصلا كنت يايكم .. ربع ساعه وانا اوصل اي شاليه انتو ؟؟
التفت للحريم وانا اسألهم رقم الشاليه .. من الخسبقه نسيت كل شي : شاليه **** سالم لا تتأخر .. سااللم هئ
سالم : لا تخافين ياي .. ياي انا .. وين الشباب خل يودونها السيارة ع مااوصل ..
صحت بحسره : جوالاتهم مصكرة هاي وقته يصكرون جوالاتهم؟؟
سالم بمنطقيه : اكيد مافيي ارسال الارسال هناك تعبان .. خلاص .. باكلمج اول مااوصل اوكي ؟؟
صكرت فويهه وانا اصييييح ..
مرت الدقايق سريعه ودخل سالم .. بعد مانادى بـ : يالله يالله .. درب ..
دخل .. وشال امي .. ولان امي مليانه شوي حسيته بصعوبه شايلها .. ركضت وياه وانا اصيح .. ركبت السيارة ..وقعدت جدام .. التفت لامي عقب ماسدحها ع الكرسي الي ورا .. صحت وانا اجوفها مغمضه عيونها .. مديت يدي ومسكتها .. وانا اصيييح ..
دخل سالم السيارة .. وحسيته يسوق وهو مرتبك .. كل شوي كان يلتفت لامي : لا تخافين سارة .. ماعليها شر انشالله؟؟ ..