منتديات بنوته - عرض مشاركة واحدة

09-27-2010, 11:39 AM

نصحني الدكتور بمتابعه الرياضه والاستمرار عليها لانها تخفف الضغط النفسي علي .. وهم تلهيني عن تفكيري..!! .. بس فعلا .. انا حاس اني سويت شي كبير .. انا ماصرت اهوجس بذكرى لولوة الا اذا احد ذكرني فيها او اذا مريت بمكان جمعني فيها

عشان جذ احاول دايما اتجنب الكلام عنها .. او اني اروح لمكان جمعنا سوى ..

يوم جافت امل ويهي الي تغير قالت بأسف : اسفه .. مب قصدي

قلت بعدم اهتمام : لا عادي .. لولوة شي وراح .. ورقه وانطوت ..!!

التفتت علي وقالت بحزن: افهم انك ماراح ترجعها من يديد؟؟

عقدت حياتي .. من دخل هالفكرة فراسها انا مستحيل ارجع لها : لا .. مستحيل؟؟!!

قالت : ليش؟؟ .. لولوة زينه .. صح انها ..

قلت بعصبيه : امــــــــــــــــل .. صكري الموضوع .. ولا عاد اسمعج تتدخلين بشي مايخصج

طالعتني بصدمة .. وصدت وانا احس بدموعها .. كتمت تنهيدتي .. مااقدروا يجرحون ويسفلون فيني الجنس الناعم الا لاني طيب القلب .. لا صرت قاسي وصارم وصلب .. يهابونك ولا تهاونت شوي عنهم .. لعبو بذيلهم ..

بنات حواء .. مالهم امااااااان

>كلهم يا علي؟ كلهم؟؟

..................
"سارة"

قعدت وانا مستحيييييه موووت من ترحيبهم الحار لي : واااي فديت مرت منصور .. قعدي قعدي يمه ..اشفيج حاطة الكشمه يمه احنا العصر مهب الصبح ..

"الكشمه= النظارة قديما"

ضحكت على كلمتها ياحبي لسوالف العيايز .. نزلت النظارة من عيوني وانا منحرجة .. : وهذي نزلناها

ابتسمت يدة منصور : فديت السنع ..

ابتسمت .. وخفت انها تقصد العكس .. قعد منصور احذاي وهو يقول ليدته : هاي يدتي (اشر على يدته).. جفتي سارة؟؟

ابتسمت يدة منصور وهي تمد يدها وتمسك راسي وهي تقول : ماشاءالله ماشاءالله عليها "مسحت بيدها على ظهري" كامله كامله والكامل الله ..

ابتسم منصور .. وفهاللحظة دشت خدامه .. وطالعتني باانبهار .. وهزت راسها .. ضحكت عليها .. عطتنا صحن فطاير وصحن حلويات ... وبعدها وزعت استكانات الجاي والحليب كرك .. بس انا قلت لها اني مابي .. قالت متعجبه .. يبي عصير ماما؟؟

ابتسمت لها : لا شكرا ..

كليت فطيرة جبن .. وكليت شوي جيز كيك .. التفت لليدة وقلت لها : خالتي تبيني ااكلج؟؟

جافتني مستانسه : اي يمه .. تعالي يالمزيونه تعالي

ضحكت منحرجة ومستانسه عليها قعدت عندها .. : يالله فتحي حلجج خالتي وسمي...

طالعتني وهبت فويهي : شنهوووووووو خالتي؟؟ قولي يمه يمه ..

طالعتها مستغربه انزين ليش تصارخ بالعدل تقول باافهم .. بس مع ذلك ابتسمت : اوكي خالـ اووه يمه ...

عدلت بطولتها .. ومديت الفطيرة :يمه رفعي البطوله اشوي حتى تاكلين ..

شهقت وهي تزخ صدرها :وشوووو .. هذا الي ناقص .. انا عيااااالي ماجايفين ويهي تبيني اتفصخ ..

احين من ياب طاري التفصخ ؟؟ الله يهديج .. سحبت الفطيرة من يدي وهي تقول بنقمه : هاتيها هاتيها انا باكلها

كلتها وهي منزله راسها ومحتاسه تعابل فالبطوله .. مسكت البطوله اشوي ارفعها حتى تاكل براحه وجنها استانست على حركتي

وقعدت ااكلها شوي .. وشوي اعلق .. وشوي منصور يضحك وهو يقول انا بعد اكليني؟؟ .. مصدق روحه الاخو ..

مضى الوقت بسرعه .. لين سمعت صوت الباب .. التفتت جفت وحدة طوويله .. بيضا عيونها مثل عيون خالتي ام منصور بالضبط .. وملامحها شوي ماطمنتني .. حسيت بنغزة في قلبي .. مااستلطفتها ع الرغم اني ماتحجيت وياها

وقفت وسلمت علي وقالت : هلا .. اكيد انتي ماتذكريني؟؟ .. بس لا تخافين حظرت عرسج .. انا بنت خالة منصور .. العاااش ..

ابتسمت مجامله "قالت شنو قالت العاش؟ .. وايد اسلوبها مب شي .. اي طبعا تاخذه من من؟؟ .. ام منصور مب مقصرة .. حسيت بااحراج لاني طولت ومارديت " هلا عايشه.. عاشت الاسامي ...

قعدت وحطت ريل على ريل : عاشت ايامج ..

طالعتها بدقه ... يعني هاي عادي تقعد جي وياهم .. بدون شيله؟؟ .. مب جنها كبيرة .. وللحين مب متحجبه .. او يمكن عشان منصور مايدري عن الدنيا قاطه الشيله؟؟ لالا مااتوقع اكيد وصلها خبر ان منصور تعافى ...

طالعتني وقالت وهي تلعب بشعرها بخفه : لايكون تغارين ليش اني مو لابسه شيله جدام منصور؟؟

يعني اتعرفين انه غلط ؟؟ ومستمره .. رفعت حاجب واحد وقلت وقلت باابتسامه : الي يغلط دايما يتوقع الهجوم من الاخرين ..

مالحقت اكمل كلامي الا وقفت بعصبيه وبحدة : اشقصدج ها؟؟؟ ..

طالعتها مصدومة .. يعني مهما كان ماتوقعت جي ردة فعلها .. امبيه لا يكون ردي كان وقح بزيادة؟؟ .. بس انا اجوف تصرفها الوقح ..!! ..

ماانتظرتني اجاوب .. طلعت بسرعه من الصاله .. وصفقت البيبان فبعض .. احين جي يستقبلون الضيف !! ..

حسيت اني مصختها بردي .. وكان للازم ارد عليها بااأدب يعني مهما يكون انا "اعتبر للحين عروسه وشخص يديد بالنسبه لهم حتى لو مرت شهور على زواجنا" والمفروض ردودي تكون مهذبه خصوصا ويا ناس اول مرة اجوفهم واعرفهم ..

طالعت منصور .. كان عاقد حياته .. ويدته بيدها المسباح وتسبح .. يوم تصكر الباب بقوة .. صرخت اليده منفجعه : وجعه توجعج ميلانووووو .. ميلااااانو وصمخ ..

دشت خدامه هنديه وهي تهز راسها : نئم ماما كبير ..

هزت راسها اليدة معصبه : اشقايل تصوفقين في البيبان ها؟؟ (اشقايل= ليش ) (تصوفقين= تصكرين الباب بااقوى ماعندج)

ميلان: ماما هاي ئاييشااا سكر باب ..

اليدة معصبه : لا انا جفتج انتي .. وشحقه ها .؟؟

عقدت حياتي .. الحين بنت بنتها تصكر البيبان وتهاوش الخدامه والله خوش؟؟ .. مساكين يالخدم كل شي طايح فوق روسكم حتى الي مالكم ذنب فيه ؟؟ الحين تجوف بنت بنتها وتحط السبه ع الخدامه !!

ميلان : ماما .. واللاا ئايشششا سكر باب ..انا مافي يجي هني.. انا في كيتجن سوي بورجار ئايشااا يبي !

اليدة معصبه وهي تقول واتحندب"اتحلطم" : بوجاد(جارهم) ياكلج ان شاء الله .. يالله روحي يالله .. هزت عصاتها وضربتها ع الارض تنهرها ..

راحت ميلان وهي معصبه وتتحلطم: كول يوم كول يوم ماما كبير موشكل .. ئايشااااا في مشكل ... سنو هازا .. هزا هرام .. واجد هرااام

تحسبت عليها اليدة وهي ترفع طرف جلابيتها من صوب الصدر: حسبي الله عليج يا ميلانو جانج مأذيتني ومرفعه ضغطي .. غطت عيونها بشيلتها وهي تصيح

وانا ومنصور نطالع مصدومين من المسرحيه .. سمعت حس ريال يتنحنح : احم احم(بسرعه عدلت شيلتي) .. الله يهداج يدتي .. اشفيج ويا المرة .. دومج تهاوشينها وهي الي قايمه فيج توديج واتيبج اتأكلج واتشربج

حسيت الصوت مب غريب علي .. التفتت يوم صاحت اليدة : مابيها .. رجعوها الهند لا بركتن فيها .. خلها تتنقع هناك مابيها انا ..

ضحك .. وهو يتقدم بيبوس يدته .. وجافنا قاعدين صوبها .. قام استقام واقف بسرعه : اوووه اسمحولي .. اشلونج اختي سارة ؟!

طالعته مصدومة .. هذا ... هذا .. الدكتور فهد .. حسيت بمغص فبطني .. ياربي ليش يه هني ؟؟ .. اخاف يزل لسانه ويقول شي عن ييتي .. بلعت ريجي وانا اقول باارتباك :.. بـ ـ بـخير .. لا .. عادي .!!..

التفت سلم على يدته .. وباس راسها .. قالت اليده متحلطمه : وشووو .. منهي سارة ؟؟ ... فتحت عيونها من ورا النظارات السمييييكة : انته تزوجت يا فهوود وماقلت لي

ضحك فهد وهو يأشر علي : لا يمه .. زوجة منصور؟؟ اشفيج

ضربت اليدة صدرها وقالت بشهقه : وووووووووووووه منصور تزوج ؟؟ .. وانا اقول منهي هالمزيونه الي قاعدتن عنده .. وانتي يامال الي مانيب قايله .. ماخذتن منصور وهادة ريلج؟؟

فتحت عيوني مصدومة .. عيل من مساعه شنسوي؟؟ .. انااااااااااا متى خذت ريال وهديت ريلي؟؟ اشفيها ذي؟؟ .. اشر لي فهد وهو يضحك انها فاقدة .. : فيها الزهايمر .. يمه يمه هاي زوجة منصور .. اشفيج قمتي تقطين خيط بخيط

اهااااااا .. توني افهم .. مت من الضحك فبالي يوم شبهت عووش بـ ميلان ههههههه لان ثنتينهم لابسين خضر اليوم فعبالها ميلان ههههههههههههههههههههههههههاي يحليلها يدة منصور ..

ابتسمت وانا اسمعها تصيح : اهئ اهئ ياولدي .. ايه عليك

ضحك فهد وهو يلم يدته ومنصور يلمها من الجهة الثانيه : شفيج يمه تتحسرين؟؟

طالعت منصور وهي تتحسر : اييي .. ودووووني لابوووويه .. ابي اروح لابوووويه

منصور : يمه من وين نطلع ابوج الحين؟؟

صاحت : ودوني له .. اهو فالسوق هاي حزته "وقته" يروح دكااانه .. صاحت شوي

منصور وهو يلمها زيادة : ان شاء الله احين انا وفهد نوديج له

وقف وهو يقول لفهد : يالله ؟؟

ضحك فهد : وين؟؟ من صجك ياخي ؟؟ .. خخخ اقعد اقعد احين تنسى ؟؟ ولا ناوي تدور فيها مابين الدكاكين ..

كنت اطالع فهد مستغربه .. كلش مايبين عليه غشمرجي .. تذكرت يوم رحت له .. يمه ..شكله يبعث الهيبه والخوف .. بس الصج .. وايد احلا عليه وهو يضحك .. عقدت حياتي وكتمت ضحكتي يوم جفت منصور قايم بيودي يدته حق ابوها .. هههه .. يحليله منصور ..

رن جوال منصورر .. ورد عليه : الو ... اي ... لا للحين ماطلعنا من عند يدتي؟؟ .. لا خالتي مب موجودة ... تبين فهد؟؟؟ .. لحظة .. فهد .. تلفون ...

سمعت فهد يرد : الووووو ... ياهلا .. افا افا ليش تصيحين .. وقف بسرعه .. شنوووووووووو ...طالع منصور ويدته وبعدها طالعني .. ورد يطالع منصور : زين زين .. ابششررري .. خلاص ياين لكم