رفعت عيوني له .. وبلعت ريجي نزلت راسي وانا مصدومة من قربه .. متى قعد عندي؟؟ اظاهر يوم طلع منصور قرب من عندي .. امبيييه وايييد قريب مني .. لالا مااقدر .. مااحب جي .. وقفت فجأة .. ويدي للحين بيدة ..
قال لي مستغرب : على وين؟؟
بلعت ريجي وطاحت عيني على صينيه بيتيفور .. : ها .. اييي .. ماتبي تتقهوى؟؟ ..
يراني لين ماقعدت عنده : لا مابي .. تقهويت انا ..
وقفت مرة ثانيه ناويه اشرد : عيل بااخليك تحلي؟؟ ..
مرة ثانيه سحبني لعنده .. وهالمرة حكم قبضته علي .. ومسكت انفاسي وكنت متوترة وخايفه من قربه .. سندني وجابل ويهي .. حسيت بالاوكسجين انقطع من الغرفه .. وكنت احاول اتنفس ..قال باابتسامه جميله : وانا اشقاعد اسوي تراني قاعد احلي .. يكفي اجوفج واحس بطعم الحلا كله ...عض شفايفه .. ومد يده يفتح الشيله ..
شهقت مصدومة .. وانترست الدموع فعيوني بسرعه رهيبه .. وبسرعه اكثر نزلت دمعه وحدة من عيني .. وانا احاول ادفعه عني ..
طالعني مستغرب ومصدوم لثانيه .. مد يده لخدي ومسح دموعي : ليش تصيحين سلوى ؟؟ ..
غطيت ويهي بيدي وقعدت اصيح .. ابتعد شوي عني .. وقعد عندي "سوري" قعد لاصق فجنبي .. حاوط جتوفي: ياقلبي ليش هالدموع والصياح .. بس ياحبيبتي .. بس ياقلبي .. قوليلي اشسويت انا .. اسف اسف .. مو قصدي شي .. بس كنت ابي اجوفج بدون شيله .. يالله بس عاد .. بس اجوف ..
حاول يبعد يدي عن ويهي وانا مازلت اصيح .. شد على جتفي وهو يقول : بس يا سلوى .. بس ياعمري ..
هديت شوي .. بس للحين مغطيه ويهي بيدي .. حاول يشيل يدي من ع ويهي بهدوء بس جافني مصره اغطيه .. بس هو شكله عنيد .. شل يده عن ويهي .. واستسلمت ليده .. كنت احس بالفشيييييييييييلله
بللت شفايفي .. ومديت يدي امسح دموعي .. تلامست يدي بيده الي مسحت دموعي .. نزلت يدي .. بس مسك يدي .. رفعها لشفايفه ..باسهم برقه
: اسف خلاص مااعيدها
امتلأت عيني مرة ثانيه بالدموع مهددة بالسقوط .. مابي يبوسني .. مابي استحي انا .. اصلا مااحب جي .. حسيت اني باانفجر من الحياء .. هذا ليش مايفهم علي .. هو وااااايد جريء .. يعني بيراضيني يقوم يبوس يدي .؟؟ اشسوا يعني ..
ظليت ساكته وهو يحاول يراضيني : انزين رضيتي ؟؟.. ليش ساكته ..؟؟ .. زين ماتبيني احلي ..؟؟"من سمعت هالكلمه وشكلي بااصيح من يديد " .. قومي ضيفيني قومي .. خلاص تبت مابي احلي بشوفتج .. باكل اي حلا .. يالله قومي حليني ..؟
كنت منحرجه من ومن كلماته ورقته واسلوبه .. صراحة كنت وااايد مستحيه منه .. ياربي اكيد احين بيقول شالي الله بلشني فيها هالياهل .. انزين شااسوي انا جي .. بس فديته والله حنون ورومانسي ... والله ماينعرف لج ياسلوى؟!
بسرعه قمت من مكاني .. وكأني اهرب من افكاري .. مسكت صحن ..ومسكته شوي بالقو اهدي رجفتي.. وحطيت له كل نوع من الحلا .. ويوم بغيت ارد رفعت نظرتي ببراءة صوبه .. جفته يطالعني وبعدها ابتسم يوم جافني اجوفه .. نزلت عيوني ..وشددت ع مسكتي للصحن .. وانا احس بخصلي القصيرة تغطي عيوني .. امبيه شعري طالع .. بسرعه خل اعطيه الصحن وادخلهم .. ولا بيطيح الصحن وماعاد اقدر احط من يديد ..
قربت لعنده .. وهو عدل الطاوله الصغيرة جدامه وقف ومسك الصحن من يدي .. وحطاه ع الطاوله جدامه.. التفتت بروح اجيب له القهوى .. بس مسك يدي .. التفت له والتفتت معاي قدلتي .. انحرجت اشلون نسيت ادخلهم.. ابتسم .. وتعدى الطاوله ووقف مجابلني .. حاولت اشيل يدي من يده بس كان ماسكهم وكان يتأمل ويهي .. نزلت عيوني ..
حسيت يدة هدت يدي .. بس انمدت يده على ويهي .. وهني بغت تطلع عيني من الصدمة والخوف .. بس مد يده ولامس قدلتي ودخلهم بالشيله رفعت عيوني له جفته يبتسم لي ..نزلت عيوني ورموشي تظلل عيوني لان الماسكرا كانت عامله عمايلها خخخ .. نزل يده ع خدي .. وقرصني ع خفيف .. (كنت حابه اكون طبيعيه اكتفيت بالكحل والماسكرا وخط اي لاينر رفيع فوق عيني"وتر بروف ..ضد الماء" والروج .. فقط لا غير .. امي عصبت يوم جافتني وقررت تتصل ع كوافيره دوم تتعامل وياها .. بس انا عندت .. وحلفت اني ماادخل عنده اذا حطت لي ميك اب)
طالعته ببراءة وخجل .. ابتسم لي .. وعض شفايفه بقوه : جيبي القهوه لا اسوي شي اندم عليه انا وانتي ..!
تحركت بسرعه متخرعه من كلامه اما هو ضحك على طول.. انحرجت ويبت القهوه .. قعدت هالمرة ع كنبه فرديه .. شوي بعيدة عن كنبته..
سمعته يتكلم عن نفسه وعن دراسته وتخصصه .. وعن شقته الي بلندن .. سألني اذا حابه ياخذ فيلا بدل من الشقه .. بس قلت له انه عادي .. استحيت وانا اتخيل نعيش بنفس الشقه امبيه فشيييله ياالله !! ..
كلى له شوي من الحلا .. وبعدها استأذن وهو يحذرني ارد على كل تلفوناته ولا بيجي لي البيت .. على طول رفعت عيني له .. وهو ضحك : ياربي انا على مرتي الخجوله .. يالله حبيبتي .. مع السلامة ..
انحرجت منه وااااايد .. انا للحين اعتبره ريال غريب علي .. وطبيعي استحي منه .. وهو شكله جريء .. لايكون متأثرر من الغرب؟؟ .. عقدت حياتي وانا افكر هالتفكير .. بس الشي الي طمني انه مب مغرور .. وانه مب سطحي في تفكيرة .. لاني كنت خايفه واييد وايد من هالجانب .. بس الحمدلله ..
تنهدت وانا اتذكر شكله العذااااب بالغترة البيضا والثوب الابيض .. ابتسمت وبعدها ضحكت على موقفي احسه كان يقول فنفسه شنو هالسخيفه صاحت بس عشان قلت لها فصخي شيلتج .. بس والله من حقي !! ..
ابتسمت بمودة ومشاعر يديدة تلهب صدري .. اول مرة احس فيهم .. كنت احس بشي يتغير بين طيات قلبي كل ثانيه .. واني اخذ انفاسي بصعوبه من اتذكر موقفه وقربه مني ..
صعدت غرفتي وانا مبتسمه .. دشيت الغرفه فتحت اللليت .. قفلت الباب .. طلعت شيلتي .. جفت نفسي بالمنظرة .. ابتسمت لشكلي .. طالعت شعري المسشور والي كنت رافعته بعضاضه "كليب" .. فتحت شعري ... وتناثر بنعومته على جتفي وتعداه لين وصل لنهايه ظهري (شعري مدرج من الكتف الين نهايه الظهر تقريبا .. شوي ارفع يعني ثلاث ارباع الظهر تقريبا).. رتبت قدلتي .. وشعري .. ابتسمت لنفسي .. ورحت للسرير انبطحت وانا الم مخدتي الصغيرة .. صكرت عيوني وانا ابتسم ..
...................
" سالم"
فنفس الوقت
طالعتني بكل احتقار الدنيا .. كرهت نفسي يوم جفت نظراتها .. تكلمت ويا منصور .. وراحت .. غابت عن عيني .. تنهدت بحسرة .. ياليت منصور مارجع لطبيعته .. الحين حتى مااقدر اخذ راحتي واجوفها .. تنهدت .. اااخ ياسارة .. ادري تتعذبين ويا منصور ..وصبرج على منصور .. ادري انه بيعذبج معاه .. خصوصا وهو يحب لولوة .. بس انا .. انا بعد كنت احب حياة والحين اكن شعور لسارة.. معقوله منصور بعد جذي؟؟ يكن لـ لولوة شعور خاص ولسارة شعور خاص ثاني .. فار الدم فعروقي ... وانا اتخيل شالي يصير بينهم لا تصكر عليهم باب واحد .. اخ يالقهر اخ .. سارة انتي نجم ساطع وعاااااااااااااااااااااااااااااااااااالي .. صعب احصل عليه .
لكن صدقيني .. صدقيني وعد وعد .. تكونين سعيدة ..
التفتت بطلع من الصاله .. كرهت البيت من يوم سارة تصد عني .. من يوم سارة تناظرني بكل احتقار الدنيا .. حسيت نفسي حشرة من جد .. بس مااقدر مااقدر .. يوم اجوفها مااقدر اتمالك نفسي .. صدقوني مااقدر.. لا تتوقعون اسوي هالشي باارادتي .. صدقوني غصب عني غصب عني ..!!!
جفت شهد واقفه وتراقب الموقف بصمت .. طنشتها وكنت بااطلع .. بس سمعتها تقول وهي شكلها بتصيح : تحبها يا سالم؟؟
التفتت عليها ونكرت بقوة : منهي؟؟
قالت لي بقهر : شينة الحلايا المدام سااااااااااارة؟
بلعت ريجي .. وقلت بعصبيه : شهالحجي ؟؟ من وين طلعتي هالخرافه ..
ضحكت بسخريه .. وقربت لعندي ويرت يدي بقوة طالعتها معصب وجفت عيونها المترووسه دموع : اسمعني يا سالم .. ابتعد عن سارة .. مالك خص فيها .. اهيييييييييي اتحب ريلهااااااااااا !! سامعني ؟؟ وريلها شكله يحبها
طالعتها بقهر : وشالمشكله؟؟ ..
صرخت وضربتني على جتفي : سالم افهم افهم .. انا احبـــــــــك احبـــــــك .. ومستحيل اخليها تاخذك مستحيييل ..
بعدت يدها بااحتقار: انتي ماتستاهلين محمد
صاحت بالقو وهي تقول : عشاني احبك صرت مااستاهل اخوك؟؟ .. انت لي .. وماراح تكون لغيري
جفتها بقهر : وبعدين وياج انتي؟؟
لصقت فيني .. بعدتها بسرعه: انتي ماتخافين حد يجوفنا ..
طالعتني بمكر .. اعرف هالنظرة زين ماازين .. يرتني لغرفه قريبه من الدري .. دخلت وهي تسحبني وياها وانا ماشي مصدوم .. دخلت الغرفه وقفلت الباب .. وتساندت عليه ..فتحت شيلتها .. وفكت شعرها .. تناثر على جتوفها .. حركته بدلع .. وقربت لعندي .. لصقت فصدري .. ومالت براسها عليه : والحين سالم .. بعد خايف حد يجوفنا .. مدت يدها وتحسست ذقني
غصبا عني انمدت يدي ومسكت شعرها .. شكلها مغري .. مسحت على شعرها .. قربت هي لعندي .. وطبعت بوسه على خدي .. صكرت عيوني .. تذكرت حياة ...
وسارة
مرت دقايق و و بعدت عنها بسرعه وانا مشمئز منها .. طالعتني بألم .. وبعدتها : انتي ماتستحين .. انا ا
سدت شفايفي وهي تصيح : انت تحبني .. تحبني ,. انا حاسه
عضيت شفايفي وانا ابعدها : لا .. انا مااحبج .. افهمي يا بنت الناس .. افهمي ..!!
صاحت : عيل هذا شنو؟؟الي سويناه شنو؟
قلت بقهر : انا ريال .. ريال تعرفين وشو ريال .. ريال محروم من هالشي .. وانتي استغليتيني .. انا ماارح اسامحج .. \
ضربتني بقهر : انت .. انت .. ماكملت وصاحت ..
غطيت ويهي بقهر .. وحسرة .. صحيح لمست بنات بس برغبتهم ..ماكانو اصلا شريفات !! .. بس هذي مرت اخوي .. اخوووووووووووي .. تعرفون شنو يعني اخوووي؟؟.. اشلون .. بستها .. اشلون تجرأت ضغطت على شفايفي مقهوور ..
تحركت من الغرفه .. مقهووور ..
طلعت بسرررعه ... خذت السيارة .. وجفت منصور وسارة طالعين ويضحكون وهم بالسيارة .. اشتعلت غييييض .. وكره ... تذكرت شهد .. ياكرهي لهالانسانه .. انسانه استغلاليه . اشلون استغلت وضعي .. اشلون .. انا ..
آآآآآآآه .. لهب يشتعل بصدر .. لهـــــب .. وشلون تتجرأ .. وتقول هالحجي لي .. اشلوووون .. وانا .. اخو ريلها .. مااستحت على ويهها .. اخ يالقهرر .. اخخ .. حسيت بفوران دمي بزيادة .. واحتقرت نفسي اكثر واكثر .. معقوله انا كنت جي ؟؟ .. ومعقوله سارة حست بنفس احساسي .. لا لا .. مستحيل ..
انا .. انا
صج صج ياسارة ماكنت اقصد
انا اسف
صكرت عيوني ودمعه وحيدة تتسلل من جفوني .. حقير .. حيوان .. ضربت صدري بقوووة .. اخ بس .. شنو هالشعور الخايس .. اشسويت انا .. اشسويت .. ااااه بس متى ارتاح متــى؟؟
>><< والي سويته ياسالم لسارة .. اقل حقاره ولا اكثر حقارة واستغلال من الي سوته شهد !!
تذكرت موقف شهد مرة ثانيه .. اشلون قدرت اتسوي جي ؟؟ .. الشون اتخون اخوي؟؟.. واشلون ترضى على نفسها .. انسانه وصخه .. قذره .. اشلون تجرأت اصلا ؟؟؟ ..
فجأة حسيت ان هالموقف كله يتكرر ... نفس الي انا .. طلبته من سارة ... وقفت السيارة بالقوووو ...
لكن بعد فوات الاوااان
........................
" علي "
عقدت حياتي وانا اتذكر هالويه .. وين انا جايفه .. انا جايف هالبنت .. بس فوين مااتذكر .. صديت عنهم .. وانا كارههم .. اكره البنات اكرههم .. كلهم نفس الشي كلهم سواسيه .. التفتت لامل الي قاعده عندي ..
ماقلت لكم .. اختي امل قررت تسافر هالمرة معاي لـ الامارات .. قلت لها اني احتمال اطول لكنها قالت " شـ وراي ..صيف وحر .. ومحد بيسافر قلت اسافر وياك اونس عمري "
تنهدت وانا اركب السيارة .. متوجهين للفندق الي حاجزه انا ..
قالت لي امل : علاوي .. ماعندك بيت هني؟؟؟
اخ ياامل لا ترشين الملح ع الجرح .. تكفييين : كان !
قالت بمزح : ياسللااام على ايام لولوة ها؟؟ تشتري لها واحنا بالطقاق ؟؟
حسيت بالذنب ..ياترى اهملتكم وااايد ياامل؟؟ اهملتكم والتهيت ويا زوجتي؟؟ وياها الخاينه؟؟ ماتستاهل ماتستاهل اهملت عيلتي عشانها ماتستاهل .. فجأة .. يه فبالي هروبي من الدوحة ... ولجوئي للامارات .. هذا بعد راح يبعدني عن اهلي هذا بعد ..
اقنعت نفسي اني فعلا جاي عشان هالصفقه المهمه .. ومب عششان هروبي .. واني قريب .. وقريب جدا راجع الدوحة .. بـ علي ثاني .. خصوصا اني قاعد اتعالج فهالفترة لاني حسيت ان نفسيتي زفت .. ولان حميد ماسمح لي ابقى جذي اتعذب ..