منتديات بنوته - عرض مشاركة واحدة

09-27-2010, 10:43 AM

" روضه "

حطت الخدامه العشا في المطبخ .. ونادت علي .. كنت منبطحه انا .. ويدي تمسح على بطني بهدوء .. تفقد طفل لك هذا شي فضيييع .. مسحت بيدي على مكان عمليتي .. دمعه طاحت من عيني .. آآآآآه..يمكن انها خير .. مسحت دمعتي بهدوء ..كان الهدوء يعم المكان لكن ثواني سمعت صوات خطوات قصيرة سريعه ويلاحقها صراخ

انفجعت .. وقمت استويت بألم اجوف اشصاير .. ثواني وينفتح الباب قبل لا اخطي اي خطوه وتركض حمدوه وهي تصرخ : ماااااااااااااااااااااااااااامي .. جافتني .. وركضت بحركات رشيقه وتسلقت السرير .. ووقفت وراي بحيث انها توقف ع السرير وانا ع الارض بس مغطيتها

التفتت لها بحنان .. ومسحت شعرها الاسود ابتسمت نصف ابتسامه وانا اطالعه تخبي جسمها وتطلع عيونها ويبهتها وشعرها من ورا جتفي .. ابتسمت بخفه: ياقلبي اشفيج؟ ها.. شمسويه؟؟

ضحكت بشطانه اليهال .. ومن سمعت صوت خطوات قامت تصارخ وتضحك : ماااااااااامي خثيني خثيني ..

دقيقه ودخل حمدان وهو فاتح عيونه وبيده مسدس لعب : لقد اصطدتتتتتتتتتتتتتتتتتتك .. هيييييييا يا اابي .. انها هنا ..

صرخت حمدوه بوناسه وضحكت بصوت عالي .. والصقت فيني زيادة .. حسيت بوخزات الم خفيفه .. ركض حمدان لجهتنا وهو يقعد عند السرير ويحط المسدس الكبير على جتفه ويقرب عيونه شوي من عدسه المسدس : سأقتلك ايتها القطوة الشيطانه

ضحكت على تعبيره وتقرب خطوتين وحمدوة تضحك بالقو .. وتحاول تتلصق فيني زيادة وهي تضحك وتضم رقبتي : لا تثتطيع ايها المقناث الغبي .. التفتت لي برجاء .. مامي .. قولي له انا مب قتوة ..!

ضحكت وانا ابعدها شوي .. تفاجأت بوجود سعيد فالغرفه .. متى دخل ؟ ماادري .. جفته واقف قريب حمدان .. عقد حياته وسحب المسدس بيد واليد الثانيه سحب حمدوه من وراي وحمدوة متشبصه فيني وتضحك تحسب ابوها بيصيدها

مدت يدها فالهوا محاوله فيها تمسك رقبتي بعد ماشلها سعيد .. صارخت وصاحت : مااااااابي مابي .. ابا ماما ..

سعيد بحنان : حبيبي ماما تعبانه .. التفت لي وعقد حياته .. نزل حمدوه ويراني خلاني اقعد ع السرير .. من قعدت ع السرير لصقت فيني حمدوه .. وحمدان نفس الشي .. وضحكو بصوت عالي ..

طالعت سعيد وكان يطالع عياله ويبتسم .. رفع عيونه لي .. تلاقت عيوني بعيونه .. صديت كارهته .. بس شكله ماعجبه ..احسن بالطقاق

حسيت بثقل يوم قعد ع السرير قريب منا : ووخروا عن امكم بعدها تعبانه

طالعتني حمدوه : ثدق ماما تعبانه؟؟

ابتسمت لها بتعب وانا احس بغثيان : اشوي ماما ..

حمدان وهو اير شعر حمدوه : وخري انا برقد عند امي ..

حمدوه وهي تضمني زيادة : لا انا ..

حمدان :انا ..

شليت يده من شعر حمدوه .. وهو دفع بنفسه لعندي زيادة : انا بنام عندج .. مابا ارقد فوق ..

حمدوه هزت راسها موافقه: انا بعد .. مابا ارقد بروحي .. طالعت عيوني وقالت لي ببراءة .. ماما توكفين

حمدان : هيه انتي مايقولون توكفين .. تكفين ؟! ماتعرفين انتي

طالعته بحقد : انته الي ماتعرف ..

قاطعهم سعيد : ياربي من هاليهال دوم ضرب ومضارب .. يالله كل واحد يروح يتعشا يالله ..

حمدوه مدت بوزها بزعل وحمدان نفس الشي : مانبا .. بناكل ويا ماما .. التفتو لي .. صح؟؟ثح؟؟

ابتسمت لهم بتعب : صح ..

سعيد طالعهم شوي وقال : زين يالله انتو روحو قولو للشغاله تجيب العشا هني دار امكم

طالعو اثنينتهم بعض وكأنه كل واحد يرمي المهمه ع الثاني ..

ابتسمت على حركاتهم .. فدييييتهم ياربي ..

قال سعيد لهم يحاول يشجعهم : الي يروح اول .. ويقول لهم .. بخليه يرقد عندي ..

يوم ماجاف اي تجاوب منهم وكل واحد مب مهتم .. حك راسه بااحراج شوي .. بخلييييييييه يرقد عند ماما

من نطق بـ ما .. وماكملها الا وحمدان وحمدوه يركضون بسرعه لبرع

طالعتهم لين مااختفو واختفت ضحكتهم البريئه

سمعت صوته قريب وخمنت انه قاعد احذاي : شخبارج؟؟

طالعته بطرف عيني؟؟ ورديت صديت .. قلت بجفاف : بخير !

سكت ثانيه ورد سأل : بترقدين هني؟ .. مابتيين فوق؟؟ ..

ظليت ساكته متجاهله سؤاله .. مسك يدي .. وحسيت بقشعريره من مسكته الحنونه .. : تبين ترقدين هني عشانج تعبانه...؟ ولا تطعنين بااتفاقنا ؟؟ ..

رديت بسرعه : لا لاني تعبانه !

لف ويهي لجهته وهو يقول : صدق .. ولا ..؟!

طبع قبله على يدي الي بين يدينه.. سحبت يدي بقوة وانا اهتز بعنف .. : لو سمحت .. لا تتعدى حدودك وياي!!

طالعني بألم : لو سمحت؟!

طالعته بااحتقار : اي ؟

ورديت صديت .. ظل ساكت ثواني .. وبعدها تنهد .. : بطنج للحين يعورج ؟؟ ..

صوته اثر فيني .. خلا الدموع لا اراديا تجتمع فعيني .. : شو تتوقع يعني؟؟ ..

سكت مرة ثانيه .. : متى موعدج الياي مع الدختر؟؟

رصيت على عيوني عاااساس ماتطيح دموعي .. قلت بصوت مخنوق .. : بعد باجر ..

لف ويهي له .. وظل يطالع عيوني وانا منزلتهم مابي اطالعه .. رفع ويهي شوي .. وباس يبتهتي .. نطق بهمس : اسف ..

ابتعد خطوتين .. وروحي تناديه .. لاااااا تبعد عني .. بس نهرت روحي بقسوه .. الي سواه مب شوي .. سمعت خطواتهم السريعه وضحاتكهم الي تملا الجو حياة وبهجه .. حمدوه ماسكه طرف قميص حمدان وشادته بالقو وحمدان شاد شعرها .. عشان محد يوصل قبل الثاني من وصلو للسرير نقز حمدان ونقزت حمدوه اسرع بتنط لصوبي .. مسكها سعيد بقوة .. وقعدها ع ريله وحمدان ع الريل الثانيه

: ياعيال امكم تعبانه لا تناقزون صوبها

صكرت عيوني .. وانا اتلهى عن صوته ونبرته الحنونة .. سمعت الخدامه تكلم سعيد وتستأذنه اذا اتيب عشا اليهال عشان ياكلون وياي؟؟ .. سمح لها وهو يقول لها اتيب العشا كله لانهم كلهم بياكلون وياي ..!!!

صكرت عيوني .. لا لا مابيك وياهم ماابيك !!

طلعت الخدامه .. قرب لي سعيد : شكلج تعبانه ؟ .. نطلع وانتي تنامين؟

هزيت راسي بلا وانا مشغوله بسوالف حمدوه وحمدان .. ماابا اكسر فرحتهم ..

رفعت عيوني .. جفته يطالعني بتأمل .. وختمها باابتسامه جميله ..

صديت بسرعه

وصكرت عيني