منتديات بنوته - عرض مشاركة واحدة

09-27-2010, 08:02 AM

اوفففف مب مرتاحة بنومتي عدل كللش .. تحركت يمين يسار .. اوففف في حاجز ثقيل مايخليني اتحرك .. مالي بارض افتح عيني .. تعبااااااااااانه ياناس من يومين مو راقدة .. حركت المخدات وانا احسهم ثقلانين وااايد .. تمددت عالسرير .. حسيت اني تعدلت .. ورقدت .. صحيت بعد فترة .. وظليت اطالع المكان بهبل .. احس بثقل مو قادرة اتحرك من الفراش .. شوي واستوعبت المكان غرررريب .. نقزت بسرعه .. شفت المكان .. كان هااادي .. المناظر مغطيه الكبتات .. والتسريحة كبيرة وتشرح النفس .. والغرفه لونها عنابي .. والستاير ذهبيه .. والليتات هم لونهم ذهبي .. الفراش لونة .. لحظة لحظة .. هاي فراشين .. شصاير؟ .. لحظة مو كان غرفتي انا برتقاليه؟ شقلبها عنابيه؟

حكيت عيوني بيديني ببراءة وهالحركة انا ويسوف نسويها اذا قمنا من النوم وحتى مجود اخوي .. حكيت يبهتي .. وركزت انظاري بالغرفه .. الغرفه شوي ضييجة .. غرفتي انا وسيعه .. كل شي غير .. انا وين؟؟ .. انفتح باب الحمام وانا افكر .. طالعت الباب بصدمة .. اااااه .. منصور!! .. شيسوي هذا هني .. قليل الادب .. مايعرف اني بنت عمه ومو لازم يشوف شعري .. صج قليل ادب .. جفته بحمق وعصبيه وتوني بصرخ وبسبة بابشع الكلمات تذكرت امس .. وهدئت .. ظليت اطالعه بدون هدف .. تزوجنا!!.. وامس نام عندي لانه يخاف .. صار ياهل .. بس انا مو مستعدة اتزوج ياهل .. ساروووووووووه فكري مابيعرف أي شي .. اصلا تفكيرة محدود .. خخخخ اما بقص عليه قص هههههههه ..

ابتسم لي وحك ذقنه المرتب :يقولون صباح الخير صح؟

ابتسمت ياربي شكله بريييييييء بس هييييييييين..كشرت بويهي .. لاطلع كل الي سويته فيني السنين الماضيه صدقني يامنصور بتندم انك اخذتني .. اييييييييييه ساروة يالخبله انتي شتقولين .. تطلعين حرتج وكل الي سواه فيج الحين بوقت مرضه؟ لا ياسارة انتي ماعمرج استغليتي ضعف الناس .. شلون تستغلين مريض .. شلون تستغلين واحد ذكرياته ممسوحة .. بس هو كان يعاملني زفت ومتكبر علي .. وكان يقول لي كلمة تجرحني .. تجرحني مووت .. صكرت عيوني متالمة .. وفتحتها من يديد اجوف المكان الي طلع منه منصور ..

صرااااااااااااااااااااع بين نفسي .. شلون اعامله .. مااعرف والله مااعرف .. حكيت يبهتي .. ياربي ساعدني ..

تحركت من السرير الي كنت نايمة عليه بالعرض .. اووووووه شلون نام هذا ع السرير؟ .. انا مااعرف انام الا بعرض السرير .. ههههه اويه اتخيل شكله لووول .. دخلت الحمام .. وتغسلت وفرشت اسناني .. اووووووه نسيت اخذ ثيابي .. امس من التعب فتحت شنطتي وهي برع عند الباب .. طلع من الحمام بهدوء .. جفته قاعد ع السرير متملل .. استحيت .. قلت لمنصور : .. ممم .. منصور ..

طالعني بهدوء .. ياررربي استحي .. نزلت عيني .. وكملت : ممكن؟ ...

وقف بسرعه ويا صوبي .. تخرعت .. ورديت خطوتين لورا .. فقال: نعم؟

قلت بهدوء وانا افتح الباب : ممكن تيب لي شنطتي؟؟

ابتسم .. :انزين ..

طلع برع الغرفه .. وانا مفتشله .. دخلها .. رحت لصوبه :مب ثقيله تبي اساعدك؟

ضحك وقال ببراءة : امبلاااااااا ثقييييييييييييلله شنو فيها هالكثر؟

ضحكت اخفف احراجي : ثيابي يعنو شنو؟

بحركة سريعه قرب مني وشلاني .. صرررررررررررررخت .. طاح قلبي فبطني وجنه الحجاب الحاجز الي يفصل بينهم انقطع من شيلته تعلقه برقبته وانا ميتة من الخوف : منصوووووووووووووور نزلني

ضحك منصور ونزلني وانا ويهي شقول لكم .. يمكن اللون العنابي شويه على لون ويهي من كثر الدم الي تيمع فيه فجأة .. ومرة ثانيه شال شنطتي وضحك وقال : انتي اخف من شنطتج .. عيل ليش جي ثيابج ثقيله .. طالع ويهي .. وقعد يضحك وقال لي : اوبييييييييه جوفي ويهج صايررر احممممر .. نسك خدودي .. وبعدت يده بلطف وانا احس اني بغرق بثابي من الفشله ..

مارديت عليه .. احس اني للحين منحرجة موووت .. فتحت شنطتي والتفت عليه فجأة : شفيك واقف للحين؟

طالعني وقال: عيل شاسوي؟

افتشلت فشله اطلع ملابسي جدااامة : امممم .. روح الصاله ببدل وبيي ..

قال لي ببراءة : زين بس لاتتأخرين؟

ابتسمت: اووكي .. امممم ولا اقول روح المطبخ عشان نسوي لنا ريوووق .. حطيت يدي على بطني الصغيرووووووووون :احس اني يوعاااانه من امس ماكليت شي

هز راسه بطاعه وراح .. يحلييييييييييله والله فرق بينه الحين وبين منصور الي قبل اعوذ بالله .. اتمنى يظل طول عمرة جذي ولايرد نفس قبل .. اقشر ..

طلعت لي ثياب وخرابيطي .. ودشيت الحمام .. تسببببحت ولبست وخلصت .. وطلعت .. توجهت مرة ثانيه للشنطة طلعت شنطه فيها كل شي يتعلق بشعري .. من مشط شباصات .. وحتى رييش .. مشطت شعري .. قررت ارفعه نالي بارض اخليه مفتوح ويلعوزني خصوصا انه قصيير لين جتوفي مب طويل .. رفعته كله لفوق وطبعا طلعت خصل واااايدة من شعري لانها قصيرة وحاوطت ويهي اوففف شسوي فيهم هذول بعد؟ .. صج الي قصت شعري تبط الجبد .. هالكثر قصييير .. يعني صح انا قلت لها ابي للجتف بس مو جذي مايتصكر ..رشيت لي عطر .. اوفف احب هالعطر ..رووز بولغاري .. لونة وردي ..مع اني مااطيق اللون الووووردي .. الا اني حبيته بسبب هالعطر .. لاتصدقون مااحب الوردي لو الي تسوون <مالت انا احب الوردي خخخ
رفعت خصل من قدلتي وثبتهم على جنب بشباصه متروسه فصوص شاريتها لي سلوى .. مااحب الشي الي متروس فصوص .. اوووه .. يعور الراس خصوصا يوم يتشربك الشعر فيه .. كحلت عيوووني .. وحطيت لي غلوس وردي خفيف .. مع ان ماكان لي بارض .. بس لاني تسبحت فاحس اني تنشطت .. شعري للحين مبلل .. ياربي .. والله مالي بارض اجففه اصلا معظمة جف من الفوطة .. احب افرك راسي بالفوطة ماحبب اجفف شعري بالسشوار لانه شعري بسرعه يتقصف اذا سشورته .. لحظة جني عطيتكم قصه حياتي .. لوول ..

وقفت جدام المنظرة .. بعد ماشفت شكلي فدييييييتني كيوووووت الله يحفظني (ويقهر عذاااالي <هم عارفين نفسهم خخخ ) ابتسمت لنفسي برضا فالمنظرة .. وكنت بطلع ..بس مرة ثانيه رشيت لي عطري المفضل اكيد عرفتوه ايوووه بولغاري .. رشيت على رقبتي وتحت اذني هالمرة .. تنهدت .. ورحت صوب الكوميدينو .. شفت الساعه .. وانصدمت صدمة حياتي .. تدرون الحين ساعه كم؟ .. كم تتوقعون؟ ... 12؟؟ لالا
1 الظهر .. لا لا ... الحين الساعه 8 الصبح .. ييييه شمقيمني هالحزة؟؟ خخخخ .. جفت نفسي بالمنظرة وصكيت حلجي اضحك على رووحي .. اول مرة اقوم بهالنشاط الساعه 8 .. عدلت قميصي .. صح ماقلت لكم انا شـ لابسه .. امممم .. تتوقعون فستان نفس العرايس؟ .. لالاا .. جلابيه مغربيه للعرايس؟ .. هم لا لا لا .. ممممم .. لاتهاوشوني .. اصلا لبست ولا مالبست منصور ياهل ومايعرف شي .. احم احم .. كنت لابسه بانطلون جينز باللون الكحلي الفخم وخيوطة باللون الذهبي .. وقميص من بدايه الجتف لين نهايه البطن فيه كشكشة .. والكشكشة تكبر عند الصدر .. ودنعه الصدر وسييييييييعه .. ولبست تحتها بدي يغطي الرقبه لونة ذهبي وقميصي ذهبي .. وفي القميص خيوط اربطهم ويا بعض .. فالقميييييييص كششششخة وعجيييب حق الايام العاديه مب حق العرايس .. يييييه وانا شعلي .. انا مو محسوبه من العرايس .. لوول

طلعت من الغرفه .. وتأملت المكان شوي .. كان واااسع وحلو .. وكان خاطري اتامل كل غرفه فيه واتعرف عليها .. بس اجلت كل شي حتى ماانتبهت للـ الوان لاني يوعاانه .. رحت المطبخ شفت منصور حاط راسه على الطاوله ومصكر عينه ببراءة .. ومن دخلت فتح عينه .. شكله حس ان في احد بالمطبخ .. اوووه صج اين غيه اكيد شم العطر .. امبييييه فشله .. ياريت ماتعطرت .. حمرت خدودي وقلت وانا اجوف المطبخ : صباح الخير ..

مارد علي .. ويييه شكله محظر <محظر= حظر ينونة خخخخخخخ
توجهت للثلاجة .. زين يامنصور بتتعامل وياي بالتطنش انا بعد اعرف اطنش .. قال لي وهو يصكر عيونة : تدرين ليش مابي ارد عليج ..

مارديت عليه ...ينجلع .. يعني بموت لو مارد علي ؟ .. والله ..ولا ميتة بويهه .. كمل : لاني مساعه قلت لج صباح الخير ومارديتي ..

طالعته .. انا؟ .. هو اصلا ماكلمني عشان يقول صباح الخير .. متى مااذكر ؟ .. ع العموم صباح الخير ولا مساء الخير مايهموني .. قلت بهدوء: منصور بلييز دور الطابي ..

(الطابي = القلايه .. القرص الي يقلون فيه البيض)

قام من مكانه .. ياربي له هييبه بس والله حرام مسكين كسر خاطري .. معقوله مايذكر ولا شي من الي قبل .. صعب الواحد يعيش بدون ماضي بدون ذكريات حتى لو كانت اليمة بس يكون له ماضي .. طلعت ثلاث بيضات قال لن بيض؟

ابتسمت .. شسوي يعني .. مافي شي ينكل .. مافي شي بالثلاجة غير البيض والجبن .. ممم .. حتى فواكة مافي ولا خضروات ولا حتى حليب فراوله <احب حليب الفراوله

ياررربي انا متعودة كل يوم اقوم اشرب حليب فراوله ..

يالله شسوي بعد امري لله .. شفته واقف ويغسل الطابي مسكيييييين .. والله اني مااستحي على ويهي اشغل ريلي من اول يوم خخخخخخخخخخخ عشان يعرف .. هههه اونه ريلي اونه .. قلت بهدوء: خلاص منصور خله مشكور .. انا بكمل

قال لي ببراءة : لاعادي بساعدج

مسكين .. والله يكسر الخاطر .. امبييه .. حرام علي والله اني مب انسانه .. تذكرت الخطط الي كنت بسويه فيه .. الحمدله اني مابديت بشي .. مسكين منصور مايستاهل .. كفايه انه مب حاس بدنيته أي ازيد عليه .. صج الله يحب منصور ولا ماكان بيفتك من خططي .. ههه ..ياربي شلون بكمل حياتي وياه .. معقوله اكمل حياتي ويا طفل؟ .. مستحيل مستحيل .. انا ابغي رجل .. تعرفون شنو يعني رياال .. يعني بجد احس ان لي ظهر استند عليه .. عندي احد الجأ له لا احتجت له .. بس احين اذا احتجت لاحد استند على من؟ .. تنهدت ... مافي انثى ماتبغي ريال يحسسها بانوثتها يحسسها باهميتها بحياته .. يحسسها بانه مب كامل الا بوجودها .. النقص الي فيه تعوضه اهيا بوجودها .. اما انا شنو؟ شنو .. اعيش ويا .. ويا طفل! .. اكمل حياتي بطفل .. يعني مستحيل احلم اني بيب ولد او بنت ينادوني ماما .. ادري بتقولون شفيها مستعيله .. بقول لكم انا مب مستعيله .. انا افكر بمنطقيه .. انا افكر بعقلانيه ..

طالعت منصور الي يطالعني ببراءة .. وابتسمت له بخجل .. مسكين يامنصور .. بتظطر تعيش ويا وحدة نفسي .. معقوله منصور نسى كل شي كل شي .. حتى الي يحبها؟ .. بس انا قريت شكثر ان الانسان حتى وان فقد ذاكرته يكون احساسه موجود .. واحساسه هو الي يدليه على الي يحبهم والي مايحبهم معقوله يحس بانه ماكان يحبني الا ماكن يواطني؟ .. معقوله اذا يبنا مجموعه بنات بيقدر يميز الي كان يحبها؟ ..

كسرت البيض بعد ماحطيت كميه دهن معقوله .. بدى يصير البيض رشيته بملح وترسسسسسسسسته فلفل .. ترسسسته حتى ان لون البيض صار شبه اسود .. شليته وحطيته بـ صحن .. وحطيته على الطاوله .. كنت مسويه بيض عيون وتارسته فلفل .. طالعه منصور .. ورجع يطالعني .. طقعته .. ورديت اسوي بيض .. ونفس الشي حطيت بنفس الكمبة من الملح بس خففت الفلفل بوااااااااااااايد .. يعني كمية الفلفل ااسود كانت خفيفه يادووب تنشاف .. وحطيته بصحن ..وحطيته على الطاوله .. غسلت جلاصين .. وبعدها حطيت واحد منهم جدامي .. والثاني جدام منصور .. صبيت فيه عصير برتقال .. هاي العصير الوحيد الموجود بالثلاجة .. شفت جبن كرافت شدر .. وجبن المراعي .. قطعت جبن كرافت قطع قطع صغيرة .. وحطيت بالجانب الثاني من الصحن كمية من الجبن .. كمية معقوله يعني لا وايد ولا شويه .. وممم طلعت زيتوون وحطيته بنفس الصحن .. وطلعت عسل وهم حطيته بنفس الصحن .. الصحن كان مقسم لاكثر من قسم .. حطيته ع السفرة .. ومممم .. خذيت طماطة وحدة .. وخيارة وحدة .. وقطعتهم شرايح .. ورشيت فلفل وملح بشكل معتدل .. وحطيته ع السفرة .. رن المكيرويف .. ورحت طلعت منه الخبز ..وكان حاااار .. وحطيت بصحن .. وحطيته على الطاوله .. تقريبا الطاوله صارت مليااانه اكل .. جفت منصور يطالع الاكل بانفجاع .. ويييه نسينا ان هو ولد سفير وماياكل هالاكل .. الحمدلله والشكر عيل شياكلون بالريوق؟ ..

طالعته باحراج: شفيك؟

طالعني .. وبعدين طالع الصحون الي ماليه الطاوله: كل هالاكل لي ولج بس؟ .. وااايد ..

الله واكبر .. الله واكبر .. الحين هالاشيا صاروا وااايد؟ .. والله خفته يستهزئ بالاكل .. استغفر الله بس هو متعود يستهزء بكل شي .. فررررررررق بين الحين وقبل الي مايقعد على السفرة الا وهي مليانه اكل وبالاخير يزيد ووين يروح؟ افكورس بالزباله .. اوووه صح نسيت منصور فاقد ذاكرته عشان جذي مستغرب ..! .. : تبغي اكل ماتبغي الاتاكل

مالت علي احين هاي الي قدرت عليه .. شفيني نسيت ان منصور فاقد الذاكرة .. لازم احاجيه عدل .. هو مب نفس قبل .. مسكين والله شكله حنين وطييب .. حسيت اني قسيت عليه فقلت : اسفه

طالعني باستغراب : على؟

قلت باحراج : مممم .. حسيت اني جاوبت بدفاشه شوي .. احم سوري ..

ابتسم وقال لي : عادي .. ممم هالبيض لي ؟ اشر على البيض المتروس فلللللللفللللل : وايد فيه فلفل

جفت البيض الي اشر عليه وابتسمت : لالالا هاي بيضي .. عطيته البيض ايل فيه فلفل بس بشكل خفيف . وابتسمت وقلت له : انا احب بيض عيون اذا كان مترووووووووس فلفل

رفع حاجب واحد وابتسم .. وبدا ياكل .. بوسط اكلنا .. رن جرس الشاليه

طالعته باستغراب: من؟؟

طالعني وهز جتفه : ماادري

صج اني غبيه اسأله من وهو قاعد عندي بالله شدراه .. قمت بروح اشوف من طبعا باخذ شيلتي .. بس هو وقف وقال لي : انا بروح اجوف من .. انتي ماقايله لاحد ايي؟؟

طالعته باستغراب شنو هذا تخبل؟ اصلا من المينون الي ايي لمعاريس بصباحيتهم صح اني مااعتبر نفسي عروسه ولا اعتبر منصور معرس بس جدام الناس أي .. ومستحيل حد ايي .. عقدت حياتي .. لايكون في امي ولا ماجد ولا مرام ولا يسوف ولا سلوي بعد قلبي شي؟ ..

شمعت صووت ريال .. اووويه .. من هاي .. سمعت منصور يقول للريال : حيااك سالم قاعدين نتريق

سالم؟ .. شيايبه هالعله بعد؟ .. صج مايستحي ايي لمعاريس بصباحيتهم .. قلت بحدة : منصور اخذ سالم للصاله انا مو لابسه شيله ولا عبايه ..

حظرته يبغي يدخل اخوه الخبل هني .. اووه انا بعد شفيني قمت انسى .. شعرفه منصور .. وسالم هالخبيث ماقال شي .. صج مايستحي على ويهه ..

طليت بويهي للصاله بشوف اذا فيها حد ولا لاء .. بس دق خشمي بخشم حد .. احححححح .. خشمي يعورني .. حتى ان عيني انترست دموع لانه دق بخشمي بقوة .. شكله انصدم مثل ماانا انصدمت .. مسكت خشمي وصكرت عيوين بقوة .. اححححح يععوووور والله ..

فتحت عيني الملاينه دموع وشفت عيونه الناعسه العسليه تطالعني باحراج: اسف مادريت انج عند الباب ..

فركت خشمي وانا احس ان خشمي يعووورني من جد : لا عادي حصل خير

ابتسمت باحراج اني حسيته تضايق .. : وينه سالم؟

ابتسم منصور وجنه نسى الي صار من شوي : راح .. مسكين كان يايب لنا ريوق .. مايدري انج تعرفين تسوين .. ضحك

ابتسمت وقلت : وييييييييه تعبت نفسي ع الفاضي ..

ضحكت وضحك وياي .. اقترحت عليه نوديه لجيراننا بالشاليه .. وافق منصور .. وقعدنا نكمل الريوق الي انا سويته ..توقعت منصور بيهد الاكل الي سويته وبياكل من بيتهم .. يعني معقوله ولد السفير وياكل من يد من بنت عمه؟ .. وياكل شنو بعد؟ بيض .. جبن .. ولا خيار .. ومن بيتهم الذ الااكل .. بس ابتسمت وانا اجوفه ياكل بشهيه .. شكله مو متعشي امس ..

ظليت اطالعه وانا سرحانه .. انتبهت على عينه العسليه تجوفني .. انحرجت .. ونزلت عيني .. : ممم منصور اليوم بنتمشى ؟

ركز نظرة علي ورد ينزل عيونه ويكمل اكله: اوكي ؟! ادلين انتي انا ماادل شي .. حك ذقنه باحراج

ضحكت :هههههه لالالا ادل ادل لاتخاف ..

بعد ماخلصنا الريوق .. شلت الصحون وكنت بغسل الصحون واحط بالقي بالثلاجة حراام ينكب برع ..

قال لي منصور : لا خليه سالم ياب الخدامة تنظف وتسوي لنا الاكل ..

ابتسمت: اوكي .. بس ع الاقل بشيل الي كليناه وبحط على صوب .. مممم .. وحطيت لها اكل وبعد حطيت لها من اكل بيت السفير .. اوه اقصد عمي ..

ابتسمت للخدامة الي دشت المطبخ بعد ماناداها منصور .. اسمها ليلي ..

تصدقون شكلها صغييييييييير .. يمكن اكبر مني بسنة ولا سنتين .. يحليلها .. حرام ليش مطرشينها من بلادها تخدم ببيوت الناس والمفروض تكون بالحرم الجامعي ..

طلعت من المطبخ .. شفت منصور منسدح على الكنبه وبيدة شي .. ييه .. قررت اخرعه .. مشيت على اطراف صوابعي .. شوي شوي .. ووقفت وراه بالضبط توني بصرخ اخرعه ولا مرة وحدة يقعد وايرني .. جان اصرخ انا .. بغيت اخرعه خرعني

منصور: هههههههههههه شفتج وانتي يايه

حطيت يدي على قلبي : حرام تخرعني

ضحك وقال لي : انتي تخرعيني معليه وانا لا؟

ضحكت : شلون جفتني من مساعه اتسحب جني سحليه شلون جفتني

ضحك منصور وقال وهو يأشر على البي اس بي ماله: جفت صورتج منطبعه فالبي اس بي وانا العب وقلت بخرعج

ورد يضحك مرة ثانيه .. يااااي شكله اينن وهو يضحك .. ماشاءالله عليه وسييييييييم حتى انه احلى مني .. عشان جذي كان مغرور .. وبعد كان مغرور علي انا بعد لانه جد كان وسيييييم ..

سحبت البي اس بي من يده وقعدت العب .. وسحباه من يدي .. رفع يده فوق وطبيعي مااوصل لانه اطول من بواايد :يييييييبه منصور اصلا عيب تسبحه من يد الناس وهم يلعبون

منصور ببراءة : يــــــه .. انتي سحبتيه من يدي

يريته من يده ورديت العب : انا عادي .. بس انته لا

شكله زعل وقال : ليــــش؟

ضحكت ورديت العب : لانك ريلي وعادي اذا سحبته من يدك

طالعني بهدوء وقال : انزين انتي مب ريلتي مايصير اسحبه منج؟

مت من الضحك :ههههههههههههههههههههههههههههههههههههههه شنو ؟ بل ـ ههههههههه .. بليز عيد عيد الكلمة

ضحك بعبط : شفيج تضحكين .. أي كلمة؟

ضحكت ووانا ادفن ويهي بالمخدة :ههههههههههههههههههههههههههههههههههههههه

ماقدرت ارد عليه .. ماادري شفيني صكتني هستيريا الضحك .. قعدت اهتز وانا اضحك .. شكله احتر مني وفرك راسي بالمخدة زيادة حتى ان ريشتي تبطلت وشعري اعتفس .. بس كنت للحين اضحك من الكلمة .. ريلتي اونه هههههههههههههههههههههههههههههههههههههههههههههههههه ههههههههه

منصور ضرب راسي : بس عاد .. صج !

ضحكت .. وغطيت ويهي بجتفه لانه شل المخدة عن ويهي وانا اضحك .. ولانه قاعد عندي وقريب فطبيعي حطيت ويهي على جتفه اغطي ويهي عنه واضحك

منصور وشكله مقهور: ساااااااااااااااااااااااره

طالعته وعيوني تدمع وويهي صاييييير احمر : هههههه هلا؟
ههههههههههههههههههههه

رديت اضحك .. بسم الله صج مايسوى عليه قال الكلمة بس والله هههههههههههه ماادري شفيني ؟ .. شكلي تعاديت من منصور ههههههههههههههههههههههههههههههه

منصور: ليش تضحكين هالكثر؟

من طالعت ويهه وبرائته زدت بالضحك رعصني بالكرسي وهو قريب مني: اشششششششش خلاص ليش تضحكين ..
غطيت ويهي بيدي وانا اهتز بضحك بعدين وقفت ضحك وابتعدت يوم حسيته قريب مني .. وابتسمت .. طالعني : ليش كنتي تضحكين؟

ابتسم .. هههههههههه .. ياربي اخاف اتحجى وارد اضحك : مافيني شي .. هههههههه .. بس منصور

طالعني وشكله من جد زعلان : ها؟

ضحكت بهدوء: منصور مايقولون ريلتي؟ يقولون مرتي .. يعني انا اقول لك ريلي بس انت تقول لي مرتي مب ريلتي ههههههههه

فلعني بالمخدة ورديت اضحك ورد يفلعني بالمخدات كلهم ورديت افلعه انا .. هو يفلع .. وانا افلع .. واخر شي مسكينه الخدامة وهي يايه فلعها منصور .. مسكينه .. حتى انها من كثر الصدمة صرخت .. اويييه شبتقول عنا مخبلين؟ احين منصور ياهل استويت انا اخس مستمرة وياه .. صج اني هبله

راحت الخدامة تتحلطم وهي رايحة للمطبخ شكلها كانت بتقول لنا عن الاكل ولا شي .. هههههههههههه مسكينه كلت الفلعه .. هع هع .. مسكت منصور وقلت له : خلااااص سوري سوري مايسوى علي .. مممم .. نروح نتمشى

مسك يدي وقال :انزين يالله ..

تفشلللللللت شنو مايستحي هذا يمسك يدي؟ ..عييييييييب .. امبييييه .. تمنيت اغطي ويهي عنه .. رحت للغرفه .. لبست شيلتي وعبايتي .. وتعطرت .. طالعت نفسي بالمنظرة .. بااال شعري متبهدل .. يمعته وهو مبهدل مالي بارض امشطة واعدله لبست شيلتي وزررت عبايتي .. وطلعت .. جفت الخدامة طالعه بيدها صينيه الريوق .. خمنت ان منصور قال لها توديه للجيران ..

ابتسمت له وقلت : منصور ماتدري وين حاطة جوالي؟

حك ذقنه : ماادري؟ ..

قلت باحراج: انزين ممكن جوالك شوي بكلم امي وسلوي ..

مد لي جواله بدون مايتمنن علي .. حسيت اني فعلا كنت غبيه يوم كنت افكر واخطط عشان اطفشه واخليه يعرف قدري الي استهان فيه سنين طويله .. مسكين منصور .. كسر خاااطري .. اكيد بتكيف وياه بسرعه حتى والله اني ماحسيت باحراج واايد .. حسيته طفل مب ريال عشان انحرج منه ..

ابتسم لي يوم جافني اتصل .. رديت له الابتسامة بسرعه ضربت بيديني على الطاوله بتوتر .. ليش مايردووون .. طالعت الشاشه اتأكد من الرقم ..

عقد حواجبه وجنه يقول لي شفيج .. هزيت جتفي وقلت له بهمس: مايردون .. شوي واسمع صوت .. صرخت بسرعه .. الوووووووووو

ضحكت يوم جفته سد اذنه بانفجاع .. رديت اكلم : الوووو يوسفوه حبيبي عمري انته .. شلونك؟ شخبارك شمسوي؟ ..

يوسف: اب باب اباب باب باب

انا : يوسي انا تاااله

يسوف وجنه يفكر : تالوووووووه

ضحكت من نبرة صوته: سارة شنو شاروة اكسر لك ضروسك؟

سمعت ضحكته فدييييييته : يوسفان وين مامي وبابي؟

يسوف ساكت :.........

صرخت: يسووووووووف بلا لعانه عطني ماما ..

شوي وسمعت صوت ضحكات: جوفي ولدج مغرم شايل التلفون ويتكركر من الضحك

حسيت اني بصيح الاخوان يسولفون وماايون يردون بصييييييح احين انا محترقه ابي اكلمهم وهم ابد مب هامهم ..

شوي وسمعت مرام تقول: لا والله مسكه ماجد وقال : الو؟
ابتسمت بسرعه واحس عيوني تحتنرق : الووووو..

ماجد: من سارووة؟

ابتسمت : ايه .. شلونكم شخباركم؟ عساكم بخير؟ شلون مرام .. شلون يسوف .. وامي .. وانته شلونك؟

ماجد .. حسته ابتسم: بال بال بال كل هالاسئله تبيني ارد عليهم اقول عطيني ريلج اسلم عليه ..

قلت بقهر: مجود بلا سخافه .. احسن انا متصله ابـ ...

قاطعني صوت امي وهي تقول :عطني يمة اكلمها .. الو ..

هني طاحت دمعتين من عيني اليسار .. ياربي والله بافتقد هالصوت الحنون .. من عنده مثل امي من؟ .. محد .. محد .. بدت تصيح امي وهي تسألني عن اخباري .. والله كنت شوي واصيح بس ماسكة روحي : يمة انا بخير .. الحمدلله ..
ماقدرت اكمل .. عطيت منصور التلفون وعطيته ظهري وانا امسح الدمعه اليتيمة الي طاحت من عيني اليمين ..

شوي وصكر من عندهم منصور .. وياه صوبي: ليش تصيحين؟ ..

كنت ساكته وهاديه بس احس من داخلي نيراان تثور : ولا شي .. بس .. ممم .. شرايك نروح برع نتمشى ..

مسك يدي وقال : يالله ..

انحرجت .. بس ماتكلمت .. طلعنا شوي تمشينا ع البحر وكنا نسولف سوالف متفرقه .. منصور يحاجيني وانا كنت سرحانه .. لين قعدنا .. على حصايه شوي كبيرة .. قال لي والهوى يهب ويطير اطراف شيلتي : متى اخر مرة يتي هني؟

منصووووووووور لا .. ارجوك .. لاتذكرني كل مااحاول انسى جروحك تذكرني فيها .. نزلت عيوني : قبل لايتوفى ابوي الله يرحمه

قال لي ببراءة : ابوج ميت؟

هزيت راسي وانا احس اني مخنووقه .. والله مو قادرة اتحمل :ايه ..

وجنه مصر يصيحني : متى مات؟

انخنق صوتي: قبل سنة وشهرين.. تلألأت عيني بالدمع .. اسفه يبه اسفه .. نسيتك هالكمن يوم .. ومارقدت وصورتك بيدي .. اسفه ..

منصور: اها .. انا مااذكر متى اخر مرة يت هني ..

سكت وسكت هو بعدين قال لي تحبين البحر : رفعت عيني من البحر وجفت اخر نقطة تقدر توصل لها عيني من البحر ..: ايه .. بس ..وااايد احبه .. وانته؟؟

ابتسم: حتى انا..قال يغير الموضوع شنهي اكثر بلدة تحبينها؟ ..

ابتسمت بصدق: قطـــر ..

قال لي وهو يضحك: لالالا اقصد من البلدان الي رحتي لها

ابتسمت: امممممم .. البحرين اكثر دوله حبيتها ..

قال لي :شمعنى؟

ابتسمت: كانت لي ذكريات حلووووووة هناااك .. وانته؟

ابتسم بأسى : مادري مااذكر ..

مسكت يدة بمواساه: معليه بتتذكر شوي شوي ..

ابتسم لي:وشني هي اكثر دوله تكرهينها

قلت بسرعه وباندفاع: لندن .. لندن ..

طالعني مستغرب.. وبعدين قلت ابرر: هناك ابوي توفى فيها .. كنت توني مخلصه من ثاني ثانوي .. وابوي كان يتعب بعد ما ابوك .اقصد .. بعد ماعمي ااه .. باقه ..

طالعني مستغرب: أي عم؟

بغيت اقول له ابوك .. بس مستحيل اشوه صورة ابوه بنظرة مهما يكون هذا ابوه : ممم واحد من اعمامي ..

قال لي ببراءة : ماتذكرين اسمه؟

ابتسمت: ايه مااذكر

ابتسم: عيل انتي نفسي بعد ماتذكرين شي ..

ضحكت وياه وقلت: ايه صح!

قال منصور: انزين مممم تبين نركب الطرااد؟

اول شي خفت بعدين حسيت بمغامرة : اوكي .. ليش لا..

ابتسم وبعدين قال لي : صبري .. قعدي لاتحركين بتصل لساالم بقول له يتفق ويا الريال

غصبت نفسي على الابتسامة .. سالم؟ .. هه .. امحق مشورة .. راح .. وقعدت اتأمل البحر ..

شوي وحسيت بحد واقف ..ماجفته توقعته منصور.. اصلا اكيد منصور ..شوي ولاحظت انه لابس بانطلون كحلي .. بس منصور كان لابس بانطلون ابيض ..

طالعته .. كان ريال مااعرفه .. طالعني وابتسم : من خمس دقايق وانا اجوفج وانتي تطالعين البحر .. شكلج يايه بروحج ..

اشر لي ان محد واقف وياي .. وقفت بروح .. سمعته يقول رقمة .. طنشت .. ولفيت والا انصدمت بـ ريال ثاني .. سمعت الريال الاول يقول: ياريتني بداله ..

رفعت عيني جفته منصور .. مسكته من يدة .. كنت خااايفه .. ومشينا بنروح لشاليهاتنا: منو هالريال؟

انصدمت من سؤاله بلعت ريجي : مااعرفه

قال باستغراب: عيل ليش واقف هناك؟

قلت له : ماعرف .. ماعرف ..

قال منصور : انزين شرايج نلعب بي اس بي ..

حاولت ابتسم: اوكي ..

دخلنا داخل وانا للحين ماسكة يده .. بعدين هديتها باحراج .. راح الغرفه يدور البي اس بي ويركبه ع التلفزيون .. قطيت نفسي ع الكنبه اهدي من نفسي .. شوي وابتسمت يوم شفته طالع وويهه احمر وينافخ .. سألته: شفيك؟

قال لي بهدوء: مالقيت شريط المصارعه

ضحكت: احسن لاني ماعرف العبه ..

ضحك علي .. وفتحنا البي اس بي وركبناه ..

قعدنا نلعب .. ثنينتنا انبطحنا على الارض وتحتنا المخدة وكل شوي يسبقني منصور وانا اتهاوش وياه ابغي اسبقه : غششششششششششششاااااااااااااااش والله غشششاااااااااااش .. مايصير مايصير

ضحك منصور وقال: لا .. انتي الي غشيتي انا قلت لج ستوب بعدل مخدتي وانتي فتحتيه والحين فزت عليج تقولين غشاش

قلت بعصبيه <مايسوى ترى لعب : لا انته تغشي شلون عيل سبقتني انا كنت سابقتكم غشاش والله غشاش

قال: مافي غشاش ماغشاش .. احنا تشرطنا الي يفوز يتشرط ويقول الي يبيه

فتحت عيوني : لاوالله؟ اصلا المفروض انا الي افوز انته غشيت .. سويت نفسي افكر .. صبر خل احط شروط فوزي

فلعني بالمخدة الي وراه: مب كيفج انا الفايز ..

قلت بعصبيه: انا

منصور: انا والله حتى شوفي .. وراني الغيم ومكتوب ان منصورو الي فايز .. قهررر على النهايه يفوز علي

منصور: يالله الحين بتنفذين شروطي

قلت له بعصبيه: تشرط !

طالعني وضحك: نلعب من يديد .. وفالليل ماترقدين بالعرض على السرير بغيت اطيح امس

تفشللللللللت يعني هو الي كان عندي مب المخدات مثل مانا اتوقع .. صج اني .. شقول بس .. غبيه شويه علي .. حسيت ويهي شب ضو : اوكي نلعب قيم يديد

قال لي : بس الي يفوز مايتشرط الحين

وقفت وتخصرت: لاوالله؟ تدري يعني اني بفوز عشان جذي جي تقول

يرني من يدي وقعدني: هاي شرطي

بغيت افلعه .. شكثر شروط كنت افكر اسويهم بمنصور خخخخخخ .. فتحنا القيم وردينا ننبطح ونلعب .. تذكرت : تعال انته قلت بتروح تشوف الطراد

ابتسم: ايه صح .. نسيت باجر ولا الي بعده بناخذه ..

قلت وانا العب وياه: اها

قال لي : بس سالم بيي يمشي الطراد بدال الهندي لاني مااعرف .. نسييت!

وعععععععع .. انا اركب ويا سويلم الطراد خسي .. انا اخوه بالغصب بالعته بعد هو .. وييييييييععع من قلب .. احين منصور مابنقول شي ناسي ذاكرته وتصرفاته غير عن قبل يعني ينبلع .. بس سويلم وخييي ...تذكرت قبل سنة يوم استهزئوا فيني هم الاثنين .. وبمشيتي .. تذكرت اشيا وااايدة .. خلت قلبي يشتغل حقد عليهم ..انا انثى مجروووحة .. مجروووحة .. شتتوقعون مني ها؟ والي كان يجرحني ويقطعني لاصغر قطعه هو ريلي الحالي .. شتتوقعون .. شتتوقعون ..

هديت يد السوني : انا تعبت..

قال لي : لااااااااااا انا ماتعبت الله يخليج خل نلعب هالقيم

قلت : لا

قال لي بسرعه:الله يخليج الله يخليج

سكت ورضخت مااحب اشوف احد متذلل جدامي .. شكثر كنت اتمنى منصور وسالم ينذلون جدامي مثل ماكانو يجروحوني ويذلوني .. بس مااعرف شخصيه منصور اليديدة ماتستاهل اني اذلها ..

كملت لعب وياه .. وماحسيت بنفسي الا وانا راقدة ..