منتديات بنوته - عرض مشاركة واحدة

09-27-2010, 08:00 AM

::سلوى::

منبطحة على السرير واطالع السقف حسيت بحركة برع .. طلعت جفت غرفه ماجد تتصكر .. عقدت حياتي .. ورديت انبطحت .. مرت احداث اليوم ببالي .. انا كنت اصيح مب على الامتحانات لالالا فهمتوني غلط .. انا بس انصدمت يوم ابوي قالي عن حاله منصور .. وانه بيتزوج سارة .. الاثنين مايبون بعض .. ابوي قال لي .. رديت انبطحت من يديد على السرير ..

مسكين يامنصور ... مرضه النفسي يسيطر على افعاله .. سروي اكيد درت عن منصور .. اكيد عصبت .. والحين ماتبغيه .. بس ليش استحت العصر .. معقوله تبغي منصور؟ .. لايكون تحبه؟ ..

صح يمكن تحبه ليش لا .. لان اغلبيه البنات يحاولون يغطون على حبهم بالهواش ويا الي يحبونه .. صح يمكن !!..بس حرام .. منصور يحب وحدة ثانيه

ياربي .. ماادري اوقف ويا من ولا من ...

قمت وطلعت برع غرفتي .. البيت هدووء .. مريت غرفه سالم وابتسمت .. لاني تذكرت عبطنا انا وسوير .. دوم نيي غرفه سلوم اخوي .. لانه دوم يشتري عطور يديدة .. وسروي تموت على عطور الريايل .. مريت غرفه منصور .. كان النور واري .. اكيد قاعد .. فتحت الباب وانصدمت .. محد بغرفه منصور .. والفراش مب موجود .. والغرفه مرتبه على غير عادتها ...

كل الي ياه ببالي .. وين راح منصور ..

ياترى وين راح منصـــــــور؟؟؟

^^^^^^^^^^^^^

::سارة::

قمت مفزوعه من النوم .. هالحلم يتكرر مرتين وياي .. هديت نبضات قلبي .. ياربي استر .. نفس الحلم .. نفس الحلم .. امي واخوي وعمي ايروني .. يبغون يدفنوني .. حطيت يدي على رقبتي .. والعرق يصب من يبهتي صب .. سديت حلجي وانا اتنفس بسرعه .. ركضت للحمام .. قفلت الباب بيدي الي ترتجف .. وقعدت اصيح .. ماادري ليش .. وشلون .. كنت محتاجة اني اصيييح .. وماصحت وايد ... يمكن دموعي بس الي نزلو كانو ثلاث دمعات ثنتين من عيني اليسار ووحدة من عيني اليمين .. توجهت للمغسله وانا احس بغصه ابغي اصيح والله حرااام ليش انحرم من الدموع ليش انحرم من لذه الصياح ليش؟ .. غسلت ويهي .. وانا احس ريجي ناشف .. خاطري بماي ابلل ريجي .. بس كنت خايفه اطلع .. مسكت رقبتي .. اخاف يذبحوني .. اخاف يدفنوني .. على الاقل يوم بكون ميتة مابحس .. بس وانا حيه ويدفنوني هذا الصعب .. هذا المؤلم .. حسيت تفكيري سخيف لاني افكر بحلم ..فتحت باب الحمام وطلعت من الغرفه... نزلت على الدري بهدوء ورجفه .. شفيني جي خايفه؟ كله كله حلم هالكثر مخوفني ..

نزلت تحت للمطبخ .. شربت ماي .. وقعدت على الكرسي .. حطيت الجلاص جدامي على الطاوله .. وظليت افكر .. ليش الحلم تكرر وياي مرتين .. ليش؟ .. هاي تأكيد للامر الاول .. ولا شسالفه؟ ..

تنهدت بضيج .. انا شبيدي؟ اسويه وماسويته؟ .. شبيدي؟ .. اخوي ومايرد علي .. ولايرد على اتصالاتنا .. انزين بتزوج مو مهم انا المهم هو شخبارة خل يطمنا عليه .. طالعت ساعتي .. الحين بيأذن الفير .. خل اروح اقرا قرأن وكمن دعاء يطمن قلبي .. اليوم يوم الاربعا ... ااااااه .. باجر الملجة .. بالليل..ويه ويه .. حكيت يبهتي بتوتر ..بتزوج .. بتزوج .. لا ..لا .. حرام عليهم ..والله حرام توني صغيرة ... ع الاقل ينتظرون لين اخلص جامعتي ..

تنهدت .. شبيدي اسوي؟ ولا شي .. ظليت ساكته اتأمل الفراغ .. اذن الصبح .. وقمت من مكاني بهدوء .. عكس العواصف الي بداخلي .. بس كلها عواصف اخمدها عمي بقسوة ..دخلت قسم مرام .. وجفتها تعابل بيوسف الي كان نايم بالعرض على السرير .. والله فديته طلع ينام نفسي .. انا بعد انام بالعرض على السرير .. ولاني قصيرة مهب طويله فالسرير يكفيني..

ابتسمت لها واشرت لها بالصلاة .. ابتسمت لي وهي تأشر على يسوف الي نايم بالعرض على السرير وعلى حظنها وسوت حركة عند بلعومها وسوت حركة اني بذبحه هههههههههه .. ضحكت .. وطلعت اهز راسي .. رحت لغرفه امي بستها على راسها .. وصحيتها للصلاة .. وبعدين رحت داري .. وتوضيت وصليت .. وضليت اقرا على السيادة شكثر ادعيه .. وانبطحت على السيادة وانا اطالع السقف وبيدي المسباح اسبح .. وبعدها ماقمت احس بـ الي حواليني وصرت متخدرة.. وعيت بسرعه وانا احس بنشاط ..

نزلت تحت .. البيت معفوس فوق تحت .. انبطحت ببجامتي على الكنبه .. بس وين يخلي ولد ابليس .. يه صوبي وقعد ايرر شعري طحت على الارض وانا اصارخ من الالم .. :يوسفوه وجع ان شاء الله الي يوجعك ويكسر عظامتك عظمة عظمة .. هد شععععععععري

يوسف مستمر واير شعري .. وانا اصرخ .. يات مرام وشالت يوسف .. وانا احس شعري انجلع كله .. والله تحسست شعري بيدي .. ااااي .. يعورني .. يعلك يايسوف تكبر .. ياتني الصيحه .. احح .. والله يعور والله..

مرام باحراج: سوري سروي حبيبتي كنت مشغوله بترتيب الاغراض والتهيت عن هالشيطان

طالعت يوسف بحقد: حصل خير!

انصدمت يوم قالت لي مرام : اليوم بتييج الحنايه

طالعتها وانا منصدمة الا منذهله وقلت بغباء: ليش؟؟؟!

طالعتني بهدوء: نسيتي؟ باجر ملجتج والي بعده على طول عرسج ..

هني حسيت نفسي بركان ثاير يمكن لاني توني استوعبت اني بتزوج : لا .. من قال .. انا مابي اتزوج .. وخصوصا منصور ماني متزوجته ..

ركضت على الدري اصيح .. دشيت داري وصحت صياح .. اتصدقون اني ارتحت .. ثلاثه ايام وانا ماسكة نفسي لا صحت ولا شي .. مستسلمة لهم واطيعهم اقول يمكن بكسر خاطرهم .. احساسي المتيلد صحى الحين ... انا ماابغي اتزوج منصور .. ماابغي ..

^^^^^^^^^^^

"لولوة"

رايحة يايه بالغرفه .. ماادري شسوي شنهو الي بيدي مااعرف .. متوترة .. معصبه .. مضطربه .. ودي اكسر الدنيا ومافيها .. ليش منصور بيتزوج ... ولا المشكله الي بياخذها بنت عمـه .. بنت عمـه مالقى الا بنت عمه؟ ... انزين لو وحدة غير جان رضيت .. كان يجذب علي ويقول لي انه مايحبها ويحبني انا اكثر .. تذكرت قبل سنة ونص .. يوم كنت اقوله اني اغار من سارة

انا بغيرة: منصور ماابغيك تتجابل ويا هذيج البنت ..

منصور باستغراب: أي بنت؟

انا : البنت الي ياتكم امس بيتكم

ضحك منصور: تراقبيني؟ لهالدرجة تغارين علي؟ .. حبيبتي .. انا ماااحب ولا راح احب .. غيــرج .. شلون تبيني اصد لغيرج ..

قلت بعصبيه: انا مااراقبك .. انا جفتها امس تدش بيتكم وانا رادة من الجامعه .. (مال صوتي للرجى) منصور انا احبك .. لاتجوف غيري بليييز

منصور :حاظر قلبي .. وبعدين .. هاي بنت عمي .. يعني نفس اختي .. اممممم ..

قلت بعصبيه: منصوووور لاتينني ..

ضحك منصور: من عيوني .. ياعيوني ..

يعني معقوله نسى هالحجي .. بس انا مانسيته ... ليش يتزوجها .. مو هي مثل اخته؟ .. ليش الحين بس حلت له؟ ليش صارت هالجيكرة ملكة جمال بالنسبه له .. ليش بياخذها .. ليش بيتزوجها ..
لو بياخذ وحدة اعلى مني بالجمال بقول مغروم بشكلها .. بس بنت عمه مب اجمل مني .. انا اجمل .. طالعت نفسي بالمنظرة وانا المس خدودي... انا ابيض عيوني اوسع هي عيونها حادة .. انا بييييضه بياضي بياض الثلج .. وهي بياضها عادي اصلا تميل للبرونز .. انا شعري بني حرير .. وهي شعرها اسوووود جنه فحم بس ماانكر انه انعم من شعري .. انا شعررري طوييل وهي شعرها قصيير ... انا خشمي قصير وناعم وصغير .. وهي خشمها طوييييل استغفر الله خشمها مب حلو جنه منقار .. طوييل وفيه عظمة بارزة بس ماانكر انه ضعيف .. انا شفايفي مليانيه ومتوسطة .. وهي شفايفها صغيرة وشوي مليانه .. انا طويله وهي قصيرة .. انا جسمي كأنه مونيكان بتنسيقه .. وهي ضعيفه جنها غصن بان .. شنو فيها احلى مني؟ .. اكيد يحبها .. اكيد نساني ..

لمعت دموعي بعيني .. ليش ينساني .. ليش بيتزوج .. وين وعده انه مابياخذ غيري ..
وين الي بيتم على ذكراي ..

اتصل عليها؟ اقول لها عني واعرفها علي؟ .. بس اكيد هي تعرف انه يحبني .. لالالا اكيد مو جايفتني .. اكيد عبالها حب عابر وعادي ..

لا .. لا ..

دقثيت الارقام بعيله بتصل فيها .. بس دخل علي الغرفه .. ارتبكت .. بسرعه صكرت قبل لا يرن .. ابتسمت بارتباك .. لو كنت متأخرة دقيقه جان انكشفت .. الحمدلله ..

اوفففف مالي بارض حق هذا بعد .. ياربي ..

علي : مساء الخير

رديت بدلع: مساء النور

ويهه كان جاد .. اعوذ بالله .. اوففف .. الله يعيني حياتي كلها كدر فكدر .. ملل .. شنو هذا مايحس .. قلت اصرفه : علي تعال نروح نتغدى

قال ببرود: مو مشتهي ..

فلع نفسه ع السرير.. وظل يطالعني .. مسكت موبايلي بتهرب منه ..

:انا بنزل ايب لك غدا .. وغصب بتاكل وياي اوكي حبي؟

طالعني وظل ساكت .. شفيه بعد؟ .. يالله .. !! ..

طلعت بسرعه من الغرفه .. ونزلت تحت .. امرت الخدامة تحط الغدى وتوديه فوق .. طلعت من الفله .. وتوجهت للحديقة .. حتى اضمن انه ماينزل بهالسرعه .. دقيت على بنت عم منصور .. زوجته ..

^^^^^^^^^^^^^

"سلوى "

قمت الصبح مستانسه .. والبيت مربوووش .. باجر خطوبه وملجة منصور والي بعده زواجه .. صح منصور مايعرف شسالفه .. بس اتوقع .. بيصحى من صدمته باجر اكييد لان الدكتور قال انه الي فيه بسبب صدمة .. وبيرجع نفس قبل واحسن بصدمة .. يعني هو انصدم بزواجة وصار بداومة من الافكار يحكمها عقله الباطني .. ويوم بيتزوج ويملجون عليه بيرجع من صدمته .. وبيرجع لنا نفس ماكان .. يارب يرجع نفس ماكان .. اييه ماقلت لكم .. امس قلبت البيت فوق تحت ادور منصور .. واخر شي لقيته نايم ويا ماجد .. يوم سألته ليش نايم هني .. قال لي اخاااف!!!... تصدقون كسر خاطري .. وساروة كسرت خاطري اكثر شلون بتكون حياتهم؟.. بس اكيد منصور بيصحى من الصدمة الدكتور قال ..

ابتسمت يوم جفت ماجد قاعد عند محمد .. ومحمد يقوله شلون يتعامل مع زوجته .. خصوصا انهم بيتزوجون جدام الناس ولازم في امور بديهيه يعلمه مثل شلون يلبسها الشبكة وجي .. ضحكت بفرح يوم جفت الكل ملتهي ومنشغل بزواج منصور .. حتى الخدامات ياقلبي عليهم مستانسين ويسون كل شي عشان منصور .. للمعلومة ترى منصور محبوب وااايد من الخدامات .. لانه مايصرخ عليهم ويعاملهم نفس الناس .. اما محمد فهو مايتعامل ويا حد غير مرته ونادرا اذا قعد ويانا اغلب وقته بالشغل .. وسالم نفس الشي كل يومين مسافر مكان .. وامي افكورس ابصم بالعشر يكرهونها الخدامات .. ابوي .. ممم .. ماادري بس يعاملهم عدل .. ااه .. من بقى؟ .. ايه شهد زوجة محمد قطيييييييييعه .. اكيد مايدانونها كله تتأمر وتصرخ .. اوفف .. لا تعتقدون اني مااحبها .. لا لا .. احبها .. بس ماتعجبني تصرفاتها .. وايد تحقر بالناس .. يا لانهم فقارة يا بسبب لونهم يابسبب جنسيتهم .. يعني تعاملهم على اشكالهم مب على جوهرهم او انهم ناس ولازم تحترمهم ...

شربت شاي بعد مايابته الخدامة .. جفت منصور متملل ويطالع ماجد الي اربع وعشرين ساعه يلعب سووني ..

وشي وهديتهم رحت لغرفتي .. جفت فستاني البحري .. وابتسمت .. مشطت شعري وبدلت ملابسي .. لبست عبايتي وشيلتي .. تعطرت بالخفيف .. ومسكت جنطتي الصغيرة .. وخذت موبايلي ودعسته بالجنطة .. نزلت تحت .. جفت ابوي يقرا جريدة .. وامي تصارخ ع الخدم وتقول لهم شيسون وشلون يقدمون .. صح نسيت اقول لكم الملجة بتكون ببيتنا .. ليش ان امي تتفشل تعزم رفيجاتها على بيت اهل سارة لان بيتهم مب كبير نفس بيتنا .. ياريت بيتنا نفس بيتهم يمكن الغرف الضيجه تقربنا من بعض !.. ابتسم لي ابوي :ياهلا بشيخة البنات كلهم ..

ابتسمت بخجل ورحت بست راس ابوي: هلا فيك .. مممم .. يبه .. بروح لسارة اليوم ..

طالعني شوي وعقد حياته ورد يقرا الجريدة:ليش؟

ابتسمت ببراءة: يبه باجر الملجة ولازم نتحنى بروح بيتهم الحنايه هناك ..

طالعتني امي بصدمة : نعم نعم؟ مابتروحين صالون ريجينسي؟ ولا صالون فورسيزن؟

ابتسمت ياحب امي للفشخرة حتى بينا وبين بعض: لايمة بالبيت احسن اخذ راحتي اكثر

امي بعصبيه: لا بتروحين وياي انا حجزت لج وياي !!

طالعت ابوي الي يقرا جريدة ابغيه يكون لي عون .. طالعني ورد عدل نظارته: امج صاجة روحي وياها ..

لا يايبه والله ماتوقعتك جي .. ع العموم شنو اتوقع منهم كل واحد منهم رافع خشمه فوق ومايجوف احد جدامة .. الله يعين .. عشان جذي الناس يكرهون الاغنياء ... لانهم دوم جذي .. بس انا مب نفسهم والله مب نفسهم .. تنهدت .. كنت فرحانه ..والله يسامحهم خربوا فرحتي كلها .. قمت من مكاني بدخله سالم

اوووه رد من السفر؟ .. دش وهو يبتسم والاخ محلق ومتكششششخ اخر كشخة وريحة عطرة تسبقه : هلا والله ببيت المعاررررررييييييس

ابتسمت ونقزت ابوسه .. انا احب كل اخواني على الرغم من عيوبهم الفضيعه والبشعه الا اني احبهم .. واحب منصور وساااالم اكثر شي .. حتى اكثر من مجوود .. بس سلووم فيه خبببث اكثر واااحد بس يدش القلب .. : حبيبي سلووومي ..

سالم فتح يدينه وضحك وهو يضمني: حبيبتي وحشتيني ياقلبي ياعمري انتي .. طالع منصور .. منصور نسوي لك بروووفه عشان تسوي لسوير .. وغمز لمنصور

اما منصور كان مفهي يطالعه ومو فاهم

ضربته على راسي: سلووم

ضحك وباس راسي: شلونج حبيبتي؟

ابتسمت: بخير .. مابغيت ترد ونجوفك يومين على بعضهم .. قلت بفرحة .. بااااااااجر ملجة مومو

ضحك سالم: ههههههههههههه مومو .. شخليتي لسوير عيل .. همس لي .. تصدقين ودي اجوفها من 4 سنين منخشه عنا عنبوه بناكلها

ضحكت : باجر بتشوفها ..

يحليله سلوم اكيد اشتاق لجوفتها من زمان عنها 4 سنين ماجايفها اكيد تغيرت .. فديت سوير من مايشتاق لها؟

ايتسمت بس امي ماتخليني بحالي: سلووووووى جاهزة

ابتسمت ببساطة: ايه يمة

طالعتني امي وبعدين قالت: بنت سفير ولابسه عبايه سودة مافيها لا شك ولا شي؟ شالعبايه حتى خدامات القصر مايلبسونها ..

ياربي على امي .. كمل عليها سلوم: أي والله سلوى عمري لبسي عبايه عدله شهالعبايه مافيها فصوص!!!

اكملت والله .. اكملت !!.. غصب مابي .. يه : يمة عشان الحنه لاتخرب عباياتي اليداد
<الله والحجج

امي: سلوى بدال العبايه بسوي لج 3 .. بعد ماتلبسينهم ليش..

اوفففففففف فكل شي يتحكمون تصدقون حتى بابتسامتي امي تتحكم .. ياربي .. : يممممممة بنروح صالون مب عرس

قالت امي وهي تعدل شيلتها جدام المنظرة : يمة روحي غيريها ..انتظرج بالسيارة

طلعت تنهي أي نقاش .. اوففففففففف .. ياربي شهالعيشه شهالحاله والله رايحة صالون اتحنى مو رايحة عرس!!!!!

^^^^^^^^^^^^^^

"سالم "

رحت قعدت عند منصور .. مسكين يكسر الخاطر مايدري عن أي شي بذاكرته ..اوف اوف اوف .. شي فضيع .. شلون بيتعامل ويا سارة .. سارة سارة سارة ..ياترى شلون شكلج ياسارة .. يامرت اخوي العزيز ..

رن موبايلي .. "اللولو " يتصل بك ..

شتـــــــــــبي ذي؟ اوفف .. عفتها والله .. انا انسان يحب التغير مايحب يستمر مع شي اكثر من اسبوع .. وذي من يومين تتصل فيني شتبغي .. عورت راسي؟ .. شذكرها برقمي؟ .. الحين لي سنة ونص مفارقها .. اذكر انها كانت من جيراننا .. وتزوجت .. يالله شبخسر ارد عليها .. وانقابلها يمكن احلوت بعد الزواج .. خو بعد الزواج محد بيشك فيها لا طلعت وياي .. ولابيشكون بعذريتها .. هههه .. أي والله شحقه معور راسي ..

ابتسمت لمنصور الي يطالعني بفضول وقلت له : سلام ياعمري .. رايح فوق ارتاح .. تجي وياي؟

ابتسم منصور ببراءة : اوكي ..!

مااصدق احين هذا منصور .. والله يازينة ياحلاته وهو جذي .. اقدر اسوي الي ابغيه وبحريه بعد . ولا بيفهم شسالفه .. قبل كنت اتضايج منه يوم يدش داري وانا اكلم حبيبات قلبي بس احين شفهمه!

صعدنا باللفت وانا اقوله عن سفرتي وهو يقولي عن لعبه بالسوني .. ياحليله ..

دخلنا غرفتي وظل يتأملها شوي .. وبعدين قرب صوب العطور .. كانو ملخبطين .. من الي ملخبطهم؟... عصبت اكيد الخدامات الزفتات

رن تلفوني وحطيته ع السبيكر : هلا والله بالقاطع

ابتسمت لها صوتها مثل مااهو الا ان لحن الدلع زايد شوي: هلا حبي .. لا قاطع ولا شي .. انتي الي قطعتي لج فترة

ضحكت بميوعه: شسوي ظروفي جذي .. ممم سوسو مم ممكن نتجابل ابغيك بموضوع مهم ..

سوسو؟ .. من متى .. مو كنت سوي صرت سوسو؟ .. يالله .. شتبي؟ الله يالدنيا قبل اقول لها بجوفج من عند باب بيتكم تقولي مااقدر اخاف .. اخوي ابوي .. ومااعرف ايش الحين هي تقول لي ابغي اجوفك؟ والله دنيا : دقيقه قلبي ..

صرخت برع الغرفه على الخدامات .. ويو 4 منهم الي ينظفون صرخت فيهم : من الزفته الي منظفه التسريحه .. اشرت على التسريحة .. كلهم ساكتات .. صرخت ..: مــن؟؟؟

ساري: مايدري ماما سلوى يروح غرفه مال انته 3 يوم قبل الحين ..

سلوى؟ شتسوي يايه غرفتي؟ .. جفت وحدة من الخدامات جسمها حلو وشعرها بعد ناعم .. شكلها صينيه .. وشكلها صغيرة بعد .. قلت بعصبيه: زين ذلفو ..

مو جنه هالخدامة يديدة؟ ماجايفها من قبل .. سمعت صوت لولو: عمري؟

اوووه نسيتها ذي بعد قلت اسايرها: قلبي اتسبح وادق عليج اوكي؟

ضحكت بميوعه: اوكي ونتفق لاتنسى

ابتسمت: انسى اسمي ولا انسى الموعد

ضحكت وصكرنا .. جفت منصور يلعب بتلفونه .. اوووه زين يعرف يستخدمة بعد؟ .. خوش والله تطوراات

ابتسمت .. ودشيت الحمام اخذ لي دششششش .. وبعدها بطلع اعلم منصور امور زوجيه لايفشلنا جدام بنت العم

^^^^^^^^^^^^^^^

"سارة"

اسمع التلفون يرن ويرون ويرن .. ومالي بارض ارد اعرفها مرام بتذكرني ان الحنايه يات يعل يحنون جتوفك يامنصور بحديد .. مسحت دموعي .. ورحت اتسبح .. وبعد ماتسبحت .. وهديت مشطت شعري ورفعته بشباصة بسرعه .. ولبست برمودا عنابي البدي يده قصيرة ايجي تقريبا لـ ربع اليد .. نزلت على الدري بهدوء .. البيت كان مليان ازعاج وتلفونات ..

جفت يسوف مقعدينه بكرسي خاص لليهال وهو يصاااااااااااااارخ حتى ان عروج رقبته طالعه من صراخه ويصيح صياح يبغي يلعب بالحنه ويخرب الصاله .. طنشته .. احسن يتأدب مجع شعري كله .. ابتسمت للحنايه .. وقعدت على الجريدة .. حطت تحت يدي كلينكس وبدت تحنيني وتسولف وياي .. وعععععععععع ريحة الحنه لوعت جبدي ريحة بترول استغفر الله .. واااي .. برجع الحين على راس الحنايه .. الريييحة قووويه .. مااقدر استحمل اوففف .. يعني غصب اتحنى؟ البنيه تتحنى لريلها لانها تحبه وتبغي تكون باحلى زينة وانا ماابغي هالمينون .. يات حنايه ثانيه وحنت يدي الثانيه وقعدوا يسولفون وياي .. وانشغلت وياهم .. ماشاءالله يعرفون يحنون .. طرت على بالي سلوووي .. وينها تاخرت كلمتها قالت بتيي ؟ .. قلت لمرام : مرووم اتصلي لسلوي جوفيها وينها تأخرت

مرام : اوكي ..

اتصلت فيها مرام وبعدت .. اوف صوت الاغاني صك اذني .. اكرة الاغاني اكره كل شي .. اوففف متنرفزة ماادري شفيني ... هديت نفسي .. تذكرت ماجد اخوي وانه مابيحضر لا عرسي ولا ملجتي .. ولا أي شي .. حسيت اني مخنوقه وبصيح .. شفيني؟ .. من ثلاث ايام ابغي اصيح ومااقدر والحين على أي شي ابغي اصيح .. شكلي من كثر ماعيبت على منصور صرت نفسه .. اوففف مااطيق اسمه .. وععععع يلوع الجبد .. ابوي محد مابيحظر ملجتي .. طاحت دمعتين من عيني اليسار ..

جافتني الحنايه وقعدت تقولي لاتصيحين وماادري ايش بالهندي وانا مفهيه وماافهم شي

بعد دقايق يات مرام : تقول سلوى بتروح الصالون

طالعتها بصدمة: بس انا قايله لها وقالت بتيي

هزت جتوفها مرام: ماادري جذي قالت لي ..

تمنيت احك يبهتي .. ماادي ليش اسوي هالحركة يوم اتوتر او اتضايق ... يعني والله مااحس احد فرحان .. يمكن لاني مغصوبه فاجوف الدنيا بشكل غير؟..

تنهدت : مرام اتصلتي لربعي الي كتبت لج اساميهم بورقه تأكدين عليهم ايون باجر؟

ابتسمت مرام: ايه افا عليج اتصلت لهم .. بس شيما قالت يمكن تتأخر وماتتي من العصر ..

هزيت راسي بتفهم .. كنت قبل يومين رافضه أي حد ايجي العرس وماابغي اعزم حد .. لاني كنت اعتبر هالشي مو من حقهم لاني مب فرحانه .. ومب متزوجة من طيب خاطر ولاني حسيتهم بيزفوني لقبري واصعب شي ان الاحبه الي نحبهم هم الي يودعونا .. بس غيرت رايي عرسي مابيتكرر مرتين صحيح اني ماابغي منصور .. بس فرصه اشوف الناس ويشوفوني .. وبعدين مرت عمي المغرورة جذي ولاجذي بتعزم رفيجاتها فليش مااعزم رفيجاتي انا بعد

بعد ساعه ونص نشفت الحنه واقدر احرك يدي وامسك الاشياء .. طبعا يسوف كان مزعجنا كل شوي ايي ويخرب الصاله وتيي مرام تشله وتطلع .. طبعا شلوه من الكرسي لانه سوى لنا عررررس من صراخه .. اوففف مزعج ..

بفتقدة .. تلألأت عيني .. شوي ولا نقز بويهي وقعد يمسك يدي .. ويوم بغا يمسك ريلي صارخت صراخ .. لان الحنه ماكانت ناشفه .. :لاااااااااااااااااااااااا يوسفوه انجلع اطلع برع الصاله انجلع ..

طنشني وقعد يناقز على الكراسي لين طاح وقعد يصيح .. فديييييييت عيونه والله .. كان خاطري اقوم بس مااقدر ريلي فيها حنه .. بعدها بدقايق .. انترس البيت من رفيجاتي وعماتي وبنات خوالنا وجي .. كانو ياين يجوفون الحنه ويقعدون معانا .. كنت ابغي اقوم واسلم عليهم بس ماقدرت مثل ماقلت لكم بريلي حنه .. وماابغي اخرب النقش لانه حلو وعجبني ..

بعد شوي يات سلوي وكنت زعلانه منها وايد وايد وايد .. حتى مارديت عليها .. يات وقعدت عندي على الارض: سوسو حبيبتي والله مو قصدي .. همست باذني مجبورة والله .. وقالت بصوت عالي : ماقلت لج شصار

طالعتها بضحكة: لا ماقلتي شنو؟ شصار؟

سلوي ضحكت : قصيت عليج هههههههههههه

ضربتها : سباللللللله

ضرخت علي : بتخربييييييييييين حنتي

انا بعد صرخت : ويه حنتي

ضحكنا ويا بعض .. وعد : مالت عليكم ثنينكم يالمخبل

الهام : لايفوتج بعد سوير وبتتزوج وللحينها خبله

ضحكت وكملت سلوي : بتخبل اخوووووووي

قلت بصوت واطي بس مااظن سمعته: بروحة مخبل مايحتاي اخبله

قعدنا نسولف ونضحك .. وبعد ساعه .. هديتهم ورحت فوق وشليت الحنه ودهنت يديني بالفكس وريلي بعد .. ونزلت لهم بعد مالبست جلابيه مغربيه بلون زيتوني <اموووووت بهذا اللون اصلا حلو على بشرتي ...وكان فيه شك وتطريز .. امي كانت مسويته لي .. المهم قعدنا نسولف لي المغرب ..

وبعدين كلهم ردا بيوتهم .. وياتني مرة الصالون وسشورت شعري قلت لها تخليه مفتوح لانه قصير وخلت حركة الشعر على برع وطلع يهببببل .. وبعها يات الممكيجة ..ومكيجتني .. وجذي .. قلت لها تحط لي شي خفيف وايييد .. لأن الليله بييون لنا ناس يباركون لنا ..وكنا مسوين لهم عشا وجذي ...

ع الساعه عشر ونص .. حسيت اني هلكانه ميتة .. حتى اني ماتعشيت .. رحت لداري وسيدة غسلت ويهي .. ورقدت .. قمت على صلاة الصبح بروحي .. نزلت تحت .. ماادري ليش كنت متحمسه اليوم .. سويت حليب بالزعفران سويته بس لاني احبه المهم .. ناديتهم للصلاة .. ورحت صليت .. وجفت نفسي بالمنظرة كان شكلي متغيير شوي .. بس كنت حلووووة .. فديتني .. هههه .. نزلت ببجامتي كنت لابسه بجامة يدها طوييله وبانطلونها بعد طوييل .. لونها بيج .. حرير شايرتها من ماركس اند سبنسر

يات مرام تحت : سرووووووووي فديتج مبرووووووووووك

ابتسمت كنت بسالها ليش ؟ .. بس تذكرت اليوم ملجتي .. حسيت بالبرودة .. اوففف برررد ..: الله يبارك فيج .. مو جنه بررررررد ..

ضحكت مرام : ايه الحين وقت الشتا لازم برد ...

شوي ونزلت امي وتيمعنا وتريقنا .. وبعدها رحت غرفتي .. اجمع بقيه ثيابي .. جفت دفتر عزيز على قلبي دفتر ذكرى .. من يوم انا بالابتدائيه هو عندي ..

قعدت اقرى واقرى .. في بنات اذكرهم للحين .. وفي بنات لا .. كنت اضحك ضحك على حجيهم .. صج كنا يهال .. ومانعرف شي بس جذي نكتب .. بس والله ايام ماتتعوض .. ابتسمت لين وصلت لمرحله الثانويه .. هني عاد كان الهبال من قلب ... والبنات كل وحدة تتفنن وتكتب احلى ذكري ..

صحت شوي على بعض الذكرى للبنات العزيزات على قلبي والبعض الثاني ابتسمت لان للحين لهم ذكرى بقلبي .. صكرت الدفتر .. وانبطحت على السرير .. وبين لحظة والثانيه من ذكرياتي .. غفييت ..

^^^^^^^^^^^^^

"سالم"

قمت الصبح بسرعه متحمس للموعد .. ياترى شتبغي لولو؟ .. شالي ذكرني فيها؟ .. اتصلت الريامي .. شسمها ماادري مااذكر <من كثر البنات

مارديت عليها .. خلها تولي .. تمللت من ويهها ..

نزلت تحت كالعادة محد على السفرة .. نجتمع بس على الغدى واحيانا بعد مو دايما

دخلت المطبخ .. جفت هذيج الفلبينيه ماادري الصينيه .. لعنبو عليها جسسسسسسم .. اوففف ولا المونيكان له نفسه .. طوييله .. وبيضه شوي .. عيونها خطة قلم .. وخشمها شوي مدبب .. مممم .. حلجها صغير جنه تمرة .. رحت وراها وشكلها ماانتبهت لي كانت تقطع الجبن .. مسكت خصرها نقزت .. صفرت لها .. وهي طالعتني اول شي باحراج بعدين قامت تضحك وتهز راسها ..

عضيت على شفايفي .. يوم سمعت صوت سلوى .. وقتج ياسلووه ؟؟.. اوفف هادمة اللذات .. بعدت عنها .. وقلت لها تيب لي اكل هي وضحكت لي وقالت لي انزين .. حركت يديني .. وطلعت من المطبخ .. لقيت سلوى تضحك .. طالعت الساعه ساعه 9 شمقومها من نومها ذي؟ تعكر مزاجي .. الله ياخذ بليسج ياسلوى مخربه علي .. اووففف ..

قعدت بضيج عندها

ابتسمت ولا جنها من شوي مخربه علي : صباح الخير

رديت من طرف خشمي: صباح النور

طالعتني شوي : اوففف المزاج متعكر شفيك؟؟

طالعتها وجنها مجرمة .. وتقول شفيني كفايه خربتي علي .. وتسأليني بعد بقواة عين ؟ ..:ولاشي .. يالله انا طالع

قالت لي : تعاااااال اليوم ملجة اخوك وين رايح

قلت بعصبيه: طالع طالع برجع الغدى

اوففف هالملقوفه شدخلها غصب تعرف والله حاله ..

^^^^^^^^^^^^

باللـــــــــــــــيل ..

"لولوة "

جفت نفسي بنظرة اخيــرة كل شي تمام .. زودت من روجي التوتي وعطاه شكل اكبر من حجمة الطبيعي وحطيت جلوس عطاه لمعه وحيوية.. مسكت الكحل وزودت الكحل شوي ..

جافني علي وصفــر :ياعيييييني ..

ابتسمت .. اشبع غروري صراحة..: تسلم عمري

علي : على وين العزم؟

ابتسمت بحالميه : بروح عرس ..

هز راسه بتفهم :تبيني اوصلج؟

ابتسمت: اذا ماعندك مانع حبو ..

علي : من عيوني .. الحين بتروحين .. طالع ساعته .. مو جنه متاخر ..

طالعت ساعتي الفخمه كانت الساعه 10 وربع :لاحبي هم من الطبقه الراقيه توها السهرة باديه

ابتسم: اوكي يالله ..

ابتسمت بانتصار .. اخيرا راح اشوف منصور .. اخيـــراً ... بشوف مرته وبتشمت فيها .. وهم بخبرها عن حبنا الاسطور .. ااه ..ههه اقصد حبه الاسطوري .. ماانكر اني كنت معجبه فيه بس زال الاعجاب بسرعه ..

اممم الي اعرفه انه بيخل يلبسها ع الساعه 11 الا ربع .. يعني يمديني اشوفه قبل لا يدخل .. طلعت من البيت بعد ماتهاوشت ويا علي هو يبغيني اغطي ويهي وانا مو راضيه .. عيل متكشخة حق شنو عشان اغطيه؟ لا والله؟ .. واخر شي مشت كلمتي .. دشينا السيارة كان معصب .. وووه .. مايسوى علي ...

شفت نظرات الاعجاب من بعض الشباب .. بس صديت غصب علي .. علي وياي ومستحيل ابين له .. سويت نفسي ثقيييييله موووت .. حتى ماعطيتهم نظرررة ..

وصلت بيتهم بعد ظرف نص ساعه .. قبل لا انزل زيدت الجلوس وزيدت الكحل .. وقبل لا انزل قررت ارضي علي.. بسته على خدة بسرعه : حبيبي مرني ع الساعه 12 ونص .. ماابغي اطول .. سويت روحي مستحيه .. اشتقت لك بنسهر ويا بعض

ابتسم لي من قلبه :على خير

مسكت ضحكتي لااضحك جدامة .. وطلعت من السيارة وانا اتمخطر .. دخلت .. شفت واحد عررريييض لابس ثوووب ابيض .. وغترة حمرة .. ومسويها ترمبه .. ودققت اكثر .. كان ابيضاني شوي عيونه وسييييعه بس ناعسه بنفس الوقت خشمة طوييل بس مب وااييد يعني يعتبر متوسط .. شفايفه متوسطة ومليانه شوي .. خدودة حمر ..شكله من البرد .. بسرعه ناديييييييييته ..:منصــور ..

التفت يمين ويسار .. وبعدين صد لصوبي .. ابتسمت له .. حسيت اني من زمان ماشفته .. رخيت الشيله .. وخصل من شعري نزلو على ويهي .. وانا اعرف تأثيرهم عدل على الريايل .. قربت لعنده وهو ماتقدم ولا خطوة .. شدعوة ماوحشته؟ ..

شفته:نسيتني؟ ..هاي وانته واعدني بأنك ماتنساني وماتتزوج بعدي ..

رفعت راسي شوي .. وشفت عيونه .. كان شكله عادي وابداً مب متأثر ولا كأني اكلمة.. شفيه؟ .. قبل اسبوعين كان متلهف على شوفتي وانا تثيقلت عشان اشوف غلاتي .. شكله للحين شايل بخاطرة .. مسكت جتفه : منصور انا لولوة .. شفيك ؟؟

طالعني ببساطة وقال لي وهو يأشر على نفسه : تعرفيني؟؟

انصدمت .. صدمة عمري .. شفيه؟ يستهبل علي ولا يستهبل .. عصبت : منصور انا لولوة حبيبتك!

طالعني وهز جتوفه : مااعرفج .. مممم .. تجوفين لي الدرب امي تبغيني شوي ..

طالعته بصدمة :حبيبي ...!!! ليش ماتذكر؟

طالعني بصدمة : انا.. انتي .. انتي من وين تعرفيني؟

لا شكله خررررررررف من قلللب .. :انته تعرضت لفقدان الذاكرة ولا تستهبل علي؟

طالعني وقال لي بصدق: احلف لج عشان تصدقين اني مااعرفج؟؟

ابتسمت .. مسكين صار مينون لانه يحبني .. ياحبيبي .. مسكينة بنت عمه هههههههههههههههههه شلون رضت فيه؟؟ .. اكيد فيها عيب ولا مخبله نفسه؟ هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه : اوكي .. من عيوني ..

دشيت وانا الدنيا مو سايعتني .. شبغي اكثر من جذي؟ ريايل متخبلين علي .. فديتني ..

^^^^^^^^^^^^^^

"سلوى "

دخل منصور .. الصاله كانت منظمة ومرتبـه .. والبوفيه بطوله مالي الصاله .. والنسوان من كل الاجناس من كل طبقات المجتمع ماليين الاربع الصالات .. وفي صاله خامسه .. خاصه بس للبرستيييج للي هاي هاي هاي هاي .. امي هناك قاعدة ويا ربعها ..

ابتسمت وانا امر بينهم ووصلت لسارة .. الي كانت لابسه اممم فستان طاوووسي رهييييييييييييييييب رهيييييييييييييييب على جسمها كانت يدها اليمين عاريه مش كلها لا اليد لين ربع الذراع .. واليد الثانيه عاريه بس مغطيه بسلاسل من نفس الوان الفستان .. كانت ساروه تهبببببل .. تبون الصج انا مااعرف اوصف خخخ انا فاشله بالعربي .. المهم اتصل منصور وقال بيدش .. وقبله بشوي دشت وحدة لابسه فستان شوي عاري بس يهبل وجسمها ماشاءالله لا اله الا اللله ايجنن .. كانت بييييييضه واللون الاحمر اينن عليها .. الله يحفظها .. مممم ايه انا كنت لابسه فستان بحري .. دخل منصور .. وامي يايت وياي .. ووريناهم الشبطة والهدايا من منصور .. تقدم منصور وهو مستحي ونظرات الكل تراقبه ..

تقرب من الكوشه .. والاغاني زاعجة الدنيا .. كنت اضحك وابتسم .. مستانسه ياناس .. بس بنفس الوقت احس بحزن ..المهم خلونا فرحانين .. تقرب منصور لين وصلنا لسارة .. الي كانت جنها حوريه من الجنه ..

وقفت هي بعد .. وقف منصور مو فاهم شي .. قال لي :سالم قال لي اسألج شسوي؟ ..

ويييييييييييييييييييييه ياربي لايكون نسى الي حفظناه ياربي .. من الربكة قلت له: بوسها ..

قال لي :ها؟ ..... استحي ..

نزل عيونه للارض

ضحكت عليه: منصور يالله لازم تبوسها على راسها ..

طالعني بتردد .. وبعدين قرب من سارة وباسها بسرعه ووقف حذاها .. شوي ويات امي باركت له وانا بعد باركت له .. ويابت وياها الشبكة.. وقالت له يلبسها .. هني عاد توهق منصو رمن قلب هههههههههههههه ؟.. ساعدنا ولبسناها .. وساروه كانت محمرة .. وتفرص بيدي ههههههههههههههههههه .. فديتهم ..

صور وياها شوي .. وبعدين طلع ..

سلطانه: هاسوير اجوفج محمرة

سارة باحراج: حرام عليكم تفشلوني

ضحكنا انا وسلطانه على ساروة يحليلها .. تمينا قاعدين وياها ونسولف وكل ساعه وحدة من رفيجاتنا يات تسلم .. ونقوم لها .. لين صارت الساعه 2 ونص .. وبعدها خفت الزحمة ..

طبعا الناس تعشو ع الساعه 12 ونص .. وبعدين تمنينا نرقص ونسولف ونضحك .. ونتحجى عن امور وااييدة .. امي كانت تخزني بنظرات قويه لاني كنت اسولف ويا رفيجاتي بدون تحفظ ولاني بعد ماسلمت على كل رفيجاتها ماشاءالله عليهم شكثر وين اقدر اسلم عليهم رقبتي بتنكسر وهم للحين ماخلصو ..

بس سمعت تعليقات ضايقتني وااايد .. ومنها

:جوفوها بنت السفير .. يالله على رفع الخشووم
..: جوفوا فستانها اكيد من فرنسا ولا ايطاليا .. ولا بنت سفير وتخيط فقطر
..: مالت شهالعايله المغرورة

..: فسسسسسسسق يشترون فستان ب4000 وغيرهم من الدول محتاج ل500 ريال ومستكثرينها عليهم

..: هاي ابوها السفير ورافعه خشمها لاصار ابوها ملك دوله شبتسوي؟

..: مايطالعون الناس الا باطراف عيونهم مب عاجبينهم؟؟

وواااااااااااايد من التعليقات الي اذتني .. كان ودي اصرخ واقول لهم بس سكتو سكتو .. كانو يقيموني وكأني تمثال من تماثيل البيت .. مو كأني وحدة لها مشاعر واحاسيس .. كان بينهم تعليقات اقوى .. بس نفسي مب راضيه تخبركم .. كفايه انا سمعتها وسكت ..

صعدت غرفتي بعد ماطلعو الناس .. وبعد مارجعت سارة واهلها لبيتهم .. غيرت ملابسي .. ماكان لي بارض امسح مكياجي .. بطني يعورني من اليوع .. نزلت تحت شفت منصور وسالم يتحجون .. قعدت عندهم ..

سالم: ها منصور عسا عجبتك سارة؟

طالعه منصور باستغراب: من سارة؟

قلت له: زوجتك !!

سالم: يالمخبل ماتعرف اسمها للحين؟

ابتسم منصور: امي تقول اسمها سوير ام الفال

فتحت عيوني بوسعها .. امي وحجيها بعد .. لو قايل جدام الناس جذي .. صج فضييييييحه .. مسكينه ساروة شكلها امي مابترحمها

الله يعين .. خذيت لي اكل ورجعت الصاله وكان منصور قاعد يوصف سارة قلت بعصبيه : منصووور عييب

منصور ببراءة : هو قالي شنو كانت لابسه

طالعت سالم بنرفزة : سلوووم ..

ضحك سالم وقال لي : سؤااال بريء شفيج معصبه

سكت سالم وبعدين قال: يالله انا بروح ارقد وراي قومة ومعابل من الصبح لعرس الحبيب .. تصبحون على خير

انا ومنصور: وانته من اهله

قلت لمنصور بعد ماراح سالم: منصور عيب وحرام توصف مرتك جدام أي احد

منصور: بس انا ماعندي مرت ..

ابتسمت بتعاطف: امبلا حبيبي .. زوجتك يعني مرتك .. وانته متزوج .. ولازم ماتوصفها لاحد

هز راسه بطاعه وسالني بعدها : ليش؟ ..

قلت ه ببساطة عشان يفهم: لو ابوي قال لك سر وانته قلت لاحد ابوي بيعصب لان هالشي يخصه ومايبي حد يعرف .. نفس الشي سارة شي يخصك ولازم ماتقول لاحد عنها ..

قال لي ببراءة : بتزعل بعدين؟

قلت له وانا اكل: ايه .. وبعد الله بيزعل عليك ...تبغي؟

هز راسه بتفهم وقال لي : لالالا ابغي ارقد ..(قلد سالم) وراي قومة من الصبح حق عرس الحبيب.. تعالي من الحبيب؟

ضحكت عليه وبعدين قلت بحزن : يقصدك انت

ضرب يبهته بطفوله: ايييه صح نسيييت .. يالله باجر بتزوج ..تتزوجين وياي؟

ضحكت وقلت باحراج: منصور حبيبي روح نام ..

ابتسم: ليش تضحكين

قلت بفرحة: لاني مستانسه لك .. تصبح على خير

قعد يجوف السقف .. وبعد دقايق وجنه تذكر شنو يردون : وانتي من اهله ..

وراح فوق .. ابتسمت .. وبنفس الوقت ماتت ابتسامتي ..

^^^^^^^^^^^^^^^

باليوم الثاني بنفس هالوقت ..

عالساعه 10 ونص بالضبط .. انزفت سارة وهي باحلى حله .. الثوب الابيض يزين جسمها .. والالماس يزين هالفستان الغالي .. الطرحة المرصعه بالالماس والكرستال تتلامع مع الاضاءة الخفيفه .. القاعه الاسطوريه الذهبيه مخليه سارة وكأنها لؤلؤ طالع من البحر خصوصا مع الاضاءة الذهبيه الي عكست لون ثيابها الابيض بلون لؤلؤي شررح .. مكياجها الخفيف الوردي معطيها هاله من البراءة والجمال .. وعقد الالماس الثقيل مزعجها بس طالع برقبتها احلى من ماكان بالعرض .. زحمة الناس تخلي الواحد يحس بالفرحة غصب .. وتوتر العرايس شي اكيد تحس فيه سارة ..ترتيب الطاولات والشموع الي تضيء دربها للكوشه .. وريحة العوود ساحرة المكان .. ومخليه الناس يطالعونها بذهول .. هذي العروسه الصغيرة مرت ولد السفير .. اتيينن .. الكل يهلل ويكبر .. والكل يبارك لـ ام محمد .. وام محمد رافعه صدرها بفخر بزوجة ولدها الصغيرة الجميله .. اختيارها ماكان خاطئ جمال سارة تحسدها البنات عليه .. واليوم جمالها زايد ..

من استقرت سارة على المسرح ابتدوا المعازيم يباركون لها ويتعنون لعندها بس عشان يشوفون جمالها من قرب ويحددون ملامح الابداع الي رسمها الله لها .. الرقص والربشه كانت ماخذه الجو بشكل عام .. والفرحة والدموع كانت طايرة بام سارة للسما من الفرحة .. بنتها الوحيدة تتزوج .. وتاخذ احسن اولاد السفير بنظر الام .. شتبغي اكثر من جذي

وحدة قاعدة على جنب وودها لو تروح وتكفخ سارة وتفتك منها .. وتشيل الانظار المتوجهه لسارة وتخليها لها وبس .. شكثر تكره الاعراس لان الانظار تكون ملتمة للعروسه .. وهي ماتلاقي الا نظرات خاطفه نظرا لانها متزوجة .. الا انها تحصل انظار كثيرة بس الجشع والطمع معمين عينها

وبجنب ثاني البنات يتراقصون مع اللحن الموسيقي .. ويروحون للعروسة كل شوي .. وغير صديقاتها الي معسكرين عندها وترقص وتصور وياها .. وهي البسمة مافارقت محياها ... الاكيد مب عشان ارتباطها بمنصور بس الاكيد لانها تجوف فرحة الكل لها .. واهم شي فرحة اهمها ومرت اخوها .. والاهم من هاي كله رضا ام ريلها .. وحبها لها .. سارة عمرها مافكرت بلحظة ان مرت عمها تحبها هالحب .. كان واضح من تصرفاتها مما خلى سارة تخجل من مواقفها الي اتخذتها من نورة "ام محمد" .. حست بأنها ظلمتها ..

شوي ويعلنون دخول المعس .. هني بدت اطراف سارة تبرد .. وكأنها تذكرت موتها .. بدت تبعد تفكير الموت من عقلها .. لازم تستانس وماتخرب ملامح الحزن فرحتها على الاقل جدام الناس .. صكروا الستارة الي جدام سارة وظلت بمكانها تترقب خروج الريايل عشان ينفتح الستار .. كانت متوترة موت .. وتتمنى لو الريايل يطولون ومايطلعون بسرعه .. لكن تأخروا وااايد صار لهم نص ساعه .. فتحو الستار بطريقه حلوة وحركة احلى .. شوي وتنصدم عينها بعين اغلى حبيب على قلبها

"سارة"

من جفت ماجد لميته بقوة وكنت بصيح بس سلوى كانت تهددني عشان مايخترب مكياجي .. كنت ابغي اعاتبه بس للاسف الوقت والزمن والمكان مايسمح .. ظليت اطالعه بكل شوق .. الحمدلله مافيه شي .. الحمدلله انه بخير .. عيل ليش ماكان يرد علي .. ؟؟.. متى وصل؟؟ .. سلمت على عمي .. مع اني كنت حامله شكثر عليه بقلبي .. الا اني بذيك اللحظة ماادري .. ممم حسيت انمسح هالحقد لفترة زمنيه قصيرة .. وبعدها طلع هو وماجد .. عيوني كانت متعلقه بماجد .. ومن اختفى من نظري .. التفت لقيت منصور يبتسم .. وعليه البشت الاسود .. وسكسوكته مجمله ويهه .. اول مرة اشوفه عن قرب .. حتى امس ماطالعته كنت احس بفشله وكنت اطالع الارض .. شوي وباس يبهتي .. افتشلت مت من الفشله .. وبعدها قعدنا نتصور .. تعبت تعبت تعبت .. من امس وانا مو نايمة .. احاول انام مو قادرة افكر بهاليوم افكر شبسوي اذا تصكر علينا باب واحد .. همس لي : مبرووك

لو ماكنت شايفه شفايفه ماسمعته من بين هالازعاج والصدعه .. حركت شفايفي بـ الله يبارك فيك ..

صوتي اختفى .. وين رحت ياصوتي؟ وين؟ ..

ماصار الساعه 1 ونص الا وطلعنا بعد ماقطعنا الكيك .. وشربنا شوي من العصير ..وهيا كله لان منصور بدى يتعب .. شفيهم .. تخسبقو .. مرة وحدة .. توقعت السهرة بتم لين 3 الفير .. لان بعرس محمد تموا لين لين 2 ونص .. لالالللا مابي اروح معاه .. حسيت اني انسحب سحب .. مشيت بهدوء .. ويده الدافيه ماسكة يدي .. كنت احس بالضياع .. كنت اشوف المكان .. وكاني اودعه .. ماكنت اعرف وين بنروح ... فندق ولا بنسافر ولا ايش بالضبط ..

بعد ماطلعنا من القاعه راح منصور صوب الريايل .. وانا رحت فوق لغرفتنا .. مسحت مكياجي وتسبحت ولبست .. يوم طلعت شفت منصور لابس وجاهز .. تفشلت .. نزلت انظاري .. ومشطت شعري المبلل ..

قال لي بهدوء: سارة خلصتي

طالعته بصدمة .. يحاجيني:ها؟.... ايه..

منصور : يالله بنروح

قلت بهبل:ها..

منصور:بنروح

نزلت نظري لاني انحرجت .. :وين بنسافر؟

ماشفته ولا عرفت تعابير ويهه بس الي شفته ريله الي تتحرك للباب: لا بنروح الشاليهات ..

سكت ماتحجت ولانه طلع .. لبست عبايتي وشيلتي .. وتعطرت .. قررت احط كحل .. حطيت كحل وجلوس وردي لامع .. وبعدها شفت سلوى والكل .. سلمت عليهم .. ومسكت ماجد على جنب : ليش ماكنت ترد علي؟

ماجد وهو يبتسم : تلفوني ضايع .. !!..

لا والله؟ يستهبل انزين والايميلات الي طرشتهم بالهبل: ماقعدت على النت

ابتسم: شفيج ناسيه كانت عندي امتحانات .. وبعدين زين مني حضرت العرس والله ماحصلت طيارة حتى مرتي ماشفتها على طول من المطار للبيت بدلت وتجهزت وحلقت .. ويت على طول عرس الريايل ..

توني بتحجى ولا تنطق سلوى وياريتها ساكته احسن

سلوى: ماخذته على جنب احين من ريلج ماجد ولا منصور

ودي اكفخها هذي تستهبل ولا تستهبل

توادعنا وبصراحة صحت .. بس مسكت نفسي وماصحت وايد .. كنت ابغي ماجد يوصلنا .. بس لانه تعبان وجذي.. فسالم الي وصلنا .. وصلنا للشاليها بعد ساعه ماادري ساعتين .. المهم .. طلع سالم ..
مايحتاي اقول لكم طول الطريج وسلوم يهرن ويهرن .. تصمخت من قلب .. ومنصور كان ساكت .. وانا بعد كنت ساكته .. المهم وصلنا وبعدها راح سالم

انا خذيت غرفه .. ودشيت الحمام ..غيرت ملابسي ومشطت شعري .. وتعطرت كالعادة ..وطلعت من الحمام.. منصور ماتحجى وراح لغرفه ثانيه .. الحمدلله اكيد حس فيني .. ويه مالت علي اونه حس فيني .. اكيد يبغي يتأسف من حبيبة قلبه .. مسكينة اكيد قلبها محروق وتدعي علي .. والله مو ذنبي عمي الي اجبرني ولا انا ماابغي افرق بينهم.. المهم انبطحت وانا احس بالغربه والوحشه .. المكان غرييب .. ويخوف .. قررت اكتشف الشاليهات باجر .. بقوم بسرعه وبروح .. بس اخاف منصور مايرضى .. لاوالله على كيفه هو .. غمضت عيوني .. حسيت بطرقات خفيفه على الباب .. قمت مفزوعة .. بسم الله الرحمن الرحيم .. لالال اكيد اتخيل اكيد .. رديت انبطحت .. حسيت الباب انفتح بهدوء .. التفت للباب .. شفته منصور .. ساحب فراشه ومخدته وواقف عند الباب

طالعته بعدم فهم ..قال لي وهو مستحي : معليه ارقد هني .. اخاف ارقد بروحي!

وييييييييييييييييه عشتو عشتو عشتو .. مالت علي ماقول الا مالت .. شالحظ .. متزوجة ريال خديه .. هه .. حظ المقرودة شسوي بعد .. قلت باحراج: اوكي!..

الحين بالله عليكم من المفروض يدق على الثاني يخاف انا ولا هو .. مالت علي .. شكلي بصير مسترجله وريلي يصير خديه ههههههههههه قالبين الادوار .. انبطح على السرير الصوب الثاني .. فتحت عيوني بوسعها .. يبغي ينام وياي ع السرير .. قصوره قصورة .. توني بانطق الا هو يقول لي

: تدرين سارة انا كل يوم ارقد عند ماجد

طالعته باستغراب .. اسلوبه وطريقه .. مب اسلوب ... لحظة لحظة .. مب فاهمه ... شسالفه!!:ليش؟

قعد وهز جتفه: ماادري من ثلاث ايام .. انا ارقد عنده اخااف .. وو و .. قال .. تعرفين تلعبين سوني؟

جفته بصدمة .. :ها؟؟؟؟؟

منصور ببراءة : تعرفين تلعبين سوني ..انا كل يوم العب ويا ماجد سوني .. ونلعب بي اس بي .. ايه تعرفين بعد .. بابا سجلني بمكان بس مااعرف هو يقول نفس المدرسة الي يروح لها ماجد بس تدرين مافي اولاد كبر ماجد ..

طالعته بصدمة .. ماافهم والله مو قادرة افهم شي : .................

منصور كمل : بابا يقول ان انا نفس ماجد نفس عقله بس .. ليش انا مب كبر ماجد ليش ماجد قصير وانا طويل .. ليش ماجد ماعنده جي (مسك لحيته وشنبه) وانا عندي ..

لالالا .. مستحيل منصور جذي مستحيل .. انا دافنيني دافنيني ويا واحد ياهل .. ياهل .. نطقت وانا ودي اصيح : دفنت روحي بالثرى معاك ياولد عمي ...