منتديات بنوته - عرض مشاركة واحدة

07-22-2010, 05:41 PM

وسلطان ماقصر علم ابوكم كيف يتعامل معاهم اذا هم اتصلو مره ثانيه يطلبو فلوس.. وجا اتصالهم وفعلا طلبو هالمره 5ملايين وكان ابوكم هادي معاهم مره وعرف كيف يطول معاهم بالاتصال وطلب يسمع صوتها لما جاه الرد بالرفض قالهم انا ادري انه بنتي ماتت من زمان وانتو تلعبو علي وقفل السماعه في وجههم .. وبعدها انتظرنا يومين وجاه صوتها وكلمها سألها اساله ماحد يعرفا غير سماح اكيد اشيا مانستها البنت وقت ما انخطفت كان عندها 9 سنين اكيد تذكر اكيد.. لما مالقا اجابه لاسألته قفل الخط بوجههم مره ثانيه .. عقبها جاه شعور انه البنت ماتت خلاص .. رفض انه يرد على أي اتصال من صوبهم وكل مايسمع الصوت يجيه يقفل الخط وسلطان عجز معاه يقنعه انه يتابع بس وقتها ابوكم تعب .. يمكن كان خايف انه يتاكد من موتها كان يقول دايم خلوني كذا عايش على امل انها ترد بيوم مرت سنه على هالشي وجاه اتصال لما رد وعرفهم قفل في وجههم وجاه اتصال ثاني وثالث وعاشر وهو رافض تماما انه يرد كان مقتنع انه البنت ماتت .. المره هذي جاني انا الاتصال وقالي الشخص ابلغ راشد انه وافق يشوف البنت وقتها حسيت انه قلبي وقف.. البنت عايشه طول هالمده عايشه واخيرا راشد بيشوفها وعطاني التوجيهات والانذارات .. قلت له اسمع بقولك انا مش ابو البنت اذا تبيني بكلمه يرد على اتصالك بس انا ماراح اوصله شي من الي قلته اسمع انا مالي دخل بموضوعك معاه البنت بنته ماهي بنتي واذا تبيه روح اتكلم معاه .. حسيته فقد الامل فيني وقالي طيب بدق عليه بعد نص ساعه بهالوقت وابيه..... ماعطيته فرصه قلت له طيب طيب يصير خير.. وقفلت واتصلت على سلطان على طول وخبرته وهو خذ اجرائاته وبعديها كلمت راشد وقلت له حسيته ساكت مصدوم .. قلت كذا ماينفع انا جايك بالطريق ياراشد.. وصلت عنده .. وجلسنا ننتظر تأخر المتصل كثير انتظرنا لحد الصباح وقتها رن التلفون وتكلم راشد ..فقل الخط وهو مو مصدق .. رمى نفسه وجلس يبكي ..قالي البنت عايشه بنتي عايشه وبشوفها بكره .. بكره ياخوي بكره..قلت له لا تجيب سيره لام سامي خلها كذا اهي ناقصه المسكينه اذا وصلنا لشي قولها واذا خابت الضنون خلها بيننا احسن وانا اخوك.. شوي وجا سلطان وكان فرحان مره .. باذن الله البنت عندنا وبنعرف كيف نرجعها.. قال راشد بس كيف بعرفها كيف بعرف شكلها البنت كبرت وملامحها اكيد اختلفت.. ضحكت عليه وقلت له ياخوي لاتنسى سما هي تؤمها بعد..قم وانا اخوك جيب صوره لسما خل سلطان يتعرف على شكلها بعد..و راح ابوكم الموعد واسبقه سلطان هناك وانا قاعد على جمر.. لما رجع كان في عالم ثاني اكلمه ومايرد علي عيونه كانت في مكان ثاني ووجهه حزين الهم ذبحه .. فكرته بيجي سعيد .. سالته ها بشر شفتها؟ البنت عايشه ياخوي؟!! ياخوي برد قلبي ورد علي.. دخل سلطان عقبه.. واخذني بعيد عنه .. قالي البنت عايشه وشافها من بعيد .. بس البنت حالتها تعبانه كثير .. البنت متبهدله حالتها ماتسر مبين عليها انها ماتدري انو ابوها جا يشوفها.. كانت مثل النعجه تنسحب من مكان لمكان .. قلت له انتو عرفتو مكانها .. قالي لا .. المكان الي خذوهم له مكان مليان ناس وعيال والعناصر توزعت بشكل ماقدرو يغطون المنطقه .. سألته والبنت .. قالي اختفت هي والي معاها في دقيقه.. وانتظرنا مرت الايام على ابوكم كأنها دهور وامكم كانت حاسه بشي بس هو كان دايم يقولها مافي شي.. نسى الضحك من شاف سماح بذيك الحاله.. نسى الشغل .. نسى ربعه وعياله تفكيره في سماح وبس .. عجزنا وحنا ندور ايش هي الامانه الي بسببها فقدنا كثير .. فقدنا راحتنا وبيوتنا وعيالنا وعقولنا.. كنا نجلس مع بعض ونناظر بعض .. اوقات كنا نتهم بعض انه الامانه عند واحد فينا واكيد واحد فينا مخبي شي عن الثاني ..تتوتر الاوضاع بيننا بس لما نتذكر الي فقدناه نعذر بعض اكيد المال مايعوض روح واحد من عيالنا.. نرجع ونناظر بعض .. اساله من غير اجوبه .. وحيره مالها تفسير.. على الاقل انا اعرف ولدي وين الان بس سماح هي وين ماندري؟
سامي: ليه سكت كمل
بومشعل: جا اتصال يقول لابوكم بعد بمده طويله يقول انو سماح حامل بتوأم واذا يبغي العيال يدفع 50مليون وافق على طول من غير لا يفكر بس وقتها سال العيال بيكونو عندي بين يدي ؟!! قالوله ايوا بيكونو عندك حنا تهمنا الام والعيال مالنا بهم .. سألهم هي بشهر كم قالوله التاسع وعلى وشك ولاده.. سألهم البنت بخير قالوله بخير ايش بيجرا عليها يعني.. قالهم راح ادفع لكم 300 مليون بشرط سماح ترجع له سكتو شوي وقفلو الخط .. لما اتصل وقلي .. ماكنت مصدق 300 مليون من وين بيجيبها انا عارف انه يملك اكثر من كذا بكثير بس ماهي كاش اغلبها عقار .. اغلبها عقار ومافي وقت انه يبيع واذا بيبيع مارح يحصل على السعر المناسب للعقار .. البنت على وشك ولاده ومابنلحق نبيع شي .. قالي لا تشيل هم بنتي بترجع لي .. بتصرف اكيد .. قلت له لا.. تقولي الاول انا معاك على الخير والمر لازم اعرف في ايش تفكر.. قالي ما ادري ربك يفرجها المهم الان امها تدري.. قال لامكم .. وامكم بدل ما تفرح ملكها الحزن على بنتها سألت ابوكم انت فرحان قال لها اكيد فرحان بنتي وبترجع لي ليه ما افرح قالت له وبنتك جابت عيالها منين؟ حلال ولا حرام قالها تعوذي من ابليس ياحرمه البنت راجعه المهم انها بخير عيالها هذول اعيالنا حلال حرام كل شي بيتعدل بس المهم بترجع.. وجاه اتصال ثاني يقوله انهم موافقين على 300مليون وسماح بيرجعونها بعد .. كان وقتها طاير.. الفرح ملاه واحس الروح ردت له .. وجلست معاه سألته انت كم معاك كاش قال تقريبا 100 مليون قلت له وانا بعد عندي 100 مليون كاش والباقي مثل ماتعرف عقار قالي وانت ايش دخلك قلت له عيب هذي بنتي لو ابيع نفسي ما تأخرت عنها .. قلت له خلك من هالشي الان منين بندبر الباقي قالي ربك يحلها.. وقتها جاني اتصال من هزاع بن محمد يبيني امسك له قضيه كبيره ووافقت طبعا وجلسنا مع بعض القضيه صعبه مره والتفكير في نجاحها كان شبه مستحيل وهزاع انلعب عليه بصوره كبيره والرجال لو ما اعرفه شخصيا ماكنت خاطرت باسمي معاه المهم اني قريت اوراقه وفكرت هزاع رجال غني واجد الفلوس عمرها ماهمته المهم عنده اسمه وسمعته كان راضي يدفع كل الي عنده ولا انه احد يقول فلان لعب عليه وربح قضيه بالاساس هي لصالح هزاع انتو عارفين طبعا اسم التاجر في السوق يهتز من اول شوشره فما بالكم بقضيه ويخسرها.. انا ماترددت ابد في اني افاتحه في الموضوع واشوف ايش بيقول.. قلته اني محتاج للفلوس متورط بشتري مجمع كبير والسيوله الي عندي ماتكفي محتاج 100 مليون بشرط اني بعطيك بدالها عقار يسوى المبلغ واكثر .. هزاع ماتردد كتب لي شيك بالمبلغ في لحظه وقالي خل عقارك عندك وهذي اعتبرها اتعاب القضيه .. بو مشعل انت اخوي الكبير سوا كان في قضيه بتمسكها لي او مافي بابي ما ينقفل بوجهك ابد .. واذا الفلوس ماكفتك لايردك الا لسانك .. وقتها ماعرفت ارد قلت له وانا اسلم عليه انا مثل ابوك ياهزاع وصدقني لو مشعل عايش كنت اتمنى يطلع برجولتك.. رجعت لراشد وانا فرحان كثير انه ربي يسر الامور لنا وانشا الله البنت بترجع .. وجلسنا ننتظر.. الفلوس وتأمنت باقي اتصالهم .. واخيرا اتصلو قالو انو سما ولدت وتعبت بولادتها عشان كذا تأخرو بالاتصال المهم انهم اتفقو مع راشد على مكان لتسليم الفلوس وكيف يستلم البنت والعيال .. بس مسالة تسليم الفلوس كانت مشكله الفلوس كثيره وكبيره وتسليمها صعب ماهو مثل كل مره .. طالت الاتصالات وطال الانتظار.. وقتها تفاجأنا بوفاة امكم .. كانت مصيبه على ابوكم تروح الام والبنت لسا ما وصلت والمشكله تسليم الفلوس .. خلص العزا وحنا ننتظر ومافي أي اتصال طال انتظارنا وطال ومافي امل لحد ما مات راشد.. راحت امكم وراح ابوكم واختكم الله العالم ايش حاصل معاها وعيالها ماندري هم وين والفلوس موجوده عندي ما تحركت.. لا رجعت سماح ولا شفنا عيالها.
سامي: عمي تعال معاي
بومشعل: وين ياولدي
سامي: تعال بس تلقا الي يسرك