منتديات بنوته - عرض مشاركة واحدة - ودك.. تنامـــــــــي نا مــــــــــــــي..}~

07-19-2010, 11:21 PM

(( ف الكويت .. على السفينة ))

( الساعة 10 باليل )

وقفوا الاثنين على حافة السفينة يطالعون الموية بالليل .. وهي تتحرك شوي شوي ..
دلع : تذكر آخر مرة وقفنا فيها على سفينة ..؟!

سعود وهو يتذكر : أي.. بعد السالفة هذيك ..

حست دلع بحزن فجأة جاها وانه دموعها تجمعت ف عيونها .. فلفت تحاول تمسحها ..
سعود : بتصيحين..؟؟ خلينا ندخل داخل اذا بتقعدين تصيحين ..؟؟
دلع تجاهلت الي قاله .. واللي يدل على انه انسان من حجر قاااسي مرة مو من لحم ودم.................!!!!!!

سعود ترك دلع وجا بيدخل داخل : اصبري هنا شوي .. لاتتحركين..
ما ردت عليه دلع .... راقبته وهو يدخل بعدين حطت عيونها بالبحر... وراقبت الموية حقت البحر ...

دلع " ياربي وش مخبية لنا الايام...؟؟ شلون بتكون حياتنا ..؟؟ ما اتخيل عمري اعيش معاه طول حياتي .... عنيد وقاسي وقلبه من حجر ... ما اقدر اتحمله .. زين مني الحين اني قاعدة اسوولف واضحك معاه واجامله .. بس اذا طولت السالفة بنفجر.. والله بنفجر .. انا ما اقدر اقعد معاه فترة طويلة .. اللي سبب لي اياه مو سهل .. ولا يمكن ينمحي بسهوووولة ... يارب صبرني بس...!! "

رجع سعود : تفضلي...

لفت دلع وشافته شايل كاستين عصير ليموووون ..اخذت كاسة : شكرا ...

(( السعودية .. بيت ابو رائد ))

( الساعة 11 )

نزل رائد من سيارته ودخل البيت ... اليوم تعب كصير لانه كان عندهم شغل كثير بالورشة .. وخصوصا وانه كان في عمال يصلحون الابواب حقت الورشة .. وكان لازم يشرف عليهم .. وعاد انتوا تعرفون الهنووود .. يطلعون رووح الواحد ..

دخل البيت وما حصل احد .. طلع فوووق وشاف غرفة ريم مسكرة والنور مطفي فعرف انها نايمة ...
وغرفة امه وابوه نفس الشي .. فاستلم عن انه يحصل احد يسولف معاه .. وراح لغرفته .. اخذ له ترويشة سريعة ولبس ملابسه وانسدح على السرير ...

رائد : يوووه .. نسيت اكلم ريم اليووم .. الله يقطعهم هالهنوود .. طلعولي قرووني ..

اخذ جواله ودق عليها ...

ردت عليه مسوية زعلانة : نعم ..؟؟
رائد : الله..!!! شفيك معصبة...؟؟!
دانة : ماني معصبة ليش ما دقيت علي اليوم ...!؟!
رائد : حبيبتي دانة والله آسف .. بس والله كنت مشغووول بالورشة وجو هنود يصلحون الابواب والله لايوريك .. شي يطفش الواحد ... هالهنود صاروا ما ينطاقون .. ف كل مكان تروحين ف وجهك ... ماهي حالة هذي...!!!!!!
دانة : هدي حبيبي شفيك انفعلت...؟؟ ادري انك مشغووول وعاذرتك .. يعطيك العافية..
رائد ابتسم واسترخى : الله يعافيك ....

(( ف الكويت .. غرفة الفندق ))

( الساعة 12 ونص )
ومن الحياة الوردية اللي عايشينها رائد دانة .. للحياة البادرة اللي عايشينها سعود ودلع ....

رمى سعود نفسه على السرير بتعب : آآآآآآي يا ظهري .. والله تعبت اليوم .. الطريق مرة يتعب ....
دلع وهي تدهن يدها بالكريم : حتى انا والله .. جسمي مكسّر .. قعدة الكرسي تعوّر

سعود : بكرة وين بنروح..؟؟
دلع طالعته بدهشة : الحين من اليوم لبكرة يصير خير.... نام الحين .. انا جاني النووم ..

قعدت على السرير .. انسدحت وتغطت .... وبدوره سعود تغطى وسكر النور اللي على الكومادينا جنبه ....

(( يوم الاثنبن .. سيارة احمد ))

( الساعة 1 الظهر )

طالع نفسه بالمرايا يعدل شماغه من قدام .. وطبعا لازم التشخيصة اللي سواها بكل مهارة ودقة ....

واول ما شاف ريم جاية .. تعدل ف قعدته وشغل السيارة ... بس لاحظ انها كانت كاشفة وجهها وحاطة كحل ازرق وبلشر وروووج وردي وعدسات ملونة .. وكانت كانها اجنبية ف السعودية ...... رفع حاجب مستنكر وما عجبه الوضع .. بس سكت لانه عارف انها محترّة منه ..

ركبت ريم وعلى غير عادتها ... ما سلمت ولا قالت ولا حرف ... ورمت نفسها رمي على الكرسي اللي ورى ... وسكرت الباب بقوة ....

احمد طالعها بالمرايا وابتسم " اووووووخص .. مو هينة هالزلعآآآآآآآنة ( زعلانة ) ...!! " : الناس يقولون السلام لما يدخلون ......

ريم لفت وجهها تطالع السيارات اللي برى : احمد لو سمحت ترى مالي خلقك .. بس وديني البيت .... !!!!
احمد شال عيونه عنها .. وتحرك بالسيارة .... وهو ساااكت .. مو عارف وشلون يرضيها .... هذي اول مرة يصير فيه زي كذا وينحط بهالموقف ....

احمد " اففف .. لاااا هذي شكلها مرررة حاقدة علي ... وش يرضيها الحين..؟؟ فكر يا احمد .. فكر زين ... "
وبطريقه ف التفكير ... شغل الـ mbc FM

لآ تعذب فيك منهو مبتـــلي
دون وصلك تترك الفرقآ تحــوول
قلبــي اللي لك من الشــوق يغلي
ذاب وانت اصبــحت لي صــعب الوصووول

آاسالك بالله .. اآسالك بالله .. وش ناوي علي .. ؟؟
فيك شي بــس ماودك تقــووول
قــل ولآ تنفي تــرى منــت بخلي
هات ما عنــدك وصمـــتك لآ يطول

ضيقــة مدري متــاها تنجــلي
يا عسآها يا حياتي ما تـــطووول
وانــــت ما همك رضايآ واسعَ لي
وعآدي عندك لو شمت فيــا العذووول

احمد قام يصفق وهو يسوووق من الحماس " ف الصميم يا عبدالمجيد ... دووومك تجيبها ع الجرح .... !!! "

ريم ما عطته وجه وكانت مسندة راسها ومغمضة عيونها ع الكرسي ورى ....

وبعد ربع ساعة .....

وقف احمد السيارة ..... ونزل .. وخلا الباب مفتووح .. ما لاحظت ريم .. الا يوم انفتح الباب اللي عندها .... رفعت راسها وافتحت عيونها .. وشافت احمد واقف ويطالعها بابتسامة مرة خفيفة .....

التفتت للمكان اللي هي فيه ... وشاف البحر.... اتفاجأت ...
ريم " هذا وش يبغى ..؟؟ ليش جايبني هنا..؟؟ "

الفتت على احمد باستغراب...
احمد بابتسامة حلوة مبينة غمازته اليسار : انزلي وبقولك كل شي...
ريم نزلت راسها زعلانة : احمد ماني بمزاج الكلام .. الله يخليك رجعني البيت ...

وما استنت رد احمد .. لانه مو هو الانسان اللي يقتنع وييأس بهالسهولة ... وبمسكة يد منه .... خلاها وخلا كل كل شي بجسمها يقوم .... سحبها ...
وطلعها من السيارة بكل نعووومة ورقة ...
بس مو هذا الشي الوحيد اللي خلاها تطلع ... لانه نظراته السااااحرة اللي كانت عليها ما كان دووورها هيّن ابد ......!!!!!

ريم " ياربيييييييييي .. انا احلم...؟؟ لا لا لا مو صدق .. احمد ما سكني ويسحبني ؟!؟!؟! لا لا لا مو معقوووول ... يارب صبرني... "

سحبها لين صارت برى السيارة ... وتركها ومشى قدام ... وهي بدورها لحقته ..

ويوم وصلوا عند السووور اللي ع الواجهة قدام البحر وقف .. ولف عليها ..

احمد : شفيك زعلانة ...؟؟
لفت ريم وجهها عنه ما تبغى تواجهه : مافيني شي..
احمد : ريم .. طالعيني.... شللي مضايقك..؟؟ قوليلي ...

ريم " اففف .. ياحلو الحنّان ... !! "

لفت عليه بكل قوة وجرأة وقالت بتحقيق وهي تعقد يدينها قدامها : احمد من وين تعرف اروى..؟؟
احمد مستغرب : اروى..؟؟ مين اروى...؟؟
ريم : احمد .. لا تلف وتدور .. اروى اخت عوض ولد عمي الله يرحمه .. وش عرفك فيها..؟؟
احمد فتح عيونه الثنتين متفاجئ : بسم الله .... الحين اخت عوض اسمها اروى..؟؟ وش دراني انا ..!؟!؟ بعدين من قالك اني اعرفها ...؟؟ والله توني عرفت وش اسمها ..

ريم طالعته بشك ومبين انها ماهي مصدقته ...

احمد " لا حوووول .. الحين هذي وشلون اقنعها..؟؟ "
وقف قدامها وفصخ نظارته : طالعي عيوووني .. وشوفي اذا مبين فيها ذرة كذب من اللي بقوله الحين ...
ريم " احلف بس...!! انا يالله اقدر اطالعك دقيقة بدون ما يغمى علي تبغاني اطالع عيووونك..!؟!؟! ترحموا علي يا ناس .. بمووووت.. "

سكتت وطالعته ....
احمد قال بكل صدق الدنيا : انا ما اعرف اروى .. وولا قد شفتها .... وادري انك سمعتيني ذيك المرة اسال عنها تدرين ليش.....؟؟؟؟

ريم ماتدري هو وش يقووول ... بس غاارقة بعيووونه خخخخخخخ .. رموووشه .. والديرتي فيس اللي مسويه ....

احمد كمل : ريم .. انا داري وش فيك .. ما يحتاج تقولين لي .. انا اعرفك اكثر منك صدقتي ولا ما صدقتي.... وبنظرة .. اقدر اعرف وش تحسين فيه ووش شعورك وانتي تطالعين ف عيووووني الحين ... اعرف كل صغيرة وكبيرة فيك .... لانك انسانة شفافة .. اللي بقلبك على لسانك .. صادقة وما تكذبين .. وهذا احلى شي فيك ..

ريم " وش دخخخخخخل هذا الحين ..؟؟ ترى مررررة بموووت .. احس وجهي احمممممر "

احمد : وانا ذاك اليوم سالت عنها .. لانه عوض كان دايم يحبها ويداريها .. فكنت ابغى اعرف كيف حالها .. ووشلون عايشة بعده.... مو اكثر من كذا..... صدقيني... شرايك..؟؟

ريم بتصيييييح من الخقة " وبعد تسالني عن رايي...؟؟؟ موافقة طبعا .... خخخخخخ " : خلاص صدقتك ... لا تحلف ...
احمد ابتسم " طبعا .. ما تقدر تقاومني !! ": صدق صدقتيني ولا بس كذا كلام ... ؟؟؟
ريم رفعت راسها بزهق : يوووه .. الحين صارلك سااعة مسويلي جلسة اعتراف .. وماتبغاني اصدق يعني...؟؟ بعدين انت ولا عمرك كذبت علي... عشان كذا ماعندي أي سبب عشان ما اصدقك ..

احمد ابتسم واخذ نظارته منها ولبسها : جيبي نظارتي... ماشالله علي لا اله الا الله .... من الصباح وانتي تخزين فيني....

ريم فتحت عيونها الثنتين ع الاخير : شووووف ...!!! ابووها الثقة اللي مقطعتك ....!!!
احمد بجاذبية مو طبيعية : طبعا .. وااثق من نفسي ...

مشت ريم جنبه ..... وقعدوا يسولفون لين شافوا سيارات وقفت ...
احمد لف عليها رافع حاجب : لا والله..!!؟!؟ وليش كاشفة وجهك انشالله ...؟؟
ريم باصرار : عنااااد
احمد : عنااااااد..؟؟؟ خلاص ... اتمشي بروحك .. انا رايح السيارة ...

وبجرأة من جديد .. مدت ريم يدها ومسكت احمد بسرعة قبل لايروح : لااااااااا ... خليك.. خلاص بغطي .... والله ...!!!!!!

احمد ضحك من قلب عليها " وه فديتها ......!! " ........

(( ف الكويت ))

( الساعة 2 الظهر )

تقلب كم مرة قبل ما يفتح عيوووونه بكسل ... ورجع انقلب للجهة الثانية .... ويوم استوعب المكان اللي هو فيه ... التفت على ساعة جواله وشاف انه الساعة 2 .. وساعتها فز من نوووومه ...

سعود " يوووووه .. شلون نمنا كل هالوقت ...؟!؟!؟ "

التفت على يساره وشاف دلع نايمة ومتلحفة بسلام ...
بكل تعب وكسل .. هزها عشان تقوم ...

سعود : دلع ... دلع ...
دلع وهي نايمة : هممممممممــ....
سعود يهزها : دلع قومي ....
دلع تقلبت للجهة الثانية : طيب ....

سعود : افففففف .. هذي وش يقومها الحين .. ؟؟؟!

فما كان منها .. الا انه يقوم ويرفعها ويحطها بوضعية الجلوووس علشان تقوم ...
سعود شبه حاضنها ومقعدها ف حضنه ويهز خدها بالخفيف: دلع ... قومي تاخرنا..

فتحت دلع عيونها.... ناظرت حولها شوي .. بعدين استوعبت المكان اللي هي فيه ..
رفعت راسها شوي وحصلت سعود فوقها .. ففزت على طووووول .. وقامت من حضنه ونزلت من على السرير ....

دلع وهي تترنح ف الوقفة : كم الساعة ....؟؟
سعود : ثنتين .... راحت علينا نومة
دلع : غريبة .. ما ضبطت المنبه ...؟؟
سعود : نسيت ... روحي غيري بسرعة عشان نطلع ونتغدى..

دلع اخذت ملابسها وراحت الحمام ... " امحق قووومة .. خرعني هو ووجهه ...!! "

(( بيت ابو سعود ))

( الساعة 5 المغرب )

قامت لينا من النوم ... تعبااانة .. تكره المدرسة مررررة ...
وببيجامتها لاول مرة .. نزلت الصالة ...
وهناك .. شافت الكل موجود

ديمة ... فيصل.. سالم ...
واول ما دخلت الكل قام يطالع فيها ..

لينا متخرعة : بسم الله .. كلكم هنا...!!! ليش تطالعوني كذا...؟؟
ديمة : اول مرة اشوووفك مو كاشخة وعلى طبيعتك
لينا ابتسمت مطمئنة : الله يقطع ابليسك خرعتيني .. حسبت في شي .. لابس مرررة تعبااانة ... المدرسة زفففففففففت .... من رياضيات .. لرياضيات انجليزي .. ومن انجليزي ... لقواعد .. الجدول قرررررررف ....

فيصل ابتسم : اجل لو توصلين ثانوي وش بتسوين..؟؟
لينا : بكل بساطة بنتحر .....

....... بعد دقيقة ..

لينا: سالم .. كلمت دلع ..؟؟
سالم مستغرب : لأ .. شلون بكلمها ..؟؟ نسيتي ما عندها جوال...؟؟
لينا بياس : اففففففف ...
فيصل : الحين ليش مكشرة...؟؟؟ انشالله على ابو مدرسة ..؟؟!؟ ترى الدنيا ما تسوى تكدرين خاطرك ....!!
لينا مبرطمة وعاجبها انه الكل يداريها ومهتم فيها : لأ موكذا .... دلع مرة شاغلة بالي....

خزها سالم عشان ما تخورها قدام ديمة ....ورقعها فيصل بدوره بعد
فيصل ابتسم يصرّف : ا... لا لاتخافين ... اكيد الحين مستانسين ولا جايبين خبرك حتى...
لينا : طيب ابغى اكلمها .. باي طريقة سالم
سالم : لا حوووول.. قلت لك لأ ... خلاص اسكتي ...

ديمه " واااي عليييييييييييه .... والله وطلع حنووووون !!! "</B></I>