أبد ما جيت أبــــارك لك ولكن جيت باوصيك
على اللي ناوي(ن) تدخــل بها اللـــيله ... معذبتي
ترى لولا الظروف اللي عطّـتك وحدّت محاكيك
قســـم بالله مـــا تدخل عليــــها لو على رقبتي
ولكن النصيب أقوى ولاادري وش اسوي فيك
نعــم...صــارت معزبتك,, ولا صــارت معزبتي
كذا شـاءت بنا الأقـــــدار تحرمني لجل تعطيك
كذا لازم عشــــان تفوز انت,,وأنا اخـسر بتجربتي
تراها غاليــــة جدا..و تكفى.. والله يخلـــــيــــك
تدللــــــــها..تدلعــــــــها ..تنسّــــيها مصاحبتي
أنا من كثر ما اغليها أحس اني بديت أغلـيك...
ولاتسـأل بأيـة حـق والا وش مناســــــبتي
لأنك لو بتسألـني بتسمـع شي مـــــــا يرضيك
لذا يا خــــــوي لا تسأل ولا تسمـع لأجوبتي
أبيك تحطها في داخل عـيونك وبين ايـديـك
وهي دلوعة إعتــــــــادت على كثرة مداعبتي
فداعبـها شوي شوي ..حـتى تشتهي طاريك
وشاغبها إلـــــــــيـن تقول: بـطّــل من مشاغبتي
واذا هي مالها خلقك,,ولا تضحك ولا تسليك
تحمّلــها وإسألـها :يا عمـــــري ليـــه عصّبـتي
وبالك أسمع انك يوم تضربهــا وهي تشكيك
ما يحتــاج أوري لك بفن الضـــرب موهبتي
صحيح انك بتملكـــها ومعك العقــد بالتمليـــك
وانا عــــارف حدود الله ومن حــقـــك معاقبتي
ولكن قل لها : المجنون وصّـــاني وهو يعنيك
يقــــــول انه بيــنــتظـرك لوشـيّـب وشـيّــــبتي
وانا مجنونها اللي مـا نساهــــــا وانت مايمديك
تغــطي ذكريـــــاتي.. في هواهــــا و ربع تجربتي
أحس اني تماديت بكلامي,, والغضب حـــاديــك
ولو انك في مــكاني ما تفكر في محــــــاسبتي
كفاك اني تركت الليــــله أشغالي عشان أجيك
دخلت القاعة برجلي ولا أدري ويش عاقبتي
وانا ما جيت أخرّب عرسك الليله ولا أذّيـــك
أنا جيتك عشــان أخاطـبك واسمع مخـــاطبتي
توصّــــى ... و انتبه.. واحرص عليها و الله يهنيك
ترى كل الكلام اللي طلع من ضيقي و كبـــتـــي
ولكن ما قدرت اني أقوله وانت مايخفـــــيك
أخـــــاف اني اذا قلته تقوم و تقطـــع رقبــتي...