منتديات بنوته - عرض مشاركة واحدة

07-15-2010, 12:27 AM

مر أسبوع على شهر العسل.. واليوم خالد وغاليه وصلوا لروما، غاليه تخبلت عليها لأنهم وصلوها بالليل والجو كان رهيب بمعنى الكلمه..
البيت الي في روما كان رووووعه، كان ملك لأبوخالد.. وكل سنه يروحون روما ينزلون فيه.. غاليه عيبها البيت الفخم، أثاثه كان مزيج بين الإستايل الغربي وأصالة العرب.. راحوا وحطوا أغراضهم فالغرفه الرئيسيه الي كانت واااايد كبيره.. بس مشكلتها مافيها كنبه كبيره يرقد عليها خالد مثل الي في ميلان..
غاليه: حبيبي وين بتوديني..
خالد: الحين إرقدي وباجر بنتفاهم..
غاليه: أمممممممممم بخاطري شي..
خالد وهو يفصخ ثيابه: آميرني..
غاليه: باجر الصبح نسير نتمشى ونرجع الظهر.. نتغدا وبعدين نرتاح والعصر نرجع نحوط..
خالد: ههههههههههه بس هذا ماطلبتي غناتي.. خالد وروما تحت ريولج وتامرينهم متى ماتبين..
غاليه: عمري إنت..
خالد: قلبي إنت.. يالله فديتج قومي بدلي ثيابج وتعالي إرقدي..
غاليه: أبا أسبح..
خالد: ومنو منعج.. قومي حبيبي وأنا بقعد هني..
دخلت غاليه تسبح وتأخرت شوي، لدرجة إنه خالد خاف وقام ودق عليها الباب..
غاليه: الحين بظهر..
رجع خالد ويلس على السرير وهو مجهز لها سندويتشات خفيفه علشان ماترقد على يوعها..
طلعت غاليه وخالد يلس يطالعها.. كانت قمه فالأنوثه والحلاوه بقميص النوم القصير.. وهي كانت مستحيه ولافه نفسها بروب القميص الخفيف، وشردت من نظرات خالد وإنخشت تحت اللحاف..
خالد وهو يبلع ريجه: جهزت لج سندويتشات..
غاليه وهي مستحيه: مشكور حياتوو
خالد يلس ياكل معاها وهو سرحان ولافي الدنيا.. وغاليه تاكل وتتطالعه من تحت لتحت.. وبعد ماخلصوا من الأكل، وخالد حب يحرج حرمته شوي..
خالد: حبيبي قومي فري الوصخ فالزباله وأنا برتب لج الفراش..
غاليه تيبست في مكانها، أنا ماصدقت أوصل للسرير الحين يقولي قومي وإمشي جدامي..
غاليه: أنا.. أنا
خالد: ههههههههههههه لا فديتج خلج مكانج أتغشمر وياج..
غاليه: عمري لاتحرجني..
خالد: ياقلبي إنتي.. يالله إرقدي فديتج..
خالد أخذ الصينيه وحطها فالصاله وغسل إيده، ورجع وشاف غاليه مبنده الليتات ومشغله الأباجوره ومتغطيه باللحاف.. راح لها ويلس يمها يلعب بشعرها وهو يسولف ويضحك معاها..
خالد: يالله ياقلبي إرقدي ورانا نشه الصبح..
غاليه: وإنت وين بتروح..؟؟
خالد: بقعد بالصاله وبعدين بروح الغرفه الثانيه برقد..
غاليه بحيره: ليش مب هني..!!
خالد: حبي ماشي كنبه هني، لاتخافين مب رايح بعيد عنج..
راح خالد عنها بس قبل لايظهر من الباب نادته..
غاليه: خـــالد..
خالد التفت عليها بإبتسامه: ياروح خالد..
غاليه وهي مبتسمه بحيا: إرقد عندي..
خالد ماصدق خبر، سكر الباب ونط على سريرها ولمها في حظنه، وهي يلست تضحك عليه..
خالد: صج حبي.. مابتضايجين مني..!!
غاليه: ههههههههه لافديت قلبك عادي.. تعودت عليك الحين..
خالد: بسجل هاليوم فالتاريخ.. اليوم الي تتخلى فيه غاليه عن عادتها البايخه وتخلي ريلها يرقد معاها عالسرير..
غاليه: هههههههههههه إنزين بند الأباجوره يمك..
خالد: أفاااا لاتخربين الليله..
غاليه: حرام عليك والله أستحي.. بند..
خالد: إن شاءالله ياقلبي..
غاليه: خالد.. فخاطري كلمه أقولها لك..
خالد وهو يسند ظهره عالمخده: آمريني حبيبي..
غاليه: أحبـــــك..
خالد يلس يطالعها فترة قبل لايحظنها بل قوته، كانت أول مرة تنطق هالكلمه.. بند خالد الليت، وإنتهى يوم ثاني من حياة غاليه اليديده الي كلها حب ورومانسيه مع حبيبها خالد..

في الإمارات..

في بيت أبوغاليه الي كان يالس مع حرمته فاطمه يتريقون بهدوء..
أبوغاليه: فطيم عطيني ماي..
فاطمه صبت لها الماي ومدت له الكوب..
أبوغاليه: ليش مضايجه..!! شو صاير..؟؟
أم غاليه: مافيني شي..
أبوغاليه: وهالدموع ليش بدت تنزل..؟؟
أم غاليه وهي تصيح: وحشتني غلووي أول مره تغيب عن عيني، وهي السباله ماتتصل إلا كل يومين أو ثلاثه..
أبوغاليه: الله يرجعها لنا بالسلامه.. لاتصيحين إنتي قومي إتصل فيها..
أم غاليه: أخاف ازعجها ولا ريلها يضايج..
أبوغاليه: عاد مالقيتي إلا خالد يضايج منا.. والله لو تروحين تيلسين عندهم هناك مابيعترض..
أم غاليه: خلاص بدق لها بعدين..
قام أبوغاليه عن الطاوله وراح وتجهز يبا يروح للشغل، وقبل لايطلع من البيت حس بدوخه بسيطه في راسه وتسند على الباب، ياته فاطمه تركض ويلسته عالكرسي..
أم غاليه: بسم الله عليك.. شو فيك..؟؟
أبوغاليه وهو يقوم: مادري بس ياتني دوخه خفيفه.. الحين أحسن خلاص..
أم غاليه: وين ساير ماشي طلعه عالدوام اليوم.. إرتاح فالبيت..
أبوغاليه: لالا مافيني شي.. الحين بروح آآآآآآخ
طاح أبوغاليه من وقفته على الأرض بدون لايتحرك.. فاطمه ركضت وإتصلت بأبوحميد الي ياهم هو وعياله بسرعه ونقلوه عالمستشفى..