منتديات بنوته - عرض مشاركة واحدة

06-25-2010, 04:56 PM

الجزء العاشر

الفصل الاول:
مر الاسبوعين بسرعه عكس ما توقعوا .. خالد ترخص قبلهم وظلوا يومين زياده يتشرون اخر الاغراض حق اللي نسوا يشترون لهم .. جاسم قعد اهو الثاني يتشرى اغراض حق نفسه وحق مرييم اللي ما قصرت بالطلبات.. بعد بس قُمر اخذت منه هالمهمه وقعدت تشتري لها احلى الاغراض.. اشترت لارفيجاتها ولصديقاتها .. ومثل كل مرة تشتري شي لخالد .. سمعت عن طريق الغلط ان عيد ميلاده جريب .. وعشان تهديه شي شرت له ساعه فخمه ماركه روليكس فضيه اللون .. قعدت تتمنظر فيها واهي سرحانه.. تتخيل موقف ثاني ..بعيد عن الواقع واهي تهدي خالد االساعه.. بمنتهى الرومانسيه.. عشى حالم وجو شاعري واخر العشا تهديه الساعه.. ومن بعدها يطلعون يتمشون باي مكان .. ولا احلى.. نست الحلم ووعت على الواقع المرير .. بس ما وقف قرارها انها تشتري الساعه وبالفعل شرتها.. ومن بعدها اختارت له ربطه حلوة انيقه سوده فيها رسم دواير لامعه شوي .. وخذت له بعد عطر اوبسيشن لكالفن كلاين .. وخلاص..
التفتت بالمحل واهي تنتظر البايع يسوي حسابها الا وبنت تناديها
منايات: هلا والله بقُمر
قُمر مستعجبه: هلا بمنايات هلا
منايات: كويس ما نسيتييني
قُمر: وانا اقدر انساج
توايهن البنات بكل محبه وكانهن ارفيجات من زمان
قُمر: والله صدفه حلوة
منايات : أي والله .. شخبارك يالغاليه
قُمر: ابخير الحمد لله .. وانتي شخبارج
منايات تتنهد: الحياه مستمرة وياي .. مع غياب الغاليه
قُمر: الله يرحمها
منايات : ويرحم الجميع .. الا قوليلي .. شخبارك .. للحين بايطاليا؟
قُمر: ايه .. بعد يومين بنرد الكويت.. وانتي
منايات: كنت برجع السعوديه قبل اسبوع .. بس لاقيت صحابي واقنعوني اني ابقى اكثر .. اتسلى وارد السعوديه ..
قُمر: خسارة .. لمتى بتظلين هني
منايات: باكر راح ارد السعوديه .. تخيلي الحظ
قُمر: أي والله .. بس رب صدفه خير من الف ميعاد
منايات: بالفعل.. تتسوقين؟
قُمر تبتسم: ايه والله اخر الشروة حق اللي نسيناهم ..
منايات: واللهي ان كان على التشري انا خلاص اعلنت افلاسي غاليه حيل روما
قُمر: اييه والله هههههههههه انتي هني لحالج؟
منايات: لا والله وياي صحابي.. كاهم هناك
تاشر منايات على مجموعه بنات وقُمر تطالع .. وانصدمت.. ندى ويا البنات.. وامبين ان ندى لاحظت قُمر .. واهي الثانيه انصدمت بعد .. جاسم يه لعند قُمر بس شاف بنت واقفه يمها لذا بعد شوي عنها بس لاحظ ان قُمر شوي مصدومه.. قعد يطالع اللي تطالعه وشاف .. ندى هني .. يا ساتر .. شناويه هالبنت .. ندى اول ما شافت قُمر رد الحقد وياها .. وراحت لعندها .. قُمر تطالعها واهي تبي تشرد بس ما قدرت
اول ما وصلت ندى لعند منايات: اعرفك يا قُمر على صحبتي الغاليه .. ندى.
قُمر تطالع منايات.. صاحبتج الغاليه .. اكثر انسانه اكرهها بحياتي تطلع اغلى ارفيجه لج .. تمت قُمر تطالعها بنظرة عدم تصديق
ندى وكانها ما تعرف قُمر : قوة قُمر.. شخبارج
قُمر:................. ابخير
منايات: ندى مثلك كويتيه .. بس تعيش بلندن ويا امها .. صدفه حلوة
قُمر بالم فظيع: يا مكثرها.. عن اذنج منايات لازم اخليج اللحين مستعيله
ندى تتلفت تشوف ان كان خالد وياها ولا لاء .. ماكان خالد . كان واحد يشابه خالد شوي بس ما تذكرت من اهو..
منايات: يالله قُمر .. ان نزلت الكويت ان شالله اعمل لك تلفون .. عندك خط ..
قُمر: .... انتي عطيني رقمج وانا اللي بدق عليج ..
منايات: كويس
منايات قعدت تكتب رقمها لقُمر اللي ما شالت عيونها عن ندى اللي من حقارتها قامت تكلم قُمر
ندى: سياحه قُمر؟
قُمر بخوف: ..... أي
ندى: بروحج ولا ويا الاهل
منايات: ويا زوجها .. صح؟
قُمر:......... أي صح
ندى تاشر على جاسم: هاذا زوجج
قُمر حست بحقارتها .. من صجها ما تعرف من زوجي: لا .. مو زوجي
منايات: هاك الرقم .. ولا تحرميني من صوتك ..
قُمر: ان شالله .. اخليكن اللحين.. عن جد فرصه حلوة منايات..
منايات: ايه والله .. باي قُمر
قُمر واهي تاخذ اغراضها: باي..
راحت عنهن قُمر واهي تحس بالموت وتبي تبجي .. مسكها جاسم اللي كمل حسابه وظل ينتظرها
قُمر بهمس لعمها: طلعني من هني .
جاسم مر على ندى وطالعها بنظرة احتقار..
جاسم دخل قُمر وظل اهو برع .. فرصه وسنحت له انه يكلم التعبانه ندى ويوقفها عند حدها .. قُمر مااعترضت على اللي يبيه عمها بالعكس راحت ويا غويليرمو وظل جاسم مكانه .. دخل المحل وراح لعند ندى
جاسم بكل غرور: ممكن كلمه اختي لو سمحتي
ندى التفتت له وشافت النظرة...: sure why not
راحت ندى ويا جاسم وخلت منايات والبنات مصدومات من حركتها .. طلع جاسم ويا ندى وراح لعند كوفي شوب جريب .. وقعدوا ..
جاسم: على مااظن عندج فكرة انا شنو ابي اقول لج ..
ندى واهي تبتسم ابتسامه خبيثة: وتدري شنو رأي بالموضوع
جاسم حس بمدى حقارتها : يا انسه .. اخلاقج مو اخلا ق بنت محترمه مربيه تربيه سنعة من قبل اهلها .. انج تلاحقين واحد متزوج كان مستعد انه يوفر لج الحياه اللي انتي يمكن ما تتصورينها باحلامج وانتي بنفسج رفضتي هاذا الشي
ندى تقاطعه: مرة ثانيه للموضوع نفسه ..
ويقاطعها جاسم واهو يكمل: لانج مو من مستوى انج تكونين زوجه لبن ظاحي
ندى تمت تطالعه بنظرة كلها شر: مو من مستواي.. انت اكيد جاسم .. مو؟
جاسم بغرور عمره ما حس فيه: بالنسبه لج .. جاسم بن ظاحي .. يا ندى.
ندى تذكرت كلم خالد عنه وشلون جاسم مغرور ومعتد بنفسه من جذي بدت تفكر بكلامها قبل لا تقوله