منتديات بنوته - عرض مشاركة واحدة - * غــــــــــارقـــــــــات في دوامـــــــة الحــــــــب *

06-19-2010, 11:28 PM

الجزء 22

في صباح مغيم على غير العادة مع نسمة رطوبة تهب داخل الغرفة من الشق المفتوح بين باب البلكون والجدار .. قامت ندى من النوم وهي حاسة بالضيق .. وتحس الدنيا كلها واقفة ضدها .. اول مافتحت عيونها من النوم تذكرت ان شوق راحت .. هذي اول صباحية من كم شهر تصحى وشوق مو موجودة بالبيت ..
حست بالدمعة في عيونها .. كل شي ضدها .. ليش مالها نصيب من السعادة في الدنيا .. ليش الدنيا ماتبيها تكون سعيدة ومرتاحة .. من فترة قريبة خسرت انسان عزيز بعد ماعرفت انهم مو ممكن يلتقون عاطفيا .. والحين بنت العم اللي اعتبرتها اكثر من الأخت راحت وتركتها .. تحس بالذنب .. تحس انها أساءت لشوق .. شوق ماتبينا بس هي انجبرت تجي عندنا .. كلنا ظلمناها ..
أعز ثنين على قلبها فقدتهم بفترة وحدة وهذا فوق طاقة احتمالها ..
تنهدت وهي تلتفت لناحية الساعة .. الساعة 11 الضحى .. وبما ان اليوم الخميس ماتدري شلون بيمر الوقت وهي فاضية ماعندها شي تسويه ..
قررت تكلمها على جوالها لكنها تراجعت باللحظة الأخيرة .. تلقاها الحين مستانسة حدها وناسيتني .. ويمكن اقطع عليها وناستها .. خليني كذا احسن .. اكيد مستانسة بعد ليش ادق ..
قررت تقوم تفتح النت ولما دخلت الماسنجر من المفاجأة لقت المجروح أون لاين .. كان قد أصر عليها تعطيه ايميلها وهي رفضت بالبداية .. لكن بعد كم يوم رجع يحاول يقنعها واقتنعت اخيرا .. وفيما هي كانت تغير النك نيم مادرت الا وهو يبدا المحادثة ..
المجروح : صباح الخير ..
حياتي كلها ضياع*ضياع : صباح النوووور والسرور..
المجروح : شلونك هاليومين ؟
حياتي كلها ضياع *ضياع : ماشية أحوالي .. ولو اني نفسيا مو زينة ..
المجروح : لييييش عسى ما شر غناتي .. صاير لك شي ..
ندى وعيونها تدمع للأشياء الكثيرة اللي حصلت لها : مو شي واحد ..اشياء .. تصدق اتمنى الموت احيانا .. كل اللي صار فوق احتمالي .. مو قادرة افكر زين ..
المجروح : ليش حبيبتي وش صاير .. ؟
حياتي كلها ضياع*ضياع : عندي لك سؤال واتمنى انك تجاوبني بصراحة ..
المجروح : تفضلي ..
حياتي كلها ضياع *ضياع : انت قد حبيت ؟
المجروح : حبيت ؟
حياتي كلها ضياع × ضياع : ايه حبيت .. قد حبيت لك احد .. احد اكتشفت خيانته بس بعد فوات الآوان .. واكتشفت انه ماكان يستاهل الحب ..
المجروح : انا مرة وحدة بس جربت الحب ..
ندى حست بالفضول : ومتى .. ومع مين ؟!
المجروح : يمكن تستغربين اذا عرفتي ؟
ندى : للحين تحبها ؟
المجروح : انتي اللي حبيتها ..
ندى فتحت عيونها مستغربة : انا ؟..
المجروح : ايه انتي .. ليش مستغربة ؟
ندى : انت ماتعرفني اصلا عشان تحبني ولا تنسى اني بعد ماقلت لك أي شي شخصي عني ؟
المجروح : مو شرط اعرفك واشوفك شخصيا .. يكفي اني عرفت شخصيتك من المحادثات اللي صارت بينا .. وما اكذب عليك اذا قلت لك اني حللت شخصيتك ووصلت لنتيجة .. وشخصيتك هي شخصية البنت المفضلة عندي
ندى حست بالفضول بيذبحها : وش نتيجته ..
المجروح : مستعدة تسمعين ؟
ندى : مستعدة ..
المجروح : اوكي شوفي .. اول شي .. طلعلي انك بنت ماتجاوزت العشرين سنة .. مرهفة الاحساس .. رومانسية ..
ندى فتحت عيونها وقاطعته : لحظة لحظة لحظة .. شلون عرفت عمري انا ماقلت لك من قبل ..
المجروح ضحك : ههههههههه .. لسا باقي كم شغلة بقولها .. وبعدين بقولك شلون عرفت ..
ندى حست بالحماس .. حست ان هالانسان شي غريب لازم تكتشفه .. ياترا شعرف عني غير عمري ..
ندى : طيب .. كمل ..
المجروح : اول شي قولي .. انتي رومانسية .. ؟
ندى وهي مبتسمة : ايوه .. بنت عمي تقول وانا اشوف نفسي كذا بصراحة ..
المجروح : حلووو .. يعني صح علي ..
حياتي كلها ضياع * ضياع : استغرب شلون عرفت ..؟
المجروح : لسا اسمعيني .. انتي بنت مرت بتجربة عاطفية استمرت لأكثر من أربع او خمس سنين وانتهت من فترة قريبة .. والشخص اللي حبته قريب منها ..
فتحت ندى عيونها عالآخر لدرجة ايقنت ان اللي قاعدة تكلمه ساحر ولا جني ..
حياتي كلها ضياع × ضياع : يمه منك ..!!
المجروح : هههههههههههههه ..
حياتي كلها ضياع × ضياع : والله جد .. شلون عرفت كل هالاشياء ؟
المجروح : يعني صح علي ؟
ندى : مية بالمية ..
المجروح : ومن دقايق اكتشفت انك تمرين بأزمة نفسية لفقد أكثر من شخص عزيز عليك ..
ندى توها بتسكر الجهاز وتنحاش .. بس هونت .. وش حقيقة هالانسان وكأنه عايش معي او بالأحرى عايش بداخلي ويعرف كل شي ..
ندى : هم صح اكثر من واحد .. هم ثنين .. الاول الشخص اللي حبيته واللي تمنيت اني ماحبيته بيوم من الأيام .. والثاني بنت عمي سافرت أمس ..
المجروح : طيب عندي لك سؤال ؟
ندى : تفضل ؟
المجروح : وش تحسين ناحية الشخص اللي حبيتيه ..
اشمئزت ندى وردت بملامح عبوس على وجهها : صراحة .. حاسة بالازداء .. مو منه .. من نفسي اللي نزلت كرامتها بالأرض .. ابي اسألك وش شعورك والشخص اللي تحبه يرفض حبك بطريقة مزدرية ومحتقرة ..
المجروح : والله ماعرف وش ارد عليك ..
ندى : طيب المجروح .. ماقلت لي شلون عرفت كل هالأشياء عني .. بدون محد يقولك ..
المجروح : بقولك .. اول شي انا ادرس علم النفس وقريب بتخرج ..
ندى باندهاش : والله ؟
المجروح : ايه والله ما اكذب .. انا مسافر ولما اتخرج برجع على طول ..
ندى : وااااو .. يعني استخدمت دراستك وجربتها علي ..
المجروح : ههههههههههههههههه .. بصراحة ما قدرت امنع نفسي من اني ادرس شخصيتك واحللها ..
ندى بفضول : طيب شلون قدرت توصل لهالنتيجة الدقيقة وانت ماعرفتي او شفتني شخصيا ..
المجروح : مو لازم .. كان كلامك وطريقة اسلوبك كلها تكفي .. كنت احيانا المس الحزن بردودك .. وكنتي بالنسبة لي تحدي لازم انجح فيه .. اذا وصلت لنتيجة دقيقة او مقاربة للحقيقة عن حقيقة شخصيتك فهذا يكفي ويثبت اني تقدمت بدراستي ووصلت لمرحلة حلوة .. والحمدلله كل اللي وصلت له كان مطابق للواقع .. وحاب اقولك بعلم النفس مو لازم تشوفين الشخص شخصيا عشان تقدرين تكونين انطباع عنه ..
ندى : يعني حتى استخدمت دراستك وتخصصك عشان تعرف اشياء .. انا ماكنت بقولها بلساني لو انك طلبت مني اقولها ..
المجروح : لما سألتك عن عمرك ورفضتي تقولين لي .. قلت مافيه غير هالطريقة .. وبنفس الوقت اختبر نفسي .. بس .. باقي شي واحد ماعرفته عنك ولا يمكن اعرفه الا لما تقولينه لي بنفسك ..
ندى حست بالاثارة وهي تتكلم معه غير عن قبل .. اكتشفت عنه شي جديد .. انه يدرس علم النفس .. وفوق كذا مسافر يدرس برا .. واكتشف اسرار عنها بطريقته ..
حياتي كلها ضياع × ضياع : وشو اللي تبي تعرفه ؟
المجروح : اسمك ..
ترددت ندى انها تقوله .. هذي مو أول مرة يطلب يعرف اسمها .. بس من قبل ماكان يعرف عنها شي بس الحين هو عرف كل شي عنها وبنفسه من دون محد يقوله .. بس باقي الاسم ..
المجروح : شوفي غناتي اذا ماتبين تعلميني هذا شي راجع لك ومن حقك ..
حياتي كلها ضياع × ضياع : اسمي ندى ..
المجروح : عاشت الاسامي .. حلو اسمك .. انا اسمي طلال ..
ابتسمت ندى .. وش هالصدف .. " طلال " من الاسماء اللي تعشقها ..
حياتي كلها ضياع × ضياع : ما اكذب عليك اذا قلت لك انك اسمك يعجبني مرة .. احب هالاسم ..
المجروح : مستعد اعلمك عن نفسي اكثر اذا تبين ..
حياتي كلها ضياع × ضياع : اذا هذا ما يزعجك .. صراحة فيني فضول .. عقب ماعرفت عني كل هذا ودي اعرف عنك .. ودي اعرف الشخص اللي قدر يوصل ويعرف اشياء .. واحد ثاني ماكان ممكن انه يعرفها ..
المجروح : ههههههههههه .. هذي أسرار علم النفس .. اسمعيني
حياتي كلها ضياع × ضياع : تفضل ..
المجروح : اسمي طلال .. عمري 25 سنة .. ادرس بأمريكا علم النفس .. خلال كم شهر بخلص وبرجع لحبيبتي السعودية .. وخاصة الرياض معشوقتي .. خاطب من فترة قبل لا اسافر ..
ماتدري ندى ليش حست بخيبة الأمل لما قرت انه خاطب .. هالشخص دخل قلبها بسرعة ..
ندى : خاطب ؟!
طلال : ايه خاطب من سنة .. بس تبين الصدق .. انا ناوي افسخ هالخطوبة اول ما أرجع ان شالله ..
حياتي كلها ضياع × ضياع : ليش طيب ؟!.. ماتحبها انت ؟
طلال " المجروح " : الخطبة ماجت عن حب .. والبنت نفسها ماتبيني مثل ما انا ما ابيها ..
ندى حبت تكتشف عنه اكثر واكثر : اجل شلون انخطبتوا لبعض وكل واحد فيكم مايبي الثاني ..
المجروح : البنت وحدة من قريباتي وانخطبنا لبعض لأسباب عائلية .. لكن من فترة دقت علي خطيبتي واعترفت انها ماتبيني ومغصوبة علي .. تبين الصراحة انا ارتحت لأنها هاللي اقدمت على هالخطوة .. كنت شايل هم .. والحمدلله انها ماتعلقت فيني ولا كان توهقت ..
ضحكت ندى على " توهقت" : هههههههههههههه ..
المجروح ضحك معها : ههههههههه ... شفيك ليش الضحك ..
حياتي كلها ضياع × ضياع : حلوة توهقت .. الله يوفقك ان شالله ..
المجروح : وياك .. اقول غناتي ..
حياتي كلها ضياع × ضياع : هلا ..
المجروح : انا طالع للجامعة الحين .. تامرين بشي ..
ندى ابتسمت : سلامتك .. ولما تكتشف عني شي جديد قولي .. ههههههههههه .. من يدري يمكن تعرف عني شي انا ما اعرفه عن نفسي ..
المجروح : ههههههههههههه ... ولا يهمك .. يالله اشوفك قريب ..
حياتي كلها ضياع × ضياع : مع السلامة ..
سكرت الماسنجر وهي تحس بشعور غريب فقدته من زمان .. شعور بالراحة بعد ما افتقدتها الفترة الأخيرة ..
سوى شي واحد نغص عليها راحتها لما مر طاري شوق في بالها .. ماتدري ليش تحس انها ظلمتها .. طول الليل أمس كانت تفكر باللي صار من جية شوق لهم لما راحت امس .. وأمس وضح كل شي ..
هو ان شوق ماتبينا .. ولا تبي العيشة عندنا .. كانت حالتها البارحة وكأننا أخذناها من الشرقية وأهلها هناك بالغصب .. وأجبرناها على العيش بمكان رافضته داخل قلبها ..
بس انا سويت لها كل شي حتى الأخت ماتسويه لأختها .. كنت ابيها تحب الحياة هنا وتسعد وتفرح مثل ما أنا فرحت بها .. بس كل اللي سويت عشانها ما بين بعيونها واستغلت أول فرصة عشان تبتعد .. واذا هذا يريحها بكلم ابوي يخليها تعيش بالمكان اللي حبته .. ما رح أجبرها أكثر عالحياة هنا .. never ...
ماتدري شلون وصلها تفكيرها انها تمسك الجوال وتدق بعفوية على نوف اللي مباشرة ردت عليها وكأن التلفون بالأصل كان بيدها
نوف : أهللللللللللللللللن ..
ندى ابتسمت : وسهههههههههللللللن ..
نوف : هههههههه .. كيفك ؟!
ندى : زفت .. شرايك بهالكلمة ؟!..
نوف : زفت ؟!.. ليش عاد ؟
ندى تنهدت بعمق وبنبرة أسى : هالأيام كله صدمات تجي في وجهي ؟!..
نوف تأثرت بنبرة ندى : صدمات ؟!.. وشو صدماته ؟!..
ندى : نوف .. وش هو شعورك لما تكتشفين ان الناس اللي تحبينهم ما يبونك ؟!..
نوف : ندى شقصدك ما فهمت ؟!..
ندى بنبرة مالت للحزن الكبير : أعز ناس على قلبك كل واحد يجيك من جهة ويقولك مابيك .. نوف انا فيني عيب عشان الكل ما يبيني ؟!..
نوف : ندى وش قاعدة تخربطين ؟!.. منهم هذولي اللي ما يبونك ؟!..
ندى : ماتدرين وش صار أمس ؟!.. شوق رجعت للشرقية وشكلها مو ناوية ترجع ؟!..
نوف بصدمة : للشرقية ؟!!..
ندى : ايه .. تصدقين ؟!..
نوف : طيب والسبب ؟!.. زعلانة من شي ؟!.. اكيد فيه سبب !!..
ندى وهي تتنهد بعمق وضيق : صدقيني انا نفسي ما أدري .. مذكر اني سويت في حقها شي غلط .. بس تدرين الظاهر العيب فيني انا .. مو هي اول وحدة تتخلى .. قبلها احد سواها فيني بقسوة ..
نوف جا على بالها انها بنت : منهي هذي بعد ؟!.. قسم بالله ما تستحي هاللي سوتها .. ( وبنبرة مرحة تبي تطيب خاطر ندى ) .. ولا فيه احد عنده هالندى اللي تسوى الدنيا ومافيها ويستغني عنها .. مجنون اللي يسويها ..
ابتسمت ندى بسخرية على هالحظ اللي مو مخليها تستقر بدرب واحد .. من حبت هالاحمد وهي لها دروب كثيرة كل واحد أطول واظلم وأعقد من الثاني .. لو تدرين يا نوف انه اللي أقصده هو اخوك .. وش بيكون موقفك ؟!.. لكن انا من ذيك اللحظة اللي عرفت فيها حقيقته وانا بديت أغلف قلبي بأطنان من الحجر عشان يموت هالحب داخله وما يحيى بعد كذا .. خلاص انا مو مستعدة أتحمل أكثر أنواع العذاب اللي قاعد احمد يذوقني اياه ويتفنن فيه ..
نوف بعد فترة وهي تنادي : وين رحتي ياهوو .. ماقلتي لي تبين مني شي يا حووووبي ..
تغيرت نبرتها للمرح التام لأنها حست بضيق ندى اللي استمرت بالسكوت .. فكملت نوف كلامها بعد ما طرا لها اقتراح مفاجئ : طيب اقولك .. شرايك نروح للسوق ؟!
ندى بعد ما استطلفت الفكرة لأنها محتاجة تبتعد عن البيت شوي : وين تبين نروح ؟!..
نوف : الفيصلية ولا المملكة ولا أي سوق .. اهم شي نطلع ..
ندى : خلاص اوكي بمرك المغرب ..
نوف : اوكيه .. بنتظرك
ندى : مع السلامة ..
سكرت ندى وظلت بغرفتها ولا طلعت .. لما مرت ساعة راحت لأمها تستأذنها انها بتطلع مع نوف .. وام فهد ما عارضت لاسيما ويوم شافت نفسية ندى اللي كانت في حالة سيئة .. ولما خذت الموافقة رجعت لغرفتها وهي ودها تفضفض لأحد أكثر .. وما تدري ليش كانت تتمنى ان المجروح أو " طلال " بالاحرى يكون اون لاين عشان تقدر تكلمه .. محتاجة لأحد يسمعها .. بس للأسف كان اوف لاين .. طبيعي هو اصلا خبرها انه بيكون بالجامعة .. وينك بس يا طلال ؟!!..

-----------

نروح للشرقية وين ماكانت شوق .. اللي حاسة ان روح جديدة سكنتها من بعد ماطاحت عينها على مشارف الشرقية .. والحين هي راكبة السيارة مع خالتها وهديل وطبعا مشعل اللي متولي القيادة .. كانت شوق قد اقترحت على خالتها انهم يطلعون بجولة في أرجاء الشرقية .. الدمام .. وطبعا الخبر مرتع طفولتها .. وعلى طريقهم مروا الجبيل .. كانت شوق في غاية السعادة وهي تتأمل كل شارع .. وكأنها تركت هالمكان من سنين طويلة وتحاول تسترجع عنه اشياء واشياء سكنت روحها وقلبها ولا يمكن تنمحي ..
هديل وهم يتجولون بشوارع الدمام : اقووول مشعل .. وش رايك تمر فينا على شاطئ الهاف مون ..
شوق قفزت في بالها ذكرى تتعلق بهالاسم : ايه خالتي ياليت ..
مشعل تنبه لكلامها ورفع عينه لها بالمرايه الأمامية : وليش تطلبين من خالتك وما تطلبين مني ؟!.. انا السواق ولا خالتك ؟!..
احمر وجه شوق وردت بعفوية : آسفة بس خالتي هي القائد ..!!..
هديل ما مسكت نفسها عن الضحك : هههههههههههه ... حلوة القائد ..
مشعل اللي ضحك بعد : والسواق اللي هو أنا وش تسمينه ؟!..
ايمان ضحكت معهم وشوق انحرجت منه اكثر : هههههههههه شفيك يا مشعل .. ماقالت شي غلط انا القائد ..
شوق عضت على شفايفها بانحراج .. وصدت بوجهها ناحية الشباك تراقب صور الشارع تمر قدامها مثل شريط السينما ..
مشعل : انتي على راسي وعلى عيني يمه .. بس مارح اوديها للهاف مون الا لما تقول يا مشعل لو سمحت ودنا لهناك ..
شوق من قال هالكلام لفت عينها له بالمراية وطاحت على عينه .. بصمت وبدون كلام ..
هديل قطعت الصمت بينهم باعتراض : لا حبيبي مو شوق اللي تترجى احد .. بتوديها لهناك غصب عليك ورجلك فوق راسك تفهم .. شوق تاج راسك ترا ..
التفتت شوق لهديل وبعيونها كلمات الشكر .. بعدي والله تعجبيني .. مارح أترجاه لو ان شالله اروح لهناك على رجليني ..
مشعل : أجل مافيه الهاف مون ..
هديل وكأنها قرأت أفكار شوق .. وبخبالها المعهود بدت تضرب بكف يدها عالباب باستمرار : أجل وقف السيارة وقف السيارة .. وقف السيارة قلت لك .. مشعلوووو وققققققف السياااارة ..
مشعل فجأة ضرب فرامل لما ضرب وجه هديل بمقعده اللي قدامها بس شوق لأنها كانت جالسة باعتدال قدرت تمسك نفسها ..
ايمان وهي تسمي بالله : بسم الله .. مشعل انهبلت ..!!
مشعل وهو يرفع عينه للمراية : يالله الحين وقفت السيارة ورينا وش بتسوين ..
هديل بتحدي التفتت للزجاج الخلفي للسيارة وبما ان الوقت قبيل العصر كان الشارع خالي تقريبا من السيارات .. ولما تأكدت من خلو الشارع التفتت لشوق ومسكتها من يدها ..
هديل : يالله شوق .. اذا ما وداك هو .. انا بنفسي بوديك ..
فتحت الباب وطلعت وسحبت شوق معها .. لما صاروا ثنتينهم خارج السيارة ..
ايمان تهز راسها وغصب عنها تضحك على بنتها اللي ماتدري متى بتتعدل وتترك عنها هالحركات ..
مشعل بعصبية وبنفس الوقت يبي يضحك على اخته اللي ما تتوانى تسوي أي شي براسها لو كان فيه مخاطرة ..
مشعل بحزم غير مقنع : هديلووو اعقلي وارجعي السيارة ..
هديل وهي تسكر الباب : ماني راجعة .. واعلى مافي خيلك اركبه ..
شوق ساكتة ما تعرف وش ترد .. بس هي تبي تبين لمشعل انها قادرة توصل للمكان اللي تبي من دون مساعدته ..
صاروا شوق وهديل يمشون مع بعض ويديهم متشابكة ..
هديل وهي تضحك : ها شرااايك ... اعجبك ها ؟!!..
شوق : انتي بصرااحة ... تححححححححفة !!
مشعل اللي بدا يضحك وبدا يمشي بالسيارة جنبهم التفت لأمه : يمه شسوي فيها ؟!..
ايمان وعينها مافارقت البنات : خلك جنبهم وهديل بنفسها بتتعب وبترجع ..
مشعل بقلة صبره ماقدر ينتظر اخته لما تتعب .. لأنه يعرف ان هذا بيستمر فترة طويلة بتكابر فيها هديل .. لذا فتح نافذته وطل بوجهه عليهم : خلاص خلاص .. بوديكم للي تبون .. بس اركبوا ..
هديل وقفت وواجهته ويدها على خصرها : تودينا للهاف مون ؟!..
مشعل وهو يهز راسه بانصياع : أوديكم للهاف مون .. أوامر ثانية ؟ّ!!..
هديل تلتفت لشوق : شوق عندك أوامر ثانية ؟!!..
شوق تهز رأسها ببراءة : لأ ..
هديل ترجع لمشعل : لأ ..
مشعل يضحك : وانتي الحين صرتي الناطق الرسمي باسم شوق ؟!.. ليه يعني شوق ماعندها لسان ؟!
شوق باعتراض : الا عندي ..
مشعل بنفاذ صبر من وقفتهم : طيب يالله كل وحدة تركب ولا .. والله .. وهذاني حلفت ياهديل .. ان ماركبتوا خلال خمس ثواني والله والله ان امشي واخليكم وارجعوا مع تكسي ..
هديل خافت لأن اخوها بهالأسلوب في قمة الجد ولو كان في وجهه آثار ضحك .. ركبوا بسرعة البرق وانطلق مشعل بسرعة أقوى حتى قبل ما تسكر هديل الباب ..
هديل بغت تطيح : عمممى مشععععل بغيت اطيح .. خلاص ركبنا انتظر لما اسكر الباب ..
مشعل : تحملي اللي جاك ..
وداهم جهة اللي تبي شوق وتجولوا بالسيارة في الشارع المحاذي لشاطئ نصف القمر ..
شوق تركت الحرية لذكرياتها ترجع في ذهنها دفعة وحدة .. أغلبها او كلها تتخللها صورة ابوها ..
دمعت عيونها لكن سرعان ماجفت لما تذكرت اللحظات السعيدة اللي ياما قضتها في هالمكان ..
طلبوا ينزلون ويقربون للبحر بس ايمان هالمرة هي اللي رفضت .. الوقت شمس وحر ووعدتهم يوم ثاني يجون .. رجعوا للبيت ومشعل حطهم وراح لشغل لازم يقضيه ..
شوق لما دخلت البيت طرا على بالها بيت عمها وخصوصا ندى .. قررت انها لازم تتصل فيها .. فحطت عبايتها عالكنبة ومسكت السماعة وهديل بفضولها جلست جنبها ..
هديل : بمين بتتصلين ؟!..
شوق : على ندى ؟!.
هديل ابتسمت : ياحليلها .. تصدقين حبيتها هالبنت .. دخلت قلبي بسرعة ..
شوق تبتسم وهي تتذكر وتدق الرقم بنفس الوقت : من ما يحبها ندى ؟! .. نعمة نزلت علي من ربي .. ( ضمت شفايفها وهي تاشر لها تسكت ) .. شششش .. دق الخط ..
سكتت هديل وهي تراقب .. وبلحظة لاحظت تقلب خاطف في ألوان وجه شوق .. اللي خلاها تمسك ضحكتها وتتساءل ..
شوق وقلبها ينتفض : الو .. السلام عليكم ..
فهد بصوت عميق غامض : وعليكم السلام ..
شوق وهي تحاول تسيطر على قلبها المتلخبط : كيف الحال فهد ؟!..
فهد عرفها طبعا من أول همسه : بخير .. شلونك انتي ؟!..
شوق : انا الحمدلله .. شلون عمي ؟!..
فهد ببرود : كلنا بخير ..
شوق ارتبكت من بروده .. لكن سرعان ما ذكرت نفسها ان هذا جزء من طبعه : طيب .. ندى عندك ؟!..
فهد : .... لا ..
قطبت شوق .. شفيه مافهم علي .. اذا مو عندك افهمها ونادها لي : طيب ممكن تناديها ..
فهد : لحظة .. هذي هي نزلت ..

حط فهد السماعة عالطاولة والتفت لندى اللي كانت تنزل وعبايتها عليها : ندى ..
ندى وقفت وهي متوجهة للباب : نعم ؟!..
فهد : شوق عالتلفون تبيك ..
سكتت لحظة وابتسمت بسخرية وتمتمت بصوت سمعه فهد : توها تذكرني الشيخة ؟!..
فهد تجاهل اللي سمعه ولا اهتم : تعالي كلميها ..
ندى وهي تلف الطرحة على راسه بعجل وتتوجه ناحية الباب : قلها مشغولة طلعت .. مو فاضية لها الحين ..
طلعت وتسكر الباب وراها اما فهد رجع للسماعة : شوق ..
شوق وقلبها رجع للخفقان بسرعة : هلا ..
فهد : ندى الحين طلعت دقي عليها بعدين ..
شوق بعفوية بريئة : طيب كان قلت لها مارح آخذ من وقتها كثير ..
فهد ببرود قاسي : عاد هذي مشكلتك انتي وياها انا مالي شغل ..
شوق تصنمت وكانت هالكلمات شبيهه بالصفعة على وجهها .. لسانها انشل ومالقت الكلمات المناسبة عشان ترد ..
شوق : ...........
فهد يتنهد بصوت مسموع حسس شوق انها منبوذة وخصوصا باتصالهاهذا .. يمكن اتصلت بوقت غلط ..
فهد : متى ناوية ترجعين ؟!
رجعها سؤاله للواقع وردت بعفوية وبدون تفكير : مدري ..
فهد : طيب تامرين بشي انا طالع ..
شوق ما ارتاحت لنبرته : طيب اذا كانت ندى عندك ياليت تعطيني اياها ..
فهد بأسلوب بارد جارح : قلت لك طلعت .. أكذب انا يعني ..
توجهت صفعة ثانية لوجهها وقررت تنهي الاتصال : آسفة فهد .. ماكنت اقصد .. مع السلامة ..
سكرت السماعة بدون ماتسمع رده .. شفيه معصب .. قلت شي غلط انا ؟!!.. ماحست بالارتياح .. قبل شوي قال لي ان ندى عنده .. وبعدها بثواني قالي انها طلعت .. ليش ما كلمتني .. لهالدرجة مشغولة ؟!.. وهو بعد شصاير له .. عمره ماتكلم معي بهالأسلوب .. شصاير في بيت عمي ؟!..
هديل انتبهت لوجهها المتغير : شوق شفيه ؟!..
شوق هزت كتفها ببراءة وحيرة : مدري .. على حسب اللي سمعته من فهد ندى طلعت مستعجلة وما رضت تكلمني .. وفهد بعد .. مدري شصاير في بيت عمي .. أخاف صاير شي هناك ..!!
هديل تبي تطمنها : لا تشيلين هم .. ندى يمكن كان وراها شي ضروري وبتكلمك بعدين .. وفهد يمكن بعد عنه شي مشغله .. ماتدرين عن ظروفهم .. وبعدين انتي امس تاركتهم وش بيصير يعني ..
شوق : أتمنى ..
فجأة وقفوا يناظرون بعض وهم يشمون رائحة شهية .. جااية من المطبخ .. كلهم بقفزة وحدة ركضوا لمصدر الريحة ولقوا هناك ايمان تشتغل على كيكة ..
هديل وهي تاخذ نفس عمييييييق : الللللللللله .. وش نوعها اللي مصلحتها ؟!..
ايمان وعيونها على شوق : الشوكليت على قولتكم .. اللي تحبها شوق ..
ضحكت شوق وبشكل تلقائي راحت دفنت نفسها بحضن خالتها كشكر وامتنان .. وايمان تلمها بكل حنية وحنان ..

-----------

وقفت السيارة قدام وحدة من بوابات المملكة ونزلت منها ندى ونوف .. ندى بعد ماطلعت من البيت شالت من بالها شوق على طول .. اذا هي مرتاحة هناك ليش تدق بعد .. عشان تحرق قلبي ؟؟!!!..
كلمت ندى قاسم وخبرته انها بتدق له تلفون لما تبيه يجي .. سكرت الباب ودخلوا مع بعض ..
بعد ربع ساعة في الشارع المقابل كانوا اثنين يمشون مع بعض ويسولفون ويتناقشون عن مخططهم اللي ناوين يسوونه الاسبوع الجاي ..
كانوا بدر وسلمان .. كل واحد يطرح آرائه على الثاني عن الخطة اللي ناوين يسوونها ..
دخلوا مع نفس البوابة ومن عجائب الصدف ساروا في نفس درب نوف وندى ..
ونوف طبعا ما تدري وين الله حاطها فيه تمشي مع ندى ويتحاورون بالازياء المعروضة على واجهات المحلات ومو حاسة بالشخصين اللي يشمون بنفس دربهم ..
نوف بعد عشر دقايق : اووففف .. اقول شرايك من الحين ادور فستان لزواج فرح ..
ندى وهي تتأمل طقم بدلة من فوق لتحت : ليش والزواج متى ؟!..
نوف : مو قبل شهور .. بس انا اقول من الحين ادور عشان ارتاح .. انتي تعرفين غثا العروس وخاصة الفساتين ..
ندى : قدامك وقت طوييل .. دوري على راحتك ..
نوف : انتي جاية تدورين على شي ؟!
ندى : مو شي معين .. تعرفين شوق راحت وتركتني ومثل ماقلتي اطلع للسوق اوسع صدري ..
نوف لفت نظرها فستان روعة معروض على واجهة احد المحلات والتفتت لندى بحماس : اقووول ندى لقيته لقيته .. تعاااالي ..
وتمسك يدها وتسحبها معها وتدخل المحل .. اما بدر وسلمان كانوا قد غيروا مسارهم بالأول لكن الصدف رجعت تلعب دورها وحطتهم بنفس درب البنات مرة ثانية .. وصاروا يمشون وراهم وهم مو دارين عن شي .. دخلوا محل رجالي مقابل للمحل اللي دخلوه البنات ..
بعد عدة دقائق طلعت نوف من المحل ووقفت تتأمل نفس الفستان بحسرة وهي تتأفف ..
نوف : عمي يعميهم .. خمس الاف !! .. وين حنا فيه .. كلها ليلة وحدة ماتسوى خمس الاف ..
ندى طلعت ووقفت جنبها : تبين رايي .. فصلي وارتاحي ..
نوف : لا حبيبتي مارح افصل .. بشتري جاهز مو مستعدة للعبال والغثا .. اذا بفصل يبيلي اروح واحووس بمحلات الأقمشة .. لا خلينا عالجاهز .. اذا ما لقيت شي احلى من هذا وارخص شوي برجع اخذه لو ان شالله بعشر الاف .. أهم شي راحت........
قطعت كلامها بشهقة مكتومة وعيونها عالشخصين اللي توهم طالعين من المحل المقابل .. واحد ماسك كيس بيده والثاني يتكلم معه .. وقفوا لحظة يتلفتون وكأنهم يقررون وين يروحون ..
خفق قلبها خوف لما طاحت عين بدر عليهم بشكل عفوي وبسرعة صد عنهم بدون مايعرفهم ..
نوف وهي تمسك يد ندى بارتجاف : ندى ندى
ندى : ها شفيك ؟
نوف وهي تسحب ندى معها بعجل : خلينا نروح من هنا .. خلينا نبعد من هنا ..
ندى وهي تمشي معها : لييش ؟
نوف : بدر ... بدر هالحمار ... بدر لاحقني لين هنا
ندى تمشي معها وهي مو مستوعبة : مين ؟!
نوف وهي تلتفت لورا بخوف : بدرررر ... بدر ولد عمي .. الخبل ..
ندى عشان تستوعب التفتت لورا ورجعت لنوف : وينه ؟!
نوف وهي تاشر باصبعها للخلف : شوفيه .. ورانا .. معه واحد ..
رجعت ندى تلتفت تبي تستوعب .. سلمان انتبه للبنتين اللي تعدوهم بعجل ويلتفتون لهم كل شوي والتفت لبدر : بدر ..
بدر وهو منشغل يتفحص محتويات الكيس بيده : هاه .. وشو ؟!
سلمان : شف هالبنتين .. كل شوي يلتفتون لنا ومسفففحين مدري شقصتهم ..!!
بدر وهو يرفع راسه : وينهم ؟!
سلمان رفع يده يأشر بنفس اللحظة اللي التفتت فيها نوف : شفهم هذوليك .. تتوقع معجبات .. ( قالها والضحكة بصوته )..
نوف بعد ما شافت سلمان يأشر لهم صدت بوجهها وهي مغمضةعيونها بحسرة : ياربي .. يأشر علينا ..
ندى عصبت : وانتي يالغبية .. تخلينا نسرع ونتلفت لهم اكيد بينتبهون .. لو انك جالسة بمكانك مادروا عنك .. اصلا من بيعرفك بالعباية ..
نوف : مالي دخل .. اهم شي نبعد عن هالديناصور ..!!
ندى ما قدرت تمسك ضحكتها : ههههههههههه ..
سلمان وهو يراقب البنتين : مدري شسالفتهم .. !!
بدر احتدت نظراته وهو يراقب هالبنتين ويركز على هيئتهم .. بعدها ضحك بصوت عالي ..
سلمان وهو يلتفت له مستغرب : شفيك .. فضحتنا ؟!..
بدر والضحكة بصوته : ياحليلها والله !!
سلمان : منهي ؟!..
بدر وعيونه مافارقت البنتين : اشك انها هي .. بس خلني اتأكد ..
سلمان : منهي ؟!
بدر : بعدين اقولك .. تعال معي ..
مشى بدر وسلمان تبعه ..
بدر : اسمع .. خلنا نلحقهم بس بدون مايدرون ان حنا قاصدين ..
سلمان : شعندك .. خلهم يروحون بحال سبيلهم ..
بدر : شششش .. انت بس الحقني وانا بعلمك ..
نوف وندى المستمرين بالمشي ماوقفوا .. وبدر وسلمان يمشون بنفس دربهم ويسولفون ويضحكون ولا كأنهم يدرون عن شي ..
ندى عصبت وتعبت وحست اني اللي قاعد يصير مصخرة من نوف ..
ندى : نوف خلاص .. تراه مب يمك .. ما يدري عن هوا دارك اصلا ..
نوف مستمرة بالمشي بدون هوادة : مالي شغل .. ما أطيق اشوف وجهه ..
ندى : خل نروح بس للكوفي شوب .. تراني عطشانة ..
نوف : فكرة .. نجلس هناك لما يذلف هو واللي معه ..
دخلوا الكوفي شوب اللي كان فاضي من الزباين .. خذوا لهم طاولة وجلسوا ونوف على اعصابها تراقب الممر اللي قدام محل القهوة اللي هم قاعدين فيه ..
ندى : ها شتبين ؟!
نوف : لحظة شوي ..
أقل من نصف دقيقة والشابين دخلوا نفس محل القهوة وجلسوا بدون ما يلتفتون لهالبنتين وكأنهم فعلا ما يعرفونهم .. لدرجة أقنعوهم انها مجرد صدفة لعبت دورها .. وصاروا الاربعة لحالهم بالمحل ومافي زباين غيرهم ..

بدر وهو يغطي فمه بقبضة يده ويحاول يخفي ضحكه التفت له سلمان مبتسم على شكله ..
سلمان : شعندك تضحك ؟!..
بدر وهو يضحك : ههههههههههه .. شفها الله يخليك شف شلون شكلها ؟!..
سلمان وهو يلتفت لهم : شفيها .. تعرفها ؟!..
بدر بهمس ما يسمعونه نوف وندى اللي يفصل عنهم طاولة وحدة بس : اقولك .. تأكدت الحين ان البنت اللي جنبنا هي نوف ..
سلمان للحظة ما استوعب : نوف ؟!!.. نوف بنت عمك ؟!
بدر وهو يضحك : هههههههههههه ... ايه !!.. تخيل ... ويوم شفتها تتلفت كانت تنحاش .. ههههههههههههههههههه ..
سلمان : وش بتسوي الحين ؟
بدر وهو يحاول يمسك نفسه عن الضحك عشان ما يفضح نفسه : لحظة شف وش بسوي .. هههههههههههههههههه
ضحك هالمرة بصوت عالي خلا نوف وندى ينتبهون ويلتفتون لهم ..
نوف وهي ترجع تصد عنه وتشبك يديها في بعض بتوتر : ياهو ينرفزني .. اكرهه .. على ايش يضحك ما ادري ..
ندى : اذا كنتي ماتبينه يعرفك خلك ساكتة وهادية وتصرفي بشكل عادي ..
نوف من اللحظة اللي دخل فيها بدر المحل وقلبها ما وقف من الخفقان خوف .. وطالما هو جالس بقربها بيظل الخوف يلازمها ..
نوف : اقولك هونت مابي شي .. خلينا نطلع ..
ندى وهي تهمس : يا خبلة وين نروح .. اذا قمتي الحين بيشك فينا صدق .. ما شفيتهم شلون شافونا وحنا نتلفت عليهم ..
نوف باستسلام : اووففف ..
فجأة سمعوا بدر يصفق بصوت عالي وينادي ..
بدر وهو يصفق : اكس كيوووووز مي ... بلييييييز
الجرسون : يس ؟!..
بدر وهو يرفع يده بأربع اصابع : اربعه اكسبريسو .. ثنين هنا ( وهو يأشر على طاولته ) .. واثنين عند البنات الحلوات هناك ( وهو يأشر على طاولة نوف وندى ويغمر لهم )
نوف وندى من سمعوه بلموا وهم يشوفون بعض .. من جده هذا ..!!
نوف وهي تهمس : والله انه قليل ادب .. !! ندى .. قولي له شكرا مانبي شي .. مارح يعرف صوتك ..
ندى وهي تبلع ريقها وتحاول ترفع صوتها : مشكور اخوي ما يحتاج ..
بدر انتبه لها تكلمه وابتسم وهو يطالع نوف : ابدا انا طلبت .. يا ليت تقبلون القهوة على حسابي ..
نوف تهمس لها بعصبية : قولي له مانبي شي منك .. مانبي شي منك ..
ندى : معليه اخوي .. انت ماتعرفنا عشان تطلب لنا ..
بدر وهو قاصد يستفز نوف : ماعليه .. بنتعرف قريب .. ( يغمر لهم بخبث مصطنع ) كلها فنجال قهوة ونتعرف على بعض ..
كتمت نوف غيظها .. اثرك راعي هالحركات يا بدر ..
ندى تجاهلت كلامه : لا شكرا مانبي منك شي ..
بدر وهو يحول عينه لنوف : والاخت الثانية ساكتة .. ما قالت شي .. اكيد تبي القهوة ..
ندى : لا ماتبي ..
بدر وهو يلتفت لسلمان اللي مغطي فمه بقبضة يده ويضحك بقوة وبدون صوت ..
سلمان يهمس وهي ميت ضحك : ههههههههههههه .. الله ياخذ بليسك ..
بدر وهو يهمس له : لحظة بس .. ( ورجع التفت لنوف ) .. طيب وراها ما تتكلم وتقول مابي ليش ساكتة .. ولا القطو اكل لسانها ..؟!!
نوف وصلت حدها .. قطو ياكلك انت يالحمار ..
ندى سكتت ومعد ردت عليه .. ونادت الجرسون : بليز ..
الجرسون اللي كان بالأصل يضحك ويتبسم عاللي صار قدامه : يس مدام ؟
ندى : بليز اثنين كروسان .. واثنين عصير ..
قاطعهم بدر وهو يرفع يده : حطه على حسابي بليز ..
ندى عصبت منه .. مالوم نوف يوم انها تعصب وتنفر منه : وبعدين معك انت .. خلاص قلنا مانبي منك شي .. مشكوووور وما قصرت ..
بدر ببرود : وانا مصر انه يكون على حسابي .. مصر يعني مصر ..
ندى وهي تهمس لنوف : اووفف ؟؟ وش نسوي مع ولد عمك .. نشب فيني نشبة ..
نوف وهي متماسكة قد ماتقدر من خليط الخوف والقهر اللي تحس فيه : وافقي وخلصينا .. معد اقدر اجلس هنا اكثر .. ارررررتفع ضغطي ..
وصل الطلب وتوزع عالطاولتين .. فنجانين من الاكسبريسو عند ندى ونوف مثل ما طلب بدر .. زيادة مع العصير والكروسان ..
سلمان وهي يضحك : شسويت فيهم ياخي .. ؟!
بدر : نوف على بالها اني ماعرفتها .. بس لحظة شوي ..
سلمان : وش بتسوي اكثر من اللي سويته ؟
بدر : لحظة وبتشوف .. بس ابيك انت بعد تدخل باللعبة .. ابيها تقتنع اني فعلا ما عرفتها ..
سلمان : تكفى عاد لا تدخلني بخبالك مع بنت عمك ..
بدر : انت بس سولف ولا كأنك تدري انها موجودة ..
نوف بدت تاكل من الكروسان وتشرب من العصير لكن بذات الوقت ما تحس بطعمه بسبة الانسان الجالس قريب منها .. القهوة اللي طلبها بدر لهم على حسابه ولا وحدة لمستها .. خلوها مثل ماهي .. نوف كل شوي تلتفت بشويش وتقز بدر واللي معه بطرف عينها .. وترجع تصد وهي تدعي مليون دعوة على بدر ..
كان يسولف ويضحك وجالس وهو حاط رجل على رجل .. يعني واااثق كل الثقة ..
نوف تهمس : ياجعلي اشوف فيك ما سويت فيني يا بدر ..!!
ندى تهمس بدورها وهي تنحني فوق الطاولة تقرب من نوف : نوف قصري صوتك بتفضحينا .. وبيعرف مين انتي ..!!
نوف : خلصي كلي اللي بيدك وخلينا نطلع ..
وتوها بتكمل الكروسان الا لقطت اذنها الكلمات اللي قالها بدر واللي معه ..
سلمان بدا اللعبة المتفق عليها : ما قلت لي يابدر .. وش صار على بنت عمك عقب ذاك المقلب..
نوف من سمعت " بنت عمك " .. " مقلب ".. نزلت الكروسان من يدها وجمدت تركز وتسمع ..
شقصده ؟!.. ومن يقصد بكلامه ؟!..
بدر وطرف عينه على نوف ومبتسم : أي مقلب تقصد ؟!
سلمان : يوم العزيمة في بيتكم .. لما رحت لغرفتك تلبس الساعة اللي عطيتك اياها .. قلت لي انك شفت بنت عمك بالغرفة ..
نوف اقشعرت من مر ذكرى هاليوم وهذيك اللحظات الفضيعة بالذات .. شافني ؟!! .. دقات قلبها بدت تتزايد .. وهذا شعرفه بالسالفة ..
بدر وهو يهز راسه موافق : آآه قصدك ذاك اليوم .. بصراحة كل ما تذكرت ذاك اليوم أضحك ( وضحك بخفة ) .. نوف بذاك اليوم ماكانت تدري اني كشفتها .. واني قفلت عليها باب الغرفة متعمد عشان تحرم تهدد وتتوعد وهي مو قد كلامها ولا وعودها ..
كلمات بدر هزت كيانها وحسستها بالإهانة .. ونزلت الحقيقة عليها مثل الصفعة !!.. يعني ما قفل علي باب الغرفة بالغلط .. كل هذا كان تخطيط منه ..
انا مو قد كلامي ولا وعودي ؟!!.. طيب ليش ؟!.. احد يقولي ليش ؟!.. انا وش سويت لك في حياتك عشان تعاملني بهالطريقة ؟!..
لمعت دموعها وهي تشوف ندى بأسى .. وندى لمحت عيونها وهمست : نوف شفيك ؟!.. لا تعطين لكلامه اهمية ..!!
نوف وهي تغمض بقوة : وانا اللي كنت اظنه مسويها بالغلط .. أثره متعمد يحبسني ساعتين .. قلبه وش منه مخلوق ؟!!.. ( فتحت عيونها بغضب ) .. بس انا اوريه .. ان ماخليت قلبه يحيى على جمر ماكون نوف بنت ابوي ..
وقامت واقفة بعنف لدرجة ارتد كرسيها للخلف بقوة وطاح عالأرض واصدر صوت عالي مزعج نبه بدر وسلمان لها ..
نوف لفت لبدر وراحت له بخطوات غاضبة حاقدة ينبعث منها الشرر وندى ماقدرت غير انها تناديها وتلحقها ..
ندى : نوووف .. استني ..
لكن نوف نست اللي حولها من فرط الأحاسيس المشتعلة داخلها ووقفت قدام طاولة سلمان وبدر وعيونها متسمرة على ولد عمها .. بنظرات يطفح منها الكره .. والاحتقااار ..!!!
بدر مبتسم يبي يغيضها أكثر : اخيرا عطتينا وجه ..!!
نوف واقفة بشموخ وبصوتها ثقة كبيرة ممزوجة بالغضب والدموع المنهمرة : انا أعلمك شلون أنفذ وعودي .. انا اعلمك يابدر .. لا تفكر اني نسيت .. ولا تلومني عاللي بسويه .. كله انت اللي جنيته بيدينك .. وانت اللي بتتحمله غصب عليك .. اللي سويته فيني ذاك اليوم لا يمكن ومستحيل أعديه لك .. ولو ترجع لغرفتك وتشوفها زين راح تلاحظ انك فقدت شي .. وعزيز عليك بعد .. لكن هالشي انسى ولا تحلم انه يرجع لك .. انساه يا فاشل ..
وفتحت شنطتها وطلعت منه مبلغ بسيط ورمتها عالطاولة : خذ .. مشكور مانبي شي منك .. غلطة عمري الوحيدة انك ولد عمي ..
طلعت من المحل مثل الصاروخ وندى ماقدرت غير انها تلحقها ..

سلمان علامات الدهشة البالغة على وجهه من القوة اللي طلعت بالبنت قدامه .. مدهوش ويبي يضحك بنفس الوقت ..
سلمان : شرشحتك يا بدر .. !!!
بدر عيونه على مدخل المحل .. يبي يستوعب الكلام اللي انقال بس مو قادر .. ومو عارف وش المقصود من كلامها ..
سلمان وهو ماسك ضحكته : والله طلعت اقوى من ماتوقعت .. البنت من جد كاارهتك ..!!.. هههههههههه !!
بدر مثل الأهبل التفت لسلمان : اقول سلمانوو فهمت وش تقصد ؟!
سلمان وهو يراجع الموقف ويضحك : ههههههههههههههههه .. الحق على عمرك البنت ماقالت هالكلام الا وفي يدها سلاح قوي ضدك .. الله يعينك ياخوي .. بس تبي الجد تستاهل اللي جاك منها .. ههههههههههههههههههه !!!
بدر سكت يراجع كلامها بذهنه ويحاول يفهم شي ..
سلمان ميت من الضحك كل ما تذكر شكل الموقف : هههههههههههه .. اقول بدر ..هههههههههه .. حلوه فاشل ها ؟!..هههههههههههههه ...
بدر وهو يقوم : قم قم قم ..
سلمان : وين بتروح ؟!
بدر : قم معي خلني اروح اشوف وش تقصد هالبنت ..
سلمان بخبث وهو يقوم : كنك خايف ؟!!
بدر : هذا وقته تتمصخر قلت لك قم ..
دفع الحساب وطلعوا من المملكة بكبرها .. وصل بدرسلمان لين باب بيتهم ..
سلمان بعد مانزل من السيارة وقبل لا يسكر الباب كانت الضحكة في صوته : اقول بشرني وش صار بعدين .. ولا أقولك دق علي طمني .. !!
بدر وهو يتحقرص بمكانه وذهنه مشوش وملئ بالافكار والاحتمالات اللي تاخذه وتوديه : يصير خير يصير خير .. سكر الباب خلني ارووووح ..
سكر سلمان الباب وهو يهز راسه ويضحك .. وانطلقت السيارة من مكانها بقوة وبسرعة .. سلمان وقف يراقبها لما اختفت وهو يهز راسه ويتمتم ..
سلمان : والله وطحت بشر اعمالك يابدر .. البنت اللي كنت مستسهلها بتسبب لك صداع طول حياتك .. الله يعينك ..

في جهة ثانية من الرياض كانوا شلة الشباب مثل عادتهم في المقهى المعتادين يجلسون فيه .. وفي وحدة من أجواء الحماس والاثارة كان فيه مباراة قوية بين فهد وعبدالله في البلياردو .. أسامة وحسين وأحمد يراقبون وكلهم حماس .. ومجموعة شباب انضموا لقائمة الجمهور يتابعون هالمباراة اللي فيها الكثير من الندية ..
احمد يراقب بحماس : فهد .. ركز .. اذا جبتها بتفوووز ..
عبدالله يهدد : فهيد ان جبتها ترا بذبحك ..
اسامة : ههههههههههههههه .. الهزيمة رقم عشرين اشوفها تطل من الباب يا عبدالله ..
عبدالله : وانت يا ثور حاسبهم ما نسيتهم .. اسكت فضحتني عند هالجمهور كله ..
حسين : يقولون يا عبدالله .. رحم الله امرئ عرف قدر نفسه ..
عبدالله : وانت بعد انثبر .. تعرفون تحبطون الواحد ..
فهد ظل يدور حول الطاولة بصمت يحاول يتخذ المكان المناسب للتسديد .. محد حوله كان حاس ان ذهنه مشوش .. الكل اعتقد ان صمته هذا يدل عالتركيز والثبات بس هو كان صامت لأشياء كثيرة وغريبة تملا عقله وصدره .. وقلبه ..!!.. وخاصة بعد المكالمة اللي صارت بينه وبين شوق .. هو نفسه يتساءل شلون كلمها بذيك الطريقة القاسية ؟!.. مو لاقي سبب مقنع يعذره عاللي سواه ..
عبدالله بعد ما زهق من كثر الانتظار : يالله فهد .. خلصنا ..
انحنى فهد فوق الطاولة وعينه مركوزة عالهدف يستعد للضربة .. ضربها بس للأسف انحرفت عن المسار وبكذا جا دور عبدالله اللي ما صدق ..
عبدالله : دعووووواتي كلها دعواااتي ..
انتصب فهد واقف وابتسامة على وجهه من الفرصة اللي ضيعها ومن شكل عبدالله الطاير من الفرحة ..
حاول عبدالله يستغل هالفرصة وسدد بتركيز.. وجاب الهدددف .. وبكذا فاز .. وكانت اول مرة يفوز على فهد بتاريخه .. واللي قام صراخه من بعدها فرحه ..
فهد ما قدر غير انه يضحك على شكله : هههههههههه .. الحظ لاعب معك اليوم ..
عبدالله باعتراض شديد : لا تقول الحظ .. الا قل فني باللعبة فوزني ..
فهد : ههههههههههه .. باخذك على قد عقلك هالمرة ..
حسين وهو يوقف بالنص بينهم ويقطع عليهم : خلاص دوركم انتهى .. الحين انا واحمد ..عبدالله : اغلبه عاد .. خل اليوم يكون خسارة احمد وفهد ..
فهد مبتسم : انا بروح اجلس وبشروني بالنتيجة ..
اسامة : وانا جاي معك ..
راح فهد واسامة وجلسوا على طاولتهم المعتادة وأول ما جلسوا وصلتهم القهوة ..
اسامة وهو يحرك السكر في الكوب : شسالفتك اليوم .. ؟!.. مو من عادتك تلعب بهالأسلوب ..
فهد : ولا شي سلامتك .. اليوم ماكان لي خلق بس قلت ألعب أجاريكم ومنها أطيب خاطر عبدالله ..
اسامة وهو يضحك : ههههههههههههه .. أي والله مسكين ..ما صدق ..
فهد : هههههههههه .. نرفع من معنوياته شوي ..
رن جوال فهد الموجود فوق الطاولة بنغمة مسج .. فتحه ولما قراه رجعه عالطاولة بابتسامة جانبية وهو يشرب القهوة من الكوب ..
اسامة كان يراقب تعابير وجهه : من مين ؟!..
فهد بهدوء وهو بادي يسرح : من شذى ..
اسامة : ابي افهم هالبنت ما زهقت .. تلفونات ورسايل وحالتها حالة ..
فهد وهي يعقد يديه على صدره ويسترخي بجلسته : خلها .. انا مرتاح كذا ..
اسامة وهو يرفع حواجبه باستغراب : من جدك ما زهقت منها ..
فهد اكتفى بكلمة وحدة : لا ..
اسامة : ومتى ناوي تنتهي منها ؟!
فهد هز كتوفه بعدم اهتمام : لما هي اللي تبينا ننتهي ..
اسامة وهي يبتسم بسخرية : أجل يا حبيبي انسى انك تنتهي مادامك تنتظرها هاللي تطلب النهاية .. شكل البنت عندها طموح اكبر .. فوق تصوراتك انت ..
فهد بنظرات هادية وبداخله فاهم وش يقصد : شقصدك ؟!
اسامة : اعتقد كلامي واضح ..
فهد وهو يرجع يمد يده للكوب ويرتشف : يصير خير .. لكل حادث حديث .. كل اللي تبيه البنت الحين انها تشوفني وانا موافق ماعندي أي مشكلة .. وافكر ادق عليها الحين واعطيها الموعد ..
اسامة بنبرة حزم : فهد ارجع واقولك انتبه .. ترا هالخطوة يمكن تطيحك بمشاكل انت بغنى عنها .. البنت اذا كانت تبي تشوفك الصورة وعندها خلاص تكفي .. ليش هالطلعة معها بعد ..
فهد وهو يتكتف وهيئته غريبة ما فهمها اسامة : طيب .... واذا قلت لك اني انا بعد ابي أشوفها ؟!.. وش تقول ؟!
اسامة وهو مستنكر : انت ؟!..
فهد : ايه انا ليش مستغرب ؟!
اسامة : ماكان هذا يهمك بالأول .. ماكان يهمك انك تشوفها .. وش اللي غير رايك الحين ؟!!..
فهد وهو يهز كتوفه : تغير وبس .. رايي الحين غير رايي أمس وغير رايي قبل دقيقة .. مافي شي يتم على حاله ..
أسامة وعلامة استفهام بوجهه : فهد انت غريب اليوم ؟!.. وش اللي صاير لك ؟!..
فهد هز كتوفه : ابد ماصار شي ..
اسامة : تلعب علي ولا على نفسك .. انت اليوم مو طبيعي ..
فهد وهو يتنهد : ابدا .. انا وشذى صار لنا فترة طويلة عالتلفون .. واعتقد جا الوقت الحين اننا نروح للخطوة اللي بعدها ..
اسامة بعد ما يأس : بصراحة انت عنيد .. وصعب الواحد يقنعك ..
رجع جوال فهد يدق .. لكن هالمرة مو مسج .. هذي مكالمة .. رفع الجوال وقطب وجهه وهو يشوف الرقم .. كان غريب عليه أول مرة يشوفه ..
اسامة وضح عليه انه يعرف المتصل : اكيد شذى ..
فهد : لا .. مب شذى .. رقم اول مرة اشوفه ..
اسامة بسخرية : بنت جديدة !! .. اكيد .. يالله هذي صيدة جديدة جت لين عندك .. ( قالها بسخرية ) ..
ابتسم فهد ورفع عينه لاسامة : جت بوقتها ..
اسامة تفاجأ بكلامه : شقصدك .. بترد عليها يعني ؟!..
فهد بنبرة الواثق من ما يفعل : ارد عليها ليش ما أرد .. ( قطع كلامه ورد ) .. هلا ...
.... : ...........
فهد زادت ابتسامته الجذابة .. هو عرف هالاسلوب ودرسه زين .. اذا المتصل مارد من أول كلمة فهذا يعني انها مليون بالمية بنت ..
فهد بصوته الساحر : ردي علينا ليش ساكتة ؟!..
.... : فهد ؟!..
قطب فهد وهو لازال مبتسم : معك فهد .. آمرينا ..
.... : شخبارك ؟!..
فهد : بخير .. انتي شلونك ؟!..
.... : انا تمااااام .. ( قالتها بنبرة كلها نعوومة ) ..
فهد يضحك بعذوبة ساحرة : ههههههه .. الله لا يخلينا من هالصوت والله ..
.... ( تضحك بخجل ) : ههههههههههه .. تسلم من ذوقك ..
فهد : ماتعرفنا ؟!..
..... : معك بدور ..
فهد : هلا والله .. مامر علي هالاسم من قبل .. بس انتي مبين انك تعرفيني ؟!..
بدور بنبرة تأكيد : أعرفك زين .. بشكل ما تتصوره ..
فهد : والله ؟!.. وش تعرفين عني ؟!..
بدور : لسا بدري على هالكلام .. انا الحين دقيت عليك لأني سمعت عنك كثير .. وبصراحة حابة اتعرف عليك ..
فهد بصوت حازم وجاد وساحر بنفس الوقت : شوفي يابدور .. انا عمري ما ابدا مع وحدة الا تقولي عنها كل شي .. وشلون وصلها رقمي ومن طرف مين .. وانا ما حب حركات التأجيل " مثل بعدين اقولك " .. تبين تبدين معي قولي لي كل شي ابيه ..
بدور سكتت فترة : ..........
فهد : مستعدة الحين ولا خلينا ننتهي من البداية .. ولا تنسين انك انتي اللي جيتيني يعني انتي اللي تبيني .. اما انا ما يهمني ..
كان كلامه يفوح منه الغرور والتكبر اللي خلا بدور تسكت لحظات متفاجئة من هالشخصية الحازمة والساحرة بنفس الوقت .. شخصية خلتها تصر على اصطيادها ..
بدور : شفيك ؟!.. انت دوم كذا تكلم البنات ؟!..
فهد بنبرة اعتزاز بنفسه : ما عجبك ؟!..
بدور : لا بس بصراحة انا اول مرة اشوف واحد يكلم البنات بهالطريقة .. خف شوي .. ماتخاف البنات يطيرون من يدينك ..
فهد وهو يضحك بخفة : ياحبيبتي اذا طارت وحدة جتني بدالها عشر ..
بدور بجرأة : فهد انت محد قالك من قبل انك مغرور وشايف حالك ..؟!
فهد ضحك أعلى هالمرة : ههههههههههه .. تبين الصدق .. الا .. كثير قالوا لي ..
بدور : اوكي بكلمك عن نفسي ..انا بدور .. 20 سنة .. أدرس بجامعة الملك سعود .. قسم علوم ادارية ..
فهد : كل هذا ما يهمني .. وش بستفيد انا وين تدرسين ولا وش تدرسين ..
بدور استغربت منه ومعد صارت تفهمه : مو انت قلت لي تبي تعرف عني كل شي ..
فهد : انا ابي اعرف رقمي هذا من وين حصلتيه ؟!.. ومن اللي دلك علي ؟!..
بدور : وانت يهمك هالشي ؟!.. ما اشوف له داعي بصراحة ..!!
فهد : لكن انا ابي اعرف .. بتقولين ولا من الحين خلينا ننتهي ..
بدور : بقولك .. بس اعذرني مو اليوم .. باي ..
سكرت الخط .. وهي تبتسم بخبث .. أول خطوة عدت بسلام .. والحين فهد بيتم يفكر وينشغل باله لأنه يبي يعرف انا شلون وصلته .. عشان كذا لازم اتم فترة ما ادق عليه عشان ينشغل باله اكثر ..
صدقت مها .. فهد هذا .. شي ثاني !!!..

سكر فهد وهو يناظر الشاشة او بالأحرى رقم المتصل .. يمكن يكون الرقم مر عليه من قبل .. بس للاسف ما استحظر شي من ذهنه .. الرقم جديد وأول مرة يشوفه ..
وصله صوت اسامة اللي كان طوول الوقت يراقب فهد وينصت للمكالمة : من هذي بعد .. وحدة جديدة ..
فهد : ايه وحدة اول مرة تكلمني .. الخبيثة مارضت تقول لي من وين حصلت رقمي .. بس انا بشوف النهاية معها هذي ..!!
اسامة : فهد تراك تضيع وقتك .. قم بس اسمع صراخ الشباب .. شكل المباراة عالحامي ..
فهد وهو يرجع الجوال بجيبه : لا لا .. مارح أطول .. بكمل الكوب وبرجع للبيت .. أمس مانمت زين ..
اسامة هز راسه متفهم : اوكيه اجل .. تصبح على خير مقدماً ..
اشار له فهد بيده وهو يكمل قهوته ..

وقفت سيارة ابو فهد اللي تقل داخلها نوف وندى قدام باب بيت ابو احمد .. ندى كانت خايفة من اللي ناوية تسويه نوف .. كانت طول الطريق ساكتة وتبكي بصمت .. فمسكت يدها لما فتحت باب السيارة قبل لا تنزل ..
ندى وهي تجاهد تمسك نوف لا تروح : نوف ماله داعي اللي تفكرين فيه ..
نوف تحاول تسحي يده من يد ندى بعصبية وتصرخ : اتركيني .. اتركيني .. انا اوريه هالحيوان .. انا اعلمه .. والله لأعذبه ..
سحبت يدها بقوة اكبر ونزلت بسررعة ودخلت البيت ركض .. وندى مثل المذعورة نزلت وراها ولحقتها ..
دفعت نوف باب الصالة وركضت بسرعة للدرج ولا سمعت لأمها اللي بدت تناديها .. وبعدها بثواني دخلت ندى وهي تركض وتلفتت بخوف ..
ندى لما شافت خالتها : خالتي وينها نوف ؟!!..
ام احمد حطت يدها على قلبها من هيئة نوف وهيئة ندى الحين : ندى وش صاير ؟!..
ندى : ماصاير شي .. راحت لغرفتها هي ..؟!!
وما سمعت لجواب خالتها لأنها اكيد توجهت لغرفتها .. او بالأحرى لشهادات بدر المخفية هناك !!!..
ركضت ندى للدرج بأسرع ما تقدر ومباشرة لغرفة نوف اللي كان بابها مغلق .. توقعت ان نوف قفلته لكن لحسن الحظ كان مفتوح .. دخلت مندفعة من الركض وشافت نوف تحوس في الدولاب بهمجية وهي تشهق بصوت عالي من البكي .. وبجزء من الثانية طلعت الورقتين وهمت بتمزيقها ..
صرخت ندى وهي تركض لها : لاااااااااااأأ ..!!
راحت لها ومسكتها ونوف تقاوم تبي تقطعها قطع صغيرة عشان يستحيل على بدر بيوم انه يرجعها مثل ماكانت ..
نوف وهي تبكي : خللللليني .. خليني انتقم منه .. خليني اخذ حقي .. لييييييييييش .. انا وش سويت له قولي لي .. يالحيووووووااااان ... يابدر يالحيووووااااان ... اكرررررهه ... اكررررهه ..
و ندى تحاول تاخذ الاوراق منها برفق عشان ما تنقطع ونوف تسحبها منها بعنف وتصرخ بدموعها ..
ندى : نوووف الله يخليك خليها .. خليها .. ما يصير اللي تسوينه ..
نوف وهي تهز راسها ودموعها تتناثر بكل مكان : لا لا لا ... ما سمعتيه شقال .. اللي بسويه الحين مو اقل من اللي سواه ذاك اليوم .. قلت لك خليني تكفيييييين ..
ندى : نوف خلاااص لا تبكين وخلي هالأوراق .. نوف بليز الله يخليك خليها لا تأذين نفسك .. بتسببين لنفسك المشاكل ..!!
نوف كانت تصرخ ومو مسيطرة على نفسها : ندى .. خللللليها انتي مالك شغل ... ماااااااااالك شغل .. ابعدي ..
دفتها بقوة لما طاحت عالأرض .. والورقة انزلقت بينهم .. ندى ما اهتمت بالألم اللي حصل لها رغم انه كان شديد .. حاولت تمد يدها عشان تاخذ الورق لكن نوف كانت اسرع سحبتها وهمت بتمزيقها مرة ثانية .. لكن اللي وقفها جامدة هو دخول امها الغرفة وعلى ملامحها الذعر ..
خبت نوف برعب الورقة خلف ظهرها ووجهها مازالت تغسله الدموع المستمرة بالهطول .. وام احمد زاد جمودها وخوفها لما نزلت عينها على ندى الطايحة عالأرض وتمسك ظهرها بألم ..
ام احمد بصوت خايف مرتجف : شفيكم ؟!..
نوف التزمت الصمت .. وندى هاللي ردت وصوتها يرتجف من الألم : ولا شي خالتي ..
تقدمت ام احمد خطوتين لما صارت داخل الغرفة وبصوت اكثر حزم وأعلى نبرة : شفيكم تصارخون ؟!.. ها يا نوف شفيكم ؟!.. شمسوية انتي ؟!..
نوف متلعثمة وهي تمسح دموعها بسرعة بيدها : م .. ما في شي يمه مافي شي ..
ندى عشان تتدراك الموقف قامت واقفة وسحبت الورق بعنف غاضب من يد نوف ودخلتها شنطتها قدام عيون خالتها .. بشكل يوحي للناظر ان الورق بالاصل يخص ندى ..
ندى وهي تلتفت لخالتها : ولا شي خالتي .. سوء تفاهم بيني وبينها بس ..
ام احمد : وليش كنتوا تصارخون .. وليش دخلتوا وانتم تركضون ؟!.. شفيكم وش صاير ؟!..
صمت نوف وعدم جوابها خلا ام احمد بهاللحظة تتوجه لها وتسدد صفعة قوية على وجهها خلاها ترتد للجهة الثانية من قوتها ..
ام احمد وبعيونها الغضب : واذا سوء تفاهم مالها حق تمد يدها على احد .. هذا وانتي بنت خالتها اللي اكبر منها .. انا بعرف البنت هذي متى بتتعدل ..
حاولت تضربها مرة ثانية لكن ندى هالمرة مسكتها بخوف من ردة فعلها الغير متوقعة ..
ندى : خااالتي هدي بالك هذي مشكلة بيني وبين نوف .. مايستاهل اللي تسوينه ..
نوف كانت حاطة يدها على خدها من الألم وسيل جديد وعنيف من الدموع ينهمر .. وداخل قلبها الكره ناحية بدر يتضاعف ويتضاعف لما غمر قلبها كامل وكل كيانها .. هو السبب الحين بكل اللي يصير .. هو السبب .. الله ياخذك .. الله ياخذك .. الله ياخذك ..
حاولت ندى تهدي خالتها المشحونة بالغضب وطلعتها بأدب خارج الغرفة وقالت لها انها بتحل المشكلة بنفسها ..
ندى لما سكرت الباب التفتت لنوف اللي ركضت ورمت نفسها عالسرير تبكي : عجبك اللي صار الحين ؟!
نوف وهي تصيح : ليش ما خليتيني أسويها .. ليش ؟!.. قطعيها تكفين قطعيها .. أكرهه .. كله منه .. المشاكل تلاحقني بسبته حتى وانا بعيدة عنه ما اسلم .. عجبك اللي سوته امي فيني ..
ندى وهي تقرب منها : نوف خلاص لا تبكين ..
نوف وهي مخبية وجهها بالمخدة وجسمها كله يهتز من البكي : روحي واتركيني .. روحي عن وجهي .. كله منك .. لو انك مخليتي اقطعها ماكان صار لي اللي صار .. ( وترفع وجهها وتصرخ ) .. رووووحي عني خليني لحالي ..
ندى بعد صمت تنتظر نوف تطلع كل اللي بقلبها : بروح .. بس بكرة برجع لك ..
نوف وهي ترجع تخبي وجهها وتكمل دموع : مابيك .. لا تجين .. روحي واتركيني .. اذلفي عن وجهي ..
ندى توجهت للباب وقبل لا تطلع استقفتها نوف .. ولما التفتت لها شافتها رافع راسها ومادة يدها ..
نوف : عطيني الأوراق ..
ندى بنبرة حازمة : وش بتسوين بها ؟!
نوف بعيون غرقانة يلمع فيه الغضب والحقد : بقطعها .. بقطعها مارح اخليه يتهنا فيها ..
ندى هزت راسها بالنفي : لا .. آسفة مارح أخليها عندك ..
نوف : عطيني اياها قلت لك .. هذا شي بيني وبين بدر انتي مالك شغل .. عطيني اياها ..
ندى رجعت تهز راسها باصرار وهي تفتح الباب : لا يانوف .. بخليها عندي .. الأوراق الحين انشقت نصها .. وزين مني اني لحقت على بقيتها .. مع السلامة .. بشوفك بكرة ..
طلعت وسكرت الباب وراها ومن بعدها سمعت صراخ نوف : لا تجين مابيك لا تجين .. كلكم مع بدر محد وقف بصفي .. حتى انتي ياندى .. حتى انتي