منتديات بنوته - عرض مشاركة واحدة - لاقلـــــت أحبــــك إسـكتـــي وإحــضنــيني ..

06-16-2010, 02:53 AM

دخلو وريف وصبا البيت ..
وريف اتجهت للمياء اللي جالسه بالصاله وصبا اتجهت لغرفتها ولا حست الا باللي ماسك يدها ..إلتفت وشافت وريف ماسكتها
صبا مبتسمه :نعم؟؟
وريف: تعالي إجلسي معنا
صبا : دام هالجنيه فيه ما اقعد
وريف: ههههه لمياء جنيه ؟؟ حرام عليك .. بس عشاني إجلسي
صبا هزت راسها وراحت تمشي مع وريف ولمياء ماهي مستوعبه اللي يصير من صبا
جلسو وريف وجنبها صبا بعد ماسلمت وريف على لمياء
لمياء : وحشتنيييييييييييييي وحشتنيييييييييي وحشتنيييييييييييي لمييييييييييييييييييس
وريف: ههههههه الا هم وين اللحين؟
لمياء : اكيد مو برا المملكه .. بس اتوقع بجده
وريف: اهاا
صبا تكلمت : لميس وعبدالرحمن بشقة عبدالرحمن اللي بجده
لمياء انصدمت : وش عرفك؟
صبا ماردت عليها
وريف همست لصبا : ردي على إختك
بس صبا ماردت عليها
وريف : وش دراك انهم بجده
صبا بدون نفس : انا اعرف
وطلعت وخلتهم بلحالهم
لمياء بقهر: ودي أذبحهاااااااا واشرب من دمهاااااااااااا افففففف
وريف : غلط .. يالمياء صبا مراهقه ماتخافون تنحرف
لمياء: ليش سمعتي عنها شي؟
وريف :لالا بسم الله عليها بس انا اقول حاولو تلينون معها .. وانتي بالذات اختها الكبيره لا تكونين قاسيه تنفرينها منك
لمياء بطنازه : انفرها مني؟؟؟ هي نافره من دون أنفرها
وريف: اكبر غلط... وش معنى مانفرت مني اليوم سولفت معي وضحكت ومشينا سوا
لمياء:إحلفي
وريف : وربي .. اجل وشلون جات جلست معنا.. وبسببك انتي قامت
لمياء:أنا؟؟؟؟؟؟؟؟؟ وش قلت؟
وريف : حاولي تتعاملين معها كأنها كبيره
لمياء: صبا طفله
وريف : من قال لك؟؟ انتي ماسمعتي كلامها واسلوبها بالحكي

جاسم: يمه خلاص هذاني خليت وريف عشانك
ام جاسم بشك : ما أهقاها منك
جاسم: والله والله يايمه اني تركتها
ام جاسم : تركتها عشاني؟؟؟؟
جاسم: لعدة أسباب .. وانتي واحد من هالأسباب
نجد : ياسفابها والله ..تجنن
جاسم كانت نظرته لأخته سهم .. نزلت دمعته بدون ما يحس .. لكنه بسرعه مسحها : وانا اليوم جايك يايمه ابيك تخطبين لي ابتهال
ام جاسم بصدمه :إبتهااااااااااااااااااااااااااااااااااااااال؟
جاسم :إيه ابتهال بنت خالتي
ام جاسم تمسح دموعها : هذا مني عيني والله .. اللحين بقوم اتصل على خالتك
قامت امه وهو ماتفرق معه ابتهال ولا غيرها لأن مافيه احد راح ينبض له القلب غير وريف ..بس هو فضل ابتهال لأن وريف اللي قالت له عليها
آآآآآآآه ياوريف

ابتهال سمعت الخبر من امها وكأنها ماسمعت .. جاها جنوون.. ذهووول ..إستغراااب.. حيره .. قالت بدون تردد: اكيد موافقه
امها عارفه الجواب قبل تنطق لبنتها .. متأكده من حب جاسم ماغاب لحظه وحده عن خيال ابتهال .. وهي اللي تقدمو لها افضل وارجل الرجال ورفضتهم لأنها مابغت الا جاسم .. بس مو مابغاها وباعها بوريف...
قامت أمها واتصلت على أم جاسم تبشرها بإن ابتهال موافقه ..
جاسم ماتفرق معه .. بل بالعكس كان يتمناها ماتوافق عشان يتعذر ولا يعرس ابد
خبر الموافقه جاه مثل الصدمه...سبحان الله عكس خبر موافقة وريف منه .. كان ينط مثل الطفل .. فرحان .. بس اليوم كل إكتئاب الدنيا سكن في وجهه..
طلع من البيت متجه للسوق .. البنت مالها ذنب بعذابي لازم أفرحها .. مثلها مثل أي بنت متزوجه.. بس غريبه ابتهال كانت من أشد الرافضين للعرس وشلون وافقت علي بهالسهوله..
ابتهال .. حضنت مخدتها وأحلامها وخيالاتها اللي صار واقع .. أخيرا يا جاسم جيت....
ابتسمت ونامت وهي تفكر بحلمها اللي تحقق..

على صلاة الفجر .. رجعو الشباب من الكشته .. كل واحد ميّت من التعب وهو يتوعد مخدته بنووومه عميقه الا عبدالعزيز وزياد اللي وراهم روحه لطلاب الطب ..
تروش زياد وطلع وهو يناظر بوريف اللي تسوي نفسها مو شايفته
زياد: وريف يا شينك والله ماقصدت كنت امزح معك
وريف : نعم؟؟ تكلمني حضرتك؟؟
زياد: هههههههههههههههههههههههه الله يعين عبدالعزيز على شكلك وانتي معصبه
وريف انخرست من الجمله .. وكمل زياد: لالا ما ظنتي عبدالعزيز يقوى يزعلك على الحب اللي شفته
استغربت وريف .. معقول؟؟؟ عبدالعزيز مبين للكل حبه؟؟
عكس جاسم.. ما كان أحد يقدر يشوف حبه الا انا ..
زياد انتبه لسرحان وريف.. بس ماعرف وش تفكر فيه ..بس الاكيد شي يخص عبدالعزيز .. ان شاء الله توافقين يا وريف ماراح القى واحد رجولته مثل عبدالعزيز ..
وريف : تبي قهوه؟
زياد: ياليت تسوين نسكافيه ما ابي انام
وريف : طيب ..
قامت وريف تسوي النسكافيه ونست تقول لزياد على موافقة لمياء
دخل زياد للمطبخ يطلع له كيك
وريف: نسيت أقولك
زياد:هلا
وريف : اخذت لك موافقة لمياء
زياد: من جد؟؟؟
وريف :إيه من جد
زياد : الله يبشرك بالخييييييير
وريف ضحكت : تستاهلون بعض
زياد: عقبالك
سكتت وريف ماردت عليه ..
زياد ناظر فيها ... انتي غريبه يا وريف متأكد إنك موافقه بس ليش ماتبين تنطقين ؟؟؟
وريف كانت نفس الأفكار تجول براسها .. ليش انا مو قادره اقول موافقه.. يمكن لأني مو موافقه.. يمكن لأن ربي مو كاتب لي معه خير ...آآآآه ياقلبي ..

الساعه 9 بالضبببط كان عبدالعزيز وزياد بالجامعه ..
وكان جاسم وأبوها بالمحكمه..

لميس : عبدالرحمن
عبدالرحمن فتح عيونه : عيونه وقلبه وروحه ونبض قلبه
لميس وردت خدودها : تسلم لي عيونه وقلبه وروحه ونبض قلبه
عبدالرحمن ابتسم: امريني يابعد كل من قام وقعد
لميس : لا تنام مابي اقعد بلحالي
عبدالرحمن :بس؟؟
هزت لميس راسها بالايجاب
فز عبدالرحمن لينه جالس : واللحين؟؟
لميس تضحك: تمام التمام
عبدالرحمن :ههههههههههههه
لميس : الا ماقلت لي ليش لك شقه بلحالك بجده ؟؟
عبدالرحمن : اولا لأني انسان فوضوي تتذكرين غرفتي بالرياض شلون كانت
لميس تضحك : كانت مأساه
عبدالرحمن: ههههه بالضبط يعني ممكن ارجع بشنطتي للرياض وممكن أنساها واشياء مهمه نسيتها بهالفنادق
لميس : وثانيا؟؟
عبدالرحمن : ثانيا لأن فيه خصوصيات ما ابي ولا واحد يشوفها او يطلع عليها وعشان كذا محد دخل هالشقه الا انا وانتي بس
لميس حست بلقافتها :آهااا
عبدالرحمن سحب يد لميس : قومي معي
لميس :وين
عبدالرحمن : بوريك الخصوصيات اللي مارضيت أحد يشوفها من قبل
لميس :بس...
عبدالرحمن :إنتي زوجتي وحبيبتي اذا ماشفتي خصوصيات زوجك من يشوفها
لميس بإنصياع :طيب
مشت وعرق اللقافه بينفجر عندها
الشقه كلها ثلاث غرف ومطبخ وحمامين تكرمون
صح انها صغيره بس مقارنة بأنها كانت له بلحاله تمام
فتح لها الغرفه اللي من اول ماوصلو مافتحها
لميس: وش هذي الغرفه؟
عبدالرحمن وقف وحوّط خصر لميس بيدينه : هنا ذكرياتي .. هنا عشت أروع وأحلى قصة حب في حياتي
لميس ناظرت فيه من فووووق لتحت من القهر : شكلك راعي سوابق؟
عبدالرحمن يمثل دور التايب : بصراحه؟؟
لميس تمثل البرود :ايه
عبدالرحمن: انا حبيت وحده بس .. والله العظيم وحده بس وماكنت لعاب ولا راعي خرابيط
لميس خلالالالاص ودها تكفر فيه : خلصني وبعدين
عبدالرحمن : و.......
لميس طلعت عيونها : وايش؟؟؟؟
عبدالرحمن :أخاف أجرح أنوثتك ومشاعرك
لميس صرخت : تكلم يابن الناس
عبدالرحمن وهو عيونه زايغه بالمكان : وخطبتها
لميس شهقت :وتزوجتها؟؟؟؟
عبدالرحمن هز راسه بالإيجاب
لميس : يعني اللحين هي على ذمتك؟؟؟
عبدالرحمن : لميس لاتعصبين
لميس حابسه دموعها : وتقولي لاتعصبين؟؟؟ تجيبني لمكان ذكرياتك وتقول لاتعصبين
عبدالرحمن ببرود : الصراحه حلوه
لميس تخصرت : قل قسم؟؟
عبدالرحمن بيموت من الضحك تكى ظهره عالباب وتنهد :آآآآآآآه ياحبي لك
لميس : أكرررررررهك من كل قلبي أكرهك
عبدالرحمن هنا ما إستحمل جلس عالأرض كالعاده وصوت ضحكته الرايقه بكل مكان ولميس تناظره مذهوله
عبدالرحمن :من زمااااان عن مقالبي فيك
لميس تغطي وجهها بيدها :حراااااااااااااااااااااام عليك حرقت أعصابي
عبدالرحمن بثقه :حلالي
لميس : قوم اقفل هالغرفه اللعينه
عبدالرحمن قام بمساعدة لميس :لاتقولين لعينه .. هنا ذكرياتي
لميس: ذكريات بعد؟؟
عبدالرحمن : انا قلبي مانبض الا لوحده من يوم فتحت عيني عالدنيا لين تغمض وهي حبيبتي
لميس فهمت قصده :بسم الله عليك عسى يومي قبل يومك
عبدالرحمن : بسم الله على قلبك يالله خلينا ندخل
دخلو الغرفه وفتح عبدالرحمن الدولاب الخشبي وسحب منه ألبوم صور
لميس : وش صوره؟؟
عبدالرحمن :هالألبوم كله صوري معك
لميس شهقت : كيف صورتها
عبدالرحمن :ههههههههه ياذكيه هذا واحنا صغار
لميس :اهاا ماشاء الله عليك
عبدالرحمن: من صغري اعشق التراب اللي تمشين عليه
لميس :الله يخليك لي
عبدالرحمن : ويخليك لي
لميس تحضن الألبوم لصدرها :تصدق؟؟
عبدالرحمن: وش؟؟
لميس: ماكنت أتخيل بيوم انك تتغير
عبدالرحمن :انا هو انا ماتغيرت ومستحيل أتغير .. بس عبدالرحمن بحضور أميرته يكون غصبن عنه انسان ثاني
لميس ابتسمت بخجل
عبدالرحمن: يالله تعالي اوريك باقي الذكريات