منتديات بنوته - عرض مشاركة واحدة - لاقلـــــت أحبــــك إسـكتـــي وإحــضنــيني ..

06-15-2010, 04:30 PM

لميس: لمووو تسمعين
لمياء: ايه
لميس: شكل زياد جايب العيد
لمياء:أحسن الله لايوفقه ولا في مباراه
شيماء: غسلو الكاتشب عن وجهي بعدين ادعو على خلق الله

رجع زياد البيت وهو قافله معه
شلون انهزمو ..
كنت محتاج الفوز عشان ارفع معنوياتي .. الله يستر بكره اش بيقولون عني الصحافه..
ثلاث انفرادات وضيعتها
دخل البيت شاف شادن بالصاله
زياد: سلام
شادن: زياد..
زياد: شوفي يا شادن والله والله والله مو ناقص غثا اذا عندك كلام أجليه لبعدين تصبحين على خير
طلع وخلاها
شادن صارت تحس بالوحده اكثر من قبل .. بعد ماعاشت حياتها كم شهر مع وريف على أروع ما يكون ..عاشتها مثل أي بنت .. صداقات .. زيارات .. حب.. لبس .. كشخه..
فجأه يروح منها كل هذا..
حتى سلمان .. ماعاد اطيقه.. ليش ياربي.. كل ذا عشان وريف تهاوشت مع أمي؟؟
ماعاد أحد يبي يسمعني.. انا ماغلطت بشي... وريف غلطت على أمي..
حتى زياد يكرهني.. وابوي اللي مانشوفه الا بعد كم شهر
اكرهك ياوريف .. اكرهك.. أكرهك
طلعت لغرفة وريف ودخلت فيها
شافت الدولاب فتحته لقت لوريف صوره وهي تبتسم ونظرتها لأبوها اللي كان حاك يده على راس بنته ويبتسم للكاميرا
أخذت الصوره لفتها .. شافت من وراها مكتوب بخط اسود
يبه وأنا من بعدك أبو التناهيت
مامر طعم للحزن ما نهمته
يبه.. يبه كلمه وأنا كل ما أوحيت
كلمة يبه صديت والوقت لمته
يبه يبه كلمه وانا كم تمنيت
اهدم بها وابني بها اللي هدمته
يبه وأنا لا ضقت رحت وتهجيت
ركون بيت ضم حلم حلمته
يومك تعلمني الا من تحاكيت
درس الحياه اللي كبرت وفهمته
هناك كانت دلتك لا تقهويت
وهناك كان يساق طيب حشمته
وهناك ..إيه اذكرني هناك خليت
طفل ملا بالدمع درب رسمته
وهناك جاني علمك انك توفيت
وهناك خاويت الشقا وإحتزمته
((للشاعر الرائع فهد المساعد))
كن نفسها تقطع الصوره وتحرقها.. بس شي بداخلها خلاها تردها..
فتحت الدولاب الثاني .. فااااضي مافيه ولا شي ماعدا عطر وريف .. قفلته بقوه
وفتحت الدولاب الثالث
شافت هدايا وتحف واوراق
كان فيه علبه صغيره مليانه اوراق مكتوب فيها كلام
أخذت ورقه وقرت فيها
((امي.. هل علمت مقدار سعادتي حين ألمح ابتسامة الرضا عني))
رمتها شادن عالارض واخذت الثانيه
((فجر .. ربما لم اخبرك يوما بأنك اوكسجيني الذي اتنفسه))
قطعت الورقه حتى خلتها فتافيت ونثرتها بالغرفه
اخذت الورقه الثالثه
((جاسم .. اكره الحب بداخلي لك))
هذا طليقها ..
صرخت شادن بعالي صوتها وصارت تكسر بالهدايا والتحف الموجوده
حتى غلبها النوم ونامت عالارض
’,
’,
وريف: هههههههههههههههههههههههههه صدق مغامرات طيب ليش لميس ماجات معكم
لمياء: تبين وتين تذبحها؟؟هي اصلا زعلانه لأن محد جابها مع لميس
شيماء: الا مادريتي وش صار بـ زياد
وريف شهقت: وش فيه؟؟
لمياء: شيمه ترى مالك داعي
وريف: وش فيه؟
لمياء وهي تتوعد شيماء بنظراتها : مافيه شي بس شكله جايب العيد بمباراته اليوم
وريف: اهاا
شيماء: الا وين ماماتك؟؟؟
وريف تضحك ماماتي نامت .. وانا الحين بطلع لها
لمياء: هههههه ترى عبدالرحمن ناوي يعوضك بعشاء ثاني
وريف: اعووووووذ بالله
الكل: هههههههههههههههههههه

طلعت وريف لغرفتها وقبل تنام فتحت ايميلها .. شيكت عالايميلات.. مافيه ولا ايميل منه
دخلت المنتدى ... نفس الشي....
الظاهر الرجال عند وعده ترك المنتدى والماسنجر عشان لا يشوف اسمي او يشوفني

فتحت موضوع جديد بالخواطر بعنوان
>>الفقد<<
((شعور الفقد يحاصرني حيثما كنت
قرأتها ذات مره في مجله شعبيه.. وعلقت بذهني
جيتك من الفقد دربٍ يبتدي مني
من كثر فقدي أحس إني ولا واحد
لقد سطر مشاعري من نظم ذلك البيت..
لشعور الفقد تواجد مخيف على مساحات مشاعرنا..
الفقد يولد مخاوفه قبل ان يأتي هو..
نخاف أن نفقد من نحب..
وحينما نفقدهم تنهار كل القوى المقاومه لذلك الحب لتكشف لهم رغم ابتعادهم مقدار حبهم
مافائدة ذلك الحب .. ان لم يروي ظمأ صاحبه..
ما فائدة ذلك الشعور حينما لا يظهر الا ((بالوقت الضايع))
مافائدة تلك الأحاسيس حينما تتفجر بعد الفراق..
مافائدة وجودي .. بلا حبك
مافائدة كتاباتي إن لم تحرر حبي من قيود خجلي
مافائدة قلبي ان لم ينبض أحبكـ أحبكـ أحبكـ
ما فائدة كلمة أحبك.. ان لم تجد..((وانا ايضا))
أظنك رددتها بيوم ما لشاعر مشهور..
كان الأمل في شوفتك يوم فرقاك
الله يجيب موادعك لجل أشوفك
أتيت لاشهد على إفتتاح جانب مشرق من حياتي.. وفوجئت بأنشودة النهايه.....
لم أنعم بلقياك.. ولم أنعم بوداعك..
فـ في الحالتين الخساره لقلبي...
وها أنا اعود ادراجي والخيبة تملاني..
أعود بقافلتي التي لم تتوقع مجيئها..
خواطر مكسوره))
وقفلت المنتدى .. النت.. الاب توب ... نور الغرفه وناااااااااااااااامت

صحى زياد اليوم الثاني وهو كاره نفسه
تروش بسرعه ولبس ثوبه وطلع.. كل شي صاير يخنقه .. البيت .. النادي.. الشوارع .. كل شي
طلع من البيت تفاجأ من اللي شافه..
هذي سيارتي... الا والله سيارتي
يااااااااااااربي من سوا يها كذا؟؟؟ حسبي الله عليكم
السياره قزازها مكسر.. الكفرات منسمه.. المسجل مسروق..
المراتب عليها بيض..
شاف ورقه مرفوعه عالباب أخذها وقرا
((اذا عرفت انك تلعب لنادي كبير..
وعرفت تلعب زين.. ذيك الساعه انا اللي بعوضك عن خراب سيارتك
تحياتـــ!ـي.. مشجع متعصب))
زياد صفق جبهته..الله ياخذ النادي واليوم اللي عرفت فيه النادي
وقف له تاكسي وراح

وريف صحت بدري اليوم فتحت باب غرفتها ناظرت بغرفة أمها اللي كانت بسابع نومه
أخذت شبشبها بيدها وطلعت تتسحب من المكان عشان لا تصحى أمها
طلعت من الجناح بكبره لبست شبشبها ونزلت للمطبخ
ناظرت بالمطبخ الكبير .. من جد بيت عز
فكرت اش تسوي لأمها فطور آخر شي قررت
سوت لها بيضتين مقليه وصبت بكوبين عصير تفاح وحطتهم بصينيه وطلعت لغرفة أمها
وريف: يمه .. يمه فديتك قومي الفطور
ام وريف صحت بسرعه: تسلم يدينك يابنتي

عبدالعزيز اليوم اول يوم في دوامه بالمستشفى كـ جراح
قامت فجر بدري عشان تبخره وتسلم عليه قبل يطلع
عبدالعزيز: يابعدي يافجوره ..
فجر تمزح: لا يابوي وش بتفيدني فيه يابعدي؟؟ نبي اليوم طلعه محترمه بمناسبة دوامك
عبدالعزيز: انا من يوم شفت بخورك وانا قايل انك مصلحجيه
فجر: ههههههههههههههههههههههههههههههه
عبدالعزيز:الا وش أخبار صديقتك وريف؟؟
فجر: هييييه يالاخو لا تتعدى على حقوق غيرك .. ياويلك من سلمان لو درى
عبدالعزيز: أي حقوق واي سلمان.. وسلمان وش دخله بالبنت.. اصلا انا ما سألت الا عشان اسمها وريف
فجر: ليه عاجبك الاسم؟؟
عبدالعزيز: احبه موووت
فجر رفعت حاجبها الايسر بإستغراب
طلع عبدالعزيز وخلاها بلحالها