منتديات بنوته - عرض مشاركة واحدة - لاقلـــــت أحبــــك إسـكتـــي وإحــضنــيني ..

06-15-2010, 03:58 PM

بدا الدكتور رامز بالعمليه .. فجر حاضنه وريف وتبكي عند باب غرفة العلميات .. جوري مقطعه نفسها من الصياح وشادن حاضنتها تهديها .. ام سلمان من الخرعه على ولدها رجولها تصلبت قعدوها على الكرسي اللي جنبهم تبكي وتدعي الله .. شادن راحمه حالة البنات وامهم وخايفه على سلمان اللي بدت تحس انه غالي عندها.. وريف كانت مرتعبه من داخلها بس تتظاهر بالقوه عشان لاينهارون البنات
محمد كان برا اتصلت عليه ام زياد
ام زياد: محمد يالله تعال انا خلصت
محمد: مدام انا في مستشفى
ام زياد: مستشفى؟؟ ليش؟
محمد: عشان مدام وريف قول روح
ام زياد بصراخ: ياحيوان انت تشتغل عندي ولا عندي وريف تعال بسرعه
قفلت ام زياد وناظرت بالساعه كانت 12ونص بالليل واتصلت على زياد..
زياد اللي كان مع اصحابه يحتفلون بالفوز بالكاس وصراخ ورقص وبعد شوي عندهم مقابله بالقناه الرياضيه لايف
زياد: هلا هلا يمه
ام زياد: شفت الحقيره الخايسه رايحه تسربت بآخر الليوله مع السواق
زياد: يمه شسالفه
ام زياد: بنت عمتك الخايسه طالعه برا البيت مع السواق
زياد: طيب انا اللحين اتصل لها

قفل زياد من امه وهو معصب منها وشلون تخرب عليه فرحته عشان وريف طلعت طيب يمكن محتاجه تطلع
وريف تحاول تتماسك: هلا زياد بشر وش النتيجه؟
زياد يمثل زعلان: افااا حتى ماتابعتي المباراه .. ابشرك فزنا وانا سجلت هدف الفوز
وريف صوتها مبحوح: من جد؟ الف مبروك
زياد: للله يبارك بك .. الا انتي وينك امي تبي السواق وقال انه معك
وريف ماقدرت تتحمل جلست تبكي
زياد: وريف ردي علي وش فيك؟؟؟
وريف بين شهقاتها : الحقنا يازياد حنا بالمستشفى
زياد: بالمـــــــــــــســـــــــــــــــــتــــــــــــ ـــــــشـــــــــــــــفـــــــــــــــــــــى!!!
وريف : ايه اخو صديقتي طاح عليهم ووديناه المستشفى ويسوون له عمليه اللحين وللحين ماطلع من الساعه 9
زياد: اوكي انا اللحين جايكم تطمنو

قفل زياد وراح لرئيس النادي
زياد: ياطويل العمر ابيك تسمح لي ابعتذر عن المقابله
رئيس النادي : مايصير يازياد انت صاحب الهدف
زياد: يا طويل العمر اهلي بالمستشفى
رئيس النادي: اجل تفضل الله يشفيهم
زياد: ان شاء الله
وطلع يركض من مقر القناه ركب سيارته وطيران عالمستشفى كانت الشوارع زحمه وهذي عادة الرياض لا واليوم بعد بزياده اغلبها سيارات تشجيع .. زياد خاف أحد يعرفه ويتأخر زود دق اللطمه وواصل طريقه للمستشفى.. اول مادخل راح لغرفة العمليات شاف حريم واقفين
زياد: سلام عليكم
وريف: وعليكم السلام .. زياد عملية انسداد الشريان كم تاخذ ساعه
زياد: والله ما ادري((يبي يطمنهم)) بس مدامها عملية قلب أكيد تطول
جوري :بابا بيعيش؟؟
زياد شاف جوري رحم حالتها المبهذله صح انها مو كبيره بس عيب تقعد بلا عبايه قدامه وقال لها وهو صاد: ان شاء الله انه بيعيش
أخذ وريف وصدو بعيد : اقول لبسوها عبايه ولا عطوها طرحه حرام تقعد كذا قدام الرجال
وريف: حتى حنا جايين ببيجامات .. هذا مو اخوهم وبس .. هذا يسمونه ابوهم يارب يخليه لهم هو اللي مربيهم ادعيله يا زياد
زياد: وانتي .. ترى صعبه تجين بلحالك بعد
وريف: لا ماجيت بلحالي شادن معي
زياد: شادن !!!!!!!!!!!!
وريف: ايه ماقصرت
ابتسم زياد وكبرت بعينه شادن : الله يعطيها العافيه

بهاللحظه انفتح باب غرفة العمليات وطلع الدكتور ومعاه واحد من الممرضين ..
جوري تمسكت في جاكيت الدكتور وهي تبكي : بابا مات؟؟؟
الدكتور تفشل منها لانها كانت قريبه وانحرج ولا رد
زياد حس انه لازم يتكلم مسك جوري مع كتوفها ورجعها على ورا :بشر يادكتور؟؟
دكتور رامز: الحمد لله نجحت العمليه
جوري شهقت من الفرحه وفجر حضنتها وهي تهمهم : الحمد لله
ام سلمان اللي رجولها متصلبه ماقدرت تجيهم سمعت كلام الدكتور وبكت من الفرحه : الحمد لله
شادن مسحت دموعها وهي فرحانه وراحت لأم سلمان تبشرها
وريف جات لفجر تتحمد لها بسلامة اخوها
الدكتور رامز : بس لازم مايتعرض لأي اخبار شينه أو إجهاد بالعمل أو زعل
جوري : والله ما احد يزعله ولا يروح العمل
الدكتور ابتسم لها وراح
زياد عصب التفت عليها وقال بهدوء: يا اختي وين عباتك؟؟
جوري تفشلت تذكرت كل اللي كانت تسويه يووووووووووه فشيله انا مو صغيره انا ثاني ثانوي فشـــــــــــــــــــله.. ودفنت وجهها بعباية فجر
فجر قررت تكلم نيابه عنها : والله حنا اختصبنا يوم طاح علينا وطلعنا وحنا مو عارفين شنسوي
زياد نزل عيونه بالارض احترام : اوكي الدكتور يقول مالازم يتعرض لاي تعب او زعل .((وسكت ثم كمل)) انتو عندكم أخوان؟؟
فجر: لا اخوي الثاني مسافر برا يدرس
زياد: اجل يالله ارجعكم البيت
جوري: لاااااااااااا ابي عند سلمان
شادن اللي واقفه جنبهم : جوري حبيتي سلمان نايم وماراح يخليكم الدكتور تدخلون عنده قبل بكره
فجر: ايه صح ويالله نرجع البيت نرتاح شوفي ماما تعبانه خليها ترتاح روعتيها بصياحك
زياد يكلم شادن : اوكي انتظركم بالسياره صح انها صغيره بس تكفي ان شاء الله
فجر: لا حنا معنا سيارتنا
شادن: مهبوله؟؟؟ قولي الاولى سلمكم ربي من نقاط التفتيش مو كل مره تسلم الجره((وتلتفت لزياد)) تخيل تبي تسوق السياره وترجع
زياد: عطوني مفاتيحها اوديكم وارجع آخذها
فجر عطت المفاتيح لشادن عشان تعطيها زياد.. أخذها زياد وتحرك على سيارته شغلها وشغل المكيف عشان يمديها تبرد قبل يجون
ام سلمان مو قادره توقف نادت فجر وحده من الممرضات وقالت لها : نبي كرسي متحرك نودي ماما للسياره
الممرضه : سنو هادا سستر هادا ممنوع
فجر دورت شنطتها مالقتها طلبت من البنات 10 ريال وعطتها السستر عشان تودي امها ولما وصلوها السياره حاولو يركبون امهم ورا بس ماقدرو عشانها ثقيله
نزل زياد: لالا ركبوها قدام عشان ماتتضايق بالقعده
وقعدو يعافرون فيها البنات ..هو صعب يتدخل لأنها حرمه غريبه عليه ايلين ركبوها السياره
فجر بعد ماركبت امها وبدون شعور : يمه سوي ريجيم
امها اللي كانت شايله هم ولدها بس ضحكت من كلمة بنتها: شلتك ببطني تسع شهور
زياد كاتم ضحكته وركب
وركبو البنات ورا فوق بعض وقامت وريف توصف له البيت لين نزلهم
زياد: وريف .. شادن .. انت خلوكم داخل ابروح اجيب السياره لثانيه وآخذكم
شادن: اوكي