منتديات بنوته - عرض مشاركة واحدة

06-07-2010, 07:35 PM

راشد : مبارك .. انساها .. و تمنالها الله يوفقها في حياتها ..
مبارك : انساها ..!!!!..
راشد : لو كنت تحبها صدق .. صدقني بتتمنالها الخير في كل خطوه تخطيها في حياتها ..
مبارك : اااااااااه .. والله اريد ادعيلها بالخير..بس..ما استحمل .راشد.تخيل..والله مب قادر اني اعيش..ليتني مت قبل لا اعيش هالحاله
راشد : مبارك .. شوف في هالدنيا جاد تلاقى حب ثاني ..
مبارك : مستحييييييييييييل .. مستحيل احب انسانه غير روضه .. تعرف .. انا اللين اليوم ما قلت لروضه كلمة احبج .. و الله و الله ما اقولها لانسانه في هالكون غيرها .. حتى و لو كانت روضه مب من نصيبي ..
راشد : بس يمكن في انسانه بتقولك هالكلمه ..
فهم مبارك قصد راشد ..
مبارك : راشد .. ما من بيني و بين منى شي ..
راشد : يمكن هالشي من صوبك .. بس انت ما تعرف شو من صوبها ..
مبارك : انا من اول مره رمست فيها منى .. قلتلها ان قلبي مب ملكي .. و هي تعرف اني احب روضه ..
راشد : جاد ربك .. مش يمكن منى تنسيك روضه ..؟؟..
مبارك : لا منى و لا غيرها ممكن انها تنسيني روضه .. راشد .. روضه شريان قلبي .. و حبها دم يمشي في شراييني ..
راشد : تراك اتعذب عمرك .. و اتعذب روضه بعد ..
مبارك : ااااااااااااااااااااه يا راشد ..
منع مبارك نفسه من الروحه صوب الوثبه .. بس عشان ما يلمح طيف روضه .. لانه تم يتعذب .. خلاص .. ما اقدر استحمل .. و روضه حست ببعد مبارك .. حست ان مبارك يتعمد هالشي ..
روضه : لا شمامي .. انا ادري .. ادري ان مبارك نساني ..
شما : روضه .. لا تظلمين مبارك ..
روضه : لا اظلمه ..؟؟!!!.. شما افعاله هي الي ترمس .. الحين من شهرين من رد من ألمانيا .. و لا ريناه الا مره وحده في ليوا .. من عقبها لا خبر و لا علم ..
شما : روضه انتي نسيتي وضعج اللحين ..؟؟..
روضه : بس هذا ما يمنعه ..
شما : لا يمنعه .. حشمته لهله .. و حشمته لهلج تمنعه ..
روضه : بس يا شما ..
شما : روضه .. انتي تعرفين انج ما بتكونين من نصيب مبارك .. ليش تعشمين مبارك بشي مستحيل انه يكون له ..!!!؟؟..
سكتت روضه .. و لا عرفت بشوه ترد عليها .. و في يوم كانت شما ترمس مبارك .. و قالتله عن روضه و عن رمستها ..
مبارك : اللحين هي تلومني ..؟؟؟..
شما : من حسرتها الي في قلبها يا مبارك ..
مبارك : لا و الله ؟؟.. و ظنج شو في قلبي ..؟؟..
شما : مبارك .. ممكن أسألك سؤال ..؟؟؟..
مبارك : عونج ..؟؟؟..
شما : انت فحياتك انسانه غير روضه ..؟؟..
هو فهم قصد شما .. اكيد راشد قالها عن منى ..
مبارك : انسانه غير روضه .. اممممممممم .. كيف يعني ؟؟..
شما : يعني .. انت بعت روضه عشان وحده غيرها ..؟؟؟..
مبارك : ابيع عمري و حياتي .. فدى عيون روضه ..
شما : عيل .. شو مدى العلاقه الي بينك و بين منى ..؟؟؟..
مبارك : ما من بيننا علاقه ..
شما : اها .. زين و الله .. خلاص عيل ما بطول عليك ..
مبارك : لا حول .. اللحين انتي شعندج ..؟؟..
شما : ما عندي شي ..
مبارك : شما ..
شما : ...
مبارك : لا تتوقعين في يوم اني ممكن اخون روضه .. بس لا تلوميني على أي شي اسويه ..
شما : بس روضه ما تستاهل هالشي منك ..
مبارك : شما .. لا تجذبين على عمرج .. انتي اكثر وحده تعرفين ان روضه ملك انسان غيري ..
شما : ..
مبارك : انزين قوليلي .. شو تبيني اسوي ..؟؟..
شما : ما ادري .. بس حرام عليك تحرم روضه من شوفتك ..
مبارك : شو هو .. شوف و حرقت يوف .. ؟؟!!!..
شما : مبارك .. تراك تميت قاسي ..
ليتهم يدرون بالي في قلبي .. ليتهم يحسون بالنار الي في يوفي .. جان عذروني ..
مبارك : شما .. اريدج توصلين شي حق روضه .. ممكن ..؟؟؟..
شما : اكيد ..
و بالباجر راحت شمامي حق قوم روضه .. و كانت شما و يدت روضه و ميثه و روضه يالسات في الصاله .. اول ما دخلت عليهم شما و عقب ما سلمت ..
يدت روضه : هاه شميم .. ما تبين تعرسين ..؟؟..
شما : و الله جن الا عندج معرس اباه .. ههههههههههه
يدت روضه : ودي بالستر .. مب امس خطبتج ؟؟..
روضه : بسم الله عليج يدوووه .. وين امس خطبتها .؟؟.
يدت روضه : ودي مب هي الي خطبها ولد حمد الخييلي ..؟؟..
شما حرمت محمد : لا يدووه ذيج وديمه ..
شما : جاد ايكون فالج فال خير يدووه ..
يدت روضه : انا بتخبركن .. سلطان شعنه مخر في عرسه ..؟؟..
روضه و هي تسوي حركات لميثه ..: تخبري العروووووووس ..
ميثه : الي منع بخيت من العرس .. منع سلطان ..
و من يابت طاري بخيت انجلب كيان روضه ..
يدت روضه : مالنا كلمه عالغريب .. بخيت متى ما بغى حرمته زاهبه ماشي الا يسريها ..
روضه : انا هب مستعيله عالعرس ..
يدت روضه : وووه غربلج الله .. وين هب مستعيله عالعرس ..!!!..
روضه : ما صحته و لا بصيحه ..
يدت روضه : هاي الا رمستج اليوم .. يوم هو في دار و انتي في دار .. و الا باجر من يظمج لدار .. بتباتين و تصبحين اتصيحينه ان فارقج ..
روضه بصوت واطي : صاحوه افمعشره ..
و عقب ما اذن عليهن المغرب .. نشن البنات عشان يصلن .. و نشت شمامي مع روضه صوب حجرتها عشان يصلن و في الحجره ..
شما : امممم .. عرب يسلمون عليج ..
و كانت روضه ماسكه السياده .. و من سمعت رمست شما تيبست ..
روضه : و الله صدق ..؟؟؟..
شما : و الله ..
روضه : شحاله و شاخباره .. و شو مسوي .. بخير ؟؟..
شما : بخير و نعمه .. ما يشكي باس ..
روضه : فديته .. و الله اني اشتقتله ..
شما و هي منزله راسها : و هو بعد .. مع انه يكابر في هالشي ..
روضه : اكيد يكابر .. و الا جان ما هنت عليه كل هالمده ما يسأل عني .. و لا يسير صوبنا حتى ..
شما : هو طلب مني اوصلج هالرساله ..
و ظهرت شما من مخباها ورقه و عطتها حق روضه ..
شما : هو نقلني اياها فالتيلفون عشان اوصلها لج ..
و راحت شما و فرشت سيادتها و صلت .. و روضه نشت و يلست على طرف الشبريه و قرت الورقه ..
" ليتج تفهمين قصدي ..

الا يـا مـدّعي فـيني الـنصافي... صـفا وقـتك وعني صرت جافي
وشـفت انّ الـذي ظـنّي خطا به... يـصافي وانـته الـلي ماتصافي
ثـلاث سـنين مـترقّب وصـالك... عـسى غيمك يطشطش ع الهيافي
ولـكنّك شـحيح الـوصل ظـالم... تـمـاديت وتـخـيّرت الـنكافي
تـجرعت الـمراره مـن جـنابك... وطـول الـهجر مـنّك والعسافي
وذقـت الـموت يـا موتي بغيابك... ولـيتك كـنت لـلشاجي سـعافي
تـعـايا مـن تـسابيبك خـفوقي... ولا لاقـى عـلى بـحرك مرافي
يـتـوه يـتوه واسـبابه غـرامك... ع شـط الـهم يـجرف بانجرافي
فـلا هـو نـال مـنّك مـا تمنّى... ولـنته كـنت لـجروحه مـشافي
ولا حـظّه الـردّي شفّ لصفوفه... ولا مـوته دنـا وانـهى الخلافي
بـعـد هـذا لـفاني مـا لـفاني... بـعد هـذا لـفى مـا كان خافي
لـفى لـي مـا حسب قلبي حسابه... وزلزل واعتصف روحي اعتّصافي
وشـبّ الـنار فـي قـلب المعنّى... وغـصّ بـسم مـسموم الزعافي
ودارت مــن حـواليه الـبسيطه... وضـجّ الصدر في خافي الخوافي
وخـصّوا بـالخبر ذايـع زفـافك... يـهـنوّنك عـلـى ذاك الـزفافي
زفـافك يـو مـا قـالوا زفـافك... خـطرت الـموت عقبه والحتافي
تـصّور وش هـي الـدنيا بدونك... وكـيف اقوى على اللي عاد لافي
قـتلته مـن لـعى قـربك قـتلته... قـتلته ولا لـقى مـنك نـصافي

و الله اني احبج .. بس ....
مبارك الخييلي "
( القصيده منقوله .. لشّاعر الوسمي )

قرت روضه الرساله مره و ثنتين و عشر .. خنقتها العبره من كلالامه .. و يلست تصيح .. و شما من شافت حالتها صلت الفرض و لا صلت السنه .. و ربعت صوب روضه الي تمت مكانها تقرى الرساله و تصيح .. اول مره مبارك يقولي كلمة احبج ..
شما : روضه فديتج ..
روضه : شما قالي احبج .. و يلست تصيح .. يالله فديت روحه .. حتى انا احبه .. و الله اني احبه .. دخيلج قوليله .. قوليله روضه تحبك .. حرام عليه انا ما قتلته .. انا انقتلت قبله ..
لوت شما على روضه : فديييييييييييتج و الله ..
هذا حال روضه و مبارك .. العذاب و الدموع .. كل ٍ انقتل في درب الهوى و الحب .. بعدها باسبوعين .. رجع مبارك و راشد صوب ألمانيا .. كان عنده مراجعه .. و الحمدلله .. الله شفى راشد من كل اعواقه .. سافرو اسبوع و رجعو ..
اول ما رجع راشد من المراجعه .. رمس هله و قالهم انه يبى شما ..
ام مبارك : يا ويلي يا راشد .. اسميك هب صاحي .. امس خطبنا الصغيره و اليوم تبانا نخطبلك العوده ..؟؟!!!..
راشد : امايه .. انتي ريتيها وديمه شو سوت فالمطار .؟؟!!.. لو الموت ما خذتها ..
مبارك : حشى هاي وديمه ياهل .. ما تعرف وين الله عاقنها في هالدنيا ..
ام مبارك : يا فظيحتيه عند فاطمه ..
مبارك : لا فظيحه و لا شي .. و جنج الا مستحيه من ختج .. انا برمسهم ..
ام مبارك : ادريبك .. هذا الشور شورك .. و الا راشد ما يتنقى في الحريم ..
مبارك : خليه يتنقى .. تره كل يوم بيعرس ؟؟..
و رمست ام مبارك ختها فاطمه ..
ام مبارك : يا لومي فيج يا فاطمه ..
ام شما : لا و الله يا سلامه .. انا بروحي متلومه فيج .. وديمه من ردت من المطار و هي مستلبسه .. ما تبى تعرس .. و افتظحنا فيكم .. و سيف .. حرام يالليل ما باته من اللوم ..
ام مبارك : حليلها وديمه ياهل .. ما تعرف .. شالنها هوى الدنيا ..
ام شما : هيه و الله .. و احنا ما بغينا نغصبها .. الا دام ان راشد تخير فشما دون وديمه .. مره فاله طيب .. و شما بنتكم و راشد ولدنا .. و ما بنلقالنا اخير منه ..و الحمدلله تمت الملجه على خير .. و راشد طبعا ما فيه صبر .. و اصر انه يعرس بسرعه .. و تحدد يوم العرس ..و قبل العرس بأسبوع .. في بيت قوم شمامي ..
شما : روضه قلبي يدق .. حشى احس عمري بموت ..
روضه : لا بسم الله عليج من طاري الموت يالغاليه ..
شما : ما اصدق ..
روضه : لا صدقي .. و انشالله الا يومين و بتكونين حرم راشد بن حمد الخييلي ..
شما : لا مب يومين .. 6 تيام ..
روضه : الله .. الله .. و كم ساعه و كم دقيقه بعد ..؟؟..
شما : روضوه .. دخيلج ..
روضه : ههههههههههههههههههههههه ..
شما : شو خلص فستانج ..؟؟..
روضه : لا بعده ورى باكر بيخلص ..
شما : الي مريحني انج بتكونين عندي يوم العرس ..
روضه : افا عليج .. احنا كم شما عندنا ..؟؟.. الا وحده ..
شما : فديتج و الله ..
روضه : بس شمامي .. انا لي طلب ..
شما : عونج ..
روضه : عانج الرحمن .. شمامي بدخل عندج يوم يدخلون راشد ..
شما : لا و الله ؟؟؟..
روضه : اوكي اوكي .. انا ادري ان راشد شافني ما بيظويج .. خلاص بندس فالكبت ..
شما : جب جب .. من حلاتج عاد ..
روضه : ههههههههههههههههههههه .. انزين بس بشوفكم شو تسوون ..
شما : اصلا البيت ما تدخلينه من يدخلون راشد ..
روضه : حشى يالغيره .. هههههههههههههه ..
روضه : صح شمامي بتسرين بالخميس و الا بتسرحين باليمعه ..؟؟.
شما : لا بنروح باليمعه ..
روضه : احسن .. عشان اغزيج باليمعه الصبح اخذ منج التقرير ..
قرب عرس شما و راشد و العرب مشتلين .. المناصير من صوب و قوم بالخيل من صوب .. طول الاسبوع الي قبل العرس كان مبارك و راشد غازين الوثبه .. عشان يشوفون ترتيب الخيم و الاعلام و الليتات و عثرة العرس الي ما توقف .. يوم الخميس الصبح .. تلايمو قوم بالخيل في رماح .. فبيت حمد الخييلي .. و يوهم عربان من كل دار .. و عالساعه 10 الصبح ظهرت المسيره .. و يا مكثر السيايير .. ماشالله .. كان شكل السيايير والاعلام تزينها .. صدق منظر يذبح .. كان المصور في سيارة عبيد و كان راشد في سيارته المرسدس .. و مبارك عداله بسيارته .. و من وراهم الشبيبه كلهم .. و وصلو الوثبه و كانو المناصير يرقبونهم .. كان الجو حلو .. و عمت الفرحه فالدار .. و من العصر و الحوربيه و العياله متواجدين عند خيمة الرياييل .. و من عقب المغرب ياهم محمد و سيف و ذياب بن زايد هذا غير باقي الشيوخ و العربان الي استاقو من كل دار .. و شما ظاربنها حفوز من اول اليوم .. و عالعصر يتها حنان شقير و عدلتها .. عالمغرب .. بعد ما خلصت روضه من عدلتها راحت صوب شما .. كانت روضه عذاب .. كانت لابسه مكسي وردي .. مرسوم على جسمها رسم .. و كانت راعية الصالون الي عدلتها حطتلها مكياج وردي .. و فاتحه شعرها مع تسريحه بسيطه رافعه بها كمن خصله من شعرها .. ماشالله شعرها تخطى ركبها من طوله .. اول ما خلصت اتصلت بسلطان عشان يخطفها صوب شما .. و خطفها سلطان و نزلها عند باب الفله .. دخلت روضه الفله .. جان تعق الغشوه و تروح صوب شما .. كان الجو ربشه .. البنات يرقصن و ينعشن .. و المسجل شال الدنيا .. كل البنات كانن عاقات الشيل و العبي .. و بدون منافس كانت روضه احلا بنت في العرس .. و الحق ينقال .. كانت احلا من العروس نفسها ..
شما : مالت عليج يا رويض .. و تبين تدخلين عندي انا و راشد بعد ..؟؟..
قالت وحده من البنات : يابخت بخيت بج ..
و تمن يالسات و يسولفن و يظحكن و راعية الاستيديو اتصورهن بكيمرة الفيديو .. و من عقب نشت شما و روضه معاها عشان يصورون شما و دخلن الحجره و خلن البنات في حفلتهن .. و هن يصورن شما ..
شما : روضوه فديتج عطشانه ..
روضه : فالج طيب ..
و ظهرت روضه عن شما و راحت صوب المطبخ التحظيري عشان تيب أي شي حق شما عشان تشرب .. و هي ظاهره من المطبخ سمعت صوت واحد يرمس ..
.... : لو تشوفين شكلي انتي .. حشى ميعف .. و لا جنا في عرس ..
و رجع و قال ..
.. : من اصبح و انا عند الطبابيخ ..
و في هاللحظه طاحت عين روضه على هالانسان الي يرمس .. و المشكله ان هو نفسه شافها .. و من شافها عرفها و تيبس الريال ..ماقدر انه يرمس او حتى يتحرك .. و روضه فاجه ثمها .. و نست انها بلا شيله و لا عباه ..

...*** اربع ... اربع حروف و يزيد حبي... اربع حروف و ايفز قلبي... انت الغلا ميزك ربي ... قلبي انا منك صويبي***..

حاولت روضه انها تتحرك او انها تسوي أي شي بس ما قدرت .. كانت صدمتها عوده .. و مبارك من شاف روضه تيبس .. هو تيبس من حلاتها .. ماقد حلم بأنه يشوف روضه .. و اللحين و هو يشوفها .. جنه يشوف ملاك من السما .. آيه من الجمال مرسومه في هيأة انسان .. كان يشوف روضه و جنه يشوفها لأول مره في حياته .. و هذي هي الحقيقه .. اول مره مبارك يشوف روضه .. و في هاللحظه نسى بخيت و نسى منى و نسى ذا الكون كله .. كل الي يشوفه اللحين .. هالغزال المنصوري الي سلب قلبه .. تم مبارك واقف و روضه واقفه .. بس تفاجأ بدمعه تنزل من عين روضه ... و في هاللحظه ..
مبارك : انزين برايج اللحين .. و سكر التيلفون بدون ما يعطي مجال للي على الخط انها ترمس ..
و روضه ميته ..يالله مبارك يرمس وحده .. لا و بكل قوة ويه .. يكلمها جدامي بعد .. و مبارك ما يدري .. و لا هب حاس بعذاب روضه .. يالله يالقدر .. اذا مبارك الي يحبني ذاك الحب .. يرمس وحده ..عيل بخيت شو بيسوي ؟؟..!!... يالله .. ليتني مت قبل ما اسمعه و هو يرمسها ..
مبارك و بصوت واااااااااااااطي : .. روضه ..
روضه و الدموع في عيونها : مبارك .. انت تحب وحده غيري .. ؟؟؟!!!!!!!!..
مبارك و هو مستغرب : شووووو ..؟؟؟!!!!!!...
روضه و هي تصيح : انت ترمس بنات ؟؟!!!... حراااااااااام عليك ..
و خنقتها العبره .. يالله .. ترها الخيانه ابّلاش عند الرياييل .. و ربعت روضه عن مبارك ..
مبارك : روضه . انتي شو تقولين .. ؟؟؟ .. روضه ردي ..
بس ما عطته ويه .. وخت و حطت الكوب الي في ايدها عالارض و افترت عن مبارك وتربع ....
و مبارك ما قدر انه يستحمل هالموقف .. ما قدر يستحمل ان روضه اتشك فيه .. او حتى اتشكك في حبه لها .. و روضه تربع و هي تصيح و توها بتوصل الدري عشان تروح الطابق الثاني .. و لا حست بمبارك الي وصلها و مسكها من ايدها ..
مبارك : رووضه ...
التفتت روضه صوب مبارك .. و في هاللحظه شاف مبارك فعيون روضه شي .. عمره ما بينساه ..
روضه : اكرهك ..
و من قالت روضه هالكلمه و مبارك جن شي يطعن افواده ..و في هاللحظه سمعو صوت حشره .. حس مبارك ان حد بيطلعلهم .. و لا بغى ان حد يشوفه و هو عند روضه .. و ما حس بعمره الا و هو يسحب روضه معاه و يدخلها في الحجره .. و روضه نفسها ما حست بعمرها و هي تمشي وراه الين ما دخلو الحجره و سكر مبارك الباب .. التفت مبارك صوب روضه .. الي كانت عاطيتنه ظهرها .. الله رحم روضه ان الحجره مظلمه و ليتاتها كانت امبنده ..
مبارك : انا شو سويت عشان تجازيني بكرهج ...؟؟؟..
تمت روضه ساكته ..
مبارك : الشيمه انج ترمسين ..
و روضه ساكته ..
مبارك : روضه لا تذبحيني .. دخيل والديج انج ترمسين ..
روضه و هي خلاص ما تقدر انها تستحمل اكثر من جذيه ... التفتت صوبه ..
روضه : اذبحك ؟؟!!.. لا و الله ..!!.. اللحين سكوتي بيذبحك .. و انت يوم اتكلم البنات ما بيذبحني ..؟؟!!.. انت تحس و انا ما احس ..؟؟!!.. انت شو جنسك .. ؟؟.. ليش ما تحسبي .. لييييييييييييييييييييييييش ..؟؟؟؟؟؟؟؟؟؟؟؟؟؟؟... و صاحت روضه
روضه : اكرهك .. اكررررررررررررهــــــــــــــــــــك ...
مبارك : روضه .. حرام عليج .. ليتج ذبحتيني .. و لا قلتيلي هالكلمه .. و الله العظيم اني ما حبيت انسانه غيرج و لا رمست بنت و الله العظيم ..
روضه : انت ليش تجذب ..؟؟؟!!!..
مبارك : اجذب ؟؟!!!!!!!!!!!!!!!!!!!...
روضه : مبارك سمعتك و انت ترمسها .. شو ما تتذكر ؟؟؟.. مسرع ما نسيت .. و هذا توك مسكر عنها ..
و في هاللحظه ظحك مبارك من الخاطر ..
روضه : و تظحك بعد ؟؟؟... حقيييييييير اكرهك ..
و افترت روضه عن مبارك و كانت تريد انها تطلع من الحجره .. بس مبارك كان واقف عند الباب و لا تقدر انها تطلع .. شاف مبارك روضه و هو يبتسم .. ابتسامه ذبحت روضه .. و من شافت ابتسامته نست غيضها على مبارك ..
مبارك : روضه ... أنتي ظالمتني ..
روضه باستهزاء : ظالمتنك ..!!!!!!!!!...
مبارك : هيه .. لأني كنت أرمس عويش ختيه ..
انصدمت روضه ..
روضه و هي تكابر : روح جذب على وحده غيري ..
مبارك : و الله العظيم انها عوشه ختيه .. و اذا مب مصدقه اندوووج التيلفون و شوفي الرقم .. و تراني من سكرت عنها و انا عندج لا مسحت رقم و لا زودت رقم ..
و مد مبارك تيلفونه لروضه .. و خذت منه روضه التيلفون و شافت ان اخر مكالمه صادره لرقم باسم "عواشي" و اخر مكالمه وارده "بوسنيده".. و في هاللحظه احمر ويه روضه من المستحى ..
مبارك : امممممم ...
و توها روضه بتناول مبارك تيلفون .. و هو ماد ايده بياخذه ..
مبارك و بكل رقه : ... تغارين ..؟؟؟؟..
و في هاللحظه طاحت عين روضه عمبارك .. من شافت مبارك في هول فلة خالته ما انتبهت لشكله بس اللحين اتشوف مبارك ... و جنها اول مره اتشوفه .. ما كان لابس سفره .. كان لابس طاقيه و شعره من تحتها يذبح .. و كانن اول عقمتين من كندورته مفتوحات .. ما قدرت روضه انها تمنع نفسها و ما تتأمل مبارك .. هي تعرف ان هالوضع الي هي فيه مع مبارك مب زين .. بس اذا ما كان مبارك ملكي في هالدنيا .. ترى هو ملكي في هاللحظه .. و مبارك .. مسكين كم بيستحمل عشان يعيش من بعد هاليوم .. و هو يشوف شوق قلبه جدامه ولا يقدر انه يسوي شي .. غير النظر ..
مبارك : .. تغارين ..؟؟..
نزلت روضه ويها .. و مدت ايدها بالتيلفون لمبارك .. و في هاللحظه .. مسك مبارك ايدها .. و من حست روضه بايده سحبت ايدها .. بس مبارك ما طاع انه يفتح ايدها ..
مبارك : روضه ..
و روضه مب عارفه شو تقوله او تسوي ..
مبارك : روضه .. اريد اشوف اعيونج ..
رفعت روضه ويها لمبارك لا اراديا ..
مبارك : روضه .. تعرفين اني ... احبج ..؟؟؟..
و في هاللحظه .. غمضت روضه عيونها ... مبارك .. لا... تريد تذبحني هالبنت؟؟!!.. .. تم مبارك ساكت... و يتأمل روضه .. يريد يعرف رد روضه على كلامه .. بس روضه ما قدرت انها تتنصخ بشي .. تم مبارك يتأمل روضه .. شاف في عيونها الي ما قدرت شفاة روضه تنطقه ..
مبارك : ان ما نطق لسانج .. ترى قلبج نطق ..
كانت خصله من شعر روضه نازله على يبهتها الين خدها ... مبارك و هو مب حاس بعمره .. رفع هالخصله و حطها ورى ذنها ..
مبارك : روضه .. ارجووووج ... لا تكونين لريال غيري ..
ما عرفت روضه شو تقوله او حتى اترد عليه ..
مبارك : ارجووووووووووووووووووووووج ... والله اني اتعذب في كل مره اتخيل انج بتكونين فيها لانسان غيري ..
و سكت مبارك و نزل راسه و تم يشوف ايد روضه و هي بين ايديه ... و روضه اول مره اتشوف مبارك في هالحزن كله ..
ماعرفت روضه شو تسوي .. هي بايدها انها تعطي الامل لمبارك .. و بايدها انها تمسح اهمومه .. و تزيد افراحه و مسرّاته في هالدنيا .. رفعت روضه ويه مبارك بايدها .. استغرب مبارك من فعلها هذا ..
روضه و من الخاطر و بكل حب في كيانها : مبارك .. و غلاتك في فوادي .. ما ريال يمسك ايدي من بعدك ... الا انت ..
مبارك : و الله ..؟؟؟؟..
روضه : و الله .. حتى و لو كان هاليوم اخر يوم في حياتي ..
مبارك : بسم الله عليج من هالطاري ..
روضه : صدقني مبارك .. اذا باجي حياتي بعيشها دونك .. احسن لي ما اعيشها ..
مبارك : فديت روحج .. و حب ايد روضه ..
و توه بيتكلم و الا تيلفونه يرن .. و كان راشد خوه متصل .. رد مبارك على راشد ..
مبارك : حيبه ..
راشد : مبارك .. وين انت ؟؟..
مبارك : ليش ..؟؟..
راشد : ياخي مرتبش ..
مبارك : ههههههههه .. مب معرس لازم بترتبش ..
و في هاللحظه تحركت روضه عشان تطلع من الحجره .. و تخطت مبارك و قدها بتفتح الباب .. بس مبارك مسكها .. التفت روضه لمبارك و ابتسمتله .. و من شاف ابتسامتها تيبس و لا يدري براشد شو يقول و لا حاس بشي في هالدنيا .. فتحت روضه الباب و طلعت من الحجره و هي تربع عن مبارك ... تم مبارك يوايج على روضه وهي تربع على الدري و شعرها يتمايل وراها ...
مبارك : اااااااااااه ياقلبي ..
راشد : حوووه مبارك شعندك ..؟؟؟..
مبارك : لا حوووول .. انت بتخبرك شعندك .؟؟.. شعندك محتشر ..؟؟؟؟
راشد : ياخي مب عارفلي راس من ريل في هالعرس .. و هذا خليفه طفربي تراه ..
مبارك : لا اله الا الله .. راشد .. بتسبح و بييكم ..
راشد : بسرعه الله يخليك ..
مبارك : انشالله ..
و سكر مبارك عن راشد .. و تم يفكر في روضه .. يالله كم بعيش من عقب هاليوم ... فديييييييييييييييييييييييييييتها و الله .. و روضه من راحت عن مبارك دخلت حجرة وديمه و عدلت مكياجها بعد ما تخرب شوي من دموعها .. و من عقب ردت صوب شمامي و البنات
شما : اخيرا ييتي ..
روضه و هي طايره من الفرح : ااااه و ليتني ما ييت ..
و راحت و يلست عدال شما ..
شما و بصوت واطي : شو بلاج ..؟؟؟..
روضه : اممم .. ماشي ..
شما : لا و الله شي ... شو ..؟؟..
روضه : سالفه طويله بقولها لج بعدين ..
و يلسن البنات يسولفن و يظحكن .. و كل شوي اتقوم وحده و ترقص .. راحت روضه و حطت غنية عيضه و اريام" ودي بكلمه يا حبيبي "..و قامت و رقصت هي و عايشه و كمن بنت من هلهن .. و كانت روضه ترقص بغنج .. اااااااااه .. كل البنات ماتن عليها .. هي بدون شي ذابحه البنات بزينها .. لا عاد و من رقصت صدق ماتن عليها .. و من يى هالمقطع يلست روضه تغني و هي ترقص و تسوي حركات و تتمايل .. عذااااااااااااااااااااب ..
روضه : شمامي .. اهدااااااااااااء .. و غمزت حق شما .. و هي طبعا عرفت ان مبارك هو المعناي بهالاهداء ..
( انت حياتي و انت لانفاس ..ودك بكلمه كلها احساس... لك زاد حبي ماله اقياس... و ان غبت حبي ما يغيبي..... حلوه.. حلوه احبك من شفاتك ...انزع غرورك من صفاتك... كلمه تغير كل حياتك.... و اسقيك من حبي و طيبي ) ..
اول مره روضه ترقص و هي اتحس بهالاحساس .. احساس عيشها في عالم ثاني ..
( الحب في قلبي و قلبك... تشتاقلي و احب قربك... و اشتاقلك و احيى بحبك ...دايم احبك يا حبيبي ...العين .. العين تتمنى تشوفك ...اقهر زمان مع ظروفك... لا يخدعك ظنك و خوفك... خلك من اعيوني قريبي )
و عند الرياييل مبارك متشقق .. عايش في عالم ثاني .. عالم ملكته روضه .. يالله .. ما اتخيل اني مسكت ايدها .. ما اتخيل اني كلمتها .. ااااااااااااااااااااااااااه يا روضه .. ليتج نصيبي ..
و انحط العشى و تعشو العربان و الحوربيه بعدها .. و في خيمة الحرمات عالساعه 11:30 طلعو شمامي .. و قبل لا يطلعونها كانن البنات كلهن في الخيمه قبلها .. و شما ياها سالم و علي و سعيد و دخلوها في الخيمه .. و كانت دخلتها من ورى الكوشه .. اول ما وصلت شما الخيمه .. شغلولها غنية اصيل ..
( تمشي بخطوات عز ٍ و احتشام ... و الحيى في وجهها الباسم يجود... ظبية ٍ فيها الغرام العذب هام .. حايزه كل الحسن عرض ٍ و طول ) ...
مشت شما عالكوشه و خوانها عندها.. بعدين خلوها تمشي بروحها في الممر الي بين الحرمات .. و في ردتها صوب الكوشه .. تلقالها سعيد و سالم و هم ايولون .. و تمو ايولون عالكوشه مسوين ربشه .. كان الجو ولا احلا من جذيه .. و خوان شما ما بغو يطلعون .. بس الحرمات تمن محتشرات .. فطلعو ..
سالم يقول لخالته سلامه : ما عليه .. حرام يا اني ادخل راشد الخيمه و عاد حينها حد يظهرني من الخيمه ..
ام مبارك : انشالله .. اللحين ظهر ..
سعيد : عنبوه هيلا عيايز منو بيطالعهن .. انا من سن احفادهن ..
ام شما : يا بويه طلعو ..
سعيد : بس بنرد عند التصوير ..
ام شما : ما عليه .. ظهر اللحين ..
و ظهرو من الخيمه .. و من عقب نشن البنات و الحرمات يسلمن على شما و الرياييل مرتبشين .. ياييبين فرقة بوصلاح و اليويله مشتلين .. كانت ليله و لا احلا منها ..
سالم : يله راشد ..
راشد : شو ..؟؟؟..
سعيد : بندخلك على شما في الخيمه ..
راشد : لالالالالالا شو خيمه و حرمات ؟؟!!!!!... لالالالالا ..
مبارك : افا يا بو سنيده .. نش نش ..
سالم : راشد لا تخرب علينا .. ياخي نش ..
راشد : لالالا .. و منو قال اني بحدر خيمة الحريم ..؟؟..
سعيد : عيل احنا قلنا لشما ريلج بيدخل عليج الخيمه و الحرمات مرتبشات هناك يرقبنك ..
راشد : و انتم شعنه ترمسون بشي انا ما قلته ..؟؟؟..
سالم : مب مشكله يله نش نش ..
و عقب عثره و محايل طاع راشد انه يحدر
مبارك : و انا بحدر بعد ..
سالم : شوووو ..؟؟؟..
مبارك : شو شوو ..؟؟؟..
سالم : وين تبى ..؟؟؟؟..
مبارك : و انت وين تبى بعد ..؟؟؟..
سالم : بتصور عند ختيه ..
مبارك : و انا بتصور عند خويه ..
و تمو يتواجعون .. سالم ما يريد مبارك يدخل .. و مبارك محتشر يريد يدخل.. و دخلو سعيد و سالم راشد على شما في الخيمه .. و راشد مسكين مرتبش مب عارفله حال .. اول ما مشى عالممر .. و وصل الكوشه .. و خى على شما و حبها على راسها .. و من عقب يلس عدالها شوي .. و سالم و سعيد مشتلين .. و راعية الفرقه ما قصرت .. ربشتهم اكثر .. و مبارك برى الخيمه و محتشر ..
مبارك و هو يرمس امه في التيلفون : لا و الله ..؟؟.. اللحين عيال ختج دخلتيهم و انا ولدج ما ادخليني ..
ام مبارك : يا بويه هيلا خوان العروس ..
مبارك : و العافيه .. و انا خو المعرس ..
ام مبارك : يا ولديه ..
مبارك : شوفي عندج خمس دقايق تظهرين و تخليني ادخل و الا و الله ادخل بلا شوركن ..
ام مبارك : اففففففف ..
مبارك : لا تتأففين .. قلتلج ..
ام مبارك : ماعليه ..
و سكرت امه عنه و رمست ختها فاطمه ..
ام شما : ياويلج من ربج جنج محيره مبارك برى .. ودي خليه يحدر ..
ام مبارك : بس شما ..
ام فاطمه : ما عليه بنحط العباه عليها ..
و راحن و خبرن راشد و شما ... و من عقب حطن عباه على شما عشان ما يقدر مبارك انه يشوفها .. و ظهر سعيد صوب مبارك .. و دخلو الخيمه .. و من دخل مبارك الخيمه و كل الحرمات افترن صوبه .. كان عذاااااااااااااااااااااااب .. لا و دخل و هو يظحك .. و من شافته روضه الي كانت على طرف هي و البنات تيبست من الخاطر .. كان مبارك لابس كندوره سوده و سفره حمرى و عقال و العصى في ايده .. صدق ما شالله .. كلمة حلو ما تعطيه حقه .. اول ما وصل مبارك صوب الكوشه .. سوى حركه لراشد خوه .. ماتن الحرمات عليه .. صدق كان يذبح .. و سلم على راشد .. و قال شي حق شما .. و من سمعه راشد مات من الظحك .. و كل الحرمات يبن يعرفن هو شو قال و اولهن روضه .. و من عقب تم ايول هو و سعيد و سالم .. و الحرمات ميتات عليهم .. قبل كانن ما يبن خوان العروس يرتزون في نص الخيمه .. الا من شافن مبارك و شافن حركاته و يولته هو سالم و الحركات الي يسونها .. ما ودوووهم يظهرون من الخيمه.. تمو شوي و من عقب ظهرو من الخيمه .. مبارك و هو نازل من الكوشه اتصل بعوشه عاش تيه .. و توه بينزل من الكوشه و ان عوشه خته عنده .. كان مبارك يتعلث باي شي بس عشان ايتم في الخيمه اكثر ..
مبارك : عقي غشوتج اريد اشوف عدلج..
عوشه : هههههههههههه .. عدلتيه انا و الا عدلت عرب ..؟؟؟؟.. هههههههههههههه ..
مبارك : أي عرب ..؟؟..
و افترت عوشه براسها صوب روضه .. الي كانت اتشوهم .. بس طبعا كانت بغشوتها ..و من طاحت عين مبارك على روضه .. ابتسملها .. اااااااه يريد يذبحني ..و من عقب ظهر من الخيمه .. و من عقب ظهر راشد من الخيمه و تمن البنات شوي .. و من عقب دخلو شما الفله عشان يدخلون راشد عليها .. و قبل لا يدخل راشد طلعن البنات عن شما .. و دخل راشد و خوانها و تمو يتصورون و من عقب تم راشد و شما بروحه مع المصوره .. و تمت تصورهم ..
راشد : حشى تعبت ..
المصوره : ازا بتريد .. بدك تعمل شوية حركات مع العروس ..
راشد : حركات شو بعد ..؟؟..
المصوره : يعني تمسك ايدها .. هيك ..
و تمت المصوره اتصور .. و شما حليلها ميته على عمرها من المستحى ..
المصوره : بدك تبوس المعروسه ..
راشد و هو يطالع شما : سمعتي .. هي قالتلي ابوسج .. و حب راشد شما عراسها عشان المصوره تصورهم ..
راشد : تسد وحده و الا ..؟؟؟..
شما و هي مستحيه : لا و الله ؟؟.. عيبتك السالفه ..
راشد : هههههههههههههههههههههههه .. ياويلي على الي يستحون .. اقولج متى بتخلصين ..؟؟..
المصوره : بس شوي ....
راشد : شوفي تراني ارقب هالليله من سنين ... ارجوووووووووج خلصي و فكينا ..
المصوره : هههههههههههههههه .. ع شو مستعجل بدك اتشوفها طول حياتك هالأمر...
راشد : هذي قمر حياتي .. بس خلصينا الله يخليج .. تراني الا جذيه ماسك عمري ..
و في النهايه راغ راشد المصوره و الي تصورهم بكيمرة الفيديو من الحجره ..
راشد : احم احم ..
شما : راشد انت ما تستحي ..
راشد : افا ليش ؟؟..
شما : شو كنت اتقول للمصوره ..؟؟؟.. ايه هذا كله بيظهر في كيمرة الفيديو ..
راشد : و يظهر انزين .. حرمتيه و اتغزل فيها حد له شي عندي ..؟؟؟..
راشد : امممممممممم ... شمامي ..
شما : .. لبيه ..
راشد : .. تحبيني ..؟؟؟..
هزت شما راسها ..
راشد : لالالالالا .. اريدج تنطقينها ..
شما : رااااااااااااشد ..
راشد : دخييييييييييييييييييلج ..
شما و بصوت وااااااااااااااااااااااااااااااااطي : ... احبك ..
راشد : شووووو ..؟؟؟..
شما : حرام عليك راشد ..
راشد : رفجه انج تعيدينها ..
شما : اوووووه .. احبك ..
راشد : اااااااااااااه .. يا ويل حالي ..

و دامت دياركم عامره بالافراح و المسرات

..*** يا قلب وشبك ما تصافي .. تهوى التباعد و التجافي .. و انا معك صادق بحبي .. مخلص ولك بالحب وافي .. عذبتني و اسهرت عيني .. و انسيت لي بينك و بيني .. حلفتك بعشرت سنيني .. كافي من التعذيب كافي ***...

يوم الجمعه الصبح ..

ام شما : بتخبرك سعيد ..
سعيد : لبيه ..
ام شما : لبيت حايه .. هاه فديتك ما تغايرت من ختك و بغيت العرس ..؟؟..