منتديات بنوته - عرض مشاركة واحدة

06-07-2010, 07:34 PM

شما : انتقم منك ..؟؟؟..
مبارك : شو... تبيني احس بالي كنتي تعيشينه انتي و راشد ؟؟..
شما : انت شو تقول ..؟؟؟..
راشد : مبارك شعندك عليها ..؟؟؟..
مبارك : حرام عليج يا شما .. ليش ما رمستي و قلتي ..؟؟..
شما : مبارك ... انا ما قدرت ارمس ..
مبارك : اوكي ليش ..؟؟؟..
شما : ليش مبارك انت شو كنت بتسوي ..؟؟..
مبارك : ما كنت بخليها تاخذ واحد غير لو عقص رقبتيه ..
شما : مبارك اتكلم بالعقل .. انت وين و روضه وين ..
مبارك : شما الي بيني و بين روضه شي ما يفرقه لا بلاد و لا بحووووووور ..
شما : ...
مبارك : .. شحالها ..؟؟؟..
شما : وايد تعبانه ..
مبارك : بس انا اليوم رمستها .. ما كانت لا زعلانه و لا شي .. حتى ما قالتلي ..
شما : و الله يا مبارك .. ان روضه من اسبوعين و هي تصيح .. و الله انها ما تباه بخيت ..
مبارك : بخيت ..؟؟.. هو اسمه بخيت ؟؟..
شما : هيه .. منصوري .. من هلهم .. من هل الخزنه ..
مبارك : و هو من وين يعرفها ؟؟؟..
شما : لا يعرفها و لا شي ... هله الي خطبوها له ..
مبارك : الله يسامحج .. ليش ما رمستي .. حرام عليج .. انا شو سويت فيج عشان اتجازيني بهالشي ...
شما : مبارك ... شو هالرمسه .. و الله يا غلاك من غلا سعيد و سالم .. و انا كنت بقولك الا روضه ما خلتني ..
مبارك : هي ما كانت تباني اعرف ...؟؟؟ ..
شما : ما بغت انها تغثك ...
غمض مبارك اعيونه ... يالله .. عشان جذيه هي سكتت يوم يبتلها طاري العرس ..
مبارك : مستحيل .. ما اقدر اتخيل روضه تعرس بريال غيري ..
شما : مبارك جن الله كاتبلك بنصيب مع روضه .. صدقني .. لا بخيت و لا غيره ممكن انه يفرق من بينكم ..
مبارك : يخسي لا بخيت و لا عشره من امثاله .. بيفرقون بيني و بين روضه ..
راشد : مبارك .. ترى البنت انملج عليها ..
مبارك : راشد لا تذبحني ..
سكتو راشد و شما عن مبارك .. مب عارفين شو ممكن يسووله .. مبارك ماله امل في روضه .. و هذي الحقيقه و الكل يعرفها .. عدا مبارك الي مصر ان روضه ما تكون لغيره ..بس كيف .؟؟. خلاص روضه تعتبر حرمة بخيت .. و هذا الي مب قادر مبارك انه يستوعبه
رجع مبارك الفندق .. اول ما دخل الغرفه .. تم يحوط فيها .. مب قادر انه ينام .. ظهر من الغرفه صوب البلكونه .. تم واقف يتأمل .. يحاول انه يستوعب الي استوى .. حاول مبارك انه ينام .. بس ما قدر .. كل ما تخر عينه يتخيل روضه و هي عند ريال غيره .. و تم مبارك عهالحال .. بالباجر .. طلع مبارك من غرفته .. و راح صوب امه و بوه .. بس كانو بعدهم نايمين .. طلع من الفندق .. و تم يمشي .. تأخر مبارك ... بعدين رجع الفندق و تسبح و طلع عشان يروح لراشد .. كانت منى من الامس مب نايمه ... تحاتي مبارك .. كانت حاسه ان فيه شي .. مستحيل يكون هذا مبارك الي اعرفه .. يالله هو شو فيه .؟؟.. كانت منى تستغل أي شي بس عشان تظهر من الغرفه و الا من الفندق .. على امل انها تشوف مبارك .. و صادف انها نازله من الفندق و كان مبارك توه بيظهر من الفندق .. بس كان يكلم راعية الرسبشن شوي .. اول ما شافته منى وقف قلبها .. يالله فديته .. كان مبارك موخي براسه يكتب شي عطته له راعية الرسبشن .. و كانت خصله من شعره نازله على يبهته .. كان شعره مبلول .. بس يذبح .. تصنمت منى من شافته .. رفع مبارك راسه و ظحك حق راعية الرسبشن .. حست ان ظحكته ما كانت من الخاطر .. و الي اثبتلها هالشي .. انه افتر بويهه في نفس الاتجاه الي كانت واقفه فيه .. و مع هذا ما افترت عينه صوبها .. مع انها حست ان في ثانيه طاحت عينها في عينه .. و مع هذا مشى مبارك و لا اهتم لا بمنى و لا بغيرها .. كان كل تفكيره بروضه .. تم مبارك على هالحال اسبوع كامل .. لا يكلم حد .. و لا يرد على حد .. يفكر كيف ممكن يرجع روضه .. و راشد الحمدلله .. الله شفاه من اخطر الاصابات الي صابته .. و انشالله ما بقالهم في ألمانيا الا يومين و بيرجعون البلاد ..

في الامارات ..

في الوثبه ..

بوشما : يالله يا فاطمه .. شو بنسوي اللحين ..؟؟؟
ام شما : و الله يا سيف ما ادري ..
بوشما : يافضيحتنا في حمد و سلامه .. جيف امس مقربيبهم و اليوم عقب ما تعوق ولدهم انرده ..؟؟..
ام شما : يا حمد شو نسوي .. البنت استلبست علينا ..
بو شما : يافضيحتنا بين العربان .. انتي بناتج مستبطرات ..
ام شما : يالله عليك .. تباني افر بنتي في حلج الريال و هي باغضتنه و تردلي باجر مطلقه ..
بوشما : و اللحين شو الراي ..؟؟..
ام شما : خير اللين ما ترد سلامه و عيالها ..
و ظهرت ام شما عن ريلها .. و راحت المطبخ و لقت شما .. كانت تعابل الفواله في المطبخ ..
شما : رب ما شر امايه ..؟؟. بويه شو كان يباج ؟؟..
ام شما : ااه .. و الله ياشما .. بوج متلعوز بسالفة وديمه ختج ..
شما : ليش وديمه شفيها ..؟؟..
ام شما : ترى خالتج و عيالها و بيردون البلاد عقب يومين .. و لا هب عارفين شو نقولهم .. ختج مستلبسه .. ما تباه راشد ..
شما : انزين ..
ام شما : و بوج مهموم .. صدقه .. يا فضيحتنا بين العربان .. امس يوم الريال بنعمه قربنابه و اليوم يوم هو متعوق رديناه ..!!.. ما يستوي ..
شما : ... امايه وديمه ياهل .. لا تلومونها ..
ام شما : ماشي معور قلبي الا يوم انها ياهل .. اااه .. خير اللين ما ترد سلامه .. و انشالله لذاك اليوم يستوي خير ..
تمت شما تفكر في الحاله الي انحطت فيها عايلتها .. يالله .. راحت شما صوب بوها .. كان يالس في الميالس .. اول ما شافته .. حست ببوها مهموم .. عورها قلبها على بوها .. يالله ما رحمناه لا في شبابه و الا في شيبته ..
كان بو شما يالس على الكرسي ..
شما : هاه بو سعيد .. اشوفك سرحان .. لهالدرجه شالنك هوى العيوز .. هههههههههه ..
بوشما : لا و الله يابنتي .. شاليتني هموم هالدنيا ..
راحت شمامي و يلست عالارض تحت الكرسي الي بوها يالس عليه ..
شما : فديت روحك من الهم يالغالي ..
شمامي اقرب وحده من خوانها لبوها .. وايد تحبه .. و هو وايد يرتاح الها ..
شما : شو بلاك يالغالي ..؟؟..
بو شما : و الله يالغاليه .. مستهم من خالتج و ريلها .. باكر بيوون يتخبرون عن عروس ولدهم .. و انتي شفتيها ختج شو سوت ..
شما : بويه ترى وديمه ياهل .. و محد بياخذ بفعلها ..
بوشما : جيف اليوم يوم تخطي خليناها ياهل .. و امس شاورناها عالعرس و خليناها حرمه ..
شما : انتي ليش مستهم ..؟؟.. جاد ربك يستوي الي يخفف هالهم من على قلبك ..
بوشما : يافضيحتنا بين العربان .. وين بودي ويهي من حمد و من الرياييل .. ؟؟..
وخت شما براسها .. فديته ..
شما : .. بويه ..
بوشما : لبيه ..
شما : لبيت حايه .. ان بغيت الشور .. خبرهم .. قولهم هذا الحال علينا .. و شاورهم ..
بوشما : مالي ويه اروحلهم و اقولهم ..
شما : .. خلاص بويه .. جن هذا الحال عليك .. خلاص بويه .. انا باخذه راشد ..
بوشما : .. شووو ..؟؟؟..
شما : ..
بوشما : يابنتي جيف بتاخذينه ..؟؟..
شما : .. يابويه .. انا مستهمه منك يالغالي .. ماريدهم يلحجونك اللوم ..
بوشما : يابنتي .. جاد مبارك يباج ..
شما : لا .. مبارك .. رمس من زمان و قال مالي حايه في بنات خالتيه ..
بوشما : فديييييييييييييتج ياالغاليه ..
وخت شما و حبت ايد بوها ..
بوشما : انا بتشاور فيا امج .. و بخيرهم .. جنهم يبون نسبنا .. ترانا بنقربهم فيج ..
فرحت شمامي لهالشي .. شمامي ماكانت عندها هالجرأه .. بس من شافت حال بوها عورها قلبها على بوها .. و هي يوم اقترحت هالاقتراح ماكانت تفكر في نفسها .. بالعكس .. كانت تفكر بهلها و بوها قبل الكل .. عقب ما ظهرت شما عن بوها .. اتصلت بروضه ..
روضه : يعني هو كلمج ..؟؟..
شما : هيه كلمني .. و تبين الصراحه ..؟؟.
روضه : شو ..؟؟..
شما : ليتني ما كلمته ..
روضه : ليش ..؟؟.
شما : و الله قلبي عورني عليه .. يالله يا روضه .. عمري ما تخيلت مبارك ممكن يحب في يوم .. لا و ايحب هالحب كله لج انتي !!.. و الله قلبي عورني عليه ..
روضه (ودمعتها تنزل ..) : فدييييييييييييييييييته .. شمامي .. انتي تعرفين اني مب موافقه على بخيت و اني ما اباه ..
شما : روضه .. انا ادري و الكل يدري .. بس خلاص .. ما بيدنا حيله ..
روضه و هي تصيح : الله يسامح هليه .. الله يسامحهم ..
و يلست روضه تصيح .. يالله يا مبارك ..

في ألمانيا ..

خلاص باجر قوم مبارك بيرجعون البلاد .. و منى ميته .. الكل حاس ان مبارك فيه شي مب طبيعي .. و منى تحس ان موتها جرب .. مبارك بيرجع البلاد .. و هي بتم بعدها اسبوعين و الا ثلاثه .. و حاسه ان مبارك فيه شي مكسور .. و مبارك من عرف بملجة روضه .. ما تم شرات قبل يسولف و يظحك .. حتى عواشي .. صار يخطف من عدالها عادي جنه ما يعرفها .. و هذا الشي الي خلنا منى تخاف عليه من الخاطر .. كان فليل .. و كان مبارك في حجرته .. كان يحاول انه ينام .. بس من اسبوع و النوم جافنه .. و الزاد عايفنه .. و في هاللحظه يته مسج ..
" لا تذكرني بحبك يا غناتي .. لا تذكرني بماظيك الجميل .. في صدى ذكراك باقزر حياتي .. مستحيل احب غيرك مستحيل "
اول شي ما عرف مبارك الرقم .. فطنشه .. قال يمكن حد مغلط ..
و رجع و يته هالمسج من نفس الرقم ..
"لك العمر بقظيه فاطلاب .. اطلب رضاك و مستذلي .. لو بتغلج دوني الباب .. لك باب قلبي طلج خلي"
قراها مبارك .. لا ما اعتقد .. انه مغلط .. راح مبارك و اتصل عهالرقم ..بس محد شله .. استغرب مبارك .. بس ما اهتم وايد ..
بس تفاجأ ان راعي هالتيلفون رجع و طرشله مسج ..
"ارفج انا بعيونك .. رفجة عرب يوفون .. لو كلهم ينسونك .. ما انساك مهما يكون "
رجع مبارك و اتصل .. و نفس الشي محد شله .. طرش مبارك مسج ..
"السموحه .. الا تراني ما عرفتك .. منو الريال ؟؟.. "
شوي و يته هالمسج ..
" انا الشاكي ..انا الباكي ..انا الحساس .. انا الي في المحبه خاظع ٍ راسي "
رد مبارك ..
"ياويل حالي .. ترك متخشع يالغالي .."
يته مسج ..
" انا بنت .."
اول ما قراها مبارك عرفها .. هذي اكيد منى ..
رد عليها ..
" اها .. السموحه منج ياختيه .. "
ردت
"مسموحه .. بس ممكن أسألك سؤال لو سمحت ؟؟.."
رد عليها ..
"تفضلي الشيخه .."
ردت ..
"شو فيك .. انت من اسبوع مب طبيعي "
سكت مبارك .. اللحين هذي شو اقولها .. ؟؟.. تأخر مبارك عليها بالرد ..
طرشتله ..
"السموحه ان كنت ظايقتك بسؤالي .. او اني تدخلت في شي من خصوصياتك .. بس و الله مستهمه عليك و احاتيك "
و في هاللحظه اتصلبها مبارك .. تأخرت منى .. بعدين ردت عليه ..
مبارك : الو ..
منى : الو .. مرحبا ..
مبارك : مرحبا الساع .. شحالج .؟؟..
منى : بخير .. انت .. شحالك ؟؟..
مبارك : الحمد لله ..
تمت منى ساكت و مبارك ساكت .. انا ليش اتصلت بها .. ؟؟!!..
منى : امممم ... رب ماشر ..؟؟؟..
مبارك : ماشر الشيخه ..
منى : لا انا حاسه ان فيك شي مب طبيعي .. انت من اسبوع متغير ..
مبارك : مب من شي ..
منى : لا مبارك .. انا حاسه ان شي استوالك .. لا و شي عود بعد و مب هين ..
سكت مبارك .. و تمت منى ساكته على امل ان مبارك يرمس ..
مبارك : ... وصلني خبر كدرني ..
منى : اممممم ... و رمسه وصلتك ممكن تسوي فيك هالشي ؟؟!!..
مبارك : لانج ما تعرفين هالرمسه الي وصلتني .. هاالرمسه ذبحتني .. خلتني جسم ٍ بلا روووح .. انسان متحطم ..
منى : بسم الله عليك .. ليش تقول هالكلام .؟؟..
سكت مبارك ..
منى : امممم .. ممكن اعرف هالخبر .. و الا بتعتبره تعدي على امورك الخاصه ؟؟..
مبارك و هو مغمض اعيونه و يتنهد : اااااه ... الانسانه الي احبها .. روح قلبي .. كانت ملجتها من اسبوعين ..
انصدمت منى من الرمسه .. انصدمت من كون مبارك يحب .. و انصدمت اكثر كون الانسانه الي يحبها صارت ملك انسان غيره .. خنقتها العبره .. يالله فديته .. ما عرفت شو تقوله ..
مبارك : شفتي .. ما تعتقدين ان هالموضوع يستاهل اني اتكدر عشانه ..؟؟..
منى : انت تحبها ..؟؟..
مبارك : امووووووووووووووووووووووووووت عليها ..
منى و هي تنذبح بكل همسه يهمسى مبارك في هوى حبه لروضه ..
منى : .. و ليش ما خطبتها ..؟؟.
مبارك : كنت بخطبها .. بس استوى حادث راشد .. و من عقب سافرنا .. و كنت بخطبها اول ما ارد البلاد ..
منى : بس مالك نصيب بها ..
مبارك : لا مستحيل .. ما اتخيل روضه لريال غيري ..
منى و ذابحتنها الغيره من روضه .. يالله .. لهالدرجه يحبها ؟؟!!..
منى : و هي تحبك ..؟؟.
مبارك : اكييييييييد ..
منى : لو كانت تحبك .. مستحيل انها تاخذ واحد غيرك .. او عالاقل بتقولك قبل لا تملج .. مب عقب الملجه بترمس ..
مبارك : انتي شو تقولين .. هذي روضه .. مستحيل انها تخوني بهالطريقه .. انا و الكل يعرف ان روضه ما تبى هذا الي خطبها .. بس المشكله في هلها .. هم الي غصبوها ..
منى : انزين .. هي ليش ما قالتلك ..؟؟.
مبارك : لاني ما اكلمها ..
انصدمت منى .. ما يكلمها و يحبها هالحب كله ..؟؟!!!!!!!!..
منى : و كيف عيل عرفت انها تحبك ..؟؟؟.
مبارك : في اشياء ما ينطقبها اللسان .. بس تنطقبها العيون .. تنطقبها رعشت الايد .. ..
و تم مبارك يتكلم عن روضه .. كان مبارك متظايق .. و لا حس بعمره انه يرمس وحده غريبه .. و ما يعرفها .. بس هو ارتاح بالرمسه مع منى .. و منى كانت تموت في كل كلمه ينطقها مبارك عن روضه ..
منى : يا بختها .. اذا انت تحبها كل هالحب ..
مبارك : منى .. تعرفين روضه شو في حياتي ؟؟؟.. روضه .. قطرة ماي تروي الظميان .. و المشكله .. ان الظميان ما يرتوي منها و لو عاش سنين ..
و في هاللحظه نزلت دمعة مبارك .. تيبست منى .. هي ما سمعت مبارك يصيح .. بس حستبه .. حست ان مبارك يعيش معاناه هو انظلم فيها .. ما قد تخيلت ان مبارك ممكن يصارحها بهالكلام .. او حتى يكملها ... ليته ما كلمني .. و لا قالي .. سكر مبارك عن منى .. و خرت عينه و هو مب حاس .. و منى .. جافاها النوم .. و دمعتها على خدها .. تصيح حالها .. يعني انا يوم حبيت حبيت انسان يحب وحده غيري .. لا و مب أي حب .. حب مستحيل انه يطلع من فواده .. و صاحت حال مبارك .. يالله يالقدر ..
بعدها بيوم رجعو قوم مبارك البلاد .. و كان يوم الثلاثا الفير .. و نزلو على مطار دبي .. و راحو رماح .. يوم الثلاثا العصر راح مبارك الوكاله يسحبله سياره يديده من الوكاله بدل الرنج .. و يوم الاربعاء كانو مسوين عزيمه عردت راشد بالسلامه .. و يوهم قوم خالته و خاواله و عمومته كلهم .. و سال مبارك شما عن روضه .. و قالتله انهم في ليوا ... يحظرون عرس بنت عمتها .. ما قدر مبارك انه يمسك عمره اكثر .. من شهر و هو يعدي بروضه .. و مستحيل انه يصبر اكثر .. اتصل بسلطان .. الي دلل مبارك على محاظره الي في ليوا .. و يوم الخميس العصر .. كان مبارك يسير صوب ليوا .. و تلقاله سلطان في نص الدرب ... لان مبارك ما قد راح صوب ليوا و هذيج المنطقه .. و توهم واصلين مزرعة قوم روضه .. كانت يدت روضه و روضه و بنات عمها و عمتها و بنات ييرانهم يالسات عند يدتها .. و كانن فارشات برى البيت و يالسات .. افترت شمسه بنت عمة روضه صوب سلطان و مبارك اول ما دخلو عليهم المزرعه ..
شمسه : يا ويل حالي .. طاعن هالرنج الرصاصي ..
و افترن كلهن صوب السياره .. و كان مبارك .. الي اشتراله رنج رصاصي يديد بدال رنجه الجديم ..
اول ما شافته روضه عرفته .. وقف قلبها .. فديييييييييييييييييييييييييييييييييييييييت رووووووووووحه من الخاطر ..
يدت روضه : .. منو هذا الي يسير صوبنا بسيارته ..؟؟؟..
روضه : يدوووه ... هذا مبارك بن حمد ..
يدت روضه : مرحبا الساع ..
كان مبارك بعده ما وقف .. بس من شاف لمت البنات عرف روضه .. يالله فديت روحها .. اول ما وقف مبارك .. طول على المسجل و كانت غنية ميحد يا طارشي ..
( يا طارشي ود السلام و رده.... للي عيونه و الهدب مسوده .. غالي و يتزايد بقلبي وده ..)
نزل مبارك بعصاته من السياره .. و تم ايول و ايسوي حركات .. و يدت روضه ميته ..
يدت روضه : عاشوو .. ياااابس ..
و البنات منصدمات من حركة مبارك .. و سلطان اول ما شاف مبارك ايول .. نزل الحبيب بعصاته هو بعد و تم ايووول و ايبس مع مبارك ..
و يوم يا هالمقطع ..
(يالي شرى البراق يسني خده .. احيى بشوفه و الهلاك من بعده .. و ان عادلي يافرح قلبي و سعده ..)
تم مبارك يحرك عصاته .. كأنه يأشر على البنات كلهن .. و من عقب اشر بعصاته على يدت روضه .. الي كانت يالسه عدالها روضه .. كأنه يقولهن ان هاليوله حق يدت روضه ... بس هو و روضه و ميثه بنت عمها .. كانو يعرفون منو المعناي بهاليوله ..

..*** ماشي فالكون عن شوفته يمنعي... الا النظر لو يفارق مقلت اعياني... من دون ما اشعر له الاشواق تدفعني... و اظن حتى بحلم النوم يلقاني ***...

اول ما خلصت الغنيه .. تحرك مبارك صوب يدت روضه عشان يوايها .. اول ما شافنه البنات يمشي صوبهن نشن ..
يدت روضه : مرحبا الساع .. مرحبا الساع .. وايه فديت هالعرضه ..
مبارك : السلام عليكم ..
البنات : و عليكم السلام ..
الكل رد سلامه .. عدا روضه ..الي من شافت مبارك ما قدرت انها تتنصخ بشي .. و الله اني احبه .. و مبارك يمشي صوب يدت روضه .. و لا اراديا طالع روضه .. كان مبارك لابس كندوره كركميه و سفره تقريبا من نفس اللون .. كان عذاب .. اول ما شافته روضه عورها قلبها على حالها و على حال مبارك .. مشى مبارك و سلم على يدت روضه و وايها و حبها على راسها .. و افتر صوب روضه الي كانت واقفه على الطرف اليمين ليدتها .. يالله فديتها .. كانت روضه واقفه و هي متغشيه بهيبتها .. اول ما شافها مبارك .. تذكرها و هي تمشي في السكه .. اول مره يشوفها فيها .. و الله صدق هالانسانه بتذبحني .. و في هاللحظه حس جن حد يطعنه في قلبه .. و افتر عن روضه بسرعه ..
يدت روضه : مرحبا الساع ..
مبارك : المرحب باجي يالغاليه .. شحالج ربج الا بخير ..؟؟؟.
يدت روضه : بخير يعني افدى روحك .. الا هالركب لعوزتنا ..
مبارك : ما تشوفين شر يالغاليه ..
يدت روضه : الشر ما يصيبك ..
اشر سلطان لروضه و البنات عشان يحدرن .. جان ينشن و يحدرن .. و مبارك عينه ما طاحت عن روضه ..
شمسه : فقتج يا ميثه ..
ميثه : فقتج الا انتي .. شعندج ..؟؟؟.
شمسه : لو ما انتي عندنا .. ما خلانا سلطان ندخل ..
روضه : ليش شمووووس ..؟؟.. انتي كنتي تريدين تيلسين في نص الرياييل ..؟؟..
شمسه : حرام عليكن .. خلني اكحل اعيوني بهالشوف ... حشى هب رحامه فيه ..
موزه : امبونه مبارك ما يخرب ..
شمسه : اكيد ما يخرب ..
روضه : انتن ليش تطرن الرياييل ..؟؟؟.. عيب عليكن ..
موزه : لا هب عيب علينا .. احنا بنات و من حقنا نتشوف فمخاوين شما .. بس انتي و ميثوه مب من حقكن ..
شمسه : هيه و الله .. كل وحده منكن وراها ريال ..
روضه : جنج الا بغيتيه تراها واصل ..
شمسه : ههههههههههه .. اوين واصل .. خلي عنج .. ماظني بتفرطيبه بخيت ..
موزه : ليت مريوووووم عندنا ..
ميثه : ليش ..؟؟..
موزه : ترى مريوم ميته على مبارك .. و الله لو شافته و هو ايول .. لا تموت .. ههههههههههههههههه ..
روضه و الغيره ذابحتنها : موزه .. عيب عليج .. انتن بناات عرب و جبايل .. و عيب عليكن هالرمسه و هالحركات ..
شمسه : انزين انتي ليش معصبه .. هدي اعصابج .. الي يشوفج يقول ريلج ..
ليت صدق .. اااااااااه ياقلبي ..
و في هاللحظه سمعن المسجل .. و كانت شلة راكان ..

بحظر زفافك يا حياتي .. بحظر زفاف الي هويته ..
و برزف عشانك لا تحاتي .. و بهديك كل الي بغيته ..
بهديك دمعي و اعبراتي .. و الهم لي فيني رميته
بحظر و لو بعرسك مماتي .. شايل معي قلب ٍ نسيته
و اجمل قديم الذكرياتي .. و الظيم لي منك خذيته
و بذكر ليالي الماضياتي .. كنت الوليف الي اهتويته
كنت الذي لاجله اباتي ..ساهر و نومه ما اهتنيته
بهديك في ليلة وفاتي .. حلم الليالي لي طويته
و اعطيك من قلبي امنياتي .. تلقى الهنى بدرب ٍ مشيته
و تعيش في راحه و سباتي .. ويّى الذي عقبي لقيته
بحظر زفافك يا حياتي .. بحظر زفاف الي هويته

ماتت روضه من سمعت هالشله .. هي عرفت قصد مبارك من وراها .. يالله يعني مبارك يدري .. و مع هذا ياني الين ليوا .. يالله فديته .. خنقتها العبره من سمعت الشله ..
سلامه : سمعن سمعن ..
و تمن البنات يسمعن الشله الين ما خلصت ..
شمسه : امممممممممم ... رهيب راكان ..
موزه : الا عذااب ..
حاولت روضه انها تمسك عمرها .. بس ما قدرت .. كل الي قدرت انها تسويه .. انها تنش عن البنات و تدخل داخل .. ميثه كانت منتبه لحركت مبارك .. و حست بعذاب روضه .. بس ما بيدهن شي ..
شمسه : شعندها روضه خلتنا و راحت ..؟؟؟..
موزه : اكيد راحت تتصل بشمامي ..
سلامه : ما ادري .. انا ما ارتاحلها هذي شما ..
ميثه : لا اله الا الله .. خاطريه لو مره وحده ما تذمن فيها بنت .. حشى اسميكن تنتفن البنات نتاف ..
موزه : لا بسم الله عليه .. ما قد طريت حد الا بالزين ..
شمسه : يالله عليج يا طويز .. يعني احنا الي نطري البنات بالشين ..؟؟.
و يلسن البنات بين السوالف و الطنازه و الوجعه ..
و روضه يالسه في حجرتها .. هي استحملت فكرة انها ممكن تكون حرمت بخيت .. بس هالشي قبل لا تشوف مبارك .. بس من شافت مبارك .. كرهت حياتها .. و تمنت موتها مية مره قبل لا تكون لواحد غيره .. بس خلاص .. الله ما كتبلها بنصيب مع مبارك ..
و في هالوقت اتصل مبارك بواحد من ربعه ..
فاضل : مرحبا ملاييييييييييييين .. حيبه ..
مبارك : افا الا ملاييييييييييين ؟؟!!!.. ترني رخيص عندك يالمزروعي ..
فاضل : اذا انت رخيص من الغالي يالغالي ..؟؟..
مبارك : جاد ربك وحده من هالغراشيب اتكون اغلا مني عندك ..
فاضل : ااه .. اسميك ييت عالعوق ..
مبارك : هههههههههههههه .. بتموت و عينك عالبنات ..
فاضل : شو اسوي ما اصبر عن السوده .. ههههههههههه
مبارك : هههههههههههههههههههه ..
فاضل : علومك يالمزيون ؟؟..
مبارك : تنشد اعلومك و الله ..
فاضل : يا ويل حالي ..
مبارك : عاد لا تصدق عمرك ..
فاضل : ههههههههههههههههه .. انا تشققت .. قلت رحمني الخييلي اليوم ..
مبارك : لا وين ارحمك و انت مزروعي ..
فاضل : ياخي شعندك عالمزاريع .. ما كلين حلالك ؟؟..
مبارك : لا حبيت مزروعيه و خانتني .. هههههههههههههههههههه..
فاضل : اسميها اجدت في لحيتك .. ههههههههههههههه
مبارك : عنلات صداك .. وين اجدت في لحيتيه ..؟؟؟.. هي ودها مبارك بن حمد يفتر صوبها ..
فاضل : هههههههههههه .. الله لا بليتنا يالخقاق ..
مبارك : هههههههههههههه .. شو اسوي خييلي و الخقه الا من عقبنا ..
فاضل : هههههههههههههه .. وين دارك ..؟؟.
مبارك : في دارك ..
فاضل : في ليوا ؟؟؟!!!...
مبارك : هيه نعم ..
فاضل : و انا اقول الدار منوره ..
مبارك : ما نارت الا بوجودك يالغالي .. هاه وين بنلاقيك ..؟؟؟.
فاضل : عشاك عندي الليله ..
مبارك : لا السموحه منك .. بنسير صوب عرس في المدينه ..
فاضل : خلاص عيل .. دام انك في ليوا طوف علينا .. لو بتتقهوي ..
مبارك : ياخي ما ادل في ليوا ..
فاضل : محد عندك من الشباب ..؟؟؟..
مبارك : لا عندي سلطان المنصوري ..
فاضل : خلاص عيل هو بيدللك .. قوله محاظر المزاريع .. الماريا .. و هو بيوصلك صوبنا .. و انا بترياكم عند حدرت المحظر ..
مبارك : خلاص عيل ..
و راح سطان و مبارك صوب فاضل .. الي تلقالهم في حدرت محاظرهم .. و راحو صوب بيتهم .. و قربهم فاضل في الميالس ..
و هم يالسين طرشتله منى مسج ..
" رقبتك اليوم اطرشلي مسج .. بس ما وصلني لا علم و لا خبر .. رب ما شر "
رد عليها ..
" ما من شر الغاليه .. بس انا في ليوا عند الرياييل .. و من عقب بنخطف صوب عرس في المدينه "
و ردت عليه ..
" اها .. السموحه ان كنت غثيتك .. بس من تفضى طرشلي مسج ^ــــ* "
و توه بيرد عليها .. جان يفضي تيلفونه ..
مبارك : لا حووول ..
سلطان : شعندك ..؟؟؟...
مبارك : تيلفوني فضى ..
فاضل : و انت ما تصبر عنه ..
مبارك : ليش قالولك فاضل المزروعي ..
فاضل : هههههههههههههه .. لا مبارك الخييلي ..
مبارك : جب جب .. لا افلعك بهالفنيال بين عيونك ..
فاضل : هههههههههههههههه .. كل هذي غيره مني يوم اني احلا من سودتك !!..
مبارك و هو ينش و ياخذ ماي بالفنيال الي في ايده من الغسول : انا اسود يالخام .. ( و يرش فاضل بالماي ) ..
فاضل : حووووووووووووووه .. هههههههههههههههههههههههه ..
مبارك و هو واقف : مزروعي ما تنعطى ويه ..
سلطان : ههههههههههههههههههههههههه ... حمد ربك يوم ان الي فالفنيال ماي هب قهوه .. ههههههههههه
مبارك : ههههههههههه .. لا ما يهون عليه احرقه .. هو جذيه و هب لاقي حد يعطيه ويه .. وين لو هو محروووق .. هههههههههه .
و نش عنهم مبارك ..
سلطان : وين بها ..؟؟...
مبارك : برووح احط التيلفون في الجراج ..
و ظهر عنهم مبارك من الميالس صوب سيارته .. ركب سيارته و حط تيلفونه في جراجت السياره و تم شوي في السياره .. و طرش لمنى مسج .. و هو يالس سمع حشرت بنات .. بس ما شاف حد منهن .. شوي و رجع مبارك صوب الشباب .. و هو في طريجه صوبهم .. يته مسج .. جان يوقف و تم يقرى .. فجأه ان وحده ظاهرتله من المطابخ .. و كانت شيلتها على جتوفها ..
العنود : اااااااااااااااااااااااااااااااااااااااااااااا... بغمت العنود بغمه .. حشى ونان ..
استلبس مبارك .. ما عرف شعندها .. و هي من شافت مبارك ربعت .. انزين كان المطبخ اقربلها .. بس هي من الربشه ربعت اللين البيت لا و لا عدلت شيلتها بعد.. و مبارك مسكين فاج ثمه .. حشى شعندهن البنات استخفن ..دخلت العنود و هي تربع على خاواتها ..
هند : شبلاج ..؟؟..
العنود : لحقن ..
حمده : شو بلاج ..؟؟.. فاضل ظربج ..؟؟؟..
العنود : هو لو درى مب الا بيضربني .. الا بيذبحني ..
هند : ليش ترج شو سويتي ..؟؟؟..
العنود : ماشي و الله .. كنت ظاهره من المطبخ و ان واحد من ربع فاضل في ويهي ..
هند : اااااا .. قولي و الله ..؟؟.. يا ويلج من فاضل ان درى ..
العنود : حرام عليج هندووه .. انا بدون شي اتحرقص .. لا تزيديني ..
حمده : حلو ؟؟..
العنود : يابوج من الزيغه ما تفطنت في شكله .. شليت عمري و ربعت ..
هند : هههههههههههههههههههه ..
راح مبارك عند الشباب في الميالس .. و عقبها بشوي ظهرو بيروحون العرس ...
حمده : تعالن تعالن شوووفن هالزين كله ..
و ربعن البنات يوايج عالشباب و هم ظاهرين من الميالس ..
العنود : هذا هذا ..
هند : أي واحد ..؟؟؟..
العنود : الي لابس كندوره كركميه ..
حمده : قولي و الله ؟؟.. يا ويل حالي .. انا ان ريت هالريال ما بروم اشل عمري ..
هند : حمدووووووه .. لحقي سيارته رنج ..
حمده : لا و تحت التجربه بعد .. يالله .. ظنكن معرس ..؟؟..
العنود : ليت فاضل يشوفكن و انتن توايجن ..
راح مبارك و سلطان و لمت شباب عرس بنت عمة روضه في المدينه .. و تأخر و الوقت .. و حلف سلطان عمبارك انه يبات عندهم .. بس مبارك ما طاع .. ما قدر انه يكون في نفس البيت الي فيه روضه ... رجع مبارك رماح ..و هو في الدرب طرشتله منى مسج ...
" شو بعدك في ليوا ؟؟ "
رد عليها ..
" لا انا في الدرب اسير صوب رماح "
ردت عليه ..
" اول ما توصل البيت طرشلي مسج .. تراني ما بنام بترياك "
رد عليها ..
" لا ترقبيني .. نامي .. جاد ابطي "
ردت عليه ..
"ما بنام الين ما تخبرني انك وصلت .. بترياك "
رد عليها ..
"انشالله "
من ذاك اليوم الي كلمت فيه منى مبارك .. و هم دوم يطرشون لبعض مسجات .. هو ما كلمها من بعد ذاك اليوم الا مره وحده .. اتصلتبه منى اول ما وصلو البلاد تتحمدله بالسلامه .. بس 24 ساعه المسجات شغاله من بينهم .. و لقى محمد خوه و عياله عندهم بس كانو نايمين ... وقف مبارك سيارته و تم يسمع المسجل شوي قبل لا ينزل البيت .. و طرش لمنى مسج ..
" الغاليه تراني وصلت رماح "
ثواني و ان منى مطرشتله ..
" الحمدلله .. انورت رماح "
رد عليها ..
" ههههههه .. دومها منوره "
منى ..
"لازم مب مبارك بن حمد من هلها لازم بتكون منوره "
مبارك ..
"هذا من طيب اصلج "
منى ..
" يله اللحين روح و نام و ارتاح .. دقيت خط من ليوا لرماح "
مبارك ..
"انشالله .. و انتي بعد .. تصبحين على خير "
منى ..
"و انت من اهله "
مرت الايام و مبارك مب عارفله حل .. هو يحب روضه .. بس ما يقدر انه يسوي شي .. خطر في باله انه يرمس بخيت .. بس خاف لا بخيت يرمس و يقول ان شي من بين مبارك و روضه .. و خاف على روضه من رمست العرب .. كان في خاطره يسوي اشياء وايده .. بس حشمت هله و حشمته لروضه منعته من هالشي .. خلاص فقد مبارك أي امل له في روضه .. و خاصتن من بعد ما رمسه سلطان عن بخيت ريل روضه.. هو البجر .. يشتغل في جازكو في بوظبي .. ما يرد لهله في الخزنه الا في الاجازات .. ما كان يكثر من الروحات صوب قوم روضه .. و روضه اللين الحين ما شافته .. و لا تريد انها تشوفه .. حس مبارك من رمسته عند سلطان انهم يبون بخيت .. و انه ريال حشيم .. بس حتى .. مستحيل انه يحب روضه مثل حبي لها او حتى 1% من حبه لروضه .. بس ما بالايد حيله .. هذا القدر و انكتب عند ربي ..
راشد : مبارك .. خلاص .. خاف ربك في عمرك ..
مبارك : ادري يا راشد .. الا مب قادر اني انسى روضه ... ما اقدر اتخيلها عند ريال غيري ..
راشد : بوحمد .. روضه صفحه و انقظت في حياتك ..
مبارك : هي صفحه .. بس مستحيل انها تنقظي من حياتي .. روضه هي حياتي ..