منتديات بنوته - عرض مشاركة واحدة - بنات عز وقلبهم ماعزهم >>رواية رومنسية جريئة (سعودية)

06-05-2010, 05:34 PM

البارت ال50
ريما>> تخيل رنيم بابا حجزلنا احنا وبنات عمي على ايطاليا حنروح فينيسا ونجلس فيها اسبوع من يوم السبت الجاي الين السبت الي بعدو

رنيم >> وااااااااااو وناسة طيب ايت سبت دا ولا الي بعدو

ريما >> السبت دا ياحلوة ياقلبي الله لايحرمني من بابا

رنيم >> على كدا من بكرة نكلم بنات عمي ونروح السوق نشتري الأشياء الي ناقصتنا ونجهز نفسنا الله فلة

نامو ريما ورنيم وهما متحمسين للسفرة وكمان مع بنات عمهم انواع الفلة حتقوم.
مر اليوم وكان يوم حلو ولزيز على قلوب البنات وختمها ابو ريما اليوم بخبر حلو

تاني يوم كان الخميس طبعا مافي عمل يعني مافي احد يقوم الساعه 8 ههههههههههه

مر الوقت وسارت الساعه 1 الظهر

قام طلال من سريرو وراح على الحمام اتروش ونزل يتغدا ميت من الجوع
اول مانزل لقى امو وصالح واخواتو التوأم جالسين في الصالة يتفرجو على التلفزيون

طلال>>صباح الخير

صالح >> صباح النور

ام طلال>> صباح النور .. من اول نستناك تقوم جوعتنا

طلال مستغرب>> وليش مااتغديتو

نهى >>لأنو بابا قال ماراح نتغدا لين يقوم طلال

طلال>> طيب ليش ماصحيتوني

صالح>> انا قلتلهم انت امس تعبت في الشغل

طلال جالوا حساس انو من جد صالح طيب .. بس على طول طير الأحساس دا ورجع الكرة ضحك طلال>> طيب يلا نتغدا انا ميت جوع

ام طلال>> خلاص انا قلتلهم يجهزو الغدا

صالح >>طلال تعال اجلس هنا جبني

راح طلال وجلس جنب صالح ... وفي دخلوا حساس بيقتلو انو صالح طيب .. بس الأحساس دا حيخرب كل شي لازم اكرهك ياصالح

في بيت ابو هتون

كان ابو هتون جالس هوا وام هتون يتغدو لانو البنات غداهم 6 المغرب هههه

ابو هتون >> ها كلمتي هتون وشهد

ام هتون>> ايوا

ابو هتون >>>ايش قالو لك

ام هتون >> ولا شي بس زغرطو ورقصو

ابو هتون >> يعني ماقالو شي

ام هتون >> ايش يقولو ؟؟ لا طبع بالعكس انبسطو واتحمسو لخلود

ابو هتون >> طيب ايش راح تسوي دحين

ام هتون >> ولا شي ابغة اكلم مرة اخوك وأسئلها عن ام حسام انا مو مرة معاها هيا تعرفها

ابو هتون >> خلود مواقفة

ام هتون >> ماقلت شي ... بس ضحكت

ابو هتون >>> يلا ربنا يسهلهم ويستر عليهم يارب

ام هتون >>> يارب

في بيت ابو ريما

طبعا ريما ورنيم مكبرين المخده
وابو ريما وام ريما اتغدو وجالسن يشربو شاهي اخضر في الصالة

ابو ريما>> ها يابنت الناس تروحي معانا ولا

ام ريما>> لا روحو انتو انا رحت ايطاليا كم مرة وبعدين انا عندي مواجيب لازم اروحها

ابو ريما >> طيب احجز لياسر ومحمد

ام ريما >>> لا لا ياسر يبغالو احد ينتبه لو ومحمد ازمة الربو تجي في أي وقت لا هدولا معا خليهم

ابو ريما>> والله اتمنيت نطلع كلنا سوا

ام ريما >> خليها مرة تانية .... دحين انت كلمت اخوك انك بتاخد بناتو

ابو ريما >> لا غصبن عنو حأخدهم بناتي هدولا

ام ريما>> برضو قولو... عشان يكون عندو خبر

ابو ريما >> طيب اعطيني الجوال من جنبك

اخد ابو ريما الجوال من ام ريما واتصل على اخو

طووووووط

ابو هتون >> هلا هلا

ابو ريما>> هلا فيك ... فينك يارجال والله لو مو بناتنا ولاندري عن اخبارك

ابو هتون >> هههههههههه ياشيخ خليها على ربك الشغل لخشمي والله

ابو ريما>> حتى لو ... من زمان ماطلعنا الكباين ومارحنا ماجينا مع بعض

ابو هتون >> ماشاء الله البنات مو مقصرين

ابو ريما>> الله لايحرمهم من بعض... اقولك يوم السبت ان شاء الله انا مسافر على ايطاليا ومعايا ريما ورنيم وابغى اخد البنات

ابو هتون >>> لالا لاتكلف على نفسك يااخويا

ابو ريما >> اقولك انا مو متصل عشان اخد الإذن انا متصل اعطيك خبر

ابو هتون >> طيب انا اروح احجز لهم

ابو ريما >> لاتحجز ولاشي انا حجز وسويت كل شي بس خليهم يجهزو نفسهم ... ولا اقولك لاتقولهم خلي ريما تقولهم

ابو هتون >> لي ريما يعني؟؟

ابو ريما>> لانو الهدية حقت عيد ميلادها هيا رحلة لمده اسبوع مع بناتك

ابو هتون >>> اها طيب الله يهنيكم ياسيدي.

ام هتون تأشر لأبو هتون انو اعطيني اكلم ام ريما

ابو ريما >> امين يارب

ابو هتون>> اقولك اخويا .. ام محمد جنبك ام هتون تبغاها
ابو ريما>> يلا شوفها معاك

اعطى ابو ريما التلفون لزوجتو

ام هتون >> الو ... السلام عليكم

ام ريما>> هلا وعليكم السلام ورحمة الله .. كيفك حبيبتي ايش اخبارك

ام هتون >> بخير الله يسلمك الحمد لله .. كيف محمد وياسر ماراح أسألك عن البنات لانو اخبارهم عندي هههههههههههه

ام ريما>> ههههههههههه الله يسلمك والله بخير كلهم الحمد لله

ام هتون >> اقولك انتي تعرفي ام حسام

ام ريما>> وه حبيبتي ام حسام ربي يسعدها ليش

ام هتون >> ياشيخ اتصلت عليا وخطبت حسام لخلود

ام ريما تسوي نفسها ماتدري ام حسام قالت لها>>> والله ماشاء الله والله ونعم بأم حسام وولدها

ام هتون >> انتي ايش رايك في الولد ... انا سمعت انو كل مايخطب يفركش الخطوبة

ام ريما>>> والله يابنت الحلال حسام ولدي وتربيتي .. والي اعرفو انو كل مايخطب وحده تطلع مو قد كده ..يعني متحرره ولامدلعه ولاشايفة نفسها

ام هتون >> اها عشان كده يعني

ام ريما >> ايوا الله هدا الي امو تقولي هوا

ام هتون >> يعني خلاص اديها كلمة واخلي ابو هتون يروح يسأل عنو

ام ريما>> والله وخير ماتسوي ترى ام حسام أدمية وولدها متربي ويعرف الأصول وربنا يقدم الي في الخير والصلاح

ام هتون >>> امين يارب ... وكيف ام طلال ياختي لها كم يوم غايبة

ام ريما>> والله مشغوله مع ولدها طلال وزوجها وبناتها

وهرجه ورى هرجه ... حريم هرجهم مايخلص ههههههههههههه

ام هتون >> طيب ياقلبي سلميلي على الجميع ... خلاص انا اكلم ام حسام واقولك

ام ريما >> خلاص ان شاء الله وربي يقدم الي في الخير والصلاح

ام هتون >> هيا حبيبتي في امان الله

ام ريما >> مع السلامه

ابو هتون >> ياساتر ساعه وانتو تهرجو

ام هتون >> ايوا لازم اعرف هذي بنتي مااابغى ارميها

ابو هتون >> ها دحين ايش قالت لك ام محمد

ام هتون >> والله تقول ونعم في ام حسام وولدها

ابو هتون >> طيب حلو ام محمد ماشاء الله لها نظره

ام هتون >> ايوا وكمان لاتنسى انها صحبها من زمان ودايما ياهيا عند ام حسام ياام حسام عندها

ابو هتون >> يلا خلاص ردي على الحرمه.. قولي لها بس نسأل عن الولد ونردلكم

ام هتون >> خلاص اسأل واخر الأسبوع يجي الولد يشوفها

ابو هتون >> لالالا مو دحين اخيوا اخدهم كلهم مع بناتو على ايطاليا يقول

ام هتون >> وه متى بيسافر

ابو هتون >>> يقول يوم السبت بعد بكرة

ام هتون >> طيب روح صحيهم يجهزو نفسهم

ابو هتون >> لا اخويا يقول ريما تقول لهم

ام هتون >> اها طيب كويس

في بيت ام حسام كانت بطه وحسام جالسين يهرجو إلا تلفون البيت يرن والتلفون جنب حسام

ترررررن تررررن

بطه >>حسام رد

حسام >>لا ماني راد

بطه >> رد لايكون احد يبغى شي

حسام >> طيب لاتدفي

رد حسام وبصوت كلو رجوله >> الو مرحبا

ام هتون >> السلام عليكم

حسام >> وعليكم السلام

ام هتون >> لو سمحت هذا بيت ام حسام

حسام >> ايوا ياامي

ام هتون >> ام حسام موجوده

حسام >> ايوا اقولها مين

ام هتون عارفة انو هذا حسام >> قلها ام خلود

حسام حس ببرد عدا على جسمو كلو >>> طيب دقيقة معايا

قام حسام جري على المطبخ عند امو كانت جالس توري الخدامة كيف تسوي الرز

ام حسام >> ولما تخلص ارمي الزر علــــ قاطع كلامها حسام

جا حسام جري مسك يد امو >>> تعالي بسرعه

ام حسام انفجعت >> ايش بطه بتولد

حسام >> لالالا ام خلود على التلفون بسرعه

ام حسام ضربت حسام على كتفو >> وه فجعتني يندمك

راحت ام حسام وردت على ام خلود وحسام لاصق جنبها

ام حسام >> ياهلا ياهلا باأم خلود

ام هتون >> هلا فيكي حبيبتي

ام حسام >> كيفك ياقلبي وكيف البنات

ام هتون >> والله بخير يسلمو عليك كيفك انتي وكيف بطه

ام حسام تدف حسام عنها وهوا لاصق فيها >>> والله اهو ربي يفك كربتها

ام هتون >> ايوا الله الله يعطيها السلامه

ام حسام >> امين يارب

ام هتون >> اقولك ياام حسام انا كلمت ابو هتون

ام حسام >> ايوا

ام هتون >> والله قال ونعم فيهم بس يسأل عن حسام ونردلكم ان شاء الله في اقرب وقت

ام حسام >> خلاص ياقلبي خلي يسأل وياخد راحتو واحنا مستنين ردكم
ام هتون >> خلاص ياعيني الله يقدم الي في الخير

ام حسام >> يارب ان شاء الله

ام هتون >> طيب حبيبتي سلمي لي على الجميع

ام حسام >> يوصل ياقلبي مع السلامه

قفلت ام حسام ونزل عليها حسام بلأسئله زي المطر

حسام >> ها ايش قالو؟ وافقت ؟ متى اشوفها ؟؟ ايش قال ابوها؟؟ متى الملكة

ام حسام تطالع في حسام >>> هذا كلو بجاوبك علية دحين

حسام حس انو زودها >> والله ياامي احسها غير عن الهبل الي خطبتهم

بطه >> هيا غير غير بقوة يعني

ام حسام >> خلاص الأبو وافق بس يسأل عنك قالت ويردولنا

حسام >> طيب ربنا يسهل

حسام مرة متحمس للخطبة غير عن كل خطبه يحس انو هذي هيا الي يدور عليها من زمااااااااااااااااااااااااااان