منتديات بنوته - عرض مشاركة واحدة - روايــــــــــــة رووووووووووعه اللي مايقراها خسران ...(( خوف من الحب ))...

06-03-2010, 05:14 PM

بمطار باريس ... بعد ما خلص عزيز وسارا اجراءات المطار المعتاده من جوازات وتذاكر وتحميل عفش ... راحوا لصاله الانتظار ... وجلسوا كان الوقت شوي مبكر باقي على اقلاع الطياره ساعتين .. يعنى عندهم ساعه ونص فاضين فيها ... اخذ عزيز الجريده وقام يقراها .. وسارا جالسه جنبه بجسمها بس .. اما روحها بمكان ثانى .. كانت تفكر بمستقبها .. قبل يومين كانت صورته واضحه .. حياه سعيده .. مع زوج تحبه .. وعيال .. وبيت صغير على قدهم .. بس الحين تحس ان مستقبلها صار اسود .. مو قادره حتى تتخيل ايش بيكون ... اصلا ما تعرف وين بتسكن .. ولا عمرها سالت عزيز.. بس الحين الف سؤال وسؤال ودها تساله .. وين راح يسكنون .. وايش راح بتكون حياتهم ...يبي يجيب عيال .. والا تكفيه زوجه ....اساله كثير تتزاحم في بالها .. لف عزيز على سارا وشافها تلعب بالمنديل الى في ايدها وتقطعه ..لين صار قطع صغيره بحضنها ... عرف انها مو معه ابد....شكلها لازالت تخاف من الطيران .... مد ايده وحطها على ايدها وضغطها بقوه ... سارا الي تفاجاه منه وترفع راسها وعلى طول تطيح عيونها بعيون عزيز .. كان بينهم مغناطيس يجذبهم ..ما قدرت تنزل عيونها عنه ... عيونه حلوه ..الجمله الوحيده الي طرت في بالها ... ان عيونه حلوه .. لو اجيب ولد ياخذ عيون ابوه .. اكيد مافي بنت تقدر تشيل عينها عنه ..حمر وجهها ...لاحظت ان عيون عزيز ابتسمت ..كانه قدر يقرى افكارها ... انا ايش قاعده افكر ..وبعد الي سمعته بعد ....
عزيز: لا تخافين انا جنبك سارا
سارا باستغراب: اخاف من ايش
عبدالعزيز: الطيران
سارا تغير وجهها وكانها توها تستوعب انها بتركب الطياره من جديد ... زاد ضغط عزيز على ايدها بعد ما لاحظ تغير وجهها...ايه يشفق على .. عطفه كله شفقه ... يعاملنى مثل الاطفال... لا انا لازم ما اخاف ..عشان ما اترك الفرصه لشفقته .. انا ما احتاجها انا احتاج لشي اكثر منها ...
سارا: مو خايفه
عبدالعزيز: ماعلينا .. ما تغدينا حنا ايش رايك نروح ناكل لنا شي
سارا: انا مو جايعه...
عبدالعزيز: براحتك بس اكل الطياره يمكن يطول ...
سارا: اوكي خلاص
راحوا لركن المطاعم ... جلست سارا على احد الطاولات وراح عبدالعزيز عشان يطلب لهم ... اخذت سارا تتفرج على الي رايح والي جاي... كانت لين الحين متضايقه ... لفت نظرها مراءه زنجيه شينه مره ... وماسكه بنت واضح انها هجين شعرها خشن بس فاتح مو اسود ..وبشرتها افتح من امها كثير ... ملامحها مو حلوه في نفس الوقت مو شينه ... كانت البنت والام واقفات عند حمام الرجال ... الفضول ذبح سارا تبي تشوف شكل الزوج ..واضح من البنت انه ابيض ... اكيد شين ... فتح الباب وطلع منه واحد اوروبي كان مره حلو ووسيم ابد ما توقعت.. اشكاله مثل اشكال بيكهام ... طارت البنت الصغيره وضمته وهو رفعها والابتسامه تشق وجهه .. بعيدن لف على المراءه وابتسم بوجهها وقرب منها وحط ايده على كتفها .. ابتسامته كلها حب ونظرته بعد ... حست سارا بالحسد منهم ..لو يشوفنى عزيز هالنظره كان مت من الوناسه .... هذا الي ابيه ابي هالحب .. الي ما يهتم بالشكل والمنظهر ... الحب الحقيقي الحب الصافي ... حب يخلى الي قدامه ملاك لو ايش ماكان شكله .... يعنى كثير هالطلب .... شافت عزيز جاي وشايل صنيه فيها بيتزا مع مشروبين .... الله يا عزيز ... لو اتملك قلبك بس.... جلس على الطاوله جنبها ... لاحظ نظرة الحزن عليها ... هو كان شاك ان فيها شي بس الحين تاكد ....ياترى ايش السبب ... ايش الي مكدرها كذا ....
سارا: قلت لهم يشيلون الزيتون ...
عبدالعزيز: ايه الزيتون والبصل بعد
اخذت سارا قطعه وقامت تاكلها وبكل هدوء وعزيز لازال يشوفها ... تصرفاتها مو طبيعيه ..حركة ايدها ..مو معقوله كل هذا توتر عشان الطيران ... الله صارت الحين اقل حركه منها احس فيها .. فرق بين اول ما سافرنا والحين ..اول ما كنت احس فيها ابد ... ايش الي مضايقها بس... يمكن ماتبي ترجع السعوديه
عبدالعزيز: اقول سارا ماودك نمدد اقامتنا هنا
سارا رفعت راسها وعيونها مفتوحه : ليييييييييش
عبدالعزيز: لا بس سؤال
سارا: انت ودك؟
عبدالعزيز: سارا الله يهديك اسالك سؤال تردين علي بسؤال مثله ....
سارا: لا بس سؤالك غريب . ..
عبدالعزيز : لا غريب ولا شي
سارا: الطياره فيها مشكله
عبدالعزيز: سارا وبعدين ... والا اقول انسي انى سالتك....
سارا: براحتك ...
وكملت اكل ...انقهر عزيز من تطنيشها ولا مبالاتها ..لا فيها شي اكيد فيها بس ايش ... انا المجنون الى اهتم ماتستاهل اعبرها ... ايش قصدها براحتك ..انا اوريك يا سوير ... واخذ له قطعه .....
....................

نزل عمر من فوق وشاف امه جالسه بالصاله وجنبها جالسه اخته رهف....
منيره: صح النوم...
عمر: صح بدنك ...
منيره: هذا الي يقول 7 صيروا جاهزات الحين الساعه 8 ونص
عمر: راحت علي نومه ...
قرب من عند امه وحبها على راسها ...
عمر: شخبارك يالغاليه ...
فوزيه: بخير ياحياتى....
عمر: اقول يمه وينها القمر
منيره: قصدك القمله
عمر: هيه ترى ما اطلعكم
منيره: ما اقصد وجع
فوزيه: وين بتطلعهم بعد
عمر: عندهم اشياء يبون يشترونها ... يمه وينهي مي ما شفتها
فوزيه: مارضت تجي من بيت عمتها ..وتركتها هناك
عمر وهو معقد حواجبه: روحاتها كثرت ... ودايما ترجع متضايقه ..حصه هذي يبي لها ضرب كل مره تتهاوش معها وما ترضى تعطيها العابها .. ومع كذا تحب تروح لهم
فوزيه: ههههههههه..اتركهم بزران يعرفون يتفاهمون
عمر: وانا الي اتوهق ..هي تروح وتستانس بعدين ترجع تصيح وانا اراضيها بلعبه جديده هالبنت بتفلسنى
فوزيه: انت جب لها اخو او اخت عشان تلعب معه
عمر ولا كانه سمع جمله امه الاخيره: اقول منور روحي نادي رهف عشان نمشي ...
فوزيه: اجلس معي شوي
عمر: يمه وراي مشاوير غير هالمشوار
منيره:ايه يمه يالله بروح البس عبايتى وانادي رهوف
وراحت فوق عشان تنادي رهف اختها .. وقام عمر بيطلع
فوزيه: على وين ...
عمر: بشغل السياره
فوزيه: تو الناس بياخذون ساعه على ما يجهزون
عمر: طيب ...
ويجلس ... عمر بعد اخر مره كلمته امه صار يحاول ما يجلس معها لحالهم ... ما يبيها تفتح الموضوع مره ثانيه .. وهالشي خلاه يتجنبها ..... الا بدخلت سالم عليهم .. كان وجهه متغير شوي ..
سالم : اقول ياحرمه الرجال جايينى الحين..
فوزيه : مين؟؟
سالم: بو محمد وبو وليد...
فوزيه: بيتعشون هنا
سالم: لا بس بيتقهوون ..
فوزيه: اوكي اروح اقول للخدامه تجهز القدوع
سالم لف على ولده : وانت لا تطلع .. خلك معنا
عمر: بس انا واعد البنات اطلعهم ....
سالم: لا اتركهم ...
منيره باعلى صوت: عمممممممممممممممممممر... حنا جاهزات
سالم: بس اص ايش هالصراخ ...
رهف: هههههه ابوي اتركها ماعندها انوثه ابد..
وتروح عند ابوها وتضمه ..
رهف: اشتقت لك يالغالي...
ارتسمت ابتسامه حنان على وجه سالم ...خلت النظره الصارمه الي ما تفارق عيونه تختفي .. ضم بنته ..
سالم: وانا بعد
منيره: ايش معنى يعنى انا لي الهواش وهي لها الضم ...
رفع سالم ايده ..وجات منيره وضمت ابوها .. صار سالم ضام بناته...
رهف: يالغيوووره ...
منيره: ليه هو لك...
عمر: هههههههه يا حليلكم ... مو ناقصكم الا نورا
منيره: نورا عندها رجلها ...
سالم وهو يقرص خشم منيره: انتى بعد بتتزوجين وبتروحين عنا
منيره: لا مستحيل افارقكم انا
عمر: ههههههههه.. وانتى يارهوف
رهف: ليه تبينى اعنس
عمر: ههههههههههههه.. البنت تبي تعرس
سالم: خلها ...اقول يالله روحو بس ترانى تعبت من الوقفه...
منيره: افا يبه تزهق منها
سالم وهو يزيد الضم : وانا اقدر افارقكم بس... وربي يصبرنى اذا تزوجتوا
منيره: وانا مستحيل اتزوج
وحبت كتف ابوها .. وتركوه عشان يجلس...
رهف: يالله عمر خلنا نمشي
عمر بابتسامه : حبيبكم مو راضي
رهف: أي حبيب ؟؟
منيره: هههههههههههه يا غبيه قصده ابوي ...الا تعال يبه صح منت براضي
سالم: بيجونى رجال وابي عمر عشان يعاونى ويصب القهوه
رهف: ليه اخوي صباب
سالم: مو صباب بس احتاجه
منيره: تكفى يبه لو ماطلعنا عمر ما نقدر نطلع
سالم: ايش عندكم
منيره: نبي نشترى اشياء لغرفه عزيز
سالم: لاحقين بكره..
منيره: أي بكره ما يكفي..عمر تكفى اقنع ابوي
عمر وهو يرفع ايده يعنى ما يقدر يسوي شي
رهف: سلوووووووووووم
سالم فتح عيونه: سلوم ولدك