مرت الأيام و الأسابيع و الشهور و أنا من يوم أفتح الماسنجر ألقى الأمير متصل
... دايم يبدأ بالسلام و يرحب فيني و لما أتأخر يسألني عن سبب تأخري
كان جدا مؤدب معي...تغيرت و صرت دوم أعتذر من صديقاتي إللي معي على الماسنجر
بسبب إنشغالي في عمل بحث ..
و في الحقيقه كنت مع الأمير أسولف ... صرت أفضل الجلوس معاه على الجلوس مع
صديقاتي ...
حتى المنتدى نشاطي قل فيه و موضوعاتي صارت قليله و ما صرت أدخله بإستمرار مع
إنه الجميع إفتقدوني و صاروا يسألون عني و عن سبب غيابي
و الواقع إني صرت مدمنه على الجلسه مع الأمير إللي كنت أقضي أغلب ساعاتي على
النت معاه و تقريبا أتواجد على النت على مدار الساعه إلا
في وقت النوم في الإجازات و وقت الدراسه و الروحه للجامعه أيام الإمتحانات
كانت أكثر سوالفنا عن المنتدى و أعضائه و خصوصا إني أحب أحلل الشخصيات من
وجهة نظري و أقرى علم النفس بشكل موسع
مع إنه ما كان تخصصي ... صرت أشرح له عن علم النفس و عن كثير أشياء هو يجهلها
و اندمجت أكثر لما عرفت إنه مستانس من كلامي و سوالفي معاه
كان دايما يمدحني و يقول عني مثقفه و موهوبه رغم صغر سني .
في مره من المرات صارت مشكله بيني و بين أعضاء المنتدى و إنصدمت لما شفت رده
على الموضوع و إنه قام يدافع عني بكل قوة لين سكت اهل المنتدى كلهم !!!
زاد إعجابي به و حماسي الأكبر و الأكثر إني أتعرف على شخصيته ..
دخلت مره على الماسنجر بعد هالحادثه و لقيته متصل ... و كالعاده رحب فيني
بحراره لكن أنا كان وضعي مختلف كان في سؤال واحد يدور في راسي ؟؟
لحن الغروب : ممكن أسألك سؤال ؟
الأمير : و لو تفضلي
لحن الغروب : ودي أعرف بس ليه دافعت عني في المنتدى مع إني يمكن ما أهمك في
شي ؟!
ما رد بسرعه .. طول لكن بعد خمس دقايق :
الأمير : أنا ما قلت غير الحقيقه إنك إنسانه محترمه و أخلاقك عاليه و ما زدت
أبدا على كذا و بعدين مين قال إنك ما تهميني و .....
سكت و قطع كلامه و ما كمل كان ودي يكمل و يقولي كيف أهمه أنا مدري وش أقولكم
كنت حاسه بشي يدفعني تجاهه و بصراحه مدري وش هو ؟؟
المهم إني إستانست لرده جدا ... و مرت الأيام تباعا و علاقتنا في إستمرار و
زياده و قوه ... إستمرت علاقتنا تسع شهور ... فيها تعلقت فيه لدرجه كبيره !!
و من خلال محادثاتنا السابقه عرفت إنه اسمه فهد و إنه يدرس في قسم الحاسب و
التقنيه و يطبق في شركه حكوميه .. تقريبا ما بقى له غير سنه
أو ترم و يخلص من الجامعه .و عمره ثلاث و عشرين سنه كان يكلمني عن كل شي حوله
أهله و أصدقائه و إحساسه بالغربه بعيد عن أهله و حبايبه
و شوي شوي صار يكلمني عن كل شي حتى إللي يخطر في باله .
إرتحت له أكثر و أكثر و تعلقت فيه بقوه ...و ببساطه صرت أكلمه عن مشاكلي في
البيت و إنه محد فاهمني أبدا !!!
و إني أعيش ضغط نفسي فظيع و صرت أكلمه عن أخواني و أختي و عن مواقفي معاهم و
صار هالإنسان جزء لا يتجزأ
من حياتي بدى يعترف لي إنه إرتاح معاي و يرتاح بوجودي و أول مره يفتح قلبه
لأحد مثلي ..
كنت راح أعترف له بنفس الشي لكني إستحيت منه بصراحه و خفت من ردة فعله صحيح
إني جريئه لكن لابد إني ما أتجاوز حدودي !!!!!!!
كنت أحس بأحاسيس جامحه تجاهه كنت أفرغ هالأحاسيس في تصميم البطاقات ...
كنت و مازلت أعرف أصمم بطاقات على الفوتوشوب و صرت كل ما أصمم بطاقه كان أهم
شي بالنسبه لي إني آخذ رايه فيها...
كان دايم يبدي إعجابه فيها كلها و ينقدني أحيانا في بعضها كنت مستانسه جدا
بكلامه
و مدحه لي و صرت ما أنزل أي بطاقه على المنتدى إلا لما آخذ رأيه فيها ..
مره فاجأني إنه بيصلح لي موقع لكني رفضت لأني فعلا ما أقدر على أشغال موقع
كامل و مع ذلك لقيته صلح لي الموقع في خمس دقايق و أرسلي الرابط
و خلفيات الموقع كانت هي بطاقاتي نفسها و لما سألته عن سبب إصراره إنه يصلح
لي موقع قال إنه معجب جدا بتصاميمي ..
إستانست و فرحت من قلب لأنه كان دايم يشجعني و أي مشكله في كمبيوتري كان
يساعدني في حلها .. كان دايم يساعدني في أي شي أطلبه و خصوصا بعد ما طلبت إنه
يعلمني في الحاسب الأشياء إللي ما أعرفها .
كان مصدر إلهامي لكثير من الموضوعات و الخواطر إللي
كنت أنزلها في المنتدى كان دايما يطلع على مواضيعي و يرد عليها لكن ما كان
يحب القسم الأدبي إللي فيه خواطري سألته مره :
لحن الغروب : أمير ... ليه ما تدخل للمنتدى الأدبي في المنتدى ؟؟
الأمير : ممكن تناديني فهد ؟؟
لحن الغروب : إن شاء الله على أمرك... يا الله يا فهد قلي وش إللي ما يعجبك
في المنتدى الأدبي ؟؟
الأمير : و الله يا طويلة العمر أحس الخواطر إللي فيه كلامها مكرر و متشابه..
جميل لما يكون الشاعر أو كاتب الخاطره
يعيش في الخاطره نفسها و يهديها قلبه و روحه و مشاعره .
لحن الغروب : ياه كلامك منطقي و حلو ... بس أنا أكتب خواطري و أعيش معاها و
أحيانا الموقف هو إللي يدفعني إني أكتبها
الأمير : ما شاء الله عليك تكتبين خواطر ؟؟
لحن الغروب : إيه أكيد و ياليتك تقرى هالخاطره توني منزلتها في المنتدى .
الأمير : زين و لا يهمك
أرسلت له رابط الخاطره و تركته يقراها ... أتذكرها عدل و أتذكر كلماتها :
حب وسط الزحام
أحبك
تلك مشكلتي !!
أحبك و لا أدري ماذا أحب فيك ؟
يا شهريار هذا الزمان
قديس أنت ؟ ربما
ملاك أنت ؟ ربما
أم تراك عاشقا لا تمطر غيماته
إلا على وقع الفتن
أحبك .. و أعرف أن حبك قاتلي
و أعرف أن حبك لا يقدر بثمن
بدائية العشق أنا
أحادية في الحب
و حبك لا يجيء إلا وسط الزحام
أحبك
الخاطره لأحدى المبدعات *
إنتظرت رده بحراره ودي أعرف رأيه بسرعه
و فعلا رد و مدحني و استانس كثير على الخاطره و سألني :
الأمير : أبي أسألك هالخاطره الحلوه كتبتيها لمن ؟
استحيييييت من سؤاله بس رديت بسرعه
لحن الغروب : و الله مالها أي سبب جات على بالي و كتبتها
الأمير : بس بصراحه جدا رائعه تصدقين ذكرتيني بالذي مضى و رجعتيني لذيك
الأيام
لحن الغروب : ماشاء الله كنت تكتب خواطر ؟؟؟
الأمير : هههههه لا بس كنت أكتب خرابيش كلام يعني كلمات متقاطعه ما توصل لحد
إنها تصير خواطر
لحن الغروب : طيب يا فهد وش رايك أكتب خاطره أو مقطع من خاطره و إنت ترد علي
بمقطع من خاطره إنت تكتبها
الأمير : و الله فكره حلوه يالله .. طيب .. إبدي إنتي
لحن الغروب : أحلم بالغد مع أمنيات سعيده
أتمنى أن أرى تكثيفا لأحلامي
و أنا أتطلع لأمنياتي على حافة الشفق
الأمير : ربما يضنيكِ التعب
و يحرق مقلتيكِ الهروب
أحتاج لأن أرى حلمك ِ على حافة الشفق
لحن الغروب : تمنيت أن أرتاح لحظه من كل هم دفين
تمنيت قلبا غدا سامقا
على بسماته حب عميق
الأمير : مع الحب أرجو أن نعيش
نعيد كل يوم جميل
نغني نطير و نحلم بغد حلو بهيج
الخاطره : Moon lover
لحن الغروب : بصراحه رهيب ما شاء الله عليك تعرف تكتب خواطر طلعت أحسن مني
الأمير : وين أعرف الله يهديك ... بس تصدقين أحس إني إنسان ثاني غير الأمير
إللي تعرفينه
إنتي غيرتيني بصراحه و أشكرك على هالشي دخلتيني لعالم كله عواطف و مشاعر و
أنا إللي كنت ما أهتم بعواطفي و لا أعطيها أي أهميه
بصراحه أشكرك من كل قلبي يا ....
ما أدري ليه يقطع كلامه و ما يكمله مره تقهرني هالحركه؟؟
لكن ما أعرف كيف أوصف لكم فرحي و سعادتي لما سمعت هالكلمات أحس إني أتقرب منه
أكثر و أكثر ...
أكثر شي كان شاغل بالي هو هل الخواطر إللي كتبها يعنيني فيها ولا يقصد شي
ثاني ؟؟
الأمير : ممكن أسألك سؤال بس لا تفهمينه غلط !
لحن الغروب : لا عادي تفضل
الأمير : ممكن أعرف وش إسمك ؟
ترددت بصراحه و تفاجأت من سؤاله و حسيت بإرتباك عجيب عمره هالسؤال ما خطر على
بالي لحظه و ش بقوله ؟؟؟
أقوله إسمي الحقيقي و لا أكذب عليه يا ربي وش بأقوله ما جا أبدا على بالي إنه
بيسألني عن إسمي قلت في نفسي :
وش بقوله ؟ و ش بقوله ؟؟ وش بقوله يا ربي ؟؟
و بعد تفكير قلت في نفسي ::خلاص لقيتها ... راح أكذب عليه بس ما أقدر ... لا
راح أكذب عليه و أقوله إسم غير إسمي مني خسرانه شي !
لحن الغروب : إسمي حنان
الأمير : عاشت الأسامي يا حنان بصراحه إسمك حلو
لحن الغروب : مشكور
فهد يعرف كم عمري و يعرف إني أدرس لغة إنجليزيه سبق و قلت له هالشي و هو بعد
إستانس على صراحتي
ياه كم إني تعلقت فيه بشكل ما ينوصف و هو بعد إعترف لي بهالشي ...









مرت الشهور و عمق علاقتنا في إزدياد كبير لما أجلس معاه و أكلمه أحس إني دخلت
عالم ثاني عمري ما عرفته في حياتي ..
مره دخلت علي أماني و الظاهر إنها لمحت شاشة اللاب توب و أنا أسولف مع فهد
فسألتني :
أماني : أمل قاعده تسولفين مع من ؟
ارتبكت و ما عرفت وش أقولها ... بصراحه فاجأتني ... و في لمح البصر طلعت في
راسي تصريفه أنقذت الموقف
أمل : هذي وحده من صديقاتي داخله من إيميل عمها و طبعا هي ما غيرت النك نيم
لأنها تخاف منه
أماني : و بما إنها تخاف منه ليه دخلت بإيميله ؟
و أنواع التصاريف بدت تشتغل !!
أمل : يا أماني يا غلاتي لأنها نسيت كلمة المرور حقت إيميلها فدخلت على إيميل
خالها ... إنتي لا تشغلين بالك بهالتفاصيل
شكلها إقتنعت بس مب مره يعني أكيد هي حست بإرتباكي بس حاولت تغير الموضوع !!
أماني : ما علينا طلبت بيتزا من المطعم وش رايك أرسل لك منها مع الخدم ؟؟
أمل : إيه يا ريت تراني ميته جوع ... مشكوره حبيبتي
طالعتني مستغربه إني ما صرخت عليها أو عصبت
أماني : يالله أنا بروح أكتب الأشياء إللي أحتاج أشتريها للعيد
قلت مستغربه
أمل : أي عيد ؟؟
أماني : أي عيد !!! أمل وش فيك ؟؟ عيد الأضحى
و قامت تضرب كف على كف
أماني : الله يخلف عليك عموما أنا بكره بروح السوق بتروحين معاي ؟
أمل : امممممممم لا إشتري لي الملابس و الأغراض هالمره على ذوقك
أماني : غريبه أمل وش ...
قاطعتها بسرعه و عيني على شاشة اللاب توب
أمل : أمونه حبيبتي تصرفي و جيبي أي شي خلاص دبري عمرك ..
أماني : زين زين خلاص بس لا تعصبين علي … أوف ؟؟
أمل : طيب يالله حبيبتي إطلعي و سكري الباب و راك
هزت راسها بحزن و طلعت و الله ما همتني أهم شي فهد إللي صار كل حياتي !!!!!
المشكله إنه لاحظ تأخري فسألني عن السبب :
الأمير : وينك ؟؟ وش فيك تأخرتي عسى ما شر ؟
لحن الغروب : لا هذي أختي كانت معاي بالغرفه تكلمني
الأمير : حنان ودي أقولك إني راح أغيب عن المنتدى أسبوع و راح أحاول قد
راستطاعتي أعلمك عن أخباري بالمسجات ..
انصدمت و ظلمت الدنيا في عيني أسبوع كثير كثير مره و أنا إللي ما أقدر على
بعده ساعه و صار جزء من حياتي مب بالنت بس !!!
لا حتى في حياتي لا لا مستحيل وش بسوي أنا يا ربي .. انقهرت من قلب حتى ما
عرفت وش أرد عليه تسعه شهور أو عشر و حنا دوم مع بعض ما يفرقنا
غير النوم يغيب بهالبساطه و أسبوع بالنسبه لي عذاب !!!!!!!!
الأمير : و انتي بعد طمنيني على أخبارك أول بأول و ارسلي لي مسج كل ما يصير
معاك شي
لحن الغروب : وش سبب غيابك ؟؟
الأمير : و الله بسافر لهلي بشوفهم و أتطمن عليهم لا تنسي إنه العيد قرب و
ودي أعايدهم بصراحه .
تذكرت أماني و هي تقولي العيد ... بصراحه مدري وش بقوله بس في شي كان لازم
أقوله من زمان ...
الأمير : حنان وش فيك سكتي ما راح تقوليلي أشوفك على خير أو الله معاك أو شي
مب معقوله أسافر بدون ما تودعيني !
لحن الغروب : كنت أبقولك إنه اسمي مب حنان إسمي أمل
الأمير : أمل !!!
لحن الغروب : بصراحه ما حبيت أكذب عليك أكثر من كذا أنا إسمي أمل و هذي
الصراحه و بعدين كذبت عليك من البدايه
لأني خفت منك إنك تخدعني أو تسوي أي شي ضدي بس أنا ارتحت لك و واثقه فيك عشان
كذا قلت لك اسمي الحقيقي
اسمي أمل يا فهد و أعتقد تسعه شهور كفيله بأني أعرفك زين و أعرف آخلاقك عدل
سامحني لأني كذبت عليك من البدايه !!!
جلس فتره ما يرد بعدها رد و قال :
الأمير : بصراحه من حقك و انتي فعلا كبرتي في عيني أكثر و أكثر صراحه راح
أفتقدك و أشتاق لك بس وش بسوي لازم أشوف أهلي .

قمت أقرى كلامه بصمت و شي يتحرك في داخلي و يناديني و أنا أقول لقلبي ...
هي كلمه وحده كان ودي أقولها له تغني عن أي كلمة وداع ثانيه ... توصف مشاعري
و أحاسيسي بكل إنسيابيه و حريه ..
أنا أبي أعترف له بشي كنت أكذبه في داخلي من زمان و اللحين لازم أبوحه به و
أقوله إني ....
بس كنت متردده مب عارفه كيف أوصلها له بصراحه مدري أحس إني راح أنفجر لو ما
قلتها ...
لكن اللحين بقولها و بحطم كل إلي في داخلي و بقولها لازم لازم أقولها .. كنت
أعنيها و أنا فعلا أعنيها أحس إني راح أحطم الدنيا بس ؟؟!
الأمير : يا الله أمول ودي تودعيني قبل لا أسافر ... و لا ما ودك تقولين لي
شي
ضغطت على نفسي و قلت :
لحن الغروب : كنت أبي أقولك إني .... إني .... إني أحبك
كتبت هالكلام و بسرعه طلعت من المحادثه و حطيت راسي على الطاوله و قمت أبكي و
أصيح بحراره مني قادره أكتم اللوعه إلي في داخلي !!
مدري وش الشي إلي يخليني أبكي بس بكيت و أنا مستغربه نفسي مستغربه من كل إلي
صار و إلي قلته له و هالإعتراف الخطير إلي هزني من داخلي ...
كان المفروض هو يقولها لي مب أنا بس هالكلمه كانت أقوى من اني أخبيها .. مب
مهم مين يسبق الثاني و يقوله أحبك المهم معناها و صدقها
إلي كان طالع من قلبي و ما كذبت فيها ...
مر شريط الذكريات إلي بيني و بينه قدام عيوني و إحساس غريب سكن قلبي إحساس
أول مره أحسه و مشاعر أول مره تختلط في داخلي إيه نعم أحبه ؟؟
أحبه و أقولها و هي طالعه من قلبي حتى لو هو ما يحبني أنا أحبه هو ملك قلبي و
ملك إحساسي و مشاعري حتى لو ما شفته أو سمعت صوته
أحبه و في داخلي تجاهه حب جارف قوي مثل النهر أحبه و كأني العطشانه إلي لقت
إلي يروي عطشها أحبه بدون أي كلمه أحبه و أنا أعنيها
و شي غريب يدفعني لإني أرجع مره ثانيه و أفتح المحادثه و أعرف وش ردة فعله
أول ما فتحت المحادثه لقيته كتب :
الأمير : أحبك يا أجمل إنسانه في حياتي ..









تفاجأت و من هول المفاجأه سكت و أنا مدري وش فيني ... مشاعر خياليه ملتهبه في
داخلي
معقول يكون يحبني مثل ما أحبه و أنا إلي توقعت إنه حب من طرفي و بس !!
زاد حبي له بعد إعترافه لي و صرت أتمنى أتم معاها طول الوقت ما أنقطع عنه و
لا ينقطع عني حسيت نفسي رحت في عالم ثاني عالم جميل !!!
بعيد عن أي عالم ما فيه إلا أنا و فهد و بس ..
الأمير : أنا مني مصدق نفسي إني أقولها لك بس أنا أحبك و كنت ناوي أقولها لك
من زمان بس كنت متردد و خايف من ردة فعلك إنتي غيرتيني يا أمل... و حسستيني
بأحاسيس عمري ما حسيتها أقولها بكل صراحه .... أحبك .
سكتنا فتره بعدين
الأمير : بأطلبك طلب و ليتك ما تطلعين من المحادثه أو تزعلين مني
لحن الغروب : تفضل قول آمرني
الأمير : ما يامر عليك عدو ... بس بغيت إني ..... و لا أقولك خلاص خلاص
لحن الغروب : لا قول وش فيك خوفتني ؟
الأمير : طيب أقول و ما تزعلين مني و لا تفهميني غلط ... أقول و علي الأمان
؟؟
لحن الغروب : قول يا فهد و عليك الأمان
الأمير : أكيد ؟؟
لحن الغروب : إيه أكيد
الأمير : متأكده
لحن الغروب : إيه أكيد متأكده
الأمير : بصراحه ......
لحن الغروب : إيه ؟
الأمير : أبي رقم جوالك !!!!!!!!!
في هاللحظه قلبي خفق بقوه و بجد حسيت بشي عمري ما حسيته في حياتي ... فهد يبي
رقم جوالي يعني يبي علاقتنا تستمر حتى لو
هو بعد عن النت يعني هو فعلا يحبني و يبي علاقتنا تستمر أكثر و أكثر ..
و نتم مع بعض على طول و صارت ألف فكره و فكره تدور في راسي و صرت أفسر طلبه
ألف تفسير و تفسير
الأمير : أمل وش فيك ؟ لو ما تبين خلاص مب مشكله أنا آسف
رديت بسرعه ... و بدون إعتراض و قلت بكل عفويه !!!
لحن الغروب : لا مب قصدي بس حبيت أقولك إني ... موافقه
ما رد فتره و بعدين :
الأمير : معقوله !!!
لحن الغروب : إيه بس بشرط ؟؟
الأمير : تفضلي إشرطي و أنا من اللحين موافق
لحن الغروب : يتم بينا مسجات و بس ... يعني ما تكلمني و لا أكلمك
الأمير : مب مشكله قايلك من قبل شروطك على العين و الراس
لحن الغروب : تسلم يا رب
فعلا أنا ما أقدر أكلمه و راح تكون خطوه جريئه جدا إني أكلمه لهالسبب الأفضل
تتم بينا مسجات عشان أعرف عن أحواله على مدار الساعه
تبادلنا الأرقام !!!! بعدين أعيد نظر في حكاية إنه يصير بينا مكالمات !!!!!

************

أحبك رغم السكوت اللي نبت في ناظــري
رغم الكلام اللي انسجن في خاطــــــــــري
و أبقى معك روح وجـــــــــــــــــــــــــــسد
من المهد حتى اللحـــــــــــــــــــــــــــــــــد

كنت محتاره وش بسميه في جوالي مب معقوله راح اسميه بإسمه يمكن يصير شي أو شي
و أختي أو واحد من أخواني يطلع على جوالي
و خصوصا إني ما أضمنهم لأنه دايم المواقف تجي معي عكس ... الحلو في الموضوع
إني مسميه صديقاتي بأسماء مستعاره مب بأسماهن الحقيقيه !
و هذا ساعدني إني أدور لفهد إسم مستعار ... غمضت عيوني يمكن أتذكر أي إسم قد
مر علي ؟
بس ما لقيت .... فتحت عيوني مره ثانيه و صرت أطالع غرفتي و أدور بنظري على أي
شي ممكن يذكرني بأي اسم
و فجأه جت عيني على التسريحه ...... و أخيرا لقيت الإسم على قارورة عطر ((
لمسة حب )) واااااااو الإسم لايق عليه تمام ... ((لمسة حب ))
إسم رهيب .... سجلته في جوالي و رجعت للمحادثه :
الأمير : رقمك مميز
لحن الغروب : و إنت بعد رقمك مميز
و فجأه سمعت صوت نغمة الرسايل في جوالي فتحت الجوال لقيت تم إستلام رساله أول
ما فتحتها
تصبحي على خير
أحبك
المرسل : لمسة حب
ابتسمت بفرح و الوناسه مقطعه قلبي رديت عليه برساله
و إنت من أهل الخير
رجعت للمحادثه مره ثانيه و قلت :
لحن الغروب : يالله اللحين ماله داعي إني أودعك لأنه ما راح ننقطع عن بعض
أبدا
الأمير : أكيد و هذي ما فيها كلام
لحن الغروب : أجل خلاص بنام و أنا مطمنه .
الأمير : الحمد لله و أنا بعد بأكون مطمن عليك و راح أرسل لك مسج بأي شي يصير
معاي ... بأزعجك يعني
لحن الغروب : ههههههه خذ راحتك جوالي تحت أمرك بيستقبل كل رسايلك
الأمير : ما أتوقع إنه بيستقبل كل رسايلي
لحن الغروب : الله ... ليه ؟؟!
الأمير : ما راح يقدر يستقبل رسايل قلبي لك أحبك حياتي أحبــــــــــــــك و
مستانس بوجودك معي الله لا يحرمني منك
سكت فتره لأنه الخجل مقطع بعضه معي ...بعدين قلت
لحن الغروب : ماودك تتجهز للسفر ؟
الأمير : ههههههههههههههه طيب طيب فهمنا يعني تصبحي على خير
لحن الغروب : و انت من أهل الخير
الأمير : أمول
لحن الغروب : عيونها
الأمير : أحبك
لحن الغروب : و بعدين معاك يا الله روح نام عشان تسافر و إنت مرتاح
الأمير : هههههههههههههههه تصبحين على ألف خير و عافيه
لحن الغروب : و انت من أهل الخير
خزنت هالمحادثه على جهازي لأني كنت أخزن أغلب المحادثات إلي بيني و بين فهد
على جهازي
أستانس و أنا أعيد قراءتها مره ثانيه أحس بشوق غريب و أنا أقراها... قفلت
اللاب توب
و نمت على سريري و أنا أحلم بأحلام سعيده ...
* * * * * *
استوقفت ذاكرتي مره ثانيه و رجعت للواقع ... ما حسيت إلا و الفجر مأذن صليت
الفجر و رديت أنام بس الواضح إني أعاني من أرق فظيع
نفضت البطانيه عني و قمت تسبحت شوي و بدلت ملابسي و مشطت شعري و قلت أنزل
أشوف أخواني و أفطر معهم
نزلت للصاله و لقيتهم متجمعين في غرفة السفره ... كلهم استانسوا بوجودي لأني
من فتره طويله ما أفطرت معهم ؟؟
سلمت عليهم و حبيت راس أبوي و سحبت لي كرسي و جلست جنب مازن بكل هدوء مع إني
في الماضي كنت أهز البيت هز بهبالتي حتى في الفطور !! و على الصبح ...
أكثر وحده إستانست بهالتغير هي أماني قامت تغرف لي من كل شي و تصب لي الشاي و
الحليب و في هالوقت أبوي كان يكلمني
أبو عبدالله : يا هلا و الله ببنيتي وش أخبارك ؟؟
أمل : الحمد لله بخير دامك بخير
أبو عبدالله : شكلك تعبان يا بنيتي فيك شي ؟
أمل : لا يوبه هو شويت تعب بسيط و بيروح
دخل في السالفه عبدالله إلي استغربت تغير إسلوبه معي
عبدالله : و الله لو فيك شي أنا أوديك المستشفى بنفسي !
أمل : مشكور و الله تسلم بس أنا الحمد لله بخير
كانت أجوبتي مختصره جدا و خصوصا إني ما لي خلق أتكلم ؟؟؟












لؤي كان قبالي مباشرة يطالعني بنظرات إلي مب راضي و إلي زعلان و عيونه مليانه
ملامه !!
إبتسمت له بنعومه و طالعت مازن إلي كان يهمس لي
مازن : أمول ... وش فيك عسى ما شر ؟؟!
أمل : سلامتك و الله الشر ما يجيك بس تعب بسيط بيروح إن شاء الله
مازن : إن شاء الله
أمل : مازن كيف حيواناتك ؟؟
شكله استغرب سؤالي؟؟ سكت ... جاوبني بضحكه مره حلوه يااااااااه لي فتره طويله
ما شفت ضحكته إلي كانت مثل ضحكة ..... فهد !!
فجأه ملامحي تغيرت و إبتسامتي تبدلت لحزن كل ما تذكرت هالألم إلي إسمه فهد
أحس بالألم يعتصرني كانت ضحكته أحلى ضحكه سمعتها في
حياتي دوم أتفاءل لما أسمع ضحكته و خصوصا لما يلعب علي و يخدعني و يخوفني كنت
أحب ضحكته مثل ما أحبه رحت في عالم كله
فهـــــــــــــــــــــــــــــــــــد
الوحيد إلي لاحظ تغير ملامحي هو مازن و خصوصا إنه كان يتأملني طول الوقت
مازن : أمل وش فيك ؟
أمل : لا أبد سلامتك
في هاللحظه مدت لي أماني الصحن و هي تقول
أماني : حياتي يالله تفضلي رتبت لك فطور معتبر يا رب يعجبك
توقفت لحظه مدهوشه و بديت أتذكر الكلمه إلي كان يناديني فيها فهد (( حياتي ))
ما كان يناديني بإسمي أبد كان يقولي حياتي على طول
آآآآآآآآه يا قلبي متى بيرحل طيفه عني متى بتموت ذكراها و تبتعد عني متى أرد
لحياتي الطبيعيه و أشيله من بالي متى متى أنسى العذاب و الشوق و الحنين متى
؟؟؟
تذكرت هالأغنيه و الوعد إلي قطعته على نفسي
آه يا قلبي يا اللي
مشغل في هواهم
دامهم ما يا بونا ليش حنا نبيهم
ليش نمشي واراهم و نتمنى رضاهم آه يا قلبي أغنى ليش نسأل عليهم
يا قلبي آه يا قلبي










بس فهد ما تركني أنا متأكده ودي أصيح و دي أصيح بصوت عالي و أقول للعالم كلها
إني أحبه أحبه أحبه و حياتي بدون وجوده دمار
سامحيني يا أماني مب قادره أوفي بوعدي لك و أنساه لو دقيقه مب قادره
آآآآآآآآآه يا قلبي آآه
أماني : أمل ... أمل ... أمل
أمل : آه نعم
أماني : وش فيك غلاتي ؟
أمل : أبد حبيبتي أنا معاك
أماني : إيه واضح و من كثر إنتباهك لي ... يدي انخلعت و أنا أعطي لك الصحن
أمل : آه آسفه ... مب قصدي آسفه آسفه
أخذت الصحن بسرعه و نظراتهم تجمعت علي و كأنها أسهم تخترقني و خصوصا أبوي
قام أبوي بعد ما خلص أكله و ناظرني بنظره أول مره أشوفها في عينه نظره مولعه
كلها شهب و سهام إخترقتني بطريقه عجيبه !!!
من عيونه على قلبي على طول و الله خوفني موووووووت و خصوصا لما قالي
أبو عبدالله : أمل لما تخلصي من فطورك مريني المكتب أبيك
بصراحه خفت بس كنت متوقعه الموضوع إلي راح يكلمني فيه أكيد عن تغير حالتي ؟؟
رجعت لصحني و أنا أتنهد من الخوف إلي خلى جسمي يرتعش
يمكن أبوي شاف علي شي شين لا لا ... معقوله عرف بموضوع فهد ... و الله لو درى
كان ذبحني من زمان ؟؟؟ و صارت الأفكار توديني و تجيبني !!
فجأه حسيت بنظرات مركزه علي بكل سخونه و حراره رفعت راسي لقيت لؤي يطالعني و
هو مقهور
لؤي : إنتي إنسانه مجنونه
فاجأني !!!!
ما توقعتها منه الصراحه خصوصا إنه لؤي كلامه حلو معاي عمره ما طالعني
بهالنظرات أو كلمني بهالطريقه و بهالكلام إلي قاله ...زادت مخاوفي أكثر بإنه
صار شي ؟؟؟
حسيت جسمي كله يرتجف من الخوف إلي سكني حتى ما قدرت أمسك الملعقه .
بس حاولت أكون طبيعيه عشان محد منهم يشك فيني و في إلي يدور في داخلي ..
نزلت راسي و سكت هو بدوره قام و طلع من الغرفه طالعت صحني بصمت و هدوء أحاول
أكون طبيعيه قدر الإمكان
و مع شدة خوفي رجعت للماضي إلي أتمنى في يوم من الأيام إنه يموت