جيت مثل الحلم مقبل من بعيد !!
جيت كلّك شوق يسبق خطوتك !!
ضمّني .. كثر السوالف مايفيد
طاحت الدمعه وكلّي فدوتك !!
ضمّني .. ذوّب وسط صدري جليد !!
من زمن ودّي أجرّب نزوتك !!
لايهمّك نبض قلبي لو يزيد ..
له شهر وأكثر وهو في حروتك !!
كنّ في صدري : زغاريد ونشيد
كان في صدري : بقايا قهوتك !!
ضمّني .. محتاج أغنّي من جديد !!
أكسر ضلوعي بحسّ بسطوتك !!
مدري أنت شفيك للحينك عنيد ؟!!
قولها وأكسر حبيبي قسوتك !!
قول : أحبّك .. دامك الحب الوحيد
لك حبيبٍ مايخيّب هقوتك !!
قلب ماحبّك / ترا قلبٍ بليد !!
لو شكى طول الغياب .. وجفوتك !!
ماتكفّي فرحتي فيك القصيد
لو كفتني عن كثيرك عنوتك !!
بأختصار ..
اليوم هذا : يوم عيد !!
منتشي / وأقرأ بعينك نشوتك !!