خلك على صدك ترى خاطري طاب
ودعتك الله وابتعد لا تجيني
من صد دون أية عواريض وأسباب
أنهيت حبٍ صار بينه وبيني
حتى إيش لو إنه من أدناة الأقراب
نفسي عزيزة والعرب خابريني
ماني عقب فرقاك عايش بلا أحباب
ولاني عقب فرقاك عايش حزيني
لا ساهرٍ لأجلك ولا الدمع سكاب
من أنت؟ حتى تبكي اليوم عيني
أصبحت في عيني مثل باق الأغراب
إن رحت والا جيت ما أنت بظنيني
وش حاجتي لا صرت بالحب لعّاب
حرام أضيّع معك باقي سنيني
خذها بلا تسويف واحسب لها حساب
نهاية المقصود في كلمتيني
اللي يبي فرقاي قدامه الباب
واللي يبيني فوق راسي وعيني