ღوقفةღ

يا حبيبي كل شئ بقضاء .. ما بأيدينا خلقنا تعساء
ربما تجمعنا أقدارنا .. ذات يوم بعدما عز اللقاء ..~
" إبراهيم ناجي "

بو عزام وقف بعصبيه وقال : لا وبعد تبا تاااااخذها ..!
عزام توقع ردة فعل ابوه وما رد عليه اكتفى بانه يطالعه بنظره ..
بو عزام : ما قلنا شي ع الأصل والفصل ..! وما قلنا شي ع الوضع ..! بس توصل لأمها ..............................
عزام طالع ابوه وقال : الشغل مب عيب أبويه ..
بو عزام باستهزاء : هه انت تقول جي ..! أحيدك أول غيرر والحين غيرر ليكون لاعبين في عقلك .. آخر شي توقعته منك يا عزااام ..!
عزام : ابووويه تعرف اني قبل كنت متأثر وحالتي حاله ..!! والحين عرفت كل شي صح
بو عزام : عزاااام منت ماخذ هالبنيه .. سمعتني ..
عزام طالع ابوه بتحدي : باااخذها يعني باااااخذها ..
بو عزام طالع ولده باستغراب : تعلي صوتك علي عزااام ...؟
عزام بقهر : يوم انك دريت ان بنت أختك طالعه على ابوووها كان عادي عندك تزوجني اياااها وللحين بعد تباها وانت تعرف شو طبعها ..؟؟
بو عزام : بس بنت عمتك غير يا عزااام .. ومصيرها بتعتدل ..!! ولا نسيت انت اشسويت فيها ..؟
عزام : لا ما نسيت ولا عمررري بنسى بعد ..! وهذي اللي اباها تسوى بنت عمتي وطوايفها بعد ..
بو عزام بعصبيه : عزااااااام اقصر الشر أحسن لك ..
عزام وقف وقال بنفس النبره : باااخذها يعني باااخذها .. والله منتو محركين فيني شعره ..
بو عزام قال وهو يتدارك أعصابه : اطلع من بيتي جانك خذيتها ..
عزام طالع ابووه بنص عين وقال : ابووويه تعرف أنا طااالع على منو وأقدر اسوي اللي ما يتسوى ...!! ووقتها عيشو من غير عزااام ..!!
بو عزام تقدم من عزام وقال خايف يفقد ولده الوحيد سنده بعد ما يصير كهل : عزااااام اهدااا ...
عزام رق صوته وحس ان هذا ابوووه : ابوووويه ...
بو عزام على كثر عصبيته الا ان يضل هذا ولده الوحيد اللي كلما يكبر يزداد عناده وكأنه ما عدا مرحلة المراهقه ..
عزام : باااجر ابيك تيي معاي نروح لهم وأخطبها ..
بو عزام : عزااام فكر عدل .. هذيل ما نعرفهم ..
عزام : ولو على شغلة أمها أقدر افنشها اليوم قبل باااجر ..
بو عزام بتهديد : قطع الأعناق ولا قطع الأرزاق يا عزااام ...!
عزام : ولا يهمك ... بس ابوووي أمهم بمليووون مررره أحسن من هذيل اللوث اللي تعرفهم ... ترا والله من عيالها صغااار ما رضت تااخذ ولا فلس من أحد ..
بو عزام : خلاااص يصير خير الين بااجر ..
عزام وقف يروح يرقد وقال بابتسامة نصر : تصبح على خير ابوويه ..!! اذا منت ياااي عادي بس أخااف امها تسوي لنا عرس قبل لا نعرس والسبب اني رااايح اخطب شرا الأجانب .. وبلا مذهب ..
بو عزام يطالع ولده يصعد وقال بقهر : الله يهديك متى تكبر وتعقل ..!! على انك كبرت وااايد بس بعدك تتصرف شرات الشباب ..
صد عزام من فوق وقال يبي يزين الجو : تتوقع بتوافق ..؟
بو عزام اللي ما عمره نزل راسه لحد : أكيييد ولا متى تطول عزام ولد عيسى ..!
/
.
/
أماني : حرااام أموور لا تصيحين .. المفروض تفرحين ..
أميره طالعت أماني وهي تمسح دموعها : أمووون ودريني برووحي
أماني : المفروض تفرحين ..
أميره بداخلها ( وين الاقي الفرح وعزام اقتحم حياتي وبيحولها لجحيم )
أماني تهز أميره : يلا أمووور استانسي ..
أميره طالعت أماني وابتسمت غصب وقالت : ممكن الحين تودريني رووحي ..
أماني وهي تبتسم : ممكن أفهم ليييش الحزن ..!! والله عمري ما توقعت انج بتاخذين واااحد جي ومتريش ..
أميره بسخريه : هاللي يهمج ..؟
أماني : أموووور .. وبعدين أحسن من غيره مثل ما قال احمدوه لماما ان الولد وااااايد زين ..
أميره بسخريه : هي الصراحه وااايد زيــــن ..!
أماني : مااالت عليج .. والله لو اني بدالج افرح واستانس ان ولد عيسى الـ ........* ياي يخطبني ..!
أميره قالت بألم : أمووون ودريني بروووحي ..
أماني : سكتي أمووور .. بتم وياااج الحين ماما بتيي تسألج ..
أميره مستغربه : ليييش بعدهم اهني ..؟
أماني : هي الله يهداج ما كملو الا نص ساعه ..
أميره غمضت عيونها وقالت بألم : أمووون تتوقعين كيف بتكون حياتي ..
أماني بوناسه : أكييييد مثل الأميرررااات كييف بعد ..؟
أميره : والله لو تعرفين اللي بداخلي جااان عذرتيني ..
أماني بلا مبالاه : لو ع الدراسه يخليج تكملين .. المهم بتيي ماما اليوم تسألج عن رايج ..
أميره طالعت أماني مستغربه : جني الا كنت أحبه وموافقه على طووول ..!!! قالو لج متشققه لهالدرجه ع الزواج ..؟
اماني مستغربه : ليييش أحمد ما سألج من أسبووع ..! هو قايل حق ماما جي ..
أميره ارتبكت : هي هي كلمني من أسبوووع
أماني ضحكت : وأنا أشوووف ليييش الحرمه ساااكته وخايفه طووول هـ الأسبوع ..
أميره ( يـ الله كرهت حياتي والسبب انت يا عزام .. من بعد ما كنت حاطه آماال وآماال .. شكلها كل هـ الأحلام تحطمت .. )
أماني وهي تطالع السقف : يالله وأخيرا صرنا نحن وأسوووم أهل ..
أميره وهي تتذكر شي ولأول مررره تحس فيه مع انه مر على بالها : عزااااااااام أخو نوااااااااااال ..؟؟
اماني : هي .. وعيال عم أسما ..
أميره منصدمه : لا تقووولين ..!
أماني : عااادي اش لج في أخته ..؟ بالطقاق جان مب عايبنها .. انتي بتتزوجين أخووها مب هي ..
أميره ( ما بغينا نفتك من الأخو طلعت لنا أخته بعد ..!! ما أقول غيررر الله يستر )
/
.
/
بعد مرور أربعة أيام ..
,
,
أماني : لا صدق .. تعالي من الحين نفكر
أسما وهي تضحك : هههههههههه
أماني : بلااااااااج ..؟؟
أسما مبتسمه : والله بعدني مب مستوعبه ان عزااام بيتزوج أختج ..!
أماني : لا استوعبي ماماتي ..
أسما : صج والله مب مصدقه ..!
أماني : المهم يلا نكمل
أسما : عن نفسي اموت ع الليموني ..
أماني : مااالت عليج .. توج في الحفله كنتي لابسه ليموني ..
أسما : عاادي باخذي لي واحد موديله غير
أماني : وشو يخصه الموديل .. ترا اللون بعد يأثر
أسما : همممم أوووكي اش رااايج باللون الازرق
اماني : لااا دوووري غيره
أسما : خلاااص عيل أسووود ..؟
أماني : لا تستوين لي أمووور ..!
أسما وهي تضحك : ليش شو بلاها ..؟
أماني : تبي تلبس أسووود بيوم عرسها ..
أسما ميته ضحك : وليييش بعد ..؟ بروووح بقووول لعزام خلاااص ..
أماني : بتذبحج جان درت ههههه
أسما : ترا صج والله حلو الاسود ..
أماني : أدررري بس بعد يبي له فرفشه جذي الوان هاديه وكيوت ..
أسما : خلاااص الأخضر وما بغير ههههه
أماني : بسأل أمووور ذوقها حلوو .. بس أخااف تقول قومي عني مب متفيجه لج ..
أسما : أكييييد بتنشغل بعرسها هههه
أماني : تعااالي أمي نحن ليييش نفكر بالعرس وبعدهم العرسان ما شافو بعض حتى ..!!
أسما : بس أحس عرسهم مطول ..
أماني : أكيييد ع الأقل يبي له كم من شهر ..
اسما : ما تدرين عزام بعد تصنيفاته غيرر شكل .. والله ما أصدق ان أمووور البيبي بتتزوج
أماني : صدقج والله حرااام أحسها صغنونه ..
أسما وهي تبتسم : اقووول امون هذا ذياب ياااي صوبي بتصل بج عقب
أماني : أوووكي .. يلا باااي
أسما : باااي
ذياب بقهر : قلت لج مليووون مرره بس ازقرج تيين ..!!
أسما لفت ويهها تأفأف : أوووفوو من العصر الجاهلي أحييد يقولن عن اللي يرفهن الرياييل جاريه ..!!
ذياب فاتح عيونها : صخي ..!! ماشي حيا بعد ..
اسما ابتسمت : أمززح انزين بس عيبتني الكلمه وأنا اقرا أمس بكتاب ..
ذياب : كتاب شو بعد ..؟
اسما : كتب أدبيه ..! كتب شو بعد ...؟
ذياب : هي ....
أسما : تبا تقرا ..؟
ذياب : قالو لج متفيج ..!! المهم تعااالي عطيني المحول ما أقدر أطلعه ..
أسما مستغربه : عندك اليسار انزين ..!
ذياب : أدررري بس هو مفعوص ورا الملااابس .. يبي له ساااعه ..
أسما تافاف : يالله متى تتعالج ونفتك من حشرتك ..
ذياب : تريي بس أصير زين بفلعج ..
أسما ابتسمت : خلاااص يابوووي سحبناها ..!
ذياب بتساؤل : على طاااري أبوووي ..!! سمعت عزااام خطب ..؟
اسما ابتسمت : هي خطب خلاااص وبيعرس ..
ذياب مستغرب : أروووى ..؟؟
أسما : له ..!! أخت أموون ..
ذياب مستغرب : منو أموون بعد ...!!
أسما : أخت ربيعتي ..
ذياب بدون اهتمام : انزين يلا عطيني المحول أباه ضروري ..
أسما : صح ذيااابو ..!
ذياب بملل : ها ..؟
أسما : مشعل ولد عمتي من زمااان عنه ...؟
ذياب : اش دراااني بعد .. ما قااام يسأل الهرم ..
أسما بقهر : لا تسب ..
ذياب ولا مبالي : شـ يخصج فيييه .. اقووول يلا عطيني المحول ..
/
.
/
عزام لف وهو يطالعه : خلاااص الحين بنروح ..
بو عزام : وين سويتو الفحص ..؟
عزام : اهني في الـمركز ....
بو عزام : هيييه .. خلاااص اليوم يعني أكيييد النتيجه ..
عزام : هي ترا يومين كفاهم ..!
بو عزام وهو يطالع موبايله : لو ما طلعت ... تباها تطلع اليوم ..؟
عزام هز راسه بالنفي وقال : لأأأ أكيييد طالعه وجان تأخرت عادي ..
بو عزام : آهاا ..
عزام : ها عيبوك الناس ..؟
بو عزام : يعني .. بس شكلهم زينين وعلى قد نياتهم ..
عزام : لا يغرك ترا والله عرجهم مافي أحسن منه ..
بو عزام : هي سألت عنهم .. بس الله يهديها أمهم جيييه اشتغلت فراااشه
عزام : عيالها كلهم كانو صغار ومن يوم أحمد تخرج وبدا يدرس ما رضت تطلع وقالت جي ولا جي بتم في الشغله ..
بو عزام هز راسه بتفهم وقال : هيييه ..
عزام وقف وقال : يلا سلااام .. عن أتاأخر ع الجماعه ..
طلع عزام وابوووه يطالعه متعجب .. عل وعسى هالزواج يخليه يصطلب ويعامل الأوادم مثل العالم والناس .. حتى أنا اللي أنا ابوووه ..! يعاملني جني أصغر عياله بس الشرهه علي يوم انك صغير عطيتك أكبر من حجمك ..
،
،
اليوم بستلم شهادتين ..؟؟
وحده دراسيه ..!!
والثانيه ..
نتيجه الفحص اللي بتثبت كل شي وبيتم بها مراسيم زواجي ...........!!
طالعت أحمد وانا متوتره : لااازم الفحص ..؟
أحمد وهو عيونه بموبايله : هـــي لااازم الله يهديج أمووور أحيدج متعلمه ..!
أميره بارتباك : لا بس أسأل ..
أحمد : ما عليج ان شاء الله كل شي يمر على خير ..
أميره وهي تطالع جنبها : وينه ..؟؟ تأخر ترا صج جبدي لاااعت ونحن نتريا ..
أحمد : ما بنــتأخر داااخل واايد .. ترا الا النتيجه ..
أميره بقهر : فكه .. جبدي لاااعت من كثر ما سحبو مني دم ذاااك اليوم ..
أحمد وهو يعابل بتلفونه : أميرررره صج راااضيه ...؟؟
أميره هزت راسها بايجاب وقاالت بحزن : والله ما رضيت الا عشااان خاطرك ..
أحمد ترك اللي بيده وصد يشوفها : أفهم من كلااامج بعدج مب راااضيه فيه ..؟
أميره بألم : راضيه ولا مب راااضيه كله وااحد يا أحمد ..
أحمد حس انه عصب وقال : خلاااص أنا بتدبر .............
أميره قاطعته : أحمد خلاااص أنا مقتنعه ....!
أحمد سكت وبدا يطالع برررع ..
أميره طالعت أحمد بحزن ان بالفعل أخووها منفعل ..
قالت بقهر : أحمد ليييش يدخلني بمشاكلك انت وياااه ...؟
أحمد : اسأليه ...!!
أميره مقهوره : شووف نهاية طيشك لوين وصلنا ..
أحمد صرخ : أميررره بس خلاااص اش فيج انتي ..؟ مستويه تتدخلين بكل شي ...؟؟
أميره بدت تصيح : أحمد والله غصب عني .. مب بيدي اسكت وأنا اشووف الموت جدام عيني ..
أحمد بعصبيه : قلت لج من بدايتها خلاااص بتدبر كل شي ..
أميره تصيح : ويموتك ....؟؟
أحمد تفاجأ : ليييييش كلمج ...؟؟
أميره ما ردت عليه اكتفت بانها تقول : حياااتي تخترب وتضيع أهووون من ان كل العايله تتشتت ..
أحمد تدارك أعصابه وقااال : مب باااجي شي ع نتيجة الفحص وكل هالكلام ما يفيد الحين .. شو تبيني أقول له لأنه قاايل بس نطلع تروحون المحكمه تملجون ...؟؟
أميره وهي تطالع برررع وتصيح : قول له مابا أملج اليوم .. يتريا علي لـ يوم الخميس ..
أحمد : ما بيتريا .. مكلم القاضي ..
أميره : الا هم يومين ما بيستوي به شي ...!
أحمد طالعها وقال : خلاااص امسحي دموووعج بننزل ..
أميره لفت تطالعه وقالت : آسفه أحمد ما كان قصدي ..
أحمد وهو يطالع سيارة عزام اللي وقفت قريب عن باركنهم : أنا اللي لااازم أتأسف كل السبب باللي يصير أنا ...
أميره يت بتتكلم بس أحمد تكلم بسرررعه وقال : يلا انزلي هذا عزام وصل ..
أميره رفعت طرف الشيله وتغشت بها .. مع انها ما تتغشى لأن أحمد مب من النووع اللي يجبر خواته يتغشن .. جان يبون برايهم .. بس اليوم انجبرت لأن ويهها ما يسمح ان أحد يشوفه وهي توها طالعه من نوبة بكاااء ..!! هذا غير وجود عزام .. اللي بيزيد انفعالها خلاال اللحظات القادمه ..
/
.
/
خآرج حدود الامارات ..
عمر وهو يطالع حمود مب مصدق : احلف بس ..؟
حمود : ذياااب كلمني ...
عمر : يا حيييه والله عزاااام وخطب ..!
علي : أخت خطيبتك ...؟؟
حمود بضيج : لأأأ حاول معاااه عمي بس مايبي بنت عمتي ..
عمر : خلوووه على كيفه عسب بااجر لا صاار شي ما يقول انتو اللي خربتو حياتي وحياة عيالي .. وبعدين عزام واااعي خلاااص بالتسعه وعشرين .. الريال بيصك الثلاثين وبعده ..
حمود : صدقك .. هو حرر باختياره ..
علي : الفال لنا ..
عمر ابتسم : البريطانيه نباااها ههههه
حمود : عسب ترد البلاد و تشوووف أمك متبريه منك ..
عمر : لا عاد ما تسويها امي ..
حمود : بس تأكد جانك خذيت وحده من غير لا تشاور أمك تأكد مليون بالميه ان أمك حبها لك بيختلف ..
علي : بس الأم مستحيل تكره ولدها ..
حمود : أدررري بس خلاااص تحسك كسرت من كلمتها وقلب الأم لااازم يحترق .. تخيل انت مكان البنيه وتزوجت من ورا شور أهلك .. كل الأهل بيعافون هالبنيه ..!!
عمر : بس البنت تفرق عن الولد ..
علي : بـ هالزمن يا رياال الولد والبنيه صااارو سواااء ..
حمود : صدقك والله .. أهم شي رضا الوالدين ..
عمر : جم بااجي ع الاجازه اللي قبل الامتحانات ..؟
علي : احتمال شهر ..
حمود : لأأأ ثلاث أسابيع ونص ..
عمر غمز لحمود : قووول لولد عمك يتريا ..
علي : هي صدقك نرد البلاد نشوف أهالينا وبالمره نحضر عرسه ..
حمود وهو يطالع عمر وعلي : بس أنا احتمال كبيرر ما راح أنزل الا عقب الامتحانات
عمر مستغرب : جيييه ..؟ وعرس ولد عمك ..؟
حمود : عندي تقديم .. وبعدين انتو أدرى .. وعزام روووحه داارس ويعرف كييف الدراسه برررع .. وتخيلو جان تأخرت طيارتي لااازم أعييد واسوي كل شي وأجدد الموعد من يديد ..
عمر : صدقك .. المهم تعدي هالأيام على خيررر ..
علي : أنا بتم بتدرب اهني ولما اخلص وبتخصص سنه عقب برد البلاد ..
حمود ابتسم : كلنا قلنا جي ..
عمر يبتسم : أضمن لك مب راااد البلاد الا وعمري ثمانيه وعشرين ..
حمود : ع الأقل انت داااش من بعد الثانويه على طوول .. مب نحن اللي بنرد البلاد ونحن صاكين الثلاثين ههههه .. يعني احسب لك اني برد البلاد واحد وثلاثين سنه ..!
علي : السنوات بتمر بسرررعه ان شاء الله ..
/
.
/
طالعته يتقدم من صووب أحمد وهو لااابس نظارته الشمسيه ويمشي بكل غرووور وفخر ..
قلت بخاطري الله ما يحبه هالمغرور المختال ..!! بس يمكن مشيته جي .. استغفر الله لا اخذ اثم بس ..
قال بصوت رجولي : السلام عليكم ...
أحمد رد عليه : وعليكم السلام ..
مشا عزام يساار أحمد وأنا يمينه .... وساااكته وأمشي بهدوووء ..
أحمد قال : تأخرت واايد ..
عزام : تدري زحمة الشواارع ..
أحمد وهو يشوف الساعه : صااارت 11 أكيييد النتيجه طلعت ..
عزام أشر على الكراسي وقاال : استريحي أميره أنا وأحمد بنسأل عن النتيجه ...
حسيت بقهر .. ليييش يكلمني ..! شو يخصه فيني ...! مسكت يد أحمد لا اردايا ...
أحمد أشر لي اني اروح أقعد .. مشيت بقهر وقعدت ..! وأنا بدااخلي بركااان قااابل للثوران ..
دعيت بداخلي تطلع النتيجه سلبيه ..!! بس حسيت انه ماشي أمل ..!! لأني ما أحمل الثلاسيميا ..! ولا عندي أي اختلال بالهيموجلوبين أو أي مرض وراثي .. دعيت دعااء بس استغفرت ربي بعدها وحمدت ربي ع الصحه ..!
يلست وأنا متوتره .. شفت كذا عايله يايين وبياخذون نتايج فحصهم .. ابتسمت بدااخلي أكييد كل هالبنات مستانسات بهاليوم ..!!
لكن هل ياترى في وحده مثلي ..؟؟
قلت بداخلي .. ! دامهم فحصو دمي .. ليييش اليوم يبوني مره ثاانيه .. خل يعطون نتيجة فحصي لـأخوي .. بس هم بالعاده لااازم يبون الطرفين .. ميره ربيعتي قاالت .. انهم لما يعطون النتايج هم يبون البنيه والولد ..
ما مرت ثواااني الا وأخوي مع عزام ياايين صوبي .. وقعد أحمد يمبي وعزام يمب أحمد ..
لاااحظت توتر عزااام وهو يهز ريوله ..
بغيت أسأل أحمد اش صااير .. بس فضلت السكوت بوجود عزااام ..
عزام قال وهو صبره نفد : قااايلين عشره ونص النتايج بتطلع وللحين الدكتوره مب مرتبه الأوراق ..
أحمد : تريا انزين الله يهديك ..
عزام : مب على شي ..!! بس أنا مواعد القاضي ..
أحمد سكت وما قال شي .. فهمت لييش ..
عزام وهو يطالع الساعه : عندي ميتينغ بعد اربع سااعاات ..
أحمد تكلم بعيد عن السالفه وحرارة الموضوع ودخل سالفة الشغل : هي الوفد اللي ياااي من يوم ..!
عزام : هي ..!
سكتت وأنا أسمع سوالف أحمد وعزام .. للحظه أحس أحمد أخووي كارهه كره العمى وبعد ثوااني يسولف ويااه كأنهم ربع روووح ..!!
الا وتيي وحده وتقول : عزام عيسى .. أميره عبدالله .. النتيجه طلعت ..
وقف عزام وأحمد وقف جان يمسك يدي .. وقفت يمب أحمد ومشيت معاه وأنا ماسكه ايده .. يمكن خووف من عزام .. أو عدم الشعور بالأمان وسط هالجو ..!
دخلنا للدكتوره .. عزام : السلام عليكم
الدكتوره ابتسمت : وعليكم السلام .. تفضلو ..
يلسنا ورمست : أميررره ..؟؟
رديت وقلت وأنا أهمس : نعم ..؟
الدكتوره : النتيجه طلعت ايجابيه والحمدلله دنتي أمر .. دمك مافيهوش حاقه ..!
ما رديت ع الدكتوره واكتفيت وقتها اني أنصدم وأعبر عن انصدامي اني أوقف وابي أطلع من الحجره ...
بس أحمد كان أسرع مني وقال بصرامه : ايلسي أميررره ..
حسيت وقتها ان عزام ابتسم ع الموقف لأنه تأكد اني انجبرت فيه ...!!
الدكتوره ابتسمت : ما فيهاش حاااقه البت بتستحي ..! وانته يا عزااام دمك كويس بس انته حامل الثلاسيميا ودنته عاارف ودا عاادي .. كتير اللي عندهم وما بخصهوش بحياة الانسان لأنو بتمارس حياتك طبيعي والحمدلله ده عكس المصاب اللي لااازم بيوفرو لو دم .. فأنت انسان سليم ..
عزام ابتسم للدكتوره وقال : هي أدررري فيني ..
الدكتوره مدت الورقه وقالت : دلوئتي هديكو الأوراأ والسبوتات بتاعت المحكمه ..
عزام قال : ما يبي له شي ثااني ..؟؟ بس هذا الفحص ..؟
الدكتوره ابتسمت : آآآه ( تضحك ) بس لو عااوز عادي نعملك ..
عزام : لأأأ يكفينا ..
الدكتوره وهي تمد الأوراق : يلا يا حبايبي دي أورائكو .. ومبروووك ان شاااء الله تعيشو بسعاااده ..
وقفت وانا أمشي وساااكته ..! أي سعاااده والتعاسه انولدت اليوم ...؟؟
أحمد قال لعزام : مبروووك ...
عزام وهو يمشي يمب أحمد : الله يبارك في حياتك ..
قربنا عن الباركنات وصلنا جريب سيارة أحمد .. قال لي عزام : مبرووك أميره ..
ما رديت اكتفيت بأني أصد الصوب الثاني واتنهد بضيج ..
حسيت بنظرات أحمد تاكلني .. بس بنفس الوقت حقك يا أحمد باخذه يعني باااخذه ..!
عزام وهو يطالع أحمد قال بغرور يبي يكسر خشمي عساس ما حركت فيه ولااا شعره : الحقني بنرووح المحكمه ..
أحمد طالعني وقاال : أميرره اركبي بيي لج الحين ..
اكتفيت بأني انصاع لأوامره وركبت وأنا أطالع صوبهم ..
بس اللي شفته علااامات الاستغراب اللي انرسمت على ويه عزااام .. بس آخر شي سلم على أحمد ورووح لسيارته ..
ركب أحمد وقال : كلمته قااال الخميس بتروحون تملجون خلاااص ..
سكتت وما علقت ..
أحمد باستغراب : بلاااج انتي ما رديتي ع الريال ..؟
قلت وأنا أغمض عيوني بألم : خذاني غصب خل يتحملني ..
أحمد عقد حياته : ترا الريال بعد يومين بيصير ريلج ..!! ماله دااعي هالأفلام الهنديه ..
دمعت عيوني واستغربت من ردة فعل أحمد البااارده ..!!! كل هذا سوااه في أختك وتسكت له
قال لي أحمد : مب من شي أقول لج .. بس خلاااص يوم يطيح الفاس بالراس ما ينفع .. المهم تشربين شي ..؟؟
قلت له : لأأ شكراا .. بس أبي أعرف نسبتي ..
احمد ابتسم ونسا سالفة الفحص وقااال : صدددق تعاالي اليوم نسب الثنويه العامه ..
قلت وأنا ابتسم أحاول أنسا همومي : نرووح المدرسه نييب الشهاده ..؟
أحمد : آفا عليييج الحييين نروووح ..!!
/
.
/
حسيت هاليومين مرو بأسرع ما يمكن ..!!
لو اني عروس أتمنى العرس .. يمكن كانو بيمرون بأبطأ ما يمكن لأني رح أعد الثواني واللحظات .. اللي راح تجمعني فيه ..~
بس أنا حاله استثنائيه اليوم .. لأني بالفعل أتمنى العقارب توقف لـ هاللحظه وحياتي توقف معها ..
حتى ما حسيت بطعم فرحتي بالنسبه ولا حسيت بطعم فرحتي بـ أي شي ذآك اليوم .. من اليوم رح أعلن ولادة التعآسه والهم والبكآء بـ حيآتي ..~
لأني بالفعل أتمنى ترجع الأيام لـ ورا وأصحح كل شي وأعيش حياتي لحظه بلحظه لأني ندمت على كثير أشياء و تولهت على أكثر منها ..
وعآني من خيالي صوت أمي وهي تقول : يما أميررره يلا ...
تقدمت عن الشيله بحزن وحطيتها على راسي .. قلت وأنا خانقتني العبره : ادعي لي ماما
كان ودي اقول لها ادعي علي ولا تدعين لي .. عشان أنتهي اليوووم ...
أمي مبتسمه : لا تحاتين بنتي باااجر بس تعرسين وتروحين لبيت ريلج بتتعودين ان شاء الله ..
قلت بابتسامه صفره وأنا ما أظن : ان شاء الله
طلعت للصاله شفت أحمد واقف يترياني .. طالعني وقال : ها جاهزه ..؟
هزيت راسي بمعنى هي ..
مشى أحمد وقال : لحقيني أنا في السياره ..
طالعت أمي وأماني وبدت دموعي تسيل ..
أمي مستغربه : يما أمييررره لييش كل هالخوف ..؟؟
أحمد صد ورا قبل لا يطلع من باب الصاله وقال : جان ما تبين برايج ...؟؟
أمي : الله يهديكم يا عيال الا هو زواج ..!! وبعدين خلاص الريال كلمنا .. وسويتو الفحص ..
أميره هزيت راسي بلا ومشيت وراااه ..
أحمد مسك يدي قبل لا نطلع من باب الحوي وقال : متأكده ..؟؟
ما رديت عليه اكتفيت بالدموووع اللي تعبر عن كل شي ..
أحمد رص ع يدي وقال : جان ما تبين قوولي ..!! عشان باجر لا تندمين ..!
قلت وأنا أغمض عيوني بألم : جي ولا جي يا أحمد نحن خسرنا كل شي ..!! ما ودي أخسرك يكفي خسرت أبوووي وأنا صغيره ...
أحمد شغل السياره وحركها : أميررره بعدنا ما وصلنا المحكمه .. قولي رااايج لأن بعده باااقي وقت ..!! ترا عقب ما بيكون بيدج شي تسوينه ...؟
احترت وأنا أطااالع برررع ودي أقول له هي أبا عشان ما يصير شي أكبرر وأصير عار لهم .. وودي أقول لأ .. لأن كل اللي قاعد يصير أنا مجبوره فيه ..
احترت .. وأخاف أندم على أي قرار أتخذه بـ هالثانيه ..
/
.
/
طلعنا من عند القاضي ومشينا للسياير ..
طالعني عزام وهـ المره ما قال مبروك .. حمدت ربي ان سكوتي أمس أثر فيه ..
أحمد باس عزام وقال له : مبروك ..
حسيتها طلعت من قلب أحمد .. بسسسس ليييش يا أحمد .. أنا أعرفك تكره عزاااام من اللي سواه ..
صد علي أحمد وقال : مبروك يا عروووس ..
قلت بدون نفس : الله يبارك في حياتك ..
ومشيت بسرررعه للسياره ...
طالعت عزام وأحمد يتكلمون .. سكتت وقعدت في السياره مديت يدي للمسجل أشغل البث المباشر وااايد أحسن لي ...!!
ما مرت دقايق الا وأحمد ركب مبتسم ..
طالعته مستغربه وقلت : أشوووفك مستانس ..؟؟
أحمد قال وهو يضحك : لا بس تذكرت سااالفه ..
قلت باستغراب وأنا أرفع حياتي : هي ..!
أحمد حرك سيارته ولحق سيارة عزام ..
طالعت أحمد وقلت : ليييش لاحقنه ..؟؟ جان عندك شغل وصلني البيت والحقه ..
أحمد هز راسه وقال : لأأأ ما عندي شغل ..
قلت : انزين لييش ساير من هالدرب ...؟؟
أحمد : عزام عازمنا ع الغدا ..
قلت وأنا مستغربه : ومنو قااال ..؟
أحمد : هو طلب مني وما قدرت ارده ..

حينما أريد إضافة رد ’ يمنحني خيآرآن
إرسآل الرد أو معآينة المشآركة ..
تمنيت لو كآن ..~ يتوفر في الحيآة خيآر [ المعآينه ] هذآ ,,
حتى نستطيع تعديل مآ يمكن تعديله
وحتى نستطيع تدآرك كثير من الأمور ,,
لكن الحيآة لآ توفر إلآ خيآر الإرسآل والإسترسآل ..
ثم يبدأ / آلندم ..!