منتديات بنوته - عرض مشاركة واحدة

02-07-2012, 10:26 PM

سليمان : غادة مي مسوية عزيمة بنات عشان تدق عليك..

العزيمة كبيرة رجال وحريم وعمي يدق على الرجال ومرة عمي على الحريم .. هي اش دخلها

ساره بدت تنزل دموعها : اي خلاص علمتك شلون تتكلم !! صرت تتكلم باسلوبها الراقي .. ان مالي أم يدقون عليها ..

يصير خلاص أجي مثل الشحاته يعني !! المفروض يقدرون وضعي ويدقون علي مخصوص لأن عارفين إن مالي أحد .. وصارت تبكي بقوة

سليمان : والله ياساره إنتـي مكبرة الموضوع يعني مافيها شي لو جيتي

وخليتي الأوضاع بينكم تتحسن ..

ساره وهي وصل حدها من البكى وقالت : مـــ ـــ ــابي أروووووح .. مابي الأوضــ ــ ــاع تتـ ـ حسـ ــ ن

مابيهـــ ـــم مايهموني زي ما إني ما أهمهـــ ـم ومايبوني

سليمان : خلاص يصير لا ... ...

" سليمـــــــــــــان !! "

صرخة قوية طلعت من فم فهد ألجمت لسان سليمان وخلته يسكت ..

التفت فهد لساره وقالها بحزم : ساره روحي غرفتك

قامت ساره وهي تبكي وأسرعت لغرفتها

انتظر فهد لين سمع صوت بابها انصك والتفت لسليمان بكل عصبية ونظرة صرامة وقال :

" شوف ياسليمان ..

ترا دموع ساره وحزنها وألمها وسعادتها هذي أمانة بأعناقنا كلنا

وصانا أبونا عليها بساعة احتضاره !

أنا مو مستعد أشوف دمعة بعيونها ولا حزن بقلبها .. ونكون إحنا الي متسببين فيه .. !

وغاده هذي من صغرها مسببة الأحزان لسارة لين كبرت وكبرت مشاكلها

وفتح عيونه بعصبية أكثر وهو مولع حده وقال : وقسم بالله ياسليمان لو عاد تمشكلت مع ساره مره ثانيه عشان غادة .. مو حاصل طيب !.. والله مني تارك أحد بحاله وهو يتسبب بدموع ساره .. !

وخبط الطاولة بكل قوة وقال : حتى لو كنت إنت ياسليمان !!

وقام ومشى للباب وهو يقول : ومحد رايح للعزيمة .. اتفضل روح إنت لحالك

وطلع وخلا سليمان منكوي بصمته

خالد كان منقهر من سليمان فقام وجا بيطلع يروح لمازن .. وهو طالع ناداه سليمان ..

خالد : هلا ..

سليمان : الحين وش أسوي

التفت خالد عنه وقال : سوي الي يمليه عليك ضميرك

وطلع وخلاه ..

اتنهد سليمان من قلبه وحزن على الي صار ورحم ساره .. انقهر من نفسه ..

وبهاللحظة دق جواله باسم " حياتي أنا " يعني إن غادة المتصلة ..

انقهر يوم شاف الاسم وحط نو بوجهـها ..

شوي الا رجعت دقت مره ثانية .. راح حط نو مره ثانيه وقفل الجوال ..

ترك الجوال وطلع لين غرفة ساره ..

وقف شوي عند الباب بعدين دق الباب .. ماسمع جواب ..

راح فتحه بشويش ودخل .. ونادى قبل لا يدخل : ساره !

ماسمع رد

فتح الباب كله ودخل .. طالع بالغرفة مالقى أحد ولقى بابا بلكونتها مفتوحة

مشى لين البلكونة ودخل

لقى ساره قاعده على كرسي قدام سور البلكونة وحاضنة صورة

ودموعها تنزل بصمت

انتبهت لسليمان .. ولفت وجهـها عنه

جا سليمان عندها وووقف وراها ومسح شعرها بإيده وهو يقول: ساره .. معليه حبيبتي أنا آسف ..

ماردت ساره

سليمان : معليه ساره يمكن غلطت بكلامي ولا جرحتك .. بس والله أنا كانت أمنيتي إن العلاقة تتحسن بينك وبين غادة .. لأن اثنينكم مهمين بالنسبة لي

ساره حست بغيظ من غادة شلون استحلت هالشرسة قلب أخوها الطيب ..

التفتت لسليمان الي انبته انها لامة صورة بإيدها ..

مسكت ساره الصورة بإيدها ومدتها لسليمان وهي تقول :

شف ذولا ... والله مايرضون على الي تسويه فيني !!

أخذ سليمان الصورة وطالعها وانذبح قلبه !

شاف صورة لأبوه وأمه قاعدين سوا وأمه مبين حامل بسارة لأن تاريخ الصورة بعد ولادة خالد ..

طالع بعين أمه الي كانت متلهفة على جية ساره ..

ومتحلمة أحلام كثيرة تبي تحققها لها

وطالع بعيون أبوه واتذكر وصاياه لهم عشان ساره

وانعصر قلبه وحس العبرة خانقته

ورفع عينه لساره وهو يقول بصوت مخنوق : أمانة ساره سامحيني

ساره بصوت باكي : سليمان انت اخوي مستيحل أزعل منك ..

بس أزعل لا حسيت انك تبدي غادة وتفضلها علي ..

سليمان بكل ألم : مستحيل ياساره .. إنتي أختي وغالية علي ومستيحل أبدي أحد عليك .. وقرب منها وهو يبتسم لها و قال : وانا تحت أمرك الحين تبيني أروح العزيمة ولا لاء !

سكتت ساره وهي الود ودها انه مايروح وينقطع عن هالبيت نهائي وينمحي اسم غاده من حياته لكنها قالت : على راحتك ..

سليمان : طيب ولو رحت ماتزعلين !

لفت ساره وجهـها عنه وقالت بهمس : لا ..

سليمان : طيب .. يلا مابي دموع سوسو خلاص .. يووه لو تشوفين شكلك بالمرايه يخرررررع !

مسحت ساره دموعها والتفتت لسليمان وابتسمتله ابتسامة باردة غصب ..

قرب سليمان ايده لخدها وقرصها بشويش وهو يبتسم لها وقال : يلا سوسو أنا طالع تبين شي !

ساره : لا مشكووور ..

سليمان وهو يمشي : زين .. مع السلامة

ساره بهمس : مع السلامة

وطلع سليمان لوين ما غادة ميته بقهرها وزعلها ..

تابعوووووني