منتديات بنوته - عرض مشاركة واحدة

02-06-2012, 09:24 PM

عند فيصل

قام على على صوت اذان المغرب فاته صلاة العصر قام توضاء وصلى صلاة العصر بالبيت وطلع للمسجد صلى المغرب رجع لجداته لقاهن جالسات يتقهون المغرب

قرب منهن وجلس / يمه ليه ماقومتيني اصلي العصر صليته بالبيت

ام جاسم / كان عندنا حريم يزورن جداتك وانشغلت معهن ماطلعن الا مع اذان المغرب

فيصل / صبي لي فنجال قهوة يعدل راسي

ام جاسم مدت له الفنجال وهو اخذه منها

عند جاسم

وصل البيت لقى امه وجداته ومعهن فيصل يتقهون قرب منهن باس راسهن وقف له فيصل سلم عليه من غير نفس وطالعه بنص عين مستحيل ينسى الي سواه شي كبيرررر دمر نفسه ممكن ياسامحه بكل شي الا الي بنيته بتدمير هند ويكون سبب بكسرها واذلالها طالعه باخوه نظرات احرقت فيصل كلها عتب ولوم

جاسم عيونه تنطق / ليه يافيصل اوجعت اخوك لهدرجه مشاعري مالها قيمه عندك المشكله انك عايش حبي يوم بيومه وشاركتك بعذابي
بدمرها وانت تعرف اني مجنونها نسيت وش بيصير في اخوك لو تدمرت وانذلت مستحيل ارضى عليها واله لطلب منهم يحبسوني وهي تعيش برى مستحيل ارضى براحه وهي تعيش بالعذاب معقوله ما فكرت فيني ونساك كرهك لها وانتقامك منها اخوك الموجوع
مستحيل اسامحك كله ولا هند يافيصل كله ولا هند

فيصل فهم نظرات اخوه ونزل عيونه نظراته احرقته اول مره اخوه يشيل عليه هالكثر تاكد انه يبي له وقت علشان يسامحه

ام جاسم / شلونك جاسم وش هالسفره المفاجئة
جاسم بتعب / بخير شلونك كنت بشغل يالغاليه خلصته على طول جيت

ام راشد / اطلع لغرفتك ارتاح وجهك تعبان

جاسم بتعب / بصلي العشاء وانام لو بنام الحين ماني بقادر انام بالليل

ام جاسم صبت القهوة لجاسم اخذت الفنجال منها شربه
وعيونه تسرق النظرات لاخوه وفيصل يتهرب من نتظرات اخوه القاتله

في بريطانيا
عند فهد

قبل العشاء بغرفته يكشخ طلع لقى غاده محتاسه قدامها اوراق وكتب

فهد / غاده تعالي معنا نتعشى وترجعين

غاده وعيونها بالاورق وتاشر عليهم بالقلم
/ ماتشوفني محتاسه الي مستغربته شلون ندى وافقت تطلع معك وعندنا امتحان طويل

فهد / غاصبها على العشاء

غاده بعتاب / حرام عليك بعدين يضعف مستواه ويقولون بسبب فهد الي اشغلها عن دراستها ترها كل سنه تنجح بتفوق

فهد / كلها ساعه نتعشى وبرجعها خليتيني مجرم

غاده بجديه / انا اختك وفاهمتك لكن غيري مايفهمك
فهد / بطلع لا اتاخر عليها ونتاخر برجعه

طلع من الشقه ركب سيارته وصل لبيت ارسل لها رساله يطلب منها تطلع له دقايق شافها طالعة تمشي بحركات بطيئة وصلت لسياره فتحت الباب جلست جنب فهد

ندى / السلام

فهد بابتسامه / وعليكم السلام ابي افهم ليش تتهربين مني كله علشان بوسه على خدك شلون لو تعمقت

ندى بحياء / فهد ارجوك ارحمني من حركاتك الجريئة اذا كانت عندك عادي فعندي غير عادي راعي اني استحي

فهد بابتسامه خبيثه / اوعدك ما ضايقك بحركاتي الحين لكن بعد الزواج مالك كلام علي بسوي الي براسي

ندى وجهها ولع حرارة حمرت خدودها
ندى / .........

فهد بابتسامه / اختاري أي مطعم تبين نتعشى فيه

ندى بابتسامه خجوله / على ذوقك

فهد بابتسامه / وش رايك بالمطعم الي تعشينا فيه ليلة ملكتنا

ندى / خلاص نتعشى فيه وبنرجع بعد ساعه
فهد بابتسامه / من الحين تحددين الوقت متى ما تعشينا يصير خير يمكن تعجبك الجلسه وتطلبين انك تجلسين اكثر

ندى بابتسامه / تراك للحين ماحركت سيارتك

فهد بابتسامه / شوفتك نستني

حرك سيارته وصلو للمطعم طلبو اكلات بحريه تعشو وجلسو شوي يسولفون وبعدها طلعو من المطعم وصل ندى لبيتها ورجع لشقته دخل الشقه شاف الصاله خاليه والاوراق ولكتب منثوره على الطاوله

دخل غرفتة غاده شافها غاطه بنومها طلع وقفل الباب بهدوء دخل غرفته غير لبسه ببجامه دخل سريره ونام

في الطائف
عند محمد

دخل لقى امه جالسه وحيده بالصاله قرب منها باس راسها وجلس

محمد / ليش صاحيه ما نمتي
نوره / انتظرك

محمد / خير يالغاليه

نوره بعتب / يوم انك تبي بنت خالك من زمان
ليش كاتم هالشي بنفسك طول هالفتره ماقلت لي

محمد / يالغاليه خايف انك ترفضين وهند قريبه منك تعرف شلون تقنعك طلبتها وسيط لي عندك

نوره بحب / متى بين الولد وامه وسيط

محمد / السموحه اذا كان الي سويته زعلك كان عن حسن نيه مني

نوره بحب / ما زعلت عليك انك توسطت بهند انت تعرف انها بنتي مثل مانت ولدي
الي مزعلني ومعور قلبي انك تعاني من غير لا تشتكي وتقولي

محمد / الا على طاري هند وينها ما شفتها من اليوم

نوره بابتسامه / اختك عند خالك ما قدرت تصبر من غير ماتتصرف بموضوعك ماتبيك تتوجع اكثر

محمد بابتسامه خوف / الله يستر من رد خالي ويو وعدتني ماترجع الا برده معها وخايف رده يكون الرفض

نور بابتسامه / تطمن مدام هند استلمت الموضوع تاكد بتجي ومعها الموافقه

محمد / يارب انا طالع لغرفتي يالغاليه بنام تعبان من الفجر صاحي

الرياض
عند هند

جالسه بالصاله اطالع بالتلفزون بعد ماطلعت خديجه لبيت اهلها وطلع خالد لبيته
دخل عليها خالها وجلس جنبها

بدر بحب / الساعه المباركه انك جينينا وفرحتيني بنومك عندنا الليله

هند بحب / وانا اسعادتي اكثر

بدر / شلونه عبالرحمن ونوره وخوانك

هند / كلهم طيبين وابشرك فهد تملك

بدر بزعل / تملك ولا حد قالي ولا احد عزمني تعتبروني غريب

هند بحب / خالي ملكته برى ما حضرها الا خالي وخالتي وبالزواج نحتاج وقفتك معنا

بدر / الله يوفقه ويسعده

هند بتردد / خالي فيه موضوع بفاتحك فيه وخايفه من ردت فعلك

بدر / قولي اسمعك

هند برتباك / وش رايك بمحمد اخوي

بدر بحب / رجال والنعم فيه

هند بجديه / خالي الكلام الي بقوله لك ابيك تحكم عقلك قبل عاطفتك

بدر بخوف / قولي جعله خير

هند / خالي الموضوع مايخوف محمد من يومين كلمني يبي يخطب بنتك حنان انا كنت رافضه لان حنان بزر

بدر مستغرب متفاجئ مصدوم / حنان مثل ما قلتي بزر كبيره عليها مسئولية الزواج

هند بجديه / خالي انا ناقشت محمد بالموضوع وانا معك برايك لكن محمد يقول بيملك عليها والزواج لتخرجت من الثانويه

بدر / اخاف يندم لتزوجها

هند بجديه / خالي محمد يعرفها من يوم صغيره وهو شاريها لا تبيعه وهو شاري بنتك والله لوشاكه 1% ان محمد مو كفو ما سعيت وتعنيت وفاتحتك بالموضوع كان سكرته اول مانفتح
البنت مصيرها تتزوج لا تفرط بمحمد وهو تربية يدك وتدري وش وراه

بدر باقتناع / على بركة الله بشاور البنت وامها والله يقدم الي فيه خير

هند / خالي قول رايك انت رافض محمد زوج لبنتك

بدر بجديه / فيه رجال عاقل يرفض زوج لبنته مثل محمد والله لولا عمرها كان غصبتها عليه لكن مدامك قلتي ملكه وبعدين الزواج ماعندي مانع

هند بابتسامه / محمد ينتظر ردي على نار طالبتك ياخالي حاول بخالتي وحنان والله انه يحبها وحبه انزرع في قلبه من يوم كانت صغيره

بدر / بحاول يا بوك الابو يدور الستر لبنته مع زوج يخاف الله فيها

هند بجديه / خالي متى تعطيني ردك النهائي مستحيل ارجع لطائف من غير ما ترد علي اتمنى يا خالي تكون الموافقه ولا تكسر قلب ولد اختك تراه مهموم ومتضايق خايف انه يرفض
بدر بحب / بكره ان شاء الله بتسمعين رد حنان وامها انا عني موافق يابوك محمد ولدي مستحيل اكسر قلبه

هند / خالي تعشيت ولا اقول لشغاله تحط عشاء لنا

بدر / لا ماتعشيت قولي لها تحط العشاء

قامت هند ودخلت وطلبت الشغاله تجهز العشاء وتحطه على الطاوله رجعت لخالها وقام معها تعشو ورجعو لصاله

بدر بحب / يا بوك انتي راعية البيت وانا من الفجر صاحي بطلع لغرفتي انام
اطلعي لغرفة الضيوف نامي وارتاحي من جيتي سوالف مع خالتك مانمتي

هند بابتسامه / جلست خلتي ما تنمل خذتنا السوالف ولا حسينا بالوقت

وقف بدر / اجل انا طالع بنام
طلع بدر لغرفته

وهند دخلت غرفة الضيوف دخلت الحمام اخذت شور ولبست بجامه ودخلت وتمددت على سريرها تذكرت مصيبة فيصل تبي تتاكد وش سوى نواف مع البنك
رفعت جوالها طلع لها خالد شريحه بنفس رقمها الاولي اتصلت

عند خالد

كان منسدح على سريره سمع صوت جواله رفعه شاف رقم هند رفع الجوال

خالد بابتسامه / وش هالازعاج

هند بجديه / اتصلت بذكرك انك تتصل على نواف وتشوفه وش سوى مع البنك

خالد / اخاف نايم الوقت متاخر

هند / جرب مراح تخسر شي

خال / طيب

عند نواف

كان منسدح على سريره والجوهره بالصاله تحاول تنوم بنتها سمع صوت جواله شاف رقم خالد رفع الجوال

خالد / الو

نواف / هلا خالد

خالد بجديه / بشر نواف سددت ديون فيصل للبنك

نواف بجديه / ايه بعد ما طلعت هند من عندي طلعت للبنك وكل شي تمام

خالد / هند مانامت بسبب هالموضوع توها متصله تبي تطمن وش الي صار

نواف / اشكرها بالنيابه عن فيصل

خالد / يوصل يله فمان الله مابي اطول عليها وهي تنتظر ردي واسفين انا تعبناك معنا

نواف / الله يفرج كربتها مثل ما فرجتها عليه

عند خالد

سكر من نواف واتصل على هند طمنها ان كل شي مثل ما تبي وان نواف سدد ديون فيصل ارتاحت

عند هند

بعد ما قفلت الجوال من اخوها حطت راسها على المخده وسمحت لدموعها بالنزول وجع بقلبها وروحها كلها بسبب جاسم والي سوته بجاسم وشكل ربي انتقم لجاسم انزرع حبه بقلبها غصب عنها حاولت تنظف قلبها من حبه تلقاه كل يوم يكبر وخايفه من نتيجة هالحب الي بسببه تتصرف بضعف

دموع حسره على خداااها تحاول تكابر على اوجاعها

هند في نفسها / مستحيل اخضع واضعف الحب ضعف ودمار مافيه شي بالدنيا اسمه حب حتى اذا حبيت
بخفيه عن العالم لو بداخلي اتوجع مافيه فايده من ورى حب وصااااااااااارت تبكي وتنتحب
افرح فيني يا جاسم هند تبكي حبك لو تدري كان دمرتني لاني ضعفت وصرت مثل امي ااااااااه يمه كنت اهرب اني احب مثل حبك لراشد والومك ان رجال قدر يملك قلبك وحطمك حتى بعد الي سواه متي وانتي تحبينه صرت احبه ولد اخوه اكثر من حبك لراشد لكن مستحيل اكون ساره واستسلم لحبي والله ارمي قلبي وادوسه اذا بيدمرني وصير نسخه من امي
ااااااااااااااااااااااااه والحل مع وجع كل ليله بالنهار مرتاحه من التفكير ماصرت انام بسبتك ياجاسم اكيد داعي علي وربي استجاب دعوتك
مستحيل اسمح لرجال يكون سبب لدموعي خلاص يا هند شيليه من قلبك وتفكيرك مستحيل تكونين لجاسم ولا يكون لك عمر الي انكسر ما يتصلح
ورجعت تبكي بوجع وانين دفنت وجهها بالمخده تتصارع مع افكارها الي رافضه تتستلم لحبه والي معذبها حبه وذبحها غرورها وكبريائها انها تخضع او تضعف بسبب رجال
نامت وهي موجوعه مثل كل اليالي

في بيت ام جاسم

الجدات وام جاسم يتعشون على الارض بالصاله
فيصل / يمه متى تبن تروحن لديره
ام جاسم / شوف جداتك متى خاطرهن يرجعن لديره
ام راشد / اذا فاضي نسافر بكره

فيصل / اجل خليها بكره بالليل اخلص اشغالي وافضى لكم
ام موضي / جعلك سالم

وقف جاسم غسل ايدينه من بعد العشى وطلع لغرفته لحقه فيصل دخل الغرفه شاف جاسم منسدح بسريره يتجاهل يلتفت عليه قرب فيصل من جاسم وجلس على طرف السرير

فيصل / جاسم طالبك لا تعذبني بصدك عني وتطنيشك لي

جاسم بقهر وعصبيه / وش بينفع التطنيش وفيه مصيبه ننتظرها

فيصل / المشكله وانحلت وكل شي رجع مثل اول واحسن

جاسم بسخريه / ليكون السماء تمطر فلوس واخذت الفلوس وسددت الديون الي بالمليارات

فيصل / اتكلم من جدي لا تتمسخر علي
جاسم / وكيف انحلت يالفالح

فيصل / يا طويل العمرنواف جاه واحد فاعل خير شارط مايقول لنا عن اسمه وهذا كان شرطه علشان يسدد ديوني

جاسم بجديه / وش ضماناته علشان يسدد ديونك وهو متاكد انك مستحيل ترجعها له لان المبلغ فوق امكانياتك ومكانيتي بكثير

فيصل / ماله أي ضمانا سددها لوجه الله

جاسم بعصبيه / انت خبل ولا تتخيبل علي من الي بيدفع مليارات علشان سواد عيونك خل المتكلم مجنون والسامع عاقل

فيصل بجديه / والله هذا الي صار وانا مثلك ماني بمصدق وللحين ماني بمصدق حاولت في نواف اعرف من هو لكن راسه يابس رافض يقولي اسمه يقول انه حالف قدامه مايقول لنا اسمه
جاسم بجديه / ليش رافض وشارط على نواف ما يقول لنا عنه اكيد احنا نعرفه ولا يبي ينكشف لنا لكن وش هي اسبابه
بكره بقابل نواف وبغصبه يقول لي منهو الي ساعدك خايف ورى مساعدته مصيبه

فيصل بجديه / وش مصيبته وهو بيحمي شركاتي من الافلاس وبيحميني من السجن لا تصير شكاك

جاسم / الكلام الي تقوله مستحيل اصدقه ان واحد يسدد مبلغ بالمليارت بدون مقابل

فيصل بحب / اتركنا من كل هذ طالبك ياخوي تسامحني

جاسم بوجع / لو قلت مسامحك اكذب عليك قلبي موجوع منك ومن تصرفاتك المتهوره كنت اكره صفة الانتقام بهند انتقلت لك
شلون طاوعك قلبك بتكسر وتذل اخوك الي بتسويه فيها بيصيبني اضعاف اضعاف الي بيصيبها نسيت اني مجنونها مافكرت بوجع اخوك وهو يشوف حبيبته مرميه بالسجن مكسوره ذليله اكسرني ولا تكسرها ذلني ولا تذلها والله الي ناوي تسويه قوي كثير لو الي خططت لها صار بتموتني بايدك ياخوي ماقدر اسامحك عليه

فيصل بحزن / جاسم الي خايف منه ما صار واوعدك ما تعرض لبنت عمك لا من قريب ولا من بعيد

جاسم / مسامحك لكن والله ان ضريتها ولا نويت بتشوف مني شي ما يرضيك وما تتوقعه مني اترك بنت عمك بحالها

فيصل / توبه والله توبه ندمان قد عدد شعر راسي معاناتي باليومين الي فاتت خلتني اندم على تهوري

جاسم بتعب / قومن لسريرك تعبان بنام من يوم مصيبتك ما نمت

قام فيصل دخل سريره وهو ندمان انه سبب الوجع لاخوه حقده على هند اعماه
ارتاح ان جاسم سامحه ووعد نفسه انه يبعد عنه هالتهور والتصرفات المجنونه حط راسه على مخدته ونام

جاسم انسدح على سريره وتفكيره فيها وينها وش قاعده تسوي

جاسم في نفسه بوجع / وينك فيه نمتي ولا باقي نفس التوقيت ولا ببلد غير وتوقيت غير مبروك عليك الصفقه والله نفسي انك تسمعينها مني لكن يا خساره
قولي يا روح جاسم ووجعه تذكريني ولا تعتبريني ذكرى مشئومه اشتقتي لايامنا سوى ولا تعتبرينها اسوء الايام الي مرت بحياتك ااااااااااااااااااه طالبك كلميني اشتميني بموت واسمع صوتك ليش مستكثره علي تكلميني بجوالك ويكون رقمك عندي حتى رقمي كرهتيه مثل ما كرهتيني ارحميني صابني مرض العاشقين الي نهايتهم الموت يرضيك اموت بسبايبك

غصب عنه دمعت عيونه بوجع متى لضيقتي من فرج متى يكون لاوجاعي وهمومي نهايه اخاف النهايه بموتي

قام من سريره وفتح شباك غرفته زادت اوجاعه اوجاع وهو يرجع بذكرياته يوم نامت عندهم يوم شوفتها جننته من غير شعوره نزل لكن مسك نفسه باخر لحظه رفع راسه ودعاء ربه وحرارة الدموع على خده يارب حبها بلاني فامسح حبها من قلبي

يبي حبها ينشال من قلبه لانه متاكد من المستحيلات ترجع له ماعاد يقدر يصبر على اوجاعه

في الرياض
في بيت بدر

رجعت خديجه وعيالها وبناتها من بيت اهلها العيال اجلسو بالملحق يبون هند تاخذ راحتها بالبيت
والبنات كانو مشتاقات يشوفن هند ويجلسن معها لكن انصدمن يوم شافن الصاله فاضيه تاكدن انها نايمه يحبنها و يعتبرنها اخت لهن اطلعن لغرفتهن

خديجه دخلت غرفتها وبدر متسند على سريره سرحان التفكير مطير النوم من عينه خاف يتسرع ويوافق ويظلم بنته وخاف يرفض محمد ويندم

قطع عليه افكاره خديجه / وش فيك سرحان دخلت الحمام وغيرت ملابسي ولا حسيت فيني قول وش شاغل تفكيرك

بدر / موضوع مصيري مدري اوافق عليه ولا ارفضه

خديجه بحب / قولي بساعدك بقرارك
بدر / اكيد لازم اقولك الموضوع يخص بنتك ورايك مهم مثل رايك

خديجه مستغربه / وش علاقتها بنتك

بدر / جاها خطيب ماينتفوت والي مخليني ارفضه انها صغيره على الزواج

خديجه بجديه / منهو الي خطبها

بدر / محمد ولد عبدالرحمن ولد اختي نوره

خديجه بفرح / وافق عليه الواحد يدور الستر لبناته ومحمد مجنون الي يرفضه تربى قدام عيونا وبنتك بسم الله عليها ما ينخاف عليها فاهمه وعقلها اكبر من عمرها تضمن لرفضت محمد يجي لبنتك احسن منه

بدر / لا العلم عند ربك

خديجه بجديه / اجل توكل على لله ووافق وربي يسعدها

بدر بجديه / اخذي راي بنتك
يمكن ترفض ومستحيل اغصبها على محمد

خديجه / بتوافق اتركها علي

بدر / هند مستعجله تسمع ردي ووعدتها اعطيها الرد بكره ويبون الملكه بسرعه

خديجه / اجل طالعه لها الحين انتظرني لا تنام

طلعت لغرفة بناتها نادت حنان تكلمها بانفراد كلمتها بالموضوع رفضت بالبدايه وباصرار امها واقناعها وافقت طلبت الزواج بعد ما تتخرج وشرطها تكمل دراستها الجامعيه اذا وافق وافقت على الملكه اذا رفض يدور تيتزوج غيرها مستحيل تتنازل عن شرطها روحها متعلقه بدراسه

حنان رجعت لخواتها وامها دخلت غرفتها لقت بدر ينتظرها على نار

بدر بحماس / بشري
خديجه / الي تبيه بيصير وافقت وشرطها تكمل دراستها

بدر / خلاص بكره بعطي الموافقه لهند والشرط بقوله لها قبل الموافقه اهم ماعندي بنتي مابي تحس اني مرخصها لهم

خديجه / تطمن بيوافقون على شرطها وبيشجعونها

بدر / الله يكتب لها الصالح

تمدد على سريره من التعب نام