منتديات بنوته - عرض مشاركة واحدة

02-06-2012, 08:29 PM

في بريطانيا

بعد ما خلص الغداء والسوالف مع صلاح دخلو مطبخه ينظفون الصواني جلس يسولف معه لساعه ست قرر يرجع لشقته

طلع من عند صلاح دخل الشقه واضح ان غاده للحين نايمه طق عليا الباب ما سمع صوت تاكد انها نايمه

دخل غرفته وانسدح على سريره وصار يفكر بالي طلبه صلاح نفسه يكون صلاح زوج لغاده ومستحيل غاده بترضى فيه لان قلبها ملك غيره وهو بتفكيره نام

عند غاده

صحت على صوت جوالها شافت رقم ندى رفعته وبصوت ناعس

غاده / الو

ندى / شكلك نايمه ازعجتك

غاده / كم الساعه الحين

ندى / صح النوم الساعه 8 بالليل

غاده / معقوله كل هذا نوم

ندى / شكل ما صليتي صلواتك

غاده / لا الحمدلله صليتهم اصلي وارجع انام موقته جوالي على وقت الصلاه باقي صلاة العشاء بقوم اصليهم

ندى / اجل بسكر لخلصتي صلاتك كلميني

غاده / طيب يله فمان الله

ندى / فمان الله

دخلت الحمام اخذت شور ولبست بجامه شتويه صلت العشاء اخذت جوالها وطلعت لصاله كانت فاضيه ومرتبه دخلت المطبخ تسوي شي تاكله فتحت الثلاجه لقت عصير برتقال صبت لها كاس تنتظر فهد يقوم تطلبه يجيب لها عشاء خفايف انتبهت لصواني نظيفه ومحطوطه على جنب

غاده تبتسم / فديتك فهودي

طلعت بكاسها لصاله شغلت التلفزون شافت فلم اجنبي شدها وجلست اتابعه سمعت صوت جوالها شافت اسم ندى ضحكت انها نستها

غاده / ههههههههه تابعت فلم ونسيتك

ندى / الحين م افارق جوالي يدي انتظرك وحضرتك تقولين ناسيتك هين ياغدويووه

غاده / اسكتي طفشانه جالسه بروحي بالصاله فهد نايم وجوعانه انتظره يصحى يجيب عشاء لي

ندى بفرح / طيب اش رايك امرك ونمر مطعم نتعشى ونرجع

غاده / فهد بيرفض لاني اليوم عندكم وش رايك تجيبين عشاك عندي وبصرف فهد عند صلاح شقته مقابل شقتنا

ندى / والله فكره نسهر مدام ما عندنا محاضرات بكره

غاده / يله انتظرك لا تتاخرين

ندى / بتاخر شوي بجيب لك عشاء على ذوقي

غاده / مع السلامه بصحي فهد يروح عند صديقه

سكرت من ندى وطقت غرفة فهد لما ماسمعت رد دخلت لقته نايم

قربت منه وصارت تهزه / فهودي قوم بيجيني ضيوف قوم

فهد / اممممممم

غاده / يوه قوم ندى بتجيني

فز فهد لما جابت سيرة ندى تفاجئت غاده من ردت فعله

فهد / من قلتي بيجيك

غاده وعيونها مانزلت من فهد / ندى

فهد مستغرب / متاكده

غاده تبتسم / تحبها

فهد تفاجئ / اه لا

غاده / هههه فهودي كبر وصار رجال وصار يحب

فهد ضربها على راسها / تكلمين بزر انا رجال من يوم طلعت من بطن امي

غاده بحب / يبختها ندى فيك

فهد بخوف / اخاف ترفضني واتحطم

غاده / البنت تحبك اكثر من حبك لها

سحبها وجلسها جنبه على السرير / قولي شلون عرفتي

غاده / بعدين البنت بتجي الحين وانا قلت لها بصرفك عند صلاح

فهد / مايصلح اجلس معكم

غاده بعصبيه / اقول قوم تقلع لصديقك مابقى الا ذي

فهد بحماس / طيب قولي لي شلون عرفتي انها تحبني

غاده وهي تحرك حواجبها / فراسه وبحزن

كملت / اسئل مجرب ولا تسئل طبيب

فهد حس بنبرة الحزن بصوتها / لو تقدم لك واحد بتوافقين عليه

غاده بحزن / اكيد برفض الزواج لاني اذا تزوجت بظلمه وبخونه لان قلبي بيكون ملك غيره لاني مستحيل اتزوج وقلبي للحين ملك فيصل ما يندى يمكن الايام تشيله من قلبي على ان حبه بقلبي صاير مثل الوسم مستحيل ينشال

فهد / الظاهر مكتوب علين نحب اخاف ينكتب لحبي الفشل وعيش معانتك

غاده / لا ان شاء الله اذا جت ندى الليلة بفاتحها بالموضوع اذا شفتها موفقه كلمت خالو واقنعته تصير ملكتكم وانتم تدرسون

قرب منها وضمها بقوه / وربي لو صار الي تقولينه مطلع من جزاك والي تبيه اسويه ولو على قص رقبتي

غاده بحب / الي ابيه اشوفك مبسوط وعايش مع الي تحبها يله بسرعه اطلع قبل لا تجي وباذن الله ابرد قلبك بردها

فهد / يارب بقعد على اعصابي لين تروح وبنتظر ردها على احر من الجمر

غاده / عني ضامنه الموافقه حط ارجولك بمويه بارده

قام من سريره / يارب يكون كلامك صحيح

دخل الحمام ولبس وطلع لشقة صلاح وهو قلقان ومتوتر

بعد ربع ساعه من طلعت فهد وصلت ندى ومعها الاكل بيتزا جلسن ياكلن ويسولفن بعدها طلعن لصاله وكملن سوالف وضحك

غاده / ندى وش رايك بفهد اخوي

ندى وجهها حمر من الحياء / مافهمت ليه هالسؤال

غاده / ندى انا كاشفتك تحبين فهد وهو يحبك

ندى بتهرب / غلطانه من قال اني احب بدري على هالسوالف

غاده / انا مجربه الحب ومكتويه بنار ومعذبني الشوق والحرمان

ندى مستغربه / انتي تحبين

غاده / سالفتي طويله وكل الي فيني بسبتي لا تعيدين الي سويته والحين اندب حظي وندمانه قد شعر راسي فهد شاريك ويبيك زوجه له وقبل كل هذا يعشقك لا تصيرين غبيه مثلي

ندى بحياء / انا احبه ويمكن اكثر من الحب لما اشوفه مدري وش يصير فيني خفت يكون حب من طرف واحد

غاده بجديه / اذا موافقه على فهد بيتقدم رسمي معه خالو يخطبونك من ابوك والملكه وانتم تدرسون والزواج بعدين قولي رايك لان فهد على نار ينتظر ردك

ندى بصدق / موافقه لاني ماتخيل اني اصير زوجه لغير فهد

قربت منها غاده وضمتها بحب / الله يوفقكم ان شاء الله برسل رساله لفهد اطمنه تلقينه احترق

ندى نزلت راسها مستحيه

في شقة صلاح

فهد من يوم دخل شقة صلاح وهو على اعصابه صلاح يسولف معه ولا يدري وش يقول انتبه صلاح لشروده

صلاح / وش فيك متوتر الي يشوفك يقول بتخطب

فهد / وهذا الي صاير

صلاح / قول الي عند لا تتكلم بالقطاره

فهد / ندى عند غاده بشقتنا وغاده بتخطبها لي

صلاح / ههههه الي اخبره البنت تنخطب ببيت اهلها مو ببيت الي بيخطبها

فهد / هذا الي صار اخاف استعجلت وانصدم برفضها
قطع عليه كلامه صوت رساله من جواله شاف رساله من غاده فتحها كاتبه مبروك يامعرس وطلعت تحبك ولا بعد تموت فيك و لا تتخيل حياتها من غيرك صدق ماعندها ذوق اول ماقرا الرسالها رجع وقراها اكثر من مره مو مصدق

لما تاكد فهد ضم صلاح وبصراخ /صلااااااااااااح وافقت تحبني يا صلاح ماني بمصدق كنت فاقد الامل

صلاح / خنقتني بعد عني يادب مبروك لها اشرف وتصلي شكر انك تقدمت لها من الي بتحصل واحد يخطبها مثلك

فهد / كاني اشم ريحة طنازه بكلامك

صلاح / وانا اقدر

فهد / يكثر فرحتي يارب يتمم كل شي ويتمم فرحتي انا مرتاح لان غاده متكفله بالموضوع

سمع صوت جواله شاف رقم محمد اخوه

فهد / هلا وغلى بو حميد

محمد / بعد ساعه عندكم ياليت تستقبلني بالمطار

فهد مستغرب جيت محمد وماله كم يوم راجع

فهد بخوف / صاير شي

محمد / ايه ابو هند مات مع زوجته والبارح دافنينه

فهد منصدم / ابو غاده مات هند درت

محمد / خالد وجاسم عندها بيقولون لها اياني وياك تقول لغاده شي لين اجي تعرف اختك حساسة

فهد / ان لله وانا اليه راجعون

صلاح كان مستمع للمكالمه وتفكيرة بغاده وردت فعلها لدرت عن ابوها يجهل علاقتها بابوها

سكر فهد من محمد وانقلبت فرحته حزن وخوف على اخته

صلاح / هونها وتهون الله يصبرها ويكون بعونها

فهد / اسمح لي بروح المطار اجيب محمد

صلاح / بروح معك ماقدر اخليك تروح بروحك

طلعو من شقتهم ركبو سيارتهم بطريقهم للمطار

بعد ساعه وصل محمد وستقبله فهد ووصلو للعماره ودخلو شقة صلاح

اتصل فهد على غاده يسالها اذا عندها احد قالت لهم ان ندى من زمان رايحه طلعو من شقة صلاح ودخلو شقتهم

عند غاده

بعد ما طلعت من عندها ندى انسدحت على الكنبه تنتظر فهد وهي فرحانه بموافقة ندى

سمعت صوت الباب يفتح التفتت للباب شافت محمد مع فهد فزت وركضت له وضمته

غاده بعدت نفسها عن حضنه/ وش هالمفاجئة الحلوه حمود

عوره قلبه وهو يشوف الفرحه بوجهها / بشريني عنك

غاده / مبسوطه بشوفتك

محمد مسكها بيدها وجلسها على الكنب وفهد جلس من الجهه الثانيه

محمد / انتي كبيره وتعرفين ان الموت علينا حق وكلنا ميتين

غاده بخوف والدموع متحجره بعيونها / ماماتي صار لها شي

محمد يمسح على ظهرها / امك بخير ابوك راشد مات وامس اندفن

غاده بدت دموعها تنزل شلال / من قال لكم بهتم ولا ببكي من متى حسيت ان عندي ابو مراح ابكي عليه وهو متبري مني وزادت نفضة يدها الي ماسكها محمد

واضح عليها التاثر والمكابره باظهار وجعها فهد اوجعه قلبه عليها متاكد انها تتوجع بداخلها سحبها لحضنه

فهد / ابكي لا تكتمين بنفسك

غاده بصراخ هستيري / مراح ابكي تفهمون مراح ابكي وصارت تضحك بهستريا هههههههههه شوفوني اضحك ماني مهتمه

ما فاقت الا بكف قوي من محمد يبي يصحيها من الحاله الي فيها

غاده طالعته بوجع والم وصارت تبكي وتشاهق وطالعت بمحمد نظرات احرقته كلها عتب ولوم

محمد انقهر من نفسه ولي سواه من غير شعور كان يبي يصحيها طالعها لقى خدها احمر من الضربه اوجعه قلبه اكثر عليها

من غير ولا كلمه قامت وهي منكسره دخلت غرفتها وسمعو تقفيل الباب بالمفتاح

فهد بوجع وبلوم / ليه يا محمد كسرتها ليه تمد يدك عليها ما يكفيها الي فيها لا تصدق الكلام الي قالته انه من قلبها هي موجعها من موت راشد تعرفها تكابر

محمد متضايق عليها وحاس بتانيب ضمير على الي سواه فيها وصار يسحب شعر من الوجع على حالها

محمد بوجع / غصب عني ابيها تفيق ما شفت حالتها كانها مجنونه تضحك وتبكي بنفس الوقت

فهد بخوف / اخاف تسوي شي بنفسها وهي مقفله الغرفة عليها

محمد / غاده عاقله وقبل كل هذا تخاف ربي يمكن تبي تختلي بنفسها

عند صلاح

صوتهم كان عالي واصل لشقة صلاح انصدم من كل الي سمعه واوجعه قلبه وهو يسمع الكف ومن بعده اختفى صوتها وسمع فهد وهو يقول انه خايف تسوي في نفسها شي وهي مقفلة الباب عليها بالمفتاح

مافيه صبر قرر يطلع لشقتهم ويطمن عليها

طلع من شقته وطق عليهم وفتح فهد الي واضح عليه الهم والحزن

صلاح / ياخوي وش فيكم صوت صراخكم واصل لشقتي طمني وش صار

فهد / تفضل ادخل داخل

دخل شاف محمد حالته اسوء من حالة اخوه

صلاح بخوف / صاير لختكم شي لما درت عن ابوها

فهد / الله يصبرها مهما كان هذا ابوها